JKW-KABUM-20-WA-001-072

Previous Text Back to Volume PageNext Text

དགེ་ལེགས་དཔྱིད་ཀྱི་དཔལ་མོས་ཡོངས་བཟུང་བ། ཞེས་པའི་དབུ་ཅན།

Wylie title	dge legs dpyid kyi dpal mos yongs bzung ba/ zhes pa'i dbu can
Location	mkhyen brtse'i bka' 'bum Volume 20, sde tshan 1, Text 72, Pages 135-137 (Folios 68a1 to 69a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dge legs dpyid kyi dpal mos yongs bzung ba zhes pa'i dbu can. In 'jam dbyangs mkhyen brtse'i dbang po'i bka' 'bum, Vol. 20: 135-137. Khams sde dge rdzong sar dgon: Rdzong sar blo gros phun tshogs, 2020.
Genre	Invocation of Auspiciousness - bkra shis brjod pa
Colophon	།ཅེས་པའི་ཞུ་གསོལ་ཀོ་ཀི་ལ། །རྟེན་གསུམ་བཀྲ་ཤིས་པའི་ལྷ་རེག །འཆི་མེད་སྐུ་གསུང་ཐུགས་རྡོ་རྗེའི་སྣང་བརྙན། སྐུ་ཚེའི་ཚེ་རྫས། མཆན། གཤོག་རླབས་གཡོ་དང་བཅས། །རབ་མྱོས་ཆོ་འཕྲུལ་ཟླ་བ་༡ཡི། །དཀར་ཕྱོགས་གྲལ་ཚེས་དགེ་བར་ཆས། །སརྦ་དཱ་སུ་ཤྲེ་ཡོ་བྷ་བ་ཏུ།
	ces pa'i zhu gsol ko ki la/_/rten gsum bkra shis pa'i lha reg_/'chi med sku gsung thugs rdo rje'i snang brnyan/_sku tshe'i tshe rdzas/_mchan/_gshog rlabs g.yo dang bcas/_/rab myos cho 'phrul zla ba 1 yi/_/dkar phyogs gral tshes dge bar chas/_/sarba dA su shre yo b+ha ba tu

Tibetan Text

Wylie

[edit]

ཨོཾ་སྭསྟི་བིཛ་ཡནྟུ། དགེ་ལེགས་དཔྱིད་ཀྱི་དཔལ་མོས་ཡོངས་བཟུང་བ། །རིན་ཆེན་གསུམ་ཞེས་གྲགས་པའི་པདྨ་དཀར། །རྟག་ཏུ་ཁྱེད་ཀྱི་གཙུག་ན་མཛེས་འབར་བས། །ཕན་བདེའི་ངལ་འཚོ་ལྷག་པར་རྒྱས་གྱུར་ཅིག །ངེས་པར་འབྱུང་བའི་ཚུལ་ཁྲིམས་ཕུང་པོ་དང་། །བྱང་ཆུབ་སེམས་གཉིས་ལང་ཚོའི་གཟི་བརྗིད་ཀྱིས། །སྲིད་ན་ཆེར་རློམ་གཞན་དག་ཟིལ་མནན་པ། །ཕྱོགས་ལས་རྣམ་པར་རྒྱལ་བའི་ཞབས་སྟེགས་སུ། །གང་ཚུལ་རྒྱལ་སྲས་སྤྱོད་ལ་རིང་དད་པ། །ཉེ་བར་མཆིད་འོས་བདུད་རྩིའི་རླན་ཆགས་པས། །གུས་སྤྲོའི་ཨུཏྤལ་རྒྱས་པའི་འཛུམ་སྒྲོས་ལས། །ཞུ་མཆིད་སྦྲང་རྩིའི་དྲི་བསུང་ཅུང་ཟད་འཐུལ། །སྔོན་བསགས་བསོད་ནམས་དམ་པའི་རང་གཟུགས་ནི། །མཐོ་རིས་ཡོན་ཏན་བདུན་གྱིས་རབ་མཛེས་ཀྱང་། །དེ་ལ་ཁེལ་པའི་བརྟུལ་ཞུགས་རིང་བཏབ་ནས། །གཅིག་ཏུ་ཞི་བ་དམ་པར་མངོན་དུ་ཕྱོགས། །དེ་ཚེ་ཚུལ་གནས་ཁྲིམས་ཀྱིས་གཞི་བཟུང་སྟེ། །གསན་བསམ་སྒོམ་པའི་འབྱོར་པ་བརྒྱ་ཕྲག་བཅས། །འཕགས་དང་མཁས་པ་དགྱེས་པའི་རྣམ་ཐར་ཅན། །འཚོ་གཞེས་ནོར་བུའི་གཟི་འོད་འབར་བ་ནས། །བཀའ་མཆིད་དབྱངས་ཀྱི་རྒྱལ་མོའི་འགྱུར་ཁུགས་ཅན། །གནང་སྐྱེས་མནྡཱ་ར་ཡི་སྒེག་འཆང་བ། །ཡར་ཚེས་༡༤དགེ་བའི་སྔ་ཆར་འདིར་སོན་པས། །གུས་སྤྲོའི་བཀའ་དྲིན་གཟུགས་ཅན་བཞིན་དུ་གྱུར། །འདི་ན་འཁོད་པའི་དགེ་སྦྱོང་རྒན་པོ་ཡང་། །འདུ་ཕུང་རྣལ་དུ་གནས་པའི་སྐབས་བྲལ་མོད། །བསམ་གཏན་ཁང་བུར་རྣམ་དཀར་བཟླས་བརྗོད་ལ། །ཅི་ནུས་ཙམ་ཞིག་གཡར་དམ་སྙིང་པོར་བཟུང་། །མཚམས་ཞུས། སླད་མའི་ཆར་ཡང་། གང་སྐུ་བསོད་ནམས་བྱེ་བའི་ཕུང་པོ་ལ། །འཆི་མེད་པདྨཱ་ཀཱ་རས་བྱིན་བརླབས་པས། །ཕྱི་ནང་གསང་བའི་བར་ཆད་ཀུན་ཞི་ནས། །སྐུ་ཚེའི་རྒྱལ་མཚན་བསྐལ་བརྒྱར་བརྟན་གྱུར་ཅིག །ཁྱེད་གསུང་ལེགས་བཤད་བྱེ་བའི་འབྱུང་གནས་ཆེར། །འཇམ་དཔལ་གཞོན་ནུའི་མཁྱེན་པས་དགེ་མཛད་མཐུར། །ཟབ་དང་རྒྱ་ཆེའི་ཆོས་ཚུལ་མཐའ་ཡས་པས། །ཕན་བདེའི་དཔྱིད་དུ་རྟག་པར་འཇོ་གྱུར་ཅིག །གང་ཐུགས་རིང་ནས་དག་པའི་བཻཌཱུཪྻ། །ལྷ་གཅིག་དཱི་པཾ་ཀ་རའི་ཡེ་ཤེས་དང་། །མི་ཕྱེད་བྱང་ཆུབ་སེམས་གཉིས་འདོད་དགུའི་ཆར། །ས་གསུམ་འགྲོ་བའི་གདུང་སེལ་ཉིད་གྱུར་ཅིག །འདིར་ཡང་རྣམ་ཀུན་དགྱེས་པས་བཟུང་བ་དང་། །ལེགས་གསུང་བདུད་རྩིའི་རྒྱུན་བཟང་སྩལ་བ་དང་། །ཕན་ཚུན་ཆོས་ཀྱི་དགའ་སྟོན་རྨད་བྱུང་བར། །སྲིད་དང་ཞི་བའི་བཀྲ་ཤིས་སྣང་བར་མཛོད། །ཅེས་པའི་ཞུ་གསོལ་ཀོ་ཀི་ལ། །རྟེན་གསུམ་བཀྲ་ཤིས་པའི་ལྷ་རེག །འཆི་མེད་སྐུ་གསུང་ཐུགས་རྡོ་རྗེའི་སྣང་བརྙན། སྐུ་ཚེའི་ཚེ་རྫས། མཆན། གཤོག་རླབས་གཡོ་དང་བཅས། །རབ་མྱོས་ཆོ་འཕྲུལ་ཟླ་བ་༡ཡི། །དཀར་ཕྱོགས་གྲལ་ཚེས་དགེ་བར་ཆས། །སརྦ་དཱ་སུ་ཤྲེ་ཡོ་བྷ་བ་ཏུ།། །། ༈

