JKW-KABUM-22-ZA-012-096

🚧 This website is under continued development. We appreciate your patience!

Previous Text Back to Volume PageNext Text

རང་གིས་རང་གྲོས་གདབ་པའི་རྡོ་རྗེའི་ཐོལ་གླུ་བདེན་པའི་འཁྲི་ཤིང་།

Wylie title	rang gis rang gros gdab pa'i rdo rje'i thol glu bden pa'i 'khri shing
Location	mkhyen brtse'i bka' 'bum Volume 22, sde tshan 12, Text 96, Pages 608-614 (Folios 132b4 to 135b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rang gis rang gros gdab pa'i rdo rje'i thol glu bden pa'i 'khri shing. In 'jam dbyangs mkhyen brtse'i dbang po'i bka' 'bum, Vol. 22: 608-614. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

96 608-614	རང་གིས་རང་གྲོས་གདབ་པའི་རྡོ་རྗེའི་ཐོལ་གླུ་བདེན་པའི་འཁྲི་ཤིང་། rang gis rang gros gdab pa'i rdo rje'i thol glu bden pa'i 'khri shing Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རང་གིས་རང་ལ་གྲོས་གདབ་པའི་རྡོ་རྗེའི་ཐོལ་གླུ་བདེན་པའི་འཁྲི་ཤིང་ཅེས་བྱ་བ། ཨ་ཧོ། དཔལ་སྐུ་བཞིའི་དབང་ཕྱུག་ཧེ་རུ་ཀཿ ། ཁྱབ་བདག་འཁོར་ལོའི་མགོན་པོ་ལ། །མི་ཕྱེད་གུས་པས་གསོལ་བ་འདེབས། །ཐུགས་རྗེ་ཆེན་པོས་རྗེས་སུ་སྐྱོངས། །སྔོན་བསྐལ་པ་རྫོགས་ལྡན་དུས་ཚོད་དེར། །ཕྱི་སྣོད་ཀྱི་འབྱུང་བ་ངང་གིས་སྙོམས། །ནང་བཅུད་ཀྱི་འགྲོ་བ་བདེ་ལ་སྤྱོད། །ལྷ་ཡི་དཔལ་འབྱོར་ལ་འགྲན་པའི་ཚེ། །ཆགས་སྡང་རགས་པའི་འདུ་བྱེད་ཀྱིས། །རང་གཞན་ཀུན་ངན་སོང་གི་གནས་མལ་ལ། །སྦྱར་བའི་ངང་ཚུལ་བག་ཉལ་བས། །རང་བཞིན་གྱི་རྣམ་པར་དུལ་མོད་དེ། །དུས་དེང་སང་སྙིགས་མའི་གནས་སྐབས་འདིར། །ཕན་པར་སྨྲས་ཀྱང་ལོག་པར་བལྟ། །ཆོས་ལ་སྦྱར་ཞིང་ཕྱི་ཕྱིར་གྱོང་། །བསྒྲུབ་སླ་བའི་གསང་སྔགས་ལ་འཇུག་རློམ་ཞིང་། །དེ་དམ་ཚིག་གི་གྲོགས་ཀྱིས་རིང་སྤངས་ཚེ། །རྡོ་རྗེ་དམྱལ་བར་སྦྱོར་མོད་ཀྱང་། །ད་རུང་རིག་པ་འཛིན་པར་རློམས། །ཨ་ལ་བསྟན་པའི་ཞབས་འདྲེན་པ། །དེ་དག་རྣམས་ལ་ཅི་ཞིག་སྨོན། །དམ་པའི་བཤེས་ལ་བསྟེན་བྱས་ནས། །དམ་ལྡན་གྲོགས་དང་འགྲོགས་ནས་ཀྱང་། །དམ་པའི་གདམས་ངག་རྟག་མཉན་ཅིང་། །དམ་པའི་སྤྱོད་པར་བསླབ་འདོད་པར། །ཁྱད་པར་ཅན་གྱི་འཕྲིན་འདི་གདམས། །རང་ལ་ཡོན་ཏན་ནོར་བུའི་གཏེར། །ཕན་བདེའི་ཟ་མ་ཏོག་དག་གིས། །ཕྱུག་པ་ཅུང་ཟད་མེད་མོད་ཀྱང་། །ཡོད་པར་རློམ་པ་རིང