JKW-KABUM-22-ZA-012-024

🚧 This website is under continued development. We appreciate your patience!

Previous Text Back to Volume PageNext Text

འཆི་མེད་པདྨ་ཀ་ར་ལ་གསོལ་བ་འདེབས་པ་རྡོ་རྗེའི་ཐོལ་གླུ་བདེ་སྟོང་དཔྱིད་ཀྱི་ཕོ་ཉའི་རྒྱང་གླུ།

Wylie title	'chi med pad+ma ka ra la gsol ba 'debs pa rdo rje'i thol glu bde stong dpyid kyi pho nya'i rgyang glu
Location	mkhyen brtse'i bka' 'bum Volume 22, sde tshan 12, Text 24, Pages 405-410 (Folios 31a5 to 33b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. chi med pad+ma ka ra la gsol ba 'debs pa rdo rje'i thol glu bde stong dpyid kyi pho nya'i rgyang glu. In jam dbyangs mkhyen brtse'i dbang po'i bka' 'bum, Vol. 22: 405-410. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs; Vajra Songs - rdo rje'i glu
Deity	pad+ma 'byung gnas
Colophon	།ཅེས་པའང་དུས་གསུམ་མཁྱེན་པ་ཨོ་རྒྱན་ཆེན་པོ་དེ་ཉིད་ཀྱིས་བྱིན་གྱིས་བརླབས་པའི་གྲུབ་པ་མཆོག་གི་ནགས་ཚལ་ཡེར་བ་ཟླ་བ་ཕུག་ཏུ་ས་ཟླ་ཕྱི་མའི་དཀར་ཕྱོགས་ཀྱི་རྫོགས་པ་གཉིས་༡༠པར་ཚོགས་ཀྱི་འདུ་བ་ བརྒྱ་ཕྲག་བགྱིས་པའི་རྗེས་ཐོག་ཏུ་ཉམས་དགའི་རྟོགས་པ་གླུར་ལེན་པ་པོ་ནི་གཏད་མེད་ཀུན་ཏུ་རྒྱུ་བ་རྡོ་རྗེ་ཐུགས་མཆོག་རྩལ་ཏེ་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ།།
	ces pa'ang dus gsum mkhyen pa o rgyan chen po de nyid kyis byin gyis brlabs pa'i grub pa mchog gi nags tshal yer ba zla ba phug tu sa zla phyi ma'i dkar phyogs kyi rdzogs pa gnyis 10par tshogs kyi 'du ba _brgya phrag bgyis pa'i rjes thog tu nyams dga'i rtogs pa glur len pa po ni gtad med kun tu rgyu ba rdo rje thugs mchog rtsal te de de bzhin du 'grub par byin gyis brlab tu gsol

1 Texts in this Section (sde tshan or chos tshan)

