JKW-KABUM-01-KA-002-050

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 2, sde tshan 50, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལ་བསྟོད་པ་གྲུབ་གཉིས་མཆོག་སྦྱིན། རྒྱ་གར་སྐད་དུ། བཛྲ་དྷཱ་ར་མཻ་ཏྲི་ཏཱ་ནནྡ་ཤཱ་ས་ན་དྷཱ་རེ་སྟུ་ཏི་དྭི་སིདྡྷ་ཤྲཱི་དཱ་ནཱ་མ། བོད་སྐད་དུ། རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལ་བསྟོད་པ་གྲུབ་གཉིས་མཆོག་སྦྱིན་ཅེས་བྱ་བ། ངག་གི་དབང་ཕྱུག་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྣམ་ཀུན་མཆོག་ལྡན་ཡེ་ཤེས་སྐུ་ནི་མཚན་དཔེའི་མཚར་སྡུག་རྫོགས་པས་མཛེས། །མི་ཤིགས་བདེ་ཆེན་ནཱ་དའི་གསུང་ནི་སྤངས་རྟོགས་རོལ་མོར་འཆར་བས་སྙན། །སྤྲོས་པའི་མཐའ་ལས་རྣམ་གྲོལ་ཐུགས་ནི་མཁྱེན་དང་བརྩེ་བའི་སྙིང་པོ་ཅན། །རྡོ་རྗེ་འཆང་དངོས་འཁོར་ལོའི་མགོན་པོས་བྱང་ཆུབ་བར་དུ་ཐུགས་རྗེས་ཟུངས། ༡ །གང་ཞིག་ཐོག་མཐའི་འཇུག་སྒོ་གཅིག་གྱུར་ཡོན་ཏན་རིན་ཆེན་ཕྲག་བརྒྱའི་གཞི། །ངེས་པར་འབྱུང་བའི་དཔྱིད་ཀས་ཡོངས་བཟུང་ཚུལ་ཁྲིམས་ཕུང་པོའི་མནྡ་ར། །རྣམ་གྲོལ་བཀྲ་ཤིས་དུ་མ་དང་བཅས་ལྷར་བཅས་ཀུན་དགའི་ངལ་འཚོའི་དཔྱིད། །རྡོ་རྗེ་འཆང་དངོས་འཁོར་ལོའི་མགོན་པོས༴ ༢ །གཞན་ཕྱིར་ཡུན་རིང་དུ་གནས་གོམས་པའི་བྱམས་པ་ཆེན་པོའི་ཟླ་ཤེལ་ནི། །སྙིང་རྗེའི་ཤེལ་གྱི་དུ་བས་བསྡམས་ལ་བྱང་ཆུབ་སེམས་ཀྱི་འོད་རིས་ཅན། །ཐེག་པ་ཆེན་པོའི་འཆི་མེད་ལམ་དུ་སྐུ་དང་ཡེ་ཤེས་ངལ་འཚོ་མཁན། །རྡོ་རྗེ་འཆང་དངོས༴ ༣ །མང་དུ་ཐོས་པའི་ཕ་རོལ་སོན་ཕྱིར་དབྱིག་གཉེན་ས་འདིར་འོང་བ་བཞིན། །དེ་དོན་བསམ་པའི་སྒྲོ་འདོགས་ལེགས་ཆོད་ཆོས་ཀྱི་གྲགས་པའི་རྣམ་དཔྱོད་ཅན། །ཚེ་གཅིག་བསྒོམས་པས་གྲུབ་པའི་ས་བརྙེས་རྣལ་འབྱོར་དབང་ཕྱུག་གཟུགས་ཀྱི་ཟླ། །རྡོ་རྗེ་འཆང་དངོས༴ ༤ །འཆད་མཁས་དཔྱོད་ལྡན་རྣ་བར་ལྷུང་བས་ཡིད་ཀྱི་བརྟན་པ་དབང་མེད་འཕྲོག །རྩོད་པས་ཕས་རྒོལ་བྲག་རི་བསྙིལ་ལ་རྡོ་རྗེ་གཟེགས་མའི་མཚོན་འཆང་ཞིང་། །རྩོམ་ཚེ་སྡེབ་ལེགས་ཚིག་དང་དོན་བཅས་བློ་ལྡན་དགྱེས་པའི་མཆོད་སྤྲིན་ཅན། །རྡོ་རྗེ་འཆང་དངོས༴ ༥ །འཇམ་མགོན་མཁྱེན་པའི་ཉི་གཞོན་གཡོ་བས་བློ་གྲོས་ཨུཏྤལ་རབ་ཏུ་རྒྱས། །ཕྱག་ན་པདྨོའི་བརྩེ་ཆེན་བདུད་རྩིས་ཡིད་ཅན་ཀུན་གྱི་སྨན་གཅིག་པུ། །གསང་འཛིན་ནུས་པའི་འཛུམ་དཀར་གསར་པས་སྲིད་ཞིའི་རྒུད་པ་ཀུན་སྲུང་བ། །རྡོ་རྗེ་འཆང་དངོས༴ ༦ །དཀྱིལ་འཁོར་རྣམ་བཞིའི་མཐོ་རིས་ལས་འོངས་དབང་བཞིའི་གངྒཱའི་རྒྱུན་བཟང་པོས། །སྒྲིབ་པ་རྣམ་བཞིའི་ཚ་གདུང་ཀུན་བཅིལ་སྐུ་བཞིའི་ངལ་འཚོ་ལ་རོལ་ཞིང་། །དམ་ཚིག་སྡོམ་པའི་ལང་ཚོ་མཛེས་པས་རྒྱལ་བ་དགྱེས་པའི་རྣམ་ཐར་ཅན། །རྡོ་རྗེ་འཆང་དངོས༴ ༧ །གསལ་སྟོང་ཟུང་འཇུག་ལྷན་ཅིག་སྐྱེས་པའི་གནས་ལུགས་མངོན་སུམ་གཟིགས་པ་ལས། །ཆོས་ཀུན་སེམས་ཉིད་སྒྱུ་མའི་རྣམ་རོལ་རྟེན་འབྱུང་བསམ་བརྗོད་བྲལ་བའི་གཤིས། །རྒྱུ་ལམ་འབྲས་གསུམ་འཁོར་འདས་དབྱེར་མེད་ངེས་དོན་དགོངས་པར་དབང་འབྱོར་པས། །རྡོ་རྗེ་འཆང་༴ ༨ །ཐ་མལ་སྣོད་བཅུད་སྣང་བའི་ལྕགས་ཁམས་ལམ་བྱེད་རྣམ་བཞིའི་གསེར་འགྱུར་རྩིས། །རེག་པས་རྟེན་དང་བརྟེན་པར་བཅས་པའི་དཀྱིལ་འཁོར་འཁོར་ལོའི་མཚར་སྡུག་ཏུ། །ཡོངས་ཤར་ཐུན་མོང་གྲུབ་པའི་ཉམས་བརྒྱས་ཕན་བདེའི་དགའ་སྟོན་མགྲོན་གཉེར་བས། །རྡོ་རྗེ་འཆང་དངོས༴ ཕུང་ཁམས་སྐྱེ་མཆེད་རྡོ་རྗེའི་གྲོང་ཁྱེར་གདན་གསུམ་ཚང་བའི་ལྷར་ཤེས་ཤིང་། །རྩ་ཡིག་བདུད་རྩི་རླུང་གི་དཀྱིལ་འཁོར་སྐུ་བཞིའི་ངོ་བོར་བྱང་ཆུབ་པས། །ཟབ་གསལ་གཉིས་མེད་ཡེ་ཤེས་མཆོག་གིས་སྣང་སྟོང་ཟུང་འཇུག་དཔལ་སྟེར་བ། །རྡོ་རྗེ་འཆང་དངོས༴ ༡༠ །སྦྱོར་བ་རྣམ་བདུན་ཆོ་གས་བཅིངས་པས་ལས་རླུང་དབུ་མའི་དབྱིངས་ཐིམ་ཞིང་། །ཟླ་བ་མེད་པ་སྒྲ་གཅན་གྲངས་ཀྱིས་རབ་སྒེག་གཏུམ་མོའི་མེ་ལྕེའི་རེག་བྱ་ཡིས། །ཧྃ་ཡིག་བདུད་རྩིར་བཞུ་བའི་བྱེད་པས་རང་བྱུང་ཡེ་ཤེས་མངོན་གྱུར་པའི། །རྡོ་རྗེ་འཆང་དངོས༴ ༡༡ །ལུས་ངག་རྦ་རླབས་སྦྱོར་བ་ལེགས་སྦྱངས་པདྨ་ཅན་དང་ལྷན་ཅིག་ཏུ། །རྦ་རླབས་མཆོག་གི་བྱེད་པ་ལ་བརྟེན་གཟུང་འཛིན་དབུ་མར་ཐིམ་པ་ལས། །རྣམ་ཀུན་ཡེ་ཤེས་ཆེན་པོར་བྱང་ཆུབ་སྙིང་པོའི་དཔལ་འཛིན་པ། །རྡོ་རྗེ་འཆང་དངོས་འཁོར་ལོའི་མགོན་པོས་བྱང་ཆུབ་བར་དུ་ཐུགས་རྗེས་ཟུངས། ༡༢ །མཛད་འཕྲོ་ལུས།

[edit]

rdo rje 'chang byams pa kun dga' bstan 'dzin la bstod pa grub gnyis mchog sbyin/ rgya gar skad du/__badz+ra d+hA ra mai tri tA nan+da shA sa na d+hA re stu ti dwi sid+d+ha shrI dA nA ma/__bod skad du/__rdo rje 'chang byams pa kun dga' bstan 'dzin la bstod pa grub gnyis mchog sbyin ces bya ba/__ngag gi dbang phyug 'jam dpal gzhon nur gyur pa la phyag 'tshal lo/__/rnam kun mchog ldan ye shes sku ni mtshan dpe'i mtshar sdug rdzogs pas mdzes/__/mi shigs bde chen nA da'i gsung ni spangs rtogs rol mor 'char bas snyan/__/spros pa'i mtha' las rnam grol thugs ni mkhyen dang brtse ba'i snying po can/__/rdo rje 'chang dngos 'khor lo'i mgon pos byang chub bar du thugs rjes zungs/__1__/gang zhig thog mtha'i 'jug sgo gcig gyur yon tan rin chen phrag brgya'i gzhi/__/nges par 'byung ba'i dpyid kas yongs bzung tshul khrims phung po'i man+da ra/__/rnam grol bkra shis du ma dang bcas lhar bcas kun dga'i ngal 'tsho'i dpyid/__/rdo rje 'chang dngos 'khor lo'i mgon pos=__2__/gzhan phyir yun ring du gnas goms pa'i byams pa chen po'i zla shel ni/__/snying rje'i shel gyi du bas bsdams la byang chub sems kyi 'od ris can/__/theg pa chen po'i 'chi med lam du sku dang ye shes ngal 'tsho mkhan/__/rdo rje 'chang dngos=__3__/mang du thos pa'i pha rol son phyir dbyig gnyen sa 'dir 'ong ba bzhin/__/de don bsam pa'i sgro 'dogs legs chod chos kyi grags pa'i rnam dpyod can/__/tshe