JKW-KABUM-23-'A-001-032

🚧 This website is under continued development. We appreciate your patience!

Previous Text Back to Volume PageNext Text

ཇོ་བོ་བཀའ་གདམས་པའི་གཞུང་གདམས་མན་ངག་མཐའ་དག་གི་བརྗོད་བྱ་མདོར་བསྡུས་པའི་གླུ་དབྱངས་ཕན་བདེའི་ཤིང་རྟ།

Wylie title	jo bo bka' gdams pa'i gzhung gdams man ngag mtha' dag gi brjod bya mdor bsdus pa'i glu dbyangs phan bde'i shing rta
Location	mkhyen brtse'i bka' 'bum Volume 23, sde tshan 1, Text 32, Pages 70-73 (Folios 35b4 to 37a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. jo bo bka' gdams pa'i gzhung gdams man ngag mtha' dag gi brjod bya mdor bsdus pa'i glu dbyangs phan bde'i shing rta. In 'jam dbyangs mkhyen brtse'i dbang po'i bka' 'bum, Vol. 23: 70-73. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

ཇོ་བོ་བཀའ་གདམས་པའི་གཞུང་གདམས་མན་ངག་མཐའ་དག་གི་བརྗོད་བྱ་མདོར་བསྡུས་པའི་གླུ་དབྱངས་ཕན་བདེའི་ཤིང་རྟ་ཞེས་བྱ་བ། རིགས་ཅན་གསུམ་གྱི་སྟོན་མཆོག་ཤཱཀྱ་ཡི་སེང་གེ །གང་དེའི་རྒྱལ་སྲས་ཐུ་བོ་མ་ཕམ་དང་འཇམ་དབྱངས། །འཛམ་གླིང་ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད། །གྲུབ་བརྙེས་བྱེ་བའི་གཙུག་རྒྱན་ཏཻ་ལོ་དང་ནཱ་རོ། །ཟབ་རྒྱས་ཉམས་སུ་ལེན་པའི་བཀའ་སྲོལ་དང་བྱིན་རླབས། །གཅིག་བསྡུས་ཇོ་བོ་ཡབ་སྲས་བརྒྱུད་འཛིན་དང་བཅས་པའི། །རྣམ་ཐར་སྙིང་ནས་དྲན་པས་གསོལ་བ་རང་འདེབས་ན། །ཐུགས་རྗེས་བྱིན་གྱིས་རློབས་ཤིག་བཀའ་གདམས་ཀྱི་བླ་མ། །ལུང་རྟོགས་ཕྲིན་ལས་མཐར་ཕྱིན་ལྷ་གཅིག་གི་ཐུགས་དམ། །ཆེ་བ་བཞི་དང་ལྡན་པའི་བྱང་ཆུབ་ཀྱི་ལམ་རིམ། །ཉན་བཤད་ཚུལ་བཞིན་བསྒྲུབ་པའི་སྐལ་བཟང་ལ་སྦྱར་བས། །རང་གཞན་དོན་གཉིས་འགྲུབ་པར་བྱིན་གྱིས་རང་རློབས་ཤིག །མཚན་ཉིད་ཀུན་དང་ལྡན་པའི་ཐེག་མཆོག་གི་བཤེས་གཉེན། །ལེགས་ཚོགས་རྒྱ་མཚོ་ལྟ་བུའི་འབྱུང་གནས་སུ་མཐོང་ནས། །བསམ་དང་སྦྱོར་བ་གཉིས་ཀྱིས་ཚུལ་བཞིན་དུ་བསྟེན་པས། །ལམ་གྱི་རྩ་བ་ཚུགས་པར་བྱིན་གྱིས་རང་རློབས་ཤིག །དལ་འབྱོར་རྙེད་དཀའ་འཇིག་སླའི་ངང་ཚུལ་ལ་བསམས་ནས། །ངན་སོང་སྡུག་བསྔལ་དྲན་པས་སྐྱབས་གསུམ་ལ་བསྙེན་ཅིང་། །མངོན་མཐོ་སྒྲུབ་བྱེད་སྐྱེས་བུ་ཆུང་ངུ་དང་ཐུན་མོང་། །ལས་འབྲས་བླང་དོར་བརྩོན་པར་བྱིན་གྱིས་རང་རློབས་ཤིག ཁམས་གསུམ་འཁོར་བའི་སྡུག༷་བསྔལ༷་མཐའ་དག་གི་འབྱུང་ཁུངས། །ལས་ཉོན་ཀུན་འབྱུང༷་འགོ༷ག་པའི༷་བདེན་པ་ལ་དམིགས་ནས། །ཐར་པ་སྒྲུབ་བྱེད་སྐྱེས་བུ་འབྲིང་པོ་དང་ཐུན་མོང་། །བསླབ་གསུམ་ལམ༷་ལ་བརྟེན་པར་བྱིན་གྱིས་རང་རློབས་ཤིག །འགྲོ་ཀུན་མར་ཤེས་དྲིན་དྲན་ཕན་འདོགས་ལ་ཞུགས་ཤིང་། །ཚད་མེད་བྱམས་དང་སྙིང་རྗེ་ལྷག་བསམ་གྱི་སྦྱོར་བས། །རྣམ་མཁྱེན་སྒྲུབ་བྱེད་སྐྱེས་བུ་ཆེན་པོ་ཡི་ལམ་མཆོག །བྱང་ཆུབ་སེམས་གཉིས་འབྱོང་བར་བྱིན་གྱིས་རང་རློབས་ཤིག །དཀོན་མཆོག་ལས་འབྲས་དད་པ་སྐྱེས་ཚོམ་གྱི་བརྗོད་གཞི། །རང་གཞན་ཕན་བདེ་སྦྱོར་བ་བསླབ་སྤྱོད་ཀྱི་ལམ་བཟང་། །ཞི་ལྷག་ཟུང་འབྲེལ་ཏིང་འཛིན་ས་རྒྱན་གྱི་འབྲས་བུ། །གཞུང་ལུགས་གདམས་པར་འཆར་བར་བྱིན་གྱིས་རང་རློབས་ཤིག །སྔོན་འགྲོ་རྟེན་དང་དངོས་གཞི་བྱང་སེམས་ལ་སྦྱངས་ཤིང་། །རྐྱེན་ངན་ལམ་ཁྱེར་ཚེ་གཅིག་ཉམས་ལེན་དུ་དྲིལ་བས། །བློ་སྦྱོང་མཐར་ཕྱིན་བསླབ་བྱ་དམ་ཚིག་དང་ལྡན་པའི། །གདམས་ངག་ཉམས་སུ་མྱོང་བར་བྱིན་གྱིས་རང་རློབས་ཤིག །སྐྱབས་གནས་བླ་མ་དྲན་པ་ཉམས་རྟོགས་ཀྱི་ཞིང་ས། །ལྷ་སྔགས་རྣལ་འབྱོར་བསྒོམ་པ་གསང་ཆེན་གྱི་ཐབས་མཁས། །སྙིང་རྗེ་སྟོང་ཉིད་ཟུང་འབྲེལ་ཐེག་མཆོག་གི་གཞུང་ལམ། །མན་ངག་གནད་དུ་སྨིན་པར་བྱིན་གྱིས་རང་རློབས་ཤིག །མདོར་ན་ལྷ་བཞི་ལུས་ཀྱི་དཀྱིལ་འཁོར་ལ་རྫོགས་པས། །རྗོད་བྱེད་སྡེ་སྣོད་གསུམ་གྱི་ལེགས་བཤད་ཀྱི་ངག་དང་། །བརྗོད་བྱ་བསླབ་གསུམ་དག་པས་སེམས་ཉིད་ལ་བརྒྱན་པའི། །བཀའ་གདམས་རྣམ་ཐར་འབྱོངས་པའི་སྨོན་ལམ་ཞིག་ཞུའོ། །ཞེས་པའང་བཀའ་གདམས་རིན་པོ་ཆེའི་རྣམ་ཐར་ལ་ལྷག་པར་དད་ཅིང་། དེའི་གཞུང་ལུགས་མང་དུ་ཐོས་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། བྱང་རྭ་བསྒྲེང་རྒྱལ་བའི་དབེན་གནས་སུ་འབྱོར་བའི་སྐབས་གློ་བུར་དུ་ཡིད་ལ་ཤར་བ་དང་། སྔ་སོར་རྒྱུད་སྨད་དགེ་སློང་དགེ་བའི་བཤེས་གཉེན་ཛྙཱ་ནའི་མཚན་ཅན་གྱིས་ཀྱང་འདི་ལྟ་བུ་ཞིག་བྲིས་ཤིག་ཅེས་བསྐུལ་བ་རྗེས་སུ་དྲན་ཏེ་རྩེ་གཅིག་གུས་པའི་ཡིད་ཀྱིས་གསོལ་བ་བཏབ་པ་དགེ་ལེགས་སུ་གྱུར་ཅིག ། ༈

