JKCL-KABUM-08-NYA-012-076

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 8, sde tshan 12, Text 76, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: . Bir, H.P.: Khyentse Labrang, 2012.
Genre	Vajra Songs - rdo rje'i glu

1 Texts in this Section (sde tshan or chos tshan)

76 537-542	བླ་མ་ལ་གསོལ་འདེབས་ཞལ་གདམས་སྨོན་ལམ་དང་འབྲེལ་བ་བདུད་རྩིའི་ཐིག་ཕྲེང་། bla ma la gsol 'debs zhal gdams smon lam dang 'brel ba bdud rtsi'i thig phreng Advice - zhal gdams   ·   Prayers - smon lam   ·   Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ བླ་མ་ལ་གསོལ་འདེབས་ཞལ་གདམས་སྨོན་ལམ་དང་འབྲེལ་བ་བདུད་རྩིའི་ཐིག་ཕྲེང་ཞེས་བྱ་བ་བཞུགས་སོ། །ན་མོ་གུ་ར་ཝེ། གཟོད་ནས་རྣམ་གྲོལ་བྱང་ཆུབ་མངོན་བརྙེས་ཀྱང་། །བདག་སོགས་གདུལ་བྱའི་མགོན་དུ་བྱོན་པའི་སྐུ། །དཔལ་ལྡན་བླ་མའི་ཞབས་ལ་གསོལ་བ་འདེབས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །བི་མ་ཆོས་རྒྱལ་ཉང་རལ་ཀུན་མཁྱེན་སོགས། །འཕགས་བོད་མཁས་གྲུབ་རྒྱ་མཚོའི་སྤྲུལ་པའི་སྐུ། །འཇམ་དབྱངས་མཁྱེན་བརྩེའི་དབང་པོར་གསོལ་བ་འདེབས། །དགོངས་བརྒྱུད་འཕོ་བ་ཐོབ་པར་བྱིན་གྱིས་རློབས། །དེ་ཡི་གསང་གསུམ་མི་ཟད་རྒྱན་འཁོར་ལོའི། །ཕྲིན་ལས་སྒྱུ་འཁྲུལ་རོལ་མོའི་མངའ་བདག་མཆོག། ཆོས་ཀྱི་བློ་གྲོས་ཞབས་ལ་གསོལ་བ་འདེབས། །བསྟན་འགྲོར་ཕན་བདེ་འབྱུང་བར་བྱིན་གྱིས་རློབས། །ཀྱེ་མ་ཀྱི་ཧུད་མགོན་པོ་ཐུགས་རྗེ་ཅན། །བདག་ལ་ཐུགས་རྗེས་མྱུར་དུ་གཟིགས་སུ་གསོལ། །བློ་སྣ་དམ་པའི་ཆོས་ལ་དྲོངས་པ་དང་། །ཐར་པའི་ལམ་སྣ་ཟིན་པར་བྱིན་གྱིས་རློབས། །སྲིད་པའི་ཕུན་ཚོགས་ཇི་ལྟར་འབྱོར་གྱུར་ཀྱང་། །སྡིག་དང་སྡུག་བསྔལ་རྒྱུ་འབྲས་འབའ་ཞིག་ལས། །གཏན་བདེ་ཕྲ་མོ་ཙམ་ཡང་མ་མཆིས་པས། །འཁོར་བར་ཞེན་པ་ལོག་པར་བྱིན་གྱིས་རློབས། །འདུས་བྱས་ཐམས་ཅད་མི་རྟག་མི་བརྟན་ཅིང་། །རྩ་རྩེའི་ཟིལ་པ་ཆུ་བུར་སྤྲིན་བཞིན་དུ། །ད་ལྟ་ཡོད་ཀྱང་ད་ལྟ་འཇིག་པའི་དཔེས། །མི་རྟག་འཆི་བ་དྲན་པར་བྱིན་གྱིས་རློབས། །དལ་དང་འབྱོར་པའི་རྟེན་བཟང་རིན་ཆེན་འདི། །ལན་ཅིག་ཐོབ་པ་ད་རེས་ཙམ་ཡིན་ཞིང་། །དེ་རྒྱུ་ཚུལ་ཁྲིམས་བསྲུང་བ་དཀོན་པས་ན། །དལ་རྟེན་དོན་ཡོད་བྱེད་པར་བྱིན་གྱིས་རློབས། །དགེ་སྡིག་ལས་བསག་འབྲས་བུ་ཆུད་མི་ཟ། །རང་གི་སྟེང་དུ་སྨིན་པར་ངེས་པ་དང་། །རྒྱུ་འབྲས་བསླུ་བ་མེད་པ་ཡིན་པའི་ཕྱིར། །དཀར་ནག་བླངས་དོར་བྱེད་པར་བྱིན༴ །སྲིད་དང་ཞི་བའི་འཇིགས་པ་ཇི་སྙེད་པ། །སྐྱོབ་པ་བླ་མེད་དཀོན་མཆོག་རིན་ཆེན་གསུམ། །གང་ལ་བསྙེན་པས་ཉེས་པ་ཀུན་ལས་སྐྱོབ། །ཡིད་ཆེས་དད་པ་བརྟན་པར༴ །བདེ་དང་སྡུག་བསྔལ་ཅི་བྱུང་སྔོན་ལས་ཀྱི། །སྨིན་པར་ཤེས་ནས་དགའ་སྡུག་མི་བྱེད་པར། །བློ་གཏད་ལིང་བསྐྱུར་མོས་འདུན་རྩེ་གཅིག་པས། །སྐྱབས་འགྲོའི་རྩ་བ་བརྟན་པར༴ །མཁའ་ཁྱབ་འགྲོ་བ་བསྒྲངས་ལས་འདས་པ་རྣམས། །རང་གི་ཕ་མར་ཡིན་པར་ཤེས་པ་དང་། །བཀའ་དྲིན་དྲན་ཞིང་དྲིན་ལན་བཟོ་འདོད་པས། །ཚད་མེད་རྣམ་བཞི་འབྱོངས་བར༴ །རང་དོན་ཡིད་བྱེད་ཞི་བདེའི་སེམས་སྤངས་ནས། །གཞན་ཕན་ལྷག་པའི་བསམ་པ་བཟང་པོ་བསྐྱེད། །ལུས་དང་ལོངས་སྤྱོད་དགེ་ཚོགས་འགྲོ་ལ་སྦྱིན། །བྱང་ཆུབ་སེམས་མཆོག་འབྱོངས་བར༴ །ཉོན་མོངས་ཉེས་པ་བརྒྱ་ཕྲག་ཚོགས་རྣམས་ཀུན། །བདག་ཏུ་འཛིན་པའི་འདྲེ་ཆེན་འདི་ལས་བྱུང་། །འདི་ཡིས་བདག་ནི་རྟག་ཏུ་སྡུག་བསྔལ་བསྐྱེད། །བདག་འཛིན་འགོང་པོ་ཆོམ་པར༴ །རང་སེམས་གདོད་ནས་དག་པའི་ཆོས་ཉིད་ལ། །མ་རིག་གསུམ་གྱི་སྤྲིན་ནག་སྟུག་པོས་སྒྲིབ། །ཐར་པ་ཐམས་ཅད་མཁྱེན་པར་བར་དུ་གཅོད། །སྒྲིབ་ཚོགས་སྟོབས་བཞིས་སྦྱངས་བ༴ །དགེ་ཚོགས་རིན་ཆེན་རྡུལ་མང་སྐད་ཅིག་གི །ཡོངས་སུ་སྡུད་པའི་ཐབས་མཁས་ཁྱད་པར་ཅན། །དཀོན་མཆོག་མཆོད་དང་འགྲོ་ལ་སྦྱིན་གཏོང་སོགས། །ཚོགས་གཉིས་རྒྱ་ཆེན་སྡུད་པར༴ །མཚན་ཉིད་ཀུན་ལྡན་རྡོ་རྗེ་སློབ་དཔོན་ལས། །རྣམ་དག་དབང་བཞིའི་དལ་བཞི་སྨིན་བྱས་ནས། །བསྐྱེད་དང་རྫོགས་པའི་རིམ་པ་ལེགས་བསྒོམ་པས། །རིག་འཛིན་རྣམ་བཞི་བསྒྲོད་པར༴ །ཁྱད་པར་སངས་རྒྱས་ཀུན་གྱི་གསང་བའི་ལམ། །ཟབ་མོ་བླ་མའི་རྣལ་འབྱོར་སྒོམ་པ་ཡི། །རྩ་བའི་བླ་མ་སངས་རྒྱས་དངོས་སུ་མཐོང་། །བཅོས་མིན་མོས་གུས་བརྟན་པར༴ །ཐ་མལ་འཁྲུལ་པའི་རྟོག་པས་མ་གོས་པར། །སྣང་གྲགས་རིག་གསུམ་བླ་མའི་རོལ་པར་ཤར། །གདོད་ནས་གནས་པའི་རིག་སྟོང་རྡོ་རྗེ་འདི། །བླ་མའི་ངོ་བོར་མཐོང་བར༴ །གསོལ་འདེབས་གདུང་བའི་དབྱངས་ཀྱིས་བསྐུལ་བ་དང་། །དབང་གི་སྙིང་པོ་འོད་ཟེར་ཆེན་པོ་ཡི། །དབང་བླངས་རང་ལ་ཐིམ་པ་དེ་ཡི་མོད། །གསང་བ་གསུམ་དང་དབྱེ་མེད་བྱིན༴ །རྡོ་རྗེའི་ཡེ་ཤེས་སྙིང་ལ་འབེབས་པ་དང་། །རང་གནས་རིག་པ་སྐུ་གསུམ་མངོན་གྱུར་ཏེ། །ཀ་དག་ལྷུན་གྲུབ་དགོངས་པའི་རྩལ་ཆེན་རྫོགས། །གཞི༵་ཡི་གནས་ལུགས་རྟོགས་པར༴ །འཁོར་འདས་ཕྱི་ནང་རུ་ཤན་ལེགས་ཕྱེད་ཅིང་། །རང་སེམས་འཁྲུལ་པའི་གཞི་རྩ་བཅད་པ་ཡི། །སྐྱེ་འགག་གནས་པའི་གཞི་མེད་རྩ་བ་བྲལ། །རིག་པ་ཆོས་སྐུ་རྟོགས་པར༴ །བྱུང་ཚོར་སྤྲོས་པ་ཐམས་ཅད་ཉེར་ཞི་ཞིང་། །དབྱིངས་ལས་བྱུང་ཡང་དབྱིངས་ལས་མ་གཡོས་པར། །ནམ་མཁའི་རྣལ་འབྱོར་བྱར་མེད་ཡངས་པ་ཆེ། །ཁྱབ་བརྡལ་དགོངས་པ་མངོན་གྱུར་བྱིན༴ །སྐུ་གསུམ་ལྷུན་གྱིས་གྲུབ་པའི་རང་གདང་ནི། །དབྱིངས་སྣང་ཆེན་པོར་ཐིག་སྐུའི་ཚོམ་བུ་བཀོད། །སྒྲོན་དྲུག་གསེང་ལམ༵་ཐོད་རྒལ་སྒོམ་པ་ཡི། །སྣང་བཞིའི་ཕ་མཐར་སོན་པར༴ །ཆོས་ཅན་སྣང་བ་ཆོས་ཉིད་དབྱིངས་སུ་ཟད། །རིག་པ་འབྲས༵་སྨིན་འཇའ་ལུས་རྡོ་རྗེའི་སྐུར། །བཞུགས་ནས་འགྲོ་བ་དཔག་མེད་སྒྲོལ་བ་དང་། །འཁོར་བ་དོང་ནས་སྤྲུགས་པར༴ །མདོར་ན་དེང་བཟུང་ཚེ་རབ་ཐམས་ཅད་དུ། །རྗེ་བཙུན་བླ་མ་གཙུག་གི་ནོར་བུར་བསྟེན། །མཉེས་པ་གསུམ་གྱིས་སྒྲུབ་པ་མཐར་ཕྱིན་ནས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །བསྟན་འཛིན་སྐྱེས་རྣམས་ཞབས་བརྟན་བསྟན་པ་དར། །བསྟན་པའི་སྦྱིན་བདག་དབུ་འཕང་མཐོ་བ་དང་། །བསྟན་ལ་གནོད་བྱེད་མིང་ཙམ་འགྱུར་བ་དང་། །བསྟན་གཉིས་དར་ཤིང་རྒྱས་པའི་བཀྲ་ཤིས་ཤོག། །ཅེས་པའང་ཨ་མདོ་རེ་སྐོང་གི་སྔགས་ཆེན་རྡོ་རྗེ་འཛིན་པ་ཆེན་པོ་གཞན་ཕན་བྱང་ཆུབ་སེམས་ཀྱིས་ཐུགས་མངའ་བཀྲ་ཤིས་དཔལ་ལྡན་ནས་བླ་མ་ལ་གསོལ་བ་འདེབས་པ་ཞལ་གདམས་སྨོན་ལམ་དང་འབྲེལ་བར་བྲིས་ཤིག་ཅེས་རྟེན་དང་བཅས་གསུང་བསྐུལ་ངོར་སྙིགས་མའི་དུས་ཀྱི་དམ་ཆོས་འཛིན་པའི་གྲལ་མཐར་སྐྱེས་ཤིང་དགེ་སྦྱོང་གི་གཟུགས་བརྙན་འཛིན་པ་འཇམ་དབྱངས་ཆོས་ཀྱི་བློ་གྲོས་པས་ས་བྱི་གནམ་ལོ་གསར་འཆར་གྱི་ཆོ་འཕྲུལ་ཟླ་བའི་ཚེས་བཅུ་གཅིག་ལ་སྡེ་དགེ་རྫོང་གསར་བཀྲ་ཤིས་ལྷ་རྩེའི་ཆོས་གྲྭ་ཆེན་པོར་བྲིས་པ་འདིས་ཀྱང་དཔལ་ལྡན་བླ་མའི་བྱིན་བརླབ་སྙིང་དབུས་སིམ་པའི་རྒྱུར་གྱུར་ཅིག། སརྦ་དཱ་མངྒ་ལཾ།། །།

[edit]

!_bla ma la gsol 'debs zhal gdams smon lam dang 'brel ba bdud rtsi'i thig phreng zhes bya ba bzhugs so/__/na mo gu ra we/__gzod nas rnam grol byang chub mngon brnyes kyang /__/bdag sogs gdul bya'i mgon du byon pa'i sku/__/dpal ldan bla ma'i zhabs la gsol ba 'debs/__/rang gzhan don gnyis 'grub par byin gyis rlobs/__/bi ma chos rgyal nyang ral kun mkhyen sogs/__/'phags bod mkhas grub rgya mtsho'i sprul pa'i sku/__/'jam dbyangs mkhyen brtse'i dbang por gsol ba 'debs/__/dgongs brgyud 'pho ba thob par byin gyis rlobs/__/de yi gsang gsum mi zad rgyan 'khor lo'i/__/phrin las sgyu 'khrul rol mo'i mnga' bdag mchog/__chos kyi blo gros zhabs la gsol ba 'debs/__/bstan 'gror phan bde 'byung bar byin gyis rlobs/__/kye ma kyi hud mgon po thugs rje can/__/bdag la thugs rjes myur du gzigs su gsol/__/blo sna dam pa'i chos la drongs pa dang /__/thar pa'i lam sna zin par byin gyis rlobs/__/srid pa'i phun tshogs ji ltar 'byor gyur kyang /__/sdig dang sdug bsngal rgyu 'bras 'ba' zhig las/__/gtan bde phra mo tsam yang ma mchis pas/__/'khor bar zhen pa log par byin gyis rlobs/__/'dus byas thams cad mi rtag mi brtan cing /__/rtsa rtse'i zil pa chu bur sprin bzhin du/__/da lta yod kyang da lta 'jig pa'i dpes/__/mi rtag 'chi