གནས་བདག་མཆོད་ཐབས་བཀྲ་ཤིས་ཆར་འབེབས།

🚧 This website is under continued development. We appreciate your patience!

Previous Text Back to Volume PageNext Text

Wylie title	gnas bdag mchod thabs bkra shis char 'bebs
Location	dil mgo mkhyen brtse bka' 'bum Volume 11, Text 22, Pages 111-117 (Folios 1a to 7b4)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Gnas bdag mchod thabs bkra shis char 'bebs. In Skyabs rje dil mgo mkhyen brtse rin po che'i bka' 'bum, Vol. 11: 111-117. Delhi: Shechen Publications, 1994.
Genre	Protector Rituals - gsol mchod
Deity	gnas bdag

Tibetan Text

Wylie

[edit]

༈ གནས་བདག་མཆོད་ཐབས་བཀྲ་ཤིས་ཆར་འབེབས་བཞུགས། ཨོཾ་སྭསྟི། གཙང་མའི་སྣོད་དུ་གཏོར་མ་དཀར་དམར་དང༌། །ཟས་སྣ་དར་སྣ་འབྲུ་སྨན་སོགས་དང༌། གསེར་སྐྱེམས་དཀར་སྡོན་བསང་དགོས་ན་ཤིང་རྩིའི་དུད་པ་དཀར་གསུམ་ཕྱེ་མར་བཅས་འདུ་བྱས་ལ། རྃ་ཡྃ་ཁྃ། ཨོཾ་ཨཱཿཧཱུྃ་དང་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་ལ། ཀྱཻ། ཆོས་ཀུན་གཟོད་ནས་དག་པའི་མདངས། །ལྷོ་ལྗོངས་སྨན་གྱི་ནགས་ཚལ་ཆེའི། །བྱེ་བྲག་ཡུལ་གྱི་དགེ་བཅུ་དང༌། །ལེགས་ཚོགས་དཔལ་ཡོན་འཁྱིལ་བའི་གཞིར། །གནས་ལ་དབང་བྱེད་ཟོ་དོར་ཆེ། །པདྨའི་ཟབ་གཏེར་སྲུང་མའི་གཙོ། །བདུད་རྒྱལ་ཟུ་ར་ར་སྐྱེས་ནི། །སྐུ་མདོག་ནག་པོ་མུན་པའི་མདོག །ཁྲོ་ཚུལ་འཇིགས་རུང་ཆས་ཀྱིས་བརྒྱན། །ཕྱག་གཡས་སྟྭ་རེ་མཁའ་ལ་འཕྱར། །གཡོན་པས་ར་ཡི་རྒྱལ་མཚན་འཕྱར། །དར་ནག་བེར་དང་མགོ་ཕྲེང་འཕྱང༌། །ཆིབས་སུ་བདུད་རྟ་ནག་པོ་དང༌། །རེས་འགའ་གཡག་ནག་ཞོལ་ལྡན་ཆིབས། །དུད་སྤྲིན་མེ་དཔུང་འཚུབས་ཀློང་འགྱིངས། །སྤྲུལ་པའི་ཕོ་ཉ་ཅིར་ཡང་སྤྲོ། །སྡེ་སྤྲུལ་འཁོར་བཅས་བཀའ་ཉན་བཅས། །མཆོད་པའི་མགྲོན་ལ་སྤྱན་འདྲེན་ན། །དགྱེས་ཞལ་ཟླ་ལྟར་དཀར་ལ་སྤྱོན། །གཙང་མའི་གནས་འདིར་ལེགས་བཞུགས་ལ། །འདོད་ཡོན་རྒྱལ་སྲིད་རིན་ཆེན་བདུན། །བཀྲ་ཤིས་རྫས་རྟགས་གཏེར་གྱི་བུམ། །ནོར་བུའི་སྤྲིན་དང་རིན་ཆེན་རི། །འདོད་འཇོའི་བ་དང་རྟ་ཕྱུགས་ནོར། །འདབ་ཆགས་གཅན་གཟན་རི་དྭགས་ཁྱུ། །མདོར་ན་བཞེད་དགུའི་མཆོད་པའི་ཚོགས། །ས་དང་བར་སྣང་ཕྱོགས་མཚམས་ཁྱབ། །གསེར་སྐྱེམས་གཡུ་སྐྱེམས་ཕུད་རྒོད་མཚོ། །བཟང་སྤོས་སྤྲིན་གྱི་ཞིང་ཀུན་ཁྱབ། །མི་ཟད་ནམ་མཁའ་མཛོད་དུ་འབུལ། །འཁོན་འགྲས་ཉམས་ཆགས་ཐམས་ཅད་བཤགས། །ཕོག་ཐུག་འཁོན་མནོལ་བཟོད་བཞེས་ལ། །གནས་མགྲོན་དམ་ཚིག་མི་གཡེལ་བས། །ཕ་ཡིས་བུ་བཞིན་དགྱེས་སྐྱོང་ལ། །སྣོད་བཅུད་དཔལ་ཡོན་རྒྱས་ཤིང་བརྟན། །དཀོན་མཆོག་གསུམ་གྱི་དབུ་རྨོག་བཙན། །རྒྱལ་བསྟན་རིན་ཆེན་དགེ་འདུན་རྒྱས། །བཤད་སྒྲུབ་ལས་ཀྱི་བྱ་བ་དར། །ཆར་ཆུ་དུས་བབ་ལོ་ཕྱུགས་ལེགས། །རིགས་ཀྱི་རྒྱུད་འཕེལ་དགེ་བློ་ལྡན། །ཚེ་བསོད་དབང་ཐང་རླུང་རྟའི་སྟོབས། །རྒྱས་པས་གནོད་བྱེད་དགྲ་བགེགས་ཐུལ། །ཇི་བསམ་ཡིད་བཞིན་འགྲུབ་པ་ཡི། །བཀྲ་ཤིས་དར་རྒྱས་ཆེ་བར་མཛོད། །ཅེས་བརྗོད་ལ་མགྲོན་བཟོད་གསོལ་གཤེགས་བསྡུ་སོགས་སྤྱི་ལྟར་བྱའོ། །ཅེས་པའང་མཆོག་སྤྲུལ་རིན་པོ་ཆེ་འཇམ་དབྱངས་མཁྱེན་བརྩེའི་དབང་ཕྱུག་གི་གསུང་བསྐུལ་བཞིན་ཀུན་ལ་སྨན་སེམས་ཀྱིས་རྒྱལ་ཁམས་པ་མངྒ་ལས་བྲིས་པ་དོན་དང་ལྡན་པར་གྱུར་ཅིག། །། སངས་རྒྱས་གཉིས་པ་རྒྱལ་དབང་པདྨ་ཡི། །གསུང་གི་དབེན་གནས་མཆིམས་ཕུའི་གནས་གཏེར་བདག །བཀའ་གཏེར་སྲུང་མ་གཞི་བདག་ཟོ་དོར་ཀུན། །གསོལ་ལོ་མཆོད་དོ་ཐུགས་དམ་དགྱེས་པར་བསྐང༌། །འཁོན་མནོལ་ཀུན་བཤགས་གནས་མགྲོན་དམ་ཚིག་གིས། །སྲུང་སྐྱོབས་སྡོང་གྲོགས་བཅོལ་བའི་ཕྲིན་ལས་མཛོད། །ཅེས་པའང་སྒྲུབ་བརྩོན་སྙིང་པོའི་རྣལ་འབྱོར་གོ་འཇོ་བླ་མ་ཀུན་བཟང་དབང་དྲག་ནས་བསྐུལ་ངོར་མངྒ་ལས་བྲིས་པ་དགེ་ལེགས་འཕེལ།། །། ༈ །རྡོ་རྗེའི་གནས་མཆོག་མཱ་ར་ཏི་ཀའི་གནས་སྲུང་གསོལ་མཆོད་ཕྲིན་ལས་ཐོགས་མེད་བཞུགས། ཨོཾ་སྭ་སྟི། འཆི་མེད་གྲུབ་པའི་གནས་མཆོག་མཱ་ར་ཏི་ཀའི་གནས་སྲུང་མཆོད་པར་འདོད་པས་གཙང་མའི་སྣོད་དུ་གཏོར་མ། གསེར་སྐྱེམས། འབྲུ་སྨན་ཟས་སྣ་ཚོགས་འདུ་བྱས་ཆབ་ཀྱིས་བྲན་ལ། །རང་གཉུག་མའི་ལྷའི་ང་རྒྱལ་ལ་གནས་པས་བྱིན་བརླབས་ཏེ། ཧྲཱིཿ ཕུན་ཚོགས་པདྨ་དྲྭ་བའི་ཞིང༌། །རྡོ་རྗེའི་ཚེ་མཆོག་སྒྲུབ་པའི་གནས། །རིགས་གསུམ་དགྱེས་པའི་ཕོ་བྲང་ཆེ། །རྡོ་རྗེའི་བྲག་གི་ཀེའུ་ཚང༌། །མཱ་ར་ཏི་ཀ་ལྷ་ཡི་ཚལ། །འཆི་མེད་པདྨ་འོད་འབར་དང༌། །ལྷ་ལྕམ་མནྡཱ་བ་ཡིས། །ཚེ་དབང་རིག་འཛིན་རྡོ་རྗེའི་སྐུར། །བཞེངས་ཏེ་གསུང་གི་རྡོ་རྗེ་དང༌། །གཉིས་མེད་རྡོ་རྗེའི་སྐུར་བཞེངས་པའི། །གནས་མཆོག་མེལ་ཚེའི་སྐྱོང་མཛད་པ། །ཕྱི་ལྟར་ཞིང་སྐྱོང་གཟི་ལྡན་རྩལ། །ནང་དུ་མགོན་པོ་སྟོབས་འཕྲོག་དབང༌། །གསང་བ་མ་ཧཱ་དེ་ཝ་ཆེ། །ཡབ་ཡུམ་སྤྲུལ་པ་འཁོར་དང་བཅས། །བཀའ་སྡོད་ཞིང་སྐྱོང་ཌཱ་ཀི་མ། །ཕོ་ཉ་གིང་དང་ལངྐའི་ཚོགས། །ཁྱི་སྤྱང་འབྲུག་ཁྱུང་ལ་སོགས་པ། །པདྨ་དབང་གི་བཀའ་ཉན་དང༌། །ལྷ་ཀླུ་ཞིང་སྐྱོང་དུ་མའི་ཚོགས། །ཀུན་ཀྱང་དགྱེས་པས་གནས་འདིར་སྤྱོན། །རང་མཐུན་གདན་ལ་བག་ཕེབས་བཞུགས། །གཙང་སྦྱར་ཡིད་འོང་མཆོད་པའི་ཚོགས། །རྡོ་རྗེའི་འདོད་ཡོན་ཉེར་སྤྱོད་བདུན། །ཤིས་པའི་རྟགས་རྫས་བུམ་བཟང་གཏེར། །གནག་ཕྱུགས་རི་དྭགས་གཅན་གཟན་ཁྱུ། །གསེར་སྐྱེམས་གཡུ་སྐྱེམས་དཔའ་བོའི་དཔུང༌། །དར་ཟབ་དཀོར་ཆ་མཁོ་དགུའི་རྫས། །རིན་ཆེན་ཁང་བཟང་དབྱིག་མཛོད་སོགས། །མི་ཟད་ནམ་མཁའ་མཛོད་ཆེན་པོའི། །ལོངས་སྤྱོད་བསམ་མི་ཁྱབ་པ་ཡིས། །གསོལ་ལོ་མཆོད་དོ་ངོ་སོ་བསྟོད། །འཁོན་གྲིབ་ཉམས་ཆག་ཐམས་ཅད་བཤགས། །གནས་མགྲོན་དམ་ཚིག་ལ་དགོངས་ནས། །ཉམས་ཆགས་འཁོན་གྲིབ་མེད་པ་དང༌། །འཆི་མེད་ཚེ་དཔལ་འབྱོར་བ་རྒྱས། །ལོངས་སྤྱོད་ཕུན་ཚོགས་གྲགས་སྙན་སྤེལ། །ལྷ་ཞལ་ཟླ་ལྟར་དཀར་ནས་ནི། །སངས་རྒྱས་བསྟན་དར་བསྟན་འཛིན་རྒྱས། །བཤད་སྒྲུབ་ལས་ཀྱི་བྱ་བ་འཕེལ། །གནས་འདིར་རིག་འཛིན་འདུ་ཚོགས་རྒྱས། །ལོ་ལེགས་འབྲུ་འཕེལ་བཀྲག་དང་ལྡན། །ཀུན་ཀྱང་བདེ་སྐྱིད་ཡིད་མཐུན་འགྲོགས། །ནད་མུག་འཁྲུག་རྩོད་རྒྱུན་ཆད་ནས། །དགའ་བདེའི་ཉི་ཟླ་བཀྲག་ཏུ་འཚེར། །དཀར་པོའི་སེམས་རྒྱུད་ཤུགས་དྲག་པས། །མཆོག་གསུམ་གཙུག་བཀུར་དགེ་བཅུ་སྤྱོད། །རྫོགས་ལྡན་དགའ་སྟོན་དར་བར་མཛོད། ཅེས་པའང་གནས་འཛིན་ཀུ་ལུང་བླ་མ་ངག་དབང་ཆོས་འཕེལ་ནས་རྟེན་བཅས་ཆེད་དུ་བསྐུལ་བ་བཞིན་མངྒ་ལ་ཤྲཱི་བྷཱུ་ཏི་གནས་དེར་སླེབས་པའི་ཚེ་བྲིས་པ་དགེ་ལེགས་འཕེལ། སརྦ་ཛ་ག་ཏཾ།། །། ༈ བཀྲ་ཤིས་དགེ་བ་ལྷོ་ལྗོངས་ཤར་ཕྱོགས་ཆར། །དབང་བྱེད་ཡུལ་ལྷ་སྡེ་བརྒྱད་དམག་དཔུང་བཅས། །འདོད་ཡོན་བདུད་རྩིའི་མཆོད་པ་འདི་བཞེས་ལ། །ཕུན་ཚོགས་བདེ་སྐྱིད་དཔལ་གྱིས་འབྱོར་བར་མཛོད། །ཧྲཱིཿ དབང་དྲག་པདྨའི་བཀའ་གཉན་མཐུ་བོ་ཆེ། །དྷིལླི་བཙན་རྒོད་སྲས་ཡུམ་སྤྲུལ་པར་བཅས། །འདོད་ཡོན་བདུད་རྩིའི་མཆོད་པ་འདི་བཞེས་ལ། །གེགས་ཞི་བསམ་དོན་ལྷུན་གྱིས་འགྲུབ་པར་མཛོད། །ཅེས་པའང་བླ་མ་པདྨ་དབང་ཆེན་གྱི་གསུང་བསྐུལ་བཞིན་བཀྲིས་དཔལ་འབྱོར་རྒན་པོས་བྲིས་པ་དགེ།། །། ༈ སྐུ་རྗེས་རྡོ་རྗེ་བརྩེགས་པའི་བཀའ་སྲུང་དམ་ཅན་ཤེལ་གིང་ཆེན་པོའི་མངའ་གསོལ་དགེ་ལེགས་དཔལ་གྱི་རོལ་མོ་ཞེས་བྱ་བ་བཞུགས་སོ།། རབ་འབྱམས་ཆོས་དབྱིངས་མཁའ་ལ་སྒྱུ་འཕྲུལ་གར། །རབ་མང་རྩ་གསུམ་རྒྱ་མཚོའི་མཁྱེན་བརྩེ་ནུས། །རབ་མཛེས་གསང་གསུམ་རྟོགས་པའི་མཚོ་སྐྱེས་རྗེའི། །རབ་སྙན་ཚིག་དོན་བརྗོད་ཚིག་ལྕི་བར་མཛོད། ༡ །ཡེ་གྲོལ་གདོད་མའི་རང་གདངས་འཁོར་འདས་ཆོས། །འགག་མེད་ཅིར་སྣང་ཆོས་ཉིད་བདེ་བ་ཆེར། །འདུ་འབྲལ་མེད་པའི་ཡེ་ཤེས་ཆེན་པོའི་རྩལ། །དམ་ཅན་ཤེལ་གྱི་གིང་ཆེན་མངའ་གསོལ་ལོ། ༢ །མ་དག་ཉོན་མོངས་དུག་གསུམ་རང་རྒྱུད་ཉིད། །རྟོགས་ན་བདེ་གསལ་མི་རྟོག་སྐུ་གསུམ་དབྱིངས། །བསྟན་སྲུང་རྒྱུད་གསུམ་དྲེགས་པའི་སྡེ་དཔོན་དུ། །རྡོ་རྗེའི་ཐ་ཚིག་ཕོག་བཞིན་མངའ་གསོལ་ལོ། ༣ །ཕན་བདེའི་འབྱུང་གནས་མཉམ་མེད་ཐུབ་བསྟན་མཚོ། །ལུང་རྟོགས་པདྨའི་ཚལ་གྱིས་རབ་མཛེས་པ། །བཤད་སྒྲུབ་ལས་ཀྱི་སྦྲང་རྩིས་ཆེས་ཕྱུག་པའི། །མེལ་ཚེས་སྐྱོང་བའི་ཉིན་བྱེད་མངའ་གསོལ་ལོ། ༤ །མཐའ་ཀླས་འགྲོ་ལ་སྙིགས་མའི་ཟུང་རྔུ་བརྒྱས། །མནར་ལ་མཆོག་གསུམ་ཕྲིན་ལས་སྟོན་ཟླའི་འོད། །ཆེས་བསིལ་ཕན་དང་བདེ་བའི་སྨན་བཅུད་ཀྱིས། །སྐྱོང་མཛད་བདུད་རྩིའི་འབྱུང་གནས་མངའ་གསོལ་ལོ། ༥ །ཁྱད་པར་སངས་རྒྱས་གཉིས་པའི་ཕྲིན་ལས་དཔལ། །སྐལ་ལྡན་ཤིང་རྟ་ལྷག་པར་འབབ་པའི་ལྗོངས། །ཁ་བཞི་ལྷོ་ཡི་སྨན་ལྗོངས་མི་མཐུན་ཕྱོགས། །སྐྱོབས་པའི་ལྷ་རབ་ཆེན་པོར་མངའ་གསོལ་ལོ། ༦ །ངེས་དོན་ཁ་བའི་རྡུལ་བརྩེགས་སྤོར་འགྱིང་ཞིང༌། །ཉམས་རྟོགས་གཡུ་རལ་རྒྱས་པའི་སེང་ཕྲུག་གིས། །ཛམ་གླིང་ཐ་གྲུར་ཁྱབ་མཛད་དབྱར་རྔ་པའི། །བསྟན་པ་ཕྱོགས་བརྒྱར་རྒྱས་བྱེད་མངའ་གསོལ་ལོ། ༧ །ཆོས་བཞིན་སྐྱོང་བའི་རྒྱལ་བློན་འབངས་དང་འཁོར། །རྣམ་དཀར་དགེ་བཅུའི་ཤིང་རྟ་ལ་འཛེགས་ནས། །ཕུན་ཚོགས་སྡེ་བཞིའི་ནོར་གྱིས་ཆེས་ཕྱུག་པའི། །མེས་པོ་སྟོབས་ཆེན་མཆོག་ཏུ་མངའ་གསོལ་ལོ། ༨ །ཁྱད་པར་ལྷ་ཆོསྃ་རྩེརྃ་སོན་འདུས་པའི་སྡེ། །རྣམ་དག་ཚུལ་ཁྲིམས་ལང་ཚོ་དར་བབ་ཅིང༌། །བསླབ་གསུམ་ནོར་བུའི་རྒྱན་གྱིས་སྒེག་པའི་སྡེ། །འཕེལ་རྒྱས་བརྟན་པའི་སྲུང་མར་མངའ་གསོལ་ལོ། ༩ །རང་བྱུང་གྲུབ་པའི་སློབ་དཔོན་ཡེ་ཤེས་སྐུའི། །ཕྱག་རྒྱས་སྤ་བའི་རྡོ་རྗེའི་གནས་ཆེན་གྱི། །སྐུ་གསུང་ཐུགས་རྟེན་མཆོད་པའི་སྲི་ཞུ་ཡིས། །ཚོགས་གཉིས་དཔལ་ཡོན་རྒྱས་ཕྱིར་མངའ་གསོལ་ལོ། ༡༠ །མང་མང་མཆོད་པའི་བཀོད་པས་མདུན་བདར་ཏེ། །སྙན་སྙན་མངའ་གསོལ་ཚིག་གིས་སྦྲན་པ་བཞིན། །མྱུར་མྱུར་ཕྲིན་ལས་གློག་ཕྲེང་བསྒྱུར་དང་བཅས། །ལེགས་ལེགས་དགེ་མཚན་དཔལ་ཀུན་རྒྱས་གྱུར་ཅིག །ཅེས་ཆོས་རྩེའི་བྱང་འདྲེན་མཆོག་ནས་རྟེན་བཅས་རྗེས་སུ་གསུང་བསྐུལ་བཞིན་རྒྱལ་ཁམས་པ་རྒན་པོ་མངྒ་ལས་གནས་མཆོག་དེ་ཉིད་དུ་བྲིས་པ་བསྟན་འགྲོའི་དགེ་མཚན་རྒྱས་པའི་རྒྱུར་གྱུར་ཅིག །། །། གནས་བདག་མཆོད་ཐབས་བཀྲ་ཤིས་ཆར་འབེབས་བཞུགས། ཨོཾ་སྭསྟི། གཙང་མའི་སྣོད་དུ་གཏོར་མ་དཀར་དམར་དང༌། །ཟས་སྣ་དར་སྣ་འབྲུ་སྨན་སོགས་དང༌། གསེར་སྐྱེམས་དཀར་སྡོན་བསང་དགོས་ན་ཤིང་རྩིའི་དུད་པ་དཀར་གསུམ་ཕྱེ་མར་བཅས་འདུ་བྱས་ལ། རྃ་ཡྃ་ཁྃ། ཨོཾ་ཨཱཿཧཱུྃ་དང་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་ལ། ཀྱཻ། ཆོས་ཀུན་གཟོད་ནས་དག་པའི་མདངས། །ལྷོ་ལྗོངས་སྨན་གྱི་ནགས་ཚལ་ཆེའི། །བྱེ་བྲག་ཡུལ་གྱི་དགེ་བཅུ་དང༌། །ལེགས་ཚོགས་དཔལ་ཡོན་འཁྱིལ་བའི་གཞིར། །གནས་ལ་དབང་བྱེད་ཟོ་དོར་ཆེ། །པདྨའི་ཟབ་གཏེར་སྲུང་མའི་གཙོ། །བདུད་རྒྱལ་ཟུ་ར་ར་སྐྱེས་ནི། །སྐུ་མདོག་ནག་པོ་མུན་པའི་མདོག །ཁྲོ་ཚུལ་འཇིགས་རུང་ཆས་ཀྱིས་བརྒྱན། །ཕྱག་གཡས་སྟྭ་རེ་མཁའ་ལ་འཕྱར། །གཡོན་པས་ར་ཡི་རྒྱལ་མཚན་འཕྱར། །དར་ནག་བེར་དང་མགོ་ཕྲེང་འཕྱང༌། །ཆིབས་སུ་བདུད་རྟ་ནག་པོ་དང༌། །རེས་འགའ་གཡག་ནག་ཞོལ་ལྡན་ཆིབས། །དུད་སྤྲིན་མེ་དཔུང་འཚུབས་ཀློང་འགྱིངས། །སྤྲུལ་པའི་ཕོ་ཉ་ཅིར་ཡང་སྤྲོ། །སྡེ་སྤྲུལ་འཁོར་བཅས་བཀའ་ཉན་བཅས། །མཆོད་པའི་མགྲོན་ལ་སྤྱན་འདྲེན་ན། །དགྱེས་ཞལ་ཟླ་ལྟར་དཀར་ལ་སྤྱོན། །གཙང་མའི་གནས་འདིར་ལེགས་བཞུགས་ལ། །འདོད་ཡོན་རྒྱལ་སྲིད་རིན་ཆེན་བདུན། །བཀྲ་ཤིས་རྫས་རྟགས་གཏེར་གྱི་བུམ། །ནོར་བུའི་སྤྲིན་དང་རིན་ཆེན་རི། །འདོད་འཇོའི་བ་དང་རྟ་ཕྱུགས་ནོར། །འདབ་ཆགས་གཅན་གཟན་རི་དྭགས་ཁྱུ། །མདོར་ན་བཞེད་དགུའི་མཆོད་པའི་ཚོགས། །ས་དང་བར་སྣང་ཕྱོགས་མཚམས་ཁྱབ། །གསེར་སྐྱེམས་གཡུ་སྐྱེམས་ཕུད་རྒོད་མཚོ། །བཟང་སྤོས་སྤྲིན་གྱི་ཞིང་ཀུན་ཁྱབ། །མི་ཟད་ནམ་མཁའ་མཛོད་དུ་འབུལ། །འཁོན་འགྲས་ཉམས་ཆགས་ཐམས་ཅད་བཤགས། །ཕོག་ཐུག་འཁོན་མནོལ་བཟོད་བཞེས་ལ། །གནས་མགྲོན་དམ་ཚིག་མི་གཡེལ་བས། །ཕ་ཡིས་བུ་བཞིན་དགྱེས་སྐྱོང་ལ། །སྣོད་བཅུད་དཔལ་ཡོན་རྒྱས་ཤིང་བརྟན། །དཀོན་མཆོག་གསུམ་གྱི་དབུ་རྨོག་བཙན། །རྒྱལ་བསྟན་རིན་ཆེན་དགེ་འདུན་རྒྱས། །བཤད་སྒྲུབ་ལས་ཀྱི་བྱ་བ་དར། །ཆར་ཆུ་དུས་བབ་ལོ་ཕྱུགས་ལེགས། །རིགས་ཀྱི་རྒྱུད་འཕེལ་དགེ་བློ་ལྡན། །ཚེ་བསོད་དབང་ཐང་རླུང་རྟའི་སྟོབས། །རྒྱས་པས་གནོད་བྱེད་དགྲ་བགེགས་ཐུལ། །ཇི་བསམ་ཡིད་བཞིན་འགྲུབ་པ་ཡི། །བཀྲ་ཤིས་དར་རྒྱས་ཆེ་བར་མཛོད། །ཅེས་བརྗོད་ལ་མགྲོན་བཟོད་གསོལ་གཤེགས་བསྡུ་སོགས་སྤྱི་ལྟར་བྱའོ། །ཅེས་པའང་མཆོག་སྤྲུལ་རིན་པོ་ཆེ་འཇམ་དབྱངས་མཁྱེན་བརྩེའི་དབང་ཕྱུག་གི་གསུང་བསྐུལ་བཞིན་ཀུན་ལ་སྨན་སེམས་ཀྱིས་རྒྱལ་ཁམས་པ་མངྒ་ལས་བྲིས་པ་དོན་དང་ལྡན་པར་གྱུར་ཅིག། །། ༈ བཀྲ་ཤིས་ལྗོངས་ཀྱི་གནས་གསོལ་དགེ་ལེགས་འདོད་འཇོ་བཞུགས། ན་མོ་གུ་ར་ཝེ། །གནས་བདག་གསོལ་མཆོད་གཏོང་བར་འདོད་པས་གཏོར་མ་དཀར་དམར། ཇ་ཆང་སྐྱེམས་ཕུད། འབྲུ་སྨན་རིན་ཆེན་སོགས་མཐུན་རྫས་འདུ་བྱས་ལ། རང་ཡི་དམ་དུ་གསལ་བས། མཆོད་གཏོར་རྣམས། རྃ་ཡྃ་ཁྃ་གིས་མཆོད་རྫས་ཉེས་སྐྱོན་སྦྱངས། །ཨོཾ་ཨཱཿཧཱུྃ་ལས་འདོད་དགུའི་མཆོད་པའི་སྤྲིན། །ཟད་མེད་ནམ་མཁའ་མཛོད་ཀྱི་འཁོར་ལོ་ཡིས། །མགྲོན་ཀུན་དགྱེས་པར་སྐོང་བའི་ནུས་ལྡན་གྱུར། །ནམ་མཁའ་མཛོད་ཀྱི་སྔགས་རྒྱས་སྤེལ། ཀྱཻ། ཡུལ་འདི་བདེ་བར་སྐྱོང་བའི་མཐུ་བོ་ཆེ། །བཙན་རྒོད་མཚོ་སྨན་ཀླུ་བདུད་འཁོར་དང་བཅས། །དགྱེས་བསྐྱེད་མཆོད་པའི་མགྲོན་དུ་གནས་འདི་རུ། །ལྷ་ཞལ་ཟླ་ལྟར་དཀར་བས་བཞུགས་སུ་གསོལ། །དངོས་དང་ཏིང་ངེ་འཛིན་གྱི་རོལ་མོ་ལས། །མཆོད་བསྐང་རྟེན་རྫས་སྒྲུབ་པའི་ཡོ་བྱད་སོགས། །མི་ཟད་ཆོས་དབྱིངས་རྒྱས་པར་འགེངས་པ་ཡིས། །དབང་པོའི་སྤྱོད་ཡུལ་དགའ་བའི་དཔལ་སྐྱེད་འབུལ། །ཁྱེད་ཅག་སྲིད་པ་ཆགས་པའི་ལྷ་རབས་སུ། །བདག་ནི་གནས་འདིར་འཁོད་པས་གུས་བཏུད་ཅིང༌། །མཆོད་པའི་དམ་རྫས་འདོད་དགུ་འབུལ་ལགས་ན། །དམ་ཚིག་གཉན་པོས་བཞེས་ཞིང་དགྱེས་ནས་ཀྱང༌། །བག་མེད་སྤྱོད་པའི་ནོངས་པ་བཟོད་བཞེས་ལ། །སྣོད་བཅུད་རྫོགས་ལྡན་དཔལ་གྱིས་འབྱོར་བ་དང༌། །མི་ཕྱུགས་འབྲུ་ནོར་ཚོང་མགྲོན་དུས་ཀུན་ལེགས། །རྣམ་དཀར་ལས་སྤྱོད་བཤད་སྒྲུབ་འདུས་ཚོགས་འཕེལ། །དགྲ་རྐུན་ནག་ཕྱོགས་ལས་རྒྱལ་བཀྲ་ཤིས་ཀྱི། །སྣང་བས་འཇིག་རྟེན་གསུམ་ན་ཁྱབ་གྱུར་ཅིག །ཆོས་ལྡན་རྒྱལ་པོའི་མངའ་ཐང་ཆབ་སྲིད་རྒྱས། །དཀོན་མཆོག་དབུ་འཕང་ཆེས་མཐོ་ཀུན་གྱིས་བཀུར། །དགེ་ལེགས་ཟླ་བ་ཡར་ངོ་ལྟར་འཕེལ་བས། །དོན་གཉིས་ཡིད་བཞིན་འབྱོར་ཞིང་རྒྱས་པར་མཛོད། །མཆོད་གཏོར་འབུལ་ཞིང་མགྲོན་གཤེགས་བསྡུ་བྱའོ། །ཞེས་པའང་སྣོད་བཅུད་སྤྱི་ལ་སྨན་པའི་ལྷག་བསམ་གྱིས་རང་སློབ་ཐུབ་བསྟན་རྣམ་རྒྱལ་ནས་རྟེན་བཅས་བསྐུལ་ངོར་རྣལ་འབྱོར་སྤྱོད་པ་བཀྲ་ཤིས་དཔལ་འབྱོར་གྱིས་བྲིས་པ་ཕན་བདེའི་དཔལ་དུ་གྱུར་ཅིག། །། ༈ ཧཱུྃ་ཧྲཱིཿ ཁྱབ་བརྡལ་ཡངས་པ་ཆོས་སྐུའི་ཀློང་ཡངས་སུ། །ལྷུན་གྲུབ་འོད་ལྔ་ལོངས་སྐུའི་ཞིང་ཆེན་པོ། །གདོད་ནས་རྫོགས་པའི་དག་ཆེན་སྤྲུལ་པའི་གནས། །རང་བྱུང་སྦས་པའི་གནས་ཀྱི་སྲུང་མ་ཆེ། །མཛོད་ལྔ་སྟག་རྩེ་སྤྲུལ་འཁོར་ལས་བྱེད་འཁོར། །ལྗོངས་འདིའི་ཕུ་མདའ་ཉིན་སྲིབ་རི་བྲག་མཚོར། །གནས་པའི་ཡུལ་གཞི་གཏེར་བདག་ལ་སོགས་པ། །ཀུན་ལ་དགྱེས་སྐྱེད་དམ་རྫས་གཏོར་མའི་ཕུད། །བདུད་རྩི་བསང་དང་གསེར་སྐྱེམས་འདོད་དགུའི་གཏེར། །དགོངས་བརྒྱུད་ཏིང་འཛིན་རོལ་མོས་འབུལ་ལགས་ན། །པདྨ་འབྱུང་གནས་རྒོད་ཀྱི་ལྡེམ་འཕྲུ་ཅན། །ནམ་མཁའི་རྣལ་འབྱོར་རྒྱལ་བ་ལྷ་བཙུན་པའི། །མཁས་གྲུབ་པདྨ་ཡེ་ཤེས་རྡོ་རྗེ་ཡིས། །ཇི་ལྟར་བཀའ་བསྒོས་དམ་ལས་མ་འདས་པར། །གསང་ཆེན་ཨ་ཏིའི་བསྟན་པ་དར་བ་དང༌། །རྒྱལ་ཁམས་བདེ་སྐྱིད་ཆོས་ཀྱི་སྣང་བ་རྒྱས། །མཐའ་དམག་དམ་སྲིའི་རྒྱལ་འགོང་གནོད་འཚེ་སྲུངས། །ཆོས་ལྡན་རྒྱལ་པོའི་མངའ་ཐང་དར་བ་དང༌། །བདག་ཅག་བསམ་དོན་ཆོས་བཞིན་འགྲུབ་པར་མཛོད། །ཅེས་པའང་ལྷ་རི་སྦས་པའི་གནས་ཆེན་ནང་ནས་རིན་ཆེན་གཏེར་མཛོད་ཆེན་པོའི་སྨིན་གྲོལ་སྤེལ་བའི་སྐབས་ཀུ་སཱ་ལི་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་གང་ཤར་བྲིས་པ་དོན་དང་ལྡན་པར་གྱུར་ཅིག། །། ༈ སྦས་ཡུལ་འབྲས་མོ་གཤོང་གི་གནས་བདག་མཆོད་ཐབས་བཀྲ་ཤིས་ལྷ་ཡི་རོལ་མོ་བཞུགས། ཨོཾ་སྭསྟི། དུས་ཚེས་དགེ་བར་གཙང་མའི་གནས་སུ་ཤིང་རྩིའི་དུད་སྤྲིན་དང༌། འབྲུ་སྨན་དར་ཟབ་རིན་ཆེན་ཕྱེ་མས་སྦགས་པའི་ཟས་སྣ། གསེར་སྐྱེམས་བཅས་འདུ་བྱས་ལ་ཆབ་ཀྱིས་བྲན་ལ། རྃ་ཡྃ་ཁྃ། ཨོཾ་ཨཱཿཧཱུྃ་དང་ནམ་མཁའ་མཛོད་ཀྱི་སྔགས་རྒྱས་བྱིན་བརླབས་ལ། ཀྱཻ། གདོད་ནས་དག་པའི་ཆོས་ཉིད་ལ། །འགགས་མེད་ཆོས་ཅན་རྟེན་འབྲེལ་གྱི། །སངས་རྒྱས་རྣམས་ཀྱི་སྨོན་ལམ་དང༌། །སྐྱེ་དགུའི་བསོད་ནམས་མཐུ་དཔལ་ལས། །དག་པའི་ཞིང་གི་སྒྲོན་མ་བཀོད། །སྣོད་བཅུད་རི་གླིང་ཅིར་ཡང་བྱུང༌། །དེ་ལས་བྱེ་བྲག་འཛམ་བུའི་གླིང༌། །གདོད་ནས་གྲུབ་པའི་གནས་དང་ཡུལ། །དཔའ་བོ་ཌཱ་ཀི་རང་བཞིན་གྱི། །འདུ་བའི་གནས་དང་ཞིང་ཁམས་ནི། །ཐུན་མོང་ཁྱད་པར་གསང་བ་ཡི། །ངོ་མཚར་བསམ་མི་ཁྱབ་པ་ཡི། །བྱེ་བྲག་རང་བྱུང་སངས་རྒྱས་ཆེ། །མཚོ་སྐྱེས་རྡོ་རྗེའི་བྱིན་བརླབས་པས། །རྡོ་རྗེ་ཐེག་པ་འབྱུང་བའི་གནས། །སྐལ་མེད་སྐྱེ་བོའི་བགྲོད་དཀའ་ཞིང༌། །རྡོ་རྗེའི་རིགས་ཅན་འདུ་བའི་གནས། །ཆོས་ནོར་རྫས་ཀྱི་གཏེར་དུ་མས། །གཏམས་ཤིང་རྩི་སྨན་ཤིང་ཏོག་འབྲུ། །འཕེལ་རྒྱས་ཟད་མེད་འབྱུང་བའི་ཡུལ། །ལྷ་རི་བཀྲ་ཤིས་འབྲས་མོ་ལྗོངས། །དབུས་སུ་བྲག་དཀར་བཀྲ་ཤིས་ལྡིང༌། །ཕྱོགས་བཞིར་རྡོ་རྗེའི་ཕུག་ཆེན་བཞི། །གངས་བྲག་མཚོ་རི་ངོ་མཚར་བའི། །བཀོད་པ་མཛེས་ཤིང་ཡིད་འོང་ཆར། །རིག་འཛིན་རྩ་བརྒྱུད་བླ་མ་དང༌། །བདེ་གཤེགས་སྒྲུབ་བཀའ་བརྒྱད་ལ་སོགས། །ཡི་དམ་རྒྱུད་སྡེ་དྲུག་གི་ལྷ། །གནས་ཡུལ་དཔའ་བོ་ཌཱ་ཀི་མ། །རྡོ་རྗེའི་ཆོས་སྲུང་གཏེར་གཞི་སྐྱོང༌། །ཇི་སྙེད་བཞུགས་པ་ཐམས་ཅད་ལ། །སྐུ་གསུང་ཐུགས་ལ་མཉེས་པའི་ཕུལ། །མི་གཙང་གྲིབ་འཁོན་སྦྱངས་བའི་ཐབས། །དག་བྱེད་བདུད་རྩིའི་ནུས་ལྡན་ཤིང༌། །སྨན་སྤོས་བཟང་པོའི་དྲི་ངད་ཅན། །ཟེགས་མ་འདོད་ཡོན་དགྱེས་དགུའི་རྫས། །རང་བཞིན་ལྷུན་གྱིས་གྲུབ་པ་ཡིས། །བསང་ངོ་མཆོད་དོ་དགྱེས་པ་བསྐྱེད། །གཞན་ཡང་གཏོར་མ་གསེར་སྐྱེམས་དང༌། །སྤྱན་གཟིགས་མཐུན་པའི་རྫས་མཐའ་དག །ཡིད་བཞིན་ལྷུན་གྱིས་གྲུབ་པའི་དཔལ། །ཟད་མི་ཤེས་པས་མཉེས་གྱུར་ཅིག །ཐུགས་དང་འགལ་བའི་ནོངས་པ་མཐོལ། །བདག་ཅག་སྒྲུབ་པ་པོ་རྣམས་ལ། །ཞི་ཞིང་བྱམས་པའི་ཐུགས་ཀྱིས་དགོངས། །ཉེས་པའི་སྤྱོད་པས་ཐུགས་འགལ་ན། །ཀོ་ལོང་རུ་ང་མ་མཛད་པར། །གནས་མགྲོན་དམ་ཚིག་གཅིག་ཏུ་དགོངས། །དབེན་པའི་གནས་ཀུན་སྒྲུབ་པའི་སྡེས། །མཛེས་ཤིང་དངོས་གྲུབ་དཔལ་ལ་སྤྱོད། །ཆོས་ཀྱི་སྡེ་ཀུན་བཤད་དང་སྒྲུབ། །བསྟན་པའི་སྙིང་པོ་རྒྱས་པ་དང༌། །སྣོད་བཅུད་དཔལ་གྱི་ཡོན་ཏན་དར། །ནད་མུག་འཁྲུགས་རྩོད་མཐའ་དག་ཞི། །ཆར་ཆུ་དུས་བབ་ལོ་ཕྱུགས་ལེགས། །དཔལ་འབྱོར་འབྲུ་ནོར་ཡོན་ཏན་རྒྱས། །བདེ་སྐྱིད་དགའ་སྟོན་དར་བ་སོགས། །བཀྲ་ཤིས་ཀུན་ཏུ་ཁྱབ་པ་ཡི། །དགེ་ལེགས་ཡར་ཟླ་ལྟར་འཕེལ་མཛོད། །ཅེས་དང་མགྲོན་ཀུན་དགྱེས་བཞིན་གཤེགས་གསོལ་སོགས་རྗེས་ཀྱི་ལས་རིམ་བྱའོ། །ཞེས་པའང་རྒྱལ་དབང་མཚོ་སྐྱེས་རྡོ་རྗེའི་རིང་ལུགས་ཀྱི་གྲལ་མཐར་འཁོད་པའི་རིག་པ་འཛིན་པ་འཇིགས་མེད་མཁྱེན་བརྩེའི་འོད་ཟེར་གྱིས་བྲིས་ཤིང་ཕྲིན་ལས་སུ་གསོལ་བས་བསྟན་འགྲོའི་དགེ་མཚན་རྒྱས་པའི་རྒྱུར་གྱུར་ཅིག །སརྦ་མངྒ་ལཾ།། །། ༈ ཧཱུྃ། རྒྱལ་དབང་པདྨའི་རིང་ལུགས་བཀའ་གཏེར་གྱི། །བསྟན་པ་སྲུང་ཕྱིར་རིག་འཛིན་དབང་པོ་ཉིད། །སྟོབས་ལྡན་ཆོས་སྐྱོང་དྲག་པོའི་སྐུར་བཞེངས་པ། །མཐུ་རྩལ་ཆེས་མྱུར་རྡོ་རྗེ་ཐོག་རྒོད་རྩལ། །སྔོན་གྱི་དམ་ཚིག་རྗེས་དགོངས་གནས་འདིར་གཤེགས། །གཏོར་མ་གསེར་སྐྱེམས་མཐུན་པའི་རྫས་ཀྱིས་བསྐང༌། །ཉམས་ཆགས་མཐོལ་བཤགས་བདག་ལ་སྡོང་གྲོགས་མཛོད། །སྔ་འགྱུར་བསྟན་དང་དེར་འཛིན་སྐྱེས་བུ་སྲུངས། །འགལ་བྱེད་ཆམ་ཕོབ་དགྲ་ལ་རྟགས་མཚན་སྟོན། །ཚེ་དཔལ་རླུང་རྟའི་སྟོབས་བསྐྱེད་འདོད་དགུའི་ལས། །ཡིད་བཞིན་འགྲུབ་པའི་ཕྲིན་ལས་མྱུར་དུ་མཛོད། །བཀྲ་ཤིས་དགེ་ལེགས་ཕྱོགས་དུ་ས་ཀུན་ཁྱབ་ཤོག །ཅེས་དྲག་པོ་སྔགས་ཀྱི་རྣལ་འབྱོར་པ་འཇིགས་མེད་སྐལ་བཟང་རྡོ་རྗེའི་བསྐུལ་ངོར་སྙིང་བཙུན་རྡོ་རྗེ་ཐུགས་མཆོག་རྩལ་གྱིས་བྲིས་པ་བི་ཛ་ཡནྟུ།། །།

[edit]

!__gnas bdag mchod thabs bkra shis char 'bebs bzhugs/_oM swasti/_gtsang ma'i snod du gtor ma dkar dmar dang*/_/zas sna dar sna 'bru sman sogs dang*/_gser skyems dkar sdon bsang dgos na shing rtsi'i dud pa dkar gsum phye mar bcas 'du byas la/_ra~M ya~M kha~M/_oM AHhU~M dang nam mkha' mdzod kyi sngags rgyas byin gyis brlabs la/_kyai/_chos kun gzod nas dag pa'i mdangs/_/lho ljongs sman gyi nags tshal che'i/_/bye brag yul gyi dge bcu dang*/_/legs tshogs dpal yon 'khyil ba'i gzhir/_/gnas la dbang byed zo dor che/_/pad+ma'i zab gter srung ma'i gtso/_/bdud rgyal zu ra ra skyes ni/_/sku mdog nag po mun pa'i mdog_/khro tshul 'jigs rung chas kyis brgyan/_/phyag g.yas s+t+wa re mkha' la 'phyar/_/g.yon pas ra yi rgyal mtshan 'phyar/_/dar nag ber dang mgo phreng 'phyang*/_/chibs su bdud rta nag po dang*/_/res 'ga' g.yag nag zhol ldan chibs/_/dud sprin me dpung 'tshubs klong 'gyings/_/sprul pa'i pho nya cir yang spro/_/sde sprul 'khor bcas bka' nyan bcas/_/mchod pa'i mgron la spyan 'dren na/_/dgyes zhal zla ltar dkar la spyon/_/gtsang ma'i gnas 'dir legs bzhugs la/_/'dod yon rgyal srid rin chen bdun/_/bkra shis rdzas rtags gter gyi bum/_/nor bu'i sprin dang rin chen ri/_/'dod 'jo'i ba dang rta phyugs nor/_/'dab chags gcan gzan ri dwags khyu/_/mdor na bzhed dgu'i mchod pa'i tshogs/_/sa dang bar snang phyogs mtshams khyab/_/gser skyems g.yu skyems phud rgod mtsho/_/bzang spos sprin gyi zhing kun khyab/_/mi zad nam mkha' mdzod du 'bul/_/'khon 'gras nyams chags thams cad bshags/_/phog thug 'khon mnol bzod bzhes la/_/gnas mgron dam tshig mi g.yel bas/_/pha yis bu bzhin dgyes skyong la/_/snod bcud dpal yon rgyas shing brtan/_/dkon mchog gsum gyi dbu rmog btsan/_/rgyal bstan rin chen dge 'dun rgyas/_/bshad sgrub las kyi bya ba dar/_/char chu dus bab lo phyugs legs/_/rigs kyi rgyud 'phel dge blo ldan/_/tshe bsod dbang thang rlung rta'i stobs/_/rgyas pas gnod byed dgra bgegs thul/_/ji bsam yid bzhin 'grub pa yi/_/bkra shis dar rgyas che bar mdzod/_/ces brjod la mgron bzod gsol gshegs bsdu sogs spyi ltar bya'o/__/ces pa'ang mchog sprul rin po che 'jam dbyangs mkhyen brtse'i dbang phyug gi gsung bskul bzhin kun la sman sems kyis rgyal khams pa mang+ga las bris pa don dang ldan par gyur cig/_//__sangs rgyas gnyis pa rgyal dbang pad+ma yi/_/gsung gi dben gnas mchims phu'i gnas gter bdag_/bka' gter srung ma gzhi bdag zo dor kun/_/gsol lo mchod do thugs dam dgyes par bskang*/_/'khon mnol kun bshags gnas mgron dam tshig gis/_/srung skyobs sdong grogs bcol ba'i phrin las mdzod/_/ces pa'ang sgrub brtson snying po'i rnal 'byor go 'jo bla ma kun bzang dbang drag nas bskul ngor mang+ga las bris pa dge legs 'phel//_//__!__/rdo rje'i gnas mchog mA ra ti ka'i gnas srung gsol mchod phrin las thogs med bzhugs/_oM swa sti/_'chi med grub pa'i gnas mchog mA ra ti ka'i gnas srung mchod par 'dod pas gtsang ma'i snod du gtor ma/_gser skyems/_'bru sman zas sna tshogs 'du byas chab kyis bran la/_/rang gnyug ma'i lha'i nga rgyal la gnas pas byin brlabs te/_hrIH_phun tshogs pad+ma drwa ba'i zhing*/_/rdo rje'i tshe mchog sgrub pa'i gnas/_/rigs gsum dgyes pa'i pho brang che/_/rdo rje'i brag gi ke'u tshang*/_/mA ra ti ka lha yi tshal/_/'chi med pad+ma 'od 'bar dang*/_/lha lcam man+dA ba yis/_/tshe dbang rig 'dzin rdo rje'i skur/_/bzhengs te gsung gi rdo rje dang*/_/gnyis med rdo rje'i skur bzhengs pa'i/_/gnas mchog mel tshe'i skyong mdzad pa/_/phyi ltar zhing skyong gzi ldan rtsal/_/nang du mgon po stobs 'phrog dbang*/_/gsang ba ma hA de wa che/_/yab yum sprul pa 'khor dang bcas/_/bka' sdod zhing skyong DA ki ma/_/pho nya ging dang lang+ka'i tshogs/_/khyi spyang 'brug khyung la sogs pa/_/pad+ma dbang gi bka' nyan dang*/_/lha klu zhing skyong du ma'i tshogs/_/kun kyang dgyes pas gnas 'dir spyon/_/rang mthun gdan la bag phebs bzhugs/_/gtsang sbyar yid 'ong mchod pa'i tshogs/_/rdo rje'i 'dod yon nyer spyod bdun/_/shis pa'i rtags rdzas bum bzang gter/_/gnag phyugs ri dwags gcan gzan khyu/_/gser skyems g.yu skyems dpa' bo'i dpung*/_/dar zab dkor cha mkho dgu'i rdzas/_/rin chen khang bzang dbyig mdzod sogs/_/mi zad nam mkha' mdzod chen po'i/_/longs spyod bsam mi khyab pa yis/_/gsol lo mchod do ngo so bstod/_/'khon grib nyams chag thams cad bshags/_/gnas mgron dam tshig la dgongs nas/_/nyams chags 'khon grib med pa dang*/_/'chi med tshe dpal 'byor ba rgyas/_/longs spyod phun tshogs grags snyan spel/_/lha zhal zla ltar dkar nas ni/_/sangs rgyas bstan dar bstan 'dzin rgyas/_/bshad sgrub las kyi bya ba 'phel/_/gnas 'dir rig 'dzin 'du tshogs rgyas/_/lo legs 'bru 'phel bkrag dang ldan/_/kun kyang bde skyid yid mthun 'grogs/_/nad mug 'khrug rtsod rgyun chad nas/_/dga' bde'i nyi zla bkrag tu 'tsher/_/dkar po'i sems rgyud shugs drag pas/_/mchog gsum gtsug bkur dge bcu spyod/_/rdzogs ldan dga' ston dar bar mdzod/_ces pa'ang gnas 'dzin ku lung bla ma ngag dbang chos 'phel nas rten bcas ched du bskul ba bzhin mang+ga la shrI b+hU ti gnas der slebs pa'i tshe bris pa dge legs 'phel/_sarba dza ga taM//__//__!