DKR-KABUM-06-CHA-041

🚧 This website is under continued development. We appreciate your patience!

Previous Text Back to Volume PageLast text in volume.

རྩ་གསུམ་སྤྱི་འདུས་སྙིང་ཐིག་གི་ཟུར་འདེབས་ཡེ་ཤེས་སྒྱུ་འཕྲུལ་དྲྭ་བ།

Wylie title	rtsa gsum spyi 'dus snying thig gi zur 'debs ye shes sgyu 'phrul drwa ba
Location	dil mgo mkhyen brtse bka' 'bum Volume 6, Text 41, Pages 309-311 (Folios 1a1 to 3b5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	Khyentse, Dilgo. Rtsa gsum spyi 'dus snying thig gi zur 'debs ye shes sgyu 'phrul drwa ba. In Skyabs rje dil mgo mkhyen brtse rin po che'i bka' 'bum, Vol. 6: 309-311. Delhi: Shechen Publications, 1994.
Genre	Supplemental Instructions - zur 'debs - zur rgyan
Cycle	རྩ་གསུམ་སྤྱི་འདུས་སྙིང་ཏིག་ (rtsa gsum spyi 'dus snying tig)
Colophon	།ཞེས་པ་འདིའང་ཟབ་དོན་སྙིང་པོའི་རྣལ་འབྱོར་པ་དབྱིངས་རིག་བྱང་ཆུབ་དབང་པོས་རྟེན་བཅས་བསྐུལ་བ་བཞིན་སྙོམས་ལས་པ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཐུབ་བསྟན་ཆོས་གླིང་ནས་བྲིས་པ་དོན་དང་ལྡན་པར་གྱུར་ཅིག །སརྦ་མངྒ་ལཾ། དགེའོ།།
	/zhes pa 'di'ang zab don snying po'i rnal 'byor pa dbyings rig byang chub dbang pos rten bcas bskul ba bzhin snyoms las pa 'gyur med theg mchog bstan pa'i rgyal mtshan gyis thub bstan chos gling nas bris pa don dang ldan par gyur cig_/sarba mang+ga laM/_dge'o//

Tibetan Text

Wylie

[edit]

༄༅། །རྩ་གསུམ་སྤྱི་འདུས་སྙིང་ཐིག་གི་ཟུར་འདེབས་ཡེ་ཤེས་སྒྱུ་འཕྲུལ་དྲྭ་བ་བཞུགས།། ན་མོ་གུ་ར་ཝེ། རྩ་གསུམ་ལས་བྱང་གཏེར་གཞུང་ལ་ཟུར་འདེབས་སྦྱར་བར་སྤྲོ་ན། བྱིན་འབེབས་རྒྱས་པ་ལ། ཧཱུྃ་ཧྲཱིཿ འོད་གསལ་རྡོ་རྗེ་སྙིང་པོའི་ཞིང༌། །ཟག་མེད་ཡོན་ཏན་འབྲས་བུའི་གཟུགས། །ཆོས་སྐུ་འོད་སྣང་མཐའ་ཡས་སོགས། །བརྒྱུད་གསུམ་བླ་མས་བྱིན་ཕོབ་ཅིག །བདེ་ཆེན་འཕོ་མེད་སངས་རྒྱས་ཞིང༌། །ཡེ་ཤེས་ལྔ་ལྡན་ལོངས་སྤྱོད་རྫོགས། །རིགས་ལྔའི་རྒྱལ་བ་གངས་ཆེན་མཚོ། །ཞི་ཁྲོ་རབ་འབྱམས་བྱིན་ཕོབ་ཅིག །རྩ་གསུམ་དཀྱིལ་འཁོར་ལྷ་ཚོགས་ཀྱི། །བྱིན་ཆེན་ཕོབ་ལ་དབང་ཆེན་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ཧཱུྃ་ཧྲཱིཿ བརྡལ་ཁྱབ་ཆོས་སྐུ་སོགས་གཞུང་གི་བྱིན་འབེབས་ལ་འཇུག་གོ །བྱིན་འབེབས་རྗེས་བཤགས་པ་ནི། བླ་མ་ཡི་དམ་མཁའ་འགྲོ་མ༔ རྩ་གསུམ་རྒྱལ་བ་འཁོར་དང་བཅས༔ བདག་ཅག་ལུས་ངག་ཡིད་གསུམ་གྱི༔ མི་དགེ་ཉམས་ཆགས་འགལ་འཁྲུལ་བཤགས༔ བཛྲ་ས་མ་ཡ་ཤུདྡྷེ་ཨཿ སྤྲོ་ན། ཕྱོགས་དུས་སྐྱབས་གནས་རྒྱ་མཚོའི་ཡེ་ཤེས་སྐུ། །རབ་འབྱམས་རྩ་གསུམ་སྤྲོ་བསྡུ་བྱེད་པོ་ཆེ། །མཁྱེན་བརྩེ་ནུས་པ་མཚུངས་མེད་ཡེ་ཤེས་སྐུ། །ཐུགས་རྗེའི་བདག་ལ་དགོངས་ཤིང་གསན་དུ་གསོལ། །རིགས་བརྒྱའི་ཁྱབ་བདག་བླ་མའི་སྐུ་གསུང་ཐུགས། །ཉམས་ཆགས་མཐོལ་བཤགས་རྡོ་རྗེའི་བྱིན་རླབས་སྩོལ། །རྒྱུད་སྡེ་བཞི་དྲུག་ཡི་དམ་ཞི་ཁྲོའི་ལྷ། །བསྙེན་སྒྲུབ་ལས་སོགས་འགལ་འཁྲུལ་ཉམས་ཆགས་བཤགས། །གསང་བའི་གཉེར་འཛིན་དཔའ་བོ་མཁའ་འགྲོ་ལ། །ལྷ་སྒོམ་སྤྱོད་པ་ནོར་འཁྲུལ་གྱུར་བ་བཤགས། །བཀའ་ཡི་གཉེར་འཛིན་དམ་ཅན་རྒྱ་མཚོ་ལ། །ཐུགས་དམ་མ་བསྐངས་ལས་སྦྱོར་ལོག་པ་བཤགས། །མི་ཤེས་རྨོངས་དང་མ་རིག་ལས་ཉོན་གྱིས། །རྩ་བ་ཡན་ལག་དམ་ཚིག་ཉམས་ཆག་ཀུན། །འགྱོད་པས་མཐོལ་བཤགས་བྱང་ཞིང་དག་ནས་ཀྱང༌། །དངོས་གྲུབ་རྒྱ་མཚོའི་དཔལ་གྱིས་འབྱོར་བ་མཛོད། །ཡིག་བརྒྱ་ཟླ། བསྟོད་པ་རྒྱས་པར་སྤྲོ་ན་ལས་གཞུང་གི་བསྟོད་པ། ཧཱུྃ་ཧྲཱིཿ མ་བཅོས་སྤྲོས་བྲལ་འོད་གསལ་འདུས་མ་བྱས། །དུས་གསུམ་བདེ་གཤེགས་ཐམས་ཅད་འབྱུང་བའི་གནས། །སྐུ་དང་ཡེ་ཤེས་ཕྲིན་ལས་རྒྱ་མཚོའི་བདག །པདྨ་ཚེ་མཐའ་ཡས་ལ་ཕྱག་འཚལ་བསྟོད། །ཁ་སྦྱོར་ཡན་ལག་བདུན་ལྡན་བདེ་ཆེན་དཔལ༔ ཕུང་པོ་གནས་གྱུར་ཉོན་མོངས་རང་སར་གྲོལ༔ མི་ཟད་བཀོད་པ་རྒྱན་གྱི་འཁོར་ལོར་ཤར༔ ཆེ་མཆོག་འབར་ཁྲོ་ཡོངས་རྫོགས་སྐུ་ལ་བསྟོད༔ མི་མཇེད་འཇིག་རྟེན་བྱེ་བ་ཕྲག་བརྒྱ་རུ༔ པད་སྡོང་ལས་འཁྲུངས་རྒྱལ་སྲས་རིག་པ་འཛིན༔ གང་འདུལ་སྒྱུ་འཕྲུལ་དྲྭ་བའི་གར་མཛད་པ༔ ཕྱོགས་དུས་རྒྱལ་ཀུན་འདུས་ཞལ་ཕྱག་འཚལ་བསྟོད༔ གནས་ཡུལ་དུར་ཁྲོད་རབ་འཇིགས་ཞིང་ཁམས་ནས༔ བདེ་སྟོང་རོལ་པའི་རིགས་ཀྱི་ཕྱག་རྒྱར་འཆང༔ འབུམ་ཕྲག་རྩ་གསུམ་མཁའ་འགྲོའི་སྤྲིན་ཕུང་འཕྲོ༔ ཌཱ་ཀི་བདུད་འདུལ་སེང་ཧ་མུ་ཁར་བསྟོད༔ གཞན་ཡང་བདག་སྐྱོབ་ལྷ་དང་རིག་པ་འཛིན༔ རྩ་གསུམ་ཆོས་སྲུང་རྒྱ་མཚོའི་སྐུར་སྟོན་པ༔ ཡེ་ཤེས་དམ་ཚིག་ཐུགས་རྗེ་མངོན་བཞུགས་པའི༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ ལས་སྦྱོར་འཕོ་བའི་དམིགས་པ་སྦྱར་ན། རང་ཉིད་པད་འབྱུང་སྐུ་ཡི་དབུས༔ འོད་ཀྱི་ཨ་བ་དྷུ་ཏིའི་ཀློང༔ རླུང་སེམས་དྭངས་མའི་ཡི་གེ་ཧྲཱིཿ རླུང་ཉིད་ཐིག་ལེའི་བཏེགས་པ་ལས༔ སྤྱི་བོ་ཚངས་པའི་གནས་བརྒྱུད་དེ༔ རིགས་ཀྱི་བདག་པོ་འོད་དཔག་མེད༔ ཡེ་ཤེས་ཐིག་ལེར་འདྲེས་པར་བསམ༔ དམིགས་པ་རྩེ་གཅིག་ཏུ་གཏད་དེ། འཿཨཿཤཿསཿམཿཧཿ ཛྙཱ་ན་པྲ་བེ་ཤ་ཡ་ཕཊ྄༔ ལན་ཇི་ལྟར་རིགས་པ་སྦྱར། མཐར་ཚེ་སྙིང་ཅུང་ཟད་བཟླས་པས་རུང་ངམ་སྙམ། བཤགས་པ་མདོར་བསྡུས་ནི། རྩ་གསུམ་སྲུང་མ་གསན་ཅིང་དགོངས་སུ་གསོལ། །མ་རིག་བདག་ཅག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་ཏེ། །རྩ་གསུམ་སྲུང་མའི་ཐུགས་དང་ཅི་འགལ་བ། །སྙིང་ནས་འགྱོད་པ་དྲག་པོས་མཐོལ་ལོ་བཤགས། །སྒྲིབ་མེད་ཚངས་པ་མཆོག་གི་དངོས་གྲུབ་སྩོལ། །འཕོ་རྫས་སྒྲུབ་པའི་དམིགས་བཟླས་ནི། སྟོང་པའི་ངང་ལས་རྫས་ཀྱི་སྟེང༌། །མཁའ་སྤྱོད་རྡོ་རྗེ་རྣལ་འབྱོར་མ། །དམར་གསལ་གྲི་ཐོད་འཛིན་པ་ཡི། །སྐུ་ལ་རུས་རྒྱན་མགོ་ཕྲེང་ཅན། །མཆན་དུ་ཁ་ཊྭཱཾ་འཆང་བའི་ཞབས། །བརྐྱང་བསྐུམ་རླུང་དཀྱིལ་སྟེང་དུ་བཞེངས། །ཐུགས་ཀའི་ཧྲཱི་ལས་འོད་དམར་ནི། །ལྕགས་ཀྱུའི་དབྱིབས་ཅན་དཔག་མེད་འཕྲོས། །ཕྱོགས་དུས་རྒྱལ་བ་རབ་འབྱམས་དང༔ རྩ་གསུམ་རྒྱ་མཚོའི་བྱིན་རླབས་ཀུན༔ མཁའ་སྤྱོད་ཌཱ་ཀིའི་རྣམ་པ་ཡིས༔ ཆར་ལྟར་བབ་པ་རྫས་ལ་ཐིམ༔ བདེ་ཆེན་མཆོག་གི་བདུད་རྩིའི་རྒྱུན། །རྫས་ལ་རེག་པས་བདེ་ཆེན་ཞིང༔ དབང་མེད་འདྲེན་པའི་ནུས་ལྡན་བསམ༔ འཿཨཿཤཿསཿམཿཧཿ ཛྙཱ་ན་པྲ་བེ་ཤ་ཡ་ཕཊ྄༔ ཞེས་ཇི་ཙམ་ནུས་པ་བསྐུལ། མཐར། ལྷ་འོད་དུ་ཞུ་ནས་རྫས་ལ་ཐིམ་པས་རེག་གྲོལ་ཐམས་ཅད་འགྲུབ་པའི་དཔལ་དུ་གྱུར། ཧཱུྃ་ཧཱུྃ་ནི་རིག་སྟོང་གཉིས་སུ་མེད་པའི་ཡེ་ཤེས་གཞི་ལམ་འབྲས་བུ་དབྱེར་མེད་ཉིད་རྩ་གསུམ་ཀུན་འདུས་གུ་རུ་རིན་པོ་ཆེའི་དཀྱིལ་འཁོར་ཀུན་གྱི་ཁྱབ་བདག་ཏུ་བཞེངས་པ་ཉིད་བདག་གི་ལུས་ངག་ཡིད་གསུམ་བླ་མའི་སྐུ་གསུང་ཐུགས་ཡེ་ཤེས་རྡོ་རྗེ་དངོས་སུ་རིག་པས་ང་ནི་འཆི་མེད་པདྨ་འབྱུང་ཞེས་པ་སྟེ། །དེ་ནི་ཡེ་ཤེས་གཅིག་གི་ཆོ་འཕྲུལ་ལས་བརྒྱུད་གསུམ་རིག་འཛིན་བླ་མ་ཐམས་ཅད་ཐ་དད་དུ་མེད་པས། བླ་མ་རྒྱ་མཚོ་འདུས་པའི་སྐུ་བླ་མ་དེའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཆོ་འཕྲུལ་ལས་རྒྱུད་སྡེ་དྲུག་གི་ཡི་དམ་རྒྱ་མཚོའི་དཀྱིལ་འཁོར་རབ་འབྱམས་སྤྲོ་ཞིང་བསྡུ་བའི་གསུང་སྟེ། སངས་རྒྱས་ཀྱི་འབྲས་བུའི་ཡོན་ཏན་མཐར་ཐུག་རྟོགས་པ་ཆོས་སྐུ་ཡིན་ཅིང༌། ཆོས་སྐུའི་ངང་དུ་ཡི་དམ་ཐམས་ཅད་དགོངས་པ་ཐ་དད་དུ་མེད་པར་གུ་རུའི་གསུང་ལ་རྫོགས། ཆོས་སྐུའི་ངང་དུ་བདེ་སྟོང་འཕོ་འགྱུར་མེད་པའི་ཐུགས་ནི་ཡེ་ཤེས་མཁའ་འགྲོ་རྒྱ་མཚོའི་སྲོག་སྙིང་དུ་གྱུར་པ་སྟེ། སྣང་ཚུལ་དུ་བྱིན་རླབས་དངོས་གྲུབ་ཕྲིན་ལས་ཀྱི་རྩ་གསུམ་རྒྱལ་བ་རབ་འབྱམས་སུ་བརྡལ་ཡང༌། གནས་ཚུལ་དུ་བྱས་ན་གཞི་ལམ་འབྲས་བུ་དབྱེར་མེད་ཆོས་དབྱིངས་ཐིག་ལེ་ཉག་ཅིག་ཐམས་ཅད་ཀློང་ན་སངས་རྒྱས་ཀྱི་ཡོན་ཏན་སྐུ་དང་ཡེ་ཤེས་ཐམས་ཅད་ལྷུན་གྱིས་རྫོགས་པའི་དེ་ཉིད་མངོན་དུ་གྱུར་པའི་མ་ཧཱ་གུ་རུ་ནི་རིག་པ་ལ་རང་དབང་ཐོབ་པས་འཁོར་འདས་ཀུན་གྱི་ཁྱབ་བདག་བདེ་བ་ཆེན་པོ་ཡེ་ཤེས་རིག་པའི་དགོངས་པས་ཅི་འདོད་དུ་དབང་བསྒྱུར་བའི་བདག་པོ་རང་རིག་མ་བཅོས་ཐིག་ལེ་ཉག་ཅིག་གི་ཀློང་དུ་གདོད་ནས་རྫོགས་པའོ། །ཨོཾ་ཨཱཿཧཱུྃ་སྐུ་གསུང་ཐུགས། བཛྲ་རྡོ་རྗེ། ཛྙཱ་ན་ཡེ་ཤེས་ཀྱི་པདྨོ་ཀོ྅ཧཾ། བདག་ཉིད་ངའོ་ཞེས་ང་རྒྱལ་གཟུང་བ་ནི་བསྐྱེད་རྫོགས་ཐམས་ཅད་ཀྱི་སྙིང་པོ་དགོངས་པ་རྒྱས་འདེབས་པའོ། །ཞེས་པ་འདིའང་ཟབ་དོན་སྙིང་པོའི་རྣལ་འབྱོར་པ་དབྱིངས་རིག་བྱང་ཆུབ་དབང་པོས་རྟེན་བཅས་བསྐུལ་བ་བཞིན་སྙོམས་ལས་པ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཐུབ་བསྟན་ཆོས་གླིང་ནས་བྲིས་པ་དོན་དང་ལྡན་པར་གྱུར་ཅིག །སརྦ་མངྒ་ལཾ། དགེའོ།། །།

[edit]

@#/__/rtsa gsum spyi 'dus snying thig gi zur 'debs ye shes sgyu 'phrul drwa ba bzhugs// na mo gu ra we/_rtsa gsum las byang gter gzhung la zur 'debs sbyar bar spro na/_byin 'bebs rgyas pa la/_hU~M hrIH_'od gsal rdo rje snying po'i zhing*/_/zag med yon tan 'bras bu'i gzugs/_/chos sku 'od snang mtha' yas sogs/_/brgyud gsum bla mas byin phob cig_/bde chen 'pho med sangs rgyas zhing*/_/ye shes lnga ldan longs spyod rdzogs/_/rigs lnga'i rgyal ba gangs chen mtsho/_/zhi khro rab 'byams byin phob cig_/rtsa gsum dkyil 'khor lha tshogs kyi/_/byin chen phob la dbang chen bskur/_/bgegs dang log 'dren bar chad sol/_/mchog dang thun mong dngos grub stsol/_/hU~M hrIH_brdal khyab chos sku sogs gzhung gi byin 'bebs la 