JKW-KABUM-01-KA-002-046

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 2, sde tshan 46, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

ཀུན་མཁྱེན་ཆེན་པོ་ལ་བསྟོད་པ་འཛམ་བུའི་འཁྲི་ཤིང་།

ཀུན་མཁྱེན་ཆེན་པོ་ལ་བསྟོད་པ་ཛམྦུའི་འཁྲི་ཤིང་ཞེས་བྱ་བ། ན་མོ་གུ་རུ་ཛྙཱ་ན་ཡེ། ཀ༷་དག༷་ཀློང༷་ཆེན༷་དགོངས་པར་དབང་བསྒྱུར་བས། །ཁ༷་ཙམ་མ་ཡིན་དོན་གྱི་ཐམས་ཅད་མཁྱེན། །ག༷་བུར་འཛིན་ལྟར་དྲི༷་མེད༷་ཐར་མཆོག་གིས། །ང༷་བདག་གདུང་སེལ་འོད༷་ཟེར༷་སྤྲོ་དེར་འདུད། ༡ །ཅ༷་ཅོ་རྣམ་སྤངས་གཞོམ་བྲལ་ནཱ་དའི་སྒྲ། །ཆ༷་མེད་དབུ་མའི་དབྱིངས་སུ་སྒྲོག་པ་ལས། །ཇ༷་ཆང་སྐྱེམས་ཀྱིས་མི་མཚོན་ལུང་རྟོགས་ཆོས། །ཉ༷་རྒྱས་ཀུནྡཱ་འཛུམ་བཞིན་སྩོལ་ལ་འདུད། ༢ །ཏ༷་ཐཱ་ག་ཏས་ལེགས་གསུངས་བདེན་གཉིས་ལམ། །ཐ༷་དད་མོས་པའི་རྗེས་འགྲོ་ཐེག་ཀུན་རྩེ། །ད༷་གཟོད་བསྐྱར་གྲོལ་ལས་འདས་རྫོགས་པ་ཆེ། །ན༷་མར་ཁོར་ཡུག་མཉམ་པར་རོལ་དེར་འདུད། ༣ །པ༷་སངས་ལྟར་དཀར་སྨོན་འཇུག་བདུད་རྩིས་རོལ། །ཕ༷་རོལ་ཕྱིན་ལམ་སྟེང་འཐུང་བཞད་པ་ལས། །བ༷་མཆོག་ཙིནྟཱ་མ་ཎི་ཇི་བཞིན་དུ། །མ༷་ལུས་འགྲོ་བའི་རེ་འདོད་སྐོང་ལ་འདུད། ༤ །ཙ༷་རི་ཏྲ་སོགས་གནས་ཡུལ་ཕྱག་རྒྱ་རུ། །ཚ༷་གྲང་ཁུར་དུ་བཟོད་པའི་དཀའ་སྤྱད་ཀྱིས། །ཛ༷་ཧུའི་རྒྱུན་བཞིན་བསྐྱེད་རྫོགས་ཏིང་འཛིན་དང་། །ཝ༷་ལྟར་རི་སུལ་དབེན་པར་སྦས་དེར་འདུད། ༥ །ཞ༷་རེངས་བྲལ་བའི་གཉུག་མའི་འཁྲི་ཤིང་ཆེར། །ཟ༷་མ་ཏོག་བཞིན་ཤེས་བྱའི་ཚོགས་བསྡམས་པས། །འ༷་ཅག་འགྲོ་བ་སྒྲོལ་ཕྱིར་ལུང་རྟོགས་ཆོས། །ཡ༷་བྲལ་ལས་འདས་རྟག་ཏུ་སྦྱིན་ལ་འདུད། ༦ །རྭ༷་ལྟར་ཉེས་པའི་རྡུལ་གྱིས་མ་གོས་ཤིང་། །ལ༷་ཀླུང་འགྲོ་ལ་ཕན་བདེའི་དགའ་སྟོན་སྦྱིན། །ཤ༷་ཟ་སྲོག་གཅོད་དྲེགས་པའི་སྡེ་དཔོན་ཀུན། །ས༷་བཅུའི་བཀའ་རྟགས་གསར་པས་འཆིང་དེར་འདུད། ༧ །ཧ༷་རིའི་དྲི་བསུང་འཐུལ་བའི་བདེ་སྟོང་རོས། །ཨ༷་ཏི་ཟུང་འཇུག་ལང་ཚོ་ཆེར་བརྟས་པས། །ཤེས་རབ་ཕ་རོལ་ཕྱིན་ཡུམ་རྗེ་བཙུན་མ། །བརྟན་པ་འཕྲོག་པའི་བྱེད་པོ་ཁྱོད་ལ་འདུད། ༨ །འགྱུར་བཅས་སྲིད་པའི་འཕོ་བ་དབུ་མར་ཞིག །འགྱུར་མེད་གདན་གསུམ་མཚན་དཔེའི་དཀྱིལ་འཁོར་སྨིན། །ཡོངས་གྲུབ་ཡེ་ཤེས་ཆེན་པོར་མཉམ་རོལ་པས། །ཞིང་ཁམས་ཀུན་སྦྱངས་འགྲོ་རྣམས་སྨིན་བགྱིད་ཤོག ༩ །ཡུལ་ལ་ལྟོས་པའི་སྤྲོས་བྲལ་སྟོང་པ་ཉིད། །ཡུལ་ཅན་བདེ་བ་ཆེན་པོས་རབ་བསྡམས་པས། །བདེ་སྟོང་ཟུང་འཇུག་རྣམ་ཀུན་མཆོག་ལྡན་དང་། །འཕོ་འགྱུར་བྲལ་བའི་གོ་འཕང་བརྙེས་གྱུར་ཅིག ༡༠ །གུས་པའི་ཆུ་གཏེར་ལས་སྐྱེས་ཚིག་གི་སྤྲིན། །རྣམ་དཀར་ཆར་གྱིས་སྤུད་པའི་དགེ་མཚན་གྱིས། །སྡུག་བསྔལ་བདེན་པའི་ཚ་གདུང་རབ་བཅིལ་ཏེ། །ལྷན་སྐྱེས་ཐར་པའི་པདྨོ་བཞད་ཕྱིར་བསྔོ། ༡༡ །ཞེས་ཀུན་མཁྱེན་སངས་རྒྱས་གཉིས་པའི་རྟོགས་པ་བརྗོད་པ་དང་མཐུན་པར་བསྔགས་པའི་མེ་ཏོག་ཕྲ་མོ་འདིའང་གཞོན་ནུ་ཨ་བྷཱ་ཡས་གང་ཤར་མྱུར་དུ་སྦྱར་བའོ།། །། ༈

