JKW-KABUM-02-KHA-001-025

🚧 This website is under continued development. We appreciate your patience!

Previous Text Back to Volume PageNext Text

འོད་དཔག་མེད།

Wylie title	'od dpag med
Location	mkhyen brtse'i bka' 'bum Volume 2, sde tshan 1, Text 25, Pages 105-107 (Folios 53a4 to 54a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. od dpag med. In jam dbyangs mkhyen brtse'i dbang po'i bka' 'bum, Vol. 2: 105-107. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

25 105-107	འོད་དཔག་མེད། 'od dpag med Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སངས་རྒྱས་འོད་དཔག་ཏུ་མེད་པ་ནི། དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོའི་དྲུང་དུ། བྱང་ཆུབ་སེམས་དཔའ་དགེ་སློང་ཆོས་ཀྱི་འབྱུང་གནས་ཞེས་བྱ་བར་གྱུར་ནས། སངས་རྒྱས་དེ་ལ་བསྟོད་པ་བྱས་ནས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་བཀོད་ཐམས་ཅད་གཅིག་ཏུ་བསྡོམས་ནས་འཛིན་པའི་སྨོན་ལམ་རྒྱ་ཆེར་བཏབ་ཅིང་རྒྱལ་སྲས་ཀྱི་སྤྱོད་པ་རླབས་པོ་ཆེ་སྤྱད་ཅིང་། སངས་རྒྱས་དེས་ཀྱང་འཇིག་རྟེན་གྱི་ཞིང་ཁམས་བདེ་བ་ཅན་ཞེས་བྱ་བར་སངས་རྒྱས་འོད་དཔག་མེད་དུ་འགྱུར་བར་ལུང་བསྟན་པ་དེ་བཞིན་དུ་སངས་རྒྱས་ནས་ད་ལྟ་ཡན་ལ་བསྐལ་བ་བཅུ་ལོན་ཅིང་། ད་དུང་ཡང་བསྐལ་པ་དཔག་ཏུ་མེད་པར་འཚོ་ཞིང་གཞེས་པའི་ཕྱིར་ཚེ་དཔག་ཏུ་མེད་པ་དང་། སྐུ་ལས་བྱུང་བའི་འོད་ཟེར་གྱི་སྣང་བས་འཇིག་རྟེན་གྱི་ཁམས་དཔག་ཏུ་མེད་པ་འགེངས་པའི་ཕྱིར་འོད་དཔག་ཏུ་མེད་པ་ཞེས་བྱ། རྡོ་རྗེ་ཐེག་པའི་རྒྱུད་སྡེ་རྣམས་སུ་པདྨའི་རིགས་ཀྱི་གཙོ་བོ་སྣང་བ་མཐའ་ཡས་སུ་གསུངས་པ་སོགས་སྐུའི་རྣམ་འགྱུར་དང་། མིང་གི་མངོན་བརྗོད་མཐའ་ཀླས་པ་དེ་ཉིད་ཀྱི་མཚན་ཙམ་གང་གི་རྣ་ལམ་དུ་སོན་པས་ཀྱང་ཚེ་འདིར་དུས་མ་ཡིན་པའི་འཆི་བ་ཐམས་ཅད་བྱང་ཞིང་། ཚེ་དང་བསོད་ནམས་དང་ཡེ་ཤེས་ཐམས་ཅད་རྒྱས་པར་འགྱུར་བ་དང་། ནམ་འཆི་བའི་ཚེའང་གནད་གཅོད་ཀྱི་སྡུག་བསྔལ་མི་འབྱུང་བར། བཅོམ་ལྡན་འདས་འོད་དཔག་ཏུ་མེད་པ་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མངོན་སུམ་དུ་མཐོང་ནས་ཡོན་ཏན་གྱི་བཀོད་པ་གཞལ་གྱིས་མི་ལང་བ་འཇིག་རྟེན་གྱི་ཞིང་ཁམས་བདེ་བ་ཅན་དུ་པདྨའི་སྙིང་པོ་ལ་བརྫུས་ཏེ་སྐྱེས་ནས་ཐེག་པ་གསུམ་གྱི་རིགས་སུ་སྨིན་པར་འགྱུར་བ་སོགས་ཕན་ཡོན་བསམ་གྱིས་མི་ཁྱབ་ན། རྟག་པར་རྗེས་སུ་དྲན་ཅིང་སྨོན་ལམ་འདེབས་པ་དང་། གང་གི་སྐུ་གསུང་ཐུགས་ཀྱི་རྟེན་བཞེངས་པ་དང་། གཟུངས་སྔགས་ཟབ་མོ་བཟླ་བ་སོགས་ཀྱི་ཕན་ཡོན་ནི་ལྟ་སྨོས་ཀྱང་ཅི་དགོས་པས། དེས་ན་དད་པ་དང་བརྩོན་འགྲུས་སུ་ལྡན་པ་རྣམས་ཀྱིས་ཚུལ་འདི་ལ་རྟག་ཏུ་ནན་ཏན་སྙིང་པོར་མཛད་འཚལ་ལོ།། །། ༈

[edit]

'od dpag med/ sangs rgyas 'od dpag tu med pa ni/_de bzhin gshegs pa 'jig rten dbang phyug rgyal po'i drung du/_byang chub sems dpa' dge slong chos kyi 'byung gnas zhes bya bar gyur nas/_sangs rgyas de la bstod pa byas nas sangs rgyas bye ba khrag khrig brgya stong phrag brgyad cu rtsa gcig gi zhing bkod thams cad gcig tu bsdoms nas 'dzin pa'i smon lam rgya cher btab cing rgyal sras kyi spyod pa rlabs po che spyad cing /_sangs rgyas des kyang 'jig rten gyi zhing khams bde ba can zhes bya bar sangs rgyas 'od dpag med du 'gyur bar lung bstan pa de bzhin du sangs rgyas nas da lta yan la bskal ba bcu lon cing /_da dung yang bskal pa dpag tu med par 'tsho zhing gzhes pa'i phyir tshe dpag tu med pa dang /_sku las byung ba'i 'od zer gyi snang bas 'jig rten gyi khams dpag tu med pa 'gengs pa'i phyir 'od dpag tu med pa zhes bya/_rdo rje theg pa'i rgyud sde rnams su pad+ma'i rigs kyi gtso bo snang ba mtha' yas su gsungs pa sogs sku'i rnam 'gyur dang /_ming gi mngon brjod mtha' klas pa de nyid kyi mtshan tsam gang gi rna lam du son pas kyang tshe 'dir dus ma yin pa'i 'chi ba thams cad byang zhing /_tshe dang bsod nams dang ye shes thams cad rgyas par 'gyur ba dang /_nam 'chi ba'i tshe'ang gnad gcod kyi sdug bsngal mi 'byung bar/_bcom ldan 'das 'od dpag tu med pa byang chub sems dpa'i tshogs kyis bskor ba mngon sum du mthong nas yon tan gyi bkod pa gzhal gyis mi lang ba 'jig rten gyi zhing khams bde ba can du pad+ma'i snying po la brdzus te skyes nas theg pa gsum gyi rigs su smin par 'gyur ba sogs phan yon bsam gyis mi khyab na/_rtag par rjes su dran cing smon lam 'debs pa dang /_gang gi sku gsung thugs kyi rten bzhengs pa dang /_gzungs sngags zab mo bzla ba sogs kyi phan yon ni lta smos kyang ci dgos pas/_des na dad pa dang brtson 'grus su ldan pa rnams kyis tshul 'di la rtag tu nan tan snying por mdzad 'tshal lo//___//_!_