JKW-KABAB-18-TSHA-046

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 18, Text 46, Pages (Folios to )
Author	[[ | ]]
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jam dbyangs mkhyen brtse'i dbang po. . In Rdzong sar 'jam dbyangs mkhyen brtse'i dbang po'i bka' babs, Vol. 18: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Karchag page	JKW-KABAB-Volume-18-TSHA-Karchag

Tibetan Text

Wylie

[edit]

རྡོ་རྗེ་སེམས་དཔའ་ལ་བརྟེན་པའི་བླ་མ་མཆོད་པའི་ཆོ་ག་དང་འབྲེལ་བའི་ཁྱད་པར་གྱི་ཕྲིན་ལས་བདེ་ཆེན་སྙིང་པོ་ཞེས་བྱ་བ་བཞུགས་སོ།། །།ན་མོ་གུ་རུ་བཛྲ་ས་ཏྭཱ་ཡ། སྟོང་ཉིད་རྡོ་རྗེར་སྲིད་ཞིའི་ཆོས། །སྡོམ་མཛད་བདེ་ཆེན་སེམས་དཔའ་ཆེ། །དཔལ་ལྡན་བླ་མ་ལ་བཏུད་ནས། །ཁྱད་པར་ཕྲིན་ལས་ཅུང་ཟད་དབྱེ། །འདི་ལ་གསུམ་སྡིག་སྒྲིབ་ཞི་བ། ཚེ་བསོད་རྒྱས་པ། མཆོག་གི་ཡེ་ཤེས་སྐྱེད་པའོ། །དང་པོ་ནི། རྫོགས་པ་ཆེན་པོ་རྡོ་རྗེ་སེམས་དཔའི་སྙིང་ཐིག་གི་རྒྱུད་ཕྱི་མ་ལས། སློབ་མའི་ལུས་ཀྱི་གནས་དྲུག་ཏུ། །རིགས་དྲུག་ས་བོན་དྲུག་བཀོད་དེ། །རང་བྱུང་ཡེ་ཤེས་བུམ་པའི་ཆུས། །སྡིག་སྒྲིབ་བག་ཆགས་སྦྱང་བར་བྱ། །ཞེས་པའི་དགོངས་དོན། སྡིག་སྒྲིབ་ནད་གདོན་བག་ཆགས་ཐམས་ཅད་ཞི་བར་བྱེད་པ་ཡེ་ཤེས་ཁྲུས་ཀྱི་ཆོ་ག་བྱེད་པར་འདོད་པས། དཀྱིལ་འཁོར་གྱི་མདུན་དུ་ཁྲུས་བུམ་བཅུད་ལྡན་ཁ་རྒྱན་མགུལ་ཆིངས་དུང་ཆོས་གཟུངས་རྡོར་དང་བཅས་པ་བཤམ། བླ་མ་མཆོད་པའི་ཕྲིན་ལས་ཀྱི་གཞུང་བསྲང༌། བསྡུ་ན་དབང་བསྐུར་གྱི་སྐབས་ལྟར་བུམ་བཟླས་བྱ། ཅུང་ཟད་རྒྱས་པར་སྤྲོ་ན། མདུན་བསྐྱེད་ཀྱི་བཟླས་པ་གྲུབ་རྗེས། བུམ་པ་ཤཱུ་ནྱ་ཏཱས་སྦྱང༌། སྟོང་པའི་ངང་ལས་པད་ཟླའི་གདན་གྱི་སྟེང༌། །བྷྲཱུྃ་ཡིག་ཡོངས་གྱུར་རིན་ཆེན་བུམ་པ་ནི། །མཚན་ཉིད་ཡོངས་རྫོགས་བདུད་རྩིས་གང་བའི་དབུས། །གླང་པོས་མཚན་པའི་རིན་ཆེན་པད་ཟླའི་ཁྲིར། །ཞེས་སོགས་ནས། བཛྲ་ཏུཥྱ་ཧོཿཞེས་པའི་བར་བླ་མ་མཆོད་པའི་ཕྲིན་ལས་ལྟར་བྱ། ཨོཾ་ཨཱཿཧཱུྃ། དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོའི་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཨོཾ་གུ་རུ་བཛྲ་ས་ཏྭ་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱའི་བར་དང༌། མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི། མི་རྟོག་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེའི་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་བསྟོད། །ཅེས་མཆོད་ཅིང་བསྟོད། རང་གི་ཐུགས་ནས་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཡི་ཐུགས་རྒྱུད་བསྐུལ། །སྙོམས་འཇུག་བྱང་ཆུབ་སེམས་ཀྱི་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། །ཅེས་བརྗོད་ཅིང་བསམས་ལ་རྩ་སྔགས་ཡི་གེ་འབྲུ་དྲུག་པ་དང༌། ཡི་གེ་བརྒྱ་པ་ཅི་ནུས་ཀྱི་མཐར། ཨ་སུ་ནྲྀ་ཏྲཱི་པྲེ་དུཿསརྦ་པཱ་པཾ་ཀླེ་ཤ་ཤཱནྟིཾ་ཀུ་རུ་སྭཱ་ཧཱ། ཞེས་བཏགས་པ་དང༌། ཁྲུས་སྔགས་ཨ་བྷི་ཥེ་ཀའང་ཅུང་ཟད་བཟླས་མཐར་མཆོད་ཅིང་བསྟོད། ཡི་གེ་བརྒྱ་པས་ནོངས་པ་བཤགས། ཨོཾ་ཨཱཿཧཱུྃ། མཆོད་ཡོན་ཕུལ་བས་བུམ་པའི་ལྷ་བདེ་སྟོང་ཆེན་པོའི་ངོ་བོར་ཞུ་བ་བུམ་ཆུ་དང་དབྱེར་མེད་དུ་གྱུར་པར་བསམ། ཕྱག་འཚལ་ནས་ཚོགས་མཆོད་བར་གྲུབ་རྗེས་བསྒྲུབ་བྱ་མདུན་དུ་འཁོད་པ་ལ། འོ། ཁྱོད་རང་གི་ཚེ་འཁོར་བ་ཐོག་མ་མེད་པ་ནས་བསགས་པའི་ལས་དང་ཉོན་མོངས་པ་དང༌། དེས་བསྐྱེད་པའི་ནད་གདོན་གྲིབ་དང་མི་གཙང་བ་ཐམས་ཅད་ཞི་ཞིང་དག་པར་བྱེད་པ་རྡོ་རྗེ་སེམས་དཔའི་ཁྲུས་ཀྱི་ཆོ་གས་རྗེས་སུ་འཛིན་པ་ལ་དམིགས་པ་འདི་བཞིན་དུ་མཛོད། རང་ཉིད་ཐ་མལ་དུ་གནས་པའི་སྤྱི་བོར་ལྷའི་ས་བོན་ཨ་དཀར་པོ། མགྲིན་པར་ལྷ་མ་ཡིན་གྱི་ས་བོན་སུ་སེར་པོ། སྙིང་གར་མིའི་ས་བོན་ནྲྀ་སྔོ་སྐྱ། ལྟེ་བར་དུད་འགྲོའི་ས་བོན་ཏྲི་ལྗང་གུ། གསང་གནས་སུ་ཡི་དྭགས་ཀྱི་ས་བོན་པྲེ་ཐལ་སྐྱ། རྐང་མཐིལ་གཉིས་སུ་དམྱལ་བའི་ས་བོན་དུཿདུད་ཀའི་རྣམ་པར་གནས་པ། སློབ་དཔོན་རྡོ་རྗེ་སེམས་དཔར་གསལ་བའི་ཕྱག་ན་བུམ་པ་བྱང་ཆུབ་སེམས་ཀྱི་བདུད་རྩིས་གང་བས་ཁྲུས་བགྱིས་པས་ཡེ་ཤེས་ཀྱི་ཆུ་རྒྱུན་སྤྱི་བོ་ནས་ཞུགས། གནས་དྲུག་གི་རིགས་དྲུག་གི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག །ནད་གདོན་སྡིག་སྒྲིབ་ཐམས་ཅད་ཞི་ཞིང༌། ཡེ་ཤེས་དྲུག་གི་སྐལ་བ་རྒྱུད་ལ་བཞག་པའི་མོས་པ་མཛོད། །འདི་ནི་བསམ་གཏན་རང་བཞིན་ཆུ། །ཉོན་མོངས་ང་རྒྱལ་སྦྱོང་བྱེད་པ། །རང་བྱུང་འོད་གསལ་ཡེ་ཤེས་ཀྱིས། །སྐུ་ལྔ་ཡོངས་རྫོགས་ཁྲུས་བགྱིའོ། །རྩ་སྔགས་དང་ཡི་གེ་བརྒྱ་པ་སྦྲེལ་བའི་མཐར། སརྦ་སུ་ར་ག་ཏེ་པཱ་པཾ་ཀླེ་ཤ་ཤཱནྟིཾ་ཀུ་རུ་སྭཱ་ཧཱ། འདི་ནི་ཚུལ་ཁྲིམས་རང་བཞིན་ཆུ། །ཉོན་མོངས་ཕྲག་དོག་སྦྱོང་བྱེད་པ། །བྱ་བ་གྲུབ་པའི་ཡེ་ཤེས་ཀྱིས། །དཔལ་ལྡན་ཕྲིན་ལས་ཁྲུས་བགྱིའོ། སརྦ་ཨ་སུ་ར་ག་ཏེ་པཱ་པཾ་ཀླེ་ཤ་ཤཱནྟིཾ་ཀུ་རུ་སྭཱ་ཧཱ། །འདི་ནི་བརྩོན་འགྲུས་རང་བཞིན་ཆུ། །ཉོན་མོངས་འདོད་ཆགས་སྦྱོང་བྱེད་པ། །སོ་སོར་རྟོག་པའི་ཡེ་ཤེས་ཀྱིས། །དཔལ་ལྡན་གསུང་གི་ཁྲུས་བགྱིའོ། སརྦ་ནྲྀ་ག་ཏེ་པཱ་པཾ་ཀླེ་ཤ་ཤཱནྟིཾ་ཀུ་རུ་སྭཱ་ཧཱ། འདི་ནི་ཤེས་རབ་རང་བཞིན་ཆུ། །ཉོན་མོངས་གཏི་མུག་སྦྱོང་བྱེད་པ། །མེ་ལོང་ལྟ་བུའི་ཡེ་ཤེས་ཀྱིས། །དཔལ་ལྡན་སྐུ་ཡི་ཁྲུས་བགྱིའོ། སརྦ་ཏིརྻ་ཀ་ག་ཏེ་པཱ་པཾ་ཀླེ་ཤ་ཤཱནྟིཾ་ཀུ་རུ་སྭཱ་ཧཱ། འདི་ནི་སྦྱིན་པའི་རང་བཞིན་ཆུ། །ཉོན་མོངས་སེར་སྣ་སྦྱོང་བྱེད་པ། །མཉམ་པ་ཉིད་ཀྱི་ཡེ་ཤེས་ཀྱིས། །དཔལ་ལྡན་ཡོན་ཏན་ཁྲུས་བགྱིའོ། སརྦ་པྲེ་ཏ་ཀ་ག་ཏེ་པཱ་པཾ་ཀླེ་ཤ་ཤཱནྟིཾ་ཀུ་རུ་སྭཱ་ཧཱ། འདི་ནི་བཟོད་པའི་རང་བཞིན་ཆུ། །ཉོན་མོངས་ཞེ་སྡང་སྦྱོང་བྱེད་པ། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་ཐུགས་ཀྱི་ཁྲུས་བགྱིའོ། སརྦ་ན་ར་ཀ་ག་ཏེ་པཱ་པཾ་ཀླེ་ཤ་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་བཀྲུ། བྱབ་པའི་སླད་དུ། བཀྲུས་པས་མ་དག་པའི་རིགས་དྲུག་ཏུ་སྐྱེ་བའི་ལས་དང༌། ཉོན་མོངས་པ། ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་དཀོན་མཆོག་གསུམ་གྱི་བདེན་པ་དང༌། སྔགས་ཀྱི་འོད་ཟེར་གྱིས་ཕྱིར་བསལ་བའི་མོས་པ་མཛོད། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་བདེན་པས་དུག་སྦྱང་ངོ༌། །སྔགས་མཐར། ཨ་སུ་ནྲྀ་པྲེ་དུཿསརྦ་པཱ་པཾ་ཀླེ་ཤ་ཨ་པ་ན་ཡེ་སྭཱ་ཧཱ། །འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སྐྱོབ་པའི་དམ་ཆོས་དུག་མི་མངའ། །དམ་ཆོས་བདེན་པས་དུག་སྦྱང་ངོ༌། །སྔགས་བརྗོད། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །འཕགས་པའི་དགེ་འདུན་དུག་མི་མངའ། །དགེ་འདུན་བདེན་པས་དུག་སྦྱང་ངོ༌། །སྔགས་བརྗོད། སྤྲོ་ན་འབྱུང་བཞི་སོ་སོས་ཀྱང་བྱབ་ཅིང༌། ས་འདི་དུག་གི་ཕ་ཡིན་ཏེ། །ས་འདི་དུག་གི་མ་ཡང་ཡིན། །སངས་རྒྱས་སྦྱིན་མའི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་བརྗོད། ཆུ་འདི་དུག་གི་ཕ་ཡིན་ཏེ། །ཆུ་འདི་དུག་གི་མ་ཡང་ཡིན། །མཱ་མ་ཀཱི་ཡི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་བརྗོད། མེ་འདི་དུག་གི་ཕ་ཡིན་ཏེ། །མེ་འདི་དུག་གི་མ་ཡང་ཡིན། །གོས་དཀར་མོ་ཡི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་བརྗོད། རླུང་འདི་དུག་གི་ཕ་ཡིན་ཏེ། །རླུང་འདི་དུག་གི་མ་ཡང་ཡིན། །དམ་ཚིག་སྒྲོལ་མའི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་གོང་ལྟར་བརྗོད། བསྲུང་བའི་སླད་དུ་རྡོ་རྗེ་སྤྱི་བོ་ལ་སོགས་པའི་གནས་དྲུག་ཏུ་བཞག་པས་རིགས་དྲུག་ཏུ་སྐྱེ་བའི་ས་བོན་བག་ཆགས་དང་བཅས་པ་དང༌། དེས་བསྐྱེད་པའི་ལས་དང༌། ཉོན་མོངས་པ་དང༌། ནད་གདོན་སྡིག་སྒྲིབ་ཐམས་ཅད་ཡེ་ཤེས་ཀྱི་མཐུས་བསྲུང་བར་བྱས་པའི་མོས་པ་མཛོད། སྟོང་ཉིད་ཡེ་ཤེས་རྡོ་རྗེ་ལ། །གང་གིས་གཞོམ་པར་མི་ནུས་ཏེ། །ལས་དང་ཉོན་མོངས་བག་ཆགས་བཅས། །དེང་ནས་ཀུན་ཏུ་སྲུང་གྱུར་ཅིག །ཅེས་དང་སྔགས་ཀྱི་མཐར། ཨ་སུ་ནྲྀ་ཏྲི་པྲེ་དུཿསརྦ་པཱ་པཾ་ཀླེ་ཤ་རཀྵ་རཀྵཿ ཞེས་བརྗོད་ལ་རྡོ་རྗེ་གནས་དྲུག་ཏུ་གྲམ་གྱི་ཚུལ་གྱིས་རེག །རྒྱལ་བར་བྱ་བའི་སླད་དུ་ཤིས་པ་བརྗོད་པས་ཀྱང་མངའ་གསོལ་བའི་མོས་པ་མཛོད། ཅེས་དང༌། བཀྲ་ཤིས་པའི་ཚིགས་བཅད་ཇི་ལྟར་རིགས་པ་བརྗོད། ཆོ་ག་ལྷག་མ་རྣམས་དཀྱུས་བཞིན། བླ་མཆོད་དམ་མ་འབྲེལ་ན། ཁྲུས་བུམ་གྱི་མདུན་དུ་མཆོད་པ་བཤམ། སྐྱབས་སེམས་སྔོན་དུ་འགྲོ་བས། རང་སྐད་ཅིག་གིས་དཔལ་རྡོ་རྗེ་སེམས་དཔའི་སྐུར་གྱུར་པར་བསམས་ལ་མཆོད་པ་བརླབ། བུམ་པ་གོང་བཞིན་བསྒྲུབས་ནས་ཁྲུས་ཀྱི་ཆོ་ག་ལ་འཇུག་ཀྱང་རུང་ངོ༌། །དེ་ལྟར་བགྱིས་པས་གནས་སྐབས་ནད་གདོན་བར་ཆད་ཐམས་ཅད་ཞི་ཞིང༌། མཐར་ཐུག་རིགས་དྲུག་ཏུ་སྐྱེ་བའི་སྒྲིབ་གཉིས་བག་ཆགས་དང་བཅས་པ་བྱང་ཞིང་དག་སྟེ་རྣམ་པར་གྲོལ་བའི་ཡེ་ཤེས་ཐོབ་པར་འགྱུར་རོ། །གཉིས་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་རྒྱས་པ་ལས། བུམ་པ་མཆོག་ནི་བཟང་པོ་ཉིད། །ཚེ་གཞག་གནས་ནི་འདི་ཡིན་ཏེ། །ཡང་དང་ཡང་དུ་དགུག་བྱ་ཞིང༌། །མངོན་སུམ་སྨིན་པར་གྱུར་པ་དང༌། །དབྱིངས་སུ་ཡང་ནི་སྦ་བར་བྱ། །རྡོ་རྗེའི་གོ་ཆ་སྲུང་བ་ཡིས། །བརྟན་ཅིང་འཁོར་ལོས་དགག་པར་བྱ། །ཞེས་རྡོ་རྗེའི་ཚེ་སྒྲུབ་པའི་རྟེན་དང༌། དགུག་པ་དང༌། བསྟིམ་པ་དང༌། སྦ་བ་དང༌། བསྲུང་བའི་ཚུལ་སོགས་རྒྱ་ཆེར་གསུངས་པའི་སྙིང་པོ་འདི་ཡིན་ཏེ། དཀྱིལ་འཁོར་གྱི་མདུན་དུ་སྙིང་པོ་ལྔའི་རྫས་ལས་གྲུབ་པའི་ཚེ་འབྲང་དང༌། གཡས་སུ་ཚེ་རིལ། གཡོན་དུ་ཚེ་ཆང༌། རང་གི་མདུན་དུ་ཚེ་འགུགས་པའི་མདའ་དར་སོགས་བཤམ། ཕྲིན་ལས་ཀྱི་གཞུང་བསྲངས་ལ་མདུན་བསྐྱེད་ཀྱི་བཟླས་པའི་མཇུག་ཏུ། ཚེའི་འབྲང་རྒྱས་ལ་དམིགས་ཏེ། ཤཱུ་ནྱ་ཏཱས་སྦྱང༌། སྟོང་པའི་ངང་ལས་འཁོར་འདས་སྙིང་པོ་ཀུན། །དྭངས་མ་འོད་ཕུང་གཅིག་ཏུ་འཁྱིལ་བའི་ཀློང༌། །གླང་པོས་མཚན་པའི་རིན་ཆེན་པད་ཟླའི་ཁྲིར། །ཞེས་སོགས་ནས། བཛྲ་ཏུཥྱ་ཧོཿ ཞེས་པའི་བར་གཞུང་ལྟར་དང༌། གོང་བཞིན་མཆོད་ཅིང་བསྟོད། རྡོ་རྗེ་སེམས་དཔའ་ཚེ་དཔག་ཏུ་མེད་པའི་ཐུགས་ཀར་ཉི་ཟླའི་གའུ་ཁ་སྦྱོར་གྱི་དབུས་སུ་མི་འགྱུར་བའི་སྲོག་ཧཱུྃ་ཡིག་ཟླ་བ་ཆུ་ཤེལ་གྱི་མདངས་ལྟར་འཚེར་བ་ལས་གཞལ་དུ་མེད་པའི་འོད་ཟེར་གྱི་ཚོགས་དང་ལྷ་མོ་མགྱོགས་མའི་སྤྲུལ་པ་ཉི་ཟེར་གྱི་རྡུལ་ལྟར་སྤྲོས་པས། རང་དང་བསྒྲུབ་བྱའི་བླ་ཚེ་ཆད་ཉམས་ཡར་བ་དང༌། འབྱུང་བ་བཞིའི་བཅུད། འཁོར་འདས་ཀྱི་དྭངས་མ་ཐམས་ཅད་འཆི་མེད་བདུད་རྩིའི་རྣམ་པར་སྤྱན་དྲངས། བདག་གི་སྤྱི་བོ་ནས་ཞུགས། སྙིང་གར་ཉི་ཟླའི་གའུའི་ནང་དུ་བྷྲཱུྃ་སྨུག་པོའི་ཁོག་པ་ནྲྀ་ཡིག་ཨ་དཀར་པོས་མཚན་པ་ལ་སིབ་སིབ་ཐིམ་པས་རྡོ་རྗེའི་སྲོག་ལ་དབང་ཐོབ། འཆི་མེད་སྒྲུབ་པའི་དམ་ཚིག་གི་རྫས་ལ་ཐིམ་པས་རྡོ་རྗེ་ཚེའི་བཅུད་ལེན་དུ་གྱུར་པར་བསམས་ལ། རྩ་སྔགས་ཀྱི་མཐར། བཛྲ་ཨཱ་ཡུ་ཥེ་ཧཱུྃ་ཨ། ཞེས་བཏགས་པ་རྩེ་གཅིག་ཏུ་བཟླ། སྤྲོ་ན་ཚེ་འགུགས་སྐུལ་བ་ནི། ཨོཾ། མགོན་པོ་སངས་རྒྱས་ཀུན་གྱི་བདག །རྡོ་རྗེ་སེམས་དཔའ་ཚེ་དཔག་མེད། །བདེ་ཆེན་སྙེམས་མར་མཉམ་སྦྱོར་བ། །སྒྱུ་འཕྲུལ་དྲྭ་བའི་དཀྱིལ་འཁོར་གཙོ། །ཐུགས་དམ་བསྐུལ་ལོ་ཐུགས་རྗེ་སྐྱེད། །ཡེ་ཤེས་ཆེན་པོའི་རོལ་པ་ལས། །ལྷ་མོ་མགྱོགས་མའི་ཕོ་ཉ་སྤྲོས། །བླ་ཚེ་ཆད་ཉམས་ཡར་བ་ཁུག །འབྱུང་བཞིའི་བཅུད་ཀྱི་དྭངས་མ་སྡུས། །ཁམས་གསུམ་སྐྱེ་འགྲོ་བའི་ཚེ་དཔལ་དངོས། །དུས་གསུམ་རྒྱལ་བའི་ཡེ་ཤེས་དབྱིག །རྣལ་འབྱོར་ལུས་ངག་ཡིད་ལ་སྟིམས། །ནད་མེད་བདེ་བའི་རྟོགས་པ་སྤོར། །རྒས་མེད་ལང་ཚོའི་གཟི་མདངས་སྐྱེད། །འཆི་མེད་ཚེ་ཡི་རིག་འཛིན་སྩོལ། །རྡོ་རྗེའི་ཚེ་མཆོག་འགྲུབ་མཛད་གསོལ། །ཅེས་བརྗོད། གང་ལྟར་ཡང་མཐར། ཚེའི་དྭངས་བཅུད་ཐམས་ཅད་སྙིང་གའི་ཚེ་རྟེན་ལ་འདུས། ཉི་ཟླའི་གའུ་སྲུབ་མེད་པ་སྔགས་ཀྱི་ཕྲེང་བས་ལུ་གུ་རྒྱུད་དུ་བཅིངས་པས་ཅིས་ཀྱང་མི་ཆོད་མི་ཤིགས་པར་གྱུར་པར་བསམས་ལ། ཨ། རིག་སྟོང་ཟུང་འཇུག་རྡོ་རྗེ་སེམས། །འོད་གསལ་གཉུག་མའི་ཐིག་ལེ་རུ། །འཆི་མེད་རྟག་པའི་ཚེ་སྦས་པས། །འཕོ་འགྱུར་མཚན་མ་དབྱིངས་སུ་ཡལ། །ཨ་ཨ་ཨ་ཞེས་བརྗོད་ཅིང་དོན་གྱི་དགོངས་པ་བསྐྱང༌། སླར་ཡང་ལུས་ཀྱི་གནས་རྣམས་སུ་རྡོ་རྗེའི་ཕྱག་རྒྱས་གོ་ཁྲབ་ཀྱི་ཚུལ་དུ་གཡོགས་ཤིང་བསྲུངས་བར་བསམས་ལ། ཨོཾ་བཛྲ་ཀཱ་ཝཱ་ཙི་བཛྲ་རཀྵ་ཧཱུྃ། ཨོཾ་སརྦ་ཏ་ཐཱ་ག་ཏ་བཛྲ་ཨ་བྷི་ཏིཥྛ་བཛྲ་ཡ་སྭཱ་ཧཱ། ཞེས་བརྟན་པར་བྱ། ཕྱག་འཚལ་ཚོགས་བསག་གི་རིམ་པ་ནས་བཟུང་དཀྱུས་ལྟར་བྱའོ། །སྒྲུབ་པ་སོགས་ཀྱི་སྐབས་ཚེའི་དངོས་གྲུབ་བླང་བ་དང་རྗེས་སུ་འབྲེལ་བར་དབང་ལེན་པར་སྤྲོ་ན། ཚོགས་ཀྱི་མཆོད་པའི་རྗེས། ཁྲུས་བྱ། མཎྜལ་ཕུལ། རྡོ་རྗེ་སེམས་དཔའ་བདེ་བ་ཆེ། །སྒྱུ་འཕྲུལ་གཙོ་བོ་དགོངས་སུ་གསོལ། །རྡོ་རྗེའི་ཚེ་དང་ཡེ་ཤེས་ཀྱི། །དབང་དང་དངོས་གྲུབ་བདག་ལ་སྩོལ། །ལན་གསུམ། ཚེ་འགུགས་བསྐུལ། ཚེ་འབྲང་སྤྱི་བོར་བླངས་ལ། ཨོཾ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་སྐུ། །དེང་འདིར་སངས་རྒྱས་ཐམས་ཅད་ཀྱི། །མི་འགྱུར་རྟག་པའི་དབང་བསྐུར་རོ། །སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ། བདུད་རྩི་མགྲིན་པར་བཞག་ལ། ཨཱཿ དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་གསུང༌། །དེང་འདིར་སངས་རྒྱས་ཐམས་ཅད་ཀྱི། །འགག་མེད་དབྱངས་ཀྱི་དབང་བསྐུར་རོ། །སྔགས་མཐར། ཝཱ་ཀ་ཨ་བྷི་ཥིཉྩ་ཨཱཿ རིལ་བུ་སྙིང་གར་བཞག་ལ། ཧཱུྃ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་ཐུགས། །དེར་འདིར་སངས་རྒྱས་ཐམས་ཅད་ཀྱི། །འཁྲུལ་མེད་ཡེ་ཤེས་དབང་བསྐུར་རོ། །སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ། རྗེས་སུ་བསྟིམ་ཞིང་རྒྱས་གདབ། ཤིས་པ་བརྗོད། སློབ་མ་རྗེས་སུ་འཛིན་ནའང་གསོལ་འདེབས་ཀྱི་རྗེས་ཡན་ལག་བདུན་གྱྀས་རྒྱུད་སྦྱང༌། ཡེ་ཤེས་དབབ་ཅིང་བསྟིམ། ཚེ་འགུགས་བསྐུལ། ཚེ་འབྲང་དང་དབང་སོགས་གོང་ལྟར་བསྐུར་རོ། །དེས་ནི་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་ཤིང༌། མཐར་ཐུག་འཆི་མེད་གྲུབ་པའི་ཡེ་ཤེས་མངོན་དུ་བྱེད་པར་འགྱུར་རོ། །གསུམ་པ་ནི། རྒྱུད་ལས། བདུད་རྩི་མཆོག་ནི་མཉམ་པའི་དབྱིངས། །བདུད་རྩིའི་དོན་ནི་སྐྱེ་ཤི་མེད། །བདུད་རྩིའི་གནས་ནི་བྱང་ཆུབ་སེམས། །བདུད་རྩིའི་ལས་ནི་རྣམ་རྟོག་སྦྱོང༌། །བདག་དཔལ་ཚོགས་ཤིང་འགྲོ་དོན་མཛད། །སྨན་གྱི་བྱིན་རླབས་བསམ་མི་ཁྱབ། །ཅེས་ངེས་པ་དང་དྲང་བའི་དོན་གྱིས་གཏན་ལ་དབབ་ཅིང་ལག་ཏུ་ལེན་པའི་ཚུལ་རྒྱ་ཆེར་གསུངས་པ་ལས། འདིར་ཤིན་ཏུ་མདོར་བསྡུས་པའི་ཚུལ་ལ་གཉིས། ཁྲོལ་བུ་དང༌། ཕྱི་མ་སྒྲུབ་པའོ། །དང་པོ་ནི། དཀྱིལ་འཁོར་གྱི་དབུས་སུ་བྷནྡྷ་མཚན་ལྡན་གྱི་སྣོད་བཟང་པོར། དྲི་ཆེན་གླང་ཤ་ཛཱ་ཏི་ཤར། །ཤ་ཆེན་རྟག་ཤ་ཀ་ཀོ་ལྷོ། །པདྨ་རྨ་བྱ་ལི་ཤི་ནུབ། །དྲི་ཆུ་ཁྱུང་ཤ་གུར་གུམ་བྱང༌། །བྱང་སེམས་སེང་ཤ་བཟང་དྲུག་དབུས། །ཞེས་པའི་ཤ་དང་བདུད་རྩི་དངོས་སམ་ཕབས་གཏའ་སོ་སོའི་སྐྱོབས་དང་བཅས་པ་དང༌། འབྲས་བུ་གསུམ། ཁ་ཆེ། ནཱ་གི །གླ་རྩི། ཙནྡན་དཀར་པོ་སོགས་དྲི་རོ་དང་ཁ་དོག་བཟང་པོ་གཙོ་བོར་གྱུར་པའི་སྨན་སྣ་རྣམས་བཞག །གཟུངས་ཐག་བཏགས། མཆོད་གཏོར་སོགས་འདྲ། ཕྲིན་ལས་ཀྱི་གཞུང་དཀྱུས་ལྟར་བསྲངས་ལ། ཞབས་གཉིས་སེམས་སྐྱིལ་པད་ཟླའི་གདན་ལ་བཞུགས། །ཞེས་པའི་མཚམས། མདུན་དུ་རླུང་མེ་ཐོད་སྒྱེད་ལ་གནས་པའི། །རང་བྱུང་བདེ་ཆེན་བྷནྡྷའི་གཞལ་མེད་ཁང༌། །ཡངས་ཤིང་རྒྱ་ཆེ་མཚན་ཉིད་ཕུན་ཚོགས་ནང༌། །གོ་ཀུ་ད་ཧ་ན་ལས་ཤ་ལྔ་དང༌། །བི་མུ་མར་ཤུ་ལས་བདུད་རྩི་ལྔ། །ཧཱུྃ་ཨོཾ་སྭཱ་མྃ་ཨྃ་དང་ཧཱ་ཡིག་དང༌། །མཱུྃ་ལཱྃ་མཱྃ་པཱྃ་ཏཱྃ་གྱིས་མཚན་པ་ལས། །འོད་འཕྲོས་རླུང་གཡོས་མེ་སྦར་རྫས་རྣམས་ཞུ། །བྱང་ཆུབ་སེམས་ཀྱི་བདུད་རྩིར་འཁྱིལ་བའི་དབུས། །གླང་པོས་མཚན་པའི་རིན་ཆེན་པད་ཟླའི་ཁྲིར། །བརྟན་གཡོའི་དྭངས་མ་མི་ཤིགས་ཐིག་ལེའི་གཟུགས། །རིགས་ཀུན་ཁྱབ་བདག་དཔལ་ལྡན་བླ་མ་དང༌། །དབྱེར་མེད་གསང་ཆེན་རིགས་གཅིག་བདེ་བ་ཆེ། །དང་པོའི་མགོན་པོ་རྡོ་རྗེ་མི་བསྐྱོད་པ། །སྐུ་མདོག་དཀར་གསལ་སོགས་ནས། །བཛྲ་ཏུཥྱ་ཧོཿཞེས་པའི་བར་གཞུང་ལྟར་དང༌། མཆོད་བསྟོད་རྒྱས་བསྡུས་གང་རིགས་བྱ། སྨན་སྲུང་སྤྱན་འདྲེན་པ་ནི། དར་སྣས་གཡབ་ཅིང་སྤོས་དཀར་གྱི་དུད་པས་བདུགས་ལ། ཧཱུྃ། རྩི་དང་སྨན་གྱི་བདག་པོ་དང༌། །རྟགས་ལྡན་རིག་འཛིན་བྲན་མོ་དག །རོལ་མོའི་ཆ་བྱད་མང་པོས་འབོད། །འདིར་གཤེགས་བཅུད་ལེན་དངོས་གྲུབ་སྩོལ། །ཞེས་རོལ་མོའི་སྒྲ་དང་བཅས་སྤྱན་དྲངས་པས་སྨན་གྱི་ཕོ་བྲང་གི་ནམ་མཁར་སྤྲིན་གཏིབས་པ་ལྟར་བཞུགས་པ་ལ་རྟོག་པ་བསལ་བའི་ཕྱིར་བདུད་རྩི་འཐོར་ཞིང༌། ཨོཾ་ཨཱཿཧཱུྃ། ཧཱུྃ། ཚངས་དང་དྲང་སྲོང་གཙང་མ་ཟ། །ལྷ་ཀླུ་བྲམ་ཟེ་གཙང་མ་ཟ། །དེ་དག་གྲོལ་བར་ངས་མ་བཤད། །བདུད་རྩི་དག་པ་ཡེ་ཤེས་ལྔ། །རིགས་ལྔ་སྐུ་ལྔ་ལྷུན་གྲུབ་ཡིན། །གཉིས་མེད་རྟོགས་པའི་ཐབས་མཁས་ཀྱིས། །གཙང་རྨེ་མེད་པར་ཀུན་སྤྱོད་ན། །དེ་དག་གྲོལ་བར་ངས་བཤད་དོ། །ཞེས་བརྗོད་པས་རྟོག་པ་དག་ནས་དངོས་གྲུབ་སྩོལ་བ་ལ་དགྱེས་པར་བསམ། གཟུངས་ཐག་ནས་བཟུང་ལ། བདག་གི་ཐུགས་ནས་རྡོ་རྗེའི་སྔགས་ཀྱི་འོད། །གཟུངས་ཐག་ལ་འཁྲིལ་མདུན་བསྐྱེད་ཐུགས་རྒྱུད་བསྐུལ། །འོད་འཕྲོས་སྲིད་ཞིའི་དངས་བཅུད་ཞལ་དུ་བཀུག །སྦྱོར་མཚམས་ནས་བབས་དམ་ཚིག་རྫས་ལ་ཐིམ། །ཞེས་བརྗོད་ཅིང་བསམས་ལ་རྩ་སྔགས་ཅུང་ཟད་དང༌། ཨོཾ་སརྦ་པཉྩ་ཨ་མྲྀ་ཏ་ར་ས་ཡཱ་ན་ཏ་ན་ཛ་ཡ་གུ་ཧྱ་སིདྡྷི་ཧཱུྃ་ཧྲཱིཿཋཱ༔ ཞེས་བཟླ། སྤྲོ་ན་ཡན་ལག་བདུན་པའང་བྱ། གང་ལྟར་ཡང་ཚོགས་ཀྱི་འཁོར་ལོས་མཆོད། དྲག་སྔགས་བཟླ་ཞིང་ཐུན་བྲབས་པས་བལྟ་ཉན་གྱི་ཉུལ་ལེ་ཚར་བཅད། བྱིན་འབེབས་རྒྱས་པའམ། ཨོཾ་ཧཱུྃ་ཨ་ལ་ལ་ཧོཿ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ༔ ཧཱུྃ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་བརླབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཅེས་དང་རྩ་སྔགས་བཟླ་ཞིང་སྤོས་རོལ་དང་བཅས་པས་བྱིན་དབབ། ཧཱུྃ་ཧཱུྃ་ཧཱུྃ་ཧཱུྃ་གིས་བྱིན་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་སྒྲུབ་པའི་རྫས་ལ་ཐིམ་པས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་གྱུར་པར་བསམ། རྗེས་ཆོག་གཞུང་ལྟར་ལ། ཉེར་བསྡུའི་མལ་དུ་བརྟན་བཞུགས་བྱ། དེ་ལྟར་ཐུན་བཞིའམ་དྲུག་ཏུ་ཞག་གྲངས་ཅི་རིགས་སུ་བསྒྲུབས་པའི་མཐར། ཐུན་ཐ་མ་ལ་རྗེས་ཆོག་གི་བཤགས་པའི་རྗེས། མདུན་གྱི་ལྷ་ཡབ་ཡུམ་བྱང་ཆུབ་སེམས་ཀྱི་བདུད་རྩིར་ཞུ་བ་དམ་ཚིག་གི་རྫས་དང་རོ་གཅིག་ཏུ་གྱུར་པར་བསམ་མོ། །གཉིས་པ་ནི། ཡུམ་དུ་བཏགས་པའི་ལས་ཀྱི་རྡོ་རྗེས་སྨན་སྣོད་བླངས་ཏེ་སློབ་དཔོན་ལ་ཕུལ། ཤར་དུ་རྡོ་རྗེའི་གཏུན་དུ་འཐག་ཅིང་སྔགས་ཀྱི་མཐར་ཨོཾ་ཨོཾ་ཨོཾ་ཞེས་བརྗོད་པས་སྦྱང༌། ལྷོར་བཙག་ཅིང་སྔགས་མཐར་ཨཱཿཨཱཿཨཱཿཞེས་བཏགས་པས་སྤེལ། ནུབ་ཏུ་ཆང་སྣ། ཆུ་སྣ། འོ་མ། རིན་པོ་ཆེའི་ཆུས་སྦོལ་ཞིང༌། སྔགས་མཐར་ཧཱུྃ་ཧཱུྃ་ཧཱུྃ་ཞེས་བརྗོད་པས་བསྒྱུར། བྱང་དུ་དམ་རྫས་སྔ་མའི་རྒྱུན་དང་ཕབས་ཀྱིས་བྲན་ཅིང་འབྲེས་པར་དཀྲུགས་ལ་སྔགས་མཐར་ཧོཿཧོཿཧོཿཞེས་པས་དབྱེར་མེད་དུ་བྱ། དེ་ནས་དྲིལ་བུས་གཞལ་ཞིང་སྣོད་དུ་བླུགས། ཅོད་པན་དང་རྡོ་རྗེ་དྲིལ་གྱིས་བརྒྱན་ཅིང་དཀྱིལ་འཁོར་དབུས་སུ་ལྡིང་ཁྲིའི་ཁར་བཞག །འོག་ཏུ་དྲོད་འབེབས་ཀྱི་མར་མེ་སྦར། གཟུངས་ཐག་བཏགས། འབྱོར་ན་གདུགས་འཕན་རྒྱལ་མཚན་ཚར་དུ་དངར་བས་བརྒྱན། སྒྲུབ་ཚུལ་གོང་དུ་སྨོས་པ་ཇི་ལྟ་བ་ལས་བཟླས་པའི་སྐབས་སུ། བདག་མདུན་ཐུགས་ཀར་ཟླ་སྟེང་ཧཱུྃ་ཡིག་མཐར། །སྔགས་ཀྱི་ཕྲེང་བས་བསྐོར་ལས་འོད་ཟེར་འཕྲོས། །རླུང་གཡོས་མེ་སྦར་ཐོད་པའི་རྫས་རྣམས་ཞུ། །ཟེར་རླངས་རྡོར་སེམས་ཞི་ཁྲོའི་ལྷ་ཚོགས་ལ། །ཕོག་པས་སྙོམས་འཇུག་བདེ་བའི་འོད་དང་སྒྲས། །འཁོར་འདས་དྭངས་བཅུད་ཀུན་བསྡུས་ཞལ་དུ་ཞུགས། །སྐུ་ཡི་དབྱིབས་བརྒྱུད་བདེ་སྟོང་སྦྱོར་མཚམས་ནས། །ཡེ་ཤེས་བདུད་རྩི་མུ་ཏིག་དཀར་པོའི་མདོག །ཆར་ལྟར་བབས་ནས་སྒྲུབ་པའི་རྫས་ལ་ཐིམ། །མི་འགྱུར་འཆི་མེད་རྟག་པའི་རྡོ་རྗེ་སེམས། །མཐོང་ཐོས་དྲན་རེག་མྱོང་གྲོལ་རྫས་ཀྱི་ཚུལ། །བདེ་ཆེན་ཐིག་ལེ་གཅིག་ཏུ་འཁྱིལ་བར་གྱུར། །ཅེས་བརྗོད་ཅིང་བསམས་ལ་གཟུངས་ཐག་བཟུང་སྟེ། ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཧཱུྃ་ཧྲཱིཿཋ༔ ཞེས་ཆིག་སྒྲིལ་དུ་བཟླ། ཐུན་བསྡུ་བ་ན་དབྱངས་གསལ་རྟེན་སྙིང་དང་མཆོད་བསྟོད་བྱ། ཡན་ལག་བདུན་པ། སྐོང་བ། ཚོགས་མཆོད་སོགས་རྒྱས་པར་བྱ་ཞིང༌། རྗེས་མཆོག་གི་ནོངས་པ་བཤགས་པའི་རྗེས་སུ། ཧཱུྃ་ཧཱུྃ་ཧཱུྃ་ཞེས་བརྗོད་པས། མདུན་གྱི་བཅོམ་ལྡན་འདས་དཔལ་རྡོ་རྗེ་སེམས་དཔའ་ཡབ་ཡུམ་ལུས་དཀྱིལ་གྱི་ལྷ་དང་བཅས་པ་སྙོམས་པར་ཞུགས་པའི་བདེ་བ་ཆེན་པོས་འོད་དུ་ཞུ་ནས་དྭངས་མ་མི་ཤིགས་པའི་ཐིག་ལེ་དམ་ཚིག་གི་བདུད་རྩི་དང་དབྱེར་མེད་དུ་འཁྱིལ་བར་གྱུར་པར་བསམས་ལ་རྟེན་འབྲེལ་སྙིང་པོ་བརྗོད་ཅིང་མེ་ཏོག་འཐོར། བསྔོ་སྨོན་བཀྲ་ཤིས་གཞུང་ལྟར་དང༌། སྐབས་ཇི་ལྟར་རིགས་པར་ཉུལ་ལེ་འདུལ་བ་དང༌། བྱིན་དབབ་པ་སོགས་འདྲའོ། །དེ་ལས་འཕྲོས་པའི་དམིགས་རིམ་བྱེ་བྲག་པ་མང་དུ་ཡོད་ཀྱང་སྤྲོས་པ་ཉེར་བསྡུའི་སྐབས་སུ་འདི་ཙམ་གྱིས་ཆོག་པར་རྒྱུད་དང་མན་ངག་གི་གཞུང་ལས་གསལ་བས། ཇི་སྐད་བཤད་པ་བཞིན་ཐུན་བཞིའམ་དྲུག་ཏུ་འབད་པས་འོད་དང༌། སྒྲ་དང༌། དྲི་སོགས་དངོས་གྲུབ་ཀྱི་མཚན་རྟགས་མཐོང་བའམ། བདུན་ཕྲག་སོགས་དུས་ཀྱི་ངེས་པ་རྫོགས་ནས་ནངས་པར་སྔ་བར་དངོས་གྲུབ་ལེན་པའི་ཚུལ་ནི། གོང་ལྟར་ཕྲིན་ལས་ཀྱི་གཞུང་བསྲང༌། རྗེས་ཆོག་གི་མཆོད་བསྟོད་ནོངས་བཤགས་ཀྱི་རྗེས། ཨོཾ་ཨཱཿཧཱུྃ། བདག་གཞན་བླ་མེད་བསྙེན་སྒྲུབ་འདི་དག་གིས། །སྡིག་སྒྲིབ་ཉམས་ཆག་མ་ལུས་ཀུན་བྱང་ནས། །ཚེ་འདི་ཉིད་ལ་རིག་འཛིན་མཆོག་འགྲུབ་ཅིང༌། །བྱིན་རླབས་རྩལ་དབང་གཟི་བྱིན་ནུས་མཐུར་ལྡན། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཅེས་བསྐུལ་ཞིང་སྔགས་ཀྱི་མཐར། ཀཱ་ཡ་ཝཱ་ཀ་ཙིཏྟ་སིདྡྷི་ཕ་ལ་ཧཱུྃ་ཞེས་བཏགས་པ་མང་དུ་བཟླས། ཨོཾ་བོ་དྷི་ཙིཏྟ་ཀཱ་ཡ་ཝཱ་ཀ་ཙིཏྟ་མ་ཧཱ་ས་མ་ཡ་ཧོཿ ཞེས་པས་རིག་པའི་མེ་ཏོག་དོར། ཡུམ་གྱི་སྨན་གྱི་ཕོ་བྲང་བཏེག་ལ་སློབ་དཔོན་གྱི་སྤྱི་གཙུག་ཏུ་བཀོད། སྔགས་ཀྱི་མཐར། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀཱ་ཡ་ཝཱ་ཀ་ཙིཏྟ་ཨཱ་ཡུར་སིདྡྷི་ཕ་ལ་ཨ་བྷི་ཥིཉྩ་ཏུ་མཱཾ། ཞེས་དབང་བླངས་པས་བདུད་རྩི་བདེ་བ་ཆེན་པོ་རྡོ་རྗེ་སེམས་དཔའ་ཡབ་ཡུམ་ལུས་དཀྱིལ་གྱི་ལྷ་དང་བཅས་པ་རང་ལ་ཐིམ་པར་བསམ། སློབ་མ་ཡོད་ན། ཧཱུྃ། རྟོག་འདུལ་དམ་ཚིག་བླ་ན་མེད། །དངོས་གྲུབ་ཀུན་གྱི་དབྱིག་ཆེན་པོ། །རྡོ་རྗེ་སེམས་དཔའི་ཡེ་ཤེས་ཀྱིས། །སྐུ་གསུང་ཐུགས་སུ་དབང་བསྐུར་རོ། །ཞེས་དང༌། སྔགས་ཀྱི་མཐར་ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཨོཾ་ཨཱཿ ཞེས་བརྗོད་ཅིང་གནས་གསུམ་རེག །ཨ་ཧོ་མ་ཧཱ་སུ་ཁ་ཧོཿཞེས་རྟོགས་པ་བརྗོད་ལ། བཛྲ་པྲ་བེ་ཤ་ཡ་ཕཊ་ཅེས་རྒྱ་དགྲོལ། སརྦ་པཉྩ་ཨ་མྲྀ་ཏ་ཨ་བེ་ཤ་ཡ་ཨཱཿ ཞེས་བརྗོད་པས་བདུད་རྩིའི་དྭངས་མ་དཀར་དམར་མཐིང་བའི་འོད་ཀྱི་རྣམ་པས་རང་ལ་ཐིམ་པར་བསམ། ནང་མཆོད་དང་སྦྱར་ལ་གཞུང་ལྟར་སྨན་མཆོད་ཀྱི་རྗེས། བདུད་རྩི་སྙིང་པོ་ཅན་གྱི་དབུས། །སངས་རྒྱས་ཀུན་གྱི་སྐུ་གསུང་ཐུགས། །ཡི་གེ་གསུམ་གྱི་རྣམ་པ་ཅན། །དམ་ཚིག་ཕྱག་རྒྱ་གཉེན་པོས་བླང༌། །སྔགས་མཐར་ཀཱ་ཡ་སིདྡྷི་ཨོཾ༔ ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ ཞེས་བརྗོད་ཅིང་གནས་གསུམ་དུ་ཐིག་ལེ་བྱས་ལ་མྱང་ཞིང་སློབ་མ་ལའང་སྦྱིན། དེ་ནས་བསྔོ་སྨོན་བཀྲ་ཤིས་སོགས་གཞུང་ལྟར་བྱས་པས་གྲུབ་བོ། །འདི་ཉིད་སྒྲུབ་པ་པོ་རང་ཉིད་ཁོ་ནས་སྤྲོས་མེད་རྒྱང་སྒྲུབ་ཏུ་བྱ་བའི་ཚུལ་ཡིན་ལ། ཤིན་ཏུ་བསྡུ་ན་ཁྲོལ་སྒྲུབ་མ་བྱས་ཀྱང་རུང༌། སྒྲུབ་གྲོགས་གཞན་ཡོད་ན་སྒྲུབ་པའི་ཁོག་འབུབས་རྒྱས་བསྡུས་གང་རིགས་དང༌། ཁོར་ཡུག་གསུང་མི་ཆད་པའི་བཟླས་པ་བྱའོ། །དེ་ལྟར་བསྒྲུབས་པའི་དམ་རྫས་ཀྱི་ཡོན་ཏན་བསྔགས་པའང་རྒྱུད་ལས། འཐུང་ན་ངན་སོང་སྒྲིབ་པ་འབྱང༌། །རྟག་བསྟེན་དངོས་གྲུབ་མཆོག་ཀྱང་འགྲུབ། །བཞི་བརྒྱ་རྩ་བཞིའི་ནད་སེལ་ཞིང༌། །ལྷ་ལ་རྟག་ཏུ་མཆོད་བྱས་ན། །བདག་དང་གཉིས་སུ་མེད་པར་འགྱུར། །མི་མཐུན་ཕྱོགས་ལ་གཏོར་བྱས་ན། །དྲག་པོ་གཏུམ་པོའང་ལྷན་ནེར་འགྱུར། །གཞན་ཡང་དངོས་གྲུབ་ཐམས་ཅད་ནི། །ཇི་ལྟར་དམིགས་པ་བཞིན་དུ་འགྲུབ། །ཅེས་སོགས་རྒྱ་ཆེར་གསུངས་པ་ལྟར་ཤེས་པར་བྱའོ། །རྒྱུད་དང་གྲུབ་པའི་མན་ངག་དོན། །བྱིན་རླབས་སྣང་བས་ཕྱེས་པའི་དགོས། །འགྲོ་ཀུན་མི་མཐུན་ཀུན་ཞི་ཞིང༌། །ཚེ་དང་ཡེ་ཤེས་རྒྱས་པར་ཤོག །ཅེས་པའང་ཀུན་མཁྱེན་བླ་མ་དགྱེས་པའི་འབངས་མཁྱེན་རྩེའི་ལྷས་སོ། །སརྦ་མངྒ་ལཾ་བྷ་བ་ཏུ།། །།

[edit]

rdo rje sems dpa' la brten pa'i bla ma mchod pa'i cho ga dang 'brel ba'i khyad par gyi phrin las bde chen snying po zhes bya ba bzhugs so//__//na mo gu ru badz+ra sa twA ya/__stong nyid rdo rjer srid zhi'i chos/__/sdom mdzad bde chen sems dpa' che/__/dpal ldan bla ma la btud nas/__/khyad par phrin las cung zad dbye/__/'di la gsum sdig sgrib zhi ba/__tshe bsod rgyas pa/__mchog gi ye shes skyed pa'o/__/dang po ni/__rdzogs pa chen po rdo rje sems dpa'i snying thig gi rgyud phyi ma las/__slob ma'i lus kyi gnas drug tu/__/rigs drug sa bon drug bkod de/__/rang byung ye shes bum pa'i chus/__/sdig sgrib bag chags sbyang bar bya/__/zhes pa'i dgongs don/__sdig sgrib nad gdon bag chags thams cad zhi bar byed pa ye shes khrus kyi cho ga byed par 'dod pas/__dkyil 'khor gyi mdun du khrus bum bcud ldan kha rgyan mgul chings dung chos gzungs rdor dang bcas pa bsham/__bla ma mchod pa'i phrin las kyi gzhung bsrang*/__bsdu na dbang bskur gyi skabs ltar bum bzlas bya/__cung zad rgyas par spro na/__mdun bskyed kyi bzlas pa grub rjes/__bum pa shU n+ya tAs sbyang*/__stong pa'i ngang las pad zla'i gdan gyi steng*/__/b+h+rU~M yig yongs gyur rin chen bum pa ni/__/mtshan nyid yongs rdzogs bdud rtsis gang ba'i dbus/__/glang pos mtshan pa'i rin chen pad zla'i khrir/__/zhes sogs nas/__badz+ra tuSh+ya hoHzhes pa'i bar bla ma mchod pa'i phrin las ltar bya/__oM AHhU~M/__dngos su 'byor dang yid kyis rnam sprul pa'i/__/kun tu bzang po'i bla med mchod sprin gyis/__/mkha' dbyings rnam dag rgya cher yongs bkod de/__/phyi nang gsang ba'i mchod pa rgya mtshos mchod/__/oM gu ru badz+ra sa twa sa pa ri wA ra ar+g+haM nas shab+da pra tIts+tsha swA hA'i bar dang*/__ma hA pany+tsa a mr-i ta rak+ta ba liM ta khA hi/__mi rtog rdo rje thabs kyi ye