JKW-KABUM-21-ZHA-002-008

🚧 This website is under continued development. We appreciate your patience!

Previous Text Back to Volume PageNext Text

འཕགས་མ་སོ་སོར་འབྲང་མའི་འཁོར་ལོའི་མན་ངག་དོན་ཐམས་ཅད་ཡོངས་སུ་གྲུབ་པ་མཁས་པའི་རྣ་རྒྱན།

Wylie title	'phags ma so sor 'brang ma'i 'khor lo'i man ngag don thams cad yongs su grub pa mkhas pa'i rna rgyan
Location	mkhyen brtse'i bka' 'bum Volume 21, sde tshan 2, Text 8, Pages 159-170 (Folios 21a5 to 26b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'phags ma so sor 'brang ma'i 'khor lo'i man ngag don thams cad yongs su grub pa mkhas pa'i rna rgyan. In 'jam dbyangs mkhyen brtse'i dbang po'i bka' 'bum, Vol. 21: 159-170. Khams sde dge rdzong sar dgon: Rdzong sar blo gros phun tshogs, 2020.
Genre	Cakra and Amulet Designs - 'khor lo - srung 'khor
Deity	'phags ma so sor 'brang ma

1 Texts in this Section (sde tshan or chos tshan)

8 159-170	འཕགས་མ་སོ་སོར་འབྲང་མའི་འཁོར་ལོའི་མན་ངག་དོན་ཐམས་ཅད་ཡོངས་སུ་གྲུབ་པ་མཁས་པའི་རྣ་རྒྱན། 'phags ma so sor 'brang ma'i 'khor lo'i man ngag don thams cad yongs su grub pa mkhas pa'i rna rgyan Cakra and Amulet Designs - 'khor lo - srung 'khor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཕགས་མ་སོ་སོར་འབྲང་མའི་འཁོར་ལོའི་མན་ངག་དོན་ཐམས་ཅད་ཡོངས་སུ་གྲུབ་པ་མཁས་པའི་རྣ་རྒྱན་ཅེས་བྱ་བ་བཞུགས་སོ། །ན་མོ་གུ་ར་བེ། བྱ་རྒྱུད་དེ་བཞིན་གཤེགས་པའི་རིགས་ཀྱི་ཡུམ་འཕགས་མ་རིག་པའི་རྒྱལ་མོ་ལྔ་ལས། གསུམ་པ་རིག་པའི་རྒྱལ་མོ་སོ་སོར་འབྲང་མ་ཆེན་མོའི་གཟུངས་ནི། སྟོན་པ་རྡོ་རྗེ་ལྷུན་པོ་ཆེན་པོའི་ཟོམ་ཁང་བརྩེགས་རྡོ་རྗེ་ཆེན་པོའི་ས་གཞིར་རྡོ་རྗེའི་སེང་ཁྲི་ལ་བཞུགས་ཏེ་འཁོར་སྐྱེ་བ་གཅིག་གིས་ཐོགས་པའི་བྱང་སེམས་དང་། ཉན་ཐོས་དང་། འཇིག་རྟེན་པའི་འཁོར་དཔག་ཏུ་མེད་པ་དང་ཐབས་གཅིག་ཏུ་བཞུགས་པ་ན་སྨིན་མཚམས་ནས་འོད་བཀྱེ་སྟེ། ཞིང་ཐམས་ཅད་སྣང་བར་བྱས་ནས་འཁོར་ལ་རིག་སྔགས་ཀྱི་ཕན་ཡོན་གསུངས་ཏེ་རིག་སྔགས་རྒྱས་པར་བཀའ་སྩལ་ཏེ། དེ་ནས་རིག་སྔགས་ཀྱི་ཕན་ཡོན་སྒྲ་གཅན་ཟིན་བཟང་པོས་རིག་པ་འདི་ཡིད་ལ་བྱས་པས་མེས་མ་ཚུགས་པ་དང་། ཚོང་དཔོན་མཛོད་སྟོབས་ཅན་གྱི་བུ་ཀླུ་འཇོག་པོའི་དུག་གིས་ཟིན་པ་དགེ་བསྙེན་དྲི་མ་མེད་པར་གྲགས་པས་རིག་པ་འདི་བརྗོད་པས་ཉེ་བར་ཞི་བ་དང་། རྒྱལ་པོ་ཚངས་པས་བྱིན་གྱིས་རིག་པའི་རྒྱལ་མོ་འདི་སྤྱི་བོར་བཏགས་པས་ཕ་རོལ་གྱི་དམག་ཚོགས་ལས་རྒྱལ་བ་དང་། དགེ་སློང་བསླབ་པ་དྲལ་ཞིང་མི་དགེ་བ་མང་དུ་སྤྱད་པ་དགེ་བསྙེན་ཞིག་གིས་རིག་པའི་རྒྱལ་མོ་འདི་བྲིས་ཏེ་དེའི་མདུན་དུ་བཏགས་པས། ནད་ལས་གྲོལ་ཞིང་མནར་མེད་པའི་སེམས་ཅན་དམྱལ་བ་ལས་གྲོལ་ཏེ་སུམ་ཅུ་རྩ་གསུམ་པའི་ལྷའི་ནང་དུ་སྐྱེས་པ་དང་། ཚོང་དཔོན་དྲི་མེད་དུང་གིས་རྒྱ་མཚན་རྩེ་མོར་བཏགས་པས། རྒྱ་མཚོ་འཁྲུགས་པའི་འཇིགས་པ་ལས་ཐར་བ་དང་། རྒྱལ་པོ་ལག་བརྐྱང་གིས་བཙུན་མོ་དམ་པའི་མགུལ་དུ་བཏགས་པས་བུ་མེད་པའི་སྡུག་བསྔལ་ལས་གྲོལ་བ་དང་། ལྷའི་དབང་པོ་བརྒྱ་བྱིན་གྱིས་སྤྱི་བོར་བཏགས་པས་ལྷ་མ་ཡིན་གྱི་ཕྱོགས་ལས་རྣམ་པར་རྒྱལ་བའི་གཏམ་རྒྱུད་ངོ་མཚར་བ་བཅས་གསུངས་ནས། སྙིང་པོ། ཉེ་སྙིང་། རབ་ཏུ་གསང་བའི་སྙིང་པོ་ཕན་ཡོན་དང་བཅས་པ་གསུངས་ཏེ། འདིས་སྟོན་པ་རྒྱ་ཆེར་རབ་ཏུ་བཞད་པའི་ཞལ་གྱིས་ཡིད་ཀྱིས་ལན་བདུན་བརྗོད་པས་བདུད་ཐམས་ཅད་བཅོམ་པ་དང་། རྒྱལ་པོ་ཚངས་པས་བྱིན་གྱིས་ཆད་པས་བཅད་པའི་འཕགས་རྒྱལ་བའི་མི་ཞིག་གིས་ཡིད་ལ་དྲན་པས་གཤེད་མ་དང་། གནོད་སྦྱིན་དང་། ཆུའི་འཇིགས་པས་མ་ཚུགས་ཤིང་རྒྱལ་པོའི་ཆད་པ་ལས་གྲོལ་བའི་གཏམ་རྒྱུད་གསུངས་ནས་འཁོར་ལོ་བྲི་བའི་ཆོ་ག་ཕན་ཡོན་དང་བཅས་པ་དང་། བསྲུང་བའི་ཆོ་ག་རིག་སྔགས་ཕན་ཡོན་དང་བཅས་པ་དང་། ནད་གསོ་བའི་ཆོ་ག་ཕན་ཡོན་དང་བཅས་པ་གསུངས་སོ། །དེ་ལྟར་རིག་སྔགས་སྡེ་ཚན་གསུམ་གྱི་དང་པོའི་སྐབས། བྲམ་ཟེ་ཆེན་པོ་གང་ལ་ལ་ཞིག་རིག་པའི་རྒྱལ་མོ་སོ་སོར་འབྲང་མ་ཆེན་མོ་འདི་ཆོ་ག་བཞིན་དུ་བྲིས་ཏེ་ལག་པའམ། མགུལ་དུ་བཏགས་ན་དེ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་སྐུར་རིག་པར་བྱའོ། །རྡོ་རྗེའི་ལུས་ཡིན་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་རིང་བསྲེལ་གྱི་སྙིང་པོ་ཅན་ཡིན་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་སྤྱན་ཡིན་པར་རིག་པར་བྱའོ། །དེ་རྡོ་རྗེ་ཆེན་པོའི་ལུས་སུ་རིག་པར་བྱའོ། །དེ་འབར་བ་འོད་འཕྲོ་པའི་ལུས་དང་ལྡན་པར་རིག་པར་བྱའོ། །དེ་མི་ཤིག་པའི་ཆོ་ག་ཅན་དུ་རིག་པར་བྱའོ། །དེ་དགྲ་ཐམས་ཅད་རབ་ཏུ་འཇོམས་པར་རིག་པར་བྱའོ། །དེ་སྒྲིབ་པ་དང་སྡིག་པ་ཐམས་ཅད་འཇོམ་པར་རིག་པར་བྱའོ། །དེ་སེམས་ཅན་དམྱལ་བའི་འགྲོ་བ་རྣམས་སྦྱོང་བར་རིག་པར་བྱའོ། །ཞེས་མཚམས་སྦྱར་ཏེ་དགེ་སློང་ངན་འགྲོ་ལས་གྲོལ་བའི་ཚུལ་རྒྱས་པར་གསུངས་པའི་འཇུག་ཏུ། དེ་ཚེ་དེར་ནི་དེ་དག་གིས། །རྒྱལ་པོའི་ཕོ་བྲང་ཉེ་བ་ན། །སྒང་བུ་དེ་ཡི་འཁོར་ཡུག་ན། །འབར་བ་གཅིག་གིས་གང་བར་མཐོང་། །མི་རོ་ཞིག་གི་མགུལ་བ་ན། །སོ་སོར་འབྲང་བ་བཏགས་པའང་མཐོང་། །ལྷ་དང་ཀླུ་དང་དྲི་ཟ་དང་། །གནོད་སྦྱིན་སྲིན་པོ་མིའམ་ཅིས། །ཀུན་ནས་འཁོར་བར་བསྐོར་ནས་ནི། །བླ་ན་མེད་པའི་མཆོད་པ་བྱེད། །དེ་ལ་གནོད་སྦྱིན་དེ་དག་གིས། །སོ་སོར་འབྲང་བའི་སྒང་ཞེས་བཏགས། །ཞེས་གསུངས། དེའང་དགེ་སློང་སྡིག་པ་སྣ་ཚོགས་བྱེད་པ་དེ་འཆི་ནད་ཚབས་ཆེན་པོས་བཏབ་པ་ན། དགེ་བསྙེན་ཞིག་གིས་སོ་སོར་འབྲང་མ་འདི་བྲིས་ཏེ་མགུལ་དུ་བཏགས་པས་ནད་འཕྲལ་དུ་ཞི། དྲན་པ་ཤིན་ཏུ་ཉེ་བར་བཞག་སྟེ། འཆི་བའི་དུས་བྱས་པ་ན་དེ་མ་ཐག་ཏུ་སྡིག་པའི་མཐུས་མནར་མེད་པའི་དམྱལ་བར་སྐྱེས། རོ་དེ་སྒང་བུ་ཞིག་ལ་བཞག་ནས་སོ་སོར་འབྲང་མའང་མགུལ་དུ་བཏགས་བཞིན་པའི་བྱིན་རླབས་ཀྱིས། མནར་མེད་ཀྱི་མེ་རང་ཞི་ནས། སེམས་ཅན་དམྱལ་བ་ཀུན་ཀྱང་བདེ་བ་དང་ལྡན་པར་གྱུར། དེ་གཤིན་རྗེའི་མི་རྣམས་ཀྱིས་ཆོས་ཀྱི་རྒྱལ་པོ་ལ་བརྗོད་པས། གཤིན་རྗེའི་རྒྱལ་པོས་སོ་སོར་འབྲང་བ་བཏགས་པའི་མཐུ་ཡིན་པའི་ཚུལ་རྒྱས་པར་བསྙད་ཅིང་། གང་གིས་ཚིག་རྣམས་ཡོངས་དྲན་པས། །དེ་ནི་ངན་འགྲོར་འགྲོ་མི་འགྱུར། །སོ་སོར་འབྲང་བ་བསྒོམ་པ་ཡི། །ཤེས་རབ་ཅན་དེ་བདེ་འགྲོར་འགྲོ། །སེམས་ཅན་དམྱལ་བའི་སྲུང་མ་ཁྱེད། །རབ་ཏུ་རྒྱལ་དང་ལྡན་པར་དང་། །དེར་ནི་སྒང་བུ་མཐོན་པོ་ན། །ལྷ་རྣམས་ཀྱིས་ནི་བསྐོར་བ་ལྟོས། །སོགས་བསྐུལ་པས་དེ་རྣམས་སོང་བ་ན་གོང་དུ་སྨོས་པ་བཞིན་མཐོང་བས་ངོ་མཚར་ཞིང་། དགེ་སློང་དེ་སུམ་ཅུ་རྩ་གསུམ་པའི་ལྷར་སྐྱེས་ཚུལ་ཤིན་ཏུ་རྒྱས་པར་གསུངས་སོ། །ཡང་། རྒྱལ་པོ་ཚངས་པས་བྱིན་གྱི་ལོ་རྒྱུས་སྐབས། རྒྱལ་པོ་ཚངས་པས་བྱིན་སྤོས་ཆུ་སྣ་ཚོགས་ཀྱིས་མགོ་བཀྲུས་ཏེ། གོས་གཙང་མ་བགོས་ནས་རིག་པའི་རྒྱལ་མོ་འདི་ཆོ་ག་བཞིན་དུ་བྲིས་ཏེ། མགོའི་གཙུག་གི་སྐྲའི་ནང་དུ་བཞག་སྟེ་རིག་པའི་རྒྱལ་མོ་འདི་ཉིད་ཀྱི་གོ་ཆ་བྱས་ཏེ་གཡུལ་གྱི་ནང་དུ་ཞུགས་པ་དང་། ཞེས་སོགས་ཀྱིས་གཡུལ་ལས་རྒྱལ་བའི་ཚུལ་དང་། ཚོང་དཔོན་དྲི་མེད་དུང་གི་ལོ་རྒྱུས་ལས་འཕྲོས་ནས། འདི་ཉིད་རྒྱལ་མཚན་གྱི་རྩེ་མོར་བཏགས་ན། རླུང་དང་། གྲང་བ་དང་། དུས་མ་ཡིན་པའི་སྤྲིན་དང་། གློག་དང་། ལྕེ་འབབས་པ་ཐམས་ཅད་ཞི་བ་དང་། འཐབ་རྩོད་ཐམས་ཅད་ལས་ཐར་བ་དང་། ལོ་ཏོག་ལ་འཚེ་བའི་སྲོག་ཆགས་ཐམས་ཅད་ཞི་བ་དང་། གཅན་གཟན་སོགས་ཀྱི་འཇིགས་པ་དང་བྲལ་བ་དང་། མེ་ཏོག་དང་། ལོ་མ་དང་། སྨན་དང་། འབྲས་བུ་རྣམ་པར་འཕེལ་བ་དང་། ཆར་ཆུ་དུས་སུ་འབེབས་པ་སོགས་ཡོན་ཏན་མཐའ་ཡས་པར་གསུངས་ཤིང་། ཡང་འདི་སྐད་དུ། ཡུལ་གང་ན་རིག་པའི་རྒྱལ་མོ་སོ་སོར་འབྲང་མ་ཆེན་མོ་ཞེས་བྱ་བ་འདི་སྤྱོད་པའི་ཡུལ་དེར་སེམས་ཅན་དེ་དག་གིས་ཤེས་པར་བྱ་སྟེ། སྤོས་སྣ་ཚོགས་དང་། བདུག་པ་སྣ་ཚོགས་དང་། མེ་ཏོག་སྣ་ཚོགས་ཀྱིས་མཆོད་ཅིང་བསྟི་སྟང་བྱས་ལ། ཚོན་སྣ་ཚོགས་ཀྱིས་དཀྲིས་ཏེ་རྒྱལ་མཚན་གྱི་རྩེ་མོར་བཏགས་ནས་གླུ་དབྱངས་དང་། རོལ་མོ་སིལ་སྙན་བྱས་ཏེ། བསྐོར་བ་བྱས་ན་ལྷ་རྣམས་དང་། བརྒྱ་བྱིན་དང་། ཚངས་པ་ལ་སོགས་པའི་སེམས་ཅན་ཆེན་པོ་དེ་དག་གིས་བསམ་པ་ཇི་ལྟ་བ་བཞིན་དུ་རེ་བ་ཡོངས་སུ་རྫོགས་པར་བྱེད་པར་འགྱུར་རོ། །ཞེས་དང་། བུ་ཕོ་འདོད་ནའང་ཁྱེའུར་འགྲུབ། །མངལ་ན་འཛིན་པ་དམ་པར་འགྱུར། །མངལ་ན་བདེ་བར་སྐྱེ་བ་དང་། །མངལ་ནས་བདེ་བར་བཙས་པར་འགྱུར། །མངལ་ན་དུས་བཞིན་སྐྱེ་བ་དང་། །དུས་བཞིན་རབ་ཏུ་བཙས་པར་འགྱུར། །ཅེས་པས་མཚམས་སྦྱར་ཏེ་རྒྱལ་པོ་ལག་བརྐྱང་གི་ལོ་རྒྱུས་དང་། རྒྱུ་སྐར་གྱི་རྒྱལ་པོ་རྒྱལ་གྱི་ཉིན་པར་བཙུན་མོ་དམ་པ་ལུས་ཤིན་ཏུ་ལེགས་པར་བཀྲུས་ཏེ། སྨྱུང་བ་བྱས་ནས་རིག་པའི་རྒྱལ་མོ་ཆེན་མོ་སོ་སོར་འབྲང་མ་འདི་ཡང་ཆོ་ག་བཞིན་དུ་བྲིས་ཏེ་བཙུན་མོ་དམ་པ་དེའི་མགུལ་དུ་བཏགས་སོ། །སངས་རྒྱས་ཀྱི་མཆོད་རྟེན་རྣམས་ལའང་མཆོད་པ་ཆེན་པོ་བྱས་སོ། །རིན་པོ་ཆེ་ཁྱད་པར་ཅན་དུ་མ་ཡང་སེམས་ཅན་རྣམས་ལ་སྦྱིན་པ་བྱིན་ནོ། །ཞེས་འབྱུང་ངོ་། །རིག་སྔགས་སྡེ་ཚན་གཉིས་པའི་མཇུག་ཏུ་དེ་ལྟར་ན་རིག་པའི་རྒྱལ་མོ་ཆེན་མོ་འདི་ཡོངས་སུ་ཤེས་ཏེ། གང་དུ་ཡང་ཐོགས་པ་མེད་དོ། །དེ་ལྟ་བས་ན་གདོན་མི་ཟ་བར་རྟག་ཏུ་ལུས་ལ་གདགས་ཤིང་བཅང་བར་བྱའོ། །བྲམ་ཟེ་ཆེན་པོ་སྐར་མ་བཟང་པོ་ལ་ཆོ་ག་ལེགས་པར་བྱས་ཏེ། རིག་པའི་རྒྱལ་མོ་འདི་བྲི་བར་བྱའོ། །དེ་ནས་བྲམ་ཟེ་ཆེན་པོ་དེ་ཡིད་རབ་ཏུ་དགའ་ནས་བཅོམ་ལྡན་འདས་ལ་ཡན་ལག་ལྔས་ཕྱག་འཚལ་ཏེ་ཞུས་པ། བཙུན་པ་བཅོམ་ལྡན་འདས་རིག་པའི་རྒྱལ་མོ་ཆེན་མོ་འདིའི་ཆོ་ག་ཇི་ལྟར་བགྱིས་ཏེ་བྲི་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ་ཁྱོད་ཉོན་ཅིག །སེམས་ཅན་ཀུན་ལ་སྙིང་བརྩེའི་ཕྱིར། །ངས་ནི་ཁྱོད་ལ་བཤད་པར་བྱ། །གང་གིས་སེམས་ཅན་བདེ་བྱེད་ཅིང་། །ཉམས་ང་བ་ཡི་ལས་ལས་འགྲོལ། །ནད་རྣམས་ལས་ཀྱང་ཐར་བྱ་དང་། །བུད་མེད་སྦྲུམ་མར་འགྱུར་བ་དང་། །སེམས་ཅན་རྣམས་ཀྱི་དབུལ་བ་ཡི། །རྨ་རྣམས་གསོ་བར་བྱ་ཕྱིར་རོ། །ཞེས་དགོས་པ་དང་། བསྙེན་གནས་དག་ལ་གནས་གྱུར་པས། ཞེས་གང་ཟག་དང་། རྒྱུ་སྐར་རྒྱལ་དུ་ཤེས་པ་ལ། ཞེས་དུས་དང་། སངས་རྒྱས་མཆོད་ལ་བརྩོན་བྱས་ཏེ། །བྱང་ཆུབ་ཕྱིར་ནི་སེམས་ཀྱང་བསྐྱེད། །སྙིང་རྗེས་ཀུན་ཏུ་བརྟན་སེམས་དང་། །བྱམས་པ་དང་ཡང་ལྡན་གྱུར་ནས། །རྟག་ཏུ་སེམས་ཅན་ཐམས་ཅད་ལ། །ཕན་པ་བསྐྱེད་པ་བརྩོན་པར་བྱ། །ཞེས་བསམ་པ་དང་། ཙནྡན་དང་ནི་གུར་གུམ་དང་། །གླ་རྩིར་བསྲེས་པའི་ཆུས་བཀྲུས་ཏེ། །བདུག་པ་རྣམས་ཀྱིས་བདུག་པ་ཡི། །གོས་གཙང་རྣམས་ནི་བགོ་བར་བྱ། །ཞེས་སྔོན་དུ་བྱ་བ་དང་། ས་ལ་ལྕི་བ་བསྲེས་པ་ཡིས། དེ་ཡི་འོག་ཏུ་དཀྱིལ་འཁོར་བྱ། ཞེས་སོགས་དཀྱིལ་འཁོར་བྱ་བའི་ཚུལ་རྒྱས་པར་གསུངས་ནའང་། ད་ལྟ་སྒྲུབ་མཆོད་དང་འབྲེལ་པར་བྱས་ན་དེས་ཁྱབ་པར་སྣང་། ཁ་ཟས་དཀར་པོ་ཟོས་ནས་སུ། །ཕན་པར་འདོད་པས་བྲི་བར་བྱ། །ཞེས་ཀུན་སྤྱོད་དང་། དར་རམ་རས་སམ་གྲོ་གའམ། །ཅི་ཡང་རུང་བ་གཞན་ལ་བྲི། །ཞེས་བྲི་གཞི་དང་། བུད་མེད་དག་ལ་བུ་འདོད་ན། །གི་འུ་ཝང་གིས་ལེགས་པར་བྲི། །དབུས་སུ་ཁྱེའུ་ཞིག་བྲིས་ནས། །རྒྱན་རྣམས་ཀུན་གྱིས་རྣམ་པར་བརྒྱན། །དེ་བཞིན་རིན་ཆེན་གང་བའི་སྣོད། །ལག་པ་གཡོན་ན་ཐོགས་པར་བྱ། །པདྨ་རབ་ཏུ་རྒྱས་གྱུར་ཅིག །བརྒྱན་པ་ལ་ནི་དེ་འདུག་བྱ། །ནོར་བུ་དོ་ཤལ་གསེར་དག་དང་། །རིན་ཆེན་སྣ་ཚོགས་རྣམས་ཀྱིས་བརྒྱན། །འདུལ་བར་ཤིན་ཏུ་དཀའ་བ་བྲི། །གྲ་བཞི་དག་ཏུ་རི་བོ་བྲི། །གལ་ཏེ་བདེ་བར་འཚོ་འདོད་ན། །རབ་ཏུ་བསྒྲིམས་ཏེ་དེ་ལྟར་བྲི། །བྱེ་བྲག་ཏུ་ནི་སྐྱེས་པ་རྣམས། །གུར་གུམ་གྱིས་ནི་བྲི་བར་བྱ། །དེ་ཡི་དགོས་པ་འདོད་པ་རྣམས། །འགྲུབ་འགྱུར་འདི་ལ་ཐེ་ཚོམ་མེད། །པདྨ་གཉིས་སམ་ཡང་ན་གསུམ། །བཞིའམ་ཡང་ན་ལྔ་བྲིས་ཏེ། །པདྨ་ལ་ནི་ཕྱག་རྒྱའི་མཚན། །རྣམ་པ་སྣ་ཚོགས་གཟུགས་སུ་བྲི། །ཞེས་སོགས་ཇི་ལྟར་འབྲི་བའི་ཚུལ་སྤྱི་དང་། དགེ་སློང་ཕྱིར་ནི་རྡོ་རྗེ་འཆང་། །གནོད་སྦྱིན་བསྡིགས་པར་བརྩོན་པ་བྲི། །རྒྱལ་པོ་ཆེན་པོ་བཞི་རྣམས་ཀྱང་། །ངོས་བཞི་རྣམས་སུ་བྲི་བར་བྱ། །ཞེས་སོགས་བྱེ་བྲག་གི་འབྲི་ཚུལ་རྒྱས་པར་གསུངས། འདི་ལ་རྒྱལ་རིགས་ལ་དབང་ཕྱུག །དམངས་རིགས་ལ་རྟག་ཞི་བ་དང་། ཁྱབ་འཇུག །རྗེའུ་རིགས་ཕྱིར་རྣམ་ཐོས་ཀྱི་བུ་དང་། །ལྷའི་དབང་ཕྱུག་དབང་པོ་སོགས་བྲི་བར་གསུངས། ཆོ་ག་བཞིན་དུ་ངེས་བྲིས་ལ། །བློ་གྲོས་ལྡན་པའི་མིས་བསྲེལ་ན། །ཟ་མ་དང་ནི་མ་ནིང་ཡང་། །བུ་ཕོ་རྙེད་པར་འགྱུར་བ་ཡིན། །འདིས་ནི་ཐམས་ཅད་འགྲུབ་པར་བྱེད། །ཤིས་ཤིང་སྡིག་པ་ཞི་བར་བྱེད། །རང་བྱུང་གི་ནི་བཀའ་བཞིན་དུ། །གནས་ཀྱི་དམ་པ་ཐོབ་པར་འགྱུར། །འཇིག་རྟེན་འདི་ན་མཆོག་ཏུ་བདེ། །འཇིག་རྟེན་ཕ་རོལ་ཤིན་ཏུ་བདེ། །སུམ་ཅུ་རྩ་གསུམ་གནས་ལ་སོགས། །ལྷ་གནས་དེའི་གནས་སུ་འགྱུར། །འཛམ་གླིང་བཟང་ཞིང་ཉམས་དགའ་བར། །ཁྱད་པར་ཅན་རིགས་གྲགས་པ་དང་། །རྒྱལ་རིགས་ཁྱད་པར་འཕགས་པ་དང་། །བྲམ་ཟེ་ཁྱད་པར་འཕགས་རྣམས་སུ། །བདག་ཉིད་ཆེན་པོ་དེ་སྐྱེས་ཏེ། །རྟག་ཏུ་རིག་དང་བདེ་བར་འགྱུར། །སོ་སོར་འབྲང་བ་འཆང་བའི་མིས། །བསོད་ནམས་ཐོབ་པ་གང་ཡིན་པ། །སངས་རྒྱས་དག་ནི་ཐམས་ཅད་ཀྱིས། །བསོད་ནམས་ཕུང་པོ་བརྗོད་མི་ནུས། །སེམས་ཅན་དམྱལ་བའི་སྒོ་རྣམས་བཅད། །མཐོ་རིས་སྒོ་རྣམས་རབ་ཏུ་ཕྱེ། །བདེ་བ་ཕུན་སུམ་ཚོགས་པ་དང་། །བློ་གྲོས་ཆེན་པོར་འགྱུར་བ་ཡིན། །སངས་རྒྱས་བྱང་ཆུབ་སེམས་དཔས་ཀྱང་། །རྟག་ཏུ་དབུགས་ནི་འབྱིན་པར་འགྱུར། །ལུས་ཀྱི་བདེ་བ་ཕུན་སུམ་ཚོགས། །སྟོབས་ཀྱང་ཆེ་བར་འགྱུར་པ་ཡིན། །རྒྱལ་བས་ཇི་སྐད་གསུངས་པ་ལྟར། །འཁོར་ལོས་སྒྱུར་བར་འགྱུར་བ་ཡིན། །མི་དང་ལྷ་རྣམས་དབུགས་འབྱིན་ཏེ། གནོད་པར་སེམས་པ་སྐྲག་པར་བྱེད། །གང་ཕྱིར་རིག་པ་ལེགས་བཤད་པ། །དེ་ནི་རིང་པོར་མི་ཐོགས་སོ། །དེ་ནི་མཚོན་གྱིས་མི་ཚུགས་ཏེ། །དུག་དང་མེས་ཀྱང་ཚུགས་མི་འགྱུར། །དུས་མིན་འཆི་བའི་སྡིག་པ་ཡང་། །དེ་ལས་ཐག་ནི་རིང་དུ་འགྲོ། །རྣམ་པ་ཀུན་ཏུ་ཉན་པའམ། །མཐོང་བ་དང་ནི་རིག་པའང་རུང་། །འབྱུང་པོ་གདོན་དང་རྩོད་པ་དང་། །ཆུ་དང་མེ་ཡིས་འཇིགས་པ་དང་། །གཅན་གཟན་སྦྲུལ་དང་སེངྒེ་དང་། །ཀླུ་དང་ནད་ནི་མི་བཟད་རྣམས། །གང་ལ་རིག་པ་ལེགས་བཤད་པ། །དེ་ལ་དེ་དག་ཀུན་མི་འབྱུང་། །དེ་དག་སེམས་ཅན་ཀུན་མཆོག་འགྱུར། །བདུད་རྣམས་ཀུན་གྱིས་ཐམས་ཅད་དུ། །མཆོད་པར་འགྱུར་བའི་འོས་ཡིན་ཏེ། །ཡང་དག་བཤད་ཀྱིས་མཉན་པར་བྱོས། །ཞེས་ཕན་ཡོན་རྒྱ་ཆེར་བསྔགས་སོ། །རིག་སྔགས་སྡེ་ཚན་གསུམ་པ་རྫོགས་པའི་མཇུག་ཏུ། ནད་པ་རྣམས་ནི་གསོ་བྱ་བ། །ད་ནི་རབ་ཏུ་བཤད་པར་བྱ། །ཞེས་མཚམས་སྦྱར་ནས། ས་དང་ལྕི་བ་བསྲེས་པ་ཡིས། །དཀྱིལ་འཁོར་གྲུ་བཞི་རྣམ་པ་བྱ། །སོགས་དཀྱིལ་འཁོར་བྱ་བའི་ཚུལ་དང་། །དེ་ཡི་འོག་ཏུ་ནད་པ་ཡང་། །དྲི་ཞིམ་སྤོས་ཀྱིས་ལུས་བསྐུས་ཏེ། །གཙང་མའི་གོས་རྣམས་བཀོན་ནས་ནི། །དཀྱིལ་འཁོར་དབུས་སུ་བཞག་པར་བྱ། །དེ་ནས་ཤར་ཕྱོགས་ཁ་བསྟན་ཏེ། །རིག་པ་འདི་ནི་བརྗོད་པར་བྱ། །ལན་བདུན་བཟླས་བརྗོད་བྱས་ནས་སུ། །མཁས་པས་དེ་ལ་བསྲུང་བར་བྱ། །དེ་ནས་ནད་པའི་དོན་གྱི་ཕྱིར། །ལན་གྲངས་ཉི་ཤུ་རྩ་གཅིག་ཏུ། །རིག་པ་འདི་ནི་བརྗོད་བྱས་ན། །དེས་ནི་ནད་ཀུན་ཞི་བར་འགྱུར། །ཞེས་ནད་པ་གསོ་བའི་ཆོ་གའི་དངོས་གཞི་དང་། འཇུག་ཏུ་གཏོར་མ་ལྷོ། ནུབ། བྱང་། འོག །སྟེང་རྣམས་སུ་བཏང་བར་གསུངས་སོ། ། ༈

[edit]

'phags ma so sor 'brang ma'i 'khor lo'i man ngag don thams cad yongs su grub pa mkhas pa'i rna rgyan/ 'phags ma so sor 'brang ma'i 'khor lo'i man ngag don thams cad yongs su grub pa mkhas pa'i rna rgyan ces bya ba bzhugs so/__/na mo gu ra be/__bya rgyud de bzhin gshegs pa'i rigs kyi yum 'phags ma rig pa'i rgyal mo lnga las/__gsum pa rig pa'i rgyal mo so sor 'brang ma chen mo'i gzungs ni/__ston pa rdo rje lhun po chen po'i zom khang brtsegs rdo rje chen po'i sa gzhir rdo rje'i seng khri la bzhugs te 'khor skye ba gcig gis thogs pa'i byang sems dang /__nyan thos dang /__'jig