JKW-KABUM-22-ZA-007-025

🚧 This website is under continued development. We appreciate your patience!

Previous Text Back to Volume PageNext Text

བྱམས་པ་ཕུན་ཚོགས་ལ་བརྟེན་པའི་བླ་མའི་རྣལ་འབྱོར་བྱིན་རླབས་སྙིང་པོ།

Wylie title	byams pa phun tshogs la brten pa'i bla ma'i rnal 'byor byin rlabs snying po
Location	mkhyen brtse'i bka' 'bum Volume 22, sde tshan 7, Text 25, Pages 265-273 (Folios 41a3 to 45a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. byams pa phun tshogs la brten pa'i bla ma'i rnal 'byor byin rlabs snying po. In 'jam dbyangs mkhyen brtse'i dbang po'i bka' 'bum, Vol. 22: 265-273. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Colophon	།ཅེས་པའང་བླ་མ་རྡོ་རྗེ་འཆང་བྱམས་པའི་མཚན་ཅན་གྱི་ཐུགས་སྲས་དམ་པ་ལི་ཐང་རྩེ་རི་ཁྲོད་ཀྱི་དབུ་མཛད་ལུང་རིགས་སྨྲ་བ་དགེ་སློང་ཕྲིན་ལས་རྒྱ་མཚོ་དང་། མཐུ་སྟོབས་ཟུང་ནས་མཎྜལ་དང་བཅས་ཏེ་ནན་ཏན་དུ་བསྐུལ་བ་ལྟར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག །
	ces pa'ang bla ma rdo rje 'chang byams pa'i mtshan can gyi thugs sras dam pa li thang rtse ri khrod kyi dbu mdzad lung rigs smra ba dge slong phrin las rgya mtsho dang /__mthu stobs zung nas maN+Dal dang bcas te nan tan du bskul ba ltar/__'jam dbyangs bla ma dgyes pa'i 'bangs mkhyen brtse'i dbang pos bris pa dge legs su gyur cig

1 Texts in this Section (sde tshan or chos tshan)

25 265-273	བྱམས་པ་ཕུན་ཚོགས་ལ་བརྟེན་པའི་བླ་མའི་རྣལ་འབྱོར་བྱིན་རླབས་སྙིང་པོ། byams pa phun tshogs la brten pa'i bla ma'i rnal 'byor byin rlabs snying po Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །བླ་མའི་རྣལ་འབྱོར་བྱིན་རླབས་སྙིང་པོ་ཞེས་བྱ་བ། ན་མོ་གུ་རུ་བཛྲ་དྷཱ་རཱ་ཡ། རྡོ་རྗེ་འཆང་དབང་དཔལ་ལྡན་བླ་མ་ཡི། །ཞབས་ཀྱི་པདྨོ་གུས་པས་ཕྱག་འཚལ་ནས། །རྣལ་འབྱོར་ཟབ་མོ་བྱིན་རླབས་སྙིང་པོའི་བཅུད། །སྐལ་བཟང་ཡིད་ཀྱི་ཐིག་ལེར་འབེབས་པར་བྱ། འདི་ལ་བཞི། སྦྱོར་བ་བླ་མའི་རྣལ་འབྱོར་གསལ་གདབ་པ། དངོས་གཞི་ཚོགས་བསག་པའི་སླད་དུ་ཡན་ལག་བདུན་པ་བྱ་བ། བྱིན་རླབས་འཇུག་པའི་ཆེད་དུ་གསོལ་བ་གདབ་པ། མཇུག་དབང་བླང་ཞིང་སྙིང་པོའི་དོན་ལ་མཉམ་པར་གཞག་པའོ། །དང་པོ་ནི། གནས་དབེན་ཞིང་ཡིད་དང་མཐུན་པར་བྱི་དོར་ལེགས་པར་བྱ། རྩ་བའི་བླ་མའི་སྣང་བརྙན་སོགས་དཀོན་མཆོག་གི་རྟེན་ཇི་ལྟར་རིགས་པའི་སྤྱན་སྔར། ཅི་འབྱོར་པའི་མཆོད་པ་བཟང་པོ་གཙང་ཞིང་བཀོད་པས་མཛེས་པར་བཤམ། སྟན་བདེ་བ་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ་དགེ་སེམས་ཁྱད་པར་ཅན་གྱི་ངང་སྐྱབས་འགྲོ་སེམས་བསྐྱེད་སྔོན་དུ་འགྲོ་བས་འདི་ལྟར་གསལ་གདབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཆོས་ཀུན་གཟོད་ནས་དག་པའི་སྟོང་ཉིད་ངང་། །རྟེན་ཅིང་འབྲེལ་འབྱུང་བདེ་བ་ཆེན་པོའི་ཚུལ། །ཟུང་འཇུག་དྭངས་བའི་མཁའ་ལ་འཇའ་ཚོན་ལྟར། །སྣོད་བཅུད་འོག་མིན་ཞིང་གི་བཀོད་པའི་དབུས། །རང་མདུན་ནམ་མཁར་ཀུན་བཟང་མཆོད་སྤྲིན་གྱིས། །མངོན་པར་སྤུངས་པའི་སེང་ཁྲི་པད་ཟླའི་སྟེང་། །དྲན་པས་སྲིད་དང་ཞི་བའི་གདུང་བ་ཀུན། །ཐུགས་རྗེ་བདུད་རྩིའི་ཆར་གྱིས་བསིལ་མཛད་པ། །འཇམ་དབྱངས་བླ་མ་མཁྱེན་བརྩེའི་དབང་པོ་ནི། །རྣམ་པ་ཡེ་ཤེས་སྐུ་ཅན་མཉྫུ་ཤྲཱི། །དམར་སེར་ཕྱག་གཡས་རལ་གྲི་ནམ་མཁར་འཕྱར། །གཡོན་པས་ཨུཏྤལ་ལྟེ་བ་གླེགས་བམ་བསྣམས། །ཟུར་ཕུད་ལྔ་ལྡན་དར་དང་རིན་ཆེན་རྒྱན། །ཞི་འཛུམ་བརྒྱད་གཉིས་ལང་ཚོའི་མཚར་སྡུག་ཅན། །ཞབས་གཉིས་རྡོ་རྗེའི་སྐྱིལ་ཀྲུང་རོལ་པས་བཞུགས། །དེ་ཡི་སྤྱི་བོར་ཁྱབ༷་བད༷ག་དང་པོའི་མགོན། །བྱམ༷ས་པ༷འི་ཐུགས་རྗེས་ངུར་སྨྲིག་འཛིན་པའི་ཚུལ། །ཕུན༷་ཚོག༷ས་སྐུ་བཞིའི་བདག་ཉིད་བླ་མ་མཆོག །རྣམ་པ་ཁ་སྦྱོར་བདུན་ལྡན་རྡོ་རྗེ་འཆང་། །སྐུ་མདོག་ཨིནྡྲ་ནཱི་ལའི་ལྷུན་པོ་ལ། །ཉི་གཞོན་སྟོང་གིས་འཁྱུད་པའི་གཟི་བྱིན་འབར། །ཐབས་ཤེས་ཕྱག་གཉིས་རྡོ་རྗེ་དྲིལ་བུ་བསྣམས། །དར་དང་རིན་ཆེན་རྒྱན་རྫོགས་མཚན་དཔེར་མཛེས། །རང་འོད་ཡུམ་འཁྱུད་བདེ་བའི་ཉམས་འགྱུར་རྫོགས། །ཞབས་ཟུང་རྡོ་རྗེའི་སྐྱིལ་ཀྲུང་པད་ཟླར་རོལ། །ཕུང་པོ་ཁམས་དང་སྐྱེ་མཆེད་ཐམས་ཅད་ཀུན། །རྣམ་དག་གདན་གསུམ་ཚང་བའི་ངོ་བོ་ཉིད། །སྐྱབས་ཀུན་འདུས་ཞལ་ཆེན་པོའི་གནས་གསུམ་དུ། །འབྲུ་གསུམ་ཡི་གེས་མཚན་པའི་འོད་ཟེར་གྱིས། །བླ་མ་ཡི་དམ་སངས་རྒྱས་བྱང་ཆུབ་སེམས། །དཔའ་བོ་མཁའ་འགྲོ་ཆོས་སྲུང་ནོར་ལྷའི་ཚོགས། །སྤྱན་དྲངས་རྡོ་རྗེ་གསུམ་དང་དབྱེར་མེད་གྱུར། །གཉིས་པ་ནི། བདག་དང་མཁའ་མཉམ་འགྲོ་བ་མ་ལུས་ཀུན། །ཞིང་རྡུལ་མཉམ་པའི་ལུས་སུ་སྤྲུལ་ནས་ཀྱང་། །མི་ཕྱེད་དད་པའི་གདུང་ཤུགས་དྲག་པོ་ཡིས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ལུས་དང་ལོངས་སྤྱོད་དུས་གསུམ་དགེ་བ་རྣམས། །ཀུན་ཏུ་བཟང་པོའི་མཆོད་སྤྲིན་རྒྱ་མཚོར་འབུལ། །ཐོགས་མེད་ནས་བསགས་སྡིག་ལྟུང་ཇི་སྙེད་ཚོགས། །སྟོབས་བཞི་ཚང་བས་སྙིང་ནས་སོ་སོར་བཤགས། །རྗེ་བཙུན་བླ་མའི་ཕྲིན་ལས་རྨད་བྱུང་བར། །མཆོག་ཏུ་དད་པས་རྗེས་སུ་ཡི་རང་ངོ་། །རིགས་ཅན་གསུམ་གྱི་གདུལ་བྱ་མཐའ་དག་ལ། །གང་འདུལ་ཆོས་ཀྱི་འཁོར་ལོ་བསྐོར་བཞིན་དུ། །ངེས་པ་ལྔ་ལྡན་ལོངས་སྤྱོད་ཆེན་པོ་དང་། །དབྱེར་མེད་རྒྱུན་གྱིས་རྟག་པར་བཞུགས་གསོལ་འདེབས། །དགེ་བ་འདི་དང་མཐའ་ཡས་དགེ་བ་ཀུན། །བྱང་ཆུབ་སྙིང་པོར་ཡོངས་སུ་བསྔོ་བར་བགྱི། །ཞེས་དང་། མཎྜལ་རྒྱས་བསྡུས་གང་རིགས་འབུལ། གསུམ་པ་ནི། མཁའ་ཁྱབ་སྲས་བཅས་རྒྱལ་བ་ཐམས་ཅད་ཀྱི། །ཡེ་ཤེས་ཕུང་པོ་གཅིག་ཏུ་བསྡུས་པའི་གཟུགས། །དྲན་པ་ཙམ་གྱིས་དངོས་གྲུབ་མཆོག་སྩོལ་བ། །དཔ༷ལ་ལྡན༷་བླ༷་མ༷འི་ཞབས་ལ་གསོལ་བ་འདེབས། །བྱམ༷ས་པ༷འི་ཐུགས་རྗེས་ཁྱབ་བདག་རྡོ་རྗེ་འཆང་། །ཐེག་མཆོག་དགེ་བའི་བཤེས་ཀྱི་ཚུལ་བཟུང་བས། །ཕུན༷་ཚོག༷ས་སྐྱབས་གནས་རྒྱ་མཚོའི་ངོ་བོ་ཉིད། །རྣམ་འདྲེན་དང་པོའི་མགོན་པོར༴ འཇ༷མ་དབྱང༷ས་བླ་མ་རྣམས་ཀྱིས་བྱིན་བརླབས་པས། །མཁྱེན༷་དང་བརྩེ༷་བ༷འི་ཡེ་ཤེས་རྨད་བྱུང་བརྙེས། །མདོ་སྔགས་སྨྲ་བའི་དབ༷ང་པོ༷་ཆོས་ཀྱི་རྗེ། །བཀའ་དྲིན་མཚུངས་མེད་ཞབས་ལ༴ གསོལ་བ་འདེབས་སོ་བྱམས་མགོན་རྡོ་རྗེ་འཆང་། །བྱིན་གྱིས་རློབས་ཤིག་འཇམ་དབྱངས་བླ་མ་རྗེ། །བདག་ཅག་འདི་ནས་བྱང་ཆུབ་སྙིང་པོའི་བར། །འབྲལ་བ་མེད་པར་རྟག་ཏུ་རྗེས་སུ་ཟུངས། །དེང་ནས་བཟུང་སྟེ་ཚེ་རབས་ཐམས་ཅད་དུ། །མགོན་པོ་ཟུང་ལས་སྐྱབས་གཞན་མ་མཆིས་པས། །མི་མཉེས་བྱ་བ་སྐད་ཅིག་མི་བགྱིད་ཅིང་། །མཉེས་པས་ཚུལ་བཞིན་བསྟེན་པར་བྱིན་གྱིས་རློབས། །རྙེད་དཀའ་ཕན་འདོགས་ཆེ་བའི་དལ་འབྱོར་རྟེན། །ངེས་པར་འཆི་ཞིང་ནམ་འཆིའི་ཚད་བཟུང་མེད། །ཤི་ན་ལས་ཀྱི་རྗེས་སུ་འབྲང་བའི་ཕྱིར། །དགེ་སྡིག་བླང་དོར་ཤེས་པར༴ ཁམས་གསུམ་འཁོར་བ་གང་དུ་སྐྱེས་གྱུར་ཀྱང་། །སྡུག་བསྔལ་གསུམ་གྱིས་འགྱུར་བའི་ཚུལ་རིག་ནས། །བདེན་བཞིའི་འཇུག་ལྡོག་ཚུལ་བཞིན་གོམས་པ་ཡིས། །བསླབ་གསུམ་རྣམ་པར་དག་པར༴ རང་ཡིད་ཁོ་ན་སྲིད་ལས་ངེས་འབྱུང་བློས། །རྣམ་མཁྱེན་གོ་འཕང་ནམ་ཡང་མི་ཐོབ་པས། །མར་གྱུར་འགྲོ་ལ་བྱམས་དང་སྙིང་རྗེའི་བློས། །བྱང་ཆུབ་སེམས་མཆོག་འབྱོངས་པར༴ ཆོས་ཀུན་སྟོང་དང་རྟེན་འབྲེལ་ཟུང་འཇུག་པའི། །གནས་ལུགས་ཟབ་མོའི་དེ་ཉིད་ཁོངས་ཆུད་ནས། །རྩེ་གཅིག་ཏིང་འཛིན་བརྟན་པས་གཟུང་འཛིན་གྱི། །བདེན་ཞེན་མཐའ་དག་ཞི་བར༴ གཞན་ཕྱིར་མྱུར་དུ་སངས་རྒྱས་ཐོབ་བྱའི་ཕྱིར། །ཟབ་མོ་རྡོ་རྗེ་ཐེག་པའི་ལམ་ཞུགས་ནས། །དབང་གིས་རྒྱུད་སྨིན་དམ་ཚིག་སྡོམ་པ་ལ། །ངེས་འབྱུང་དྲི་མ་མེད་པར༴ སྲིད་པ་སྐྱེ་ཤི་བར་དོའི་སྣང་ཞེན་ཀུན། །སྐུ་གསུམ་ལམ་བྱེད་བསྐྱོད་པའི་རིམ་པ་ཡིས། །ཡོངས་སུ་དག་པའི་སྐུ་དང་ཡེ་ཤེས་དང་། །ཡོན་ཏན་ཕྲིན་ལས་རྫོགས་པར༴ སྣང་བ་ལྷ་དང་སྲོག་རྩོལ་སྔགས་སུ་ཤར། །གཟུང་འཛིན་ཉེར་ཞི་ཀུན་རྫོབ་སྒྱུ་ལུས་དང་། །དོན་དམ་འོད་གསལ་ངང་དུ་མཉམ་གཞག་པས། །སློབ་པའི་ཟུང་འཇུག་འགྲུབ་པར༴ མཐར་ཐུག་སྤྱོད་པ་ཟབ་མོས་མཚམས་སྦྱར་ནས། །ལོངས་སྤྱོད་རྫོགས་དང་ཆོས་སྐུ་དབྱེར་མེད་པའི། །སློབ་པ་མིན་པའི་ཟུང་འཇུག་མངོན་གྱུར་ནས། །མཁའ་ཁྱབ་འགྲོ་ཀུན་འདྲེན་པར༴ རྒྱལ་བ་དགྱེས་པའི་ལམ་ལ་བསླབ་པ་རྣམས། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །མཐུན་རྐྱེན་མ་ལུས་ཕུན་སུམ་ཚོགས་པ་ཡིས། །རང་གཞན་ཕན་བདེར་འགོད་པར༴ བསྟན་འཛིན་སྐྱེས་བུ་མཆོག་རྣམས་ཞབས་པད་བརྟན། །བཤད་སྒྲུབ་བསྟན་པས་ས་ཆེན་ཡོངས་སུ་ཁྱབ། །འགྲོ་རྣམས་དུས་ཀྱི་རྒུད་པ་ཀུན་ཞི་ཞིང་། །བདེ་སྐྱིད་ཆོས་འབྱོར་འཕེལ་བར༴ མདོར་ན་འདི་ཕྱི་བར་དོའི་གནས་སྐབས་ཀུན། །རྗེ་བཙུན་བླ་མས་རྟག་ཏུ་བྱིན་བརླབས་པས། །བསམ་པའི་དོན་ཀུན་ཆོས་བཞིན་འགྲུབ་པ་དང་། །སྲིད་ཞིའི་ལེགས་ཚོགས་རྒྱས་པའི་བཀྲ་ཤིས་སྩོལ། །ཅེས་མོས་གུས་ཤུགས་དྲག་པོས་རྩེ་གཅིག་ཏུ་གསོལ་བ་གདབ། མཚན་སྔགས་བཟླ་བར་སྤྲོ་ན། བླ་མ་རིན་པོ་ཆེ་ལ་མོས་གུས་རྩེ་གཅིག་པས་མཚན་ནས་བོས་ཏེ་བདག་ལ་དངོས་གྲུབ་རྣམ་པ་གཉིས་སྩལ་དུ་གསོལ་སྙམ་པའི་ཡིད་ཀྱིས། ཨོཾ་ཨཱཿགུ་རུ་བཛྲ་དྷཱ་ར་མཻ་ཏྲི་ལཀྵྨཱི་སརྦ་སིདྡྷི་ཧཱུྃ། ཞེས་དང་། ཨོཾ་ཨཱཿམཉྫུ་གྷོ་ཥ་གུ་རུ་བིད་ཀྲི་པེནྡྲ་སརྦ་སིདྡྷི་ཧཱུྃ། ཞེས་ཅི་ནུས་སུ་བཟླ། བཞི་པ་ནི། དེ་ལྟར་རྩེ་གཅིག་གུས་པས་གསོལ་བཏབ་མཐུས། །རྒྱལ་ཀུན་འདུས་ཞལ་རྗེ་བཙུན་བླ་མ་ཟུང་། །དམིགས་མེད་ཐུགས་རྗེའི་འཇུག་པས་ལྷག་པར་དགོངས། །བདག