shes ni/__/dmigs med shes rab yum gyi ngang du rtogs/__/thugs rje'i bye brag sna tshogs cir yang ston/__/rdo rje sems dpa' che la phyag 'tshal bstod/__/ces mchod cing bstod/__rang gi thugs nas 'od zer gzungs thag la/__/'khril te bum pa'i lha yi thugs rgyud bskul/__/snyoms 'jug byang chub sems kyi bdud rtsi'i rgyun/__/babs pas bum chur dbyer med ro gcig gyur/__/ces brjod cing bsams la rtsa sngags yi ge 'bru drug pa dang*/__yi ge brgya pa ci nus kyi mthar/__a su nr-i trI pre duHsarba pA paM kle sha shAn+tiM ku ru swA hA/__zhes btags pa dang*/__khrus sngags a b+hi She ka'ang cung zad bzlas mthar mchod cing bstod/__yi ge brgya pas nongs pa bshags/__oM AHhU~M/__mchod yon phul bas bum pa'i lha bde stong chen po'i ngo bor zhu ba bum chu dang dbyer med du gyur par bsam/__phyag 'tshal nas tshogs mchod bar grub rjes bsgrub bya mdun du 'khod pa la/__'o/__khyod rang gi tshe 'khor ba thog ma med pa nas bsags pa'i las dang nyon mongs pa dang*/__des bskyed pa'i nad gdon grib dang mi gtsang ba thams cad zhi zhing dag par byed pa rdo rje sems dpa'i khrus kyi cho gas rjes su 'dzin pa la dmigs pa 'di bzhin du mdzod/__rang nyid tha mal du gnas pa'i spyi bor lha'i sa bon a dkar po/__mgrin par lha ma yin gyi sa bon su ser po/__snying gar mi'i sa bon nr-i sngo skya/__lte bar dud 'gro'i sa bon tri ljang gu/__gsang gnas su yi dwags kyi sa bon pre thal skya/__rkang mthil gnyis su dmyal ba'i sa bon duHdud ka'i rnam par gnas pa/__slob dpon rdo rje sems dpar gsal ba'i phyag na bum pa byang chub sems kyi bdud rtsis gang bas khrus bgyis pas ye shes kyi chu rgyun spyi bo nas zhugs/__gnas drug gi rigs drug gi sa bon bag chags dang bcas pa thams cad byang zhing dag__/nad gdon sdig sgrib thams cad zhi zhing*/__ye shes drug gi skal ba rgyud la bzhag pa'i mos pa mdzod/__/'di ni bsam gtan rang bzhin chu/__/nyon mongs nga rgyal sbyong byed pa/__/rang byung 'od gsal ye shes kyis/__/sku lnga yongs rdzogs khrus bgyi'o/__/rtsa sngags dang yi ge brgya pa sbrel ba'i mthar/__sarba su ra ga te pA paM kle sha shAn+tiM ku ru swA hA/__'di ni tshul khrims rang bzhin chu/__/nyon mongs phrag dog sbyong byed pa/__/bya ba grub pa'i ye shes kyis/__/dpal ldan phrin las khrus bgyi'o/__sarba a su ra ga te pA paM kle sha shAn+tiM ku ru swA hA/__/'di ni brtson 'grus rang bzhin chu/__/nyon mongs 'dod chags sbyong byed pa/__/so sor rtog pa'i ye shes kyis/__/dpal ldan gsung gi khrus bgyi'o/__sarba nr-i ga te pA paM kle sha shAn+tiM ku ru swA hA/__'di ni shes rab rang bzhin chu/__/nyon mongs gti mug sbyong byed pa/__/me long lta bu'i ye shes kyis/__/dpal ldan sku yi khrus bgyi'o/__sarba tir+Ya ka ga te pA paM kle sha shAn+tiM ku ru swA hA/__'di ni sbyin pa'i rang bzhin chu/__/nyon mongs ser sna sbyong byed pa/__/mnyam pa nyid kyi ye shes kyis/__/dpal ldan yon tan khrus bgyi'o/__sarba pre ta ka ga te pA paM kle sha shAn+tiM ku ru swA hA/__'di ni bzod pa'i rang bzhin chu/__/nyon mongs zhe sdang sbyong byed pa/__/chos kyi dbyings kyi ye shes kyis/__/dpal ldan thugs kyi khrus bgyi'o/__sarba na ra ka ga te pA paM kle sha shAn+tiM ku ru swA hA/__zhes brjod cing bkru/__byab pa'i slad du/__bkrus pas ma dag pa'i rigs drug tu skye ba'i las dang*/__nyon mongs pa/__nad gdon sdig sgrib bag chags dang bcas pa thams cad dkon mchog gsum gyi bden pa dang*/__sngags kyi 'od zer gyis phyir bsal ba'i mos pa mdzod/__'dod chags zhe sdang gti mug gsum/__/'di dag 'jig rten dug gsum ste/__/bcom ldan sangs rgyas dug mi mnga'/__/sangs rgyas bden pas dug sbyang ngo*/__/sngags mthar/__a su nr-i pre duHsarba pA paM kle sha a pa na ye swA hA/__/'dod chags zhe sdang gti mug gsum/__/'di dag 'jig rten dug gsum ste/__/skyob pa'i dam chos dug mi mnga'/__/dam chos bden pas dug sbyang ngo*/__/sngags brjod/__'dod chags zhe sdang gti mug gsum/__/'di dag 'jig rten dug gsum ste/__/'phags pa'i dge 'dun dug mi mnga'/__/dge 'dun bden pas dug sbyang ngo*/__/sngags brjod/__spro na 'byung bzhi so sos kyang byab cing*/__sa 'di dug gi pha yin te/__/sa 'di dug gi ma yang yin/__/sangs rgyas sbyin ma'i byin rlabs kyis/__/skal ldan khyod la dug med shog__/sngags brjod/__chu 'di dug gi pha yin te/__/chu 'di dug gi ma yang yin/__/mA ma kI yi byin rlabs kyis/__/skal ldan khyod la dug med shog__/sngags brjod/__me 'di dug gi pha yin te/__/me 'di dug gi ma yang yin/__/gos dkar mo yi byin rlabs kyis/__/skal ldan khyod la dug med shog__/sngags brjod/__rlung 'di dug gi pha yin te/__/rlung 'di dug gi ma yang yin/__/dam tshig sgrol ma'i byin rlabs kyis/__/skal ldan khyod la dug med shog__/sngags gong ltar brjod/__bsrung ba'i slad du rdo rje spyi bo la sogs pa'i gnas drug tu bzhag pas rigs drug tu skye ba'i sa bon bag chags dang bcas pa dang*/__des bskyed pa'i las dang*/__nyon mongs pa dang*/__nad gdon sdig sgrib thams cad ye shes kyi mthus bsrung bar byas pa'i mos pa mdzod/__stong nyid ye shes rdo rje la/__/gang gis gzhom par mi nus te/__/las dang nyon mongs bag chags bcas/__/deng nas kun tu srung gyur cig__/ces dang sngags kyi mthar/__a su nr-i tri pre duHsarba pA paM kle sha rak+Sha rak+ShaH__zhes brjod la rdo rje gnas drug tu gram gyi tshul gyis reg__/rgyal bar bya ba'i slad du shis pa brjod pas kyang mnga' gsol ba'i mos pa mdzod/__ces dang*/__bkra shis pa'i tshigs bcad ji ltar rigs pa brjod/__cho ga lhag ma rnams dkyus bzhin/__bla mchod dam ma 'brel na/__khrus bum gyi mdun du mchod pa bsham/__skyabs sems sngon du 'gro bas/__rang skad cig gis dpal rdo rje sems dpa'i skur gyur par bsams la mchod pa brlab/__bum pa gong bzhin bsgrubs nas khrus kyi cho ga la 'jug kyang rung ngo*/__/de ltar bgyis pas gnas skabs nad gdon bar chad thams cad zhi zhing*/__mthar thug rigs drug tu skye ba'i sgrib gnyis bag chags dang bcas pa byang zhing dag ste rnam par grol ba'i ye shes thob par 'gyur ro/__/gnyis pa ni/__rdo rje sems dpa' sgyu 'phrul drwa ba'i rgyud rgyas pa las/__bum pa mchog ni bzang po nyid/__/tshe gzhag gnas ni 'di yin te/__/yang dang yang du dgug bya zhing*/__/mngon sum smin par gyur pa dang*/__/dbyings su yang ni sba bar bya/__/rdo rje'i go cha srung ba yis/__/brtan cing 'khor los dgag par bya/__/zhes rdo rje'i tshe sgrub pa'i rten dang*/__dgug pa dang*/__bstim pa dang*/__sba ba dang*/__bsrung ba'i tshul sogs rgya cher gsungs pa'i snying po 'di yin te/__dkyil 'khor gyi mdun du snying po lnga'i rdzas las grub pa'i tshe 'brang dang*/__g.yas su tshe ril/__g.yon du tshe chang*/__rang gi mdun du tshe 'gugs pa'i mda' dar sogs bsham/__phrin las kyi gzhung bsrangs la mdun bskyed kyi bzlas pa'i mjug tu/__tshe'i 'brang rgyas la dmigs te/__shU n+ya tAs sbyang*/__stong pa'i ngang las 'khor 'das snying po kun/__/dwangs ma 'od phung gcig tu 'khyil ba'i klong*/__/glang pos mtshan pa'i rin chen pad zla'i khrir/__/zhes sogs nas/__badz+ra tuSh+ya hoH__zhes pa'i bar gzhung ltar dang*/__gong bzhin mchod cing bstod/__rdo rje sems dpa' tshe dpag tu med pa'i thugs kar nyi zla'i ga'u kha sbyor gyi dbus su mi 'gyur ba'i srog hU~M yig zla ba chu shel gyi mdangs ltar 'tsher ba las gzhal du med pa'i 'od zer gyi tshogs dang lha mo mgyogs ma'i sprul pa nyi zer gyi rdul ltar spros pas/__rang dang bsgrub bya'i bla tshe chad nyams yar ba dang*/__'byung ba bzhi'i bcud/__'khor 'das kyi dwangs ma thams cad 'chi med bdud rtsi'i rnam par spyan drangs/__bdag gi spyi bo nas zhugs/__snying gar nyi zla'i ga'u'i nang du b+h+rU~M smug po'i khog pa nr-i yig a dkar pos mtshan pa la sib sib thim pas rdo rje'i srog la dbang thob/__'chi med sgrub pa'i dam tshig gi rdzas la thim pas rdo rje tshe'i bcud len du gyur par bsams la/__rtsa sngags kyi mthar/__badz+ra A yu She hU~M a/__zhes btags pa rtse gcig tu bzla/__spro na tshe 'gugs skul ba ni/__oM/__mgon po sangs rgyas kun gyi bdag__/rdo rje sems dpa' tshe dpag med/__/bde chen snyems mar mnyam sbyor ba/__/sgyu 'phrul drwa ba'i dkyil 'khor gtso/__/thugs dam bskul lo thugs rje skyed/__/ye shes chen po'i rol pa las/__/lha mo mgyogs ma'i pho nya spros/__/bla tshe chad nyams yar ba khug__/'byung bzhi'i bcud kyi dwangs ma sdus/__/khams gsum skye 'gro ba'i tshe dpal dngos/__/dus gsum rgyal ba'i ye shes dbyig__/rnal 'byor lus ngag yid la stims/__/nad med bde ba'i rtogs pa spor/__/rgas med lang tsho'i gzi mdangs skyed/__/'chi med tshe yi rig 'dzin stsol/__/rdo rje'i tshe mchog 'grub mdzad gsol/__/ces brjod/__gang ltar yang mthar/__tshe'i dwangs bcud thams cad snying ga'i tshe rten la 'dus/__nyi zla'i ga'u srub med pa sngags kyi phreng bas lu gu rgyud du bcings pas cis kyang mi chod mi shigs par gyur par bsams la/__a/__rig stong zung 'jug rdo rje sems/__/'od gsal gnyug ma'i thig le ru/__/'chi med rtag pa'i tshe sbas pas/__/'pho 'gyur mtshan ma dbyings su yal/__/a a a zhes brjod cing don gyi dgongs pa bskyang*/__slar yang lus kyi gnas rnams su rdo rje'i phyag rgyas go khrab kyi tshul du g.yogs shing bsrungs bar bsams la/__oM badz+ra kA wA tsi badz+ra rak+Sha hU~M/__oM sarba ta thA ga ta badz+ra a b+hi tiSh+Tha badz+ra ya swA hA/__zhes brtan par bya/__phyag 'tshal tshogs bsag gi rim pa nas bzung dkyus ltar bya'o/__/sgrub pa sogs kyi skabs tshe'i dngos grub blang ba dang rjes su 'brel bar dbang len par spro na/__tshogs kyi mchod pa'i rjes/__khrus bya/__maN+Dal phul/__rdo rje sems dpa' bde ba che/__/sgyu 'phrul gtso bo dgongs su gsol/__/rdo rje'i tshe dang ye shes kyi/__/dbang dang dngos grub bdag la stsol/__/lan gsum/__tshe 'gugs bskul/__tshe 'brang spyi bor blangs la/__oM/__dpal ldan rigs rnams kun gyi bdag__/rdo rje mi phyed gsum gyi sku/__/deng 'dir sangs rgyas thams cad kyi/__/mi 'gyur rtag pa'i dbang bskur ro/__/sngags mthar/__kA ya a b+hi Shiny+tsa oM/__bdud rtsi mgrin par bzhag la/__AH__dpal ldan rigs rnams kun gyi bdag__/rdo rje mi phyed gsum gyi gsung*/__/deng 'dir sangs rgyas thams cad kyi/__/'gag med dbyangs kyi dbang bskur ro/__/sngags mthar/__wA ka a b+hi Shiny+tsa AH__ril bu snying gar bzhag la/__hU~M/__dpal ldan rigs rnams kun gyi bdag__/rdo rje mi phyed gsum gyi thugs/__/der 'dir sangs rgyas thams cad kyi/__/'khrul med ye shes dbang bskur ro/__/sngags mthar/__tsit+ta a b+hi Shiny+tsa