rten pa'i 'khor dpag tu med pa dang thabs gcig tu bzhugs pa na smin mtshams nas 'od bkye ste/__zhing thams cad snang bar byas nas 'khor la rig sngags kyi phan yon gsungs te rig sngags rgyas par bka' stsal te/__de nas rig sngags kyi phan yon sgra gcan zin bzang pos rig pa 'di yid la byas pas mes ma tshugs pa dang /__tshong dpon mdzod stobs can gyi bu klu 'jog po'i dug gis zin pa dge bsnyen dri ma med par grags pas rig pa 'di brjod pas nye bar zhi ba dang /__rgyal po tshangs pas byin gyis rig pa'i rgyal mo 'di spyi bor btags pas pha rol gyi dmag tshogs las rgyal ba dang /__dge slong bslab pa dral zhing mi dge ba mang du spyad pa dge bsnyen zhig gis rig pa'i rgyal mo 'di bris te de'i mdun du btags pas/__nad las grol zhing mnar med pa'i sems can dmyal ba las grol te sum cu rtsa gsum pa'i lha'i nang du skyes pa dang /__tshong dpon dri med dung gis rgya mtshan rtse mor btags pas/__rgya mtsho 'khrugs pa'i 'jigs pa las thar ba dang /__rgyal po lag brkyang gis btsun mo dam pa'i mgul du btags pas bu med pa'i sdug bsngal las grol ba dang /__lha'i dbang po brgya byin gyis spyi bor btags pas lha ma yin gyi phyogs las rnam par rgyal ba'i gtam rgyud ngo mtshar ba bcas gsungs nas/__snying po/__nye snying /__rab tu gsang ba'i snying po phan yon dang bcas pa gsungs te/__'dis ston pa rgya cher rab tu bzhad pa'i zhal gyis yid kyis lan bdun brjod pas bdud thams cad bcom pa dang /__rgyal po tshangs pas byin gyis chad pas bcad pa'i 'phags rgyal ba'i mi zhig gis yid la dran pas gshed ma dang /__gnod sbyin dang /__chu'i 'jigs pas ma tshugs shing rgyal po'i chad pa las grol ba'i gtam rgyud gsungs nas 'khor lo bri ba'i cho ga phan yon dang bcas pa dang /__bsrung ba'i cho ga rig sngags phan yon dang bcas pa dang /__nad gso ba'i cho ga phan yon dang bcas pa gsungs so/__/de ltar rig sngags sde tshan gsum gyi dang po'i skabs/__bram ze chen po gang la la zhig rig pa'i rgyal mo so sor 'brang ma chen mo 'di cho ga bzhin du bris te lag pa'am/__mgul du btags na de de bzhin gshegs pa thams cad kyi byin gyis brlabs par rig par bya'o/__/de de bzhin gshegs pa thams cad kyi skur rig par bya'o/__/rdo rje'i lus yin par rig par bya'o/__/de de bzhin gshegs pa thams cad kyi ring bsrel gyi snying po can yin par rig par bya'o/__/de de bzhin gshegs pa thams cad kyi spyan yin par rig par bya'o/__/de rdo rje chen po'i lus su rig par bya'o/__/de 'bar ba 'od 'phro pa'i lus dang ldan par rig par bya'o/__/de mi shig pa'i cho ga can du rig par bya'o/__/de dgra thams cad rab tu 'joms par rig par bya'o/__/de sgrib pa dang sdig pa thams cad 'jom par rig par bya'o/__/de sems can dmyal ba'i 'gro ba rnams sbyong bar rig par bya'o/__/zhes mtshams sbyar te dge slong ngan 'gro las grol ba'i tshul rgyas par gsungs pa'i 'jug tu/__de tshe der ni de dag gis/__/rgyal po'i pho brang nye ba na/__/sgang bu de yi 'khor yug na/__/'bar ba gcig gis gang bar mthong /__/mi ro zhig gi mgul ba na/__/so sor 'brang ba btags pa'ang mthong /__/lha dang klu dang dri za dang /__/gnod sbyin srin po