ba dran par byin gyis rlobs/__/dal dang 'byor pa'i rten bzang rin chen 'di/__/lan cig thob pa da res tsam yin zhing /__/de rgyu tshul khrims bsrung ba dkon pas na/__/dal rten don yod byed par byin gyis rlobs/__/dge sdig las bsag 'bras bu chud mi za/__/rang gi steng du smin par nges pa dang /__/rgyu 'bras bslu ba med pa yin pa'i phyir/__/dkar nag blangs dor byed par byin=__/srid dang zhi ba'i 'jigs pa ji snyed pa/__/skyob pa bla med dkon mchog rin chen gsum/__/gang la bsnyen pas nyes pa kun las skyob/__/yid ches dad pa brtan par=__/bde dang sdug bsngal ci byung sngon las kyi/__/smin par shes nas dga' sdug mi byed par/__/blo gtad ling bskyur mos 'dun rtse gcig pas/__/skyabs 'gro'i rtsa ba brtan par=__/mkha' khyab 'gro ba bsgrangs las 'das pa rnams/__/rang gi pha mar yin par shes pa dang /__/bka' drin dran zhing drin lan bzo 'dod pas/__/tshad med rnam bzhi 'byongs bar=__/rang don yid byed zhi bde'i sems spangs nas/__/gzhan phan lhag pa'i bsam pa bzang po bskyed/__/lus dang longs spyod dge tshogs 'gro la sbyin/__/byang chub sems mchog 'byongs bar=__/nyon mongs nyes pa brgya phrag tshogs rnams kun/__/bdag tu 'dzin pa'i 'dre chen 'di las byung /__/'di yis bdag ni rtag tu sdug bsngal bskyed/__/bdag 'dzin 'gong po chom par=__/rang sems gdod nas dag pa'i chos nyid la/__/ma rig gsum gyi sprin nag stug pos sgrib/__/thar pa thams cad mkhyen par bar du gcod/__/sgrib tshogs stobs bzhis sbyangs ba=__/dge tshogs rin chen rdul mang skad cig gi__/yongs su sdud pa'i thabs mkhas khyad par can/__/dkon mchog mchod dang 'gro la sbyin gtong sogs/__/tshogs gnyis rgya chen sdud par=__/mtshan nyid kun ldan rdo rje slob dpon las/__/rnam dag dbang bzhi'i dal bzhi smin byas nas/__/bskyed dang rdzogs pa'i rim pa legs bsgom pas/__/rig 'dzin rnam bzhi bsgrod par=__/khyad par sangs rgyas kun gyi gsang ba'i lam/__/zab mo bla ma'i rnal 'byor sgom pa yi/__/rtsa ba'i bla ma sangs rgyas dngos su mthong /__/bcos min mos gus brtan par=__/tha mal 'khrul pa'i rtog pas ma gos par/__/snang grags rig gsum bla ma'i rol par shar/__/gdod nas gnas pa'i rig stong rdo rje 'di/__/bla ma'i