JKCL-KABUM-08-NYA-012-005

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 5, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ རང་ལ་གྲོས་གདབ་ཀྱི་མཚངས་འདོན་བཞུགས་སོ། །ཕ་སྐྱབས་གནས་ཀུན་འདུས་བླ་མ་རྗེ་མཁྱེན་ནོ། །བདག་དལ་འབྱོར་མི་ལུས་ཁྱད་འཕགས་ནི་ཐོབ་ཀྱང་། །ལས་ངན་པའི་དབང་གིས་འདིར་སྣང་གི་ཞེན་པས། །རྒྱུད་མ་རུངས་ཐ་མ་སྲ་མཁྲེགས་ཏུ་གྱུར་པས། །སེམས་དམུ་ཆུའི་གཅོང་ནད་དྲག་པོ་ཡིས་ཟིན་ཏོ། །དུས་དེང་སང་ཕ་གཅིག་མཚན་ལྡན་གྱི་བླ་མ། །སྐུ་དངོས་སུ་མཇལ་བའི་སྐལ་བ་ནི་དམན་ཞིང་། །གསུངས་གདམས་ངག་ཆོས་ཀྱི་ཕུང་པོ་རྣམས་མཐོང་ཡང་། །རང་རྒྱུད་དུ་མ་ལོན་ཁྱི་སྔོན་ལ་རྩྭ་བཞིན། །བུ་ཐར་པའི་བློ་མིག་གྱེན་དུ་རེ་གཏོད་ཀྱང་། །དགྲ་ཉོན་མོངས་ཆགས་སོགས་ཞགས་པས་ནི་ཐེབས་ཏེ། །མགོ་ཐུར་དུ་དུད་སྟེ་དམྱལ་བ་ཡི་གཏིང་རྡོ། །བྱས་འདི་ལ་འཁོན་དུ་བཟུང་རིན་ཞིག་གདའ་འོ། །སེམས་ཆོས་ཉིད་རིག་པའི་ཡེ་ཤེས་ཀྱི་ཁྱེའུ་ཆུང་། །རྗེ་མཚན་ལྡན་བླ་མས་ཕྱོགས་ཙམ་ཞིག་བསྟན་ཀྱང་། །དོན་གོམས་འགྲིས་མ་བྱས་གཤིས་སུ་ནི་མ་ཕེབས། །དཔེ་སྤྲིན་གསེབ་ཉི་ཞུར་ལྟ་བུ་འདིས་སྐྱོའོ། །བདུད་འཆི་བདག་གཤེད་པོའི་སྡང་མིག་གིས་གཟིར་ཏེ། །ལས་ཞགས་པ་ནག་པོས་རྐེ་ལ་ནི་བཏབ་ནས། །མཚོན་དགྲ་སྟྭས་སྲོག་རྩ་དམར་པོ་ནི་གཅོད་རན། །བདག་གོམ་གསུམ་སྤོས་ན་འཆི་བདག་དང་ཉེའོ། །ལུས་འབྱུང་བཞིའི་བེམ་རྒོག་ཤུལ་དུ་ནི་ལུས་ཏེ། །གྲོགས་སུ་མེད་གཅིག་པུར་འགྲོ་བ་ཡི་དུས་སུ། །སྐྱབས་མཚུངས་མེད་བླ་མ་ཐུགས་རྗེ་ཅན་རྣམས་ལས། །མགོན་དཔུང་གཉེན་གཞན་མེད་གསོལ་བ་ནི་འདེབས་སོ། །ལས་དགེ་སྡིག་གང་བྱས་ཕྱི་བཞིན་དུ་འབྲང་ཚེ། །དགེ་བྱས་བསགས་ཆུད་དུ་ཉུང་ངུ་ལས་མེད་ཅིང་། །སྡིག་མི་དགེ་རི་རབ་ལྷུན་པོ་ཙམ་བསགས་པ། །བསྐྱུར་བ་ཡི་ཐབས་ནི་ཅི་བྱས་ཀྱང་མ་རྙེད། །འབྲས་རྣམ་སྨིན་རྩུབ་མོ་རང་ཐོག་ཏུ་མྱོང་དུས། །དུས་སྐད་ཅིག་བཟོད་པའི་གོ་སྐབས་ནི་མེད་ཀྱང་། །རང་བྱས་ཀྱི་འབྲས་བུར་སྤྱོད་པ་ལས་འོས་མེད། །དུས་དེ་ཚེ་ཀྱེ་ཧུད་ཀྱེ་ཧུད་ཅེས་འབོད་ཚེ། །ཕྱིས་སོང་བའི་སེམས་འགྱོད་ཆེན་པོ་ཞིག་ཡོང་ངོ་། །རྒྱུ་དེས་ན་བློ་གྲོས་ལས་ངན་གྱི་ཁུར་པོ། །བཏེག་མ་རན་གོང་ནས་དམ་ཆོས་ལ་འབད་མཛོད། །བུ་རང་དབང་ཡོད་དུས་དལ་ཆུད་ནི་མ་གསོན། །རྒྱུད་བསམ་པ་དགེ་བར་ནན་ཏན་དུ་བསྐྱེད་མཛོད། །དེ་སྐད་རང་ལ་གདམས་པ་འདི། སྦྲུལ་ལོ་ཆོ་འཕྲུལ་ཟླ་བའི་ཚེས༢། དགའ་སྐྱོ་སྤེལ་མའི་ཉམས་ཤར་ཚེ། རང་ལ་གྲོས་སུ་བཏབ་བོ།། །།