[edit]

bka' gdams lam rim bstan pa'i glu phan bde'i shing rta/__ jo bo bka' gdams pa'i gzhung gdams man ngag mtha' dag gi brjod bya mdor bsdus pa'i glu dbyangs phan bde'i shing rta zhes bya ba/__rigs can gsum gyi ston mchog shAkya yi seng ge__/gang de'i rgyal sras thu bo ma pham dang 'jam dbyangs/__/'dzam gling shing rta chen po klu sgrub dang thogs med/__/grub brnyes bye ba'i gtsug rgyan tai lo dang nA ro/__/zab rgyas nyams su len pa'i bka' srol dang byin rlabs/__/gcig bsdus jo bo yab sras brgyud 'dzin dang bcas pa'i/__/rnam thar snying nas dran pas gsol ba rang 'debs na/__/thugs rjes byin gyis rlobs shig bka' gdams kyi bla ma/__/lung rtogs phrin las mthar phyin lha gcig gi thugs dam/__/che ba bzhi dang ldan pa'i byang chub kyi lam rim/__/nyan bshad tshul bzhin bsgrub pa'i skal bzang la sbyar bas/__/rang gzhan don gnyis 'grub par byin gyis rang rlobs shig__/mtshan nyid kun dang ldan pa'i theg mchog gi bshes gnyen/__/legs tshogs rgya mtsho lta bu'i 'byung gnas su mthong nas/__/bsam dang sbyor ba gnyis kyis tshul bzhin du bsten pas/__/lam gyi rtsa ba tshugs par byin gyis rang rlobs shig__/dal 'byor rnyed dka' 'jig sla'i ngang tshul la bsams nas/__/ngan song sdug bsngal dran pas skyabs gsum la bsnyen cing /__/mngon mtho sgrub byed skyes bu chung ngu dang thun mong /__/las 'bras blang dor brtson par byin gyis rang rlobs shig__khams gsum 'khor ba'i sdugaX bsngalaX mtha' dag gi 'byung khungs/__/las nyon kun 'byungaX 'goXg pa'iX bden pa la dmigs nas/__/thar pa sgrub byed skyes bu 'bring po dang thun mong /__/bslab gsum lamaX la brten par byin gyis rang rlobs shig__/'gro kun mar shes drin dran phan 'dogs la zhugs shing /__/tshad med byams dang snying rje lhag bsam gyi sbyor bas/__/rnam mkhyen sgrub byed skyes bu chen po yi lam mchog__/byang chub sems gnyis 'byong bar byin gyis rang rlobs shig__/dkon mchog las 'bras dad pa skyes tshom gyi brjod gzhi/__/rang gzhan phan bde sbyor ba bslab spyod kyi lam bzang /__/zhi lhag zung 'brel ting 'dzin sa rgyan gyi 'bras bu/__/gzhung lugs gdams par 'char bar byin gyis rang rlobs shig__/sngon 'gro rten dang dngos gzhi byang sems la sbyangs shing /__/rkyen ngan lam khyer tshe gcig nyams len du dril bas/__/blo sbyong mthar phyin bslab bya dam tshig dang ldan pa'i/__/gdams ngag nyams su myong bar byin gyis rang rlobs shig__/skyabs gnas bla ma dran pa nyams rtogs kyi zhing sa/__/lha sngags rnal 'byor bsgom pa gsang chen gyi thabs mkhas/__/snying rje stong nyid zung 'brel theg mchog gi gzhung lam/__/man ngag gnad du smin par byin gyis rang rlobs shig__/mdor na lha bzhi lus kyi dkyil 'khor la rdzogs pas/__/rjod byed sde snod gsum gyi legs bshad kyi ngag dang /__/brjod bya bslab gsum dag pas sems nyid la brgyan pa'i/__/bka' gdams rnam thar 'byongs pa'i smon lam zhig zhu'o/__/zhes pa'ang bka' gdams rin po che'i rnam thar la lhag par dad cing /__de'i gzhung lugs mang du thos pa'i bya bral ba 'jam dbyangs mkhyen brtse'i dbang pos/__byang rwa bsgreng rgyal ba'i dben gnas su 'byor ba'i skabs glo bur du yid la shar ba dang /__snga sor rgyud smad dge slong dge ba'i bshes gnyen dz+nyA na'i mtshan can gyis kyang 'di lta bu zhig bris shig ces bskul ba rjes su dran te rtse gcig gus pa'i yid kyis gsol ba btab pa dge legs su gyur cig__/__!