24 410-416	འཆི་མེད་པདྨ་ཀ་ར་ལ་གསོལ་བ་འདེབས་པ་རྡོ་རྗེའི་ཐོལ་གླུ་བདེ་སྟོང་དཔྱིད་ཀྱི་ཕོ་ཉའི་རྒྱང་གླུ། 'chi med pad+ma ka ra la gsol ba 'debs pa rdo rje'i thol glu bde stong dpyid kyi pho nya'i rgyang glu Supplications - gsol 'debs   ·   Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཆི་མེད་པདྨཱ་ཀཱ་ར་ལ་གསོལ་བ་འདེབས་པ་རྡོ་རྗེའི་ཐོལ་གླུ་བདེ་སྟོང་དཔྱིད་ཀྱི་ཕོ་ཉའི་རྒྱང་གླུ་རིང་མོ་ཞེས་བྱ་བ། ཨེ་མ་ཧོ། རང་རིག་གདོད་ནས་དག་པའི་རྩལ། །ཟུང་འཇུག་སྒྱུ་འཕྲུལ་དྲྭ་བའི་གར། །འཆི་མེད་པདྨ་ཐོད་ཕྲེང་ལ། །གཉིས་སུ་མེད་པས་ཕྱག་འཚལ་ལོ། །རྡོ་རྗེ་ཕུང་པོའི་གྲོང་ཁྱེར་ན། །རྩ་ཁམས་དག་པ་རབ་འབྱམས་སྒྲུབས། །ཐིག་ལེ་ཚོམ་བུར་གྲོལ་བའི་སྐུ། །ལྷུན་གྲུབ་རིག་འཛིན་ཁྱོད་ལ་འདུད། །འགྲོ་འོང་སྲོག་དང་རྩོལ་བའི་རླུང་། །ཨ་བ་དྷཱུ་ཏཱིར་ཐིམ་པ་ལས། །བརྗོད་བྲལ་བདེ་ཆེན་ནཱ་དའི་དངོས། །གསུང་གི་རྡོ་རྗེ་ཁྱོད་ལ་འདུད། །འཇུག་དང་ལྡང་བའི་རྟོག་པ་ཀུན། །རྣམ་ཐར་གསུམ་ལྡན་དབྱིངས་སུ་བཅོམ། །བསམ་གྱིས་མི་ཁྱབ་སྤྱོད་ཡུལ་ཐུགས། །ལྷན་ཅིག་སྐྱེས་པ་ཁྱོད་ལ་འདུད། །སྣང་སེམས་འཛིན་པ་མཐའ་དག་དང་། །ཕྲ་མོའི་ས་བོན་བཅོམ་པ་ལས། །གང་བཞེད་དེ་ངོར་འཆར་བ་ཡི། །ཡོན་ཏན་མཐའ་ཡས་ཁྱོད་ལ་འདུད། །ཆོས་ཀུན་སྡོམ་པ་གཅིག་པུ་ཉིད། །དུ་མའི་གར་དུ་རོལ་པ་ལས། །རྣམ་བཞིའི་ཕྲིན་ལས་སྦྱིན་མཛད་པའི། །ཧེ་རུ་ཀ་དཔལ་ཁྱོད་ལ་འདུད། །རྒྱལ་ཀུན་ཐུགས་རྗེའི་གོང་བུ་ནི། །ཁྱབ་བདག་དཔལ་ལྡན་བླ་མ་སྟེ། །དེ་ཕྱིར་སྐྱབས་གནས་འདུས་པའི་ཞལ། །རྡོ་རྗེ་སློབ་དཔོན་ཁྱོད་ལ་འདུད། །ཕུང་ཁམས་སྐྱེ་མཆེད་འདུས་བྱས་ལས། །རྣམ་གྲོལ་ཁ་སྦྱོར་མཚན་དཔེའི་དཔལ། །རབ་འབར་ཡི་དམ་ལྷ་ཡི་དངོས། །ཕྱག་རྒྱ་ཆེན་པོ་ཁྱོད་ལ་འདུད། །གནས་དང་ཡུལ་གྱི་ཌཱ་ཀི་ཀུན། །རྡུལ་བྲལ་ལྷག་མེས་ཞུ་བདེ་ཡིས། །བརྟན་པ་འཕྲོགས་ནས་རོལ་མཛད་པ། །མཁའ་འགྲོའི་ཚོགས་རྗེ་ཁྱོད་ལ་འདུད། །ཡིད་ཆོས་དབུ་མར་འཁྱུད་པ་ཡི། །འདའ་དཀའི་དམ་ཚིག་གིས་གཟིར་བས། །ཆོས་སྲུང་དྲེགས་ཚོགས་མཐའ་དག་གི །ཆེ་བའི་ཆེ་མཆོག་ཁྱོད་ལ་འདུད། །ཁྱད་པར་ཚོགས་བརྒྱད་འཁྲུལ་པའི་ཆོས། །ཡེ་ཤེས་དྲྭ་བར་བསྡོམས་པ་ལས། །བརྟུལ་ཞུགས་གྲུབ་པའི་སློབ་དཔོན་མཆོག །རྣམ་པ་བརྒྱད་དུ་སྟོན་ལ་འདུད། །ཀ་དག་ངང་ལས་མ་གཡོས་ཀྱང་། །ལྷུན་གྲུབ་སྙིང་རྗེའི་སྤྲིན་བཀོད་པས། །ཟུང་འཇུག་འཇའ་ལུས་རྡོ་རྗེའི་ཞལ། །པདྨ་ཀཱ་ར་ལ་ཕྱག་འཚལ། །སོ་སོར་རྟོག་པའི་ཡེ་ཤེས་མེས། །སྒྲིབ་གཉིས་རྒྱུར་བཅས་ཡོངས་བསྲེགས་པས། །ཐམས་ཅད་མཁྱེན་པའི་སྣང་བ་ཅན། །བློ་ལྡན་མཆོག་སྲེད་ལ་ཕྱག་འཚལ། །བདེ་སྟོང་འཕོ་མེད་གྲུབ་པའི་སྲོག །ཐུགས་ཀྱི་ཐིག་ལེར་རོ་གཅིག་པས། །ཕྱོགས་ལས་རྣམ་རྒྱལ་སྤྱོད་པ་ཅན། །ཉི་མ་འོད་ཟེར་ལ་ཕྱག་འཚལ། །བདག་ཏུ་བལྟ་བའི་ཉེར་ལེན་ཀུན། །བདག་མེད་སྙིང་རྗེ་ཁྲོས་པའི་མཐུས། །སྤྲོས་བྲལ་ཆོས་དབྱིངས་ཆེན་པོར་བཅོམ། །སེང་གེ་སྒྲ་སྒྲོགས་ལ་ཕྱག་འཚལ། །རླུང་སེམས་རྟོག་ཚོགས་རྒྱུར་བཅས་པ། །ཨེ་ཝྃ་གཉིས་སུ་མེད་པར་བསྡོམས། །སྣ་ཚོགས་ཕྱག་རྒྱའི་གཟུགས་འཆང་བ། །པདྨ་སཾ་བྷཱ་ལ་ཕྱག་འཚལ། །ཟག་པ་བྲལ་བའི་ཚུལ་ཁྲིམས་མཆོག །གཙུག་ཏོར་གདེངས་ཀར་མངོན་རྫོགས་པས། །ཕྱི་ནང་བདུད་ཚོགས་ཕམ་མཛད་པ། །ཤཱཀྱ་སེང་གེ་ལ་ཕྱག་འཚལ། །རྡུལ་མུན་སྙིང་སྟོབས་ཁམས་གསུམ་པོ། །དབུ་མའི་གྲོང་དུ་དབང་བྱས་པས། །རྗེས་ཆགས་ཞུ་བདེའི་ལང་ཚོ་ཅན། །པདྨ་རྒྱལ་པོ་ལ་ཕྱག་འཚལ། །ཀུན་བརྟགས་གཉིས་སུ་སྣང་བ་ཡི། །གཞན་དབང་གྱུར་པའི་བར་ཆད་བགེགས། །ཡོངས་གྲུབ་ཕྱག་རྒྱར་སྒྲོལ་མཛད་པ། །རྡོ་རྗེ་གྲོ་ལོད་ལ་ཕྱག་འཚལ། །མདོར་ན་སྲིད་དང་ཞི་བ་ཡི། །ཕན་བདེའི་དངོས་ཀུན་ཡོངས་སྩོལ་བ། །སྐྱབས་ཀུན་འདུས་ཞལ་མཚོ་སྐྱེས་རྗེར། །དུས་གསུམ་དུས་མེད་ཆེན་པོར་འདུད། །ཀུན་རྫོབ་དམ་ཚིག་སེམས་དཔའ་ལ། །དོན་དམ་ཡེ་ཤེས་སེམས་དཔའ་ཡིས། །བྱིན་གྱིས་བརླབས་པའི་དེ་མ་ཐག །གཟུང་འཛིན་བྲལ་བས་ཕྱག་བགྱིའོ། །བརྟན་དང་གཡོ་བའི་དངོས་པོ་ཀུན། །རང་གྲོལ་གཉུག་མར་དག་པའི་མོད། །སྣོད་བཅུད་མཆོད་པའི་སྤྲིན་ཕུང་ཆེ། །འཁོར་གསུམ་ཡང་དག་ངང་ནས་འབུལ། །རང་རིག་བདེ་གཤེགས་སྙིང་པོ་ལ། །གློ་བུར་འཁྲུལ་པའི་ནོངས་པས་སྒྲིབ། །མཉམ་རྗེས་མཐའ་ལས་འདས་པའི་དབྱིངས། །དག་པ་གཉིས་ལྡན་ཆེན་པོར་བཤགས། །ཆོས་ཉིད་བདེན་པ་མཐོང་བ་དང་། །ཚོགས་གཉིས་ཀྱིས་མཚོན་དགེ་བའི་ཚོགས། །འཕགས་དང་སོ་སྐྱེའི་ཡུལ་གྱུར་པར། །མི་ཕྱེད་དགའ་བས་རྗེས་ཡི་རངས། །གང་ཞིག་རྒྱུད་ལ་བརྟེན་པ་ཡིས། །ཆགས་བྲལ་ཐབས་མཁས་སྦྱིན་བྱེད་པ། །འགོགས་དང་ལམ་གྱི་བདེན་པའི་དབྱངས། །རྟག་པ་རྒྱུན་དུ་སྟོན་གྱུར་ཅིག །ཐོག་མར་སྐྱེ་བ་མ་མཆིས་ན། །ཐ་མར་གང་དུ་འགགས་པར་འགྱུར། །དེ་ཕྱིར་འཆི་མེད་ཡེ་ཤེས་སྐུ། །སེམས་ཀྱི་རྡོ་རྗེར་བཞུགས་པར་གསོལ། །དེ་ལྟར་བསགས་ལས་བྱུང་བ་ཡིས། །མཐའ་ཀླས་དགེ་བ་གང་ལགས་པ། །ཐོག་མ་བླ་མ་དང་བྲལ་བ། །བློ་ལ་མི་གནས་ངང་དུ་བསྔོ། །ཨེ་མ་རྒྱལ་བ་ཐམས་ཅད་ཀྱི། །ཡེ་ཤེས་ཕུང་པོའི་རང་གཟུགས་མཆོག །སྐྱབས་གཅིག་མ་ཧཱ་གུ་རུ་རྗེར། །གུས་པས་གསོལ་འདེབས་བུ་ལ་དགོངས། །དངོས་ཉམས་རྨི་ལམ་སྣང་ཆ་རུ། །མགོན་ཁྱོད་དགྱེས་པའི་ཞལ་བསྟན་ནས། །གསུང་གི་བདུད་རྩིའི་དབུགས་དབྱུང་བའི། །སྐལ་བ་བཟང་པོ་གྲུབ་པར་མཛོད། །དེ་མཐུས་དྲི་བཅས་འཁྲུལ་པའི་ལུས། །སྣང་སྟོང་ཆེན་པོར་བྱིན་བརླབས་པས། །སྐྱེ་དང་འཆི་བ་བྲལ་བ་ཡིས། །རྡོ་རྗེའི་སྐུ་མཆོག་འགྲུབ་བྱིན་རློབས། །འགྲོ་འོང་རླུང་གི་རྒྱུ་བ་ཀུན། །དག་པའི་སྔགས་ཀྱིས་བྱིན་བརླབས་པས། །འཇུག་ལྡང་བྱེད་རྩོལ་བྲལ་བ་ཡིས། །རྡོ་རྗེའི་གསུང་མཆོག་འགྲུབ་བྱིན་རློབས། །རྣམ་པར་རྟོག་པའི་སྒྱུ་མ་ཀུན། །མཁའ་ཁྱབ་རིག་པས་བྱིན་བརླབས་པས། །གཟུང་འཛིན་མཚན་མ་ལས་འདས་པའི། །རྡོ་རྗེའི་ཐུགས་མཆོག་འགྲུབ་བྱིན་རློབས། །གནས་སྐབས་བདག་གཞན་འགྲོ་བ་ལ། །རྣམ་པར་འཚེ་བའི་འཇུག་པ་ཅན། །བརྒྱད་གཉིས་འཇིགས་པའི་དཔུང་ཚོགས་ཀུན། །ཡོངས་སུ་ཞི་བར་བྱིན་གྱིས་རློབས། །ཚེ་བསོད་དཔལ་འབྱོར་སྟོབས་བཅུ་ཡི། །ཡོན་ཏན་འབད་པ་མེད་པའི་གཏེར། །ཕྱོགས་དུས་ཀུན་ཏུ་རྒྱས་པ་ཡིས། །དོན་གཉིས་འགྲུབ་པར་བྱིན་གྱིས་རློབས། །བརྟན་དང་གཡོ་བའི་དངོས་པོ་ནི། །ཡིད་ལ་མཛའ་བའི་ཉེར་སྤྱོད་ཚོགས། །དྲན་པ་ཙམ་གྱིས་རང་དབང་དུ། །འགྱུར་བའི་དགའ་སྟོན་ཐོབ་བྱིན་རློབས། །གང་ན་མི་དང་མི་མིན་གྱི། །དཔུང་པས་བཏེགས་པའི་ཉེར་འཚེའི་གཡུལ། །རྡོ་རྗེ་སྲིན་པོ་ཁྲོས་པའི་གཟིས། །ལྷག་མེད་བཅོམ་པར་བྱིན་གྱིས་རློབས། །མཐར་ཐུག་ཕྱོགས་བཅུའི་འགྲོ་བ་ཡི། །མོས་དང་སྐལ་བར་ཉེར་འཚམས་པའི། །སྣ་ཚོགས་གཟུགས་ཅན་འཆང་བ་པོ། །སྤྲུལ་པའི་སྐུ་རུ་འགྲུབ་བྱིན་རློབས། །བདེ་སྟོང་ཁ་སྦྱོར་བདུན་ལྡན་པའི། །དག་པ་དོན་དམ་སྒྱུ་མའི་ཚུལ། །འོག་མིན་ཞིང་དུ་རྣམ་རོལ་པ། །ལོངས་སྤྱོད་རྫོགས་སྐུར་བྱིན་གྱིས་རློབས། །མཁའ་ཁྱབ་མཁའ་ཡི་རྡོ་རྗེ་ནི། །ཆ་དང་བཅས་པའི་ཡུལ་ལས་གྲོལ། །ཤིན་ཏུ་རྟག་པ་མཆོག་གི་དཔྱིད། །ཆོས་ཀྱི་སྐུ་རུ་འགྲུབ་བྱིན་རློབས། །ནམ་ཞིག་ཚེ་འདིའི་སྣང་བ་ནུབ། །ཕྱི་མའི་སྣང་བ་མ་ཤར་ཚེ། །བརྗོད་བྲལ་འོད་གསལ་མཚོ་སྐྱེས་རྗེར། །སྐད་ཅིག་གྲོལ་བར་བྱིན་གྱིས་རློབས། །གལ་ཏེ་རླུང་སེམས་ཟག་པ་ཡིས། །གཞན་གྱི་དབང་དུ་གྱུར་པ་ན། །ཟུང་འཇུག་རྡོ་རྗེའི་སྐུར་ལྡངས་ནས། །མི་སློབ་གོ་འཕང་ཐོབ་བྱིན་རློབས། །དེར་ཡང་བརྟན་པ་མ་ཐོབ་ན། །དག་པའི་སྣང་བ་ལ་གོམས་པས། །ས་སྤྱོད་ཟངས་མདོག་དཔལ་རི་རུ། །ཐོགས་མེད་བགྲོད་པར་བྱིན་གྱིས་རློབས། །དེ་ཚེ་མགོན་པོ་མཆོག་ཁྱོད་ཀྱིས། །སྨིན་གྲོལ་བདུད་རྩིས་ཉེར་གསོས་པས། །རིག་འཛིན་རྣམ་བཞིའི་གསང་ལམ་དུ། །མཆོག་གི་དངོས་གྲུབ་ཐོབ་བྱིན་རློབས། །ཨ་ཧོ་གང་ཤར་རྡོ་རྗེའི་གླུས། །ཡེ་ཤེས་སྐུ་ཅན་ཁྱོད་མཆོད་པས། །སྐྱེ་ཞིང་སྐྱེ་བར་བདག་སོགས་འགྲོ། །ཁྱོད་ཞབས་རྟག་ཏུ་བསྙེན་པར་ཤོག །ཅེས་པའང་དུས་གསུམ་མཁྱེན་པ་ཨོ་རྒྱན་ཆེན་པོ་དེ་ཉིད་ཀྱིས་བྱིན་གྱིས་བརླབས་པའི་གྲུབ་པ་མཆོག་གི་ནགས་ཚལ་ཡེར་བ་ཟླ་བ་ཕུག་ཏུ་ས་ཟླ་ཕྱི་མའི་དཀར་ཕྱོགས་ཀྱི་རྫོགས་པ་གཉིས་༡༠པར་ཚོགས་ཀྱི་འདུ་བ་ བརྒྱ་ཕྲག་བགྱིས་པའི་རྗེས་ཐོག་ཏུ་ཉམས་དགའི་རྟོགས་པ་གླུར་ལེན་པ་པོ་ནི་གཏད་མེད་ཀུན་ཏུ་རྒྱུ་བ་རྡོ་རྗེ་ཐུགས་མཆོག་རྩལ་ཏེ་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ།། །། ༈

[edit]

'chi med pad+ma ka ra la gsol ba 'debs pa rdo rje'i thol glu bde stong dpyid kyi pho nya'i rgyang glu/__ 'chi med pad+mA kA ra la gsol ba 'debs pa rdo rje'i thol glu bde stong dpyid kyi pho nya'i rgyang glu ring mo zhes bya ba/__e ma ho/__rang rig gdod nas dag pa'i rtsal/__/zung 'jug sgyu 'phrul drwa ba'i gar/__/'chi med pad+ma thod phreng la/__/gnyis su med pas phyag 'tshal lo/__/rdo rje phung po'i grong khyer na/__/rtsa khams dag pa rab 'byams sgrubs/__/thig le tshom bur grol ba'i sku/__/lhun grub rig 'dzin khyod la 'dud/__/'gro 'ong srog dang rtsol ba'i rlung /__/a ba d+hU tIr thim pa las/__/brjod bral bde chen nA da'i dngos/__/gsung gi rdo rje khyod la 'dud/__/'jug dang ldang ba'i rtog pa kun/__/rnam thar gsum ldan dbyings su bcom/__/bsam gyis mi khyab spyod yul thugs/__/lhan cig skyes pa khyod la 'dud/__/snang sems 'dzin pa mtha' dag dang /__/phra mo'i sa bon bcom pa las/__/gang bzhed de ngor 'char ba yi/__/yon tan mtha' yas khyod la 'dud/__/chos kun sdom pa gcig pu nyid/__/du ma'i gar du rol pa las/__/rnam bzhi'i phrin las sbyin mdzad pa'i/__/he ru ka dpal khyod la 'dud/__/rgyal kun thugs rje'i gong bu ni/__/khyab bdag dpal ldan bla ma ste/__/de phyir skyabs gnas 'dus pa'i zhal/__/rdo rje slob dpon khyod la 'dud/__/phung khams skye mched 'dus byas las/__/rnam grol kha sbyor mtshan dpe'i dpal/__/rab 'bar yi dam lha yi dngos/__/phyag rgya chen po khyod la 'dud/__/gnas dang yul gyi DA ki kun/__/rdul bral lhag mes zhu bde yis/__/brtan pa 'phrogs nas rol mdzad pa/__/mkha' 'gro'i tshogs rje khyod la 'dud/__/yid chos dbu mar 'khyud