__bkra shis dge ba lho ljongs shar phyogs char/_/dbang byed yul lha sde brgyad dmag dpung bcas/_/'dod yon bdud rtsi'i mchod pa 'di bzhes la/_/phun tshogs bde skyid dpal gyis 'byor bar mdzod/_/hrIH_dbang drag pad+ma'i bka' gnyan mthu bo che/_/d+hil+li btsan rgod sras yum sprul par bcas/_/'dod yon bdud rtsi'i mchod pa 'di bzhes la/_/gegs zhi bsam don lhun gyis 'grub par mdzod/_/ces pa'ang bla ma pad+ma dbang chen gyi gsung bskul bzhin bkris dpal 'byor rgan pos bris pa dge//_//__!_sku rjes rdo rje brtsegs pa'i bka' srung dam can shel ging chen po'i mnga' gsol dge legs dpal gyi rol mo zhes bya ba bzhugs so//_rab 'byams chos dbyings mkha' la sgyu 'phrul gar/_/rab mang rtsa gsum rgya mtsho'i mkhyen brtse nus/_/rab mdzes gsang gsum rtogs pa'i mtsho skyes rje'i/_/rab snyan tshig don brjod tshig lci bar mdzod/_1_/ye grol gdod ma'i rang gdangs 'khor 'das chos/_/'gag med cir snang chos nyid bde ba cher/_/'du 'bral med pa'i ye shes chen po'i rtsal/_/dam can shel gyi ging chen mnga' gsol lo/_2_/ma dag nyon mongs dug gsum rang rgyud nyid/_/rtogs na bde gsal mi rtog sku gsum dbyings/_/bstan srung rgyud gsum dregs pa'i sde dpon du/_/rdo rje'i tha tshig phog bzhin mnga' gsol lo/_3_/phan bde'i 'byung gnas mnyam med thub bstan mtsho/_/lung rtogs pad+ma'i tshal gyis rab mdzes pa/_/bshad sgrub las kyi sbrang rtsis ches phyug pa'i/_/mel tshes skyong ba'i nyin byed mnga' gsol lo/_4_/mtha' klas 'gro la snyigs ma'i zung rngu brgyas/_/mnar la mchog gsum phrin las ston zla'i 'od/_/ches bsil phan dang bde ba'i sman bcud kyis/_/skyong mdzad bdud rtsi'i 'byung gnas mnga' gsol lo/_5_/khyad par sangs rgyas gnyis pa'i phrin las dpal/_/skal ldan shing rta lhag par 'bab pa'i ljongs/_/kha bzhi lho yi sman ljongs mi mthun phyogs/_/skyobs pa'i lha rab chen por mnga' gsol lo/_6_/nges don kha ba'i rdul brtsegs spor 'gying zhing*/_/nyams rtogs g.yu ral rgyas pa'i seng phrug gis/_/dzam gling tha grur khyab mdzad dbyar rnga pa'i/_/bstan pa phyogs brgyar rgyas byed mnga' gsol lo/_7_/chos bzhin skyong ba'i rgyal blon 'bangs dang 'khor/_/rnam dkar dge bcu'i shing rta la 'dzegs nas/_/phun tshogs sde bzhi'i nor gyis ches phyug pa'i/_/mes po stobs chen mchog tu mnga' gsol lo/_8_/khyad par lha chosa~M rtsera~M son 'dus pa'i sde/_/rnam dag tshul khrims lang tsho dar bab cing*/_/bslab gsum nor bu'i rgyan gyis sgeg pa'i sde/_/'phel rgyas brtan pa'i srung mar mnga' gsol lo/_9_/rang byung grub pa'i slob dpon ye shes sku'i/_/phyag rgyas spa ba'i rdo rje'i gnas chen gyi/_/sku gsung thugs rten mchod pa'i sri zhu yis/_/tshogs gnyis dpal yon rgyas phyir mnga' gsol lo/_10_/mang mang mchod pa'i bkod pas mdun bdar te/_/snyan snyan mnga' gsol tshig gis sbran pa bzhin/_/myur myur phrin las glog phreng bsgyur dang bcas/_/legs legs dge mtshan dpal kun rgyas gyur cig_/ces chos rtse'i byang 'dren mchog nas rten bcas rjes su gsung bskul bzhin rgyal khams pa rgan po mang+ga las gnas mchog de nyid du bris pa bstan 'gro'i dge mtshan rgyas pa'i rgyur gyur cig_//_//_gnas bdag mchod thabs bkra shis char 'bebs bzhugs/_oM swasti/_gtsang ma'i snod du gtor ma dkar dmar dang*/_/zas sna dar sna 'bru sman sogs dang*/_gser skyems dkar sdon bsang dgos na shing rtsi'i dud pa dkar gsum phye mar bcas 'du byas la/_ra~M ya~M kha~M/_oM AHhU~M dang nam mkha' mdzod kyi sngags rgyas byin gyis brlabs la/_kyai/_chos kun gzod nas dag pa'i mdangs/_/lho ljongs sman gyi nags tshal che'i/_/bye brag yul gyi dge bcu dang*/_/legs tshogs dpal yon 'khyil ba'i gzhir/_/gnas la dbang byed zo dor che/_/pad+ma'i zab gter srung ma'i gtso/_/bdud rgyal zu ra ra skyes ni/_/sku mdog nag po mun pa'i mdog_/khro tshul 'jigs rung chas kyis brgyan/_/phyag g.yas s+t+wa re mkha' la 'phyar/_/g.yon pas ra yi rgyal mtshan 'phyar/_/dar nag ber dang mgo phreng 'phyang*/_/chibs su bdud rta nag po dang*/_/res 'ga' g.yag nag zhol ldan chibs/_/dud sprin me dpung 