JKCL-KABUM-08-NYA-012-045

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 45, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ཀྱེ་ཧོ། གང་གི་རང་བཞིན་ཐུགས་རྗེའི་ཟླ་སྣང་ནི། །དྭངས་བའི་ཆུ་ལ་སྒྲིབ་མེད་འཆར་ན་ཡང་། །མི་བསྲུན་སྐྱེ་བོས་རབ་ཏུ་དཀྲུག་པ་ན། །རི་བོང་ཅན་ཡང་ནུབ་རིའི་ཕག་ལ་གཞོལ། །ལྷ་དང་བླ་མའི་ཞལ་བཟང་བལྟ་བའི་ཕྱིར། །དེང་ནས་བཟུང་སྟེ་བྱང་ཆུབ་སྙིང་པོའི་བར། །རྡོ་རྗེའི་གཡར་དམ་གཉན་པོ་བླངས་བ་ཡང་། །སོ་སོར་འབྲལ་བ་དུས་ཀྱི་རང་བཞིན་གཤིས། །ཀྱེ་མ་མ་གྲང་ཁྲོད་གནས་བྱིས་པ་འགས། །ཡིད་ཀྱི་ཁ་ཆུས་དམར་པོར་འཆིང་བ་ལས། །བཟང་པོར་སྤྱོད་དང་འགྲོག་པའི་སྐལ་བ་ནི། །རུས་སྦལ་སྤུ་ཡི་ནམ་མཁར་ཐགས་སུ་བཏགས། །ཆགས་དང་བྲལ་བ་རྒྱལ་དང་རྒྱལ་བའི་སྲས། །ཡེ་ཤེས་སྤྱན་གྱིས་སྒྲིབ་མེད་རྟག་གཟིགས་ལ། །སྲེད་པའི་འཆིང་བ་ཀུན་ལྡན་བདག་འདྲ་ལ། །ཐུགས་རྗེ་བསིལ་བའི་ཆབ་ཀྱིས་བརླན་པར་མཛོད། །ཕན་པར་སྨྲས་ཀྱང་ལོག་པར་སེམས་པ་ཡི། །སྐྱེ་བོ་ངན་པ་སྦྲུལ་གདུག་དང་འདྲ་བའི། །ཇི་ཙམ་བསྙེན་ཀྱང་ཕྱིར་ཕྱིར་རྒྱང་བསྲིང་བ། །དེ་འདྲའི་སྡིག་གྲོགས་རིང་དུ་སྤངས་བར་ཤོག། སུ་དང་འགྲོག་ཀྱང་ཆགས་སྡང་འཕེལ་བའི་གཞི། །གང་དུ་གནས་ཀྱང་ཆོས་བརྒྱད་བདུད་མོས་བསླུས། །ད་ནི་དབེན་པའི་གནས་བཟང་བསྟེན་བྱས་ནས། །བརྩོན་པས་སྒྲུབ་ལ་གཞོལ་བར་བྱིན་གྱིས་རློབས། །དུས་གསུམ་རྒྱལ་བ་ཀུན་གྱི་མཁྱེན་བརྩེ་ཡི་རང་གཟུགས། །དྲན་པས་སྲིད་ཞིའི་གདུང་སེལ་བླ་མ་རང་མཁྱེན་ནོ། །ཡེ་ཤེས་སྤྱན་གྱིས་བདག་ཅག་ལས་ངན་ལ་གཟིགས་ཤིག། སྲིད་ཞིའི་འཇིགས་པ་ཀུན་ལས་ད་ལྟ་རང་སྐྱོབས་མཛོད། ཨ་ཧོ་ཡེ། ཚེ་སྲོག་མི་རྟག་སྒྱུ་མའི་དཔེ་བརྒྱད་དང་མཚུངས་ཏེ། །ད་ལྟ་ཡོད་ཀྱང་གློག་བཞིན་མྱུར་དུ་ནི་འཇིག་པའི། །ཕྱི་ལ་བསམ་ན་འཁོར་བ་སྡུག་བསྔལ་གྱི་རང་བཞིན། །བྱ་དཀའ་དོན་ཆུང་བྱེ་མའི་ཁང་བུ་དང་འདྲ་བ། །ཟིན་དང་འགྲུབ་དུས་མེད་པའི་ལས་ངན་བདག་སྐྱོབས་ཤིག། སྟོན་ཀའི་ནམ་མཁའ་དང་མཚུངས་དགྲ་གཉེན་ནི་ངེས་མེད། །ལུས་འདི་གཅེས་པར་བསྐྱང་ཡང་སྐད་ཅིག་ཙམ་མི་སྡོད། །འཆི་བདག་གཤིན་རྗེའི་དགྲ་སྟྭས་བཅོམ་པ་ལ་ཉེའོ། །ནམ་ཟླ་དུས་བཞིའི་འཕོ་འགྱུར་འཕེལ་འགྲིབ་ལ་ལྟོས་དང་། །གཉེན་དང་ཉེ་དུ་བར་མའི་སེམས་ཅན་དང་འདྲའོ། །སྐྱེ་ཤི་དར་རྒུད་བདེ་སྡུག་འཕོ་འགྱུར་ལ་བསམ་ན། །རྟག་ཅིང་བརྟན་པ་རྡུལ་ཕྲན་ཙམ་ཞིག་ནི་མི་འདུག། རྣམ་ཐོས་བུ་ཡི་དཔལ་འབྱོར་ལོངས་སྤྱོད་ཙམ་ཡོད་ཀྱང་། །ཕྱི་མའི་ལམ་དུ་ཁབ་ཅིག་ཁྱེར་དབང་ནི་མེད་དོ། །འདོད་པས་གསོག་སྲུང་སྙིང་པོ་ཅུང་ཟད་ཀྱང་མེད་དོ། །མི་འཆི་སྡོད་གྲབས་བྱེད་པའི་སྙིང་མེད་ཀྱི་བླུན་པོ། །རང་མགོ་རང་གིས་གཡོགས་པའི་མདོ་མེད་ཀྱི་དྲེད་པོ། །བདག་ནི་སྐྱབས་དང་མགོན་མེད་སྡུག་བསྔལ་གྱི་ཉམ་ཐག། འདི་ལ་དཔལ་ལྡན་བླ་མའི་ཐུགས་རྗེ་ཡིས་གཟིགས་མཛོད། །འཁོར་བ་དགྲ་རུ་མཐོང་བར་བྱིན་གྱིས་རང་རློབས་ཤིག། ཡེ་ཤེས་རིག་པའི་དབང་ཆེན་བསྐུར་ཐོབ་དང་བྲལ་བ། །མངོན་སུམ་ཐོབ་ནས་འཁྲུལ་པ་རུ་ལོགས་སུ་གྱུར་ཏེ། །གདོད་མའི་གནས་ལུགས་རྟོགས་པ་བྱིན༴ །མཁྱེན་ནོ་མཁྱེན་ནོ་དཔལ་ལྡན་བླ་མ་རང་མཁྱེན་ནོ། །ཆོས་ཀྱི་བློ་གྲོས་པས་སོ།། །།

