JKW-KABUM-01-KA-002-031

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 2, sde tshan 31, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

བདེ་བར་གཤེགས་པའི་མཆོད་རྟེན་རྣམ་པ་ཐམས་ཅད་དུ་རྫོགས་པ་བརྒྱད་ལ་བསྔགས་པ་ནོར་བུའི་དོ་ཤལ། བདེ་བར་གཤེགས་པའི་མཆོད་རྟེན་རྣམ་པ་ཐམས་ཅད་དུ་རྫོགས་པ་བརྒྱད་ལ་བསྔགས་པ་ནོར་བུའི་དོ་ཤལ་ཅེས་བྱ་བ་བཞུགས་སོ། ། ༈ པདྨ་སྤུངས་པ། ལྔ་བརྒྱའི་གཏེར་གྱིས་སྤུད་པའི་དགེ་མཚན་རྩེར། །པདྨ་གཞོན་ནུའི་ཟུར་ཕུད་གཡོ་བ་ཡིས། །ཞབས་མཐིལ་འཁོར་ལོའི་རེ་ཁཱར་བསྟི་སྟང་གི །གྲགས་པ་ལུམྦིའི་ཚལ་དུ་རྣམ་པར་སྤུངས། །བྱང་ཆེན། གང་དུ་གཤེགས་ན་བྱང་ཆུབ་ཤིང་གི་དྲུང་། །སྙིང་རྗེའི་ཀུན་ཕན་གཞོན་ནུས་དཀྲིས་པའི་ཟེར། །སྡེར་བཅས་བདུད་སྡེའི་མུན་པ་ཕམ་བྱས་ཏེ། །ས་ལམ་ཆ་ཤས་ཡོངས་སུ་རྫོགས་པར་མཚོན། །བཀྲ་ཤིས་སྒོ་མང་། དང་པོའི་ཆོས་འཁོར་བདེན་བཞིའི་དོ་ཤལ་གྱིས། །ལྔ་སྡེ་བཟང་པོའི་བསླབ་པ་དོན་ཡོད་དུ། །སྦྱར་བའི་ངོ་མཚར་རྣམ་ཐར་རྟེན་འགྱུར་གི། །སྒོ་འཕར་གསར་པའི་ཆོ་གས་དབྱེ་བ་བཞིན། །ཆོ་འཕྲུལ། ཇི་སྙེད་ས་ལམ་བང་རིམ་རྩེར་འཛེགས་པའི། །སྟོབས་བཅུའི་ཆོ་འཕྲུལ་རྡོ་རྗེ་གདེངས་པའི་མེས། །ཕས་རྒོལ་རི་བོའི་རྐང་པ་མྱུར་བཅོམ་ཚེ། །མཉན་ཡོད་ཚོགས་རྣམས་སྐྲག་དང་གུས་པས་བཏུད། །ལྷ་བབས། དྲིན་ལ་ལན་དུ་ལྡོན་པའི་མངོན་རྟོགས་ཀྱིས། །འཆི་མེད་གྲུབ་པའི་གྲོང་ཁྱེར་ལ་གཤེགས་ནས། །ཞི་བསིལ་བདུད་རྩིས་ཚིམ་བྱས་གསལ་ལྡན་བུ། །འབབ་སྟེགས་ཐེམ་སྐས་མཛེས་པས་བོས་པ་བཞིན། །དབྱེན་འདུམས། དགེ་འདུན་ཁྱུ་མཆོག་འདུས་པའི་རོལ་སྒེག་ནི། །ཀུན་མྱོས་གཉིས་འཐུང་དྲེགས་པས་དབྱེ་བའི་ཚེ། །དགྲ་བཅོམ་རྫུ་འཕྲུལ་ཆོ་གའི་ལྕགས་ཀྱུ་ཡིས། །དབང་ཕྱུག་རྣམ་པར་འདུམས་པའི་གྲགས་པ་འབར། །རྣམ་རྒྱལ། མེ་ཏོག་མདའ་ཅན་ཀུན་ཏུ་དགའ་བྱའི་ཕྱིར། །རྫུ་འཕྲུལ་རྐང་པའི་ཡོན་ཏན་སྦ་བྱས་ཀྱང་། །ཙུནྡའི་གསོལ་འདེབས་ཐལ་མོའི་གདེངས་ཀ་རུ། །འཚོ་བའི་འདུ་བྱེད་བྱིན་རླབས་རྣམ་པར་རྒྱལ། །མྱང་འདས། གཟུགས་སྐུའི་གདུལ་བྱ་ཡོལ་བའི་འགྲོ་བ་ཀུན། །སྐྱོ་སླད་ཆོས་དབྱིངས་སྤྲོས་བྲལ་ལ་ཐིམ་ཚེ། །མཚན་དཔེའི་ཟློས་གར་རིང་བསྲེལ་ཟ་མ་ཏོག །རྩྭ་ཅན་འགྲོ་བའི་དཔྱིད་དུ་ལྷག་པར་བཞེངས། །ཞེས་དེ་བཞིན་གཤེགས་པའི་མཛད་པ་དང་མཐུན་པར་བཞེངས་པའི་མཆོད་རྟེན་བརྒྱད་ལ་བསྔགས་བརྗོད་ཀྱི་མེ་ཏོག་ཕྲ་མོ་འདིའང་གཞོན་ནུ་ཨ་བྷཱ་ཡས་འཐོར་བའོ།། །། ༈

[edit]

bde bar gshegs pa'i mchod rten rnam pa thams cad du rdzogs pa brgyad la bsngags pa nor bu'i do shal/__ bde bar gshegs pa'i mchod rten rnam pa thams cad du rdzogs pa brgyad la bsngags pa nor bu'i do shal ces bya ba bzhugs so/__/_!_pad+ma spungs pa/__lnga brgya'i gter gyis spud pa'i dge mtshan rtser/__/pad+ma gzhon nu'i zur phud g.yo ba yis/__/zhabs mthil 'khor lo'i re khAr bsti stang gi__/grags pa lum+bi'i tshal du rnam par spungs/__/byang chen/__gang du gshegs na byang chub shing gi drung /__/snying rje'i kun phan gzhon nus dkris pa'i zer/__/sder bcas bdud sde'i mun pa pham byas te/__/sa lam cha shas yongs su rdzogs par mtshon/__/bkra shis sgo mang /__dang po'i chos 'khor bden bzhi'i do shal gyis/__/lnga sde bzang po'i bslab pa don yod du/__/sbyar ba'i ngo mtshar rnam thar rten 'gyur gi/__/sgo 'phar gsar pa'i cho gas dbye ba bzhin/__/cho 'phrul/__ji snyed sa lam bang rim rtser 'dzegs pa'i/__/stobs bcu'i cho 'phrul rdo rje gdengs pa'i mes/__/phas rgol ri bo'i rkang pa myur bcom tshe/__/mnyan yod tshogs rnams skrag dang gus pas btud/__/lha babs/__drin la lan du ldon pa'i mngon rtogs kyis/__/'chi med grub pa'i grong khyer la gshegs nas/__/zhi bsil bdud rtsis tshim byas gsal ldan bu/__/'bab stegs them skas mdzes pas bos pa bzhin/__/dbyen 'dums/__dge 'dun khyu mchog 'dus pa'i rol sgeg ni/__/kun myos gnyis 'thung dregs pas dbye ba'i tshe/__/dgra bcom rdzu 'phrul cho ga'i lcags kyu yis/__/dbang phyug rnam par 'dums pa'i grags pa 'bar/__/rnam rgyal/__me tog mda' can kun tu dga' bya'i phyir/__/rdzu 'phrul rkang pa'i yon tan sba byas kyang /__/tsun+da'i gsol 'debs thal mo'i gdengs ka ru/__/'tsho ba'i 'du byed byin rlabs rnam par rgyal/__/myang 'das/__gzugs sku'i gdul bya yol ba'i 'gro ba kun/__/skyo slad chos dbyings spros bral la thim tshe/__/mtshan dpe'i zlos gar ring bsrel za ma tog__/rtswa can 'gro ba'i dpyid du lhag par bzhengs/__/zhes de bzhin gshegs pa'i mdzad pa dang mthun par bzhengs pa'i mchod rten brgyad la bsngags brjod kyi me tog phra mo 'di'ang gzhon nu a b+hA yas 'thor ba'o//___//__!_