་ལ་དགྱེས་ཤིང་བརྩེ་བས་བཞུགས་པ་ཡི། །གནས་གསུམ་རྡོ་རྗེ་གསུམ་གྱི་འབྲུ་གསུམ་ལས། །དཀར་དམར་མཐིང་གའི་འོད་ཟེར་བདུད་རྩིར་བཅས། །རིམ་དང་ཅིག་ཅར་བར་མ་ཆད་དུ་བྱུང་། །རང་གི་གནས་གསུམ་ཞུགས་ཤིང་ཐིམ་པ་ཡིས། །དབང་བཞིས་རྒྱུད་སྨིན་སྒྲིབ་བཞི་ཡོངས་སུ་སྦྱངས། །བསྐྱེད་རྫོགས་ཟབ་མོའི་ལམ་བཞི་བསྒོམ་པ་དང་། །འབྲས་བུ་སྐུ་བཞི་འགྲུབ་པའི་སྐལ་ལྡན་བྱས། །མཐར་ནི་རྡོ་རྗེ་འཆང་དབང་བླ་མ་ཆེ། །འཇམ་མགོན་བླ་མ་ཉིད་དང་དབྱེར་མེད་གྱུར། །དེ་ཡང་འོད་ཞུ་རང་ལ་ཐིམ་པ་ཡིས། །སྒོ་གསུམ་བླ་མའི་སྐུ་གསུང་ཐུགས་སུ་འདྲེས། །བྱིན་རླབས་སྟོབས་ཀྱིས་རླུང་སེམས་དབུ་མར་ཐིམ། །དགའ་བཞིའི་བདེ་དང་སྟོང་པ་བཞིའི་འོད་གསལ། །དབྱེར་མེད་ལྷན་སྐྱེས་ཡེ་ཤེས་མངོན་གྱུར་ནས། །སྣང་གྲགས་རྟོག་ཚོགས་ལྷ་སྔགས་ཆོས་སྐུར་ཤར། །ཅེས་བརྗོད་ཅིང་བསམ་ལ་སེམས་བཟུང་། ཐུན་མཚམས་ཀྱི་བྱ་བར་འཇུག་པ་ན། དགེ་བ་འདི་ཡིས་བདག་སོགས་འགྲོ་བ་ཀུན། །དཔལ་ལྡན་བླ་མས་འབྲལ་མེད་རྗེས་བཟུང་ཞིང་། །རྒྱལ་བ་དགྱེས་པའི་ལམ་བཟང་མཐར་ཕྱིན་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་སོགས་བསྔོ་སྨོན་ཤིས་བརྗོད་ཇི་ལྟར་རིགས་པས་མཚམས་སྦྱར་ཏེ། ཐུན་མཚམས་ཐམས་ཅད་དུའང་བླ་མའི་མོས་གུས་དང་མ་བྲལ་བའི་སྒོ་ནས་ལུས་ངག་ཡིད་གསུམ་ལོངས་སྤྱོད་དང་བཅས་པས་དོན་ཡོད་པའི་དགེ་ཚོགས་རླབས་པོ་ཆེ་སྒྲུབ་པའི་ཐབས་ལ་མཁས་པར་བྱའོ། །དེ་ལྟར་ཐུན་མོང་གི་ལམ་གྱིས་རྒྱུད་འབྱོངས། །དབང་བཞི་ཐོབ་ཅིང་དམ་ཚིག་དང་སྡོམ་པ་རྣམ་པར་དག་པས་ལམ་འདི་ལྟ་བུ་ལ་བརྩོན་པར་བྱས་པས་རིང་པོར་མི་ཐོགས་པར་བླ་ན་མེད་པའི་དངོས་གྲུབ་ལ་དབང་འབྱོར་བར་འགྱུར་རོ། །འདི་ལས་རྒྱས་པར་སྤྲོས་ཏེ་བླ་མ་མཆོད་པ་བྱེད་པར་སྤྲོ་ན། ཅི་འབྱོར་པའི་མཆོད་པ་དང་། ཚོགས་ཀྱི་ཡོ་བྱད་སོགས་བཤམ། རང་སྐད་ཅིག་གིས་ལྷག་པའི་ལྷར་གསལ་བའི་ངང་ནས་སྐྱབས་སེམས་མཆོད་པ་བྱིན་རླབས་སྔོན་དུ་འགྲོ་བས་ཚོགས་ཞིང་བརྗོད། ཡན་ལག་བདུན་པ་དང་མཎྜལ་རྒྱས་པར་འབུལ། གོང་དུ་སྨོས་པའི་གསོལ་འདེབས་དང་། གཞན་ཡང་གསོལ་འདེབས་རྒྱས་པ་ཅི་རིགས་པ་བྱ་ཞིང་མཚན་སྔགས་བཟླ། ཚོགས་མཆོད་ཡོད་ན་ཆོ་ག་རྒྱས་བསྡུས་གང་རིགས་ཀྱིས་ཕུལ། སངས་རྒྱས་བྱང་ཆུབ་སེམས་དཔའ་ཀུན། །ཞེས་སོགས་རིགས་ལྔའི་སྡོམ་བཟུང་ལན་གསུམ་གྱི་མཐར། སླར་ཡང་གསོལ་བ་གདབ་ཅིང་དབང་བཞི་བླངས་ནས་མཉམ་པར་གཞག །དེ་ལས་ལྡང་བ་ན་བསྔོ་སྨོན་དང་ཤིས་བརྗོད་རྒྱས་པར་བྱས་པས་གྲུབ་བོ། །སྲིད་ཞིའི་དགེ་ལེགས་ཀུན་གྱི་སྒོ་གཅིག་པུ། །བླ་མའི་རྣལ་འབྱོར་བྱིན་རླབས་སྙིང་པོའི་ལམ། །འདི་ལ་བརྟེན་ནས་མཐའ་ཡས་ཡིད་ཅན་ཀུན། །རྣམ་གྲོལ་སྐུ་བཞིའི་གོ་འཕང་མྱུར་ཐོབ་ཤོག །ཅེས་པའང་བླ་མ་རྡོ་རྗེ་འཆང་བྱམས་པའི་མཚན་ཅན་གྱི་ཐུགས་སྲས་དམ་པ་ལི་ཐང་རྩེ་རི་ཁྲོད་ཀྱི་དབུ་མཛད་ལུང་རིགས་སྨྲ་བ་དགེ་སློང་ཕྲིན་ལས་རྒྱ་མཚོ་དང་། མཐུ་སྟོབས་ཟུང་ནས་མཎྜལ་དང་བཅས་ཏེ་ནན་ཏན་དུ་བསྐུལ་བ་ལྟར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག ། ༈

[edit]

