JKW-KABUM-20-WA-001-073

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 20, sde tshan 1, Text 73, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 20: . Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

73 137-141	གྲགས་པའི་མེ་ཏོག་ཡིད་འོང་བཀྲ་ཤིས་རྡུལ། ཞེས་པའི་དབུ་ཅན། grags pa'i me tog yid 'ong bkra shis rdul/ zhes pa'i dbu can Invocation of Auspiciousness - bkra shis brjod pa   ·   Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

གྲགས་པའི་མེ་ཏོག་ཡིད་འོང་བཀྲ་ཤིས་རྡུལ། ཞེས་པའི་དབུ་ཅན། ཨོཾ་སྭསྟི་སིདྡྷཾ། གྲགས་པའི་མེ་ཏོག་ཡིད་འོང་བཀྲ་ཤིས་རྡུལ། །དཔལ་ཡོན་དམ་པས་ཡོངས་བཟུང་འཆི་མེད་ལྷས། །བྱིན་རླབས་རྒྱལ་རྔ་གསར་པ་བརྡུངས་ཙམ་གྱིས། །སྲིད་ཞིའི་དགེ་མཚན་མཐའ་དག་འཇོ་གྱུར་ཅིག །རྣམ་ཀུན་ལེགས་བྱས་བྱེ་བས་བསྐྱེད་བསྲིངས་པའི། །ཞབས་ཟུང་བཀྲ་ཤིས་འཁོར་ལོའི་མཚན་མ་ཅན། །ཡིད་སྲུབས་དཔུང་གིས་བརྫི་བ་མེད་པའི་ཕྱིར། །ཆེ་དགུས་ཐོད་ཀོས་བཏེག་པའི་ཉེ་དྲུང་དུ། །རིང་ནས་གུས་པའི་ས་ཧཱ་ཀ་རའི་ཚལ། །ཐུགས་བརྩེའི་རླན་གྱིས་སླར་ཡང་བསྐྱེད་བསྲིངས་པས། །དགེ་མཚན་འདབ་བརྒྱ་གྲོལ་བའི་མགྲིན་པ་ནས། །ཞུ་མཆིད་བཻ་ཌཱུར་རྒྱུད་མང་ཅུང་ཟད་བརྡུངས། །གང་ཚེ་བསོད་ནམས་དམ་པའི་ཆུ་གཏེར་ལས། །གཟུགས་སྐུའི་ཟླ་རིས་ཐོག་མར་ཤར་ཙམ་ནས། །མི་མཐུན་ཉེས་བརྒྱའི་མུན་པ་གཞིལ་བ་དང་། །དགེ་ལེགས་ཆུ་གཏེར་རྒྱས་པའི་དཔྱིད་དུ་གྲུབ། །འཛམ་གླིང་བསྟན་འགྲོའི་གཙུག་གི་ནོར་བུ་མཆོག །གོང་མ་མཆོད་ཡོན་ཕྲིན་ལས་གདུགས་དཀར་པོ། །སྙིང་སྟོབས་དཔུང་པས་བཟུང་བའི་དགེ་མཚན་གྱིས། །བསིལ་ལྗོངས་ཕན་བདེའི་ངལ་འཚོ་མཆོག་ཏུ་མཐོ། །ཁྱད་པར་མེ་ཏོག་མདའ་ཅན་མངོན་སུམ་པ། །སྡེ་དང་དཔུང་བཅས་ཡོངས་སུ་གཞོམ་པ་ཡིས། །ལྷ་རྒྱལ་སྭསྟི་ཀ་ཡི་དབྱངས་སྙན་པོས། །སྲིད་པའི་མཐར་ཡང་ནུབ་པ་མེད་པར་བྱས། །དེང་ཚེ་རི་གླིང་མཚོ་དང་བཅས་པ་ཡི། །ཕྱོགས་ལས་རྣམ་པར་རྒྱལ་དང་ཆབ་གཅིག་པར། །ཕུན་ཚོགས་དོན་ཀུན་གྲུབ་པའི་གཟི་བརྗིད་ཀྱིས། །སྙིགས་མའི་དུས་ཀྱང་རྫོགས་ལྡན་གཞོན་ནུར་ཤར། །མཚོ་སྐྱེས་རྡོ་རྗེའི་བྱིན་རླབས་རིག་འཛིན་རྗེའི། །ཟབ་ཆོས་མཁྱེན་པའི་སྤྱན་གྱིས་གཟིགས་པ་ན། །སྔོན་སྨོན་ལྷག་པར་སད་པའི་མོས་གུས་ཀྱི། །ཨུཏྤལ་སར་པའི་ནགས་ཀླུང་ཅིར་ཡང་དར། །དབང་རྟུལ་དྭངས་པའི་མཁར་བར་འཆེལ་བ་ཙམ། །མ་ཡིན་སྐྱེས་དང་སྦྱངས་པའི་ཤེས་རབ་ཀྱིས། །ཞིབ་མོར་དཔྱད་པ་འདི་འདྲའི་ཡ་མཚན་ལ། །བསམ་ན་ཚངས་པའི་བློ་ཡང་གཟུགས་བརྙན་ཙམ། །དེ་ཕྱིར་སྲིད་ན་མངོན་མཐོའི་བསྔགས་འོས་ཅན། །ཟླ་བྲལ་གང་ཉིད་འཚོ་གཞེས་བརྟན་པ་དང་། །ལྷན་ཅིག་བཀའ་གླེགས་ཞིབ་འཁོར་སྐྱེས་དང་བཅས། །འདུད་ལྡན་ཐལ་མོའི་རྫིང་བུར་སོན་པའི་མོད། །གུས་དང་སྤྲོ་བའི་རབ་དགའ་ཆེར་བརྟས་པས། །སྙིང་གི་ཆུ་གཏེར་བདུད་རྩིའི་རླབས་གཡོ་བ། །དང་པོའི་ས་ཡི་དགེ་མཚན་ཐོབ་པ་ལས། །གཞན་དུ་འབྱུང་བའི་གོ་སྐབས་ཇི་ལྟར་ཡོད། །འདི་ན་རྨོངས་དང་མ་རིག་མཐུས་ནོན་ཀྱང་། །བླ་མ་ལྷ་ཡི་ཐུགས་རྗེས་མ་བཏང་བས། །ཟག་ཕུང་ཉེ་ཞོའི་གདུང་བ་བྲལ་དང་བཅས། །བསྟན་འགྲོར་སྨན་པའི་བསམ་སྦྱོར་དཀར་བར་མཆིས། །མཚམས་ཞུས། སླར་ཡང་ཕན་བདེའི་འབྱུང་གནས་ཀྱི། །མཛེས་སྐུ་ཡུན་རིང་འཚོ་གཞེས་སླད། །རབ་དྭང་ཡིད་ཀྱི་རོལ་མཚོ་ལས། །ཤིས་པའི་མེ་ཏོག་ཅུང་ཟད་འཐོར། །ཤྲཱི་ཤྲཱི་ཤྲཱི་བི་ཛ་ཡནྟུ། དགེ་ལེགས་ཚོགས་གཉིས་བྱེ་བའི་རང་གཟུགས་ནི། །རྣམ་ཀུན་འཆི་མེད་གྲུབ་པའི་གཟི་འོད་ཀྱིས། །ས་གསུམ་འཇིག་རྟེན་ཀུན་ཏུ་རྒྱས་འགེངས་པའི། །ངོ་མཚར་ནམ་ཡང་ནུབ་པ་མེད་གྱུར་ཅིག །ཆོས་དང་སྲིད་ཀྱི་གཞུང་ལུགས་མཐའ་དག་ཀུན། །ཚངས་པའི་སྲས་མོའི་གླུ་རུ་འཇོ་བའི་གསུང་། །མཐའ་བཞིའི་དྲེགས་ལྡན་ཀུན་གྱི་དོ་ཀེར་རྩེར། །རྟག་ཏུ་བརྗིད་པའི་སྐལ་བཟང་ལྷུར་ལེན་ཤོག །སྒྲིབ་མེད་མཁྱེན་པའི་བཻ་ཌཱུར་མེ་ལོང་ངོགས། །ལུགས་གཉིས་རི་མོ་མཐའ་དག་ཡོངས་རྫོགས་པ། །ཆེ་དགུའི་ཡིད་ཀྱི་རྒྱལ་མཚན་ལ་བཀོད་པས། །སྡེ་བཞིའི་དུས་སྟོན་མཆོག་ཏུ་རྒྱས་གྱུར་ཅིག །བསྔགས་འོས་འཛད་པ་མེད་པའི་ཡོན་ཏན་གྱིས། །རྨད་བྱུང་ཕྲིན་ལས་ནོར་བུའི་རྔ་ཡབ་ནི། །བཟུང་བ་མེད་པར་ཕྱོགས་ཀྱི་མཐར་འགྲོ་བས། །ས་འདིར་རྫོགས་ལྡན་གསར་དུ་འཆར་བར་ཤོག །མདོར་ན་དཔལ་ལྡན་ས་ཡི་དབང་ཕྱུག་མཆོག །བསྐལ་བརྒྱར་འཚོ་གཞེས་ལེགས་མཛད་གོང་འཕེལ་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཀྱིས། །སྣང་བས་སྲིད་ཞིའི་ཁམས་ཀུན་ཁྱབ་གྱུར་ཅིག །འདིར་ཡང་རྣམ་ཀུན་མཉེས་གཤིན་པའི། །ཐུགས་རྗེའི་ཕྱག་གིས་ཡོངས་བཟུང་བས། །ཡིད་ཀྱི་ཤིང་རྟ་མངོན་འདོད་ཀྱི། །འབྲས་བུས་མཆོག་ཏུ་འགེངས་མཛད་གསོལ། །དེ་སྐད་ལེགས་སྨོན་མེ་ཏོག་གི། །ཆར་སྤྲིན་དཀར་པོ་གཡོ་བ་ལ། །གེགས་མེད་གྲུབ་པར་རྩ་གསུམ་གྱི། །བདེན་པའི་ཚིག་གིས་དགེ་གྱུར་ཅིག །ཅེས་མངོན་པར་དྭང་བའི་ཡིད་ཀྱིས་རྩེ་གཅིག་ཏུ་ཞུ་གསོལ་འདེབས་པའི་རྟེན་འབྱུང་གི་ལེགས་སྐྱེས་མཚོན་པ་ཙམ་དུ་བཀྲ་ཤིས་པའི་ལྷ་གོས་རབ་དཀར། རྒྱལ་བ་རྡོ་རྗེ་འཆང་གི་སྣང་བརྙན། བདག་ཅག་གི་དངོས་གྲུབ་ཏུ་ཐོབ་པའི་གསུང་རྡོ་རྗེ་པདྨ་སཾ་བྷཱ་ཝའི་ཞལ་ལུང་གི་གླེགས་བམ། མཉམ་མེད་ཇོ་བོ་ཆེན་པོའི་ཆོས་སྐུའི་རྟེན། རིན་ཆེན་དཀར་པོ་སྲང་འཁོར་ཟླ་བ་ཡར་ངོའི་གྲངས་ལྡན་གཙོས་བྱ་བཏང་ཆོས་རྗེ་འཇམ་དབྱངས་མཁྱེན་བརྩེའི་དབང་པོའམ། དུས་གསུམ་མཁྱེན་པ་ཨོ་རྒྱན་ཆེན་པོས་པདྨ་འོད་གསལ་མདོ་སྔགས་གླིང་པར་མིང་གི་དབང་བསྐུར་བས། གྲུབ་པའི་གནས་ཆེན་བཀྲ་ཤིས་ཟླ་གམ་དབང་ཕུག་གི་མདུན། །རི་རྒྱལ་གླང་ཆེན་འགྱིང་འདྲའི་མགུལ་ནས་རབ་བྱུང་བཅོ་ལྔ་པའི་ཐོག་མ་མེ་ཡོས་ནག་པ་ཟླ་བའི་ཚེས་༡༥བཟང་པོར་གུས་པས་ཕུལ་བ་ཇི་ལྟར་སྨོན་པའི་དོན་ཐམས་ཅད་དེ་དེ་བཞིན་དུ་འགྲུབ་པའི་དགེ་ལེགས་མཆོག་ཏུ་གྱུར་ཅིག། །། ༈

[edit]