'tshubs klong 'gyings/_/sprul pa'i pho nya cir yang spro/_/sde sprul 'khor bcas bka' nyan bcas/_/mchod pa'i mgron la spyan 'dren na/_/dgyes zhal zla ltar dkar la spyon/_/gtsang ma'i gnas 'dir legs bzhugs la/_/'dod yon rgyal srid rin chen bdun/_/bkra shis rdzas rtags gter gyi bum/_/nor bu'i sprin dang rin chen ri/_/'dod 'jo'i ba dang rta phyugs nor/_/'dab chags gcan gzan ri dwags khyu/_/mdor na bzhed dgu'i mchod pa'i tshogs/_/sa dang bar snang phyogs mtshams khyab/_/gser skyems g.yu skyems phud rgod mtsho/_/bzang spos sprin gyi zhing kun khyab/_/mi zad nam mkha' mdzod du 'bul/_/'khon 'gras nyams chags thams cad bshags/_/phog thug 'khon mnol bzod bzhes la/_/gnas mgron dam tshig mi g.yel bas/_/pha yis bu bzhin dgyes skyong la/_/snod bcud dpal yon rgyas shing brtan/_/dkon mchog gsum gyi dbu rmog btsan/_/rgyal bstan rin chen dge 'dun rgyas/_/bshad sgrub las kyi bya ba dar/_/char chu dus bab lo phyugs legs/_/rigs kyi rgyud 'phel dge blo ldan/_/tshe bsod dbang thang rlung rta'i stobs/_/rgyas pas gnod byed dgra bgegs thul/_/ji bsam yid bzhin 'grub pa yi/_/bkra shis dar rgyas che bar mdzod/_/ces brjod la mgron bzod gsol gshegs bsdu sogs spyi ltar bya'o/__/ces pa'ang mchog sprul rin po che 'jam dbyangs mkhyen brtse'i dbang phyug gi gsung bskul bzhin kun la sman sems kyis rgyal khams pa mang+ga las bris pa don dang ldan par gyur cig/_//__!__bkra shis ljongs kyi gnas gsol dge legs 'dod 'jo bzhugs/_na mo gu ra we/_/gnas bdag gsol mchod gtong bar 'dod pas gtor ma dkar dmar/_ja chang skyems phud/_'bru sman rin chen sogs mthun rdzas 'du byas la/_rang yi dam du gsal bas/_mchod gtor rnams/_ra~M ya~M kha~M gis mchod rdzas nyes skyon sbyangs/_/oM AHhU~M las 'dod dgu'i mchod pa'i sprin/_/zad med nam mkha' mdzod kyi 'khor lo yis/_/mgron kun dgyes par skong ba'i nus ldan gyur/_/nam mkha' mdzod kyi sngags rgyas spel/_kyai/_yul 'di bde bar skyong ba'i mthu bo che/_/btsan rgod mtsho sman klu bdud 'khor dang bcas/_/dgyes bskyed mchod pa'i mgron du gnas 'di ru/_/lha zhal zla ltar dkar bas bzhugs su gsol/_/dngos dang ting nge 'dzin gyi rol mo las/_/mchod bskang rten rdzas sgrub pa'i yo byad sogs/_/mi zad chos dbyings rgyas par 'gengs pa yis/_/dbang po'i spyod yul dga' ba'i dpal skyed 'bul/_/khyed cag srid pa chags pa'i lha rabs su/_/bdag ni gnas 'dir 'khod pas gus btud cing*/_/mchod pa'i dam rdzas 'dod dgu 'bul lags na/_/dam tshig gnyan pos bzhes zhing dgyes nas kyang*/_/bag med spyod pa'i nongs pa bzod bzhes la/_/snod bcud rdzogs ldan dpal gyis 'byor ba dang*/_/mi phyugs 'bru nor tshong mgron dus kun legs/_/rnam dkar las spyod bshad sgrub 'dus tshogs 'phel/_/dgra rkun nag phyogs las rgyal bkra shis kyi/_/snang bas 'jig rten gsum na khyab gyur cig_/chos ldan rgyal po'i mnga' thang chab srid rgyas/_/dkon mchog dbu 'phang ches mtho kun gyis bkur/_/dge legs zla ba yar ngo ltar 'phel bas/_/don gnyis yid bzhin 'byor zhing rgyas par mdzod/_/mchod gtor 'bul zhing mgron gshegs bsdu bya'o/__/zhes pa'ang snod bcud spyi la sman pa'i lhag bsam gyis rang slob thub bstan rnam rgyal nas rten bcas bskul ngor rnal 'byor spyod pa bkra shis dpal 'byor gyis bris pa phan bde'i dpal du gyur cig/_//__!__hU~M hrIH_khyab brdal yangs pa chos sku'i klong yangs su/_/lhun grub 'od lnga longs sku'i zhing chen po/_/gdod nas rdzogs pa'i dag chen sprul pa'i gnas/_/rang byung sbas pa'i gnas kyi srung ma che/_/mdzod lnga stag rtse sprul 'khor las byed 'khor/_/ljongs 'di'i phu mda' nyin srib ri brag mtshor/_/gnas pa'i yul gzhi gter bdag la sogs pa/_/kun la dgyes skyed dam rdzas gtor ma'i phud/_/bdud rtsi bsang dang gser skyems 'dod dgu'i gter/_/dgongs brgyud ting 'dzin rol mos 'bul lags na/_/pad+ma 'byung gnas rgod kyi ldem 'phru can/_/nam mkha'i rnal 'byor rgyal ba lha btsun pa'i/_/mkhas grub pad+ma ye shes rdo rje yis/_/ji ltar bka' bsgos dam las ma 'das par/_/gsang chen a ti'i bstan pa dar ba dang*/_/rgyal khams bde skyid chos kyi snang ba rgyas/_/mtha' dmag dam sri'i rgyal 'gong gnod 'tshe srungs/_/chos ldan rgyal po'i mnga' thang dar ba dang*/_/bdag cag bsam don chos bzhin 'grub par mdzod/_/ces pa'ang lha ri sbas pa'i gnas chen nang nas rin chen gter mdzod chen po'i smin grol spel ba'i skabs ku sA li 'gyur med theg mchog bstan pa'i rgyal mtshan gyis gang shar bris pa don dang ldan par gyur cig/_//_!