JKCL-KABUM-08-NYA-012-079

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 79, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ རང་བྱུང་རྡོ་རྗེའི་བྲོ་གླུ་བཀྲ་ཤིས་འཁྱིལ་བ། །ཐོས་གྲོལ་འབྲེལ་ཚད་དོན་ལྡན་བཞུགས་སོ། ཨ་ལ་ལ་ལ་ཧོཿཨ་ཧོ་གི་རྟི་ཨ་ཧོ་ཡེ༔ རྩ་གསུམ་དགྱེས་པའི་དགའ་ཚལ༔ བཀྲ་ཤིས་ལེགས་ཀྱི་འབྱུང་གནས། །ཉམས་དགའི་འདོད་ཡོན་ཕུན་ཚོགས༔ ། ནགས་ཚལ་ལྗོན་པའི་ར་བ། །གཡུ་ཡི་ནེའུ་སེང་སྔོ་ལྗང་། །གསེར་གྱི་མེ་ཏོག་བཀྲ་བ། །བུང་བ་ལིང་ལིང་ལྡིང་ཞིང་། །ཕུ་གསུམ་གངས་རི་དཀར་པོ། །རྩལ་གསུམ་ལྡན་པའི་སེང་གེའི། །ཐེག་མཆོག་ཆོས་ཀྱི་ང་རོས། །ལོག་ལྟའི་ཝ་ཚོགས་བཅོམ་སོང་། །གཡུ་ཡི་རལ་པ་སྔོ་སང་། །ནམ་མཁའི་དབྱིངས་ལ་སྤྱོད་དོ། །ཡན་ལག་བརྒྱད་ལྡན་ཆུ་ཀླུང་། །དལ་གྱིས་འབེབས་པའི་ཀློང་དུ། །བྱ་རིགས་སྣ་ཚོགས་སྐད་སྙན། །ཅ་ཅོ་སྒྲོགས་པས་དགའ་འོ། །ཉོན་མོངས་གདུང་སེལ་སྨན་ཆར། །ལྷ་ཡི་བུམ་བཟང་ནས་བབས། །དག་བྱེད་བདུད་རྩིའི་ཁྲུས་ཀྱིས། །ལུས་སེམས་དགའ་བདེས་ཁྱབ་བྱུང་། །གཟུགས་བཟང་ལྟ་ན་སྡུག་པའི། །ལྷ་ཡི་བུ་དང་བུ་མོར། །འགྲན་པའི་ལང་ཚོའི་མཚར་སྡུག། མང་དུ་འཛོམ་པའི་བདེ་སྐྱིད། །འཆི་མེད་དཔལ་དུ་ཆས་བྱུང་། །སྲིད་དང་ཞི་བའི་ཕུན་ཚོགས། །ས་འདིར་མངོན་སུམ་བཀུག་སྟེ། །དགའ་བ་བརྒྱ་ལྡན་གྲོང་ཁྱེར། །མི་ཕམ་འཇམ་དབྱངས་ཞལ་རས། །ལྟ་བའི་ཆོག་མི་ཤེས་པ། །བསྟན་འགྲོའི་མགོན་དུ་འཆར་བྱུང་། །ནག་ཕྱོགས་དམ་སྲིའི་དཔུང་ཚོགས། །ཁྲོ་རྒྱལ་རྟ་མགྲིན་སྤྲུལ་པ། །ཅང་ཤེས་རྨིག་གི་ཐལ་སྒྲས། །སྲོག་སྙིང་ཚལ་པར་གཏོར་སོང་། །འཇམ་དཔལ་ཁྲོས་པའི་འཁོར་ལོ། །ཕྱོགས་ཀུན་གཡས་སུ་འཁོར་བས། །ལྷ་མིན་འབྱུང་པོའི་མགོ་གཅོད། །དཔའ་བོའི་རྒྱན་དུ་བྱས་སོ། །ཕྲིན་ལས་ཕུར་པའི་མེ་སྒྱོག། རྡོ་རྗེའི་མདེའུ་རྩེ་བརྒྱས། །འབྲུག་གི་སྒྲ་ལྟར་སྒྲོགས་པས། །ཕ་རོལ་བདུད་སྡེའི་དམག་ཚོགས། །མིང་ཙམ་མེད་པར་བྱས་སོང་། །གཡུལ་རྒྱལ་རུ་དར་དཀར་པོ། །ཕྱོགས་ལས་རྣམ་པར་རྒྱལ་ལོ། །བདེ་ཞིང་སྐྱིད་པའི་ཉི་མ། །བཀྲ་ཤིས་ལྷ་ཡི་ཟླ་བ། །རྒྱུ་སྐར་ལྷ་མོ་གསུམ་པོ། །དུས་གཅིག་འཛོམ་པའི་དགའ་སྟོན། །དེ་རིང་ཆོས་ཀྱི་ཉི་མར། །འཆར་བའི་བཀྲ་ཤིས་ལེགས་བྱས། །འདི་འདྲ་འཛོམ་པའི་དགའ་མོ། །རྐང་གཡས་ཐབས་ཀྱི་བྲོ་ཆེན། །རྐང་གཡོན་ཤེས་རབ་བྲོ་མོ། །ཐབས་ཤེས་ཟུང་འཇུག་ཞབས་བྲོ། །ཁྲིགས་སེ་ཁྲིགས་སེ་ཆེམ་ཆེམ། །རྐང་པའི་སྟངས་ཀྱིས་བསྒྱུར་ཞིང་། །ས་གཞི་ཡོངས་པའི་ཁྱོན་ལ། །ཚངས་པའི་ཡུལ་ས་རྩེ་གནོན། །ལག་མཐིལ་དར་གྱི་གཤོག་རླབས། །སྟེང་འོག་ཕྱོགས་བཅུར་གཡོ་བས། །སྣོད་བཅུད་དཔལ་ཡོན་ཀུན་སྡུས། །ཕྱ་དང་གཡང་གི་དགེ་ལེགས། །བྲོ་ར་འདི་རུ་ཁུག་ཅིག། ཁུ་ཡེ་ཁུ་ཡེ་གཡང་ཁུག། རྒྱལ་ལོ་རྒྱལ་ལོ་ལྷ་རྒྱལ། །བཀྲ་ཤིས་འཁྱིལ་པའི་བྲོ་འདིས། །སྡེ་བཞི་དགེ་བཅུར་བཀྲ་ཤིས། །དགེ་ལེགས་རྣམ་རྒྱལ་གྱུར་ཅིག། ཅེས་པའང་ལྕགས་སྟག་སྣྲོན་གྱི་ཟླ་བའི་ཚེས་ལྔ་ལ། པདྨ་ཡེ་ཤེས་རྡོ་རྗེས་རང་བཞིན་དབྱིངས་སུ་ཇི་ལྟར་ཤར་བ། ཐུགས་རྗེ་དཔལ་མགོན་མཚུངས་མེད་དགེ་རྟག་མཆོག་སྤྲུལ་རིན་པོ་ཆེས་ཕྱག་བྲིས་སུ་མཛད་པ་འདིས་ཀྱང་བསྟན་པའི་རྒྱལ་མཚན་ཕྱོགས་བཅུར་བསྒྲེངས་ཤིང་། མི་མཐུན་དུས་ཀྱི་རྒུད་པ་འཇོམས་པའི་རྒྱུར་བླ་མ་རྒྱལ་བ་སྲས་བཅས་ཀྱིས་བྱིན་གྱིས་རླབས་ཏུ་གསོལ། ཤུ་བྷཾ། མངྒ་ལཾ།། །།

[edit]

!_rang byung rdo rje'i bro glu bkra shis 'khyil ba/__/thos grol 'brel tshad don ldan bzhugs so/__a la la la hoHa ho gi rti a ho ye:__rtsa gsum dgyes pa'i dga' tshal:__bkra shis legs kyi 'byung gnas/__/nyams dga'i 'dod yon phun tshogs:__/__nags tshal ljon pa'i ra ba/__/g.yu yi ne'u seng sngo ljang /__/gser gyi me tog bkra ba/__/bung ba ling ling lding zhing /__/phu gsum gangs ri dkar po/__/rtsal gsum ldan pa'i seng ge'i/__/theg mchog chos kyi nga ros/__/log lta'i wa tshogs bcom song /__/g.yu yi ral pa sngo sang /__/nam mkha'i dbyings la spyod do/__/yan lag brgyad ldan chu klung /__/dal gyis 'bebs pa'i klong du/__/bya rigs sna tshogs skad snyan/__/ca co sgrogs pas dga' 'o/__/nyon mongs gdung sel sman char/__/lha yi bum bzang nas babs/__/dag byed bdud rtsi'i khrus kyis/__/lus sems dga' bdes khyab byung /__/gzugs bzang lta na sdug pa'i/__/lha yi bu dang bu mor/__/'gran pa'i lang tsho'i mtshar sdug/__mang du 'dzom pa'i bde skyid/__/'chi med dpal du chas byung /__/srid dang zhi ba'i phun tshogs/__/sa 'dir mngon sum bkug ste/__/dga' ba brgya ldan grong