ngo bor mthong bar=__/gsol 'debs gdung ba'i dbyangs kyis bskul ba dang /__/dbang gi snying po 'od zer chen po yi/__/dbang blangs rang la thim pa de yi mod/__/gsang ba gsum dang dbye med byin=__/rdo rje'i ye shes snying la 'bebs pa dang /__/rang gnas rig pa sku gsum mngon gyur te/__/ka dag lhun grub dgongs pa'i rtsal chen rdzogs/__/gzhi~X yi gnas lugs rtogs par=__/'khor 'das phyi nang ru shan legs phyed cing /__/rang sems 'khrul pa'i gzhi rtsa bcad pa yi/__/skye 'gag gnas pa'i gzhi med rtsa ba bral/__/rig pa chos sku rtogs par=__/byung tshor spros pa thams cad nyer zhi zhing /__/dbyings las byung yang dbyings las ma g.yos par/__/nam mkha'i rnal 'byor byar med yangs pa che/__/khyab brdal dgongs pa mngon gyur byin=__/sku gsum lhun gyis grub pa'i rang gdang ni/__/dbyings snang chen por thig sku'i tshom bu bkod/__/sgron drug gseng lama~X thod rgal sgom pa yi/__/snang bzhi'i pha mthar son par=__/chos can snang ba chos nyid dbyings su zad/__/rig pa 'brasa~X smin 'ja' lus rdo rje'i skur/__/bzhugs nas 'gro ba dpag med sgrol ba dang /__/'khor ba dong nas sprugs par=__/mdor na deng bzung tshe rab thams cad du/__/rje btsun bla ma gtsug gi nor bur bsten/__/mnyes pa gsum gyis sgrub pa mthar phyin nas/__/don gnyis lhun gyis grub par byin gyis rlobs/__/bstan 'dzin skyes rnams zhabs brtan bstan pa dar/__/bstan pa'i sbyin bdag dbu 'phang mtho ba dang /__/bstan la gnod byed ming tsam 'gyur ba dang /__/bstan gnyis dar shing rgyas pa'i bkra shis shog/__/ces pa'ang a mdo re skong gi sngags chen rdo rje 'dzin pa chen po gzhan phan byang chub sems kyis thugs mnga' bkra shis dpal ldan nas bla ma la gsol ba 'debs pa zhal gdams smon lam dang 'brel bar bris shig ces rten dang bcas gsung bskul ngor snyigs ma'i dus kyi dam chos 'dzin pa'i gral mthar skyes shing dge sbyong gi gzugs brnyan 'dzin pa 'jam dbyangs chos kyi blo gros pas sa byi gnam lo gsar 'char gyi cho 'phrul zla ba'i tshes bcu gcig la sde dge rdzong gsar bkra shis lha rtse'i chos grwa chen por bris pa 'dis kyang dpal ldan bla ma'i byin brlab snying dbus sim pa'i rgyur gyur cig/__sarba dA mang+ga laM//___//