JKCL-KABUM-02-KHA-031

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 2, Text 31, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: . Bir, H.P.: Khyentse Labrang, 2012.
Genre	Verses of Praise - bstod pa

1 Texts in this Section (sde tshan or chos tshan)

435-437	འཕགས་མ་སྒྲོལ་མ་དཀར་མོ་ལ་བསྟོད་པ་འཆི་མེད་བདུད་རྩིའི་རླབས་ཕྲེང། 'phags ma sgrol ma dkar mo la bstod pa 'chi med bdud rtsi'i rlabs phreng Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

འཕགས་མ་སྒྲོལ་མ་དཀར་མོ་ལ་བསྟོད་པ་འཆི་མེད་བདུད་རྩིའི་རླབས་ཕྲེང་ཞེས་བྱ་བ་བཞུགས་སོ། །ཨོཾ་སྭསྟི། རིག་སྔགས་གྲུབ་པའི་ཅོད་པན་རལ་པའི་རྩེར། །ཞབས་མཐིལ་ཆུ་སྐྱེས་དམར་པོ་རྟག་རོལ་པ། །ལྷ་དང་ཀླུ་དབང་ཚོགས་ཀུན་གུས་འདུད་པ། །བཅོམ་ལྡན་འདས་མས་དགེ་ལེགས་སྣང་བ་སྩོལ། །ཨོཾ་ཡིག་གླུར་བླངས་རིག་སྔགས་ཚོགས་ལྡན་པ། །དབྱངས་ཅན་མགྲིན་པའི་སྒྲ་སྙན་འཕྲོག་མཛད་ཅིང་། །དྲང་སྲོང་དགེ་བའི་དབང་པོར་བརྩེ་མཛད་པའི། །འཆི་མེད་ཚེ་སྦྱིན་ལྷ་མོར་གུས་པས་བསྟོད། །ཁྱོད་སྐུ་ཁ་བ་དུང་ལྟར་རབ་དཀར་ཞིང་། །སྟོན་ཟླ་བྱེ་བས་འཁྱུད་ལྟར་བཀྲག་མཛེས་པ། །མཚན་དཔེའི་རྒྱུ་སྐར་དཀྱིལ་འཁོར་ལྟར་བཀྲ་བའི། །འཆི་མེད་ཚེ་སྦྱིན་ལྷ་མོར༴། རི་དྭགས་མིག་ཟུང་ཨུཏྤལ་གཡོ་སྙམ་བྱེད། །ཕྱག་ཞབས་ལྕུགས་ཕྲན་དཔག་བསམ་ཡལ་ག་སྙོམས། །མྱོས་བུམ་མཐོ་བ་སྐབས་གསུམ་བུ་མོར་འཁྲུལ། །འཆི་མེད་ཚེ་སྦྱིན༴། དབུ་སྐྲ་རལ་པའི་ལན་བུ་ལྟག་པར་བཅིངས། །ལྷག་མ་རྒྱབ་གྲོལ་སྐུ་སྐེད་མཛེས་ཤིང་དྲང་། །ཞབས་ཟུང་རྡོ་རྗེའི་མདུད་པ་དམ་པོར་བཅིངས། །འཆི་མེད་ཚེ་སྦྱིན༴། སྤྱན་བདུན་བཀྲ་བས་རིགས་དྲུག་གནས་ལ་གཟིགས། །བསྐལ་མང་ཐུགས་བསྐྱེད་བདུད་རྩིའི་སྤྲིན་ཕུང་འཁྲིགས། །འགྲོ་ལ་ཕན་བདེའི་གྲུ་ཆར་འབེབས་མཛད་པ། །འཆི་མེད་ཚེ་སྦྱིན༴། ལྷ་རྫས་སྲབ་མོའི་གོས་དང་དར་དཔྱང་འཕུར། །གསེར་རྒྱན་རིན་ཆེན་དུ་མའི་ཕྲ་ཚོམ་ཅན། །མཐོང་བས་ཡིད་འཕྲོག་ཆགས་བྲལ་ཡིད་གཡོས་པའི། །འཆི་མེད་ཚེ་སྦྱིན༴། བྱམས་པའི་དཔལ་མངའ་སྙིང་རྗེའི་མངའ་འཛིན་པ། །རྒྱལ་སྲས་སེམས་དཔའི་གཏེར་ཆེན་འབྱིན་མཛད་ལས། །འགྲོ་རྣམས་སྒྲོལ་བའི་དེད་དཔོན་གཅིག་གྱུར་པ། །འཆི་མེད་ཚེ་སྦྱིན༴། ཁྱོད་གསུང་ཚངས་དབྱངས་ཡན་ལག་དྲུག་ཅུས་བརྗིད། །ཨ་དོན་སྐྱེ་མེད་སྟོང་ཉིད་ཕུད་སྒྲ་སྒྲོག །མཁྱེན་བརྩེའི་རོ་འཛིན་རིང་འཚོའི་ཞམ་ཆུ་འཐོར། །འཆི་མེད་ཚེ་སྦྱིན༴། ཟབ་གསལ་གཉིས་མེད་གང་ཐུགས་མཁའ་ཡི་དབྱིངས། །གདོད་མའི་མགོན་པོ་ཚེ་སྦྱིན་ལྷ་མོར་བརྫུ། །རྒྱལ་བ་ཀུན་གྱི་ཡེ་ཤེས་གཅིག་བསྡུས་པ། །འཆི་མེད་ཚེ་སྦྱིན༴། ཡོན་ཏན་དཔག་ཡས་ཞིང་གི་རྡུལ་སྙེད་དང་། །འགྲན་ན་ཞིང་རྡུལ་ནམ་མཁའི་པདྨོར་མཚུངས། །ཁྱོད་ཀྱི་ཡོན་ཏན་ཕྲིན་ལས་འཛད་མེད་པ། །འཆི་མེད་ཚེ་སྦྱིན་ལྷ་མོར་གུས་པས་བསྟོད། །དེ་ལྟར་བཅོམ་ལྡན་ཨཱཪྻ་ཏཱ་རེ་ལ། །རྩེ་གཅིག་བསྟོད་ཅིང་གསོལ་བ་བཏབ་པའི་མཐུས། །བདག་སོགས་འགྲོ་བའི་འཇིགས་པ་ཆེན་པོའི་རིགས། །མཐའ་དག་མ་ལུས་པ་ལས་བསྐྱབ་ཏུ་གསོལ། །ཚེ་ནོར་ཆོས་དང་བསོད་ནམས་ཡེ་ཤེས་རྒྱས། །བྱང་ཆུབ་སེམས་གཉིས་མི་ཉམས་གོང་འཕེལ་ནས། །རླབས་ཆེན་གཞན་དོན་སྒྲུབ་ལ་མཐུ་དཔའ་བ། །འཆི་མེད་ལྷ་མོ་ཁྱེད་འདྲར་བདག་གྱུར་ཅིག །ཅེས་བཅོམ་ལྡན་འདས་མ་ལ་བསྟོད་པ་འདིའང་རང་ལོ་ཉེར་ལྔ་པའི་གནམ་ལོ་གསར་དུ་ཚེས་པའི་དགའ་བ་བཟང་པོར་གཙུག་ལག་སྨྲ་བའི་ཉི་མས་རྩེ་གཅིག་གུས་པས་བསྟོད་ཅིང་གསོལ་བ་འདེབས་པའི་མཐུ་ལས་རེ་སྨོན་ཐམས་ཅད་ཡིད་བཞིན་དུ་འགྲུབ་པ་དང་བསྟན་འཛིན་སྐྱེས་བུ་རྣམས་ཞབས་པད་བསྐལ་བརྒྱར་བརྟན་པའི་རྒྱུར་གྱུར་ཅིག །སརྦ་དཱ་མངྒ་ལཾ། ། །།

[edit]