pa yi/__/'da' dka'i dam tshig gis gzir bas/__/chos srung dregs tshogs mtha' dag gi_/che ba'i che mchog khyod la 'dud/__/khyad par tshogs brgyad 'khrul pa'i chos/__/ye shes drwa bar bsdoms pa las/__/brtul zhugs grub pa'i slob dpon mchog__/rnam pa brgyad du ston la 'dud/__/ka dag ngang las ma g.yos kyang /__/lhun grub snying rje'i sprin bkod pas/__/zung 'jug 'ja' lus rdo rje'i zhal/__/pad+ma kA ra la phyag 'tshal/__/so sor rtog pa'i ye shes mes/__/sgrib gnyis rgyur bcas yongs bsregs pas/__/thams cad mkhyen pa'i snang ba can/__/blo ldan mchog sred la phyag 'tshal/__/bde stong 'pho med grub pa'i srog__/thugs kyi thig ler ro gcig pas/__/phyogs las rnam rgyal spyod pa can/__/nyi ma 'od zer la phyag 'tshal/__/bdag tu blta ba'i nyer len kun/__/bdag med snying rje khros pa'i mthus/__/spros bral chos dbyings chen por bcom/__/seng ge sgra sgrogs la phyag 'tshal/__/rlung sems rtog tshogs rgyur bcas pa/__/e wa~M gnyis su med par bsdoms/__/sna tshogs phyag rgya'i gzugs 'chang ba/__/pad+ma saM b+hA la phyag 'tshal/__/zag pa bral ba'i tshul khrims mchog__/gtsug tor gdengs kar mngon rdzogs pas/__/phyi nang bdud tshogs pham mdzad pa/__/shAkya seng ge la phyag 'tshal/__/rdul mun snying stobs khams gsum po/__/dbu ma'i grong du dbang byas pas/__/rjes chags zhu bde'i lang tsho can/__/pad+ma rgyal po la phyag 'tshal/__/kun brtags gnyis su snang ba yi/__/gzhan dbang gyur pa'i bar chad bgegs/__/yongs grub phyag rgyar sgrol mdzad pa/__/rdo rje gro lod la phyag 'tshal/__/mdor na srid dang zhi ba yi/__/phan bde'i dngos kun yongs stsol ba/__/skyabs kun 'dus zhal mtsho skyes rjer/__/dus gsum dus med chen por 'dud/__/kun rdzob dam tshig sems dpa' la/__/don dam ye shes sems dpa' yis/__/byin gyis brlabs pa'i de ma thag__/gzung 'dzin bral bas phyag bgyi'o/__/brtan dang g.yo ba'i dngos po kun/__/rang grol gnyug mar dag pa'i mod/__/snod bcud