mi'am cis/__/kun nas 'khor bar bskor nas ni/__/bla na med pa'i mchod pa byed/__/de la gnod sbyin de dag gis/__/so sor 'brang ba'i sgang zhes btags/__/zhes gsungs/__de'ang dge slong sdig pa sna tshogs byed pa de 'chi nad tshabs chen pos btab pa na/__dge bsnyen zhig gis so sor 'brang ma 'di bris te mgul du btags pas nad 'phral du zhi/__dran pa shin tu nye bar bzhag ste/__'chi ba'i dus byas pa na de ma thag tu sdig pa'i mthus mnar med pa'i dmyal bar skyes/__ro de sgang bu zhig la bzhag nas so sor 'brang ma'ang mgul du btags bzhin pa'i byin rlabs kyis/__mnar med kyi me rang zhi nas/__sems can dmyal ba kun kyang bde ba dang ldan par gyur/__de gshin rje'i mi rnams kyis chos kyi rgyal po la brjod pas/__gshin rje'i rgyal pos so sor 'brang ba btags pa'i mthu yin pa'i tshul rgyas par bsnyad cing /__gang gis tshig rnams yongs dran pas/__/de ni ngan 'gror 'gro mi 'gyur/__/so sor 'brang ba bsgom pa yi/__/shes rab can de bde 'gror 'gro/__/sems can dmyal ba'i srung ma khyed/__/rab tu rgyal dang ldan par dang /__/der ni sgang bu mthon po na/__/lha rnams kyis ni bskor ba ltos/__/sogs bskul pas de rnams song ba na gong du smos pa bzhin mthong bas ngo mtshar zhing /__dge slong de sum cu rtsa gsum pa'i lhar skyes tshul shin tu rgyas par gsungs so/__/yang /__rgyal po tshangs pas byin gyi lo rgyus skabs/__rgyal po tshangs pas byin spos chu sna tshogs kyis mgo bkrus te/__gos gtsang ma bgos nas rig pa'i rgyal mo 'di cho ga bzhin du bris te/__mgo'i gtsug gi skra'i nang du bzhag ste rig pa'i rgyal mo 'di nyid kyi go cha byas te g.yul gyi nang du zhugs pa dang /__zhes sogs kyis g.yul las rgyal ba'i tshul dang /__tshong dpon dri med dung gi lo rgyus las 'phros nas/__'di nyid rgyal mtshan gyi rtse mor btags na/__rlung dang /__grang ba dang /__dus ma yin pa'i sprin dang /__glog dang /__lce 'babs pa thams cad zhi ba dang /__'thab rtsod thams cad las thar ba dang /__lo tog la 'tshe ba'i srog chags thams cad zhi ba dang /__gcan gzan sogs kyi 'jigs pa dang bral ba dang /__me tog dang /__lo ma dang /__sman dang /__'bras bu rnam par 'phel ba dang /__char chu dus su 'bebs pa sogs yon tan mtha' yas par gsungs shing /__yang 'di skad du/__yul gang na rig pa'i rgyal mo so sor 'brang ma chen mo zhes bya ba 'di spyod pa'i yul der sems can de dag gis shes par bya ste/__spos sna tshogs dang /__bdug pa sna tshogs dang /__me tog sna tshogs kyis mchod cing bsti stang byas la/__tshon sna tshogs kyis dkris te rgyal mtshan gyi rtse mor btags nas glu dbyangs dang /__rol mo sil snyan byas te/__bskor ba byas na lha rnams dang /__brgya byin dang /__tshangs pa la sogs pa'i sems can chen po de dag gis bsam pa ji lta ba bzhin du re ba yongs su rdzogs par byed par 'gyur ro/__/zhes dang /__bu pho 'dod na'ang khye'ur 'grub/__/mngal na 'dzin pa dam par 'gyur/__/mngal na bde bar skye ba dang /__/mngal nas bde bar btsas par 'gyur/__/mngal na dus bzhin skye ba dang /__/dus bzhin rab tu btsas par 'gyur/__/ces pas mtshams sbyar te rgyal po lag brkyang gi lo rgyus dang /__rgyu