JKW-KABUM-06-CHA-002-015

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 6, sde tshan 2, Text 15, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 6: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

1 Texts in this Section (sde tshan or chos tshan)

15 231-235	རྗེ་བཙུན་བློ་བཟང་གྲགས་པའི་ལྟ་གྲུབ་ཀྱི་བཞེད་ཚུལ་མདོ་ཙམ། rje btsun blo bzang grags pa'i lta grub kyi bzhed tshul mdo tsam Philosophical & Doctrinal Literature - lta grub skor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྗེ་བཙུན་བློ་བཟང་གྲགས་པའི་ལྟ་གྲུབ་ཀྱི་བཞེད་ཚུལ་མདོ་ཙམ། རྗེ་བཙུན་བློ་བཟང་གྲགས་པའི་ལྟ་གྲུབ་ཀྱི་བཞེད་ཚུལ་མདོ་ཙམ་བཞུགས་སོ། །ན་མོ་མཉྫུ་གྷོ་ཥཱ་ཡ། འཇམ་དཔལ་དབྱངས་ཀྱིས་གསང་བའི་མཛོད་ཆེན་པོ་བྱིན་ཅིང་། ཤིང་རྟ་ཆེན་པོའི་གཞུང་ལུགས་ལ་བརྟེན་ནས་མདོ་སྔགས་ཐམས་ཅད་གདམས་པར་ཤར་བ་རྗེ་བཙུན་བློ་བཟང་གྲགས་པའི་དཔལ་གྱིས་ལྟ་གྲུབ་ཇི་ལྟར་བཞེད་ཚུལ་རྒྱས་པ་ནི། བྱང་ཆུབ་ལམ་རིམ་ཆེན་མོ་དང་། རྩ་འཇུག་གི་རྣམ་བཤད། དྲང་ངེས་རྣམ་འབྱེད། སྲས་ཀྱི་ཐུ་བོ་གཉིས་ཀྱིས་མཛད་པའི་སྟོང་ཐུན་སྐལ་བཟང་མིག་འབྱེད་དང་། ལྟ་ཁྲིད་ལྟ་ངན་མུན་སེལ། ཁྱད་པར་སྔགས་ཀྱི་བདེ་སྟོང་སྦྱོར་ཚུལ་གསང་བ་འདུས་པའི་རིམ་ལྔ་གསལ་སྒྲོན་སོགས་ལས་ཤེས་པར་བྱ་བ་ལས་སྨོས་ཀྱིས་མི་ལངས་ཀྱང་། མདོར་བསྡུ་ན། འཁོར་འདས་ཀྱི་ཆོས་ཐམས་ཅད་རང་རང་གི་གདགས་གཞིའི་ངོས་ནས་དོན་དམ་པར་གྲུབ་པ་རྡུལ་ཙམ་ཡང་མི་དམིགས་ཀྱང་གདགས་གཞིའི་སྟེང་དུ་མིང་དང་རྟོག་པས་ཕར་བཞག་ཙམ་དེ་ཐ་སྙད་དུ་ཚད་མས་གྲུབ་ལ། ཆོས་ཐམས་ཅད་རང་རང་གི་ངོ་བོས་སྟོང་པའི་རྒྱུ་མཚན་གྱིས་ཐ་སྙད་དུ་དེ་དང་དེར་སྣང་ཞིང་བྱ་བྱེད་སོགས་འཐད་ལྡན་དུ་འཇོག་ཤེས་པས། རང་བཞིན་གྱིས་གྲུབ་པ་ཐ་སྙད་དུ་ཡང་ཁེགས་ཀྱང་། ལས་འབྲས་ལ་སོགས་པའི་བྱ་བྱེད་ཐམས་ཅད་གཞན་ངོ་ཙམ་ལ་སྐྱེལ་མི་དགོས་པར་རང་ལུགས་ལ་ཡང་ཚད་གྲུབ་ཏུ་ཁས་བླངས་པས་ཆོག་པར་མ་ཟད། རྟེན་འབྲེལ་གྱི་ཆོས་ལ་ངེས་པ་དྲངས་པ་ཉིད་ཀྱིས་རང་བཞིན་མེད་པ་ལ་ངེས་པ་ཆེར་འགྲོ་བས་སྟོང་དང་རྟེན་འབྱུང་གཅིག་གྲོགས་གཅིག་འཁྱེར་ཤེས་པ་ཞིག་སོང་ཞེས་གསུངས། གཞན་དུ་ན་སྔ་རབས་པ་དག་དོན་དམ་དཔྱོད་བྱེད་ཀྱི་རིག་པས་དཔྱད་ནས་དགག་བྱ་མ་ལུས་པ་ཁེགས་པ་དང་། བཀག་པའི་ཤུལ་དུ་ལས་འབྲས་བྱ་བྱེད་སོགས་བསྙོན་མེད་དུ་འཇོག་ཤེས་པའི་གཉིས་ཚོགས་དེ་སུས་ཀྱང་མ་རྟོགས་པས་རྣམ་པར་འཁྱམས་སོ། །དེ་ལྟར་རྟོགས་ནས་ཉམས་སུ་བླངས་པའི་ཚེ་དང་། འཇོག་སྒོམ་ཁོ་ན་མ་ཡིན་པར་སྐབས་སུ་གང་བབས་ཀྱིས་སྤེལ་བ་དང་། ཁྱད་