DKYD-KABUM-03-GA-027
DKYD-KABUM-03-GA-027
༄༅། །རྗེ་བཙུན་འཇམ་དཔལ་ཁྲོ་བོ་ནག་པོའི་སྒྲུབ་ཐབས་རྡོ་རྗེ་ཕ་ལམ་བཞུགས་སོཿ «༄༅། །ན་མོ་མཉྫུ་ཤྲི་ཡེ། རྗེ་བཙུན་འཇམ་དཔལ་ནག་པོ་གསང་བའི་སྒྲུབ་ཐབས་ལ། རང་ཉིད་རྡོ་རྗེའི་གོ་ཆ་བཙན་པོའི་ལུས་བསྲུང་ཞིང༌། ཕ་རོལ་གནམ་ལྕགས་རལ་གྲིའི་འཁྲུལ་འཁོར་གྱིས། རྡུལ་དུ་བརླག་པར་འདོད་པའི་རྣལ་འབྱོར་པས། སྐྱབས་སེམས་སྔོན་དུ་འགྲོ་ཞིང༌། »ཨོཾ་སྭ་བྷ་ཝ«ས་སྟོང་པར་སྦྱང༌།» སྟོང་པའི་ངང་ལ་བཾཿལས་པདྨ་ཨཿ ལས་ཟླ་བ་མ་ལས་ཉི་མའི་དཀྱིལ་འཁོར་དེའི་སྟེང་དུ་རང་གི་རྣམ་པར་ཤེས་པ་ཧྲཱིཿཡིག་མཐིང་ནག་མེ་འབར་བ་གཅིག་ཏུ་གྱུར་པ་ལས་འོད་ཟེར་འཕྲོས་འཕགས་པ་མཆོད་སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་རྗེ་བཙུན་འཕགས་པ་འཇམ་དཔལ་དབྱངས་སྐུ་མདོག་མཐིང་ནག་རབ་ཏུ་ཁྲོས་པ་ཁྲོ་བོའི་ཆ་ལུགས་ཅན་དབུ་སྐྲ་སྤྱི་བོར་བཅིངས་ཤིང་སྤྱན་གསུམ་དམར་ལ་ཟླུམ་པ། ཞལ་གཅིག་ཕྱག་གཉིས་གཡས་ཤེས་རབ་ཀྱི་རལ་གྲི་མེ་འབར་བ་ནམ་མཁའ་ལ་ཕྱར་བས་དགྲ་བགེགས་ཐམས་ཅད་བརླག་པར་བྱེད་ཅིང་གཡོན་ཞལ་ཤེས་ཡོད་ཨུཏྤལའི་ཡུ་བ་སྡིག་མཛུབ་ཀྱིས་ཐུགས་ཀར་འཛིན་ཅིང་འདབ་མ་སྙན་གཡོན་གྱི་ཐད་དུ་ཁ་ཕྱེས་པའི་སྟེང་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པའི་གླེགས་བམ་བསྣམས་པ། ལྟོ་བ་ཆེ་ཞིང་རྡོ་རྗེ་འཇིགས་རུང་གྱེན་དུ་སྒྲེང་བའི་རྩེ་མོ་ནས་མེ་ཡི་ཚྭ་ཚྭ་འཕྲོ་བ། ཞབས་གཉིས་གཡས་བསྐུམ་གཡོན་བརྐྱང་བའི་སྟབས་ཀྱིས་རུས་པའི་ཕྱག་རྒྱ་དྲུག་གིས་བརྒྱན་ཅིང་ཡེ་ཤེས་ཀྱི་མེ་རི་མེ་དཔུང་འབར་བའི་དབུས་ན་བཞུགས་པར་བསྒོམ། «འདི་ལ་ཡེ་ཤེས་འགུགས་གཞུག་སོགས་བྱ་མི་དགོས་སོ། »དེའི་སྤྱི་བོར་ཨོཾ་དཀར་པོ་མགྲིན་པར་ཨཱཿདམར་པོ་ཐུགས་ཀར་ཧཱུཾ་སྔོན་པོ་དྷཱིཿཡིག་མཐིང་ནག་དང་བཅས་པའི་མཚན་པར་གྱུར། སྙིང་ཁར་ཉི་མའི་སྟེང་དུ་དྷཱིཿཡིག་གི་མཐའ་སྐོར་དུ་སྔགས་ཀྱིས་འཁོར་བ་ལས་འོད་ཟེར་འཕྲོས་ནད་གདོན་སྡིག་སྒྲིབ་རྣམ་རྟོག་བག་ཆགས་ཐམས་ཅད་གཞོབ་ཐུལ་གྱིས་བསྲེག་པར་བསམ། ཨོཾ་པྲ་སོད། ཆུ་སོད། དུར་ཏ་སོད། དུར་མི་སོད། སྙིང་མགོ་ལ་ཆོད། ཁ་ལ་ཛཿ ཀཾ་ཤཾ་ཊཾ་རྦད་ཕཊཿསྭཱ་ཧཱ།« སྔགས་འདི་ཁྲི་ཚོ་འམ་འབུམ་ཐེར་བཟླ་བ་གོང་བསྙེན་ཏེ། རྒྱུན་དུ་ཞག་རེར་བརྒྱ་རྩའམ་ཉེར་གཅིག་རེ་བཟླའོ། ཿཿ ཐུན་མཐར། »ཨོཾ་ཨརྱ་མཉྫུ་ཤྲི་ས་པ་རི་ཝ་ར་ཨརྒྷཾ་«ནས་»ཤབྷ་པྲ་ཏིཙྪ་སྭཱ་ཧཱ། «དེ་བཞིན་དུ་སྦྱར་ཏེ་མཆོད་ལ། »གཞོན་ནུའི་ཆ་ལུགས་འཆང་བ་སོགས། «ཞེས་པའི་བསྟོད་ལ། »སྣོད་བཅུད་འོད་ཞུ་བདག་ལ་ཐིམ། །རང་ཡང་མི་དམིགས་སྟོང་པར་གྱུར། །སླར་ཡང་འཕགས་པའི་སྐུ་རུ་གསལ། དགེ་དེའི་དོན་གཉིས་མཐར་ཕྱིན་ཤོག «།གཏོར་མ་འབུལ་བར་འདོད་ན་མཆོད་བསྟོད་ཀྱི་མཇུག་ཏུ།» རཾ་ཡཾ་ཁ«ཾ་དང་»ཧ་ཧོ་ཧྲཱིས«་བྱིན་གྱིས་བརླབས་ལ། »ཨོཾ་མཉྫུ་ཤྲི་པྲ་ཛྙཱ་ཝརྡྷ་«ནི་ས་པ་རི་ཝ་ར་ཨེ་དཾ་བཱ་ལིངྟ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་བསྔོ་ཞིང༌། མཆོད་སྦྱིན་གཏོར་མ་འདི་བཞེས་ལ། སོགས་ཀྱིས་འབུལ་བ་དང༌། འཇིགས་པ་བརྒྱད་སྐྱོབས་སོགས་ཀྱིས་དངོས་གྲུབ་ལེན་པ་ནི་སྤྲོ་ན་བསྙེན་མཚམས་སོགས་ཀྱི་སྐབས་སུ་བྱ་བ་སྟེ། མ་ནུས་ནའང་ཆད་པའི་སྐྱོན་མེད། འདི་ཡི་ལས་སྦྱོར་གྱི་ཚེ་ཞལ་གདམས་གནད་བཅུ་གཅིག་སྟེ། དྲན་པ་དུས་ཀྱི་གནད། ཐོ་རངས་སྐར་ཆེན་ཤར་དུས་སོ། ལྟ་བ་ཕྱོགས་ཀྱི་གནད། རང་ཀ་ཤར་དུ་བལྟ། བཅའ་བ་ལུས་ཀྱིས་གནད། སྒལ་ཚིགས་དྲང་པོ་བསྲོང༌། འབུད་པ་རླུང་