[edit]

!_rang la gros gdab kyi mtshangs 'don bzhugs so/__/pha skyabs gnas kun 'dus bla ma rje mkhyen no/__/bdag dal 'byor mi lus khyad 'phags ni thob kyang /__/las ngan pa'i dbang gis 'dir snang gi zhen pas/__/rgyud ma rungs tha ma sra mkhregs tu gyur pas/__/sems dmu chu'i gcong nad drag po yis zin to/__/dus deng sang pha gcig mtshan ldan gyi bla ma/__/sku dngos su mjal ba'i skal ba ni dman zhing /__/gsungs gdams ngag chos kyi phung po rnams mthong yang /__/rang rgyud du ma lon khyi sngon la rtswa bzhin/__/bu thar pa'i blo mig gyen du re gtod kyang /__/dgra nyon mongs chags sogs zhags pas ni thebs te/__/mgo thur du dud ste dmyal ba yi gting rdo/__/byas 'di la 'khon du bzung rin zhig gda' 'o/__/sems chos nyid rig pa'i ye shes kyi khye'u chung /__/rje mtshan ldan bla mas phyogs tsam zhig bstan kyang /__/don goms 'gris ma byas gshis su ni ma phebs/__/dpe sprin gseb nyi zhur lta bu 'dis skyo'o/__/bdud 'chi bdag gshed po'i sdang mig gis gzir te/__/las zhags pa nag pos rke la ni btab nas/__/mtshon dgra s+t+was srog rtsa dmar po ni gcod ran/__/bdag gom gsum spos na 'chi bdag dang nye'o/__/lus 'byung bzhi'i bem rgog shul du ni lus te/__/grogs su med gcig pur 'gro ba yi dus su/__/skyabs mtshungs med bla ma thugs rje can rnams las/__/mgon dpung gnyen gzhan med gsol ba ni 'debs so/__/las dge sdig gang byas phyi bzhin du 'brang tshe/__/dge byas bsags chud du nyung ngu las med cing /__/sdig mi dge ri rab lhun po tsam bsags pa/__/bskyur ba yi thabs ni ci byas kyang ma rnyed/__/'bras rnam smin rtsub mo rang thog tu myong dus/__/dus skad cig bzod pa'i go skabs ni med kyang /__/rang byas kyi 'bras bur spyod pa las 'os med/__/dus de tshe kye hud kye hud ces 'bod tshe/__/phyis song ba'i sems 'gyod chen po zhig yong ngo /__/rgyu des na blo gros las ngan gyi khur po/__/bteg ma ran gong nas dam chos la 'bad mdzod/__/bu rang dbang yod dus dal chud ni ma gson/__/rgyud bsam pa dge bar nan tan du bskyed mdzod/__/de skad rang la gdams pa 'di/__sbrul lo cho 'phrul zla ba'i tshes2/__dga' skyo spel ma'i nyams shar tshe/__rang la gros su btab bo//___//