པར་ལས་དང་པོ་པའི་དུས་སུ་ངའོ་སྙམ་པའི་འཛིན་སྟང་དམ་ཧྲིང་པ་དེ་ཡུལ་དུ་བྱས་ནས་དེ་འགོགས་བྱེད་ཀྱི་རིག་པས་བཀག་པའི་གསལ་བའི་ངར་དང་མ་བྲལ་བ་ཅིས་ཀྱང་གལ་ཆེ་སྟེ། གཞན་དུ་ན་འབེན་མ་མཐོང་བའི་མདའ་བཞིན་དུ་དོན་མེད་པར་འགྱུར་བའི་ཕྱིར་རོ། །འདི་ལྟར་གྱི་ལྟ་སྒོམ་གྱི་གནད་རྣམ་པར་དག་པ་རྙེད་ཅིང་། བསོད་ནམས་ཀྱི་ཚོགས་མཐའ་ཡས་པས་གྲོགས་བྱས་ནས་ཉོན་ཤེས་སྒྲིབ་པ་རགས་པ་སྤང་ནུས་ཀྱང་། ཕྲ་མོ་སྤང་མི་ནུས་པས་འཚང་རྒྱ་བ་ལ་ཡུན་རིང་དུ་འགོར་བས། དེས་ན་སྙིགས་དུས་ཀྱི་ཚེ་ཐུང་གཅིག་ལ་ཤེས་སྒྲིབ་མ་ལུས་པ་སྤང་ནུས་པའི་རྡོ་རྗེ་ཐེག་པ་བླ་མེད་ཀྱི་ལམ་ལ་འཇུག་ཅིང་། དེར་ཞུགས་མཁན་གྱི་གང་ཟག་ཀྱང་ཕར་ཕྱིན་ཐེག་པའི་དབང་པོ་རྣོ་ཤོས་ལས་ཀྱང་ཆེས་རྣོ་བ་ཞིག་དགོས་པས། དེ་འདྲ་བའི་གདུལ་བྱ་དེས་དབུ་མ་ཐལ་འགྱུར་བས་ཇི་ལྟར་བཀྲལ་བའི་སྟོང་པ་ཉིད་དམིགས་རྣམ་དག་རྙེད་པའི་ཚེ། བླ་མེད་ཀྱི་དབང་བསྐུར་བ་ཟབ་མོ་དང་། བསྐྱེད་པའི་རིམ་པ་སྔོན་དུ་འགྲོ་བས། རྫོགས་རིམ་རླུང་སྦྱོར་དང་གཏུམ་མོ་སོགས་ལ་བརྟེན་ནས་རླུང་དབུ་མར་ཞུགས་གནས་ཐིམ་གསུམ་བྱས་པའི་ནུས་པས། ཡིད་བདེ་བའི་ངོ་བོར་སོང་དེ་བས་སྔར་གྱི་ཡུལ་སྟོང་པ་ཉིད་དུ་རྟོགས་པ་དེ་གང་ཞིག །ཡུལ་བདེ་བ་ཆེན་པོ་དང་། ཡུལ་ཅན་སྟོང་ཉིད་རྟོགས་པའི་ལྷག་མཐོང་ཟུང་དུ་འཇུག་པ་ནི་རྒྱུད་སྡེ་རྣམས་དང་། གྲུབ་པའི་སློབ་དཔོན་རྣམས་ཀྱིས་བཞེད་པའི་བདེ་སྟོང་ཟུང་འཇུག་མ་ནོར་བ་ཡིན་པས། ཤིང་རྟ་ཆེན་པོ་ཀླུ་སྒྲུབ་ཀྱིས་ཇི་ལྟར་བཀྲལ་བའི་དོན་དཔལ་ལྡན་ཟླ་བས་གསལ་བར་མཛད་པའི་གཞུང་ལ་མ་བརྟེན་པར་སྔགས་བླ་མེད་ཀྱིས་ཀྱང་གྲུབ་པ་ཐོབ་པར་མི་སྲིད་དེ། དེའི་ཉམས་ལེན་མཐར་ཐུག་པ་ནི་བདེ་སྟོང་ཟུང་འཇུག་ཡིན་ན། གང་གི་ཡ་གྱལ་དུ་བཞག་པའི་སྟོང་པ་ཉིད་དམིགས་རྣམ་དག་རྙེད་ཚུལ་མ་བསྟན་པའི་ཕྱིར་རོ། །དེས་ན་སེམས་ཙམ་དུའང་མ་སོན་པའི་ལྟ་བས་སྔགས་བླ་མེད་ཀྱི་བདེ་བ་དང་སྦྱོར་བའི་སྟོང་ཉིད་དུ་མི་རུང་ཞིང་། དེ་མི་རུང་བས་ན་བསྐྱེད་རྫོགས་ཙམ་སྒོམ་ལོ་བྱས་ཀྱང་སྲོག་མེད་པའི་གཟུགས་བརྙན་དུ་སོང་བས་ན་ཆོས་སྐུའི་ལག་རྗེས་འཇོག་རྒྱུ་མེད་པས་གྱི་ན་ཙམ་དུ་ཟད་ཅིང་། ལྟ་བ་རྣམ་པར་དག་པ་འདིར་བསྟན་པ་བཞིན་རྙེད་ནས་བདེ་བ་ཆེན་པོའི་ཐབས་ཀྱིས་ཟིན་པ་དང་། ཁྱད་པར་དེའི་སྟེང་ཚེ་འདིར་མཚན་དཔེས་སྤྲས་པའི་རྡོ་རྗེའི་སྐུ་ཐོབ་པར་བྱེད་པ་ནི་སྒྱུ་མའི་སྐུ་སྒྲུབ་ཚུལ་ཤེས་མི་ཤེས་ཁོ་ན་ལ་རག་ལས་པས་དེའི་ངོས་འཛིན་འགོས་ལུགས་སུ་གསལ་བར་མ་གསུངས་ཤིང་། མར་ལུགས་པ་དག །ལུས་ལྷ་སྐུ་ལ་བྱས་ནས་དེ་སྣང་ལ་རང་བཞིན་མེད་པར་ངོ་སྤྲོད་བྱེད་པ་ཙམ་དུ་འདོད་ཀྱང་། འདིར་ནི་སྒྱུ་ལུས་ཀྱི་སྒྲུབ་གཞི་གཏན་ལ་དབབས་ནས་སེམས་དབེན་ལ་གནས་པའི་རྣལ་འབྱོར་པ་དེས་ནང་གི་རྐྱེན་རྡོར་བཟླས་དང་། ཕྱིའི་རྐྱེན་ཕྱག་རྒྱ་དང་སྙོམས་པར་ཞུགས་པས་ས་ཆུ་ལ་ཐིམ་པ་སོགས་ཀྱི་རིམ་པས་རླུང་སེམས་གཉིས་འཆི་རིམ་ཇི་ལྟ་བ་བཞིན་དུ་ཞུགས་པའི་སེམས་དབེན་སྟོང་པ་གསུམ་དུ་བསྒྱུར་ནས། སེམས་དབེན་མཐར་ཐུག་འོད་གསལ་ལས་ལུགས་ལྡོག་ཏུ་ལྡང་བ་ན། དེའི་བཞོན་པ་གཉུག་མའི་རླུང་དེ་ཡིས་རིགས་འདྲ་ཕྱི་མ་དེ་མ་དག་པའི་སྒྱུ་ལུས་སུ་ལྡང་ཚུལ་གསལ་བར་བཤད་དོ། །དེས་ན་ཐུན་མོང་པའི་ལམ་ངེས་འབྱུང་། བྱང་སེམས། ཡང་དག་པའི་ལྟ་བ་གསུམ་ལ་སྔ་མ་སྔ་མ་ལ་མྱོང་བ་ཐོབ་ནས་ཕྱི་མ་ཕྱི་མ་བསྒོམས་ཤིང་། ལྟ་བའི་དཔྱད་པ་ཡོངས་སུ་རྫོགས་པ་ན་སྔགས་བླ་མེད་ལ་ཞུགས་ཏེ་བདེ་སྟོང་ཟུང་འཇུག་གི་ལྷན་ཅིག་སྐྱེས་པའི་ཡེ་ཤེས་དང་། སྒྱུ་ལུས་ཀྱི་གནད་ཁྱད་པར་ཅན་ལ་བརྟེན་ནས་ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ལ་སྦྱོར་བ་ཡིན་ནོ། །ཞེས་གསུངས་སོ། །ཞེས་པའང་རང་ཉིད་ཀྱི་བརྗེད་ཐོར་ཟིན་བྲིས་སུ་བགྱིས་པ་ཤུ་བྷཾ།། །། ༈

[edit]

rje btsun blo bzang grags pa'i lta grub kyi bzhed tshul mdo tsam/ rje btsun blo bzang grags pa'i lta grub kyi bzhed tshul mdo tsam bzhugs so/__/na mo many+dzu g+ho ShA ya/__'jam dpal dbyangs kyis gsang ba'i mdzod chen po byin cing /__shing rta chen po'i gzhung lugs la brten nas mdo sngags thams cad gdams par shar ba rje btsun blo bzang grags pa'i dpal gyis lta grub ji ltar bzhed tshul rgyas pa ni/__byang chub lam rim chen mo dang /__rtsa 'jug gi rnam bshad/__drang nges rnam 'byed/__sras kyi thu bo gnyis kyis mdzad pa'i stong thun skal bzang mig 'byed dang /__lta khrid lta ngan mun sel/__khyad par sngags kyi bde stong sbyor tshul gsang ba 'dus pa'i rim lnga gsal sgron sogs las shes par bya ba las smos kyis mi langs kyang /__mdor bsdu na/__'khor 'das kyi chos thams cad rang rang gi gdags gzhi'i ngos nas don dam par grub pa rdul tsam yang mi dmigs kyang gdags gzhi'i steng du ming dang rtog pas phar bzhag tsam de tha snyad du tshad mas grub la/__chos thams cad rang rang gi ngo bos stong pa'i rgyu mtshan gyis tha snyad du de dang der snang zhing bya byed sogs 'thad ldan du 'jog shes pas/__rang bzhin gyis grub pa tha snyad du yang khegs kyang /__las 'bras la sogs pa'i bya byed thams cad