JKCL-KABUM-02-KHA-050

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 2, Text 50, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: . Bir, H.P.: Khyentse Labrang, 2012.
Genre	Verses of Praise - bstod pa

1 Texts in this Section (sde tshan or chos tshan)

515-519	མ་ཧཱ་གུ་རུ་ཨོ་རྒྱན་རྡོ་རྗེ་འཆང་ལ་བསྟོད་ཅིང་གསོལ་བ་འདེབས་པ་བྱིན་རླབས་ཀྱི་གྲུབ་ཆར། ma hA gu ru o rgyan rdo rje 'chang la bstod cing gsol ba 'debs pa byin rlabs kyi grub char Verses of Praise - bstod pa   ·   Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

མ་ཧཱ་གུ་རུ་ཨོ་རྒྱན་རྡོ་རྗེ་འཆང་ལ་བསྟོད་ཅིང་གསོལ་བ་འདེབས་པ་བྱིན་རླབས་ཀྱི་གྲུབ་ཆར་ཞེས་བྱ་བ་བཞུགས་སོ། །ན་མོ་གུ་རུ་པདྨ་ཀཱ་ར་ཡེ། འཆི་མེད་བདེ་ལྡན་འོད་མཚན་སྟོང་འབར་མགོན། །སོར་རྟོག་ཡེ་ཤེས་ཕྱག་རྒྱའི་གཟུགས་སུ་ཤར། །སིནྡྷཱུའི་དྭངས་མཚོར་པདྨའི་སྡོང་པོའི་རྩེར། །བརྫུས་སྐྱེས་དབང་པོ་པདྨ་འབྱུང་གནས་རྒྱལ། །མཚན་དཔེའི་ལྷུན་སྟུག་སྲིད་ཞིའི་ཁམས་ན་མཛེས། །དྭངས་མའི་སྐུ་མཆོག་འཁོར་བའི་སྒྲིབ་ལས་གྲོལ། །དེ་བཞིན་ཞི་སྒོའི་ལམ་གྱི་མཐའ་བརྒལ་བ། །ལྷུན་གྲུབ་རིག་འཛིན་རྒྱལ་བའི་དབང་པོར་བསྟོད། །གཅིག་ཉིད་མ་ཡིན་ཕྱོགས་བཅུ་མཐའ་ཀླས་པའི། །ཞིང་ཁམས་རབ་འབྱམས་གངྒཱའི་རྡུལ་སྙེད་ན། །པདྨའི་མཚན་འཆང་རྒྱལ་སྲས་ཁྱུ་མཆོག་གི། གསང་བ་བླ་མེད་རྡོ་རྗེའི་དབྱངས་ཀྱིས་བསྙན། །ཁྱད་པར་མི་མཇེད་ཐུགས་ཀྱི་ཞིང་ཁམས་ན། །སྟོན་དང་བསྟན་པའི་རྣམ་འཕྲུལ་བསམ་ཡས་པ། །རྒྱལ་བ་རྣམས་ཀྱི་སྤྱོད་ཡུལ་ཁོ་ན་ལས། །འཕགས་བློས་ཀྱང་ནི་གཞལ་བར་ག་ལ་བཟོད། །འདྲེན་པ་མཉམ་མེད་དོན་ཀུན་གྲུབ་པ་ཡི། །དཔལ་གྱི་མགུལ་ནས་ལེགས་པར་བསྔགས་པའི་སྒྲས། །སྔགས་སྟོན་རྡོ་རྗེའི་རིག་འཛིན་འབྱུང་འགྱུར་གྱི། །ལུང་བསྟན་བདེན་པའི་རྔ་སྒྲས་འཛམ་གླིང་ཁྱབ། །གདོད་ནས་ཡེ་སངས་རྒྱས་ཀྱང་སློབ་ཚུལ་བསྟན། །སྤངས་རྟོགས་ཕར་མཐར་ཕྱིན་ཀྱང་སྦྱོངས་པའི་ཚུལ། །གྲུབ་གཉིས་རྩེ་མོར་གཤེགས་ཀྱང་གྲུབ་ཚུལ་བརྙེས། །སྐྱེ་འཆིའི་འཇིགས་ལས་འདས་ཀྱང་འཆི་མེད་བསྒྲུབ། །རྡོ་རྗེའི་སྐུ་ནི་བེམ་ཆོས་ལས་འདས་ཤིང་། །ཕུང་ཁམས་རྣམ་ཤེས་སྦུབས་ལས་རབ་གྲོལ་བ། །འོད་གསལ་ཡེ་ཤེས་རྡོ་རྗེའི་སྐུ་མཆོག་ནི། །སྲིད་པ་ཇི་སྲིད་གནས་ཀྱི་བར་དུ་རྟག །བདུད་དང་མུ་སྟེགས་རྒོལ་བའི་ཀླད་པ་འགེམ། །སངས་རྒྱས་བསྟན་པའི་རྒྱལ་རྔ་རབ་ཏུ་བརྡུང་། །འཇིགས་མེད་གདོང་ལྔའི་ང་རོ་སྒྲོགས་པ་ཡི། །ཀུན་མཁྱེན་ཐུབ་པའི་རྒྱལ་ཚབ་ཁྱེད་ལས་སུ། །ཁྱད་པར་སྨོན་ལམ་གཅིག་ཏུ་མཐུན་གྲུབ་པའི། །མངའ་བདག་ཚངས་པ་ལྷ་ཡི་མེ་ཏོག་གི། ཐུགས་བསྐྱེད་གསེར་གྱི་ཤིང་རྟས་དྲངས་པ་ན། །བྱང་ཕྱོགས་གངས་རིའི་ལྗོང་འདིར་དཀར་པོ་བྱས། །དེ་ཚེ་འཕགས་པ་དགྱེས་པའི་གནྡྷོ་ལ། །མཆོག་གསུམ་རྟེན་མཆོག་ནོར་བུའི་མཛོད་ཀྱིས་གཏམས། །མདོ་སྔགས་ཡོངས་རྫོགས་བསྒྱུར་བཤད་འཆད་ཉན་དང་། །སྒོམ་དང་སྒྲུབ་པའི་ཉིན་བྱེད་གསར་དུ་འཆར། །བཀའ་བབ་སྙིང་གི་བུ་མཆོག་ཉེར་ལྔ་སོགས། །མི་ཡི་ལུས་ལ་རྡོ་རྗེའི་གསང་གསུམ་གྱི། །བྱིན་རླབས་གྲུབ་པའི་མཚན་རྟགས་བཟང་པོ་ལ། །འཕགས་ཡུལ་རྣལ་འབྱོར་ཆེ་རྣམས་ཕྲག་པར་དོགས། །ས་གསུམ་ཀུན་ཏུ་ཁྱབ་པའི་གཟི་འོད་འཕྲོ། །རྒྱལ་བས་རྒྱལ་བ་ཉིད་ལས་ཆེས་བསྔགས་ཀྱང་། །ཡོན་ཏན་ཆ་ཡི་ཐུབ་པ་མཆོག་དང་མཉམ། །ངོ་མཚར་ཕྲིན་ལས་འདི་ཡི་ལྷག་པར་ངེས། །དབང་འབྱོར་ཆེན་པོའི་ཏིང་འཛིན་མཐུ་ཡི་ནི། །ཟབ་མོའི་ཆོས་རྟེན་ནོར་གྱི་གཏེར་མང་པོས། །བོད་ཁམས་མཐའ་དབུས་ཐམས་ཅད་ཕྱུར་བུར་གཤམས། །ཆེར་སྙིགས་རྩོད་དུས་ཐ་མའང་མངོན་དུ་སྣང་། །བསྟན་པ་ཡོངས་ཀྱི་སྤྱི་མོས་ཨོ་རྒྱན་རྗེ། །གདུལ་དཀའ་འདུལ་ཞིང་སྣང་སྲིད་ཟིལ་གྱིས་གནོན། །དུས་གསུམ་ཀུན་ཏུ་འབྱུང་བར་དཀའ་བ་ཡི། །རྣམ་ཐར་མཚུངས་མེད་སྲིད་པ་གསུམ་ཀྱི་མགོན། །བྱང་ཕྱོགས་འདི་ན་རྒྱལ་བའི་ལམ་སྲོལ་དག །ཅི་དགར་འདྲེན་ཅིང་གང་བདེར་སྤྱོད་པ་འདི། །ཁྱོད་དྲིན་ཁོ་ན་གཟུར་གནས་རྣམས་ཀྱིས་ཤེས། །འཁྱོག་པོར་ཞུགས་པའི་ཡིད་གར་འཇུག་མི་འགྱུར། །དེས་ན་མགོན་པོ་ཁྱོད་ཀྱི་བཀའ་དྲིན་འདི། །གཟུགས་སུ་གྲུབ་ན་ས་ཆེན་འདིས་ཐེག་དཀའ། །ནམ་མཁའ་འདི་ཡང་སྣོད་དུ་ཆུང་བ་ནི། །ཡེ་ཤེས་སྤྱན་ལྡན་རྣམས་ལ་ཚད་མར་གྲུབ། །གང་གི་ཐུགས་རྗེ་དཔྲིི་བཀོལ་མ་མཆིས་ཀྱང་། །ཚེས་བཅུའི་མཛད་པའི་དུས་ཆེན་མཐའ་དག་ལ། །བྱིན་རླབས་ལྷག་པར་མྱུར་བར་ཞལ་བཞེས་བཞིན། །དད་མོས་ཅན་ལ་བདེན་དོན་མངོན་སུམ་སྣང་། །བྱང་ཆུབ་ཕྱོགས་ཀྱི་ཡོན་ཏན་སོ་བདུན་སོགས། །དེ་བཞིན་གཤེགས་ཀྱི་མི་ཟད་རྒྱན་འཁོར་ལྔ། །ཡོངས་སུ་རྫོགས་པས་དེ་དང་དགོངས་པ་གཅིག །སྐུ་གསུམ་སྟོན་པའི་ཡོན་ཏན་བསམ་མི་ཁྱབ། །དེ་ལྟར་རྒྱལ་ཀུན་འདུས་པའི་སྤྱི་དཔལ་ཆེ། །གང་གི་རང་བཞིན་ཟབ་ཅིང་གཏིང་དཔག་དཀའ། །འཇམ་དཔལ་དབྱངས་ཀྱི་མཁྱེན་པས་མ་དཔོག་ན། །བྱིས་བློའི་མཐུ་ཡི་ངལ་བས་ཅི་ཞིག་བྱ། །དེ་ལྟ་ནའང་བཀའ་དྲིན་རྗེས་དྲན་གྱི། །ལེགས་བྱས་བསྟོད་པའི་དགེ་ཚོགས་ཅི་མཆིས་འདིས། །ཀུན་མཁྱེན་རྒྱལ་བའི་བསྟན་པ་རྒྱས་པ་དང་། །དེར་འཛིན་བྱེད་རྣམས་དབུ་འཕང་མཐོ་གྱུར་ཅིག །བསྟན་ལ་གུས་པས་མཆོད་པའི་སྦྱིན་བདག་རྣམས། །དད་དང་དགེ་བའི་བློ་མཆོག་རྒྱུད་ལ་སྐྱེ། །ཕན་ཚུན་བྱམས་པའི་སེམས་དང་རབ་ལྡན་ཞིང་། །ཚེ་བསོད་དཔལ་འབྱོར་ཡར་ཟླ་ལྟར་རྒྱས་ཤོག །ཕྱོགས་བཅུའི་ངུར་སྨྲིག་འཆང་བའི་དགེ་འདུན་རྣམས། །རྣམ་དག་ཚུལ་ཁྲིམས་གཙང་མས་གཞི་གཟུང་ཞིང་། །སྤང་དང་ཀློག་པའི་བྱ་བར་རབ་བརྩོན་ཏེ། །རྒྱལ་བའི་བསྟན་པ་རིན་ཆེན་འཕེལ་གྱུར་ཅིག །གང་ཞིག་བསྟན་ལ་འཁུ་བའི་སེམས་འཆང་བའི། །ལྷ་མིན་ཀླ་ཀློ་མུ་སྟེགས་ཚོགས་རྣམས་ཀུན། །མགོན་པོ་པདྨ་རྒྱལ་གྱི་ཐུགས་རྗེས་གཟིགས། །མིང་གི་ལྷག་མ་ཉིད་དུ་འགྱུར་བར་ཤོག །བདག་ཀྱང་བྱང་ཆུབ་ལམ་བཟང་སྒྲུབ་པ་ཡི། །རྣམ་དཀར་དགེ་བའི་པད་དཀར་རྒྱས་པའི་ཚལ། །མི་མཐུན་བ་མོས་གཞོམ་པར་མ་གྱུར་ཅིག །གང་བསམ་ཐམས་ཅད་འབད་མེད་འགྲུབ་གྱུར་ཅིག །ཤིན་ཏུ་གདུལ་བ་དཀའ་བའི་སེམས་ཅན་རྣམས། །འདུལ་ཐབས་རྣམ་པ་བཞི་ཡིས་རབ་འདུལ་ཞིང་། །བདག་གི་མིང་ཙམ་ཐོས་པས་ཐར་མཆོག་གི། ས་བོན་ཐེབས་ནས་རྣམ་གྲོལ་ལ་འགོད་ཤོག །ཇི་སྲིད་འཁོར་བའི་སེམས་ཅན་མ་སྟོངས་བར། །རྒྱལ་སྲས་འཇམ་དཔལ་དཔའ་བོ་ཇི་བཞིན་དུ། །འགྲོ་བ་སྒྲོལ་བའི་དམ་བཅའ་མི་ལྷོད་པ། །སེམས་ཅན་དོན་རབ་སྒྲུབ་ལ་བརྩོན་པར་ཤོག །འཆི་བདག་བདུད་ཀྱི་གཡུལ་ལས་རབ་རྒྱལ་ཞིང་། །ཐབས་ཤེས་རྣལ་འབྱོར་ཟབ་མོ་བསྒྲོད་པ་ཡིས། །ཟག་བཅས་དྭངས་མ་རྡོ་རྗེའི་སྐུར་སྨིན་ཏེ། །རིག་འཛིན་པད་འབྱུང་རྗེ་དང་དབྱེར་མེད་ཤོག །ཅེས་པའང་མེ་ཁྱི་ཆོ་འཕྲུལ་ཟླ་བའི་དཀར་ཕྱོགས་ཀྱི་བཟང་པོ་དང་པོར་བྲིས་པ་གུ་རུ་རིན་པོ་ཆེའི་ཐུགས་རྗེའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག །སརྦ་དཱ་མངྒ་ལཾ། ། །།

[edit]

ma hA gu ru o rgyan rdo rje 'chang la bstod cing gsol ba 'debs pa byin rlabs kyi grub char zhes bya ba bzhugs so/____/na mo gu ru pad+ma kA ra ye/__'chi med bde ldan 'od mtshan stong 'bar mgon/____/sor rtog ye shes phyag rgya'i gzugs su shar/____/sin+d+hU'i dwangs mtshor pad+ma'i sdong po'i rtser/____/brdzus skyes dbang po pad+ma 'byung gnas rgyal/____/mtshan dpe'i lhun stug srid zhi'i khams na mdzes/____/dwangs ma'i sku mchog 'khor ba'i sgrib las grol/____/de bzhin zhi sgo'i lam gyi mtha' brgal ba/____/lhun grub rig 'dzin rgyal ba'i dbang por bstod/____/gcig nyid ma yin phyogs bcu mtha' klas pa'i/____/zhing khams rab 'byams gang+gA'i rdul snyed na/____/pad+ma'i mtshan 'chang rgyal sras khyu mchog gi/__gsang ba bla med rdo rje'i dbyangs kyis bsnyan/____/khyad par mi mjed thugs kyi zhing khams na/____/ston dang bstan pa'i rnam 'phrul bsam yas pa/____/rgyal ba rnams kyi spyod yul kho na las/____/'phags blos kyang ni gzhal bar ga la bzod/____/'dren pa mnyam med don kun grub pa yi/____/dpal gyi mgul nas legs par bsngags pa'i sgras/____/sngags ston rdo rje'i rig 'dzin 'byung 'gyur gyi/____/lung bstan bden pa'i rnga sgras 'dzam gling khyab/____/gdod nas ye sangs rgyas kyang slob tshul bstan/____/spangs rtogs phar mthar phyin kyang sbyongs pa'i tshul/____/grub gnyis rtse mor gshegs kyang grub tshul brnyes/____/skye 'chi'i 'jigs las 'das kyang 'chi med bsgrub/____/rdo rje'i sku ni bem chos las 'das shing /____/phung khams rnam shes sbubs las rab grol ba/____/'od gsal ye shes rdo rje'i sku mchog ni/____/srid pa ji srid gnas kyi bar du rtag__/bdud dang mu stegs rgol ba'i klad pa 'gem/____/sangs rgyas bstan pa'i rgyal rnga rab tu brdung /____/'jigs med gdong lnga'i nga ro sgrogs pa yi/____/kun mkhyen thub pa'i rgyal tshab khyed las su/____/khyad par smon lam gcig tu mthun grub pa'i/____/mnga' bdag tshangs pa lha yi me tog gi/__thugs bskyed gser gyi shing rtas drangs pa na/____/byang phyogs gangs ri'i ljong 'dir dkar po byas/____/de tshe 'phags pa dgyes pa'i gan+d+ho la/____/mchog gsum rten mchog nor bu'i mdzod kyis gtams/____/mdo sngags yongs rdzogs bsgyur bshad 'chad nyan dang /____/sgom dang sgrub pa'i nyin byed gsar du 'char/____/bka' bab snying gi bu mchog nyer lnga sogs/____/mi yi lus la rdo rje'i gsang gsum gyi/____/byin rlabs grub pa'i mtshan rtags bzang po la/____/'phags yul rnal 'byor che rnams phrag par dogs/____/sa gsum kun tu khyab pa'i gzi 'od 'phro/____/rgyal bas rgyal ba nyid las ches bsngags kyang /____/yon tan cha yi thub pa mchog dang mnyam/____/ngo mtshar phrin las 'di yi lhag par nges/____/dbang 'byor chen po'i ting 'dzin mthu yi ni/____/zab mo'i chos rten nor gyi gter mang pos/____/bod khams mtha' dbus thams cad phyur bur gshams/____/cher snyigs rtsod dus tha ma'ang mngon du snang /____/bstan pa yongs kyi spyi mos o rgyan rje/____/gdul dka' 'dul zhing snang srid zil gyis gnon/____/dus gsum kun tu 'byung bar dka' ba yi/____/rnam thar mtshungs med srid pa gsum kyi mgon/____/byang phyogs 'di na rgyal ba'i lam srol dag__/ci dgar 'dren cing gang bder spyod pa 'di/____/khyod drin kho na gzur gnas rnams kyis shes/____/'khyog por zhugs pa'i yid gar 'jug mi 'gyur/____/des na mgon po khyod kyi bka' drin 'di/____/gzugs su grub na sa chen 'dis theg dka'/____/nam mkha' 'di yang snod du chung ba ni/____/ye shes spyan ldan rnams la tshad mar grub/____/gang gi thugs rje dpri+i bkol ma mchis kyang /____/tshes bcu'i mdzad pa'i dus chen mtha' dag la/____/byin rlabs lhag par myur bar zhal bzhes bzhin/____/dad mos can