'jug go_/byin 'bebs rjes bshags pa ni/_bla ma yi dam mkha' 'gro ma:_rtsa gsum rgyal ba 'khor dang bcas:_bdag cag lus ngag yid gsum gyi:_mi dge nyams chags 'gal 'khrul bshags:_badz+ra sa ma ya shud+d+he aH_spro na/_phyogs dus skyabs gnas rgya mtsho'i ye shes sku/_/rab 'byams rtsa gsum spro bsdu byed po che/_/mkhyen brtse nus pa mtshungs med ye shes sku/_/thugs rje'i bdag la dgongs shing gsan du gsol/_/rigs brgya'i khyab bdag bla ma'i sku gsung thugs/_/nyams chags mthol bshags rdo rje'i byin rlabs stsol/_/rgyud sde bzhi drug yi dam zhi khro'i lha/_/bsnyen sgrub las sogs 'gal 'khrul nyams chags bshags/_/gsang ba'i gnyer 'dzin dpa' bo mkha' 'gro la/_/lha sgom spyod pa nor 'khrul gyur ba bshags/_/bka' yi gnyer 'dzin dam can rgya mtsho la/_/thugs dam ma bskangs las sbyor log pa bshags/_/mi shes rmongs dang ma rig las nyon gyis/_/rtsa ba yan lag dam tshig nyams chag kun/_/'gyod pas mthol bshags byang zhing dag nas kyang*/_/dngos grub rgya mtsho'i dpal gyis 'byor ba mdzod/_/yig brgya zla/_bstod pa rgyas par spro na las gzhung gi bstod pa/_hU~M hrIH_ma bcos spros bral 'od gsal 'dus ma byas/_/dus gsum bde gshegs thams cad 'byung ba'i gnas/_/sku dang ye shes phrin las rgya mtsho'i bdag_/pad+ma tshe mtha' yas la phyag 'tshal bstod/_/kha sbyor yan lag bdun ldan bde chen dpal:_phung po gnas gyur nyon mongs rang sar grol:_mi zad bkod pa rgyan gyi 'khor lor shar:_che mchog 'bar khro yongs rdzogs sku la bstod:_mi mjed 'jig rten bye ba phrag brgya ru:_pad sdong las 'khrungs rgyal sras rig pa 'dzin:_gang 'dul sgyu 'phrul drwa ba'i gar mdzad pa:_phyogs dus rgyal kun 'dus zhal phyag 'tshal bstod:_gnas yul dur khrod rab 'jigs zhing khams nas:_bde stong rol pa'i rigs kyi phyag rgyar 'chang:_'bum phrag rtsa gsum mkha' 'gro'i sprin phung 'phro:_DA ki bdud 'dul seng