JKW-KABUM-22-ZA-007-005

🚧 This website is under continued development. We appreciate your patience!

Previous Text Back to Volume PageNext Text

ཐུགས་རྗེ་ཆེན་པོ་ལ་བརྟེན་པའི་བླ་མའི་རྣལ་འབྱོར་གྲུབ་གཉིས་ལམ་བཟང་།

Wylie title	thugs rje chen po la brten pa'i bla ma'i rnal 'byor grub gnyis lam bzang
Location	mkhyen brtse'i bka' 'bum Volume 22, sde tshan 7, Text 5, Pages 207-210 (Folios 12a1 to 13b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. thugs rje chen po la brten pa'i bla ma'i rnal 'byor grub gnyis lam bzang. In 'jam dbyangs mkhyen brtse'i dbang po'i bka' 'bum, Vol. 22: 207-210. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Deity	thugs rje chen po

1 Texts in this Section (sde tshan or chos tshan)

5 207-210	ཐུགས་རྗེ་ཆེན་པོ་ལ་བརྟེན་པའི་བླ་མའི་རྣལ་འབྱོར་གྲུབ་གཉིས་ལམ་བཟང་། thugs rje chen po la brten pa'i bla ma'i rnal 'byor grub gnyis lam bzang Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཐུགས་རྗེ་ཆེན་པོ་ལ་བརྟེན་པའི་བླ་མའི་རྣལ་འབྱོར་གྲུབ་གཉིས་ལམ་བཟང་ཞེས་བྱ་བ། ན་མོ་གུ་རུ་ལོ་ཀེ་ཤྭ་རཱ་ཡ། སྙིང་རྗེའི་དབང་ཕྱུག་པད་དཀར་འཆང་། །དབྱེར་མེད་དཔལ་ལྡན་བླ་མའི་ཞབས། །བསྙེན་ལས་དངོས་གྲུབ་བརྙེས་འདོད་ན། །སྐྱབས་སེམས་སྤྱི་ལྟར་སྔོན་སོང་ནས། །ཧྲཱིཿ གཟོད་ནས་སྤྲོས་བྲལ་འོད་གསལ་ཆོས་སྐུའི་དབྱིངས། །གཟུང་འཛིན་འཁྲུལ་པའི་མཚན་མ་ལས་འདས་བཞིན། །ཟུང་འཇུག་འགགས་མེད་སྙིང་རྗེའི་སྣང་ཆ་ནི། །སྣོད་བཅུད་ཐམས་ཅད་རི་བོ་པོ་ཏཱ་ལ། །དྲང་སྲོང་རིག་འཛིན་གྲུབ་པའི་དགའ་ཚལ་ཆེ། །ཐ་གྲུ་ཡངས་པའི་གསེར་གྱི་ས་གཞི་ལ། །རིན་ཆེན་བཻཌཱུརྱ་ཡི་བྲག་རིས་མཛེས། །དྭངས་པའི་རོལ་མཚོ་ཡན་ལག་བརྒྱད་ལྡན་ཆབ། །ནོར་བུའི་དྲ་བས་དཔྱངས་པའི་ལྗོན་ཤིང་སོགས། །ཐར་པ་ཆེན་པོའི་གྲོང་ཁྱེར་ཉམས་དགའི་དབུས། །རང་ཉིད་གཞི་ལུས་འཆི་མེད་ཐོད་ཕྲེང་རྩལ། །མཐིང་ནག་ཞལ་གཅིག་ཕྱག་གཉིས་རྡོར་དྲིལ་བསྣམས། །མཚོ་རྒྱལ་དཀར་མོ་གྲི་ཐོད་འཛིན་པས་འཁྱུད། །དར་དང་རིན་ཆེན་རུས་པའི་རྒྱན་གྱིས་མཛེས། །སྤྱི་བོར་ཆུ་སྐྱེས་ཉི་ཟླའི་དཀྱིལ་འཁོར་དབུས། །རྩ་བའི་བླ་མ་མགོན་པོ་སྤྱན་རས་གཟིགས། །སྐུ་མདོག་དཀར་གསལ་མཚན་དཔེའི་འོད་ཟེར་འབར། །ཞལ་གཅིག་ཕྱག་བཞི་ཞི་འཛུམ་སྒེག་པའི་ཉམས། །རྩ་བའི་ཕྱག་གཉིས་ཐུགས་ཀར་ཐལ་སྦྱར་ཞིང་། །ལྷག་མ་རྣམ་གཉིས་ཤེལ་ཕྲེང་པད་དཀར་བསྣམས། །ཀྲྀཥྞ་སཱ་རའི་པགས་པའི་སྟོད་གཡོགས་དང་། །ལྷ་རྫས་ན་བཟའ་རིན་ཆེན་རྒྱན་གྱིས་སྤྲས། །ཞབས་གཉིས་རྡོ་རྗེའི་སྐྱིལ་ཀྲུང་གདན་ལ་རོལ། །རལ་པའི་གསེབ་ན་རིགས་བདག་འོད་དཔག་མེད། །དམར་པོ་མཉམ་གཞག་བདུད་རྩིའི་ལྷུང་བཟེད་བསྣམས། །དེ་ལྟར་གསལ་བའི་གནས་གསུམ་ཡིག་འབྲུ་ལས། །འོད་འཕྲོས་ཡེ་ཤེས་ལྷ་ཚོགས་སྤྱན་དྲངས་གྱུར། །ཧྲཱིཿ སྟོང་ཉིད་སྙིང་རྗེར་རོལ་བའི་ཡེ་ཤེས་ནི། །སྲིད་ཞིར་མི་གནས་སྒྱུ་འཕྲུལ་རྡོ་རྗེའི་སྤྲིན། །བཅོམ་ལྡན་མགོན་པོ་འཕགས་པ་སྤྱན་རས་གཟིགས། །འགག་མེད་ཐུགས་རྗེའི་དབང་གིས་གནས་འདིར་གཤེགས། །ཧྲཱིཿ ཐ་དད་བློ་ཡི་སྣང་ཆ་ཞིག་གྱུར་པའི། །རོ་གཅིག་གཉུག་མའི་ངང་དུ་ཕྱག་བགྱིའོ། །རྟོག་ཚོགས་གང་ཤར་རང་སར་གྲོལ་བའི་དཔྱིད། །བདེ་སྟོང་རོལ་མོར་འཆར་བའི་མཆོད་སྤྲིན་འབུལ། །བློ་བྲལ་འོད་གསལ་གདོད་མའི་གཤིས་ལུགས་ལ། །ཡིད་བྱེད་མཚན་མས་བཅིངས་པ་མཐོལ་ཞིང་བཤགས། །སློབ་དང་མི་སློབ་ལམ་གྱི་སྤངས་རྟོགས་ཆོས། །ཡེ་ཤེས་ཕ་རོལ་ཕྱིན་ལ་རྗེས་ཡི་རང་། །མི་ཤིགས་རྡོ་རྗེ་ནཱ་དའི་དབྱངས་སྙན་པོས། །བདེན་གཉིས་ཆོས་འཁོར་རྒྱ་མཚོ་བསྐོར་བར་བསྐུལ། །འཆི་མེད་རྟག་པ་དམ་པའི་ཐིག་ལེ་རུ། །རྡུལ་བྲལ་ཕྱག་རྒྱ་ཆེན་པོར་བཞུགས་གསོལ་འདེབས། །འདིས་མཚོན་དགེ་ཚོགས་འཁོར་གསུམ་ལས་འདས་པའི། །ཟབ་ཞི་སྤྲོས་བྲལ་དབུ་མའི་ཀློང་དུ་བསྔོ། །ཧྲཱིཿ སྙིང་རྗེའི་དབང་ཕྱུག་འཕགས་མཆོག་སྤྱན་རས་གཟིགས། །གང་འདུལ་མོས་པའི་སྣང་ངོར་རྗེས་ཆགས་གར། །ཁྱབ་བདག་བླ་མ་དྲན་མཆོག་འཁོར་ལོའི་མགོན། །སྐུ་གསུམ་དབྱེར་མེད་ཁྱོད་ལ་གསོལ་བ་འདེབས། །བདག་ཅག་སྙིགས་མ་ལྔ་ཡིས་གཟིར་བའི་འགྲོ། །ལས་དང་ཉོན་མོངས་དྲག་པོའི་མཐུས་ནོན་ཚེ། །ཚད་མེད་ཐུགས་རྗེའི་ཕྱག་གིས་དྲངས་ནས་ཀྱང་། །ཕན་དང་བདེ་བའི་གནས་སུ་དབུགས་དབྱུང་མཛོད། །གནས་སྐབས་ངེས་འབྱུང་སྙིང་རྗེའི་གཞན་དབང་གིས། །སྨོན་འཇུག་སེམས་བསྐྱེད་དམ་བཅའ་མི་འདོར་ཞིང་། །མཐར་ཐུག་ལམ་ལྔ་ས་བཅུའི་ཐེམ་སྐས་ལ། །འཛེགས་ཏེ་ཀུན་མཁྱེན་གྲོང་དུ་དཀྲི་གྱུར་ཅིག །ཁྱད་པར་འདིར་སྣང་ནུབ་པར་གྱུར་པའི་ཚེ། །འཕགས་མཆོག་ཕྱག་ན་པདྨོས་རྗེས་བཟུང་སྟེ། །རང་སྣང་རྣམ་དག་ཡིད་འོང་པོ་ཏཱ་ལར། །གྲུབ་པ་གཉིས་ཀྱི་རྩེ་དགའ་རོལ་པར་ཤོག །ཨོཾ་མ་ཎི་པདྨེ་ཧཱུྃ་ཧྲཱིཿ མི་ཕྱེད་དད་པས་གསོལ་བཏབ་བཟླས། །ཐུན་མཐར་དབང་བཞི་བླང་བ་ནི། །རྩེ་གཅིག་གུས་པས་ཉེ་བར་བསྙེན་པ་ལས། །འཕགས་མཆོག་དགྱེས་པའི་གསང་གསུམ་འོད་ཟེར་སྤྲིན། །གནས་བཞིའི་འཁོར་ལོར་སྨིན་པའི་བྱེད་ལས་ཀྱིས། །སྒྲིབ་བཞི་དག་ཅིང་དབང་བཞིའི་ཡེ་ཤེས་ཐོབ། །སྐུ་བཞིའི་གོ་འཕང་ཐོབ་པའི་ས་བོན་བཞག །མཐར་ཐུག་བླ་མ་རང་སེམས་དབྱེར་མེད་ངང་། །སྣང་ཞེན་གདན་གསུམ་སྒྱུ་མའི་ལྷ་སྐུར་དག །སྒྲ་གྲགས་མི་ཤིགས་ནཱ་དའི་རོལ་མོར་རྫོགས། །རྟོག་ཚོགས་འོད་གསལ་དབུ་མར་ཐིམ་པ་ལས། །འཕགས་པའི་གསང་གསུམ་གསལ་སྟོང་རོལ་པར་སྤྱོད། །ཞེས་བརྗོད་ལམ་ཁྱེར་འབྲལ་མེད་ངང་། །རྗེས་ཐོབ་དྲན་དང་ཤེས་བཞིན་པས། །སྟོང་ཉིད་སྙིང་རྗེ་ཟུང་འཇུག་པར། །ཚོགས་གཉིས་རྫོགས་པའི་ཐབས་ལ་འབད། །འདི་ནི་བླ་མ་སྤྱན་རས་གཟིགས། །སྙིང་དབུས་བསྒོམ་ནས་གསོལ་བཏབ་པས། །བྱིན་རླབས་ཅུང་ཟད་ཐོབ་པ་ལས། །གང་ཤར་བཅོས་བསྒྱུར་བྲལ་བར་བཀོད། །དགེ་དེས་བདག་དང་གཞན་གྱི་འགྲོ། །ཐབས་ཤེས་ཟུང་འབྲེལ་ལམ་མཆོག་ལ། །བརྟེན་ནས་གོམས་པ་མཐར་ཕྱིན་པས། །སྐུ་དང་ཡེ་ཤེས་མཆོག་བརྙེས་ཤོག །སརྦ་མངྒ་ལཾ་བྷ་བ་ཏུ། ། ༈

