JKW-KABUM-22-ZA-012-060

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 60, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

60 523-525	འཆི་མེད་གཉུག་མའི་རྡོ་རྗེའི་ཐོལ་གླུ་བདེ་སྟོང་སྲོག་འཛིན། 'chi med gnyug ma'i rdo rje'i thol glu bde stong srog 'dzin Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཆི་མེད་གཉུག་མའི་རྡོ་རྗེའི་ཐོལ་གླུ་བདེ་སྟོང་སྲོག་འཛིན། འཆི་མེད་གཉུག་མའི་རྡོ་རྗེའི་ཐོལ་གླུ་བདེ་སྟོང་སྲོག་འཛིན་ཞེས་བྱ་བ། ཨེ་མ་ཧོ། ཨེ་དབྱིངས་ཐབས་མཆོག་བདེ་ཆེན་སྙིང་རྗེ་ཡི་ཀློང་ནས། །ཝཾ་ཡིག་ཤེས་རབ་སྟོང་ཉིད་ཟུང་འཇུག་ཏུ་རོལ་པས། །སྤྲོས་བྲལ་དགའ་བཞིའི་ཡེ་ཤེས་དབུ་མ་རུ་ཤར་བའི། །འཆི་མེད་འཇའ་ལུས་མཚོ་སྐྱེས་རྡོ་རྗེ་དེ་མཁྱེན་ནོ། །རང་རིག་འཁྲུལ་གྲོལ་ལས་འདས་རྩེ་གཅིག་གི་ངོ་བོར། །ཆོས་ཉིད་མངོན་སུམ་བདུད་རྩིའི་ཐིགས་ཕྲེང་གིས་རེག་པས། །གདན་གསུམ་མངོན་རྟོགས་ངོམ་པའི་རྣམ་སྣང་གི་རང་ཞལ། །ལྷན་སྐྱེས་དགའ་བའི་ཡེ་ཤེས་བདེ་ཆེན་དུ་ཤར་རོ། །མཐའ་བརྒྱད་སྤྲོས་པ་ཀུན་བྲལ་གཉུག་མ་ཡི་ངོ་བོར། །ཉམས་སྣང་གོང་འཕེལ་བདུད་རྩིའི་ཐིགས་ཕྲེང་གིས་རེག་པས། །མཉམ་སྦྱོར་མཉམ་ཉིད་འཆི་བ་མེད་པ་ཡི་ཐིག་ལེ། །རང་བྱུང་མཆོག་གི་ཡེ་ཤེས་བདེ་སྟོང་དུ་ཤར་རོ། །འཁོར་འདས་སྣང་སྲིད་རོ་གཅིག་དབུ་མ་ཡི་ངོ་བོར། །རིག་པ་ཚད་ཕེབས་བདུད་རྩིའི་ཐིགས་ཕྲེང་གིས་རེག་པས། །ཆགས་བྲལ་སོ་སོར་རྟོག་པའི་འཆི་མེད་ཀྱི་ཐིག་ལེ། །དགའ་བྲལ་མི་ཤིགས་ཆོས་ཉིད་འཁོར་ལོ་རུ་ཤར་རོ། །ཡེངས་འཁྲུལ་བྲལ་བའི་བློ་བྲལ་སྒོམ་མེད་ཀྱི་ངོ་བོར། །ཆོས་ཟད་བློ་འདས་བདུད་རྩིའི་ཐིགས་ཕྲེང་གིས་རེག་པས། །འཛིན་བྲལ་བྱ་བ་གྲུབ་པའི་འཆི་མེད་ཀྱི་ཐིག་ལེར། །ལྷན་སྐྱེས་སྐུ་བཞི་དབྱེར་མེད་སྤྲུལ་པ་རུ་ཤར་རོ། །ཀ་དག་གདོད་མའི་ངོ་བོ་བུམ་སྐུ་ཡི་སྦུབས་སུ། །ལྷུན་གྲུབ་སྣང་བཞིའི་ཚོགས་ཀུན་ཟུང་འཇུག་ཏུ་རོལ་པས། །དབྱིངས་རིག་དབྱེར་མེད་བདེ་ཆེན་གཉུག་མ་ཡི་བདུད་རྩི། །སྐྱེ་འགགས་འཕོ་འཇིགས་བྲལ་བའི་ངོ་བོ་རུ་ཤར་རོ། །འགྲོ་འོང་རྟོག་པའི་དྲི་གཞོན་དབུ་མ་རུ་བཅིལ་བས། །ཐབས་ཤེས་ཨེ་ཝཾ་མཉམ་སྦྱོར་ཟུང་འཇུག་གི་བདུད་རྩི། །རྩ་གསུམ་འཁོར་ལོ་བཞི་ཡི་ལྗོན་ཤིང་ལ་རེག་པས། །བདེ་སྟོང་འཆི་བ་མེད་པའི་འབྲས་བུ་རུ་ཤར་རོ། །ཧཾ་ཡིག་བྱང་ཆུབ་སེམས་མཆོག་འཕོ་མེད་ཀྱི་ཐིག་ལེ། །ཨ་ཤད་ཙཎྜའི་ཉི་མས་གནས་བཞི་རུ་བཞུ་བས། །ལྷན་སྐྱེས་དཔའ་བོ་ཌཱ་ཀི་ཡོངས་གྲུབ་ཀྱི་ལང་ཚོ། །བཅུ་དྲུག་འཆི་བ་མེད་པའི་རང་བཞིན་དུ་བཞད་དོ། །སྣང་སྟོང་ཟུང་འཇུག་རྡོ་རྗེ་ཕུང་པོ་ཡི་གྲོང་ཁྱེར། །གདན་གསུམ་དབྱེར་མེད་དཀྱིལ་འཁོར་ཉག་གཅིག་ཏུ་རྫོགས་པས། །ཕྱི་ནང་གཞན་གསུམ་མཉམ་སྦྱོར་རང་རིག་ཏུ་བསྡམས་ཏེ། །སྐྱེ་ཤི་གཉིས་མེད་ལྷུན་གྲུབ་ཆེན་པོ་རུ་ཤར་རོ། །དེ་སྐད་ལོངས་སྤྱོད་ཡོངས་རྫོགས་མགྲིན་པ་ཡི་རོལ་མོ། །ཐབས་ཤེས་ཨཱ་ལི་ཀཱ་ལིའི་ཡི་གེ་རུ་ཤར་བ། །གྲགས་སྟོང་སྐྱེ་མེད་རྡོ་རྗེའི་རོལ་མོ་རུ་བསྒྱུར་བས། །ལྷན་སྐྱེས་སྐུ་བཞིའི་ལམ་མཆོག་རྨད་བྱུང་དུ་གྲུབ་བོ། །དགེ་བ་དེ་ཡིས་ཕྱི་ནང་གཞན་གསུམ་གྱི་རྟོག་པ། །ཐབས་ཤེས་རོ་རྐྱང་ལམ་ནས་དྷཱུ་ཏཱི་རུ་བཅིལ་བས། །ཞུགས་གནས་ཐིམ་གསུམ་ཡོངས་རྫོགས་ལྷན་སྐྱེས་ཀྱི་ངོ་བོར། །ཉེར་ལེན་སྲིད་པའི་འཁྲུལ་འཁོར་འགགས་པ་རུ་ཤོག་ཅིག ། ༈

[edit]

'chi med gnyug ma'i rdo rje'i thol glu bde stong srog 'dzin/__ 'chi med gnyug ma'i rdo rje'i thol glu bde stong srog 'dzin zhes bya ba/__e ma ho/__e dbyings thabs mchog bde chen snying rje yi klong nas/__/waM yig shes rab stong nyid zung 'jug tu rol pas/__/spros bral dga' bzhi'i ye shes dbu ma ru shar ba'i/__/'chi med 'ja' lus mtsho skyes rdo rje de mkhyen no/__/rang rig 'khrul grol las 'das rtse gcig gi ngo bor/__/chos nyid mngon sum bdud rtsi'i thigs phreng gis reg pas/__/gdan gsum mngon rtogs ngom pa'i rnam snang gi rang zhal/__/lhan skyes dga' ba'i ye shes bde chen du shar ro/__/mtha' brgyad spros pa kun bral gnyug ma yi ngo bor/__/nyams snang gong 'phel bdud rtsi'i thigs phreng gis reg pas/__/mnyam sbyor mnyam nyid 'chi ba med pa yi thig le/__/rang byung mchog gi ye shes bde stong du shar ro/__/'khor 'das snang srid ro gcig dbu ma yi ngo bor/__/rig pa tshad phebs bdud rtsi'i thigs phreng gis reg pas/__/chags bral so sor rtog pa'i 'chi med kyi thig le/__/dga' bral mi shigs chos nyid 'khor lo ru shar ro/__/yengs 'khrul bral ba'i blo bral sgom med kyi ngo bor/__/chos zad blo 'das bdud rtsi'i thigs phreng gis reg pas/__/'dzin bral bya ba grub pa'i 'chi med kyi thig ler/__/lhan skyes sku bzhi dbyer med sprul pa ru shar ro/__/ka dag gdod ma'i ngo bo bum sku yi sbubs su/__/lhun grub snang bzhi'i tshogs kun zung 'jug tu rol pas/__/dbyings rig dbyer med bde chen gnyug ma yi bdud rtsi/__/skye 'gags 'pho 'jigs bral ba'i ngo bo ru shar ro/__/'gro 'ong rtog pa'i dri gzhon dbu ma ru bcil bas/__/thabs shes e waM mnyam sbyor zung 'jug gi bdud rtsi/__/rtsa gsum 'khor lo bzhi yi ljon shing la reg pas/_/bde stong 'chi ba med pa'i 'bras bu ru shar ro/__/haM yig byang chub sems mchog 'pho med kyi thig le/__/a shad tsaN+Da'i nyi mas gnas bzhi ru bzhu bas/__/lhan skyes dpa' bo DA ki yongs grub kyi lang tsho/__/bcu drug 'chi ba med pa'i rang bzhin du bzhad do/__/snang stong zung 'jug rdo rje phung po yi grong khyer/__/gdan gsum dbyer med dkyil 'khor nyag gcig tu rdzogs pas/__/phyi nang gzhan gsum mnyam sbyor rang rig tu bsdams te/__/skye shi gnyis med lhun grub chen po ru shar ro/__/de skad longs spyod yongs rdzogs mgrin pa yi rol mo/__/thabs shes A li kA li'i yi ge ru shar ba/__/grags stong skye med rdo rje'i rol mo ru bsgyur bas/__/lhan skyes sku bzhi'i lam mchog rmad byung du grub bo/__/dge ba de yis phyi nang gzhan gsum gyi rtog pa/___/thabs shes ro rkyang lam nas d+hU tI ru bcil bas/__/zhugs gnas thim gsum yongs rdzogs lhan skyes kyi ngo bor/__/nyer len srid pa'i 'khrul 'khor 'gags pa ru shog cig__/__!