gcig bsgoms pas grub pa'i sa brnyes rnal 'byor dbang phyug gzugs kyi zla/__/rdo rje 'chang dngos=__4__/'chad mkhas dpyod ldan rna bar lhung bas yid kyi brtan pa dbang med 'phrog__/rtsod pas phas rgol brag ri bsnyil la rdo rje gzegs ma'i mtshon 'chang zhing /__/rtsom tshe sdeb legs tshig dang don bcas blo ldan dgyes pa'i mchod sprin can/__/rdo rje 'chang dngos=__5__/'jam mgon mkhyen pa'i nyi gzhon g.yo bas blo gros ut+pal rab tu rgyas/__/phyag na pad+mo'i brtse chen bdud rtsis yid can kun gyi sman gcig pu/__/gsang 'dzin nus pa'i 'dzum dkar gsar pas srid zhi'i rgud pa kun srung ba/_/rdo rje 'chang dngos=__6__/dkyil 'khor rnam bzhi'i mtho ris las 'ongs dbang bzhi'i gang+gA'i rgyun bzang pos/__/sgrib pa rnam bzhi'i tsha gdung kun bcil sku bzhi'i ngal 'tsho la rol zhing /__/dam tshig sdom pa'i lang tsho mdzes pas rgyal ba dgyes pa'i rnam thar can/__/rdo rje 'chang dngos=__7__/gsal stong zung 'jug lhan cig skyes pa'i gnas lugs mngon sum gzigs pa las/__/chos kun sems nyid sgyu ma'i rnam rol rten 'byung bsam brjod bral ba'i gshis/__/rgyu lam 'bras gsum 'khor 'das dbyer med nges don dgongs par dbang 'byor pas/__/rdo rje 'chang =_8__/tha mal snod bcud snang ba'i lcags khams lam byed rnam bzhi'i gser 'gyur rtsis/__/reg pas rten dang brten par bcas pa'i dkyil 'khor 'khor lo'i mtshar sdug tu/__/yongs shar thun mong grub pa'i nyams brgyas phan bde'i dga' ston mgron gnyer bas/__/rdo rje 'chang dngos=__phung khams skye mched rdo rje'i grong khyer gdan gsum tshang ba'i lhar shes shing /__/rtsa yig bdud rtsi rlung gi dkyil 'khor sku bzhi'i ngo bor byang chub pas/__/zab gsal gnyis med ye shes mchog gis snang stong zung 'jug dpal ster ba/__/rdo rje 'chang dngos=__10__/sbyor ba rnam bdun cho gas bcings pas las rlung dbu ma'i dbyings thim zhing /__/zla ba med pa sgra gcan grangs kyis rab sgeg gtum mo'i me lce'i reg bya yis/__/ha~M yig bdud rtsir bzhu ba'i byed pas rang byung ye shes mngon gyur pa'i/__/rdo rje 'chang dngos=__11__/lus ngag rba rlabs sbyor ba legs sbyangs pad+ma can dang lhan cig tu/__/rba rlabs mchog gi byed pa la brten gzung 'dzin dbu mar thim pa las/__/rnam kun ye shes chen por byang chub snying po'i dpal 'dzin pa/__/rdo rje 'chang dngos 'khor lo'i mgon pos byang chub bar du thugs rjes zungs/__12_/mdzad 'phro lus/__