JKW-KABUM-11-DA-002

🚧 This website is under continued development. We appreciate your patience!

Previous Section Back to Volume Page Next Section

བཀའ་གདམས་ཐིག་ལེ་བཅུ་དྲུག་གི་ཟབ་ཁྲིད་གྲུབ་གཉིས་མཆོག་སྦྱིན།

Wylie title	bka' gdams thig le bcu drug gi zab khrid grub gnyis mchog sbyin
Location	mkhyen brtse'i bka' 'bum Volume 11, sde tshan 2, Pages 71-102 (Folios 1a to 16b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bka' gdams thig le bcu drug gi zab khrid grub gnyis mchog sbyin. In 'jam dbyangs mkhyen brtse'i dbang po'i bka' 'bum, Vol. 11: 71-102. Khams sde dge rdzong sar dgon: Rdzong sar blo gros phun tshogs, 2020.
Genre	Mind Training Texts - blo sbyong · Contemplative Guide Books and Instructional Manuals - khrid yig
DNZ	In the Damngak Dzö: https://dnz.tsadra.org/index.php/Wylie:Bka%27_gdams_thig_le_bcu_drug_gi_zab_khrid_kyi_rim_pa_snying_por_dril_ba_grub_gnyis_mchog_sbyin
Colophon	།ཅེས་པའང་རྗེ་བླ་མ་བཅུ་ཕྲག་རིག་པའི་པཎྜིཏ་དཀོན་མཆོག་བསྟན་པ་རབ་རྒྱས་དཔལ་བཟང་པོས་ཆོས་གྲྭ་ཆེན་པོ་བཀྲ་ཤིས་ལྷུན་པོ་དཔལ་གྱི་སྡེ་ཆེན་ཕྱོགས་ཐམས་ཅད་ལས་རྣམ་པར་རྒྱལ་བའི་ཕུན་ཚོགས་ཁང་གསར་དུ་ཇི་ལྟར་སྩལ་བ་བཞིན། གཞོན་ནུ་མཁྱེན་བརྩེའི་མིང་གིས་ཟིན་བྲིས་སུ་བཏབ་པ་སརྦ་དཱ་ཀ་ལྱཱ་ཎཾ་བྷ་བ་ཏུ།།
Colophon	ces pa'ang rje bla ma bcu phrag rig pa'i paN+Dita dkon mchog bstan pa rab rgyas dpal bzang pos chos grwa chen po bkra shis lhun po dpal gyi sde chen phyogs thams cad las rnam par rgyal ba'i phun tshogs khang gsar du ji ltar stsal ba bzhin/__gzhon nu mkhyen brtse'i ming gis zin bris su btab pa sarba dA ka l+yA NaM b+ha ba tu

1 Texts in this Section (sde tshan or chos tshan)

71-102	བཀའ་གདམས་ཐིག་ལེ་བཅུ་དྲུག་གི་ཟབ་ཁྲིད་གྲུབ་གཉིས་མཆོག་སྦྱིན། bka' gdams thig le bcu drug gi zab khrid grub gnyis mchog sbyin Mind Training Texts - blo sbyong · Contemplative Guide Books and Instructional Manuals - khrid yig	Text page View PDF
	[[\|འཇམ་དབྱངས་མཁྱེན་བརྩེའི་དབང་པོ་ ()]]

[edit]

༄༅། །བཀའ་གདམས་ཐིག་ལེ་བཅུ་དྲུག་གི་ཟབ་འཁྲིད་ཀྱི་རིམ་པ་སྙིང་པོར་དྲིལ་བ་གྲུབ་གཉིས་མཆོག་སྦྱིན་ཞེས་བྱ་བ་བཞུགས་སོ།། །།

ཨོཾ་སྭསྟི་སིདྡྷཾ། །དཀོན་མཆོག་གསུམ་དངོས་ཐུགས་རྗེའི་ཟླ་རིས་ནི། །ཡོངས་རྫོགས་བསྟན་པའི་བདུད་རྩིའི་འོད་དཀར་བཅས། །ཤར་བའི་མོད་ལ་ཕན་བདེའི་ཆུ་གཏེར་ཆེ། །རབ་ཏུ་རྒྱས་མཛད་དཔལ་ལྡན་བླ་མར་འདུད། །གང་གི་བཀའ་དྲིན་ཁ་བ་ཡིས། །རེག་པས་བསིལ་བའི་གངྒཱ་ནི། །བདག་བློའི་ལམ་གསུམ་ལ་ཆགས་པས། །ཟབ་དོན་ངལ་འཚོ་ཅིར་ཡང་རྒྱས། །དེ་སླད་འདི་ན་འཕགས་བོད་ཀྱི། །མཁས་གྲུབ་རྒྱ་མཚོའི་གཙུག་གི་ནོར། །མཉམ་མེད་ཇོ་བོ་ཡབ་སྲས་ཀྱི། །གདམས་པའི་སྙིང་པོ་ཅུང་ཟད་དབྱེ། །དེ་ལ་འདིར་ལྔ་བརྒྱ་པ་རྣམས་ཀྱི་གཙུག་གི་ནོར་བུ་མཉམ་མེད་ཇོ་བོ་ཆེན་པོས་ཟ་མ་ཏོག་བཀོད་པ་ལ་སོགས་པའི་མདོའི་སྦས་དོན་མཐར་ཐུག་པ་དཔལ་གསང་བ་འདུས་པ་ཡེ་ཤེས་ཞབས་ལུགས་དང་མཐུན་པར་བཀྲལ་བ་དགེ་བའི་བཤེས་གཉེན་བཀའ་གདམས་པ་རྣམས་ཀྱི་གསང་ཆོས་མན་ངག་ཐུན་མོང་མ་ཡིན་པ་ཟབ་པ་ལས་ཀྱང་ཆེས་ཟབ་པའི་སྙན་བརྒྱུད་ཐིག་ལེ་བཅུ་དྲུག་གི་གདམས་པ་ཟབ་མོ་ཉམས་སུ་ལེན་པའི་ཚུལ་ལ་གཉིས། ད་ལྟར་གྱི་ཕྱག་བཞེས་ལྟར་ཟབ་ཁྲིད་ཀྱི་སྙིང་པོ་མདོར་བསྡུས་ཏེ་བསྟན་པ་དང་། དེ་ལས་རྒྱས་པར་སྤྲོས་པའི་སྒོ་ཕྱོགས་ཙམ་མཚོན་པའོ། །དང་པོ་ལ་གསུམ། སྔོན་འགྲོ་དངོས་གཞི། རྗེས་སོ། །དང་པོ་ནི། ནོར་བུའི་ཕྲེང་བ་ལེའུ་གཉིས་པར། སྲས་ཀྱི་ཐུ་བོ་སྤྱན་རས་གཟིགས། །ཁྱེད་ཀྱི་རྗེས་འབྲངས་ཁོ་མོས་བསྐྱང་། །ཁོ་མོའི་གདམས་པ་འདི་ལོངས་ལ། །རྗེས་སུ་འབྲངས་ལ་བསྟན་པར་གྱིས། །སྐྱབས་གནས་བླ་མ་དྲན་པར་མཛོད། །ལུས་ནི་ལྷ་ཡི་རང་བཞིན་ཏེ། །ངག་ནི་བཟླས་བརྗོད་རྒྱུན་པར་མཛོད། །འགྲོ་བ་མ་ལུས་ཕ་མར་སེམས། །སེམས་ཀྱི་གནས་ལུགས་སྟོང་པར་དཔྱོད། །ལྔ་པོ་འདི་ཡི་སྐྱ་བར་ནས། །དགེ་རྩ་ཐམས་ཅད་དག་པར་མཛོད། །ཅེས་གསུངས་པ་ལྟར་རྗེས་དྲན་ལྔའི་སྒོ་ནས་ཉམས་སུ་ལེན་པ་ལ། ཐོག་མར་སྦྱོར་བའི་ཆོས། གནས་ཁང་བྱི་དོར་བྱ་ཞིང་སྐུ་གསུང་ཐུགས་ཀྱི་རྟེན་དགྲམ། མཆོད་པ་གཡོ་མེད་པ་བཙལ་ལ་བཀོད་པས་མཛེས་པར་བཤམ། སྟན་བདེ་བ་ལ་ལུས་གནད་བསམ་གཏན་གྱི་སྤྱོད་ལམ་དང་ལྡན་པས་སྐྱབས་སེམས་དང་། ཚོགས་ཞིང་གསལ་གདབ་པ། ཡན་ལག་བདུན་པ་འབུལ་བ། འདོད་པའི་དོན་ལ་གསོལ་བ་གདབ་པ་རྣམས་ཚུལ་བཞིན་དུ་བྱས་ནས། དེ་ནས་ལམ་གྱི་རྩ་བ་བཤེས་གཉེན་བསྟེན་ཚུལ་གྱི་སྒོ་ནས་སྐྱབས་གནས་བླ་མ་རྗེས་སུ་དྲན་པ་དང་། སྐྱེས་བུ་ཆུང་འབྲིང་གཉིས་སྔོན་དུ་འགྲོ་བས་སྐྱེས་བུ་ཆེན་པོའི་ཉམས་ལེན་གྱིས་འགྲོ་དྲུག་ཕ་མ་རྗེས་སུ་དྲན་པ་དང་། ཁྱད་པར་ཕར་ཕྱིན་ཐ་མ་ཞི་ལྷག་གཉིས་ལ་བསླབས་པས་སེམས་ཀྱི་གནས་ལུགས་སྟོང་པར་རྗེས་སུ་དྲན་པ་རྣམས་བྱང་ཆུབ་ལམ་གྱི་རིམ་པའི་གདམས་ངག་ལས་ཇི་ལྟར་འབྱུང་བ་བཞིན་ཉམས་སུ་བླངས་པས་རྒྱུད་སྦྱང་བ་ནི་སྤྱིའི་སྔོན་འགྲོའོ།། །། གཉིས་པ་དངོས་གཞི་ལའང་རྗེས་དྲན་ལྔ་ལས། དང་པོ་སྐྱབས་གནས་བླ་མ་རྗེས་སུ་དྲན་པ་ནི། རང་ཉིད་ཐ་མལ་དུ་གནས་པའི་མདུན་གྱི་ནམ་མཁར་དྲན་པ་ཙམ་གྱིས་དགོས་འདོད་ཐམས་ཅད་ཡིད་བཞིན་དུ་སྩོལ་བར་ནུས་པའི་དཔག་བསམ་གྱི་ལྗོན་ཤིང་སྡོང་པོ་ཡལ་ག་ལོ་འདབ་བཀོད་པ་ཕུན་སུམ་ཚོགས་པའི་དབུས་སུ་རྩ་བའི་བླ་མ་འཕགས་པ་སྤྱན་རས་གཟིགས་ཕྱག་བཞི་པའི་རྣམ་པར་བཞུགས་པ་ནས་བཟུང་། ནོར་བུའི་ཕྲེང་བའི་བླ་མ་བརྒྱུད་པ་རྣམས་ཐོ་བརྩེགས་སུ་བཞུགས་པ་གཙོ་བོར་གྱུར་པའི་བླ་མ་དང་། མཐའ་སྐོར་དུ་སྐྱབས་གནས་དཀོན་མཆོག་རྒྱ་མཚོ་ཏིལ་གྱི་གང་བུ་ཁ་བྱེ་བའམ། ཉི་ཟེར་ལ་རྡུལ་འཁྲིགས་པ་བཞིན་མངོན་སུམ་ལྟ་བུར་བཞུགས་པའི་སྤྱན་སྔར་རང་གཞན་སེམས་ཅན་ཐམས་ཅད་ས་ཆེན་པོའི་དྲེག་པ་བཞིན་དུ་འཁོད་པས། དྭངས་འདོད་ཡིད་ཆེས་ཀྱི་དད་པ་ཤུགས་དྲག་པོས་ཀུན་ནས་བསླངས་ཏེ། ཐུན་གྱི་མགོར་དགེ་སྦྱོར་གང་བྱེད་བྱེ་བར་འགྱུར་བའི་སྔགས་བཟླ་བར་གསུངས་པས། ཨོཾ་སཾ་བྷཱ་ར་སཾ་བྷཱ་ར་བི་མ་ན་ས་ར་མ་ཧཱ་ཛམྦྷ་བ་ཧཱུྃ་ཕཊ་སྭཱ་ཧཱ། ཞེས་ཅི་ནུས་དང་། དེ་ནས་འདྲེན་པ་མཉམ་མེད་སྟོན་པ་བཅོམ་ལྡན་འདས། །གངས་རིའི་མགོན་པོ་རྗེ་བཙུན་སྤྱན་རས་གཟིགས། རྒྱལ་ཡུམ་སྒྲོལ་མ་བཅོམ་ལྡན་མི་གཡོ་མགོན། །བཀའ་གདམས་ལྷ་མཆོག་བཞི་ལ་གསོལ་བ་འདེབས། །བྱམས་པ་ཐོགས་མེད་དབྱིག་གཉེན་རྣམ་གྲོལ་སྡེ། །མཆོག་སྡེ་དུལ་བའི་སྡེ་དང་གྲགས་པའི་སྡེ། །སེང་བཟང་ཀུ་སཱ་ལི་གཉིས་གསེར་གླིང་པ། །རྒྱ་ཆེན་སྤྱོད་པའི་བརྒྱུད་པར་གསོལ་བ་འདེབས། །འཇམ་དབྱངས་ཡོད་མེད་ཕྱོགས་འཇིག་ཀླུ་སྒྲུབ་དང་། །ཟླ་བ་གྲགས་པ་རིག་པའི་ཁུ་བྱུག་ཆེ། །སངས་རྒྱས་དགོངས་སྐྱོབ་འཕགས་པ་ཡབ་སྲས་ཏེ། །ཟབ་མོ་ལྟ་བའི་བརྒྱུད་པར་གསོལ་བ༴ ཐུགས་རྗེ་ཆེན་པོ་བདེ་གཤེགས་རྡོ་རྗེ་འཆང་། །མཆོག་གཟིགས་ཏི་ལོ་པ་དང་ནཱ་རོ་དང་། །དཔལ་མཆོག་ཌོམྦི་པ་དང་ཨ་ཏི་ཤ །ཉམས་ལེན་བྱིན་རླབས་བརྒྱུད་པར་གསོལ༴ ལམ་བཟང་གསལ་མཛད་མགོན་པོ་ཨ་ཏི་ཤ །བཀའ་གདམས་བསྟན་པའི་མེས་པོ་རྒྱལ་བ་འབྲོམ། །ལེགས་པའི་ཤེས་རབ་རྒྱལ་མཚན་བཞི་ལ་སོགས། །དངོས་བརྒྱུད་བླ་མ་རྣམས་ལ་གསོལ་བ༴ སྲིད་ལ་ཞེན་ལོག་རྐྱེན་ངན་གྲོགས་སུ་ཤར། །བདག་གཞན་མཉམ་བརྗེས་རླབས་ཆེན་སྤྱོད་ལ་ཞུགས། །སྲིད་རྩ་དྲུང་འབྱིན་ལྟ་བས་རྒྱས་བཏབ་སྟེ། །ཐུན་མོང་ལམ་བཟང་བགྲོད་པར་བྱིན་གྱིས་རློབས། །གསང་སྔགས་སྒོར་ཞུགས་དམ་ཚིག་ཚུལ་བཞིན་སྲུང་། །ཟབ་གསལ་གཉིས་མེད་ལྷ་ཡི་རྣལ་འབྱོར་གྱིས། །ཟུང་འཇུག་སྙིང་གི་ཐིག་ལེ་མངོན་གྱུར་ནས། །འགྲོ་ཀུན་མགོན་དུ་འགྱུར་བར་བྱིན་གྱིས་རློབས། །ཞེས་བརྒྱུད་པའི་གསོལ་འདེབས་མདོར་བསྡུས་པ་སྔོན་དུ་འགྲོ་བས་འཁོར་བའི་སྡུག་བསྔལ་རྒྱུ་དང་བཅས་པ་ལ་འཇིགས་ཤིང་སྐྲག་པས་སྙིང་ཐག་པ་ནས་སྐྱབས་སུ་འགྲོ་བའི་འདུན་པ་དང་བཅས། །བདག་དང་འགྲོ་བ་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཆོས་རྣམས་ཀྱི་མཆོག་ཞི་བ་འདོད་ཆགས་དང་བྲལ་བའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་འཕགས་པ་བྱང་ཆུབ་སེམས་དཔའ་ཕྱིར་མི་ལྡོག་པའི་དགེ་འདུན་ཆེན་པོ་རྣམས་ལ་སྐྱབས་སུ་མཆིའོ། །ཞེས་སྐྱབས་འགྲོ་ཅི་ནུས་སུ་བྱ། །གཉིས་པ་འགྲོ་ཀུན་ཕ་མར་རྗེས་སུ་དྲན་པ་ནི། མཐའ་མེད་པའི་སེམས་ཅན་ཐམས་ཅད་ཕ་མ་དྲིན་ཅན་ཤ་སྟག་ཏུ་ཤེས་ཤིང་དེའི་དྲིན་བཟོར་མཁའ་ཁྱབ་ཀྱི་མ་རྣམས་བདེ་བ་དང་ལྡན། སྡུག་བསྔལ་དང་བྲལ་བའི་ཕྱིར་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ལམ་ཟབ་མོ་འདི་ཉམས་སུ་བླང་ངོ་སྙམ་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་དང་མཁའ་མཉམ་གྱི་སེམས་ཅན་མ་ལུས་པ་ཐམས་ཅད་ཀྱིས་སྐྱེ་བ་འདི་དང་སྐྱེ་བ་གཞན་དག་ཏུ་སྦྱིན་པའི་རང་བཞིན་དང་། ཚུལ་ཁྲིམས་ཀྱི་རང་བཞིན་དང་། སྒོམ་པའི་རང་བཞིན་གྱི་དགེ་བའི་རྩ་བ་ཅི་བགྱིས་པ་དང་། བགྱིད་དུ་སྩལ་བ་དང་། བགྱིས་པ་ལ་རྗེས་སུ་ཡི་རང་བའི་དགེ་བའི་རྩ་བ་དེས་ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་མཛད་པ་དེ་བཞིན་ཏུ་བདག་སོགས་སེམས་ཅན་རྣམས་ཀྱིས་ཀྱང་། དུས་འདི་ནས་བཟུང་སྟེ་ཇི་སྲིད་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོ་ལ་སེམས་བསྐྱེད་པར་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་ཕྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །ཞེས་སེམས་བསྐྱེད་བྱ། མཐར་སྐྱབས་ཡུལ་ཐམས་ཅད་རྩ་བརྒྱུད་ཀྱི་བླ་མ་རྣམས་ལ་ཐིམ། བརྒྱུད་པའི་བླ་མ་རྣམས་ཀྱང་རིམ་གྱིས་འོད་དུ་ཞུ་ནས་རྩ་བའི་བླ་མ་ལ་ཐིམ། རྩ་བའི་བླ་མ་ཡང་དགྱེས་པ་ཆེན་པོའི་ངང་ནས་འོད་དུ་ཞུ། རང་ལ་ཐིམ་པས་རྒྱུད་བྱིན་གྱིས་བརླབས་པར་བསམས་ལ་ཅུང་ཟད་རེ་མཉམ་པར་བཞག་གོ། །བར་འདིར་སྤྲོ་ཞིང་ནུས་ན་རྡོ་རྗེ་སེམས་དཔའི་སྒོམ་བཟླས་དང་། བླ་མ་སྤྱན་རས་གཟིགས་ལ་བརྟེན་པའི་བླ་མའི་རྣལ་འབྱོར་གསལ་བཏབ་ལ། ཀུ་སཱ་ལིའི་ཚོགས་གསོག །མཎྜལ། དབང་བླང་རྣམས་མཛད་པའི་ཕྱག་བཞེས་ཀྱང་ཡོད་མོད་ཀྱུས་ལ་འདི་ཙམ་གྱིས་ཆོག །དངོས་སུ་བཤམས་པའི་མཆོད་པ་ཡོད་ན་བྱིན་གྱིས་བརླབ་པ་ནི། རང་ཉིད་སྐད་ཅིག་གིས་ཐུགས་རྗེ་ཆེན་པོ་གཡས་ནོར་བུའི་ཕྲེང་བ་དང་གཡོན་ཤེལ་གྱི་འཁར་བ་རྩེ་མོར་སངས་རྒྱས་སྟོང་གིས་མཚན་པ་འཛིན་པ། ཞབས་གཉིས་མཉམ་པའི་སྟབས་ཀྱིས་བཞེངས་པའི་ཐུགས་ཀའི་ཧྲཱིཿལས་འོད་འཕྲོས། སྣོད་བཅུད་ཀྱི་མ་དག་པ་སྦྱངས། ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་འོད་དུ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་ལ་སོགས་པ་རྣམས་དྭངས་ཤིང་ཐོགས་པ་མེད་པ་དཔལ་ཀུན་ཏུ་བཟང་པོའི་རྣམ་པར་སྤྲུལ་པ་ལས་བྱུང་བའི་མཆོད་པའི་སྤྲིན་ཕུང་ཟད་མི་ཤེས་པ་ནམ་མཁའ་དང་མཉམ་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤཔྡའི་བར་སྦྱར་བས་བརླབ། གསུམ་པ་གནས་ལུགས་སྟོང་པར་རྗེས་སུ་དྲན་པ་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅་ཧཾ། ཞེས་པའི་སྔགས་ཀྱིས་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་དང་རང་གི་སེམས་རོ་གཅིག་ཏུ་གྱུར་པ་ཐུགས་རྗེ་ཆེན་པོའི་ཐུགས་ཟབ་གསལ་གཉིས་སུ་མེད་པའི་ཡེ་ཤེས་ཀྱི་ངོ་བོར་མོས་ནས་དེའི་ངང་དུ་གཉིས་སྣང་གི་སྤྲོས་པ་གཞན་གྱིས་བར་མ་ཆོད་པར་འཛིན་སྟངས་གསལ་ཞིང་དམ་པར་མཉམ་པར་འཇོག་ཅིང་། དེ་ལྟ་བུའི་གཉིས་སུ་མེད་པའི་ཡེ་ཤེས་ཀྱི་བདག་ཉིད་ངའོ་སྙམ་དུ་ང་རྒྱལ་ཤུགས་དྲག་ཏུ་བསྐྱེད་པ་ནི་ཆོས་སྐུའི་ལག་རྗེས་འཇོག་པར་བྱེད་པ་སྟོང་པའི་རྣལ་འབྱོར་རོ། །བཞི་པ་རང་ལུས་ལྷ་སྐུར་རྗེས་སུ་དྲན་པ་ལ་གཉིས། རིམ་པ་དང་པོ་བསྐྱེད་པའི་རིམ་པ་དང་། རིམ་པ་གཉིས་པ་རྫོགས་པའི་རིམ་པ་ལ་སློབ་ཚུལ་ལོ། །དང་པོ་ལའང་ཐིག་ལེ་བཅོ་ལྔ་ལས། དང་པོ་ཕྱི་བཀོད་པ་བསམ་གྱིས་མི་ཁྱབ་པའི་ཐིག་ལེ་བསྒོམ་པ་ནི། སྟོང་པའི་ངང་ལས་རང་སེམས་ཀྱི་ཆ་ཤས་ལས་གྲུབ་པའི་འཇའ་ཚོན་སྣ་ལྔའི་གུར་ཁྱིམ་གྱི་དབུས་སུ་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་འདོད་སྣམ་ཕ་གུ་དྲྭ་བ་དྲྭ་ཕྱེད་མདའ་ཡབ་པུ་ཤུ་རྟ་བབས་སོགས་མཚན་ཉིད་ཐམས་ཅད་ཡོངས་སུ་རྫོགས་པ། ནང་གི་སྟེང་དང་ཤར་དཀར། ལྷོ་སེར། ནུབ་དམར། བྱང་ལྗང་། འོག་སྔོན་པོར་གྱུར་པའི་ཁ་དོག་སོ་སོའི་རང་མདོག་ལྟར་འཆར་བ་ལ་རྣམ་པ་ཡི་གེའི་གཟུགས་ཅན་གྱིས་བར་མཚམས་མེད་པར་ཁྱབ་པ། ཁ་དོག་དང་དབྱིབས་རྣམས་མ་འདྲེས་པར་སོ་སོར་བཀྲ་བའི་སྟེང་གི་ཡི་གེ་ཐམས་ཅད་ཨོཾ། ཤར་མ། ལྷོ་ཎི། ནུབ་པད། བྱང་མེ། འོག་ཧཱུྃ་དུ་སྣང་བའི་གཞལ་ཡས་ཁང་གི་ནང་དུ་སེམས་ཉིད་ཐིག་ལེ་དཀར་པོ་གསལ་སྟོང་འོད་ཀྱི་རང་བཞིན་ཅན་དེ་ཇེ་ཆེར་སོང་བ་ལས་རང་ཉིད་ཐུབ་པ་དང་དབྱེར་མེད་པའི་ཐུགས་རྗེ་ཆེན་པོར་གྱུར་པ་འོད་དུ་ཞུ་བ་ལས། སྐད་ཅིག་གིས་པྃ་ཡིག་དཀར་པོ་ལས་ནམ་མཁའི་མཐའ་དང་མཉམ་པའི་པདྨ་དཀར་པོ་འདབ་མ་སྟོང་དང་ལྡན་པའི་ལྟེ་བར་ཨ་དཀར་པོ་ལས་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿདཀར་པོ་ཡོངས་སུ་གྱུར་པ་ལས་ཐིག་ལེ་དཀར་པོ་ནམ་མཁའ་ལྟར་མཐའ་དང་བྲལ་བའི་རང་བཞིན་ཅན། དེ་ཡོངས་སུ་གྱུར་པ་ལས་བཀོད་པ་བསམ་གྱིས་མི་ཁྱབ་པའི་ཐུགས་རྗེ་ཆེན་པོ་རྒྱལ་བ་རྒྱ་མཚོ་ནམ་མཁས་གར་ཁྱབ་ཏུ་སྐུས་ཁྱབ་པ། དབུ་བཅུ་གཅིག་ཕྱག་སྟོང་སྤྱན་སྟོང་དང་ལྡན་པ། རྩ་ཞལ་དཀར། གཡས་དམར། གཡོན་ལྗང་། དེའི་སྟེང་གི་ཞལ་དབུས་ལྗང་། གཡས་དཀར། གཡོན་དམར། དེའི་སྟེང་གི་ཞལ་དབུས་དམར། གཡས་ལྗང་། གཡོན་དཀར་བ། དེའི་སྟེང་ན་ཁྲོ་ཞལ་ནག་པོ་མཆེ་བ་གཙིགས་པ། སྤྱན་གསུམ་པ། རལ་པ་དམར་སེར་གྱེན་དུ་བརྗེས་པ། དེའི་སྤྱི་བོར་ཞི་ཞལ་དམར་པོ་གཙུག་ཏོར་ཅན། རྩ་བའི་ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་གཉིས་པ་ན་བགྲང་ཕྲེང་། གསུམ་པ་མཆོག་སྦྱིན་གྱི་ཕྱག་རྒྱས་ཡི་དྭགས་ཀྱི་སྐོམ་པ་སེལ་བ། བཞི་པ་ན་འཁོར་ལོ། །གཡོན་གྱི་གཉིས་པ་ན་པདྨ། གསུམ་པ་ན་རིལ་བ་སྤྱི་བླུགས། བཞི་པ་ན་མདའ་གཞུ་འཛིན་པ། ཕྱག་ལྷག་མ་དགུ་བརྒྱ་དང་དགུ་བཅུ་རྩ་གཉིས་པོ་ཐམས་ཅད་མཆོག་སྦྱིན་མཛད་པ། ཞབས་རྡོ་རྗེ་སྐྱིལ་ཀྲུང་གིས་བཞུགས་པ། བ་སྤུའི་བུ་ག་རེ་རེ་ན་སངས་རྒྱས་ཀྱི་ཞིང་གྲངས་མེད་པ། དེ་རྣམས་ན་སངས་རྒྱས་བྱང་སེམས་མཐའ་ཀླས་པ་བཞུགས་པ། གནས་གསུམ་གྱི་ཡིག་འབྲུ་ལས་འོད་ཟེར་གྱི་ཚོགས་འཕྲོས་པས་སེམས་ཅན་གྱི་དོན་དཔག་ཏུ་མེད་པ་མཛད་པ་ཞིག་ཏུ་གྱུར་པར་བསམས་ལ་ང་རྒྱལ་དང་གསལ་སྣང་ཅི་ཐོན་བྱའོ། །དེ་ལྟར་ཕྱི་བཀོད་པ་བསམ་གྱིས་མི་ཁྱབ་པའི་བསྐྱེད་རིམ་གསལ་ཐེབས་ནས་རིམ་པ་བཞིན་དམིགས་པ་ཕྱི་མ་རྣམས་ལ་འཇུག་པར་བྱ་སྟེ། དེའི་ཐུགས་ཀར་ཐིག་ལེ་གཉིས་པ་མི་མཇེད་ཀྱི་བཀོད་པ་སྔར་ལྟ་བུའི་གཞལ་ཡས་ཁང་གི་ནང་དུ་པད་ཟླའི་སྟེང་ན་ཨོཾ་སེར་པོ་ལས་ཐུབ་པ་ཆེན་པོ་རྣམ་པར་སྣང་མཛད་གངས་ཆེན་མཚོ་སྤྲུལ་སྐུའི་ཆ་བྱད་ཅན། གཡས་སྐྱབས་སྦྱིན་གྱི་ཕྱག་རྒྱ་དང་གཡོན་མཉམ་བཞག་མཛད་པ། གཡས་གཡོན་མཆོག་ཟུང་བཞེངས་ཏེ་བཞུགས་པ། ཐེག་པ་གསུམ་གྱི་འཁོར་ཚོགས་རྒྱ་མཚོས་བསྐོར་བ། དེའི་ཐུགས་ཀར་ཐིག་ལེ་གསུམ་པ་ཁ་བ་ཅན་གྱི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་སྤྱན་རས་གཟིགས་རྒྱལ་བ་རྒྱ་མཚོ་བཀོད་པ་བསམ་གྱིས་མི་ཁྱབ་པ་ཇི་ལྟ་བ་བཞིན་བཞུགས་པ། དེའི་ཐུགས་ཀར་ཐིག་ལེ་བཞི་པ་ཡང་སྒོས་དབུ་རུ་བྱང་ཕྱོགས་ཀྱི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་ཧྲཱིཿལས་འབྲོམ་ཤེལ་གྱི་ཁྱེའུ་དཀར་པོ་ཞི་ཞིང་འཛུམ་པ། དབུ་སྐྲ་མཐིང་ག་དཔུང་པའི་ཐད་དུ་སླེབས་པ། ཕྱག་གཡས་ཤེལ་དཀར་གྱི་ཕྲེང་བ་དང་། གཡོན་ཤེལ་གྱི་འཁར་བ་རྩེ་མོར་པདྨ་དཀར་པོ་འདབ་མ་སྟོང་དང་ལྡན་པའི་ལྟེ་བར་ཟླ་གདན་ལ་ཡུམ་ཆེན་མོ། གཡས་སུ་བླ་མ་མར་མེ་མཛད། གཡོན་དུ་རྒྱལ་བ་ཤཱཀྱ་ཐུབ་པ། འདབ་མ་སྟོང་ལ་སངས་རྒྱས་སྟོང་བཞུགས་པས་མཚན་པ་འཛིན་པ། ཞབས་གཉིས་མཉམ་པའི་སྟབས་ཀྱིས་བཞེངས་པ། འདི་བཞི་ལ་རྟེན་གྱི་ཐིག་ལེ་ཞེས་བརྗོད་དེ། གཙོ་བོར་སྣོད་ཀྱི་འཇིག་རྟེན་སྤྱི་དང་བྱེ་བྲག་མ་དག་པའི་སྣང་ཞེན་སྦྱངས་ནས་དག་པ་རབ་འབྱམས་སུ་སྒྱུར་བར་བྱེད་པའི་ཕྱིར་རོ། །དེའི་ཐུགས་ཀར་ལྔ་པ་ཡུམ་ཤེར་ཕྱིན་མའི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་ཨ་སེར་པོ་ལས་ཡུམ་ཤེར་ཕྱིན་མ་སྐུ་མདོག་སེར་མོ་ཞལ་གཅིག་ཕྱག་བཞི་མ་གཡས་དང་པོ་ཐུགས་ཀར་སྐྱབས་སྦྱིན་གྱི་ཕྱག་རྒྱ་དང་། གཡོན་དང་པོ་མཉམ་བཞག་མཛད་པ། གཡས་འོག་མས་རྡོ་རྗེ་དང་། གཡོན་འོག་མས་གླེགས་བམ་འཛིན་པ། ཞབས་སྐྱིལ་ཀྲུང་གིས་བཞུགས་པ། ཕྱོགས་བཅུའི་རྒྱལ་བ་སྲས་བཅས་ཀྱིས་བསྐོར་བ། དེའི་ཐུགས་ཀར་དྲུག་པ་ཐུབ་པའི་ཐིག་ལེ། །གཞལ་ཡས་ཁང་གི་ནང་དུ་པད་ཟླའི་སྟེང་ན་མཱུྃ་སེར་པོ་ལས་ཐུབ་པ་བདུད་འདུལ་སྤྲུལ་སྐུའི་ཆ་ལུགས་ཅན། གཡས་ས་གནོན་དང་གཡོན་མཉམ་བཞག་མཛད་པ། དེའི་ཐུགས་དཀར་བདུན་པ་སྤྱན་རས་གཟིགས་ཀྱི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་ཧྲཱིཿདཀར་པོ་ལས་སྤྱན་རས་གཟིགས་ཞལ་གཅིག་ཕྱག་བཞི་པ། དང་པོ་གཉིས་ཐུགས་ཀར་ཐལ་མོ་སྦྱར་བ། ལྷག་མ་གཉིས་ཤེལ་ཕྲེང་དང་པད་དཀར་འཛིན་པ། ཞབས་སྐྱིལ་ཀྲུང་གིས་བཞུགས་པ། འཁོར་བྱང་ཆུབ་སེམས་དཔའི་ཚོགས་ཀྱིས་བསྐོར་བ། དེའི་ཐུགས་ཀར་བརྒྱད་པ་རྗེ་བཙུན་སྒྲོལ་མའི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་ཏཱྃ་ལྗང་གུ་ལས་སྒྲོལ་མ་ལྗང་གུ་ཞལ་གཅིག་ཕྱག་གཉིས་མ། གཡས་མཆོག་སྦྱིན་གྱི་ཕྱག་རྒྱ་དང་། གཡོན་ཨུཏྤལ་མཐེབ་སྲིན་གྱིས་ཐུགས་ཀར་འཛིན་པ། འཁོར་ཞི་བའི་ལྷ་མོ་དཔག་ཏུ་མེད་པས་བསྐོར་བ། དེའི་ཐུགས་ཀར་དགུ་པ་སྒྲོལ་མ་དྲག་མོའི་ཐིག་ལེ། གཞལ་ཡས་ཁང་གི་ནང་དུ་པད་ཉིའི་སྟེང་ན་ཏཱྃ་ལྗང་ནག་ལས་སྒྲོལ་མ་དྲག་མོ་ལྗང་ནག་ཞལ་གཅིག་ཕྱག་བཞི་མ། དང་པོ་གཉིས་གྲི་ཐོད། འོག་མ་གཉིས་ཌཱ་མ་རུ་དང་ཁ་ཊྭཱྃ་ག་འཛིན་པ། མི་ལྤགས་ཀྱི་གཡང་གཞི་དང་སྟག་ལྤགས་ཀྱི་ཤམ་ཐབས་དང་རུས་པའི་རྒྱན་དྲུག་གསོལ་ཞིང་གཡོན་བརྐྱང་གིས་བཞུགས་པ། འཁོར་དུ་ལྷ་མོ་དྲག་མོའི་ཚོགས་དཔག་ཏུ་མེད་པས་བསྐོར་བ། དེའི་ཐུགས་ཀར་བཅུ་པ་མི་གཡོ་བའི་ཐིག་ལེ། གཞལ་ཡས་ཁང་གི་ནང་དུ་པད་ཉིའི་སྟེང་དུ་ཧཱུྃ་མཐིང་ག་ལས་མི་གཡོ་བ་སྔོན་པོ་ཞལ་གཅིག་ཕྱག་གཉིས་པ། ཁྲོ་ཞིང་གཏུམ་པ། གཡས་རལ་གྲི་དང་གཡོན་ཞགས་པ་འཛིན་པ། སྦྲུལ་དང་རིན་པོ་ཆེས་བརྒྱན་ཅིང་གླང་ལྤགས་དང་སྟག་ཤམ་གསོལ་བ། གཡས་བརྐྱང་གིས་ཚོགས་ཀྱི་བདག་པོའི་གདན་ལ་མེ་དཔུང་གི་དབུས་ན་ཁྲོ་བོའི་ཚོགས་ཀྱིས་བསྐོར་ཏེ་བཞུགས་པ། འདི་དྲུག་ལ་བརྟེན་པ་ཡི་དམ་ལྷའི་ཐིག་ལེ་ཞེས་བརྗོད་དེ། གཙོ་བོར་རང་རང་གི་ལུས་ཐ་མལ་གྱི་སྣང་ཞེན་སྦྱངས་ནས་ཡི་དམ་གྱི་ལྷའི་སྐུར་བསྒོམ་པ་སྟེ་ཟབ་གསལ་གཉིས་མེད་ཀྱི་ལྷའི་རྣལ་འབྱོར་རྩལ་དུ་བཏོན་པ་དང་། སྔོན་འབྲོམ་ཆོས་ཀྱི་རྒྱལ་པོས་ཇོ་བོའི་སྤྱན་སྔར་སངས་རྒྱས་བྱང་སེམས་ཐམས་ཅད་ལྷ་བཞིར་བསྡུས་ནས་གདམས་པ་ལྟར། བཀའ་གདམས་ལྷ་ཆོས་བདུན་ལྡན་གྱི་རྣམ་ཐར་སྐྱོང་བར་འདོད་པ་རྣམས་ཀྱིས་གཙོ་བོར་ཉམས་སུ་བླང་དགོས་པའི་ཕྱིར་རོ། །དེའི་ཐུགས་ཀར་བཅུ་གཅིག་པ་ཇོ་བོའི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་ཧཱུྃ་དཀར་པོ་ལས་མགོན་པོ་ཨ་ཏི་ཤ་ལོངས་སྤྱོད་རྫོགས་སྐུའི་ཆ་ལུགས་ཅན། རྡོ་རྗེ་དང་དྲིལ་བུ་འཛིན་པ། སྐྱིལ་ཀྲུང་གིས་བཞུགས་པ། དེའི་མདུན་དུ་ཐུབ་པ་ལོངས་སྐུའི་ཆ་ལུགས་ཅན། གཡས་སུ་སྤྱན་རས་གཟིགས། གཡོན་དུ་སྒྲོལ་མ། རྒྱབ་ཏུ་མི་གཡོ་བ། ཤར་ལྷོར་ཇོ་བོ་པཎྜི་ཏའི་ཆ་བྱད་ཅན། ལྷོ་ནུབ་ཏུ་འབྲོམ་དགེ་བསྙེན་གྱི་ཆ་བྱད་ཅན། ནུབ་ཏུ་རྔོག་དང་། བྱང་ཤར་དུ་ཁུ་སྟོན་གཉིས་བོད་སྟོན་རབ་བྱུང་གི་ཆ་བྱད་ཅན། སྟེང་གི་ཆ་ལ་བརྒྱུད་པ་གསུམ་གྱི་བླ་མའི་ཚོགས་རྣམས་བཞུགས་པ། དེའི་ཐུགས་ཀར་བཅུ་གཉིས་པ་འབྲོམ་གྱི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་དུ་ཧྲཱིཿདཀར་པོ་ལས་འབྲོམ་ཆོས་ཀྱི་རྒྱལ་པོ་ལོངས་སྐུའི་གར་ཆས་སུ་བཞུགས་པ། དགུང་ལོ་བཅུ་དྲུག་ལོན་པའི་ན་ཚོད་ཅན། གཡས་པད་དཀར་དང་གཡོན་དྲིལ་བུ་འཛིན་པ། ཞབས་སྐྱིལ་ཀྲུང་གིས་བཞུགས་པའི་མདུན་དུ་ཕྱི་ལྟར་ན་རང་དང་ཆ་ལུགས་མཚུངས་པའི་ཁྱེའུ་དཀར་པོ་བཞི། གཡས་སུ་སེར་པོ་བཞི། གཡོན་དུ་ལྗང་གུ་བཞི། རྒྱབ་ཏུ་དམར་པོ་བཞི། ནང་ལྟར་ན་སྐུ་མཆེད་གསུམ་སོགས། གསང་བ་ལྟར་ན་རིགས་ལྔའི་ངོ་བོ། སྟེང་གི་ཆ་ལ་བརྒྱུད་པ་གསུམ་གྱི་བླ་མ་རྣམས་དང་། གསང་བ་ཡེ་ཤེས་སོགས་མཁའ་འགྲོའི་ཚོགས་དུ་མ་རྣམས་ཨུ་རྒྱན་གྱི་ཡུལ་དུ་མཛད་པ་ཇི་ལྟ་བ་བཞིན་གར་སྟབས་སྣ་ཚོགས་སུ་སྒྱུར་བ། དེའི་ཐུགས་ཀར་བཅུ་གསུམ་པ་བྱམས་པའི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་མེ་སེར་པོ་ལས་རྒྱལ་བ་བྱམས་པ་དགེ་སློང་སྣམ་སྦྱར་ཆོས་གོས་གྱོན་པ། མཚན་དཔེ་དང་ལྡན་པ། ཆོས་འཆད་ཀྱི་ཕྱག་རྒྱ་མཛད་པ། གཡས་གཡོན་ན་ནམ་མཁའ་དྲི་མ་མེད་པ་དང་བཙུན་པ་སྤྱན་རས་གཟིགས་གཉིས་དགེ་སློང་གི་ཆ་བྱད་ཅན་བཞེངས་ཏེ་བཞུགས་པ། སྟེང་གི་ཆ་ལ་འཕགས་པ་ཐོགས་མེད་སོགས་རྒྱ་ཆེན་སྤྱོད་བརྒྱུད་ཀྱི་བླ་མའི་ཚོགས་རྣམས་བཞུགས་པ། དེའི་ཐུགས་ཀར་བཅུ་བཞི་པ་འཇམ་དབྱངས་ཀྱི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་དྷཱིཿདམར་སེར་ལས་རྗེ་བཙུན་འཇམ་དཔལ་དབྱངས་རབ་བྱུང་སྤྲུལ་སྐུའི་ཆ་ལུགས་ཅན། ཕྱག་གཉིས་ཆོས་འཆད་ཀྱི་ཕྱག་རྒྱ་མཛད་པ། ཞབས་སྐྱིལ་ཀྲུང་གིས་བཞུགས་པ། གཡས་གཡོན་དུ་ཇོ་བོ་དང་སྤྱན་རས་གཟིགས་རབ་བྱུང་གི་རྣམ་པ་ཅན། སྟེང་གི་ཆ་ལ་མགོན་པོ་ཀླུ་སྒྲུབ་སོགས་ཟབ་མོ་ལྟ་བརྒྱུད་ཀྱི་བླ་མའི་ཚོགས་རྣམས་བཞུགས་པ། དེའི་ཐུགས་ཀར་བཅོ་ལྔ་པ་རྡོ་རྗེ་འཆང་གི་ཐིག་ལེ། གཞལ་ཡས་ཁང་གི་ནང་དུ་སེང་གེས་བཏེགས་པའི་རིན་པོ་ཆེའི་ཁྲིའི་སྟེང་དུ་པདྨ་ཉི་མ་ཟླ་བའི་གདན་ལ་ཧཱུྃ་མཐིང་ག་ལས་རྒྱལ་བ་རྡོ་རྗེ་འཆང་ལོངས་སྤྱོད་རྫོགས་སྐུའི་ཆ་ལུགས་ཅན་སྐུ་མདོག་སྔོན་པོ། རྡོ་རྗེ་དང་དྲིལ་བུ་ཐུགས་ཀར་བསྣོལ་ཏེ་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། གཡས་གཡོན་དུ་མཆོག་ཟུང་ལོངས་སྐུའི་ཆ་ལུགས་ཅན་གྱིས་བཞེངས་པ། སྟེང་གི་ཆ་ལ་ཏཻ་ལོ་ནཱ་རོ་སོགས་ཉམས་ལེན་བྱིན་རླབས་བརྒྱུད་པའི་བླ་མའི་ཚོགས་རྣམས་བཞུགས་པ། འདི་རྣམས་ལ་རྩ་བརྒྱུད་ཀྱི་བླ་མའི་ཐིག་ལེ་ཞེས་བརྗོད་དེ། གསང་སྔགས་བླ་མེད་ཀྱི་ལམ་གྱི་ལུས་ཡོངས་སུ་རྫོགས་པ་མྱུར་བ་མྱུར་བར་རྒྱུད་ལ་བསྐྱེད་པའི་ཕྱིར་བླ་མའི་རྣལ་འབྱོར་ལ་རྩལ་དུ་བཏོན་པ་ཡིན་པའི་ཕྱིར་རོ། །དེ་ཡན་ཆད་ནི་གཟུགས་སྐུའི་ལག་རྗེས་འཇོག་བྱེད་རྟེན་དང་བརྟེན་པར་བཅས་པའི་དཀྱིལ་འཁོར་བསྒོམ་པའོ།། །། གཉིས་པ་རྫོགས་རིམ་ནི། རྡོ་རྗེ་འཆང་དེའི་ཐུགས་ཀར་བཅུ་དྲུག་པ་བྱང་ཆུབ་སེམས་ཀྱི་ཐིག་ལེ། གཞལ་ཡས་ཁང་གི་ནང་དུ་པད་ཟླའི་སྟེང་ན་ཧཱུྃ་ཧཱུྃ་སེར་པོ་ལས་གསེར་མདོག་ཏུ་བསྒོམ་པའང་ཡོད། སྔོན་པོ་ལས་སངས་རྒྱས་ཆོས་ཀྱི་སྐུ་མཐིང་སྐྱ་མཉམ་གཞག་དང་སྐྱིལ་ཀྲུང་ཅན་ཆོས་ཀྱི་དབྱིངས་ལས་མི་གཡོ་བཞིན་དུ་སྒྱུ་འཕྲུལ་དྲ་བའི་རྣམ་རོལ་སྣ་ཚོགས་སུ་སྟོན་པ། དེའི་སྙིང་དཀྱིལ་དུ་ཤིན་ཏུ་ཕྲ་བའི་རླུང་གི་ངོ་བོ་བྱང་ཆུབ་སེམས་ཀྱི་ཐིག་ལེ་དཀར་དྭངས་ཡུངས་འབྲུ་ཙམ་པ། དེ་རྒྱ་ཇེ་ཆེར་སོང་ནས་ནོར་བུ་རིན་པོ་ཆེའི་སྣོད་རྒྱ་ཆེ་ཞིང་དཔངས་མཐོ་ལ་འོད་འཚེར་བ། དེའི་ནང་དུ་རང་སེམས་ཐིག་ལེ་སེར་པོ་སྲན་མ་ཙམ་པ་དྭངས་ཤིང་འོད་འཚེར་བ་མེར་མེར་གཡོ་ཞིང་འཇུ་བ་ལྟ་བུ། དེ་རྒྱ་ཇེ་ཆེར་སོང་བས་ཐིག་ལེའི་རྒྱ་མཚོ་གསེར་བཙོ་མའི་མདོག་ལྟར་དྭངས་ཤིང་ཁོད་སྙོམས་པ། གཞི་བརྟན་པ། རྒྱ་ཆེ་བ་ཁྱབ་ཆེ་བ། གཟུགས་བརྙན་ཐམས་ཅད་འཆར་བ་ཞིག་ཏུ་གྱུར་པར་བསམས་ལ་སེམས་ཞུགས་པ་བཞིན་གཏད་ནས་རྩེ་གཅིག་ཏུ་མཉམ་པར་བཞག་པས། རླུང་སེམས་འཇུག་པ་གཅིག་པས་སེམས་སྙིང་དབུས་ཀྱི་དྷཱུ་ཏིར་ཟིན་པ་ན་རླུང་ཡང་དེ་ཉིད་དུ་ཟིན་ཏེ། རླུང་དབུ་མར་ཞུགས་པའི་རྟགས་སུ་སྣ་བུག་ནས་མཉམ་རྒྱུ་ཁོ་ནར་འབབས། གནས་པའི་རྟགས་སུ་རྣལ་འབྱོར་ལ་མཉམ་པར་བཞག་པའི་སྐབས་སུ་ལྟེ་བ་མི་འགུལ། ཐིམ་པའི་རྟགས་སུ་འོད་གསལ་དུ་ཐིམ་པའི་སྣང་བ་ཤར་བ་སྟེ་དེ་ལྟ་བུའི་ཞུགས་གནས་ཐིམ་གསུམ་གྱི་རྩལ་རྫོགས་ཏེ་ཡུལ་བདེ་བ་ཆེན་པོ་དང་། ཡུལ་ཅན་སྟོང་པ་ཉིད་དུ་ཟུང་འཇུག་ཏུ་གྲུབ་པས་ན་རྫོགས་རིམ་དུ་འགྲོ་བ་ཡིན་ནོ། །དེ་ལྟར་ཐིག་ལེ་བཅུ་དྲུག་པོ་དེ་རེ་རེ་ལའང་རྒྱས་པར་ན་རྗེས་དྲན་ལྔ་ཚང་བར་བསྒོམས་ཏེ། རྩ་བརྒྱུད་བླ་མ་རྣམས་ལ་གསོལ་བ་གདབ་པ་དང་། ཆོས་སྐུའི་ལག་རྗེས་འཇོག་བྱེད་སྟོང་པའི་རྣལ་འབྱོར་བསྒོམ་པ་དང་། དེའི་ངང་ལས་ལྷ་བསྒོམ་པ་དང་དཀྱིལ་འཁོར་རྟེན་དང་བརྟེན་པར་བཅས་པ་ལ་གསལ་སྣང་ཐོན་ནས། རང་གི་སེམས་ཀྱི་ཆ་ཤས་ཤིག་གིས་འགྲོ་ཀུན་ཕ་མར་རྗེས་སུ་དྲན་པས་སེམས་ཅན་ཐམས་ཅད་དཀྱིལ་འཁོར་གྱི་ནང་དུ་ཁྲིད་དེ་དཀྱིལ་འཁོར་གྱི་གཙོ་བོ་ལ་ཐུན་མོང་མ་ཡིན་པའི་ཡན་ལག་བདུན་པ་འབུལ་བ་དང་། ཕྱག་དང་སྐོར་བ་མང་དུ་བྱས་ནས་གཟུངས་སྔགས་བཟླས་པས་སླར་ཡང་ནང་མ་ནང་མར་འཇུག་པ་དང་། ངག་སྔགས་སུ་རྗེས་དྲན་གྱིས་སོ་སོའི་སྙིང་པོ་དམིགས་པའི་གནད་དང་བཅས་པས་བཟླ་བ་རྣམས་བྱ་ཞིང་། མདོར་བསྡུ་ན། སྐབས་འདིར་གནས་གསུམ་བྱིན་རླབས་མན་ལྷན་ཅིག་ཏུ་བྱ་བ་ནི། ལྷ་ཚོགས་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་དག་པ་རབ་འབྱམས་ཀྱི་ཞིང་ཁམས་ནས་བསྒོམ་པ་དང་འདྲ་བའི་ཡེ་ཤེས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། ཛཿཧཱུྃ་བྃ་ཧོཿགཉིས་སུ་མེད་པར་གྱུར། པདྨ་ཀཱ་མ་ལཱ་ཡ་སྟྭཾ། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རྣམས་སྤྱན་དྲངས། ཁྱེད་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ་ཞེས་དབང་བསྐུར། ལུས་གང་། དྲི་མ་དག །ཆུའི་ལྷག་མ་སྤྱི་གཙུག་ཏུ་འཁྱིལ་བ་ལས་རང་རང་གི་ས་བོན་གྱིས་དབུར་བརྒྱན་པར་མོས་པ་སྟེ་ཡན་ལག་བཞི་རྫོགས་ཀྱི་ཚུལ་དུ་གསལ་བཏབ་ནས། རང་གི་སེམས་ཀྱི་ཆ་ཤས་ལས་གྲུབ་པའི་མཆོད་པའི་ལྷ་མོ་དཔག་ཏུ་མེད་པ་སྤྲོས་ཏེ། །ཕྱག་དང་ཕྱག་ཡུལ་གཉིས་སྟོང་པའི། །རྣམ་དག་སྐུ་ལ་ཡེ་ཕྱག་འཚལ། །སྐྱེ་གནས་འཇིག་པས་མ་གོས་པའི། །དྲི་མེད་མཆོད་ཚོགས་འབུལ་ལོ་ལྷ། །སྒོ་གསུམ་སྐྱེ་གནས་འཇིགས་བྲལ་བའི། །ཉེས་པའི་གཡང་ས་མཐོལ་ལོ་བཤགས། །སྟོང་ཡང་སྣ་ཚོགས་སྐུར་སྟོན་པའི། །གྲངས་མེད་འདྲེན་ལ་རྗེས་ཡི་རང་། །སྨོན་དང་མཚན་མས་སྟོང་པ་ཡི། །འཁོར་ལོ་དབྱིངས་སུ་བསྐོར་དུ་གསོལ། །སྐྱེ་བས་སྟོང་པའི་ཆོས་སྐུ་ཁྱེད། །ལྷུན་གྲུབ་གནས་པའི་རང་བཞིན་ལས། །གང་དུའང་འདའ་བར་མ་མཛད་ཅིག །དགེ་བ་འདི་ཡིས་འཁོར་བ་རྣམས། །འདི་འདྲར་རྟོགས་ཏེ་འདི་འདྲ་བའི། །གཞལ་ཡས་ཁང་དུ་འདྲོངས་གྱུར་ཏེ། །གསང་སྔགས་འདི་བཞིན་སྤྱོད་པར་བསྔོ། །གནས་སྐབས་ཀྲྀ་ཡའི་ལྷ་ལྔ་བཞིན། །པད་དཀར་སྟོང་ལྡན་ལྟེ་བ་ལ། །ཟླ་བ་ཞུན་མའི་གདན་སྟེང་དུ། །ཕྱི་ནང་གསང་བ་དེ་ཉིད་ཀྱི། །བསྐྱེད་རྫོགས་མཆོག་ཏུ་བསྔགས་པར་ཤོག །གློ་བུར་འདི་ཡང་ཆོས་དབྱིངས་ལས། །ཐ་དད་ཅི་ཡང་ཡོད་མ་མཆིས། །ཐ་དད་མེད་པར་ཕུན་ཚོགས་པའི། །བཀྲ་ཤིས་ཕུན་སུམ་ཚོགས་པར་ཤོག །གཙང་མ་རིགས་ཀྱི་བཀྲ་ཤིས་ཤོག །ཐོག་མཐའ་བར་གསུམ་གཙང་མ་ལས། །གཡོས་པ་མེད་པའི་བཀྲ་ཤིས་ཤོག །ཅེས་ཡན་ལག་བདུན་པ་དང་། རྒྱས་པར་ཚིགས་བཅད་སྦྲགས་མའམ་བསྡུ་ན། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱི་ཙྪ་སྭཱ་ཧཱ་ནས། ཤཔྡའི་བར་སྦྱར་བའི་ཆུ་གཉིས་སྔོན་འགྲོའི་ཉེར་སྤྱོད་ཀྱིས་མཆོད། སྤྲོ་ན་འདོད་ཡོན་ལྔ་དང་། རྒྱལ་སྲིད་བདུན། བཀྲ་ཤིས་རྫས་རྟགས་སོགས་ཀྱང་སྤྱི་ལྟར་ཕུལ། །མ་དག་ཞིང་གི་འཇིག་རྟེན་ཇི་སྙེད་པ། །དག་པ་རབ་འབྱམས་ལྷ་ཡི་གཞལ་ཡས་སུ། །མངོན་པར་ལེགས་སྒྱུར་བཅོམ་ལྡན་ཐུབ་པ་ཆེ། །རྗེ་བཙུན་ཕྱག་ན་པདྨོའི་ཚོགས་ལ་བསྟོད། །སྡེ་སྣོད་གསུམ་གྱི་ཡུམ་ཆེན་ཤེར་ཕྱིན་མ། །སངས་རྒྱས་ཞིང་དང་ཁྲོ་བོ་མཁའ་འགྲོའི་ཚོགས། །ཀུན་འདུས་བཀའ་གདམས་ལྷག་པའི་ལྷ་མཆོག་བཞི། །སྐྱབས་མཆོག་ཡི་དམ་ཆོས་སྐྱོང་རྣམས་ལ་བསྟོད། །རྒྱ་ཆེན་སྤྱོད་དང་ཟབ་མོ་ལྟ་བའི་ལམ། །ཉམས་ལེན་སྙན་བརྒྱུད་གདམས་པ་མཆོག་གི་གཏེར། །རྒྱུན་ཆད་མེད་པར་འཛིན་ཅིང་སྤེལ་མཁས་པ། །ལྷ་ཆོས་བདུན་ལྡན་བརྒྱུད་པ་རྣམས་ལ་བསྟོད། །གདོད་ནས་རྣམ་དག་སྣང་སྟོང་དག་པའི་གཤིས། །བཞིན་ལག་མཚན་དཔེའི་འཇའ་ཚོན་རྣམ་བཀྲ་བ། །འགྱུར་མེད་ཆོས་སྐུ་གསལ་སྟོང་རླུང་སེམས་ཟུང་། །ཆེས་ཕྲ་ཐིག་ལེའི་རྣམ་པར་ཤར་ལ་བསྟོད། །ལྷ་ཆོས་བདུན་གྱི་ཉིང་ཁུ་ཐིག་ལེའི་ཆོས། །ཉམས་སུ་བསྟར་བས་ཚེ་འདིར་ཟུང་འཇུག་སྐུ། །མངོན་དུ་བྱས་ཏེ་དོན་གཉིས་མ་ལུས་པ། །འབད་མེད་ལྷུན་གྱིས་གྲུབ་པར་བྱིན་གྱིས་རློབས། །ཞེས་རྡོ་རྗེའི་གླུ་སྙན་འགྱུར་གྱི་ཉམས་དང་ལྡན་པས་ཡོན་ཏན་རྗེས་སུ་དྲན་པའི་སྒོ་ནས་བསྟོད་པར་བསམ། དེ་ནས་རང་ཉིད་ཐུགས་རྗེ་ཆེན་པོ་ཕྱག་གཉིས་པའི་རྣམ་པར་ལོགས་སུ་བྱེ་བས། འགྲོ་ཀུན་ཕ་མར་རྗེས་སུ་དྲན་པའི་སྙིང་རྗེ་ཆེན་པོས་བལྟས་ཏེ། རང་ཉིད་ཀྱིས་སྣ་དྲངས་སེམས་ཅན་ཐམས་ཅད་ཕྱི་བཀོད་པ་བསམ་གྱིས་མི་ཁྱབ་པའི་དཀྱིལ་འཁོར་དུ་ཞུགས། ཐུགས་རྗེ་ཆེན་པོ་རྒྱལ་བ་རྒྱ་མཚོ་ལ་ཕྱག་དང་བསྐོར་བ་བྱས་ཏེ་གསོལ་བ་བཏབ། ཁྱད་པར་དུ་རང་གི་ལུས་ལོངས་སྤྱོད་དུས་གསུམ་དུ་བསགས་པའི་དགེ་ཚོགས་རྒྱ་མཚོ་དང་བཅས་པ་ཐམས་ཅད་འགྲོ་བ་མགོན་དང་སྐྱབས་མེད་པ་རྣམས་ཀྱི་ཕན་པ་དང་བདེ་བ་གང་ལ་གང་འཚམས་ཀྱི་ཉེར་འཚོའི་རྟེན་དུ་འགྱུར་པའི་ཕྱིར་ཕོངས་པ་མེད་པར་ལྷ་ཚོགས་རྣམས་ལ་ཀུན་ཏུ་བཟང་པོའི་མཆོད་སྤྲིན་ཆེན་པོར་ཕུལ་བས་ཟག་མེད་ཀྱི་བདེ་བས་དགྱེས། གནས་གསུམ་གྱི་ཡི་གེ་གསུམ་དང་ཁྱད་པར་ཐུགས་ཀའི་ས་བོན་དང་སྔགས་ཕྲེང་ལས་འོད་ཟེར་བདུད་རྩིའི་རྒྱུན་དང་བཅས་པ་བྱུང་། བདག་དང་སེམས་ཅན་ཐམས་ཅད་ཀྱི་ལུས་སེམས་ལ་ཞུགས། ལས་ཉོན་སྡིག་སྒྲིབ་བག་ཆགས་དང་བཅས་པ་སྦྱངས། སྐུ་གསུང་ཐུགས་ཀྱི་བྱིན་རླབས་ཐོབ་པར་བསམ་མོ། །ལྔ་པ་ངག་སྔགས་སུ་རྗེས་སུ་དྲན་པ་ལ་གཉིས་ཏེ། རིམ་པ་དང་པོའི་ལྷའི་རྣལ་འབྱོར་དང་ལྡན་པའི་སྒོ་ནས་ཐིག་ལེ་བཅུ་དྲུག་གི་ལྷ་ཚོགས་རྣམས་ཀྱི་ཐུགས་རྒྱུད་སྐུལ་བའི་བཟླས་བརྗོད་ཇི་ལྟར་བྱ་བ་དང་། རིམ་པ་གཉིས་པའི་རྣལ་འབྱོར་དང་ལྡན་པས་རླུང་སྔགས་དབྱེར་མེད་དུ་བྱས་ཏེ་རྡོ་རྗེའི་བཟླས་པ་ལ་སློབ་ཚུལ་ལོ། །དང་པོ་ནི། ཐིག་ལེ་བཅུ་དྲུག་གི་ལྷ་ཚོགས་རྣམས་ཀྱི་གཙོ་བོའི་ཐུགས་ཀར་སོ་སོའི་ས་བོན་གྱི་མཐར་སྔགས་ཀྱི་ཕྲེང་བ་བཀོད་ལ། དེ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཐུགས་མཉེས་པའི་མཆོད་པ་ཕུལ། གསང་གསུམ་གྱི་བྱིན་རླབས་ཐམས་ཅད་འོད་དང་འོད་ཟེར་གྱི་རྣམ་པར་སྤྱན་དྲངས་ནས་རང་ལ་ཐིམ། སླར་ཡང་འོད་ཟེར་འཕྲོས་པས་སྣོད་བཅུད་ཐམས་ཅད་ཀྱི་སྒྲིབ་གཉིས་བག་ཆགས་དང་བཅས་པ་སྦྱངས། ཐམས་ཅད་དག་པའི་ཞིང་གི་རྣམ་རོལ་དུ་གྱུར་པར་བསམས་ལ། ཐིག་ལེ་དང་པོ་ལ། ཨོཾ་མ་ཎི་པདྨེ་ཧཱུྃ། ཞེས་བཟླ། དེ་བཞིན་ཏུ་གཉིས་པ་ལ། ཨོཾ་མུ་ནི་མུ་ནི་མ་ཧཱ་མུ་ན་ཡེ་སྭཱ་ཧཱ། གསུམ་བཞི་གཉིས་ལ་ཡིག་དྲུག་དང་། ལྔ་པ་ལ། ཏདྱཱ་ཐཱ། ཨོཾ་ག་ཏེ་ག་ཏེ། པཱ་ར་ག་ཏེ། པཱ་ར་སཾ་ག་ཏེ། བོ་དྷི་སྭཱ་ཧཱ། དྲུག་པ་ལ་མུ་ནེ། བདུན་པ་ལ་ཡིག་དྲུག །བརྒྱད་པ་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དགུ་པར། ཨོཾ་ཏཱ་རེ་ཏུ་ཏྟཱ་རེ་ཏུ་རེ་ཧཱུྃ་ཕཊ། བཅུ་པ་ལ། ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། བཅུ་གཅིག་པ་ལ། བཀའ་གདམས་ལྷ་བཞིའི་སྔགས་སམ། ཡང་ན། ཨོཾ་མ་ཧཱ་གུ་རུ་དཱི་པཾ་ཀཱ་ར་ཨ་ཏི་ཤ་སྭཱ་ཧཱ། བཅུ་གཉིས་པ་ལ་ཡིག་དྲུག །བཅུ་གསུམ་པ་ལ། ཨོཾ་མཻ་ཏྲི་མཻ་ཏྲི་མ་ཧཱ་མཻ་ཏྲི་ཡེ་སྭཱ་ཧཱ་དང་། ཨོཾ་མཻ་ཏྲི་ཡེ་སྭཱ་ཧཱ་གང་རུང་། བཅུ་བཞི་པ་ལ། ཨོཾ་ཝཱ་གི་ཤྭ་རི་མཱུྃ། བཅོ་ལྔ་པ་ལ། ཨོཾ་བཛྲ་དྷྲྀཀ་ཧཱུྃ་ཧཱུྃ། བཅུ་དྲུག་པ་ལ། ཨོཾ་དྷརྨ་ཀཱ་ཡ་སིདྡྷི་ཧཱུྃ། ཞེས་དང་། ཨོཾ་ཨཱཿཧཱུྃ། ཞེས་སོ་སོར་བརྒྱ་སྟོང་སོགས་ཅི་ནུས་སུ་བཟླ། ཡང་ན། དེ་ཐམས་ཅད་ལ་ཡིག་དྲུག་ཁོ་ན་བཟླ་ཞིང་། གཙོ་བོར་ཡིག་དྲུག་ལ་རྩལ་དུ་འདོན། དེའི་ཚེ་དམིགས་པ་ནི། རང་ཕྱི་བཀོད་པ་བསམ་གྱིས་མི་ཁྱབ་པའི་ཐུགས་རྗེ་ཆེན་པོའི་སྐུའི་བ་སྤུའི་ཁུང་བུ་རེ་རེར་ཡང་ཞིང་ཁམས་བསམ་གྱིས་མི་ཁྱབ་པ་དང་། དེ་རེ་རེར་ཡང་རྒྱལ་བ་སྲས་བཅས་བསམ་གྱིས་མི་ཁྱབ་པ་ཉི་ཟེར་ལ་རྡུལ་འཁྲིགས་པ་ལྟར་བཞུགས་པ་ཐམས་ཅད་ཀྱི་ཞལ་ནས་ཀྱང་ཡི་གེ་དྲུག་པའི་སྒྲ་འུར་དིར་རེ་གསུང་བ་དང་། དེར་མ་ཟད་ཞིང་ཁམས་དེ་དང་དེར་གནས་པའི་ས་ཆུ་མེ་རླུང་སྟེ་རྟེན་འབྱུང་བ་བཞིའི་སྒྲ་དང་། བརྟེན་པ་སེམས་ཅན་ཐམས་ཅད་ཀྱང་ཐུགས་རྗེ་ཆེན་པོའི་རྣམ་རོལ་ཏུ་ཤར་བས་ཡི་གེ་དྲུག་པའི་སྒྲ་འུར་འུར་སྒྲོག་པར་བསམས་ལ། ཅིར་སྣང་ལྷ་སྐུ། སྒྲར་གྲག་ཡི་གེ་དྲུག་པ། དྲན་རྟོག་ཐུགས་རྗེ་ཆེན་པོའི་ཐུགས་སྟོང་ཉིད་སྙིང་རྗེའི་སྙིང་པོ་ཅན་དུ་ལྟ་བའི་ལམ་ཁྱེར་ཟབ་མོ་དང་མ་བྲལ་བའི་ངང་ནས་བཟླས་པ་བྱ་བ་ནི་བསོད་ནམས་ཀྱི་ཕུང་པོ་བསམ་གྱིས་མི་ཁྱབ་པ་ཡིན་ཏེ། དེའི་རྒྱུ་མཚན་ཞིབ་པར་ཟ་མ་ཏོག་བཀོད་པའི་མདོ་སྡེ་སོགས་ལས་ཤེས་པར་བྱའོ། །གཉིས་པ་ནི། ལུས་གནད་བསྲངས་ཏེ་རླུང་རོ་བསལ་ལ་ཅུང་ཟད་ངལ་བསོ། །དེ་ནས་སྣ་བུག་གཉིས་ནས་རླུང་ནང་དུ་འཇུག་པ་ཨོཾ་གྱི་གདངས་དང་། སྙིང་གའི་བྱང་ཆུབ་སེམས་ཀྱི་ཐིག་ལེ་གནས་པ་ཨཱཿའི་གདངས་དང་། དེ་ལས་ཕྱིར་ལྡང་བ་ཧཱུྃ་གི་གདངས་དང་། ངོ་བོ་དབྱེར་མེད་དུ་སྦྱོར་བའི་རྡོ་རྗེའི་བཟླས་པ་ལ་འབད་དོ། །སྤྱིར་འདིའི་རྫོགས་རིམ་ཉིད་འདུས་པ་ཡེ་ཤེས་ཞབས་ལུགས་ཀྱི་རྫོགས་རིམ་ཐིག་ལེ་བཞི་རིམ་དང་མཐུན་ཞིང་། ཁྱད་པར་མཐར་ཐུག་ལྷན་སྐྱེས་ཀྱི་དགའ་བའི་དབང་དུ་བྱས་ཏེ་སྙིང་གར་མི་ཤིགས་པའི་ཐིག་ལེ་བསྒོམ་ཚུལ་དང་། འདིའི་བྱང་ཆུབ་སེམས་ཀྱི་ཐིག་ལེ་གཉིས་དོན་གཅིག་ཏུ་འབབས་པའི་ཕྱིར། ཚུལ་འདི་ལ་ཡེ་ཤེས་ཞབས་ལུགས་ཀྱི་གཞུང་ཆེན་པོ་རྣམས་དང་། མན་ངག་གི་ཡི་གེ་རྣམས་ལེགས་པར་རྟོགས་པར་བྱས་ཏེ་ཕན་ཚུན་ལྟོ་སྦྱར་ནས་ངེས་ཤེས་བསྐྱེད་པར་བྱའོ་ཞེས་བླ་མ་ཕྱི་མ་རྣམས་གསུང་ངོ་། །གསུམ་པ་རྗེས་ནི། ཐུན་དེ་ལས་ལྡང་བར་བརྩམ་པ་ན། ཡི་གེ་བརྒྱ་པ་ཅི་ནུས་སུ་བཟླ་པས་ཏིང་ངེ་འཛིན་གྱི་ལྷག་ཆད་ཁ་བསྐང་བ་དང་། བརྟན་ཅིང་ནུས་པ་གོང་འཕེལ་དུ་བྱས་ནས་སྔར་ལྟར་མཆོད་ཅིང་བསྟོད། རང་ཉིད་གཙོ་བོའི་ཐུགས་ཀའི་ཐིག་ལེ་སེར་པོ་ཡུངས་འབྲུ་ཙམ་དྭངས་ཤིང་གསལ་བ་དེ་ལས་འོད་ཟེར་འཕྲོས་པས་སྣོད་བཅུད་ཐམས་ཅད་ལན་ཚྭ་ཆུར་བཅུག་པ་བཞིན་འོད་དཀར་པོ་བདེ་བ་ཆེན་པོའི་ངོ་བོར་མེར་གྱིས་ཞུ་ནས་ཕྱི་བཀོད་པ་བསམ་གྱིས་མི་ཁྱབ་པའི་ལྷའི་གཞལ་ཡས་ཁང་ལ་ཐིམ་ཞིང་ཐིག་ལེ་བཅོ་ལྔའི་བར་གྱི་གཞལ་ཡས་ཁང་དེ་རྣམས་ཀྱང་རང་རང་གི་ཁ་དོག་གི་ཐིག་ལེར་གྱུར་ནས་ཕྱི་མ་ཕྱི་མ། ནང་མ་ནང་མ་ལ་ཐིམ་པའི་མཐར། ཐིག་ལེ་སེར་པོ་སྲན་མ་ཙམ་པ་ཞིག་ཏུ་གྱུར། དེ་ཉིད་སངས་རྒྱས་ཆོས་ཀྱི་སྐུའི་སྤྱི་བོའི་ཨོཾ་ལ་ཐིམ། དེ་ཨཱཿལ། དེ་ཧཱུྃ་ལ། དེ་ཡང་ཤིན་ཏུ་ཕྲ་བའི་རླུང་སེམས་ཀྱི་ཐིག་ལེ་ལ་ཐིམ་ནས་སྟོང་ཉིད་སྙིང་རྗེ་གཉིས་སུ་མེད་པར་གྱུར་པར་བསམས་ལ་ཅི་གནས་སུ་མཉམ་པར་བཞག །དེའི་ངང་ལས་སྐད་ཅིག་གིས་རང་ཉིད་ཐུགས་རྗེ་ཆེན་པོ་ཞལ་གཅིག་ཕྱག་གཉིས་པའི་སྐུ་འཇའ་ཚོན་ལྟར་ལམ་གྱིས་ཤར་བའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པར་མོས་ལ། །བརྒྱུད་པ་གསུམ་ལྡན་བླ་མ་ཐམས་ཅད་དང་། །ཡི་དམ་ཐུགས་རྗེ་ཆེན་པོའི་ལྷ་ཚོགས་དང་། །ཇོ་བོ་ཡབ་སྲས་ཐུགས་རྗེ་ཅན་རྣམས་ཀྱིས། །བདག་གི་སྨོན་པའི་གནས་འདི་འགྲུབ་པར་མཛོད། །འདིས་མཚོན་དུས་གསུམ་དགེ་ཚོགས་བསྡོམས་པའི་མཐུས། །བདག་དང་མཁའ་མཉམ་འགྲོ་བ་མ་ལུས་པ། །བརྒྱུད་པ་གསུམ་ལྡན་བླ་མ་དམ་པ་ཡིས། །ཚེ་རབས་ཀུན་ཏུ་འབྲལ་མེད་རྗེས་བཟུང་སྟེ། །བཀའ་གདམས་རྣམ་ཐར་གཙང་མ་མཐར་ཕྱིན་ཤོག །སྐྱེས་བུ་གསུམ་གྱི་ལམ་དུ་གསུང་རབ་ཀུན། །བསྡུས་ཏེ་ཉམས་སུ་བླངས་པས་རྒྱུད་སྦྱངས་ནས། །གསང་ཆེན་སྒོར་ཞུགས་དམ་ཚིག་ཚུལ་བཞིན་སྲུང་། །ཟུང་འཇུག་སྙིང་གི་ཐིག་ལེ་འགྲུབ་པར་ཤོག །ལྷ་བཞིས་ལུས་དང་སྡེ་སྣོད་གསུམ་གྱིས་ངག །བསླབ་པ་གསུམ་གྱིས་སེམས་བརྒྱན་རྗེས་དྲན་ལྔའི། །ཉམས་ལེན་མཐར་ཕྱིན་འགྲོ་ཀུན་སྒྲོལ་བ་ལ། །རྒྱལ་བ་རྒྱ་མཚོ་ཉིད་དང་མཚུངས་པར་ཤོག །གསང་ཆེན་སྙིང་གི་ཐིག་ལེའི་གདམས་པ་མཆོག །དབེན་པའི་གནས་སུ་ཉམས་སུ་ལེན་པ་ལ། །ཇོ་བོའི་བཀའ་སྲུང་དགུ་བཅུ་རྩ་གཉིས་ཀྱིས། །གཡེལ་བ་མེད་པར་རྟག་ཏུ་གྲོགས་བྱེད་ཤོག །ཅེས་བསྔོ་སྨོན་དང་། ལེགས་ཚོགས་ཀུན་གྱི་འབྱུང་གནས་བླ་མ་རྣམས་ཀྱི་བཀྲ་ཤིས་ཤོག །སྐུ་གསུམ་མངོན་དུ་གྱུར་པ་སངས་རྒྱས་རྣམས་ཀྱི་བཀྲ་ཤིས་ཤོག །ཐོག་མཐའ་བར་དུ་དགེ་བ་དམ་པའི་ཆོས་ཀྱི་བཀྲ་ཤིས་ཤོག །བསླབ་གསུམ་རྣམ་པར་དག་པ་དགེ་འདུན་རྣམས་ཀྱི་བཀྲ་ཤིས་ཤོག །བདག་གཞན་མཉམ་བརྗེ་རིན་ཆེན་བྱང་ཆུབ་སེམས་ཀྱི་བཀྲ་ཤིས་ཤོག །ཐབས་ཤེས་ཟུང་འཇུག་རིམ་གཉིས་རྣལ་འབྱོར་ཟབ་མོའི་བཀྲ་ཤིས་ཤོག །ཕན་བདེའི་གཞིར་གྱུར་ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །འགྲོ་ཀུན་ཐེག་མཆོག་ཆོས་ཀྱི་དཔལ་ལ་སྤྱོད་པའི་བཀྲ་ཤིས་ཤོག །ཅེས་ཤིས་པ་བརྗོད་ཅིང་སྤྱོད་ལམ་ལ་འཇུག་པར་བྱའོ། །དེ་ལྟར་ན་དེ་རྣམས་ཀྱི་སྒོ་ནས་བཀའ་གདམས་གླེགས་བམ་རིན་པོ་ཆེའི་དོན་གྱི་སྙིང་པོ་མདོར་བསྡུས་ཏེ་རྗེས་དྲན་ལྔའི་ཚུལ་གྱིས་ཉམས་སུ་ལེན་ཚུལ་གྱི་ཁྲིད་འཇམ་དབྱངས་ཀུན་དགའ་གྲོལ་མཆོག་གི་ཁྲིད་བརྒྱ་སོགས་ལས་ཀྱང་མདོ་ཙམ་འབྱུང་བ་དང་། ད་ལྟར་གྱི་བླ་མ་དམ་པ་རྣམས་ཀྱི་ཕྱག་བཞེས་དང་ཞལ་ལུང་ལས་ཇི་ལྟར་ཐོས་པ་བཞིན་ངག་འདོན་དང་དམིགས་རིམ་ཕྱོགས་གཅིག་ཏུ་བཀོད་པ་ཡིན་ནོ། །གཉིས་པ་ནི། དེ་ལས་ཀྱང་རྒྱས་པར་སྤྲོ་ན། ཐིག་ལེ་དང་པོའི་སྐབས་ལྷའི་གསལ་སྣང་དང་ཚོགས་བསག་པའི་དམིགས་པ་ནན་ཏན་དུ་བྱས་ནས། ཐིག་ལེ་གཉིས་པ། གསུམ་པ། བཞི་པ་རྣམས་ལ་རིམ་པ་བཞིན་སྐྱེས་བུ་ཆུང་ངུའི་ཁྲིད། འབྲིང་གི་ཁྲིད། ཆེན་པོ་ཐེག་པ་ཆེན་པོའི་བློ་སྦྱོང་བའི་ཁྲིད་རྣམས་བསྒོམ། ལྔ་པ་ལ་ཤེར་ཕྱིན་གྱི་ཐུགས་ཀའི་འོད་ཟེར་གྱི་འཕྲོ་འདུས་བདུད་སྡེའི་དཔུང་ཚོགས་རྣམས་བཅོམ་ནས་ཞི་བར་བསམ་མོ། །དྲུག་པ་བདུན་པ་བརྒྱད་པ་དགུ་པ་བཅུ་པ་རྣམས་ལ་བཀའ་གདམས་ལྷ་བཞིའི་ཁྲིད་བསྒོམ་ཞིང་། ཁྱད་པར་སྒྲོལ་མ་དྲག་མོ་དང་མི་གཡོ་བ་གཉིས་ལ་དགྲ་བགེགས་ཚར་གཅོད་པའི་དམིགས་པ་དང་དྲག་སྔགས་བཟླ། ཐིག་ལེ་བཅུ་གཅིག་པ་འདིར་ནི་བརྒྱུད་པ་གསུམ་ལ་བརྟེན་པའི་བླ་མའི་སྒྲུབ་པ་གཙོ་བོར་བྱ། བཅུ་གཉིས་པར་གླེགས་བམ་རིན་པོ་ཆེའི་སྐྱེས་རབས་སྤྱི་དང་། ཁྱད་པར་དཀོན་མཆོག་འབངས་ཀྱིས་ཨུ་རྒྱན་གྱི་ཡུལ་དུ་བྱོན་པའི་རྡོ་རྗེའི་གླུ་དང་ཆོས་ཟབ་མོ་དཔག་ཏུ་མེད་པའི་སྐོར་གྱི་རྣམ་ཐར་ཡིད་ཡུལ་དུ་ངེས་པར་བྱས་ནས་རང་ཉིད་ཀྱང་བློས་དེར་ཕྱིན་པ་དང་དེ་འདྲ་བ་བྱས་པའི་བསམ་སྒོམ་ནན་ཏན་ཏུ་བྱ། བཅུ་གསུམ་པ་ལ་ཞི་གནས་གཙོ་བོར་བསྒོམ། བཅུ་བཞི་པ་ལ་ཟབ་མོ་དབུ་མའི་ལྟ་བ་བསྒོམ། བཅོ་ལྔ་པར་རང་གང་མོས་པའི་བླ་མེད་ཀྱི་རྒྱུད་སྡེ་ཞིག་གི་རྫོགས་རིམ་དང་སྦྱར་ན་ལེགས། བཅུ་དྲུག་པ་ནི་སངས་རྒྱས་ཆོས་སྐུའི་ཐིག་ལེ་དེ་ཉིད་གྲངས་མེད་པར་སྤྲོ་ཞིང་སྡུད་པ་སོགས་ཀྱི་ངང་ནས་ཐིག་ལེའི་ནང་དུ་སངས་རྒྱས་ཀྱི་ཞིང་རྟེན་དང་བརྟེན་པར་བཅས་པ་གྲངས་མེད་པ་འཆར་བ་དང་། དེ་རྣམས་ལ་རང་ཉིད་ཀྱིས་མཇལ་ཞིང་ཆོས་ཉན་པ་སོགས་མང་དུ་བསམས་པའི་མཐར་ཐིག་ལེ་དེ་ཉིད་གསལ་སྟོང་དབྱིངས་རིག་སྤྲོས་པ་དང་བྲལ་བའི་ངང་དུ་མཉམ་པར་གཞག །ཐུན་བསྡུ་བ་ནི་བཅུ་དྲུག་པོ་ཐམས་ཅད་ལ་རིགས་འགྲེའོ། །འཁྲིད་རྒྱུན་ཁྱེར་དུ་ཉམས་སུ་ལེན་ན་བཅུ་དྲུག་པོ་གཞན་རྣམས་རྒྱས་བསྡུས་སྐབས་སྦྱར་ཆགས་མེད་ཙམ་བྱས། རང་གང་མོས་པ་ཞིག་དང་། བཅུ་དྲུག་པ་གཉིས་ལ་ནན་ཏན་དུ་བྱ། ཤིན་ཏུ་བསྡུས་པ་བྱེད་ན། ཐིག་ལེ་ཐམས་ཅད་ཀྱི་སྐྱེད་ཆོག་ཙམ་བྱས་ནས། ཉམས་ལེན་དམིགས་ཕུག་པ་གཅིག་ལ་བྱས་ཀྱང་རུང་ངོ་། །མདོར་ན་ལམ་གྱི་རྩ་བ་བཤེས་གཉེན་བསྟེན་ཚུལ་ནས་ཟུང་འཇུག་གི་བར་གྱི་ལམ་ཐམས་ཅད་སྟན་ཐོག་གཅིག་ཏུ་ཉམས་སུ་ལེན་པའི་ཚུལ་ཚང་ལ་མ་ནོར་བ་འདི་ནི་གདུལ་བྱ་རིན་པོ་ཆེ་ལྟ་བུའི་གང་ཟག་སྙིགས་དུས་ཀྱི་ཚེ་ཐུང་གཅིག་ལ་འཚང་རྒྱ་བའི་ལམ་ཚང་ལ་མ་ནོར་བ་ཡིན་ནོ། །སྨྲས་པ། །མཁས་གྲུབ་གངྒཱའི་ཡབ་གཅིག་ཏི་སེའི་གཟུགས། །མཉམ་མེད་དཱི་པཾ་ཀཱ་ར་ཡབ་སྲས་ཀྱི། །ཟབ་ཆོས་ཐིག་ལེ་བཅུ་དྲུག་སྙིང་པོའི་གཏམ། །བདུད་རྩིའི་མཆོད་ཡོན་གཏན་པ་མེད་པར་སྦྲེངས། །དེ་ལས་བྱུང་བའི་དགེ་བ་ནི། །དཔག་བསམ་གསར་པའི་རྗེས་འགྲོ་བས། །འགྲོ་བ་ཀུན་ལ་གྲུབ་གཉིས་ཀྱི། །དགའ་སྟོན་མཆོག་ཏུ་སྦྱིན་གྱུར་ཅིག །ཅེས་པའང་རྗེ་བླ་མ་བཅུ་ཕྲག་རིག་པའི་པཎྜིཏ་དཀོན་མཆོག་བསྟན་པ་རབ་རྒྱས་དཔལ་བཟང་པོས་ཆོས་གྲྭ་ཆེན་པོ་བཀྲ་ཤིས་ལྷུན་པོ་དཔལ་གྱི་སྡེ་ཆེན་ཕྱོགས་ཐམས་ཅད་ལས་རྣམ་པར་རྒྱལ་བའི་ཕུན་ཚོགས་ཁང་གསར་དུ་ཇི་ལྟར་སྩལ་བ་བཞིན། གཞོན་ནུ་མཁྱེན་བརྩེའི་མིང་གིས་ཟིན་བྲིས་སུ་བཏབ་པ་སརྦ་དཱ་ཀ་ལྱཱ་ཎཾ་བྷ་བ་ཏུ།། །།

[edit]

bka' gdams thig le bcu drug gi zab khrid grub gnyis mchog sbyin/ @#/__/bka' gdams thig le bcu drug gi zab 'khrid kyi rim pa snying por dril ba grub gnyis mchog sbyin zhes bya ba bzhugs so//__// oM swasti sid+d+haM/__/dkon mchog gsum dngos thugs rje'i zla ris ni/__/yongs rdzogs bstan pa'i bdud rtsi'i 'od dkar bcas/__/shar ba'i mod la phan bde'i chu gter che/__/rab tu rgyas mdzad dpal ldan bla mar 'dud/__/gang gi bka' drin kha ba yis/__/reg pas bsil ba'i gang+gA ni/__/bdag blo'i lam gsum la chags pas/__/zab don ngal 'tsho cir yang rgyas/__/de slad 'di na 'phags bod kyi/__/mkhas grub rgya mtsho'i gtsug gi nor/__/mnyam med jo bo yab sras kyi/__/gdams pa'i snying po cung zad dbye/__/de la 'dir lnga brgya pa rnams kyi gtsug gi nor bu mnyam med jo bo chen pos za ma tog bkod pa la sogs pa'i mdo'i sbas don mthar thug pa dpal gsang ba 'dus pa ye shes zhabs lugs dang mthun par bkral ba dge ba'i bshes gnyen bka' gdams pa rnams kyi gsang chos man ngag thun mong ma yin pa zab pa las kyang ches zab pa'i snyan brgyud thig le bcu drug gi gdams pa zab mo nyams su len pa'i tshul la gnyis/__da ltar gyi phyag bzhes ltar zab khrid kyi snying po mdor bsdus te bstan pa dang /__de las rgyas par spros pa'i sgo phyogs tsam mtshon pa'o/__/dang po la gsum/__sngon 'gro dngos gzhi/__rjes so/__/dang po ni/__nor bu'i phreng ba le'u gnyis par/__sras kyi thu bo spyan ras gzigs/__/khyed kyi rjes 'brangs kho mos bskyang /__/kho mo'i gdams pa 'di longs la/__/rjes su 'brangs la bstan par gyis/__/skyabs gnas bla ma dran par mdzod/__/lus ni lha yi rang bzhin te/__/ngag ni bzlas brjod rgyun par mdzod/__/'gro ba ma lus pha mar sems/__/sems kyi gnas lugs stong par dpyod/__/lnga po 'di yi skya bar nas/__/dge rtsa thams cad dag par mdzod/__/ces gsungs pa ltar rjes dran lnga'i sgo nas nyams su len pa la/__thog mar sbyor ba'i chos/__gnas khang byi dor bya zhing sku gsung thugs kyi rten dgram/__mchod pa g.yo med pa btsal la bkod pas mdzes par bsham/__stan bde ba la lus gnad bsam gtan gyi spyod lam dang ldan pas skyabs sems dang /__tshogs zhing gsal gdab pa/__yan lag bdun pa 'bul ba/__'dod pa'i don la gsol ba gdab pa rnams tshul bzhin du byas nas/__de nas lam gyi rtsa ba bshes gnyen bsten tshul gyi sgo nas skyabs gnas bla ma rjes su dran pa dang /__skyes bu chung 'bring gnyis sngon du 'gro bas skyes bu chen po'i nyams len gyis 'gro drug pha ma rjes su dran pa dang /__khyad par