hU~M/__rjes su bstim zhing rgyas gdab/__shis pa brjod/__slob ma rjes su 'dzin na'ang gsol 'debs kyi rjes yan lag bdun gy-is rgyud sbyang*/__ye shes dbab cing bstim/__tshe 'gugs bskul/__tshe 'brang dang dbang sogs gong ltar bskur ro/__/des ni rdo rje sems dpa'i tshe dang lang tsho la mnga' brnyes shing*/__mthar thug 'chi med grub pa'i ye shes mngon du byed par 'gyur ro/__/gsum pa ni/__rgyud las/__bdud rtsi mchog ni mnyam pa'i dbyings/__/bdud rtsi'i don ni skye shi med/__/bdud rtsi'i gnas ni byang chub sems/__/bdud rtsi'i las ni rnam rtog sbyong*/__/bdag dpal tshogs shing 'gro don mdzad/__/sman gyi byin rlabs bsam mi khyab/__/ces nges pa dang drang ba'i don gyis gtan la dbab cing lag tu len pa'i tshul rgya cher gsungs pa las/__'dir shin tu mdor bsdus pa'i tshul la gnyis/__khrol bu dang*/__phyi ma sgrub pa'o/__/dang po ni/__dkyil 'khor gyi dbus su b+han+d+ha mtshan ldan gyi snod bzang por/__dri chen glang sha dzA ti shar/__/sha chen rtag sha ka ko lho/__/pad+ma rma bya li shi nub/__/dri chu khyung sha gur gum byang*/_/byang sems seng sha bzang drug dbus/__/zhes pa'i sha dang bdud rtsi dngos sam phabs gta' so so'i skyobs dang bcas pa dang*/__'bras bu gsum/__kha che/__nA gi__/gla rtsi/__tsan+dan dkar po sogs dri ro dang kha dog bzang po gtso bor gyur pa'i sman sna rnams bzhag__/gzungs thag btags/__mchod gtor sogs 'dra/__phrin las kyi gzhung dkyus ltar bsrangs la/__zhabs gnyis sems skyil pad zla'i gdan la bzhugs/__/zhes pa'i mtshams/__mdun du rlung me thod sgyed la gnas pa'i/__/rang byung bde chen b+han+d+ha'i gzhal med khang*/__/yangs shing rgya che mtshan nyid phun tshogs nang*/__/go ku da ha na las sha lnga dang*/__/bi mu mar shu las bdud rtsi lnga/__/hU~M oM swA ma~M a~M dang hA yig dang*/__/mU~M lA~M mA~M pA~M tA~M gyis mtshan pa las/__/'od 'phros rlung g.yos me sbar rdzas rnams zhu/__/byang chub sems kyi bdud rtsir 'khyil ba'i dbus/__/glang pos mtshan pa'i rin chen pad zla'i khrir/__/brtan g.yo'i dwangs ma mi shigs thig le'i gzugs/__/rigs kun khyab bdag dpal ldan bla ma dang*/__/dbyer med gsang chen rigs gcig bde ba che/__/dang po'i mgon po rdo rje mi bskyod pa/__/sku mdog dkar gsal sogs nas/__/badz+ra tuSh+ya hoHzhes pa'i bar gzhung ltar dang*/__mchod bstod rgyas bsdus gang rigs bya/__sman srung spyan 'dren pa ni/__dar snas g.yab cing spos dkar gyi dud pas bdugs la/__hU~M/__rtsi dang sman gyi bdag po dang*/__/rtags ldan rig 'dzin bran mo dag__/rol mo'i cha byad mang pos 'bod/__/'dir gshegs bcud len dngos grub stsol/__/zhes rol mo'i sgra dang bcas spyan drangs pas sman gyi pho brang gi nam mkhar sprin gtibs pa ltar bzhugs pa la rtog pa bsal ba'i phyir bdud rtsi 'thor zhing*/__oM AHhU~M/__hU~M/__tshangs dang drang srong gtsang ma za/__/lha klu bram ze gtsang ma za/__/de dag grol bar ngas ma bshad/__/bdud rtsi dag pa ye shes lnga/__/rigs lnga sku lnga lhun grub yin/__/gnyis med rtogs pa'i thabs mkhas kyis/__/gtsang rme med par kun spyod na/__/de dag grol bar ngas bshad do/__/zhes brjod pas rtog pa dag nas dngos grub stsol ba la dgyes par bsam/__gzungs thag nas bzung la/__bdag gi thugs nas rdo rje'i sngags kyi 'od/__/gzungs thag la 'khril mdun bskyed thugs rgyud bskul/__/'od 'phros srid zhi'i dngas bcud zhal du bkug__/sbyor mtshams nas babs dam tshig rdzas la thim/__/zhes brjod cing bsams la rtsa sngags cung zad dang*/__oM sarba pany+tsa a mr-i ta ra sa yA na ta na dza ya gu h+ya sid+d+hi hU~M hrIHThA:__zhes bzla/__spro na yan lag bdun pa'ang bya/__gang ltar yang tshogs kyi 'khor los mchod/__drag sngags bzla zhing thun brabs pas blta nyan gyi nyul le tshar bcad/__byin 'bebs rgyas pa'am/__oM hU~M a la la hoH__b+ha ga wAn sa ma ya hoH__sa ma ya s+t+waM:__hU~M/__'phags mchog thugs rje'i dus la bab/__/khyad par bstan pa'i dus la bab/__/mthu rtsal dbyung ba'i dus la bab/__/byin gyis brlab pa'i dus la bab/__/dbang mchog bskur ba'i dus la bab/__/dngos grub stsol ba'i dus la bab/__/mthu chen bdud 'dul bcom ldan 'das/__/byin chen byin phob bcom ldan 'das/__/dbang chen dbang bskur bcom ldan 'das/__/dngos grub mchog stsol bcom ldan 'das/__/bdag cag las 'bras mchis par mdzod/__/ces dang rtsa sngags bzla zhing spos rol dang bcas pas byin dbab/__hU~M hU~M hU~M hU~M gis byin bsdus pas/__nam mkha' gang ba'i lha tshogs thams cad sgrub pa'i rdzas la thim pas sku gsung thugs mi zad pa rgyan gyi 'khor los byin gyis brlabs par gyur par bsam/__rjes chog gzhung ltar la/__nyer bsdu'i mal du brtan bzhugs bya/__de ltar thun bzhi'am drug tu zhag grangs ci rigs su bsgrubs pa'i mthar/__thun tha ma la rjes chog gi bshags pa'i rjes/__mdun gyi lha yab yum byang chub sems kyi bdud rtsir zhu ba dam tshig gi rdzas dang ro gcig tu gyur par bsam mo/__/gnyis pa ni/__yum du btags pa'i las kyi rdo rjes sman snod blangs te slob dpon la phul/__shar du rdo rje'i gtun du 'thag cing sngags kyi mthar oM oM oM zhes brjod pas sbyang*/__lhor btsag cing sngags mthar AHAHAHzhes btags pas spel/__nub tu chang sna/__chu sna/__'o ma/__rin po che'i chus sbol zhing*/__sngags mthar hU~M hU~M