skar gyi rgyal po rgyal gyi nyin par btsun mo dam pa lus shin tu legs par bkrus te/__smyung ba byas nas rig pa'i rgyal mo chen mo so sor 'brang ma 'di yang cho ga bzhin du bris te btsun mo dam pa de'i mgul du btags so/__/sangs rgyas kyi mchod rten rnams la'ang mchod pa chen po byas so/__/rin po che khyad par can du ma yang sems can rnams la sbyin pa byin no/__/zhes 'byung ngo /__/rig sngags sde tshan gnyis pa'i mjug tu de ltar na rig pa'i rgyal mo chen mo 'di yongs su shes te/__gang du yang thogs pa med do/__/de lta bas na gdon mi za bar rtag tu lus la gdags shing bcang bar bya'o/__/bram ze chen po skar ma bzang po la cho ga legs par byas te/__rig pa'i rgyal mo 'di bri bar bya'o/__/de nas bram ze chen po de yid rab tu dga' nas bcom ldan 'das la yan lag lngas phyag 'tshal te zhus pa/__btsun pa bcom ldan 'das rig pa'i rgyal mo chen mo 'di'i cho ga ji ltar bgyis te bri bar bgyi/__bcom ldan 'das kyis bka' stsal pa/__bram ze chen po khyod nyon cig__/sems can kun la snying brtse'i phyir/__/ngas ni khyod la bshad par bya/__/gang gis sems can bde byed cing /__/nyams nga ba yi las las 'grol/__/nad rnams las kyang thar bya dang /__/bud med sbrum mar 'gyur ba dang /__/sems can rnams kyi dbul ba yi/__/rma rnams gso bar bya phyir ro/__/zhes dgos pa dang /__bsnyen gnas dag la gnas gyur pas/__zhes gang zag dang /__rgyu skar rgyal du shes pa la/__zhes dus dang /__sangs rgyas mchod la brtson byas te/__/byang chub phyir ni sems kyang bskyed/__/snying rjes kun tu brtan sems dang /__/byams pa dang yang ldan gyur nas/__/rtag tu sems can thams cad la/__/phan pa bskyed pa brtson par bya/__/zhes bsam pa dang /__tsan+dan dang ni gur gum dang /__/gla rtsir bsres pa'i chus bkrus te/__/bdug pa rnams kyis bdug pa yi/__/gos gtsang rnams ni bgo bar bya/__/zhes sngon du bya ba dang /__sa la lci ba bsres pa yis/__de yi 'og tu dkyil 'khor bya/__zhes sogs dkyil 'khor bya ba'i tshul rgyas par gsungs na'ang /__da lta sgrub mchod dang 'brel par byas na des khyab par snang /__kha zas dkar po zos nas su/__/phan par 'dod pas bri bar bya/__/zhes kun spyod dang /__dar ram ras sam gro ga'am/__/ci yang rung ba gzhan la bri/__/zhes bri gzhi dang /__bud med dag la bu 'dod na/__/gi 'u wang gis legs par bri/__/dbus su khye'u zhig bris nas/__/rgyan rnams kun gyis rnam par brgyan/__/de bzhin rin chen gang ba'i snod/__/lag pa g.yon na thogs par bya/__/pad+ma rab tu rgyas gyur cig__/brgyan pa la ni de 'dug bya/__/nor bu do shal gser dag dang /__/rin chen sna tshogs rnams kyis brgyan/__/'dul bar shin tu dka' ba bri/__/gra bzhi dag tu ri bo bri/__/gal te bde bar 'tsho 'dod na/__/rab tu bsgrims te de ltar bri/__/bye brag tu ni skyes pa rnams/__/gur gum gyis ni bri bar bya/__/de yi dgos pa 'dod pa rnams/__/'grub 'gyur 'di la the tshom med/__/pad+ma gnyis sam yang na gsum/__/bzhi'am yang na lnga bris te/__/pad+ma la ni phyag rgya'i mtshan/__/rnam pa sna tshogs gzugs su bri/__/zhes sogs ji ltar 'bri ba'i tshul spyi dang /__dge slong phyir ni rdo rje 'chang /__/gnod sbyin