phar phyin tha ma zhi lhag gnyis la bslabs pas sems kyi gnas lugs stong par rjes su dran pa rnams byang chub lam gyi rim pa'i gdams ngag las ji ltar 'byung ba bzhin nyams su blangs pas rgyud sbyang ba ni spyi'i sngon 'gro'o//__// gnyis pa dngos gzhi la'ang rjes dran lnga las/__dang po skyabs gnas bla ma rjes su dran pa ni/__rang nyid tha mal du gnas pa'i mdun gyi nam mkhar dran pa tsam gyis dgos 'dod thams cad yid bzhin du stsol bar nus pa'i dpag bsam gyi ljon shing sdong po yal ga lo 'dab bkod pa phun sum tshogs pa'i dbus su rtsa ba'i bla ma 'phags pa spyan ras gzigs phyag bzhi pa'i rnam par bzhugs pa nas bzung /__nor bu'i phreng ba'i bla ma brgyud pa rnams tho brtsegs su bzhugs pa gtso bor gyur pa'i bla ma dang /__mtha' skor du skyabs gnas dkon mchog rgya mtsho til gyi gang bu kha bye ba'am/__nyi zer la rdul 'khrigs pa bzhin mngon sum lta bur bzhugs pa'i spyan sngar rang gzhan sems can thams cad sa chen po'i dreg pa bzhin du 'khod pas/__dwangs 'dod yid ches kyi dad pa shugs drag pos kun nas bslangs te/__thun gyi mgor dge sbyor gang byed bye bar 'gyur ba'i sngags bzla bar gsungs pas/__oM saM b+hA ra saM b+hA ra bi ma na sa ra ma hA dzam+b+ha ba hU~M phaT swA hA/__zhes ci nus dang /__de nas 'dren pa mnyam med ston pa bcom ldan 'das/__/gangs ri'i mgon po rje btsun spyan ras gzigs/__rgyal yum sgrol ma bcom ldan mi g.yo mgon/__/bka' gdams lha mchog bzhi la gsol ba 'debs/__/byams pa thogs med dbyig gnyen rnam grol sde/__/mchog sde dul ba'i sde dang grags pa'i sde/__/seng bzang ku sA li gnyis gser gling pa/__/rgya chen spyod pa'i brgyud par gsol ba 'debs/__/'jam dbyangs yod med phyogs 'jig klu sgrub dang /__/zla ba grags pa rig pa'i khu byug che/__/sangs rgyas dgongs skyob 'phags pa yab sras te/__/zab mo lta ba'i brgyud par gsol ba=__thugs rje chen po bde gshegs rdo rje 'chang /__/mchog gzigs ti lo pa dang nA ro dang /__/dpal mchog Dom+bi pa dang a ti sha__/nyams len byin rlabs brgyud par gsol=__lam bzang gsal mdzad mgon po a ti sha__/bka' gdams bstan pa'i mes po rgyal ba 'brom/__/legs pa'i shes rab rgyal mtshan bzhi la sogs/__/dngos brgyud bla ma rnams la gsol ba=__srid la zhen log rkyen ngan grogs su shar/__/bdag gzhan mnyam brjes rlabs chen spyod la zhugs/__/srid rtsa drung 'byin lta bas rgyas btab ste/__/thun mong lam bzang bgrod par byin gyis rlobs/__/gsang sngags sgor zhugs dam tshig tshul bzhin srung /__/zab gsal gnyis med lha yi rnal 'byor gyis/__/zung 'jug snying gi thig le mngon gyur nas/__/'gro kun mgon du 'gyur bar byin gyis rlobs/__/zhes brgyud pa'i gsol 'debs mdor bsdus pa sngon du 'gro bas 'khor ba'i sdug bsngal rgyu dang bcas pa la 'jigs shing skrag pas snying thag pa nas skyabs su 'gro ba'i 'dun pa dang bcas/__/bdag dang 'gro ba sems can thams cad dus 'di nas bzung ste ji srid byang chub snying po la mchis kyi bar du rkang gnyis rnams kyi mchog sangs rgyas bcom ldan 'das rnams la skyabs su mchi'o/__/chos rnams kyi mchog zhi ba 'dod chags dang bral ba'i chos la skyabs su mchi'o/__/tshogs rnams kyi mchog 'phags pa byang chub sems dpa' phyir mi ldog pa'i dge 'dun chen po rnams la skyabs su mchi'o/__/zhes skyabs 'gro ci nus su bya/__/gnyis pa 'gro kun pha mar rjes su dran pa ni/__mtha' med pa'i sems can thams cad pha ma drin can sha stag tu shes shing de'i drin bzor mkha' khyab kyi ma rnams bde ba dang ldan/__sdug bsngal dang bral ba'i phyir du bdag gis rdzogs pa'i sangs rgyas kyi go 'phang thob par bya/__de'i ched du lam zab mo 'di nyams su blang ngo snyam pas/__phyogs bcu na bzhugs pa'i sangs rgyas dang byang chub sems dpa' thams cad bdag la dgongs su gsol/__bdag dang mkha' mnyam gyi sems can ma lus pa thams cad kyis skye ba 'di dang skye ba gzhan dag tu sbyin pa'i rang bzhin dang /__tshul khrims kyi rang bzhin dang /__sgom pa'i rang bzhin gyi dge ba'i rtsa ba ci bgyis pa dang /__bgyid du stsal ba dang /__bgyis pa la rjes su yi rang ba'i dge ba'i rtsa ba des ji ltar sngon gyi de bzhin gshegs pa dgra bcom pa yang dag par rdzogs pa'i sangs rgyas rnams dang sa chen po la rab tu bzhugs pa'i byang chub sems dpa' chen po rnams kyis dang por bla na med pa yang dag par rdzogs pa'i byang chub tu thugs bskyed par mdzad pa de bzhin tu bdag sogs sems can rnams kyis kyang /__dus 'di nas bzung ste ji srid byang chub kyi snying po la mchis kyi bar du bla na med pa yang dag par rdzogs pa'i byang chub chen po la sems bskyed par bgyi'o/__/sems can ma bsgral ba rnams bsgral bar bgyi'o/__/ma grol ba rnams dgrol bar bgyi'o/__/dbugs ma phyung ba rnams dbugs dbyung bar bgyi'o/__/yongs su mya ngan las ma 'das pa rnams yongs su mya ngan las 'da' bar bgyi'o/__/zhes sems bskyed bya/__mthar skyabs yul thams cad rtsa brgyud kyi bla ma rnams la thim/__brgyud pa'i bla ma rnams kyang rim gyis 'od du zhu nas rtsa ba'i bla ma la thim/__rtsa ba'i bla ma yang dgyes pa chen po'i ngang nas 'od du zhu/__rang la thim pas rgyud byin gyis brlabs par bsams la cung zad re mnyam par bzhag go/__/bar 'dir spro zhing nus na rdo rje sems dpa'i sgom bzlas dang /__bla ma spyan ras gzigs la brten pa'i bla ma'i rnal 'byor gsal btab la/__ku sA li'i tshogs gsog__/maN+Dal/__dbang blang rnams mdzad pa'i phyag bzhes kyang yod mod kyus la 'di tsam gyis chog__/dngos su bshams pa'i mchod pa yod na byin gyis brlab pa ni/__rang nyid skad cig gis thugs rje chen po g.yas nor bu'i phreng ba dang g.yon shel gyi 'khar ba rtse mor sangs rgyas stong gis mtshan pa 'dzin pa/__zhabs gnyis mnyam pa'i stabs kyis bzhengs pa'i thugs ka'i hrIHlas 'od 'phros/__snod bcud kyi ma dag pa sbyangs/__oM las rin po che'i snod yangs shing rgya che ba rnams kyi nang du hU~M 'od du zhu ba las byung ba'i mchod yon/__zhabs bsil/__me tog__/bdug spos/__snang gsal/__dri chab/__zhal zas/__rol mo la sogs pa rnams dwangs shing thogs pa med pa dpal kun tu bzang po'i rnam par sprul pa las byung ba'i mchod pa'i sprin phung zad mi shes pa nam mkha' dang mnyam par gyur/__oM badz+ra ar+g+haM AHhU~M nas/__shap+da'i bar sbyar bas brlab/__gsum pa gnas lugs stong par rjes su dran pa ni/__oM swa b+hA wa shud+d+haHsarba d+harmAHswa b+hA ba shud+d+ho\u0f85 haM/__zhes pa'i sngags kyis chos thams cad kyi gnas lugs stong pa nyid dang rang gi sems ro gcig tu gyur pa thugs rje chen po'i thugs zab gsal gnyis su med pa'i ye shes kyi ngo bor mos nas de'i ngang du gnyis snang gi spros pa gzhan gyis bar ma chod par 'dzin stangs gsal zhing dam par mnyam par 'jog cing /__de lta bu'i gnyis su med pa'i ye shes kyi bdag nyid nga'o snyam du nga rgyal shugs drag tu bskyed pa ni chos sku'i lag rjes 'jog par byed pa stong pa'i rnal 'byor ro/__/bzhi pa rang lus lha skur rjes su dran pa la gnyis/__rim pa dang po bskyed pa'i rim pa dang /__rim pa gnyis pa rdzogs pa'i rim pa la slob tshul lo/__/dang po la'ang thig le bco lnga las/__dang po phyi bkod pa bsam gyis mi khyab pa'i thig le bsgom pa ni/__stong pa'i ngang las rang sems kyi cha shas las grub pa'i 'ja' tshon sna lnga'i gur khyim gyi dbus su thar pa chen po'i gzhal yas khang gru bzhi sgo bzhi 'dod snam pha gu drwa ba drwa phyed mda' yab pu shu rta babs sogs mtshan nyid thams cad yongs su rdzogs pa/__nang gi steng dang shar dkar/__lho ser/__nub dmar/__byang ljang /__'og sngon por gyur pa'i kha dog so so'i rang mdog ltar 'char ba la rnam pa yi ge'i gzugs can gyis bar mtshams med par khyab pa/__kha dog dang dbyibs rnams ma 'dres par so sor bkra ba'i steng gi yi ge thams cad oM/__shar ma/__lho Ni/__nub pad/__byang me/__'og hU~M du snang ba'i gzhal yas khang gi nang du sems nyid thig le dkar po gsal stong 'od kyi rang bzhin can de je cher song ba las rang nyid thub pa dang dbyer med pa'i thugs rje chen por gyur pa 'od du zhu ba las/__skad cig gis pa~M yig dkar po las nam mkha'i mtha' dang mnyam pa'i pad+ma dkar po 'dab ma stong dang ldan pa'i lte bar a dkar po las zla ba'i dkyil 'khor gyi steng du hrIHdkar po yongs su gyur pa las thig le dkar po nam mkha' ltar mtha' dang bral ba'i rang bzhin can/__de yongs su gyur pa las bkod pa bsam gyis mi khyab pa'i thugs rje chen po rgyal ba rgya mtsho nam mkhas gar khyab tu skus khyab pa/__dbu bcu gcig phyag stong spyan stong dang ldan pa/__rtsa zhal dkar/__g.yas dmar/__g.yon