་དུ་སྤང་། །གཞན་གྱིས་བསྙེན་བཀུར་འདོད་པའི་སྤྲིན། །རྟག་པར་སྙིང་ལ་ངལ་འཚོས་ཀྱང་། །རེ་དོགས་རྡོ་རྗེ་ལྕུག་མ་ཡིས། །ཐར་པའི་བྲག་རི་ཚལ་བར་བཀས། །དེས་ན་གང་དང་གང་དུ་རུང་། །ཉམ་ཆུང་གྱི་ནའི་འཚོ་བ་གང་། །བག་ཡོད་བསླབ་པས་དུས་འདའ་ཞིང་། །ཆོག་ཤེས་ནོར་ལ་མངོན་པར་བསྙེན། །རང་ཉིད་དམའ་བའི་ས་བཟུང་ཞིང་། །ཀུན་དང་མཐུན་པར་དཀའ་ན་ཡང་། །སྙིང་ལ་འབབ་པར་སྨྲ་བའི་ཚིག །བདེན་པའི་དོན་གྱིས་ལྕི་བར་གླེང་། །མཁས་པ་དང་ནི་གྲུབ་པ་ཡི། །སྙན་གྲགས་ཤུགས་ལ་བྱུང་ན་རུང་། །དེ་བས་འདོད་པར་མི་བྱ་བར། །རྟག་ཏུ་སྙིང་གི་ཐིག་ལེར་ཟུངས། །ཇོ་བོ་བཀའ་གདམས་བརྒྱུད་འཛིན་པའི། །དགེ་བའི་བཤེས་གཉེན་ཐམས་ཅད་ཀུན། །ཡོན་ཏན་སྦེད་པར་གཙོར་མཛད་ན། །བདག་གིས་ཅི་ཕྱིར་སྒྲོགས་པར་བྱེད། །འཇིག་རྟེན་འདི་ན་གྲགས་པ་ཡི། །ཆེན་པོ་འགའ་ཡང་ཆོས་བརྒྱད་ཀྱི། །ཞགས་པས་བཅིངས་པ་དེ་མཐོང་ནས། །འདི་ལ་བག་ཟོན་མཛད་པའི་རིགས། །ལར་ཡང་རྒྱ་གར་འཕགས་ཡུལ་དུ། །གྲུབ་པའི་དབང་ཕྱུག་བརྒྱད་ཅུ་དང་། །འཛམ་གླིང་མཛེས་པའི་རྒྱན་དྲུག་སོགས། །སྟོན་པ་གཉིས་པར་གྲགས་ཀུན་ཀྱང་། །ཚུལ་བཞིན་བསླབ་དང་བསྒྲུབས་པ་ལས། །ཚེ་འདིར་མཆོག་གི་གོ་འཕང་དུ། །གཤེགས་ལས་གདུང་དང་སྐུ་སྐྱེ་ཡི། །གྲགས་སྙན་མེད་ཀྱང་བྷོ་ཊ་འདིར། །དེ་ལ་གཙོ་བོར་བྱེད་པ་ལ། །ཕལ་ཆེར་ངོ་མཚར་ཆེ་མོད་ཀྱང་། །ཕལ་པ་འགའ་ཡང་དེ་རྗེས་སུ། །འབྲང་བ་མང་བས་སྐབས་དབྱེ་དཀའ། །དེ་ལྟར་ན་ཡང་ལུང་རིག་གིས། །རྗེས་སུ་བསྒྲུབ་པའི་ཡོན་ཏན་དག །མངའ་བ་ཛ་ལནྡྷ་ར་རུ། །ཞབས་སེན་བླང་བའི་ཡུལ་ཡིན་ཅིང་། །དག་སྣང་ཁྱབ་ལ་ཉིན་བྱེད་ཀྱིས། །དད་གསུམ་ཨུཏྤལ་ཕྱེ་བ་ཕལ། །རང་བཞིན་དུལ་བ་ཆོས་གཟུགས་ཡིན། །ཡིད་ཀྱི་ཟེའུ་འབྲུར་བསྟེན་པར་འོས། །ཁྱད་པར་རྒྱུད་ལུང་མན་ངག་ལས། །ཉེ་བར་བསྟན་པ་རྗེས་སྤྱོད་ཅིང་། །བྱ་བ་རྣམས་སྤངས་བསླབ་གསུམ་ལྡན། །སྐྱབས་ཀྱི་དམ་པར་བཟུང་བར་མཛོད། །གཞན་ཟེར་ཚིག་གི་རྗེས་འབྲངས་ཤིང་། །གར་མཁན་ལག་པའི་མཉེན་ལྕུག་ལས། །བྲེལ་བའི་སྤྱོད་པར་ཡིད་དབྱུང་ནས། །དབེན་པའི་གནས་སུ་སྙེགས་ན་ལེགས། །བསྟན་བཅོས་རྩོམ་པའི་ངལ་བ་དང་། །འཆད་སྤེལ་སྨིན་གྲོལ་གཡེང་པ་ཡང་། །རང་འདོད་བྲལ་ན་ལེགས་མོད་དེ། །གཞན་དུ་བདུད་ཀྱིས་བློ་བསྒྱུར་ནས། །ཟས་ནོར་སྙན་གྲགས་བསྡུ་བའི་ཕྱིར། །འཇིག་རྟེན་མཐུན་འཇུག་ཤུལ་ལམ་དུ། །ཞུགས་པ་འདི་ལས་རིང་དུ་བྲོས། །ཕ་རོལ་ཡོན་ཏན་ལྡན་གྱུར་ཀྱང་། །སྐྱོན་གྱི་གོང་བུར་རབ་བཟུང་ནས། །བདག་གི་སྐྱོན་ཡང་ཡོན་ཏན་དུ། །རློམ་པའི་ང་རྒྱལ་རྩད་ནས་ཆོད། །བདེ་ན་ཚོགས་གཉིས་འབྲས་བུ་ལས། །དེ་ཉིད་བྱུང་བ་ཤེས་བྱས་ཏེ། །དཀར་པོའི་ཕྱོགས་ལ་འབད་བྱས་ནས། །དགའ་བའི་བདོག་པ་འགྲོ་ལ་བསྔོ། །སྡུག་ན་མི་དགེའི་འབྲས་སྐྱེས་པར། །མཐོང་ནས་བྱང་ཆུབ་སེམས་བསྒོམས་ཤིང་། །ཚུལ་མིན་ཀུན་ཀྱང་འགྲོ་རྣམས་ཀྱི། །དུཿཁ་བདག་གི་ཁུར་དུ་བླངས། །གང་ལ་རབ་ཏུ་ཆགས་ཆེ་བའི། །ཡོ་བྱད་བསྙུང་ནས་སྦྱིན་ནུས་ན། །བསྐམ་ཆགས་གཞན་དག་མི་འདོད་ཕྱིར། །ཆོག་ཤེས་ནོར་གྱི་མཆོག་དེ་འཐོབ། །སྲོག་བཅད་མ་བྱིན་ལེན་པ་དང་། །མི་ཚངས་སྤྱོད་པ་རྫུན་སྨྲ་བ། །རྩ་བ་བཞི་པོ་ཆང་བཅས་པ། །རིང་དུ་སྤང་བའི་ཚུལ་ཁྲིམས་བླངས། །ཕ་རོལ་ངན་སྨྲས་ཚིག་གི་མདས། །སྙིང་ལ་འབིགས་གང་ལྡོག་དཀའ་བའི། །ཟུག་རྔུའི་ཚོར་བས་མནར་མོད་དེ། །བཟོད་པའི་གོ་ཆ་རྟག་ཏུ་བགོ །རིམ་གྱིས་ཡོན་ཏན་གོང་འཕེལ་ཞིང་། །དེ་ལྡོག་ཕྱི་ཕྱིར་བསྲིངས་པའི་ཕྱིར། །བརྩོན་པ་དོན་ཡོད་རྡོ་བ་ལ། །རི་མོ་བྲིས་ལྟར་བསླུ་མི་བགྱིད། །གཅིག་པུར་སྡོད་པའི་དུས་ཀྱི་ཚེ། །བསམ་གཏན་ཐག་པས་དྲན་འཛིན་ཡིད། །འཆིང་བས་ཕྲ་རགས་ཉོན་མོངས་ཚོགས། །རྩེ་གཅིག་ཞི་བའི་དོན་ལ་གཞོལ། །མང་པོའི་དབུས་སུ་ཞུགས་པའི་ཚེ། །ལྷག་མཐོང་ཤེས་རབ་ཕ་རོལ་ཕྱིན། །རང་གྲོལ་རྗེན་པ་གཉུག་མའི་ངང་། །བསལ་བཞག་བྲལ་བར་ལ་བཟླ་བྱ། །ཡི་གེ་འབྲི་ཀློག་སྦྱིན་པ་སོགས། །ཆོས་སྤྱོད་བཅུ་ལ་རབ་འབད་ཅིང་། །རྟག་ཏུ་མི་དགེ་རྣམས་བསྡམ་སྟེ། །དགེ་བའི་དོན་ལ་བརྩོན་པའི་ཚེ། །སྦྱོར་བ་སེམས་བསྐྱེད་དངོས་གཞི་ནི། །དམིགས་མེད་འཁོར་གསུམ་ཡང་དག་ལ། །རྗེས་ཐོབ་བསྔོ་བས་མཚམས་སྦྱོར་བའི། །དམ་པ་གསུམ་གྱིས་ཟིན་པ་གཅེས། །མཐོ་ཡང་ང་རྒྱལ་རྣམ་སྤང་ཞིང་། །དམན་པར་ལྷག་པར་ཞུམ་པ་བྲལ། །བར་མའི་དུས་སུ་འཚམས་པར་སྤྱད། །འདི་ནི་དམ་པའི་བསླབ་པ་ཡིན། །དབེན་པར་བསྒོམ་ཚེ་འཆད་ཉན་སྤྲོ། །འཆད་ཉན་འབད་ཚེ་ཏིང་འཛིན་ལ། །གཞོལ་བར་ཕྱོགས་པའི་སྐྱེས་བུ་ནི། །མཐའ་མ་གཅིག་ཀྱང་གྲུབ་པ་མེད། །ཁྱད་པར་སྤྲེའུའི་སྒྱུ་རྩལ་ལས། །བྲེལ་བའི་བློ་སྣ་ཚོགས་པ་ནི། །རླུང་མང་དབུས་ཀྱི་མར་མེ་ལྟར། །མྱུར་དུ་དམན་པར་འགྲོ་བའི་ལྟས། །མདོར་ན་མང་དུ་སྨོས་ཅི་དགོས། །རྟག་ཏུ་དམ་པའི་རྗེས་སློབ་ཅིང་། །ཡོན་ཏན་ཉེར་སྦས་སྐྱོན་རྣམས་བསལ། །སྙོམ་ཆུང་ཆོག་ཤེས་སྙན་གྲགས་ཀྱི། །བཀུར་སྟིའི་རེ་བ་རིང་དུ་ཆོད། །ངེས་པར་འཆི་བ་མ་དྲན་པའི། །ཐོས་བསམ་སྒོམ་གསུམ་ཐམས་ཅད་ཀུན། །ཚེ་འདིའི་ཤོམ་རར་འགྲོ་བའི་ཕྱིར། །བྱ་བྱེད་མང་པོའི་སྤྲོས་པ་སྐྱུངས། །ནམ་ཞིག་འཆི་འཕོ་དུས་ཀྱི་ཚེ། །དོན་གྱི་བཙན་ས་མ་ཟིན་ན། །འདིར་སྣང་ཚོགས་དྲུག་འཇའ་སྤྲིན་གྱིས། །བསླུ་བར་ངེས་སོ་ཡིད་ལ་ཟུངས། །བཅོམ་ལྡན་བདེན་པར་གསུངས་པ་དེས། །ནང་པའི་ཆོས་རྣམས་ཐམས་ཅད་ལས། །མི་རྟག་བསྒོམ་པ་མཆོག་ཡིན་ཅེས། །ཡང་ནས་ཡང་དུ་བཀའ་སྩལ་ཕྱིར། །འཕགས་ཡུལ་གྲུབ་པའི་དབང་ཕྱུག་དང་། །བོད་དུ་རྗེ་བཙུན་མི་ལ་སོགས། །མཁས་དང་གྲུབ་པས་ཕྱག་ལེན་གྱིས། །གཏན་ལ་ཕབ་པ་དེ་དགོངས་ལ། །རྙེད་དང་བསྟོད་སྨད་ཆགས་སྡང་སོགས། །ཚེ་འདིའམ་ལོ་དང་ཟླ་བ་ལས། །ངེས་པར་རྟག་མི་ཐུབ་པ་རུ། །བསམ་ནས་ངེས་ཤེས་བསྐྱེད་པར་མཛོད། །དེ་སྐད་རང་དང་གཞན་ཡང་རུང་། །སྐལ་མཉམ་དག་གི་དོན་ཆེད་དུ། །རྡོ་རྗེའི་གླུ་རུ་བླངས་པ་འདི། །བདེན་པའི་ཚིག་ཏུ་ངེས་པར་བརྗོད། །དགེ་བས་ཆོས་མཐུན་སྤྱོད་ཚུལ་ལ། །རྟག་ཏུ་བསླབ་པས་མངོན་མཐོ་དང་། །ངེས་ལེགས་ཐེམ་སྐས་ལ་འཛེགས་ཏེ། །བྱང་ཆུབ་སྙིང་པོར་གཤེགས་པར་ཤོག ། ༈

[edit]

rang gis rang gros gdab pa'i rdo rje'i thol glu bden pa'i 'khri shing /__ rang gis rang la gros gdab pa'i rdo rje'i thol glu bden pa'i 'khri shing ces bya ba/__a ho/__dpal sku bzhi'i dbang phyug he ru kaH__/_khyab bdag 'khor lo'i mgon po la/__/mi phyed gus pas gsol ba 'debs/__/thugs rje chen pos rjes su skyongs/__/sngon bskal pa rdzogs ldan dus tshod der/__/phyi snod kyi 'byung ba ngang gis snyoms/__/nang bcud kyi 'gro ba bde la spyod/__/lha yi dpal 'byor la 'gran pa'i tshe/__/chags sdang rags pa'i 'du byed kyis/__/rang gzhan kun ngan song gi gnas mal la/__/sbyar ba'i ngang tshul bag nyal bas/__/rang bzhin gyi rnam par dul mod de/__/dus deng sang snyigs ma'i gnas skabs 'dir/__/phan par smras kyang log par blta/__/chos la sbyar zhing phyi phyir gyong /__/bsgrub sla ba'i gsang sngags la 'jug rlom zhing /__/de dam tshig gi grogs kyis ring spangs tshe/__/rdo rje dmyal bar sbyor mod kyang /__/da rung rig pa 'dzin par rloms/__/a la bstan pa'i zhabs 'dren pa/__/de dag rnams la ci zhig smon/__/dam pa'i bshes la bsten byas nas/__/dam ldan grogs dang 'grogs nas kyang /__/dam pa'i gdams ngag rtag mnyan cing /__/dam pa'i spyod par bslab 'dod par/__/khyad