ha mu khar bstod:_gzhan yang bdag skyob lha dang rig pa 'dzin:_rtsa gsum chos srung rgya mtsho'i skur ston pa:_ye shes dam tshig thugs rje mngon bzhugs pa'i:_dkyil 'khor yongs rdzogs lha la phyag 'tshal bstod:_las sbyor 'pho ba'i dmigs pa sbyar na/_rang nyid pad 'byung sku yi dbus:_'od kyi a ba d+hu ti'i klong:_rlung sems dwangs ma'i yi ge hrIH_rlung nyid thig le'i btegs pa las:_spyi bo tshangs pa'i gnas brgyud de:_rigs kyi bdag po 'od dpag med:_ye shes thig ler 'dres par bsam:_dmigs pa rtse gcig tu gtad de/_'aHaHshaHsaHmaHhaH_dz+nyA na pra be sha ya phaTa?:_lan ji ltar rigs pa sbyar/_mthar tshe snying cung zad bzlas pas rung ngam snyam/_bshags pa mdor bsdus ni/_rtsa gsum srung ma gsan cing dgongs su gsol/_/ma rig bdag cag lus dang ngag sems kyis/_/bag med tshul gyis dam las 'gal gyur te/_/rtsa gsum srung ma'i thugs dang ci 'gal ba/_/snying nas 'gyod pa drag pos mthol lo bshags/_/sgrib med tshangs pa mchog gi dngos grub stsol/_/'pho rdzas sgrub pa'i dmigs bzlas ni/_stong pa'i ngang las rdzas kyi steng*/_/mkha' spyod rdo rje rnal 'byor ma/_/dmar gsal gri thod 'dzin pa yi/_/sku la rus rgyan mgo phreng can/_/mchan du kha T+wAM 'chang ba'i zhabs/_/brkyang bskum rlung dkyil steng du bzhengs/_/thugs ka'i hrI las 'od dmar ni/_/lcags kyu'i dbyibs can dpag med 'phros/_/phyogs dus rgyal ba rab 'byams dang:_rtsa gsum rgya mtsho'i byin rlabs kun:_mkha' spyod DA ki'i rnam pa yis:_char ltar bab pa rdzas la thim:_bde chen mchog gi bdud rtsi'i rgyun/_/rdzas la reg pas bde chen zhing:_dbang med 'dren pa'i nus ldan bsam:_'aHaHshaHsaHmaHhaH_dz+nyA na pra be sha ya phaTa?:_zhes ji tsam nus pa bskul/_mthar/_lha 'od du zhu nas rdzas la thim pas reg grol thams cad 'grub pa'i dpal du gyur/_hU~M hU~M ni rig stong gnyis su med pa'i ye shes gzhi lam 'bras bu dbyer med