'phags ma sgrol ma dkar mo la bstod pa 'chi med bdud rtsi'i rlabs phreng zhes bya ba bzhugs so/____/oM swasti/__rig sngags grub pa'i cod pan ral pa'i rtser/____/zhabs mthil chu skyes dmar po rtag rol pa/____/lha dang klu dbang tshogs kun gus 'dud pa/____/bcom ldan 'das mas dge legs snang ba stsol/____/oM yig glur blangs rig sngags tshogs ldan pa/____/dbyangs can mgrin pa'i sgra snyan 'phrog mdzad cing /____/drang srong dge ba'i dbang por brtse mdzad pa'i/____/'chi med tshe sbyin lha mor gus pas bstod/____/khyod sku kha ba dung ltar rab dkar zhing /____/ston zla bye bas 'khyud ltar bkrag mdzes pa/____/mtshan dpe'i rgyu skar dkyil 'khor ltar bkra ba'i/____/'chi med tshe sbyin lha mor=/__ri dwags mig zung ut+pal g.yo snyam byed/____/phyag zhabs lcugs phran dpag bsam yal ga snyoms/____/myos bum mtho ba skabs gsum bu mor 'khrul/____/'chi med tshe sbyin=/__dbu skra ral pa'i lan bu ltag par bcings/____/lhag ma rgyab grol sku sked mdzes shing drang /____/zhabs zung rdo rje'i mdud pa dam por bcings/____/'chi med tshe sbyin=/__spyan bdun bkra bas rigs drug gnas la gzigs/____/bskal mang thugs bskyed bdud rtsi'i sprin phung 'khrigs/____/'gro la phan bde'i gru char 'bebs mdzad pa/____/'chi med tshe sbyin=/__lha rdzas srab mo'i gos dang dar dpyang 'phur/____/gser rgyan rin chen du ma'i phra tshom can/____/mthong bas yid 'phrog chags bral yid g.yos pa'i/____/'chi med tshe sbyin=/__byams pa'i dpal mnga' snying rje'i mnga' 'dzin pa/____/rgyal sras sems dpa'i gter chen 'byin mdzad las/____/'gro rnams sgrol ba'i ded dpon gcig gyur pa/____/'chi med tshe sbyin=/__khyod gsung tshangs dbyangs yan lag drug cus brjid/____/a don skye med stong nyid phud sgra sgrog__/mkhyen brtse'i ro 'dzin ring 'tsho'i zham chu 'thor/____/'chi med tshe sbyin=/__zab gsal gnyis med gang thugs mkha' yi dbyings/____/gdod ma'i mgon po tshe sbyin lha mor brdzu/____/rgyal ba kun gyi ye shes gcig bsdus pa/____/'chi med tshe sbyin=/__yon tan dpag yas zhing gi rdul snyed dang /____/'gran na zhing rdul nam mkha'i pad+mor mtshungs/____/khyod kyi yon tan phrin las 'dzad med pa/____/'chi med tshe sbyin lha mor gus pas bstod/____/de ltar bcom ldan AR+Ya tA re la/____/rtse gcig bstod cing gsol ba btab pa'i mthus/____/bdag sogs 'gro ba'i 'jigs pa chen po'i rigs/____/mtha' dag ma lus pa las bskyab tu gsol/____/tshe nor chos dang bsod nams ye shes rgyas/____/byang chub sems gnyis mi nyams gong 'phel nas/____/rlabs chen gzhan don sgrub la mthu dpa' ba/____/'chi med lha mo khyed 'drar bdag gyur cig__/ces bcom ldan 'das ma la bstod pa 'di'ang rang lo nyer lnga pa'i gnam lo gsar du tshes pa'i dga' ba bzang por gtsug lag smra ba'i nyi mas rtse gcig gus pas bstod cing gsol ba 'debs pa'i mthu las re smon thams cad yid bzhin du 'grub pa dang bstan 'dzin skyes bu rnams zhabs pad bskal brgyar brtan pa'i rgyur gyur cig__/sarba dA mang+ga laM/__/____//_