bsdigs par brtson pa bri/__/rgyal po chen po bzhi rnams kyang /__/ngos bzhi rnams su bri bar bya/__/zhes sogs bye brag gi 'bri tshul rgyas par gsungs/__'di la rgyal rigs la dbang phyug__/dmangs rigs la rtag zhi ba dang /__khyab 'jug__/rje'u rigs phyir rnam thos kyi bu dang /__/lha'i dbang phyug dbang po sogs bri bar gsungs/__cho ga bzhin du nges bris la/__/blo gros ldan pa'i mis bsrel na/__/za ma dang ni ma ning yang /__/bu pho rnyed par 'gyur ba yin/__/'dis ni thams cad 'grub par byed/__/shis shing sdig pa zhi bar byed/__/rang byung gi ni bka' bzhin du/__/gnas kyi dam pa thob par 'gyur/__/'jig rten 'di na mchog tu bde/__/'jig rten pha rol shin tu bde/__/sum cu rtsa gsum gnas la sogs/__/lha gnas de'i gnas su 'gyur/__/'dzam gling bzang zhing nyams dga' bar/__/khyad par can rigs grags pa dang /__/rgyal rigs khyad par 'phags pa dang /__/bram ze khyad par 'phags rnams su/__/bdag nyid chen po de skyes te/__/rtag tu rig dang bde bar 'gyur/__/so sor 'brang ba 'chang ba'i mis/__/bsod nams thob pa gang yin pa/__/sangs rgyas dag ni thams cad kyis/__/bsod nams phung po brjod mi nus/__/sems can dmyal ba'i sgo rnams bcad/__/mtho ris sgo rnams rab tu phye/__/bde ba phun sum tshogs pa dang /__/blo gros chen por 'gyur ba yin/__/sangs rgyas byang chub sems dpas kyang /__/rtag tu dbugs ni 'byin par 'gyur/__/lus kyi bde ba phun sum tshogs/__/stobs kyang che bar 'gyur pa yin/__/rgyal bas ji skad gsungs pa ltar/__/'khor los sgyur bar 'gyur ba yin/__/mi dang lha rnams dbugs 'byin te/__gnod par sems pa skrag par byed/__/gang phyir rig pa legs bshad pa/__/de ni ring por mi thogs so/__/de ni mtshon gyis mi tshugs te/__/dug dang mes kyang tshugs mi 'gyur/__/dus min 'chi ba'i sdig pa yang /__/de las thag ni ring du 'gro/__/rnam pa kun tu nyan pa'am/__/mthong ba dang ni rig pa'ang rung /__/'byung po gdon dang rtsod pa dang /__/chu dang me yis 'jigs pa dang /__/gcan gzan sbrul dang seng+ge dang /__/klu dang nad ni mi bzad rnams/__/gang la rig pa legs bshad pa/__/de la de dag kun mi 'byung /__/de dag sems can kun mchog 'gyur/__/bdud rnams kun gyis thams cad du/__/mchod par 'gyur ba'i 'os yin te/__/yang dag bshad kyis mnyan par byos/__/zhes phan yon rgya cher bsngags so/__/rig sngags sde tshan gsum pa rdzogs pa'i mjug tu/__nad pa rnams ni gso bya ba/__/da ni rab tu bshad par bya/__/zhes mtshams sbyar nas/__sa dang lci ba bsres pa yis/__/dkyil 'khor gru bzhi rnam pa bya/__/sogs dkyil 'khor bya ba'i tshul dang /__/de yi 'og tu nad pa yang /__/dri zhim spos kyis lus bskus te/__/gtsang ma'i gos rnams bkon nas ni/__/dkyil 'khor dbus su bzhag par bya/__/de nas shar phyogs kha bstan te/__/rig pa 'di ni brjod par bya/__/lan bdun bzlas brjod byas nas su/__/mkhas pas de la bsrung bar bya/__/de nas nad pa'i don gyi phyir/__/lan grangs nyi shu rtsa gcig tu/__/rig pa 'di ni brjod byas na/__/des ni nad kun zhi bar 'gyur/__/zhes nad pa gso ba'i cho ga'i dngos gzhi dang /__'jug tu gtor ma lho/__nub/__byang /__'og__/steng rnams su btang bar gsungs so/___/___!_