la bden don mngon sum snang /____/byang chub phyogs kyi yon tan so bdun sogs/____/de bzhin gshegs kyi mi zad rgyan 'khor lnga/____/yongs su rdzogs pas de dang dgongs pa gcig__/sku gsum ston pa'i yon tan bsam mi khyab/____/de ltar rgyal kun 'dus pa'i spyi dpal che/____/gang gi rang bzhin zab cing gting dpag dka'/____/'jam dpal dbyangs kyi mkhyen pas ma dpog na/____/byis blo'i mthu yi ngal bas ci zhig bya/____/de lta na'ang bka' drin rjes dran gyi/____/legs byas bstod pa'i dge tshogs ci mchis 'dis/____/kun mkhyen rgyal ba'i bstan pa rgyas pa dang /____/der 'dzin byed rnams dbu 'phang mtho gyur cig__/bstan la gus pas mchod pa'i sbyin bdag rnams/____/dad dang dge ba'i blo mchog rgyud la skye/____/phan tshun byams pa'i sems dang rab ldan zhing /____/tshe bsod dpal 'byor yar zla ltar rgyas shog__/phyogs bcu'i ngur smrig 'chang ba'i dge 'dun rnams/____/rnam dag tshul khrims gtsang mas gzhi gzung zhing /____/spang dang klog pa'i bya bar rab brtson te/____/rgyal ba'i bstan pa rin chen 'phel gyur cig__/gang zhig bstan la 'khu ba'i sems 'chang ba'i/____/lha min kla klo mu stegs tshogs rnams kun/____/mgon po pad+ma rgyal gyi thugs rjes gzigs/____/ming gi lhag ma nyid du 'gyur bar shog__/bdag kyang byang chub lam bzang sgrub pa yi/____/rnam dkar dge ba'i pad dkar rgyas pa'i tshal/____/mi mthun ba mos gzhom par ma gyur cig__/gang bsam thams cad 'bad med 'grub gyur cig__/shin tu gdul ba dka' ba'i sems can rnams/____/'dul thabs rnam pa bzhi yis rab 'dul zhing /____/bdag gi ming tsam thos pas thar mchog gi/__sa bon thebs nas rnam grol la 'god shog__/ji srid 'khor ba'i sems can ma stongs bar/____/rgyal sras 'jam dpal dpa' bo ji bzhin du/____/'gro ba sgrol ba'i dam bca' mi lhod pa/____/sems can don rab sgrub la brtson par shog__/'chi bdag bdud kyi g.yul las rab rgyal zhing /____/thabs shes rnal 'byor zab mo bsgrod pa yis/____/zag bcas dwangs ma rdo rje'i skur smin te/____/rig 'dzin pad 'byung rje dang dbyer med shog__/ces pa'ang me khyi cho 'phrul zla ba'i dkar phyogs kyi bzang po dang por bris pa gu ru rin po che'i thugs rje'i byin rlabs myur du 'jug pa'i rgyur gyur cig__/sarba dA mang+ga laM/__/____//