nyid rtsa gsum kun 'dus gu ru rin po che'i dkyil 'khor kun gyi khyab bdag tu bzhengs pa nyid bdag gi lus ngag yid gsum bla ma'i sku gsung thugs ye shes rdo rje dngos su rig pas nga ni 'chi med pad+ma 'byung zhes pa ste/_/de ni ye shes gcig gi cho 'phrul las brgyud gsum rig 'dzin bla ma thams cad tha dad du med pas/_bla ma rgya mtsho 'dus pa'i sku bla ma de'i sku gsung thugs yon tan phrin las kyi cho 'phrul las rgyud sde drug gi yi dam rgya mtsho'i dkyil 'khor rab 'byams spro zhing bsdu ba'i gsung ste/_sangs rgyas kyi 'bras bu'i yon tan mthar thug rtogs pa chos sku yin cing*/_chos sku'i ngang du yi dam thams cad dgongs pa tha dad du med par gu ru'i gsung la rdzogs/_chos sku'i ngang du bde stong 'pho 'gyur med pa'i thugs ni ye shes mkha' 'gro rgya mtsho'i srog snying du gyur pa ste/_snang tshul du byin rlabs dngos grub phrin las kyi rtsa gsum rgyal ba rab 'byams su brdal yang*/_gnas tshul du byas na gzhi lam 'bras bu dbyer med chos dbyings thig le nyag cig thams cad klong na sangs rgyas kyi yon tan sku dang ye shes thams cad lhun gyis rdzogs pa'i de nyid mngon du gyur pa'i ma hA gu ru ni rig pa la rang dbang thob pas 'khor 'das kun gyi khyab bdag bde ba chen po ye shes rig pa'i dgongs pas ci 'dod du dbang bsgyur ba'i bdag po rang rig ma bcos thig le nyag cig gi klong du gdod nas rdzogs pa'o/__/oM AHhU~M sku gsung thugs/_badz+ra rdo rje/_dz+nyA na ye shes kyi pad+mo ko\u0f85haM/_bdag nyid nga'o zhes nga rgyal gzung ba ni bskyed rdzogs thams cad kyi snying po dgongs pa rgyas 'debs pa'o/__/zhes pa 'di'ang zab don snying po'i rnal 'byor pa dbyings rig byang chub dbang pos rten bcas bskul ba bzhin snyoms las pa 'gyur med theg mchog bstan pa'i rgyal mtshan gyis thub bstan chos gling nas bris pa don dang ldan par gyur cig_/sarba mang+ga laM/_dge'o//__//