ljang /__de'i steng gi zhal dbus ljang /__g.yas dkar/__g.yon dmar/__de'i steng gi zhal dbus dmar/__g.yas ljang /__g.yon dkar ba/__de'i steng na khro zhal nag po mche ba gtsigs pa/__spyan gsum pa/__ral pa dmar ser gyen du brjes pa/__de'i spyi bor zhi zhal dmar po gtsug tor can/__rtsa ba'i phyag dang po gnyis thugs kar thal mo sbyar ba/__g.yas gnyis pa na bgrang phreng /__gsum pa mchog sbyin gyi phyag rgyas yi dwags kyi skom pa sel ba/__bzhi pa na 'khor lo/__/g.yon gyi gnyis pa na pad+ma/__gsum pa na ril ba spyi blugs/__bzhi pa na mda' gzhu 'dzin pa/__phyag lhag ma dgu brgya dang dgu bcu rtsa gnyis po thams cad mchog sbyin mdzad pa/__zhabs rdo rje skyil krung gis bzhugs pa/__ba spu'i bu ga re re na sangs rgyas kyi zhing grangs med pa/__de rnams na sangs rgyas byang sems mtha' klas pa bzhugs pa/__gnas gsum gyi yig 'bru las 'od zer gyi tshogs 'phros pas sems can gyi don dpag tu med pa mdzad pa zhig tu gyur par bsams la nga rgyal dang gsal snang ci thon bya'o/__/de ltar phyi bkod pa bsam gyis mi khyab pa'i bskyed rim gsal thebs nas rim pa bzhin dmigs pa phyi ma rnams la 'jug par bya ste/__de'i thugs kar thig le gnyis pa mi mjed kyi bkod pa sngar lta bu'i gzhal yas khang gi nang du pad zla'i steng na oM ser po las thub pa chen po rnam par snang mdzad gangs chen mtsho sprul sku'i cha byad can/__g.yas skyabs sbyin gyi phyag rgya dang g.yon mnyam bzhag mdzad pa/__g.yas g.yon mchog zung bzhengs te bzhugs pa/__theg pa gsum gyi 'khor tshogs rgya mtshos bskor ba/__de'i thugs kar thig le gsum pa kha ba can gyi thig le/__gzhal yas khang gi nang du pad zla'i steng na spyan ras gzigs rgyal ba rgya mtsho bkod pa bsam gyis mi khyab pa ji lta ba bzhin bzhugs pa/__de'i thugs kar thig le bzhi pa yang sgos dbu ru byang phyogs kyi thig le/__gzhal yas khang gi nang du pad zla'i steng na hrIHlas 'brom shel gyi khye'u dkar po zhi zhing 'dzum pa/__dbu skra mthing ga dpung pa'i thad du slebs pa/__phyag g.yas shel dkar gyi phreng ba dang /__g.yon shel gyi 'khar ba rtse mor pad+ma dkar po 'dab ma stong dang ldan pa'i lte bar zla gdan la yum chen mo/__g.yas su bla ma mar me mdzad/__g.yon du rgyal ba shAkya thub pa/__'dab ma stong la sangs rgyas stong bzhugs pas mtshan pa 'dzin pa/__zhabs gnyis mnyam pa'i stabs kyis bzhengs pa/__'di bzhi la rten gyi thig le zhes brjod de/__gtso bor snod kyi 'jig rten spyi dang bye brag ma dag pa'i snang zhen sbyangs nas dag pa rab 'byams su sgyur bar byed pa'i phyir ro/__/de'i thugs kar lnga pa yum sher phyin ma'i thig le/__gzhal yas khang gi nang du pad zla'i steng na a ser po las yum sher phyin ma sku mdog ser mo zhal gcig phyag bzhi ma g.yas dang po thugs kar skyabs sbyin gyi phyag rgya dang /__g.yon dang po mnyam bzhag mdzad pa/__g.yas 'og mas rdo rje dang /__g.yon 'og mas glegs bam 'dzin pa/__zhabs skyil krung gis bzhugs pa/__phyogs bcu'i rgyal ba sras bcas kyis bskor ba/__de'i thugs kar drug pa thub pa'i thig le/__/gzhal yas khang gi nang du pad zla'i steng na mU~M ser po las thub pa bdud 'dul sprul sku'i cha lugs can/__g.yas sa gnon dang g.yon mnyam bzhag mdzad pa/__de'i thugs dkar bdun pa spyan ras gzigs kyi thig le/__gzhal yas khang gi nang du pad zla'i steng na hrIHdkar po las spyan ras gzigs zhal gcig phyag bzhi pa/__dang po gnyis thugs kar thal mo sbyar ba/__lhag ma gnyis shel phreng dang pad dkar 'dzin pa/__zhabs skyil krung gis bzhugs pa/__'khor byang chub sems dpa'i tshogs kyis bskor ba/__de'i thugs kar brgyad pa rje btsun sgrol ma'i thig le/__gzhal yas khang gi nang du pad zla'i steng na tA~M ljang gu las sgrol ma ljang gu zhal gcig phyag gnyis ma/__g.yas mchog sbyin gyi phyag rgya dang /__g.yon ut+pal mtheb srin gyis thugs kar 'dzin pa/__'khor zhi ba'i lha mo dpag tu med pas bskor ba/__de'i thugs kar dgu pa sgrol ma drag mo'i thig le/__gzhal yas khang gi nang du pad nyi'i steng na tA~M ljang nag las sgrol ma drag mo ljang nag zhal gcig phyag bzhi ma/__dang po gnyis gri thod/__'og ma gnyis DA ma ru dang kha T+wA~M ga 'dzin pa/__mi lpags kyi g.yang gzhi dang stag lpags kyi sham thabs dang rus pa'i rgyan drug gsol zhing g.yon brkyang gis bzhugs pa/__'khor du lha mo drag mo'i tshogs dpag tu med pas bskor ba/__de'i thugs kar bcu pa mi g.yo ba'i thig le/__gzhal yas khang gi nang du pad nyi'i steng du hU~M mthing ga las mi g.yo ba sngon po zhal gcig phyag gnyis pa/__khro zhing gtum pa/__g.yas ral gri dang g.yon zhags pa 'dzin pa/__sbrul dang rin po ches brgyan cing glang lpags dang stag sham gsol ba/__g.yas brkyang gis tshogs kyi bdag po'i gdan la me dpung gi dbus na khro bo'i tshogs kyis bskor te bzhugs pa/__'di drug la brten pa yi dam lha'i thig le zhes brjod de/__gtso bor rang rang gi lus tha mal gyi snang zhen sbyangs nas yi dam gyi lha'i skur bsgom pa ste zab gsal gnyis med kyi lha'i rnal 'byor rtsal du bton pa dang /__sngon 'brom chos kyi rgyal pos jo bo'i spyan sngar sangs rgyas byang sems thams cad lha bzhir bsdus nas gdams pa ltar/__bka' gdams lha chos bdun ldan gyi rnam thar skyong bar 'dod pa rnams kyis gtso bor nyams su blang dgos pa'i phyir ro/__/de'i thugs kar bcu gcig pa jo bo'i thig le/__gzhal yas khang gi nang du pad zla'i steng na hU~M dkar po las mgon po a ti sha longs spyod rdzogs sku'i cha lugs can/__rdo rje dang dril bu 'dzin pa/__skyil krung gis bzhugs pa/__de'i mdun du thub pa longs sku'i cha lugs can/__g.yas su spyan ras gzigs/__g.yon du sgrol ma/__rgyab tu mi g.yo ba/__shar lhor jo bo paN+Di ta'i cha byad can/__lho nub tu 'brom dge bsnyen gyi cha byad can/__nub tu rngog dang /__byang shar du khu ston gnyis bod ston rab byung gi cha byad can/__steng gi cha la brgyud pa gsum gyi bla ma'i tshogs rnams bzhugs pa/__de'i thugs kar bcu gnyis pa 'brom gyi thig le/__gzhal yas khang gi nang du pad zla'i steng du hrIHdkar po las 'brom chos kyi rgyal po longs sku'i gar chas su bzhugs pa/__dgung lo bcu drug lon pa'i na tshod can/__g.yas pad dkar dang g.yon dril bu 'dzin pa/_zhabs skyil krung gis bzhugs pa'i mdun du phyi ltar na rang dang cha lugs mtshungs pa'i khye'u dkar po bzhi/__g.yas su ser po bzhi/__g.yon du ljang gu bzhi/__rgyab tu dmar po bzhi/__nang ltar na sku mched gsum sogs/__gsang ba ltar na rigs lnga'i ngo bo/__steng gi cha la brgyud pa gsum gyi bla ma rnams dang /__gsang ba ye shes sogs mkha' 'gro'i tshogs du ma rnams u rgyan gyi yul du mdzad pa ji lta ba bzhin gar stabs sna tshogs su sgyur ba/__de'i thugs kar bcu gsum pa byams pa'i thig le/__gzhal yas khang gi nang du pad zla'i steng na me ser po las rgyal ba byams pa dge slong snam sbyar chos gos gyon pa/__mtshan dpe dang ldan pa/__chos 'chad kyi phyag rgya mdzad pa/__g.yas g.yon na nam mkha' dri ma med pa dang btsun pa spyan ras gzigs gnyis dge slong gi cha byad can bzhengs te bzhugs pa/__steng gi cha la 'phags pa thogs med sogs rgya chen spyod brgyud kyi bla ma'i tshogs rnams bzhugs pa/__de'i thugs kar bcu bzhi pa 'jam dbyangs kyi thig le/__gzhal yas khang gi nang du pad zla'i steng na d+hIHdmar ser las rje btsun 'jam dpal dbyangs rab byung sprul sku'i cha lugs can/__phyag gnyis chos 'chad kyi phyag rgya mdzad pa/__zhabs skyil krung gis bzhugs pa/__g.yas g.yon du jo bo dang spyan ras gzigs rab byung gi rnam pa can/__steng gi cha la mgon po klu sgrub sogs zab mo lta brgyud kyi bla ma'i tshogs rnams bzhugs pa/__de'i thugs kar bco lnga pa rdo rje 'chang gi thig le/__gzhal yas khang gi nang du seng ges btegs pa'i rin po che'i khri'i steng du pad+ma nyi ma zla ba'i gdan la hU~M mthing ga las rgyal ba rdo rje 'chang longs spyod rdzogs sku'i cha lugs can sku mdog sngon po/__rdo rje dang dril bu thugs kar bsnol te 'dzin pa/__zhabs rdo rje'i skyil krung gis bzhugs pa/__g.yas g.yon du mchog zung longs sku'i cha lugs can gyis bzhengs pa/__steng gi cha la tai lo nA ro sogs nyams len byin rlabs brgyud pa'i bla ma'i tshogs rnams bzhugs pa/__'di rnams la rtsa brgyud kyi bla ma'i thig le zhes brjod de/__gsang sngags bla med kyi lam gyi lus yongs su rdzogs pa myur ba myur bar rgyud la bskyed pa'i phyir bla ma'i rnal 'byor la rtsal du bton pa yin pa'i phyir ro/__/de yan chad ni gzugs sku'i lag rjes 'jog byed rten dang brten par bcas pa'i dkyil 'khor bsgom pa'o//__// gnyis pa rdzogs rim ni/__rdo rje 'chang de'i thugs kar bcu drug pa byang chub sems kyi thig le/__gzhal yas khang gi nang du pad zla'i steng na hU~M hU~M ser po las gser mdog tu bsgom pa'ang yod/__sngon po las sangs rgyas chos kyi sku mthing skya mnyam gzhag dang skyil krung can chos kyi dbyings las mi g.yo bzhin du sgyu 'phrul dra ba'i rnam rol sna tshogs su ston pa/__de'i snying dkyil du shin tu phra ba'i rlung gi ngo bo byang chub sems kyi thig le dkar dwangs yungs 'bru tsam pa/__de rgya je cher song nas nor bu rin po che'i snod rgya che zhing dpangs mtho la 'od 'tsher ba/__de'i nang du rang sems thig le ser po sran ma tsam pa dwangs shing 'od 'tsher ba mer mer g.yo zhing 'ju ba lta bu/__de rgya je cher song bas thig le'i rgya mtsho gser btso ma'i mdog ltar dwangs shing khod snyoms pa/__gzhi brtan pa/__rgya che ba khyab che ba/__gzugs brnyan thams cad 'char ba zhig tu gyur par bsams la sems zhugs pa bzhin gtad nas rtse gcig tu mnyam par bzhag pas/__rlung sems 'jug pa gcig pas sems snying dbus kyi d+hU tir zin pa na rlung yang de nyid du zin te/__rlung dbu mar zhugs pa'i rtags su sna bug nas mnyam rgyu kho nar 'babs/__gnas pa'i rtags su rnal 'byor la mnyam par bzhag pa'i skabs su lte ba mi 'gul/__thim pa'i rtags su 'od gsal du thim pa'i snang ba shar ba ste de lta bu'i zhugs gnas thim gsum gyi rtsal rdzogs te yul bde ba chen po dang /__yul can stong pa nyid du zung 'jug tu grub pas na rdzogs rim du 'gro ba yin no/__/de ltar thig le bcu drug po de re re la'ang rgyas par na rjes dran lnga tshang bar bsgoms te/__rtsa brgyud bla ma rnams la gsol ba gdab pa dang /__chos sku'i lag rjes 'jog byed stong pa'i rnal 'byor bsgom pa dang /__de'i ngang las lha bsgom pa dang dkyil 'khor rten dang brten par bcas pa la gsal snang thon nas/__rang gi sems kyi cha shas shig gis 'gro kun pha mar rjes su dran pas sems can thams cad dkyil 'khor gyi nang du khrid de dkyil 'khor gyi gtso bo la thun mong ma yin pa'i yan lag bdun pa 'bul ba dang /__phyag dang skor ba mang du byas nas gzungs sngags bzlas pas slar yang nang ma nang mar 'jug pa dang /__ngag sngags su rjes dran gyis so so'i snying po dmigs pa'i gnad dang bcas pas bzla ba rnams bya zhing /__mdor bsdu na/__skabs 'dir gnas gsum byin rlabs man lhan cig tu bya ba ni/__lha tshogs thams cad kyi spyi bor oM dkar po/__mgrin par AHdmar po/__thugs kar hU~M sngon po/__thugs ka'i hU~M las 'od zer 'phros pas dag pa rab 'byams kyi zhing khams nas bsgom pa dang 'dra ba'i ye shes pa la sangs rgyas dang byang chub sems dpa'i tshogs kyis bskor ba spyan drangs/__dzaHhU~M ba~M hoHgnyis su med par gyur/__pad+ma kA ma lA ya s+t+waM/__slar yang thugs ka'i hU~M las 'od zer 'phros pas dbang gi lha rnams spyan drangs/_khyed rnams kyis bdag la mngon par dbang bskur du gsol/__zhes gsol ba btab pas/__oM sarba ta thA ga ta a b+hi She ka ta sa ma ya shri ye hU~M zhes dbang bskur/__lus gang /__dri ma dag__/chu'i lhag ma spyi gtsug tu 'khyil ba las rang rang gi sa bon gyis dbur brgyan par mos pa ste yan lag bzhi rdzogs kyi tshul du gsal btab nas/__rang gi sems kyi cha shas las grub pa'i mchod pa'i lha mo dpag tu med pa spros te/__/phyag dang phyag yul gnyis stong pa'i/__/rnam dag sku la ye phyag 'tshal/__/skye gnas 'jig pas ma gos pa'i/__/dri med mchod tshogs 'bul lo lha/__/sgo gsum skye gnas 'jigs bral ba'i/__/nyes pa'i g.yang sa mthol lo bshags/__/stong yang sna tshogs skur ston pa'i/__/grangs med 'dren la rjes yi rang /__/smon dang mtshan mas stong pa yi/__/'khor lo dbyings su bskor du gsol/__/skye bas stong pa'i chos sku khyed/__/lhun grub gnas pa'i rang bzhin las/__/gang du'ang 'da' bar ma mdzad cig__/dge ba 'di yis 'khor ba rnams/__/'di 'drar rtogs te 'di 'dra ba'i/_/gzhal yas khang du 'drongs gyur te/__/gsang sngags 'di bzhin spyod par bsngo/__/gnas skabs kr-i ya'i lha lnga bzhin/__/pad dkar stong ldan lte ba la/__/zla ba zhun ma'i gdan steng du/__/phyi nang gsang ba de nyid kyi/__/bskyed rdzogs mchog tu bsngags par shog__/glo bur 'di yang chos dbyings las/__/tha dad ci yang yod ma mchis/__/tha dad med par phun tshogs pa'i/__/bkra shis phun sum tshogs par shog__/gtsang ma rigs kyi bkra shis shog__/thog mtha' bar gsum gtsang ma las/__/g.yos pa med pa'i bkra shis shog__/ces yan lag bdun pa dang /__rgyas par tshigs bcad sbrags ma'am bsdu na/__oM sarba ta thA ga ta ar+g+haM pra tI ts+tsha swA hA nas/__shap+da'i bar sbyar ba'i chu gnyis sngon 'gro'i nyer spyod kyis mchod/__spro na 'dod yon lnga dang /__rgyal srid bdun/__bkra shis rdzas rtags sogs kyang spyi ltar phul/__/ma dag zhing gi 'jig rten ji snyed pa/__/dag pa rab 'byams lha yi gzhal yas su/__/mngon par legs sgyur bcom ldan thub pa che/__/rje btsun phyag na pad+mo'i tshogs la bstod/__/sde snod gsum gyi yum chen sher phyin ma/__/sangs rgyas zhing dang khro bo mkha' 'gro'i tshogs/__/kun 'dus bka' gdams lhag pa'i lha mchog bzhi/__/skyabs mchog yi dam chos skyong rnams la bstod/__/rgya chen spyod dang zab mo lta ba'i lam/__/nyams len snyan brgyud gdams pa mchog gi gter/__/rgyun chad med par 'dzin cing spel mkhas pa/__/lha chos bdun ldan brgyud pa rnams la bstod/__/gdod nas rnam dag snang stong dag pa'i gshis/__/bzhin lag mtshan dpe'i 'ja' tshon rnam bkra ba/__/'gyur med chos sku gsal stong rlung sems zung /__/ches phra thig le'i rnam par shar la bstod/__/lha chos bdun gyi nying khu thig le'i chos/__/nyams su bstar bas tshe 'dir zung 'jug sku/__/mngon du byas te don gnyis ma lus pa/__/'bad med lhun gyis grub par byin gyis rlobs/__/zhes rdo rje'i glu snyan 'gyur gyi nyams dang ldan pas yon tan rjes su dran pa'i sgo nas bstod par bsam/__de nas rang nyid thugs rje chen po phyag gnyis pa'i rnam par logs su bye bas/__'gro kun pha mar rjes su dran pa'i snying rje chen pos bltas te/__rang nyid kyis sna drangs sems can thams cad phyi bkod pa bsam gyis mi khyab pa'i dkyil 'khor du zhugs/__thugs rje chen po rgyal ba rgya mtsho la phyag dang bskor ba byas te gsol ba btab/__khyad par du rang gi lus longs spyod dus gsum du bsags pa'i dge tshogs rgya mtsho dang bcas pa thams cad 'gro ba mgon dang skyabs med pa rnams kyi phan pa dang bde ba gang la gang 'tshams kyi nyer 'tsho'i rten du 'gyur pa'i phyir phongs pa med par lha tshogs rnams la kun tu bzang po'i mchod sprin chen por phul bas zag med kyi bde bas dgyes/__gnas gsum gyi yi ge gsum dang khyad par thugs ka'i sa bon dang sngags phreng las 'od zer bdud rtsi'i rgyun dang bcas pa byung /__bdag dang sems can thams cad kyi lus sems la zhugs/__las nyon sdig sgrib bag chags dang bcas pa sbyangs/__sku gsung thugs kyi byin rlabs thob par bsam mo/__/lnga pa ngag sngags su rjes su dran pa la gnyis te/__rim pa dang po'i lha'i rnal 'byor dang ldan pa'i sgo nas thig le bcu drug gi lha tshogs rnams kyi thugs rgyud skul ba'i bzlas brjod ji ltar bya ba dang /__rim pa gnyis pa'i rnal 'byor dang ldan pas rlung sngags dbyer med du byas te rdo rje'i bzlas pa la slob tshul lo/__/dang po ni/__thig le bcu drug gi lha tshogs rnams kyi gtso bo'i thugs kar so so'i sa bon gyi mthar sngags kyi phreng ba bkod la/__de las 'od zer 'phros pas phyogs bcu'i sangs rgyas dang byang chub sems dpa' thams cad la thugs mnyes pa'i mchod pa phul/__gsang gsum gyi byin rlabs thams cad 'od dang 'od zer gyi rnam par spyan drangs nas rang la thim/__slar yang 'od zer 'phros pas snod bcud thams cad kyi sgrib gnyis bag chags dang bcas pa sbyangs/__thams cad dag pa'i zhing gi rnam rol du gyur par bsams la/__thig le dang po la/__oM ma Ni pad+me hU~M/__zhes bzla/__de bzhin tu gnyis pa la/__oM mu ni mu ni ma hA mu na ye swA hA/__gsum bzhi gnyis la yig drug dang /__lnga pa la/__tad+yA thA/__oM ga te ga te/__pA ra ga te/__pA ra saM ga te/__bo d+hi swA hA/__drug pa la mu ne/__bdun pa la yig drug__/brgyad pa la/__oM tA re tut+tA re tu re swA hA/__dgu par/__oM tA re tu t+tA re tu re hU~M phaT/__bcu pa la/__oM tsaN+Da ma hA ro Sha Na hU~M phaT/__bcu gcig pa la/__bka' gdams lha bzhi'i sngags sam/__yang na/__oM ma hA gu ru dI paM kA ra a ti sha swA hA/__bcu gnyis pa la yig drug__/bcu gsum pa la/__oM mai tri mai tri ma hA mai tri ye swA hA dang /__oM mai tri ye swA hA gang rung /__bcu bzhi pa