par can gyi 'phrin 'di gdams/__/rang la yon tan nor bu'i gter/__/phan bde'i za ma tog dag gis/__/phyug pa cung zad med mod kyang /__/yod par rlom pa ring du spang /__/gzhan gyis bsnyen bkur 'dod pa'i sprin/__/rtag par snying la ngal 'tshos kyang /__/re dogs rdo rje lcug ma yis/__/thar pa'i brag ri tshal bar bkas/__/des na gang dang gang du rung /__/nyam chung gyi na'i 'tsho ba gang /__/bag yod bslab pas dus 'da' zhing /__/chog shes nor la mngon par bsnyen/__/rang nyid dma' ba'i sa bzung zhing /__/kun dang mthun par dka' na yang /__/snying la 'bab par smra ba'i tshig__/bden pa'i don gyis lci bar gleng /__/mkhas pa dang ni grub pa yi/__/snyan grags shugs la byung na rung /__/de bas 'dod par mi bya bar/__/rtag tu snying gi thig ler zungs/__/jo bo bka' gdams brgyud 'dzin pa'i/__/dge ba'i bshes gnyen thams cad kun/__/yon tan sbed par gtsor mdzad na/__/bdag gis ci phyir sgrogs par byed/__/'jig rten 'di na grags pa yi/__/chen po 'ga' yang chos brgyad kyi/__/zhags pas bcings pa de mthong nas/__/'di la bag zon mdzad pa'i rigs/__/lar yang rgya gar 'phags yul du/__/grub pa'i dbang phyug brgyad cu dang /__/'dzam gling mdzes pa'i rgyan drug sogs/__/ston pa gnyis par grags kun kyang /__/tshul bzhin bslab dang bsgrubs pa las/__/tshe 'dir mchog gi go 'phang du/__/gshegs las gdung dang sku skye yi/__/grags snyan med kyang b+ho Ta 'dir/__/de la gtso bor byed pa la/__/phal cher ngo mtshar che mod kyang /__/phal pa 'ga' yang de rjes su/__/'brang ba mang bas skabs dbye dka'/__/de ltar na yang lung rig gis/__/rjes su bsgrub pa'i yon tan dag__/mnga' ba dza lan+d+ha ra ru/__/zhabs sen blang ba'i yul yin cing /__/dag snang khyab la nyin byed kyis/__/dad gsum ut+pal phye ba phal/__/rang bzhin dul ba chos gzugs yin/__/yid kyi ze'u 'brur bsten par 'os/__/khyad par rgyud lung man ngag las/__/nye bar bstan pa rjes spyod cing /__/bya ba rnams spangs