JKCL-KABUM-08-NYA-012-048

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 48, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ཀུན་མཁྱེན་བླ་མར་གསོལ་འདེབས་ཀྱི་གླུ་སྤྲིན་གྱི་ཕོ་ཉ་ཞེས་བྱ་བ་བཞུགས། ཨ་ཧོ་ཡེ། དབྱིངས་ཀ་དག་ཡེ་སྟོང་ཆེན་པོ་ཡི་མཁའ་ལ། །གདང་རང་བཞིན་འོད་གསལ་ལྔ་ལྡན་གྱི་འཇའ་གུར། །རྩལ་ཐུགས་རྗེ་རིག་པ་སྤྲུལ་པ་ཡི་སྐུ་མཆོག། ཕ་ཀུན་མཁྱེན་ཆོས་ཀྱི་རྒྱལ་པོ་ཁྱེད་མཁྱེན་ནོ། །སྐུ་ཟག་མེད་རྡུལ་བྲལ་ཡེ་ཤེས་ཀྱི་ཕུང་པོ། །རྗེ་མཚན་དཔེས་བརྒྱན་པའི་གདན་གསུམ་གྱི་དཀྱིལ་འཁོར། །དེ་ཕྱི་ན་མི་བཞུགས་རང་ཉིད་ལ་རྫོགས་སྟེ། །གཞི་མ་བཅོས་རང་བྱུང་ལྷུན་གྲུབ་ཀྱི་རྩལ་སྣང་། །དུས་ད་ལྟའི་རིག་པ་ཟང་ཀ་མ་འདི་ག། རྗེ་མཚན་མཚོན་བརྗོད་པ་ཐམས་ཅད་དང་བྲལ་བ། །རང་ཤར་པའི་སྒྱུ་འཕྲུལ་རྡོ་རྗེ་ཡི་བཀོད་པ། །རང་རིག་པའི་ངང་ནས་རང་ཞལ་ཞིག་མཇལ་བྱུང་། །དཔལ་རྫོགས་པའི་སངས་རྒྱས་དྲི་མེད་ཀྱི་འོད་ཟེར། །མི་བདག་གི་རེ་ལྟོས་ཅིག་ཆོག་ཏུ་ཞུ་ཤིང་། །སྐྱབས་གཞན་ན་མེད་པ་ཁོ་ཐག་རང་ཆོད་ནས། །བུ་ང་ཡི་བློ་སེམས་བདེ་བ་ཞིག་བྱུང་སོང་། །རྗེ་སྐུ་གསུམ་ལྷུན་གྲུབ་སྲིད་ཞི་ཡི་ཁྱབ་བདག། མཁའ་མཉམ་གྱི་འགྲོ་ཁམས་ཇི་སྙེད་ཀྱི་སྣང་ངོར། །དག་མ་དག་སྒྱུ་འཕྲུལ་རོལ་རྩེད་ནི་བསམ་ཡས། །སྤྲོ་བ་དང་བསྡུ་བའི་བྱེད་པོ་ཡི་མགོན་པོ། །ཕ་ཀུན་མཁྱེན་བླ་མ་ཀློང་ཆེན་གྱི་རབ་འབྱམས། །མཚན་ཐོས་པས་སྲིད་དང་ཞི་བ་ཡི་འཇིགས་འཕྲོག། མགོན་ཁྱེད་ནི་བདག་གི་སྙིང་དབུས་སུ་བཞུགས་ནས། །མི་ང་ཡི་གཟུང་འཛིན་འཁྲུལ་པ་འདི་གཏོར་ཏེ། །དབྱིངས་རིག་པའི་ཡེ་ཤེས་རྩལ་ཁ་ནི་རྒྱས་ནས། །རྗེ་ཁྱེད་དང་མཉམ་པར་བྱིན་གྱིས་རང་རློབས་ཤིག། མི་ང་ལ་འབྲེལ་བའི་སེམས་ཅན་གྱི་གཙོ་བྱས། །ཁམས་གསུམ་གྱི་འགྲོ་རྣམས་སྡུག་བསྔལ་ལས་གྲོལ་ཞིང་། །ནུབ་བདེ་ལྡན་ཞིང་སོགས་དག་པ་རུ་དྲོངས་ནས། །འཁོར་བ་འདི་དོང་ནས་སྤྲུགས་ནུས་ཞིག་ཞུའོ། །ཅེས་པའང་ས་གླང་རྒྱལ་ཟླའི་དུས་དྲན་མཆོད་པར་པདྨ་ཡེ་ཤེས་རྡོ་རྗེས་གསོལ་བ་བཏབ་པ་དགེའོ།། །།

[edit]

!_kun mkhyen bla mar gsol 'debs kyi glu sprin gyi pho nya zhes bya ba bzhugs/__a ho ye/__dbyings ka dag ye stong chen po yi mkha' la/__/gdang rang bzhin 'od gsal lnga ldan gyi 'ja' gur/__/rtsal thugs rje rig pa sprul pa yi sku mchog/__pha kun mkhyen chos kyi rgyal po khyed mkhyen no/__/sku zag med rdul bral ye shes kyi phung po/__/rje mtshan dpes brgyan pa'i gdan gsum gyi dkyil 'khor/__/de phyi na mi bzhugs rang nyid la rdzogs ste/__/gzhi ma bcos rang byung lhun grub kyi rtsal snang /__/dus da lta'i rig pa zang ka ma 'di ga/__rje mtshan mtshon brjod pa thams cad dang bral ba/__/rang shar pa'i sgyu 'phrul rdo rje yi bkod pa/__/rang rig pa'i ngang nas rang zhal zhig mjal byung /__/dpal rdzogs pa'i sangs rgyas dri med kyi 'od zer/__/mi bdag gi re ltos cig chog tu zhu shing /__/skyabs gzhan na med pa kho thag rang chod nas/__/bu nga yi blo sems bde ba zhig byung song /__/rje sku gsum lhun grub srid zhi yi khyab bdag/__mkha' mnyam gyi 'gro khams ji snyed kyi snang ngor/__/dag ma dag sgyu 'phrul rol rtsed ni bsam yas/__/spro ba dang bsdu ba'i byed po yi mgon po/__/pha kun mkhyen bla ma klong chen gyi rab 'byams/__/mtshan thos pas srid dang zhi ba yi 'jigs 'phrog/__mgon khyed ni bdag gi snying dbus su bzhugs nas/__/mi nga yi gzung 'dzin 'khrul pa 'di gtor te/__/dbyings rig pa'i ye shes rtsal kha ni rgyas nas/__/rje khyed dang mnyam par byin gyis rang rlobs shig/__mi nga la 'brel ba'i sems can gyi gtso byas/__/khams gsum gyi 'gro rnams sdug bsngal las grol zhing /__/nub bde ldan zhing sogs dag pa ru drongs nas/__/'khor ba 'di dong nas sprugs nus zhig zhu'o/__/ces pa'ang sa glang rgyal zla'i dus dran mchod par pad+ma ye shes rdo rjes gsol ba btab pa dge'o//___//