byams pa phun tshogs la brten pa'i bla ma'i rnal 'byor byin rlabs snying po/__ @#/_/bla ma'i rnal 'byor byin rlabs snying po zhes bya ba/__na mo gu ru badz+ra d+hA rA ya/__rdo rje 'chang dbang dpal ldan bla ma yi/__/zhabs kyi pad+mo gus pas phyag 'tshal nas/__/rnal 'byor zab mo byin rlabs snying po'i bcud/__/skal bzang yid kyi thig ler 'bebs par bya/__'di la bzhi/__sbyor ba bla ma'i rnal 'byor gsal gdab pa/__dngos gzhi tshogs bsag pa'i slad du yan lag bdun pa bya ba/__byin rlabs 'jug pa'i ched du gsol ba gdab pa/__mjug dbang blang zhing snying po'i don la mnyam par gzhag pa'o/__/dang po ni/__gnas dben zhing yid dang mthun par byi dor legs par bya/__rtsa ba'i bla ma'i snang brnyan sogs dkon mchog gi rten ji ltar rigs pa'i spyan sngar/__ci 'byor pa'i mchod pa bzang po gtsang zhing bkod pas mdzes par bsham/__stan bde ba la bsam gtan gyi spyod lam dang ldan pas 'khod de dge sems khyad par can gyi ngang skyabs 'gro sems bskyed sngon du 'gro bas 'di ltar gsal gdab par bya'o/__/oM shU n+ya tA dz+nyA na badz+ra swa b+hA ba At+ma ko\u0f85haM/__chos kun gzod nas dag pa'i stong nyid ngang /__/rten cing 'brel 'byung bde ba chen po'i tshul/__/zung 'jug dwangs ba'i mkha' la 'ja' tshon ltar/__/snod bcud 'og min zhing gi bkod pa'i dbus/__/rang mdun nam mkhar kun bzang mchod sprin gyis/__/mngon par spungs pa'i seng khri pad zla'i steng /__/dran pas srid dang zhi ba'i gdung ba kun/__/thugs rje bdud rtsi'i char gyis bsil mdzad pa/__/'jam dbyangs bla ma mkhyen brtse'i dbang po ni/__/rnam pa ye shes sku can many+dzu shrI/__/dmar ser phyag g.yas ral gri nam mkhar 'phyar/__/g.yon pas ut+pal lte ba glegs bam bsnams/__/zur phud lnga ldan dar dang rin chen rgyan/__/zhi 'dzum brgyad gnyis lang tsho'i mtshar sdug can/__/zhabs gnyis rdo rje'i skyil krung rol pas bzhugs/__/de yi spyi bor khyabaX bdaXg dang po'i mgon/__/byamaXs paX'i thugs rjes ngur smrig 'dzin pa'i tshul/__/phunaX tshogaXs sku bzhi'i bdag nyid bla ma mchog__/rnam pa kha sbyor bdun ldan rdo rje 'chang /__/sku mdog in+d+ra nI la'i lhun po la/__/nyi gzhon stong gis 'khyud pa'i gzi byin 'bar/__/thabs shes phyag gnyis rdo rje dril bu bsnams/__/dar dang rin chen rgyan rdzogs mtshan dper mdzes/__/rang 'od yum 'khyud bde ba'i nyams 'gyur rdzogs/__/zhabs zung rdo rje'i skyil krung pad zlar rol/__/phung po khams dang skye mched thams cad kun/__/rnam dag gdan gsum tshang ba'i ngo bo nyid/__/skyabs kun 'dus zhal chen po'i gnas gsum du/__/'bru gsum yi ges mtshan pa'i 'od zer gyis/__/bla ma yi dam sangs rgyas byang