bslab gsum ldan/__/skyabs kyi dam par bzung bar mdzod/__/gzhan zer tshig gi rjes 'brangs shing /__/gar mkhan lag pa'i mnyen lcug las/__/brel ba'i spyod par yid dbyung nas/__/dben pa'i gnas su snyegs na legs/__/bstan bcos rtsom pa'i ngal ba dang /__/'chad spel smin grol g.yeng pa yang /__/rang 'dod bral na legs mod de/__/gzhan du bdud kyis blo bsgyur nas/__/zas nor snyan grags bsdu ba'i phyir/__/'jig rten mthun 'jug shul lam du/__/zhugs pa 'di las ring du bros/__/pha rol yon tan ldan gyur kyang /__/skyon gyi gong bur rab bzung nas/__/bdag gi skyon yang yon tan du/__/rlom pa'i nga rgyal rtsad nas chod/__/bde na tshogs gnyis 'bras bu las/__/de nyid byung ba shes byas te/__/dkar po'i phyogs la 'bad byas nas/__/dga' ba'i bdog pa 'gro la bsngo/__/sdug na mi dge'i 'bras skyes par/__/mthong nas byang chub sems bsgoms shing /__/tshul min kun kyang 'gro rnams kyi/__/duHkha bdag gi khur du blangs/__/gang la rab tu chags che ba'i/__/yo byad bsnyung nas sbyin nus na/__/bskam chags gzhan dag mi 'dod phyir/__/chog shes nor gyi mchog de 'thob/__/srog bcad ma byin len pa dang /__/mi tshangs spyod pa rdzun smra ba/__/rtsa ba bzhi po chang bcas pa/__/ring du spang ba'i tshul khrims blangs/__/pha rol ngan smras tshig gi mdas/__/snying la 'bigs gang ldog dka' ba'i/__/zug rngu'i tshor bas mnar mod de/_/bzod pa'i go cha rtag tu bgo__/rim gyis yon tan gong 'phel zhing /__/de ldog phyi phyir bsrings pa'i phyir/__/brtson pa don yod rdo ba la/__/ri mo bris ltar bslu mi bgyid/__/gcig pur sdod pa'i dus kyi tshe/__/bsam gtan thag pas dran 'dzin yid/__/'ching bas phra rags nyon mongs tshogs/__/rtse gcig zhi ba'i don la gzhol/__/mang po'i dbus su zhugs pa'i tshe/__/lhag mthong shes rab pha rol phyin/__/rang grol rjen pa gnyug ma'i ngang /__/bsal bzhag bral bar la bzla bya/__/yi ge 'bri klog sbyin pa sogs/__/chos spyod bcu la rab 'bad cing /__/rtag