hU~M zhes brjod pas bsgyur/__byang du dam rdzas snga ma'i rgyun dang phabs kyis bran cing 'bres par dkrugs la sngags mthar hoHhoHhoHzhes pas dbyer med du bya/__de nas dril bus gzhal zhing snod du blugs/__cod pan dang rdo rje dril gyis brgyan cing dkyil 'khor dbus su lding khri'i khar bzhag__/'og tu drod 'bebs kyi mar me sbar/__gzungs thag btags/__'byor na gdugs 'phan rgyal mtshan tshar du dngar bas brgyan/__sgrub tshul gong du smos pa ji lta ba las bzlas pa'i skabs su/__bdag mdun thugs kar zla steng hU~M yig mthar/__/sngags kyi phreng bas bskor las 'od zer 'phros/__/rlung g.yos me sbar thod pa'i rdzas rnams zhu/__/zer rlangs rdor sems zhi khro'i lha tshogs la/__/phog pas snyoms 'jug bde ba'i 'od dang sgras/__/'khor 'das dwangs bcud kun bsdus zhal du zhugs/__/sku yi dbyibs brgyud bde stong sbyor mtshams nas/__/ye shes bdud rtsi mu tig dkar po'i mdog__/char ltar babs nas sgrub pa'i rdzas la thim/__/mi 'gyur 'chi med rtag pa'i rdo rje sems/__/mthong thos dran reg myong grol rdzas kyi tshul/__/bde chen thig le gcig tu 'khyil bar gyur/__/ces brjod cing bsams la gzungs thag bzung ste/__oM AHhU~M badz+ra a mr-i ta hU~M hrIHTha:__zhes chig sgril du bzla/__thun bsdu ba na dbyangs gsal rten snying dang mchod bstod bya/__yan lag bdun pa/__skong ba/__tshogs mchod sogs rgyas par bya zhing*/__rjes mchog gi nongs pa bshags pa'i rjes su/__hU~M hU~M hU~M zhes brjod pas/__mdun gyi bcom ldan 'das dpal rdo rje sems dpa' yab yum lus dkyil gyi lha dang bcas pa snyoms par zhugs pa'i bde ba chen pos 'od du zhu nas dwangs ma mi shigs pa'i thig le dam tshig gi bdud rtsi dang dbyer med du 'khyil bar gyur par bsams la rten 'brel snying po brjod cing me tog 'thor/__bsngo smon bkra shis gzhung ltar dang*/__skabs ji ltar rigs par nyul le 'dul ba dang*/__byin dbab pa sogs 'dra'o/__/de las 'phros pa'i dmigs rim bye brag pa mang du yod kyang spros pa nyer bsdu'i skabs su 'di tsam gyis chog par rgyud dang man ngag gi gzhung las gsal bas/__ji skad bshad pa bzhin thun bzhi'am drug tu 'bad pas 'od dang*/__sgra dang*/__dri sogs dngos grub kyi mtshan rtags mthong ba'am/__bdun phrag sogs dus kyi nges pa rdzogs nas nangs par snga bar dngos grub len pa'i tshul ni/__gong ltar phrin las kyi gzhung bsrang*/__rjes chog gi mchod bstod nongs bshags kyi rjes/__oM AHhU~M/__bdag gzhan bla med bsnyen sgrub 'di dag gis/__/sdig sgrib nyams chag ma lus kun byang nas/__/tshe 'di nyid la rig 'dzin mchog 'grub cing*/__/byin rlabs rtsal dbang gzi byin nus mthur ldan/__/sku gsung thugs kyi dngos grub stsal du gsol/__/ces bskul zhing sngags kyi mthar/__kA ya wA ka tsit+ta sid+d+hi pha la hU~M zhes btags pa mang du bzlas/__oM bo d+hi tsit+ta kA ya wA ka tsit+ta ma hA sa ma ya hoH__zhes pas rig pa'i me tog dor/__yum gyi sman gyi pho brang bteg la slob dpon gyi spyi gtsug tu bkod/__sngags kyi mthar/__oM AHhU~M sarba pany+tsa a mr-i ta kA ya wA ka tsit+ta A yur sid+d+hi pha la a b+hi Shiny+tsa tu mAM/__zhes dbang blangs pas bdud rtsi bde ba chen po rdo rje sems dpa' yab yum lus dkyil gyi lha dang bcas pa rang la thim par bsam/__slob ma yod na/__hU~M/__rtog 'dul dam tshig bla na med/__/dngos grub kun gyi dbyig chen po/__/rdo rje sems dpa'i ye shes kyis/__/sku gsung thugs su dbang bskur ro/__/zhes dang*/__sngags kyi mthar kA ya wA ka tsit+ta a b+hi Shiny+tsa oM AH__zhes brjod cing gnas gsum reg__/a ho ma hA su kha hoHzhes rtogs pa brjod la/__badz+ra pra be sha ya phaT ces rgya dgrol/__sarba pany+tsa a mr-i ta a be sha ya AH__zhes brjod pas bdud rtsi'i dwangs ma dkar dmar mthing ba'i 'od kyi rnam pas rang la thim par bsam/__nang mchod dang sbyar la gzhung ltar sman mchod kyi rjes/__bdud rtsi snying po can gyi dbus/__/sangs rgyas kun gyi sku gsung thugs/__/yi ge gsum gyi rnam pa can/__/dam tshig phyag rgya gnyen pos blang*/__/sngags mthar kA ya sid+d+hi oM:__wA ka sid+d+hi AH__tsit+ta sid+d+hi hU~M:__zhes brjod cing gnas gsum du thig le byas la myang zhing slob ma la'ang sbyin/__de nas bsngo smon bkra shis sogs gzhung ltar byas pas grub bo/__/'di nyid sgrub pa po rang nyid kho nas spros med rgyang sgrub tu bya ba'i tshul yin la/_shin tu bsdu na khrol sgrub ma byas kyang rung*/__sgrub grogs gzhan yod na sgrub pa'i khog 'bubs rgyas bsdus gang rigs dang*/__khor yug gsung mi chad pa'i bzlas pa bya'o/__/de ltar bsgrubs pa'i dam rdzas kyi yon tan bsngags pa'ang rgyud las/__'thung na ngan song sgrib pa 'byang*/__/rtag bsten dngos grub mchog kyang 'grub/__/bzhi brgya rtsa bzhi'i nad sel zhing*/__/lha la rtag tu mchod byas na/__/bdag dang gnyis su med par 'gyur/__/mi mthun phyogs la gtor byas na/__/drag po gtum po'ang lhan ner 'gyur/__/gzhan yang dngos grub thams cad ni/__/ji ltar dmigs pa bzhin du 'grub/__/ces sogs rgya cher gsungs pa ltar shes par bya'o/__/rgyud dang grub pa'i man ngag don/__/byin rlabs snang bas phyes pa'i dgos/__/'gro kun mi mthun kun zhi zhing*/__/tshe dang ye shes rgyas par shog__/ces pa'ang kun mkhyen bla ma dgyes pa'i 'bangs mkhyen rtse'i lhas so/__/sarba mang+ga laM b+ha ba tu//__//