grags pa'i me tog yid 'ong bkra shis rdul/_zhes pa'i dbu can/ oM swasti sid+d+haM/_grags pa'i me tog yid 'ong bkra shis rdul/_/dpal yon dam pas yongs bzung 'chi med lhas/_/byin rlabs rgyal rnga gsar pa brdungs tsam gyis/_/srid zhi'i dge mtshan mtha' dag 'jo gyur cig_/rnam kun legs byas bye bas bskyed bsrings pa'i/_/zhabs zung bkra shis 'khor lo'i mtshan ma can/_/yid srubs dpung gis brdzi ba med pa'i phyir/_/che dgus thod kos bteg pa'i nye drung du/_/ring nas gus pa'i sa hA ka ra'i tshal/_/thugs brtse'i rlan gyis slar yang bskyed bsrings pas/_/dge mtshan 'dab brgya grol ba'i mgrin pa nas/_/zhu mchid bai DUr rgyud mang cung zad brdungs/_/gang tshe bsod nams dam pa'i chu gter las/_/gzugs sku'i zla ris thog mar shar tsam nas/_/mi mthun nyes brgya'i mun pa gzhil ba dang /_/dge legs chu gter rgyas pa'i dpyid du grub/_/'dzam gling bstan 'gro'i gtsug gi nor bu mchog_/gong ma mchod yon phrin las gdugs dkar po/_/snying stobs dpung pas bzung ba'i dge mtshan gyis/_/bsil ljongs phan bde'i ngal 'tsho mchog tu mtho/_/khyad par me tog mda' can mngon sum pa/_/sde dang dpung bcas yongs su gzhom pa yis/_/lha rgyal swasti ka yi dbyangs snyan pos/_/srid pa'i mthar yang nub pa med par byas/_/deng tshe ri gling mtsho dang bcas pa yi/_/phyogs las rnam par rgyal dang chab gcig par/_/phun tshogs don kun grub pa'i gzi brjid kyis/_/snyigs ma'i dus kyang rdzogs ldan gzhon nur shar/_/mtsho skyes rdo rje'i byin rlabs rig 'dzin rje'i/_/zab chos mkhyen pa'i spyan gyis gzigs pa na/_/sngon smon lhag par sad pa'i mos gus kyi/_/ut+pal sar pa'i nags klung cir yang dar/_/dbang rtul dwangs pa'i mkhar bar 'chel ba tsam/_/ma yin skyes dang sbyangs pa'i shes rab kyis/_/zhib mor dpyad pa 'di 'dra'i ya mtshan la/_/bsam na tshangs pa'i blo yang gzugs brnyan tsam/_/de phyir srid na mngon mtho'i bsngags 'os can/_/zla bral gang nyid 'tsho gzhes brtan pa dang /_/lhan cig bka' glegs zhib 'khor skyes dang bcas/_/'dud ldan thal mo'i rdzing bur son pa'i mod/_/gus dang spro ba'i rab dga' cher brtas pas/_/snying gi chu gter bdud rtsi'i rlabs g.yo ba/_/dang po'i sa yi dge mtshan thob pa las/_/gzhan du 'byung ba'i go skabs ji ltar yod/_/'di na rmongs dang ma rig mthus non kyang /_/bla ma lha yi thugs rjes ma btang bas/_/zag phung nye zho'i gdung ba bral dang bcas/_/bstan 'gror sman pa'i bsam sbyor dkar bar mchis/_/mtshams zhus/_slar