chub sems/__/dpa' bo mkha' 'gro chos srung nor lha'i tshogs/__/spyan drangs rdo rje gsum dang dbyer med gyur/__/gnyis pa ni/__bdag dang mkha' mnyam 'gro ba ma lus kun/__/zhing rdul mnyam pa'i lus su sprul nas kyang /__/mi phyed dad pa'i gdung shugs drag po yis/__/sgo gsum gus pa chen pos phyag 'tshal lo/__/lus dang longs spyod dus gsum dge ba rnams/__/kun tu bzang po'i mchod sprin rgya mtshor 'bul/__/thogs med nas bsags sdig ltung ji snyed tshogs/__/stobs bzhi tshang bas snying nas so sor bshags/__/rje btsun bla ma'i phrin las rmad byung bar/__/mchog tu dad pas rjes su yi rang ngo /__/rigs can gsum gyi gdul bya mtha' dag la/__/gang 'dul chos kyi 'khor lo bskor bzhin du/__/nges pa lnga ldan longs spyod chen po dang /__/dbyer med rgyun gyis rtag par bzhugs gsol 'debs/__/dge ba 'di dang mtha' yas dge ba kun/__/byang chub snying por yongs su bsngo bar bgyi/__/zhes dang /__maN+Dal rgyas bsdus gang rigs 'bul/__gsum pa ni/__mkha' khyab sras bcas rgyal ba thams cad kyi/__/ye shes phung po gcig tu bsdus pa'i gzugs/__/dran pa tsam gyis dngos grub mchog stsol ba/__/dpaXl ldanaX blaX maX'i zhabs la gsol ba 'debs/_/byamaXs paX'i thugs rjes khyab bdag rdo rje 'chang /__/theg mchog dge ba'i bshes kyi tshul bzung bas/__/phunaX tshogaXs skyabs gnas rgya mtsho'i ngo bo nyid/__/rnam 'dren dang po'i mgon por=__'jaXm dbyangaXs bla ma rnams kyis byin brlabs pas/__/mkhyenaX dang brtseX baX'i ye shes rmad byung brnyes/__/mdo sngags smra ba'i dbaXng poX chos kyi rje/__/bka' drin mtshungs med zhabs la=__gsol ba 'debs so byams mgon rdo rje 'chang /__/byin gyis rlobs shig 'jam dbyangs bla ma rje/__/bdag cag 'di nas byang chub snying po'i bar/__/'bral ba med par rtag tu rjes su zungs/__/deng nas bzung ste tshe rabs thams cad du/__/mgon po zung las skyabs gzhan ma mchis pas/__/mi mnyes bya ba skad cig mi bgyid cing /__/mnyes pas tshul bzhin bsten par byin gyis rlobs/__/rnyed dka' phan 'dogs che ba'i dal 'byor rten/__/nges par 'chi zhing nam 'chi'i tshad bzung med/__/shi na las kyi rjes su 'brang ba'i phyir/__/dge sdig blang dor shes par=__khams gsum 'khor ba gang du skyes gyur kyang /__/sdug bsngal gsum gyis 'gyur ba'i tshul rig nas/__/bden bzhi'i 'jug ldog tshul bzhin goms pa yis/__/bslab gsum rnam par dag par=__rang yid kho na srid las nges 'byung blos/__/rnam mkhyen go 'phang nam yang mi thob pas/__/mar gyur 'gro la byams dang snying