གི་གནད༌། རླུང་སྣ་བུག་གཡས་ནས་དྲང་པོར་གཡོན་དུ་འབུད། བསྒོམ་པ་བྱིན་རླབས་ཀྱིས་གནད། རང་ཉིད་འཕགས་པ་འཇམ་དཔལ་ཁྲོ་བོར་བསྒོམ་པའི་སྤྱི་བོར་རྩ་བའི་བླ་མ་བསྒོམ། བཟླས་པ་སྔགས་ཀྱི་གནད། དྲག་སྔགས་འབྲུག་ལྟར་སྒྲོག །རྟེན་འབྲེལ་རྫས་ཀྱི་གནད། རང་གི་རྐང་པས་རྒྱུད་ཁུགས་གཉིས་སུ་མཆིལ་མ་བཏབ་སྟེ་འཕུར་བའི་དྲེག་པ་ལག་གཡོན་པའི་སྲིན་ལག་གིས་བླངས་ཏེ། བྱུགས་པ་བུ་གའི་གནད་བུ་ག་དགུ་དང༌། །བཅུ་དྲུག་འཛོམ་ཞེས་དྲུག་མདོར་བྱུག་གོ །འབྱེད་གཅོད་སྒོའི་གནད། །ཕྱི་སྒོག་མ་ཕྱེ་ཟས་མ་ཟོས་བའི་གོང་དུ་བྱའོ། །གདབ་པ་སྒྲའི་གནད། །སྐན་སྒྲ་དྲག་པོ་ལན་གསུམ་བརྡབ། །ཕྱིར་བཟློག་ཐེབས་ཀྱི་གནད། སྤྱི་བོར་ཐལ་མོ་ལན་གསུམ་བརྡབ། རྐང་པ་གཡས་པའི་མཐེ་བོང་གིས། གཡོན་པའི་མཐེ་བོང་གི་རྩེ་མོ་མནན། ཚངས་པའི་འཇིག་རྟེན་མན་ཆོད་ཀྱི་རང་ལ་གནོད་པ་ཐམས་ཅད་དང་སྲིད་གསུམ་ཟིལ་གྱི་མནན་པར་བསྒོམ། ཤིན་ཏུ་རྟོག་པ་ཆེ་ན་གོས་མགོ་མཇུག་ལྡོག །བཟླས་སྒོམ་རྒྱུན་ཆད་མེད་པར་བྱས་ན་ཉམ་ང་བའི་གནོད་པ་ཐམས་ཅད་ཐུབ་པར་ངེས་པའི་གདམས་པ་ཟབ་མོ་ཡིན་ནོ། །དགྲ་གདོན་བགེགས་ཀྱི་གནོད་པ་དང༌། བྱད་ཕུར་རྦོད་གཏོང་ཐན་ལྟས་རྨི་ལམ་ངན་པ་གཟའ་སྐར་དུས་སྦྱོར་ཕྱོགས་ངན་པ། གྲིབ་དང་མི་གཙང་འོག་གི་ནད་རིམས་ཡམ་རིམས་དུག་དང་མནོལ་བཙོག་ཟས་གོས་ལ་སོགས། མདོར་ན་འཇིགས་ཤིང་ཉམ་ང་བག་ཚ་བ་ཐེ་ཚོམ་དང་རྣམ་རྟོག་སྐྱེ་ཞིང་ཁུ་འཕྲིག་ཟ་བའི་རིགས་གང་གིས་ཀྱང་མི་ཐུབ་ཅིང་འཇོམས་པར་མི་འགྱུར་ན་ར་ཀན། ས་མ་ཡཱཿ རང་ཉིད་སྲུང་བ་ཁོ་ན་ལས། །གཞན་ལ་སྔགས་སོགས་གདབ་མི་བྱ། །ཅི་ཕྱིར་སྔགས་ནུས་ཅུང་ཟད་ཉམས། །དགྲ་གསོད་ལས་མཐའ་ཐུགས་ལ་གབ། །སྐྱེས་བུ་རང་གི་ཉམས་ལེན་ནོ།། །།