gzhan ngo tsam la skyel mi dgos par rang lugs la yang tshad grub tu khas blangs pas chog par ma zad/__rten 'brel gyi chos la nges pa drangs pa nyid kyis rang bzhin med pa la nges pa cher 'gro bas stong dang rten 'byung gcig grogs gcig 'khyer shes pa zhig song zhes gsungs/__gzhan du na snga rabs pa dag don dam dpyod byed kyi rig pas dpyad nas dgag bya ma lus pa khegs pa dang /__bkag pa'i shul du las 'bras bya byed sogs bsnyon med du 'jog shes pa'i gnyis tshogs de sus kyang ma rtogs pas rnam par 'khyams so/__/de ltar rtogs nas nyams su blangs pa'i tshe dang /__'jog sgom kho na ma yin par skabs su gang babs kyis spel ba dang /__khyad par las dang po pa'i dus su nga'o snyam pa'i 'dzin stang dam hring pa de yul du byas nas de 'gogs byed kyi rig pas bkag pa'i gsal ba'i ngar dang ma bral ba cis kyang gal che ste/__gzhan du na 'ben ma mthong ba'i mda' bzhin du don med par 'gyur ba'i phyir ro/__/'di ltar gyi lta sgom gyi gnad rnam par dag pa rnyed cing /__bsod nams kyi tshogs mtha' yas pas grogs byas nas nyon shes sgrib pa rags pa spang nus kyang /__phra mo spang mi nus pas 'tshang rgya ba la yun ring du 'gor bas/__des na snyigs dus kyi tshe thung gcig la shes sgrib ma lus pa spang nus pa'i rdo rje theg pa bla med kyi lam la 'jug cing /__der zhugs mkhan gyi gang zag kyang phar phyin theg pa'i dbang po rno shos las kyang ches rno ba zhig dgos pas/__de 'dra ba'i gdul bya des dbu ma thal 'gyur bas ji ltar bkral ba'i stong pa nyid dmigs rnam dag rnyed pa'i tshe/__bla med kyi dbang bskur ba zab mo dang /__bskyed pa'i rim pa sngon du 'gro bas/__rdzogs rim rlung sbyor dang gtum mo sogs la brten nas rlung dbu mar zhugs gnas thim gsum byas pa'i nus pas/__yid bde ba'i ngo bor song de bas sngar gyi yul stong pa nyid du rtogs pa de gang zhig__/yul bde ba chen po dang /__yul can stong nyid rtogs pa'i lhag mthong zung du 'jug pa ni rgyud sde rnams dang /__grub pa'i slob dpon rnams kyis bzhed pa'i bde stong zung 'jug ma nor ba yin pas/__shing rta chen po klu sgrub