rje'i blos/__/byang chub sems mchog 'byongs par=__chos kun stong dang rten 'brel zung 'jug pa'i/__/gnas lugs zab mo'i de nyid khongs chud nas/__/rtse gcig ting 'dzin brtan pas gzung 'dzin gyi/__/bden zhen mtha' dag zhi bar=__gzhan phyir myur du sangs rgyas thob bya'i phyir/__/zab mo rdo rje theg pa'i lam zhugs nas/__/dbang gis rgyud smin dam tshig sdom pa la/__/nges 'byung dri ma med par=__srid pa skye shi bar do'i snang zhen kun/__/sku gsum lam byed bskyod pa'i rim pa yis/__/yongs su dag pa'i sku dang ye shes dang /__/yon tan phrin las rdzogs par=__snang ba lha dang srog rtsol sngags su shar/__/gzung 'dzin nyer zhi kun rdzob sgyu lus dang /__/don dam 'od gsal ngang du mnyam gzhag pas/__/slob pa'i zung 'jug 'grub par=__mthar thug spyod pa zab mos mtshams sbyar nas/__/longs spyod rdzogs dang chos sku dbyer med pa'i/__/slob pa min pa'i zung 'jug mngon gyur nas/__/mkha' khyab 'gro kun 'dren par=__rgyal ba dgyes pa'i lam la bslab pa rnams/__/phyi nang gsang ba'i 'gal rkyen kun zhi zhing /__/mthun rkyen ma lus phun sum tshogs pa yis/__/rang gzhan phan bder 'god par=__bstan 'dzin skyes bu mchog rnams zhabs pad brtan/__/bshad sgrub bstan pas sa chen yongs su khyab/__/'gro rnams dus kyi rgud pa kun zhi zhing /__/bde skyid chos 'byor 'phel bar=__mdor na 'di phyi bar do'i gnas skabs kun/__/rje btsun bla mas rtag tu byin brlabs pas/__/bsam pa'i don kun chos bzhin 'grub pa dang /_/srid zhi'i legs tshogs rgyas pa'i bkra shis stsol/__/ces mos gus shugs drag pos rtse gcig tu gsol ba gdab/__mtshan sngags bzla bar spro na/__bla ma rin po che la mos gus rtse gcig pas mtshan nas bos te bdag la dngos grub rnam pa gnyis stsal du gsol snyam pa'i yid kyis/__oM AHgu ru badz+ra d+hA ra mai tri lak+Sh+mI sarba sid+d+hi hU~M/__zhes dang /__oM AHmany+dzu g+ho Sha gu ru bid kri pen+d+ra sarba sid+d+hi hU~M/__zhes ci nus su bzla/__bzhi pa ni/__de ltar rtse gcig gus pas gsol btab mthus/__/rgyal kun 'dus zhal rje btsun bla ma zung /__/dmigs med thugs rje'i 'jug pas lhag par dgongs/__/bdag la dgyes shing brtse bas bzhugs pa yi/__/gnas gsum rdo rje gsum gyi 'bru gsum las/__/dkar dmar mthing ga'i 'od zer bdud rtsir bcas/__/rim dang cig car bar ma chad du byung /__/rang gi gnas gsum zhugs shing thim pa yis/__/dbang bzhis rgyud smin sgrib bzhi yongs su sbyangs/__/bskyed rdzogs zab mo'i lam bzhi bsgom pa dang /__/'bras bu sku bzhi 'grub pa'i skal ldan