tu mi dge rnams bsdam ste/__/dge ba'i don la brtson pa'i tshe/__/sbyor ba sems bskyed dngos gzhi ni/__/dmigs med 'khor gsum yang dag la/__/rjes thob bsngo bas mtshams sbyor ba'i/__/dam pa gsum gyis zin pa gces/__/mtho yang nga rgyal rnam spang zhing /__/dman par lhag par zhum pa bral/__/bar ma'i dus su 'tshams par spyad/__/'di ni dam pa'i bslab pa yin/__/dben par bsgom tshe 'chad nyan spro/__/'chad nyan 'bad tshe ting 'dzin la/__/gzhol bar phyogs pa'i skyes bu ni/__/mtha' ma gcig kyang grub pa med/__/khyad par spre'u'i sgyu rtsal las/__/brel ba'i blo sna tshogs pa ni/__/rlung mang dbus kyi mar me ltar/__/myur du dman par 'gro ba'i ltas/__/mdor na mang du smos ci dgos/__/rtag tu dam pa'i rjes slob cing /__/yon tan nyer sbas skyon rnams bsal/__/snyom chung chog shes snyan grags kyi/__/bkur sti'i re ba ring du chod/__/nges par 'chi ba ma dran pa'i/__/thos bsam sgom gsum thams cad kun/__/tshe 'di'i shom rar 'gro ba'i phyir/__/bya byed mang po'i spros pa skyungs/__/nam zhig 'chi 'pho dus kyi tshe/__/don gyi btsan sa ma zin na/__/'dir snang tshogs drug 'ja' sprin gyis/__/bslu bar nges so yid la zungs/__/bcom ldan bden par gsungs pa des/__/nang pa'i chos rnams thams cad las/__/mi rtag bsgom pa mchog yin ces/__/yang nas yang du bka' stsal phyir/__/'phags yul grub pa'i dbang phyug dang /__/bod du rje btsun mi la sogs/__/mkhas dang grub pas phyag len gyis/__/gtan la phab pa de dgongs la/__/rnyed dang bstod smad chags sdang sogs/__/tshe 'di'am lo dang zla ba las/__/nges par rtag mi thub pa ru/__/bsam nas nges shes bskyed par mdzod/__/de skad rang dang gzhan yang rung /__/skal mnyam dag gi don ched du/__/rdo rje'i glu ru blangs pa 'di/__/bden pa'i tshig tu nges par brjod/__/dge bas chos mthun spyod tshul la/__/rtag tu bslab pas mngon mtho dang /__/nges legs them skas la 'dzegs te/__/byang chub snying por gshegs par shog__/__!