kyis ji ltar bkral ba'i don dpal ldan zla bas gsal bar mdzad pa'i gzhung la ma brten par sngags bla med kyis kyang grub pa thob par mi srid de/__de'i nyams len mthar thug pa ni bde stong zung 'jug yin na/__gang gi ya gyal du bzhag pa'i stong pa nyid dmigs rnam dag rnyed tshul ma bstan pa'i phyir ro/__/des na sems tsam du'ang ma son pa'i lta bas sngags bla med kyi bde ba dang sbyor ba'i stong nyid du mi rung zhing /__de mi rung bas na bskyed rdzogs tsam sgom lo byas kyang srog med pa'i gzugs brnyan du song bas na chos sku'i lag rjes 'jog rgyu med pas gyi na tsam du zad cing /__lta ba rnam par dag pa 'dir bstan pa bzhin rnyed nas bde ba chen po'i thabs kyis zin pa dang /__khyad par de'i steng tshe 'dir mtshan dpes spras pa'i rdo rje'i sku thob par byed pa ni sgyu ma'i sku sgrub tshul shes mi shes kho na la rag las pas de'i ngos 'dzin 'gos lugs su gsal bar ma gsungs shing /__mar lugs pa dag__/lus lha sku la byas nas de snang la rang bzhin med par ngo sprod byed pa tsam du 'dod kyang /__'dir ni sgyu lus kyi sgrub gzhi gtan la dbabs nas sems dben la gnas pa'i rnal 'byor pa des nang gi rkyen rdor bzlas dang /__phyi'i rkyen phyag rgya dang snyoms par zhugs pas sa chu la thim pa sogs kyi rim pas rlung sems gnyis 'chi rim ji lta ba bzhin du zhugs pa'i sems dben stong pa gsum du bsgyur nas/__sems dben mthar thug 'od gsal las lugs ldog tu ldang ba na/__de'i bzhon pa gnyug ma'i rlung de yis rigs 'dra phyi ma de ma dag pa'i sgyu lus su ldang tshul gsal bar bshad do/__/des na thun mong pa'i lam nges 'byung /__byang sems/__yang dag pa'i lta ba gsum la snga ma snga ma la myong ba thob nas phyi ma phyi ma bsgoms shing /__lta ba'i dpyad pa yongs su rdzogs pa na sngags bla med la zhugs te bde stong zung 'jug gi lhan cig skyes pa'i ye shes dang /__sgyu lus kyi gnad khyad par can la brten nas tshe 'di nyid la phyag rgya chen po mchog gi dngos grub la sbyor ba yin no/__/zhes gsungs so/__/zhes pa'ang rang nyid kyi brjed thor zin bris su bgyis pa shu b+haM//____//__!_