byas/__/mthar ni rdo rje 'chang dbang bla ma che/__/'jam mgon bla ma nyid dang dbyer med gyur/__/de yang 'od zhu rang la thim pa yis/__/sgo gsum bla ma'i sku gsung thugs su 'dres/__/byin rlabs stobs kyis rlung sems dbu mar thim/__/dga' bzhi'i bde dang stong pa bzhi'i 'od gsal/__/dbyer med lhan skyes ye shes mngon gyur nas/__/snang grags rtog tshogs lha sngags chos skur shar/__/ces brjod cing bsam la sems bzung /__thun mtshams kyi bya bar 'jug pa na/__dge ba 'di yis bdag sogs 'gro ba kun/__/dpal ldan bla mas 'bral med rjes bzung zhing /__/rgyal ba dgyes pa'i lam bzang mthar phyin nas/__/don gnyis lhun gyis grub pa'i bkra shis shog__/ces sogs bsngo smon shis brjod ji ltar rigs pas mtshams sbyar te/__thun mtshams thams cad du'ang bla ma'i mos gus dang ma bral ba'i sgo nas lus ngag yid gsum longs spyod dang bcas pas don yod pa'i dge tshogs rlabs po che sgrub pa'i thabs la mkhas par bya'o/__/de ltar thun mong gi lam gyis rgyud 'byongs/__/dbang bzhi thob cing dam tshig dang sdom pa rnam par dag pas lam 'di lta bu la brtson par byas pas ring por mi thogs par bla na med pa'i dngos grub la dbang 'byor bar 'gyur ro/__/'di las rgyas par spros te bla ma mchod pa byed par spro na/__ci 'byor pa'i mchod pa dang /__tshogs kyi yo byad sogs bsham/__rang skad cig gis lhag pa'i lhar gsal ba'i ngang nas skyabs sems mchod pa byin rlabs sngon du 'gro bas tshogs zhing brjod/__yan lag bdun pa dang maN+Dal rgyas par 'bul/__gong du smos pa'i gsol 'debs dang /__gzhan yang gsol 'debs rgyas pa ci rigs pa bya zhing mtshan sngags bzla/__tshogs mchod yod na cho ga rgyas bsdus gang rigs kyis phul/__sangs rgyas byang chub sems dpa' kun/__/zhes sogs rigs lnga'i sdom bzung lan gsum gyi mthar/__slar yang gsol ba gdab cing dbang bzhi blangs nas mnyam par gzhag__/de las ldang ba na bsngo smon dang shis brjod rgyas par byas pas grub bo/__/srid zhi'i dge legs kun gyi sgo gcig pu/__/bla ma'i rnal 'byor byin rlabs snying po'i lam/__/'di la brten nas mtha' yas yid can kun/__/rnam grol sku bzhi'i go 'phang myur thob shog__/ces pa'ang bla ma rdo rje 'chang byams pa'i mtshan can gyi thugs sras dam pa li thang rtse ri khrod kyi dbu mdzad lung rigs smra ba dge slong phrin las rgya mtsho dang /__mthu stobs zung nas maN+Dal dang bcas te nan tan du bskul ba ltar/__'jam dbyangs bla ma dgyes pa'i 'bangs mkhyen brtse'i dbang pos bris pa dge legs su gyur cig__/___!