mchod pa'i sprin phung che/__/'khor gsum yang dag ngang nas 'bul/__/rang rig bde gshegs snying po la/__/glo bur 'khrul pa'i nongs pas sgrib/__/mnyam rjes mtha' las 'das pa'i dbyings/__/dag pa gnyis ldan chen por bshags/__/chos nyid bden pa mthong ba dang /__/tshogs gnyis kyis mtshon dge ba'i tshogs/__/'phags dang so skye'i yul gyur par/__/mi phyed dga' bas rjes yi rangs/__/gang zhig rgyud la brten pa yis/__/chags bral thabs mkhas sbyin byed pa/__/'gogs dang lam gyi bden pa'i dbyangs/__/rtag pa rgyun du ston gyur cig__/thog mar skye ba ma mchis na/__/tha mar gang du 'gags par 'gyur/__/de phyir 'chi med ye shes sku/__/sems kyi rdo rjer bzhugs par gsol/__/de ltar bsags las byung ba yis/__/mtha' klas dge ba gang lags pa/__/thog ma bla ma dang bral ba/__/blo la mi gnas ngang du bsngo/__/e ma rgyal ba thams cad kyi/__/ye shes phung po'i rang gzugs mchog__/skyabs gcig ma hA gu ru rjer/__/gus pas gsol 'debs bu la dgongs/__/dngos nyams rmi lam snang cha ru/__/mgon khyod dgyes pa'i zhal bstan nas/__/gsung gi bdud rtsi'i dbugs dbyung ba'i/__/skal ba bzang po grub par mdzod/__/de mthus dri bcas 'khrul pa'i lus/__/snang stong chen por byin brlabs pas/__/skye dang 'chi ba bral ba yis/__/rdo rje'i sku mchog 'grub byin rlobs/__/'gro 'ong rlung gi rgyu ba kun/__/dag pa'i sngags kyis byin brlabs pas/__/'jug ldang byed rtsol bral ba yis/__/rdo rje'i gsung mchog 'grub byin rlobs/__/rnam par rtog pa'i sgyu ma kun/__/mkha' khyab rig pas byin brlabs pas/__/gzung 'dzin mtshan ma las 'das pa'i/__/rdo rje'i thugs mchog 'grub byin rlobs/__/gnas skabs bdag gzhan 'gro ba la/__/rnam par 'tshe ba'i 'jug pa can/__/brgyad gnyis 'jigs pa'i dpung tshogs kun/__/yongs su zhi bar byin gyis rlobs/__/tshe bsod dpal 'byor stobs bcu yi/__/yon tan 'bad pa med pa'i gter/__/phyogs dus kun tu rgyas pa yis/__/don gnyis 'grub par byin gyis rlobs/__/brtan