la/__oM wA gi shwa ri mU~M/__bco lnga pa la/__oM badz+ra d+hr-ika hU~M hU~M/__bcu drug pa la/__oM d+harma kA ya sid+d+hi hU~M/__zhes dang /__oM AHhU~M/__zhes so sor brgya stong sogs ci nus su bzla/__yang na/__de thams cad la yig drug kho na bzla zhing /__gtso bor yig drug la rtsal du 'don/__de'i tshe dmigs pa ni/__rang phyi bkod pa bsam gyis mi khyab pa'i thugs rje chen po'i sku'i ba spu'i khung bu re rer yang zhing khams bsam gyis mi khyab pa dang /__de re rer yang rgyal ba sras bcas bsam gyis mi khyab pa nyi zer la rdul 'khrigs pa ltar bzhugs pa thams cad kyi zhal nas kyang yi ge drug pa'i sgra 'ur dir re gsung ba dang /__der ma zad zhing khams de dang der gnas pa'i sa chu me rlung ste rten 'byung ba bzhi'i sgra dang /__brten pa sems can thams cad kyang thugs rje chen po'i rnam rol tu shar bas yi ge drug pa'i sgra 'ur 'ur sgrog par bsams la/__cir snang lha sku/__sgrar grag yi ge drug pa/__dran rtog thugs rje chen po'i thugs stong nyid snying rje'i snying po can du lta ba'i lam khyer zab mo dang ma bral ba'i ngang nas bzlas pa bya ba ni bsod nams kyi phung po bsam gyis mi khyab pa yin te/__de'i rgyu mtshan zhib par za ma tog bkod pa'i mdo sde sogs las shes par bya'o/__/gnyis pa ni/__lus gnad bsrangs te rlung ro bsal la cung zad ngal bso/__/de nas sna bug gnyis nas rlung nang du 'jug pa oM gyi gdangs dang /__snying ga'i byang chub sems kyi thig le gnas pa AH'i gdangs dang /__de las phyir ldang ba hU~M gi gdangs dang /__ngo bo dbyer med du sbyor ba'i rdo rje'i bzlas pa la 'bad do/__/spyir 'di'i rdzogs rim nyid 'dus pa ye shes zhabs lugs kyi rdzogs rim thig le bzhi rim dang mthun zhing /__khyad par mthar thug lhan skyes kyi dga' ba'i dbang du byas te snying gar mi shigs pa'i thig le bsgom tshul dang /__'di'i byang chub sems kyi thig le gnyis don gcig tu 'babs pa'i phyir/__tshul 'di la ye shes zhabs lugs kyi gzhung chen po rnams dang /__man ngag gi yi ge rnams legs par rtogs par byas te phan tshun lto sbyar nas nges shes bskyed par bya'o zhes bla ma phyi ma rnams gsung ngo /__/gsum pa rjes ni/__thun de las ldang bar brtsam pa na/__yi ge brgya pa ci nus su bzla pas ting nge 'dzin gyi lhag chad kha bskang ba dang /__brtan cing nus pa gong 'phel du byas nas sngar ltar mchod cing bstod/__rang nyid gtso bo'i thugs ka'i thig le ser po yungs 'bru tsam dwangs shing gsal ba de las 'od zer 'phros pas snod bcud thams cad lan tshwa chur bcug pa bzhin 'od dkar po bde ba chen po'i ngo bor mer gyis zhu nas phyi bkod pa bsam gyis mi khyab pa'i lha'i gzhal yas khang la thim zhing thig le bco lnga'i bar gyi gzhal yas khang de rnams kyang rang rang gi kha dog gi thig ler gyur nas phyi ma phyi ma/__nang ma nang ma la thim pa'i mthar/__thig le ser po sran ma tsam pa zhig tu gyur/__de nyid sangs rgyas chos kyi sku'i spyi bo'i oM la thim/__de AHla/__de hU~M la/__de yang shin tu phra ba'i rlung sems kyi thig le la thim nas stong nyid snying rje gnyis su med par gyur par bsams la ci gnas su mnyam par bzhag__/de'i ngang las skad cig gis rang nyid thugs rje chen po zhal gcig phyag gnyis pa'i sku 'ja' tshon ltar lam gyis shar ba'i gnas gsum du oM AHhU~M gis mtshan par mos la/__/brgyud pa gsum ldan bla ma thams cad dang /__/yi dam thugs rje chen po'i lha tshogs dang /__/jo bo yab sras thugs rje can rnams kyis/__/bdag gi smon pa'i gnas 'di 'grub par mdzod/__/'dis mtshon dus gsum dge tshogs bsdoms pa'i mthus/__/bdag dang mkha' mnyam 'gro ba ma lus pa/__/brgyud pa gsum ldan bla ma dam pa yis/__/tshe rabs kun tu 'bral med rjes bzung ste/__/bka' gdams rnam thar gtsang ma mthar phyin shog__/skyes bu gsum gyi lam du gsung rab kun/__/bsdus te nyams su blangs pas rgyud sbyangs nas/__/gsang chen sgor zhugs dam tshig tshul bzhin srung /__/zung 'jug snying gi thig le 'grub par shog__/lha bzhis lus dang sde snod gsum gyis ngag__/bslab pa gsum gyis sems brgyan rjes dran lnga'i/__/nyams len mthar phyin 'gro kun sgrol ba la/__/rgyal ba rgya mtsho nyid dang mtshungs par shog__/gsang chen snying gi thig le'i gdams pa mchog__/dben pa'i gnas su nyams su len pa la/__/jo bo'i bka' srung dgu bcu rtsa gnyis kyis/__/g.yel ba med par rtag tu grogs byed shog__/ces bsngo smon dang /__legs tshogs kun gyi 'byung gnas bla ma rnams kyi bkra shis shog__/sku gsum mngon du gyur pa sangs rgyas rnams kyi bkra shis shog__/thog mtha' bar du dge ba dam pa'i chos kyi bkra shis shog__/bslab gsum rnam par dag pa dge 'dun rnams kyi bkra shis shog__/bdag gzhan mnyam brje rin chen byang chub sems kyi bkra shis shog__/thabs shes zung 'jug rim gnyis rnal 'byor zab mo'i bkra shis shog__/phan bde'i gzhir gyur thub bstan phyogs bcur rgyas pa'i bkra shis shog__/'gro kun theg mchog chos kyi dpal la spyod pa'i bkra shis shog__/ces shis pa brjod cing spyod lam la 'jug par bya'o/__/de ltar na de rnams kyi sgo nas bka' gdams glegs bam rin po che'i don gyi snying po mdor bsdus te rjes dran lnga'i tshul gyis nyams su len tshul gyi khrid 'jam dbyangs kun dga' grol mchog gi khrid brgya sogs las kyang mdo tsam 'byung ba dang /__da ltar gyi bla ma dam pa rnams kyi phyag bzhes dang zhal lung las ji ltar thos pa bzhin ngag 'don dang dmigs rim phyogs gcig tu bkod pa yin no/__/gnyis pa ni/__de las kyang rgyas par spro na/__thig le dang po'i skabs lha'i gsal snang dang tshogs bsag pa'i dmigs pa nan tan du byas nas/__thig le gnyis pa/__gsum pa/__bzhi pa rnams la rim pa bzhin skyes bu chung ngu'i khrid/__'bring gi khrid/__chen po theg pa chen po'i blo sbyong ba'i khrid rnams bsgom/__lnga pa la sher phyin gyi thugs ka'i 'od zer gyi 'phro 'dus bdud sde'i dpung tshogs rnams bcom nas zhi bar bsam mo/__/drug pa bdun pa brgyad pa dgu pa bcu pa rnams la bka' gdams lha bzhi'i khrid bsgom zhing /__khyad par sgrol ma drag mo dang mi g.yo ba gnyis la dgra bgegs tshar gcod pa'i dmigs pa dang drag sngags bzla/__thig le bcu gcig pa 'dir ni brgyud pa gsum la brten pa'i bla ma'i sgrub pa gtso bor bya/__bcu gnyis par glegs bam rin po che'i skyes rabs spyi dang /__khyad par dkon mchog 'bangs kyis u rgyan gyi yul du byon pa'i rdo rje'i glu dang chos zab mo dpag tu med pa'i skor gyi rnam thar yid yul du nges par byas nas rang nyid kyang blos der phyin pa dang de 'dra ba byas pa'i bsam sgom nan tan tu bya/__bcu gsum pa la zhi gnas gtso bor bsgom/__bcu bzhi pa la zab mo dbu ma'i lta ba bsgom/__bco lnga par rang gang mos pa'i bla med kyi rgyud sde zhig gi rdzogs rim dang sbyar na legs/__bcu drug pa ni sangs rgyas chos sku'i thig le de nyid grangs med par spro zhing sdud pa sogs kyi ngang nas thig le'i nang du sangs rgyas kyi zhing rten dang brten par bcas pa grangs med pa 'char ba dang /__de rnams la rang nyid kyis mjal zhing chos nyan pa sogs mang du bsams pa'i mthar thig le de nyid gsal stong dbyings rig spros pa dang bral ba'i ngang du mnyam par gzhag__/thun bsdu ba ni bcu drug po thams cad la rigs 'gre'o/__/'khrid rgyun khyer du nyams su len na bcu drug po gzhan rnams rgyas bsdus skabs sbyar chags med tsam byas/__rang gang mos pa zhig dang /__bcu drug pa gnyis la nan tan du bya/__shin tu bsdus pa byed na/__thig le thams cad kyi skyed chog tsam byas nas/__nyams len dmigs phug pa gcig la byas kyang rung ngo /__/mdor na lam gyi rtsa ba bshes gnyen bsten tshul nas zung 'jug gi bar gyi lam thams cad stan thog gcig tu nyams su len pa'i tshul tshang la ma nor ba 'di ni gdul bya rin po che lta bu'i gang zag snyigs dus kyi tshe thung gcig la 'tshang rgya ba'i lam tshang la ma nor ba yin no/__/smras pa/__/mkhas grub gang+gA'i yab gcig ti se'i gzugs/__/mnyam med dI paM kA ra yab sras kyi/__/zab chos thig le bcu drug snying po'i gtam/__/bdud rtsi'i mchod yon gtan pa med par sbrengs/__/de las byung ba'i dge ba ni/__/dpag bsam gsar pa'i rjes 'gro bas/__/'gro ba kun la grub gnyis kyi/__/dga' ston mchog tu sbyin gyur cig__/ces pa'ang rje bla ma bcu phrag rig pa'i paN+Dita dkon mchog bstan pa rab rgyas dpal bzang pos chos grwa chen po bkra shis lhun po dpal gyi sde chen phyogs thams cad las rnam par rgyal ba'i phun tshogs khang gsar du ji ltar stsal ba bzhin/__gzhon nu mkhyen brtse'i ming gis zin bris su btab pa sarba dA ka l+yA NaM b+ha ba tu//__//

Footnotes

Other Information