[edit]

thugs rje chen po la brten pa'i bla ma'i rnal 'byor grub gnyis lam bzang /__ @#/_/thugs rje chen po la brten pa'i bla ma'i rnal 'byor grub gnyis lam bzang zhes bya ba/__na mo gu ru lo ke shwa rA ya/__snying rje'i dbang phyug pad dkar 'chang /__/dbyer med dpal ldan bla ma'i zhabs/__/bsnyen las dngos grub brnyes 'dod na/__/skyabs sems spyi ltar sngon song nas/__/hrIH__gzod nas spros bral 'od gsal chos sku'i dbyings/__/gzung 'dzin 'khrul pa'i mtshan ma las 'das bzhin/__/zung 'jug 'gags med snying rje'i snang cha ni/__/snod bcud thams cad ri bo po tA la/__/drang srong rig 'dzin grub pa'i dga' tshal che/__/tha gru yangs pa'i gser gyi sa gzhi la/__/rin chen baiDUr+ya yi brag ris mdzes/__/dwangs pa'i rol mtsho yan lag brgyad ldan chab/__/nor bu'i dra bas dpyangs pa'i ljon shing sogs/__/thar pa chen po'i grong khyer nyams dga'i dbus/__/rang nyid gzhi lus 'chi med thod phreng rtsal/__/mthing nag zhal gcig phyag gnyis rdor dril bsnams/__/mtsho rgyal dkar mo gri thod 'dzin pas 'khyud/__/dar dang rin chen rus pa'i rgyan gyis mdzes/__/spyi bor chu skyes nyi zla'i dkyil 'khor dbus/__/rtsa ba'i bla ma mgon po spyan ras gzigs/__/sku mdog dkar gsal mtshan dpe'i 'od zer 'bar/__/zhal gcig phyag bzhi zhi 'dzum sgeg pa'i nyams/__/rtsa ba'i phyag gnyis thugs kar thal sbyar zhing /__/lhag ma rnam gnyis shel phreng pad dkar bsnams/__/kr-iSh+Na sA ra'i pags pa'i stod g.yogs dang /__/lha rdzas na bza' rin chen rgyan gyis spras/__/zhabs gnyis rdo rje'i skyil krung gdan la rol/__/ral pa'i gseb na rigs bdag 'od dpag med/__/dmar po mnyam gzhag bdud rtsi'i lhung bzed bsnams/__/de ltar gsal ba'i gnas gsum yig 'bru las/__/'od 'phros ye shes lha tshogs spyan drangs gyur/__/hrIH__stong nyid snying rjer rol ba'i ye shes ni/__/srid zhir mi gnas sgyu 'phrul rdo rje'i sprin/__/bcom ldan mgon po 'phags pa spyan ras gzigs/__/'gag med thugs rje'i dbang gis gnas 'dir gshegs/__/hrIH_tha dad blo yi snang cha zhig gyur pa'i/__/ro gcig gnyug ma'i ngang du phyag bgyi'o/__/rtog tshogs gang shar rang sar grol ba'i dpyid/__/bde stong rol mor 'char ba'i mchod sprin 'bul/__/blo bral 'od gsal gdod ma'i gshis lugs la/___/yid byed mtshan mas bcings pa mthol zhing bshags/__/slob dang mi slob lam gyi spangs rtogs chos/_/ye shes pha rol phyin la rjes yi rang /__/mi shigs rdo rje nA da'i dbyangs snyan pos/__/bden gnyis chos 'khor rgya mtsho bskor bar bskul/__/'chi med rtag pa dam pa'i thig le ru/__/rdul bral phyag rgya chen por bzhugs gsol 'debs/__/'dis mtshon dge tshogs 'khor gsum las 'das pa'i/__/zab zhi spros bral dbu ma'i klong du bsngo/__/hrIH__snying rje'i dbang phyug 'phags mchog spyan ras gzigs/__/gang 'dul mos pa'i snang ngor rjes chags gar/__/khyab bdag bla ma dran mchog 'khor lo'i mgon/__/sku gsum dbyer med khyod la gsol ba 'debs/__/bdag cag snyigs ma lnga yis gzir ba'i 'gro/__/las dang nyon mongs drag po'i mthus non tshe/__/tshad med thugs rje'i phyag gis drangs nas kyang /__/phan dang bde ba'i gnas su dbugs dbyung mdzod/__/gnas skabs nges 'byung snying rje'i gzhan dbang gis/__/smon 'jug sems bskyed dam bca' mi 'dor zhing /__/mthar thug lam lnga sa bcu'i them skas la/__/'dzegs te kun mkhyen grong du dkri gyur cig__/khyad par 'dir snang nub par gyur pa'i tshe/__/'phags mchog phyag na pad+mos rjes bzung ste/__/rang snang rnam dag yid 'ong po tA lar/__/grub pa gnyis kyi rtse dga' rol par shog__/oM ma Ni pad+me hU~M hrIH__mi phyed dad pas gsol btab bzlas/_/thun mthar dbang bzhi blang ba ni/__/rtse gcig gus pas nye bar bsnyen pa las/__/'phags mchog dgyes pa'i gsang gsum 'od zer sprin/__/gnas bzhi'i 'khor lor smin pa'i byed las kyis/__/sgrib bzhi dag cing dbang bzhi'i ye shes thob/__/sku bzhi'i go 'phang thob pa'i sa bon bzhag__/mthar thug bla ma rang sems dbyer med ngang /__/snang zhen gdan gsum sgyu ma'i lha skur dag__/sgra grags mi shigs nA da'i rol mor rdzogs/__/rtog tshogs 'od gsal dbu mar thim pa las/__/'phags pa'i gsang gsum gsal stong rol par spyod/__/zhes brjod lam khyer 'bral med ngang /__/rjes thob dran dang shes bzhin pas/__/stong nyid snying rje zung 'jug par/__/tshogs gnyis rdzogs pa'i thabs la 'bad/__/'di ni bla ma spyan ras gzigs/__/snying dbus bsgom nas gsol btab pas/__/byin rlabs cung zad thob pa las/__/gang shar bcos bsgyur bral bar bkod/__/dge des bdag dang gzhan gyi 'gro/__/thabs shes zung 'brel lam mchog la/__/brten nas goms pa mthar phyin pas/__/sku dang ye shes mchog brnyes shog__/sarba mang+ga laM b+ha ba tu/___/__!