dang g.yo ba'i dngos po ni/__/yid la mdza' ba'i nyer spyod tshogs/__/dran pa tsam gyis rang dbang du/__/'gyur ba'i dga' ston thob byin rlobs/__/gang na mi dang mi min gyi/__/dpung pas btegs pa'i nyer 'tshe'i g.yul/__/rdo rje srin po khros pa'i gzis/__/lhag med bcom par byin gyis rlobs/__/mthar thug phyogs bcu'i 'gro ba yi/__/mos dang skal bar nyer 'tshams pa'i/__/sna tshogs gzugs can 'chang ba po/__/sprul pa'i sku ru 'grub byin rlobs/__/bde stong kha sbyor bdun ldan pa'i/__/dag pa don dam sgyu ma'i tshul/__/'og min zhing du rnam rol pa/__/longs spyod rdzogs skur byin gyis rlobs/__/mkha' khyab mkha' yi rdo rje ni/__/cha dang bcas pa'i yul las grol/__/shin tu rtag pa mchog gi dpyid/__/chos kyi sku ru 'grub byin rlobs/__/nam zhig tshe 'di'i snang ba nub/__/phyi ma'i snang ba ma shar tshe/__/brjod bral 'od gsal mtsho skyes rjer/__/skad cig grol bar byin gyis rlobs/__/gal te rlung sems zag pa yis/__/gzhan gyi dbang du gyur pa na/__/zung 'jug rdo rje'i skur ldangs nas/__/mi slob go 'phang thob byin rlobs/__/der yang brtan pa ma thob na/__/dag pa'i snang ba la goms pas/__/sa spyod zangs mdog dpal ri ru/__/thogs med bgrod par byin gyis rlobs/__/de tshe mgon po mchog khyod kyis/__/smin grol bdud rtsis nyer gsos pas/__/rig 'dzin rnam bzhi'i gsang lam du/__/mchog gi dngos grub thob byin rlobs/__/a ho gang shar rdo rje'i glus/__/ye shes sku can khyod mchod pas/__/skye zhing skye bar bdag sogs 'gro/__/khyod zhabs rtag tu bsnyen par shog__/ces pa'ang dus gsum mkhyen pa o rgyan chen po de nyid kyis byin gyis brlabs pa'i grub pa mchog gi nags tshal yer ba zla ba phug tu sa zla phyi ma'i dkar phyogs kyi rdzogs pa gnyis 10par tshogs kyi 'du ba _brgya phrag bgyis pa'i rjes thog tu nyams dga'i rtogs pa glur len pa po ni gtad med kun tu rgyu ba rdo rje thugs mchog rtsal te de de bzhin du 'grub par byin gyis brlab tu gsol//__//___!_