__sbas yul 'bras mo gshong gi gnas bdag mchod thabs bkra shis lha yi rol mo bzhugs/_oM swasti/_dus tshes dge bar gtsang ma'i gnas su shing rtsi'i dud sprin dang*/_'bru sman dar zab rin chen phye mas sbags pa'i zas sna/_gser skyems bcas 'du byas la chab kyis bran la/_ra~M ya~M kha~M/_oM AHhU~M dang nam mkha' mdzod kyi sngags rgyas byin brlabs la/_kyai/_gdod nas dag pa'i chos nyid la/_/'gags med chos can rten 'brel gyi/_/sangs rgyas rnams kyi smon lam dang*/_/skye dgu'i bsod nams mthu dpal las/_/dag pa'i zhing gi sgron ma bkod/_/snod bcud ri gling cir yang byung*/_/de las bye brag 'dzam bu'i gling*/_/gdod nas grub pa'i gnas dang yul/_/dpa' bo DA ki rang bzhin gyi/_/'du ba'i gnas dang zhing khams ni/_/thun mong khyad par gsang ba yi/_/ngo mtshar bsam mi khyab pa yi/_/bye brag rang byung sangs rgyas che/_/mtsho skyes rdo rje'i byin brlabs pas/_/rdo rje theg pa 'byung ba'i gnas/_/skal med skye bo'i bgrod dka' zhing*/_/rdo rje'i rigs can 'du ba'i gnas/_/chos nor rdzas kyi gter du mas/_/gtams shing rtsi sman shing tog 'bru/_/'phel rgyas zad med 'byung ba'i yul/_/lha ri bkra shis 'bras mo ljongs/_/dbus su brag dkar bkra shis lding*/_/phyogs bzhir rdo rje'i phug chen bzhi/_/gangs brag mtsho ri ngo mtshar ba'i/_/bkod pa mdzes shing yid 'ong char/_/rig 'dzin rtsa brgyud bla ma dang*/_/bde gshegs sgrub bka' brgyad la sogs/_/yi dam rgyud sde drug gi lha/_/gnas yul dpa' bo DA ki ma/_/rdo rje'i chos srung gter gzhi skyong*/_/ji snyed bzhugs pa thams cad la/_/sku gsung thugs la mnyes pa'i phul/_/mi gtsang grib 'khon sbyangs ba'i thabs/_/dag byed bdud rtsi'i nus ldan shing*/_/sman spos bzang po'i dri ngad can/_/zegs ma 'dod yon dgyes dgu'i rdzas/_/rang bzhin lhun gyis grub pa yis/_/bsang ngo mchod do dgyes pa bskyed/_/gzhan yang gtor ma gser skyems dang*/_/spyan gzigs mthun pa'i rdzas mtha' dag_/yid bzhin lhun gyis grub pa'i dpal/_/zad mi shes pas mnyes gyur cig_/thugs dang 'gal ba'i nongs pa mthol/_/bdag cag sgrub pa po rnams la/_/zhi zhing byams pa'i thugs kyis dgongs/_/nyes pa'i spyod pas thugs 'gal na/_/ko long ru nga ma mdzad par/_/gnas mgron dam tshig gcig tu dgongs/_/dben pa'i gnas kun sgrub pa'i sdes/_/mdzes shing dngos grub dpal la spyod/_/chos kyi sde kun bshad dang sgrub/_/bstan pa'i snying po rgyas pa dang*/_/snod bcud dpal gyi yon tan dar/_/nad mug 'khrugs rtsod mtha' dag zhi/_/char chu dus bab lo phyugs legs/_/dpal 'byor 'bru nor yon tan rgyas/_/bde skyid dga' ston dar ba sogs/_/bkra shis kun tu khyab pa yi/_/dge legs yar zla ltar 'phel mdzod/_/ces dang mgron kun dgyes bzhin gshegs gsol sogs rjes kyi las rim bya'o/__/zhes pa'ang rgyal dbang mtsho skyes rdo rje'i ring lugs kyi gral mthar 'khod pa'i rig pa 'dzin pa 'jigs med mkhyen brtse'i 'od zer gyis bris shing phrin las su gsol bas bstan 'gro'i dge mtshan rgyas pa'i rgyur gyur cig_/sarba mang+ga laM//__//__!__hU~M/_rgyal dbang pad+ma'i ring lugs bka' gter gyi/_/bstan pa srung phyir rig 'dzin dbang po nyid/_/stobs ldan chos skyong drag po'i skur bzhengs pa/_/mthu rtsal ches myur rdo rje thog rgod rtsal/_/sngon gyi dam tshig rjes dgongs gnas 'dir gshegs/_/gtor ma gser skyems mthun pa'i rdzas kyis bskang*/_/nyams chags mthol bshags bdag la sdong grogs mdzod/_/snga 'gyur bstan dang der 'dzin skyes bu srungs/_/'gal byed cham phob dgra la rtags mtshan ston/_/tshe dpal rlung rta'i stobs bskyed 'dod dgu'i las/_/yid bzhin 'grub pa'i phrin las myur du mdzod/_/bkra shis dge legs phyogs du sa kun khyab shog_/ces drag po sngags kyi rnal 'byor pa 'jigs med skal bzang rdo rje'i bskul ngor snying btsun rdo rje thugs mchog rtsal gyis bris pa bi dza yan+tu//_//