khyer/__/mi pham 'jam dbyangs zhal ras/__/lta ba'i chog mi shes pa/__/bstan 'gro'i mgon du 'char byung /__/nag phyogs dam sri'i dpung tshogs/__/khro rgyal rta mgrin sprul pa/__/cang shes rmig gi thal sgras/__/srog snying tshal par gtor song /__/'jam dpal khros pa'i 'khor lo/__/phyogs kun g.yas su 'khor bas/__/lha min 'byung po'i mgo gcod/__/dpa' bo'i rgyan du byas so/__/phrin las phur pa'i me sgyog/__rdo rje'i mde'u rtse brgyas/__/'brug gi sgra ltar sgrogs pas/__/pha rol bdud sde'i dmag tshogs/__/ming tsam med par byas song /__/g.yul rgyal ru dar dkar po/__/phyogs las rnam par rgyal lo/__/bde zhing skyid pa'i nyi ma/__/bkra shis lha yi zla ba/__/rgyu skar lha mo gsum po/__/dus gcig 'dzom pa'i dga' ston/__/de ring chos kyi nyi mar/__/'char ba'i bkra shis legs byas/__/'di 'dra 'dzom pa'i dga' mo/__/rkang g.yas thabs kyi bro chen/__/rkang g.yon shes rab bro mo/__/thabs shes zung 'jug zhabs bro/__/khrigs se khrigs se chem chem/__/rkang pa'i stangs kyis bsgyur zhing /__/sa gzhi yongs pa'i khyon la/__/tshangs pa'i yul sa rtse gnon/__/lag mthil dar gyi gshog rlabs/__/steng 'og phyogs bcur g.yo bas/__/snod bcud dpal yon kun sdus/__/phya dang g.yang gi dge legs/__/bro ra 'di ru khug cig/__khu ye khu ye g.yang khug/__rgyal lo rgyal lo lha rgyal/__/bkra shis 'khyil pa'i bro 'dis/__/sde bzhi dge bcur bkra shis/__/dge legs rnam rgyal gyur cig/__ces pa'ang lcags stag snron gyi zla ba'i tshes lnga la/__pad+ma ye shes rdo rjes rang bzhin dbyings su ji ltar shar ba/__thugs rje dpal mgon mtshungs med dge rtag mchog sprul rin po ches phyag bris su mdzad pa 'dis kyang bstan pa'i rgyal mtshan phyogs bcur bsgrengs shing /__mi mthun dus kyi rgud pa 'joms pa'i rgyur bla ma rgyal ba sras bcas kyis byin gyis rlabs tu gsol/__shu b+haM/__mang+ga laM//___//