[edit]

dge legs dpyid kyi dpal mos yongs bzung ba/__zhes pa'i dbu can/ oM swasti bidza yan+tu/_dge legs dpyid kyi dpal mos yongs bzung ba/_/rin chen gsum zhes grags pa'i pad+ma dkar/_/rtag tu khyed kyi gtsug na mdzes 'bar bas/_/phan bde'i ngal 'tsho lhag par rgyas gyur cig_/nges par 'byung ba'i tshul khrims phung po dang /_/byang chub sems gnyis lang tsho'i gzi brjid kyis/_/srid na cher rlom gzhan dag zil mnan pa/_/phyogs las rnam par rgyal ba'i zhabs stegs su/_/gang tshul rgyal sras spyod la ring dad pa/_/nye bar mchid 'os bdud rtsi'i rlan chags pas/_/gus spro'i ut+pal rgyas pa'i 'dzum sgros las/_/zhu mchid sbrang rtsi'i dri bsung cung zad 'thul/_/sngon bsags bsod nams dam pa'i rang gzugs ni/_/mtho ris yon tan bdun gyis rab mdzes kyang /_/de la khel pa'i brtul zhugs ring btab nas/_/gcig tu zhi ba dam par mngon du phyogs/_/de tshe tshul gnas khrims kyis gzhi bzung ste/_/gsan bsam sgom pa'i 'byor pa brgya phrag bcas/_/'phags dang mkhas pa dgyes pa'i rnam thar can/_/'tsho gzhes nor bu'i gzi 'od 'bar ba nas/_/bka' mchid dbyangs kyi rgyal mo'i 'gyur khugs can/_/gnang skyes man+dA ra yi sgeg 'chang ba/_/yar tshes 14dge ba'i snga char 'dir son pas/_/gus spro'i bka' drin gzugs can bzhin du gyur/_/'di na 'khod pa'i dge sbyong rgan po yang /_/'du phung rnal du gnas pa'i skabs bral mod/_/bsam gtan khang bur rnam dkar bzlas brjod la/_/ci nus tsam zhig g.yar dam snying por bzung /_/mtshams zhus/_slad ma'i char yang /_gang sku bsod nams bye ba'i phung po la/_/'chi med pad+mA kA ras byin brlabs pas/_/phyi nang gsang ba'i bar chad kun zhi nas/_/sku tshe'i rgyal mtshan bskal brgyar brtan gyur cig_/khyed gsung legs bshad bye ba'i 'byung gnas cher/_/'jam dpal gzhon nu'i mkhyen pas dge mdzad mthur/_/zab dang rgya che'i chos tshul mtha' yas pas/_/phan bde'i dpyid du rtag par 'jo gyur cig_/gang thugs ring nas dag pa'i baiDUR+Ya/_/lha gcig dI paM ka ra'i ye shes dang /_/mi phyed byang chub sems gnyis 'dod dgu'i char/_/sa gsum 'gro ba'i gdung sel nyid gyur cig_/'dir yang rnam kun dgyes pas bzung ba dang /_/legs gsung bdud rtsi'i rgyun bzang stsal ba dang /_/phan tshun chos kyi dga' ston rmad byung bar/_/srid dang zhi ba'i bkra shis snang bar mdzod/_/ces pa'i zhu gsol ko ki la/_/rten gsum bkra shis pa'i lha reg_/'chi med sku gsung thugs rdo rje'i snang brnyan/_sku tshe'i tshe rdzas/_mchan/_gshog rlabs g.yo dang bcas/_/rab myos cho 'phrul zla ba 1yi/_/dkar phyogs gral tshes dge bar chas/_/sarba dA su shre yo b+ha ba tu//__//_!_