[edit]

!_kye ho/__gang gi rang bzhin thugs rje'i zla snang ni/__/dwangs ba'i chu la sgrib med 'char na yang /__/mi bsrun skye bos rab tu dkrug pa na/__/ri bong can yang nub ri'i phag la gzhol/__/lha dang bla ma'i zhal bzang blta ba'i phyir/__/deng nas bzung ste byang chub snying po'i bar/__/rdo rje'i g.yar dam gnyan po blangs ba yang /__/so sor 'bral ba dus kyi rang bzhin gshis/__/kye ma ma grang khrod gnas byis pa 'gas/__/yid kyi kha chus dmar por 'ching ba las/__/bzang por spyod dang 'grog pa'i skal ba ni/__/rus sbal spu yi nam mkhar thags su btags/__/chags dang bral ba rgyal dang rgyal ba'i sras/__/ye shes spyan gyis sgrib med rtag gzigs la/__/sred pa'i 'ching ba kun ldan bdag 'dra la/__/thugs rje bsil ba'i chab kyis brlan par mdzod/__/phan par smras kyang log par sems pa yi/__/skye bo ngan pa sbrul gdug dang 'dra ba'i/__/ji tsam bsnyen kyang phyir phyir rgyang bsring ba/__/de 'dra'i sdig grogs ring du spangs bar shog/__su dang 'grog kyang chags sdang 'phel ba'i gzhi/__/gang du gnas kyang chos brgyad bdud mos bslus/__/da ni dben pa'i gnas bzang bsten byas nas/__/brtson pas sgrub la gzhol bar byin gyis rlobs/__/dus gsum rgyal ba kun gyi mkhyen brtse yi rang gzugs/__/dran pas srid zhi'i gdung sel bla ma rang mkhyen no/__/ye shes spyan gyis bdag cag las ngan la gzigs shig/__srid zhi'i 'jigs pa kun las da lta rang skyobs mdzod/__a ho ye/__tshe srog mi rtag sgyu ma'i dpe brgyad dang mtshungs te/__/da lta yod kyang glog bzhin myur du ni 'jig pa'i/__/phyi la bsam na 'khor ba sdug bsngal gyi rang bzhin/__/bya dka' don chung bye ma'i khang bu dang 'dra ba/__/zin dang 'grub dus med pa'i las ngan bdag skyobs shig/__ston ka'i nam mkha' dang mtshungs dgra gnyen ni nges med/__/lus 'di gces par bskyang yang skad cig tsam mi sdod/__/'chi bdag gshin rje'i dgra s+t+was bcom pa la nye'o/__/nam zla dus bzhi'i 'pho 'gyur 'phel 'grib la ltos dang /__/gnyen dang nye du bar ma'i sems can dang 'dra'o/__/skye shi dar rgud bde sdug 'pho 'gyur la bsam na/__/rtag cing brtan pa rdul phran tsam zhig ni mi 'dug/__rnam thos bu yi dpal 'byor longs spyod tsam yod kyang /__/phyi ma'i lam du khab cig khyer dbang ni med do/__/'dod pas gsog srung snying po cung zad kyang med do/__/mi 'chi sdod grabs byed pa'i snying med kyi blun po/__/rang mgo rang gis g.yogs pa'i mdo med kyi dred po/__/bdag ni skyabs dang mgon med sdug bsngal gyi nyam thag/__'di la dpal ldan bla ma'i thugs rje yis gzigs mdzod/__/'khor ba dgra ru mthong bar byin gyis rang rlobs shig/__ye shes rig pa'i dbang chen bskur thob dang bral ba/__/mngon sum thob nas 'khrul pa ru logs su gyur te/__/gdod ma'i gnas lugs rtogs pa byin=__/mkhyen no mkhyen no dpal ldan bla ma rang mkhyen no/__/chos kyi blo gros pas so//___//