yang phan bde'i 'byung gnas kyi/_/mdzes sku yun ring 'tsho gzhes slad/_/rab dwang yid kyi rol mtsho las/_/shis pa'i me tog cung zad 'thor/_/shrI shrI shrI bi dza yan+tu/_dge legs tshogs gnyis bye ba'i rang gzugs ni/_/rnam kun 'chi med grub pa'i gzi 'od kyis/_/sa gsum 'jig rten kun tu rgyas 'gengs pa'i/_/ngo mtshar nam yang nub pa med gyur cig_/chos dang srid kyi gzhung lugs mtha' dag kun/_/tshangs pa'i sras mo'i glu ru 'jo ba'i gsung /_/mtha' bzhi'i dregs ldan kun gyi do ker rtser/_/rtag tu brjid pa'i skal bzang lhur len shog_/sgrib med mkhyen pa'i bai DUr me long ngogs/_/lugs gnyis ri mo mtha' dag yongs rdzogs pa/_/che dgu'i yid kyi rgyal mtshan la bkod pas/_/sde bzhi'i dus ston mchog tu rgyas gyur cig_/bsngags 'os 'dzad pa med pa'i yon tan gyis/_/rmad byung phrin las nor bu'i rnga yab ni/_/bzung ba med par phyogs kyi mthar 'gro bas/_/sa 'dir rdzogs ldan gsar du 'char bar shog_/mdor na dpal ldan sa yi dbang phyug mchog_/bskal brgyar 'tsho gzhes legs mdzad gong 'phel nas/_/don gnyis lhun gyis grub pa'i bkra shis kyis/_/snang bas srid zhi'i khams kun khyab gyur cig_/'dir yang rnam kun mnyes gshin pa'i/_/thugs rje'i phyag gis yongs bzung bas/_/yid kyi shing rta mngon 'dod kyi/_/'bras bus mchog tu 'gengs mdzad gsol/_/de skad legs smon me tog gi/_/char sprin dkar po g.yo ba la/_/gegs med grub par rtsa gsum gyi/_/bden pa'i tshig gis dge gyur cig_/ces mngon par dwang ba'i yid kyis rtse gcig tu zhu gsol 'debs pa'i rten 'byung gi legs skyes mtshon pa tsam du bkra shis pa'i lha gos rab dkar/_rgyal ba rdo rje 'chang gi snang brnyan/_bdag cag gi dngos grub tu thob pa'i gsung rdo rje pad+ma saM b+hA wa'i zhal lung gi glegs bam/_mnyam med jo bo chen po'i chos sku'i rten/_rin chen dkar po srang 'khor zla ba yar ngo'i grangs ldan gtsos bya btang chos rje 'jam dbyangs mkhyen brtse'i dbang po'am/_dus gsum mkhyen pa o rgyan chen pos pad+ma 'od gsal mdo sngags gling par ming gi dbang bskur bas/_grub pa'i gnas chen bkra shis zla gam dbang phug gi mdun/_/ri rgyal glang chen 'gying 'dra'i mgul nas rab byung bco lnga pa'i thog ma me yos nag pa zla ba'i tshes 15bzang por gus pas phul ba ji ltar smon pa'i don thams cad de de bzhin du 'grub pa'i dge legs mchog tu gyur cig/__//_!_