[edit]

kun mkhyen chen po la bstod pa 'dzam bu'i 'khri shing /__ kun mkhyen chen po la bstod pa dzam+bu'i 'khri shing zhes bya ba/__na mo gu ru dz+nyA na ye/__kaX dgaX klongaX chenaX dgongs par dbang bsgyur bas/__/khaX tsam ma yin don gyi thams cad mkhyen/__/gaX bur 'dzin ltar driX medaX thar mchog gis/__/ngaX bdag gdung sel 'odaX zeraX spro der 'dud/__1__/caX co rnam spangs gzhom bral nA da'i sgra/__/chaX med dbu ma'i dbyings su sgrog pa las/__/jaX chang skyems kyis mi mtshon lung rtogs chos/__/nyaX rgyas kun+dA 'dzum bzhin stsol la 'dud/__2_/taX thA ga tas legs gsungs bden gnyis lam/__/thaX dad mos pa'i rjes 'gro theg kun rtse/__/daX gzod bskyar grol las 'das rdzogs pa che/__/naX mar khor yug mnyam par rol der 'dud/__3__/paX sangs ltar dkar smon 'jug bdud rtsis rol/__/phaX rol phyin lam steng 'thung bzhad pa las/__/baX mchog tsin+tA ma Ni ji bzhin du/__/maX lus 'gro ba'i re 'dod skong la 'dud/__4__/tsaX ri tra sogs gnas yul phyag rgya ru/__/tshaX grang khur du bzod pa'i dka' spyad kyis/__/dzaX hu'i rgyun bzhin bskyed rdzogs ting 'dzin dang /__/waX ltar ri sul dben par sbas der 'dud/__5__/zhaX rengs bral ba'i gnyug ma'i 'khri shing cher/__/zaX ma tog bzhin shes bya'i tshogs bsdams pas/__/'aX cag 'gro ba sgrol phyir lung rtogs chos/__/yaX bral las 'das rtag tu sbyin la 'dud/__6__/rwaX ltar nyes pa'i rdul gyis ma gos shing /__/laX klung 'gro la phan bde'i dga' ston sbyin/__/shaX za srog gcod dregs pa'i sde dpon kun/__/saX bcu'i bka' rtags gsar pas 'ching der 'dud/__7_/haX ri'i dri bsung 'thul ba'i bde stong ros/__/aX ti zung 'jug lang tsho cher brtas pas/__/shes rab pha rol phyin yum rje btsun ma/__/brtan pa 'phrog pa'i byed po khyod la 'dud/__8__/'gyur bcas srid pa'i 'pho ba dbu mar zhig__/'gyur med gdan gsum mtshan dpe'i dkyil 'khor smin/__/yongs grub ye shes chen por mnyam rol pas/__/zhing khams kun sbyangs 'gro rnams smin bgyid shog__9_/yul la ltos pa'i spros bral stong pa nyid/__/yul can bde ba chen pos rab bsdams pas/__/bde stong zung 'jug rnam kun mchog ldan dang /__/'pho 'gyur bral ba'i go 'phang brnyes gyur cig__10__/gus pa'i chu gter las skyes tshig gi sprin/__/rnam dkar char gyis spud pa'i dge mtshan gyis/__/sdug bsngal bden pa'i tsha gdung rab bcil te/__/lhan skyes thar pa'i pad+mo bzhad phyir bsngo/__11_/zhes kun mkhyen sangs rgyas gnyis pa'i rtogs pa brjod pa dang mthun par bsngags pa'i me tog phra mo 'di'ang gzhon nu a b+hA yas gang shar myur du sbyar ba'o//___//__!_