JKW-KABUM-02-KHA-001-024

Previous Text Back to Volume PageNext Text

མི་འཁྲུགས་པ།

Wylie title	mi 'khrugs pa
Location	mkhyen brtse'i bka' 'bum Volume 2, sde tshan 1, Text 24, Pages 102-105 (Folios 51b2 to 53a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mi 'khrugs pa. In 'jam dbyangs mkhyen brtse'i dbang po'i bka' 'bum, Vol. 2: 102-105. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

Tibetan Text

Wylie

[edit]

དེ་བཞིན་གཤེགས་པ་མི་འཁྲུགས་པ་ནི། སྔོན་གྱི་དུས་དེ་བཞིན་གཤེགས་པ་སྤྱན་ཆེན་པོ་ཞེས་བྱ་བའི་དྲུང་དུ་སེམས་དང་པོ་བསྐྱེད་པ་ནས་བཟོད་པའི་གོ་ཆ་ཤིན་ཏུ་བརྟན་པོར་བགོས་ནས། སེམས་ཅན་ཐམས་ཅད་ལ་སེམས་མི་འཁྲུགས་ཤིང་ཀུན་ཏུ་མི་འཁྲུགས་པར་བྱས་པས་དགེ་སློང་མི་འཁྲུགས་པ་ཞེས་པའི་མཚན་ཐོབ་ཅིང་། སངས་རྒྱས་དེའི་ཞལ་ནས་ཀྱང་། གནས་སྐབས་བྱང་ཆུབ་ཀྱི་སྤྱོད་པ་སྤྱད་པའི་ཚེ་ཐམས་ཅད་དང་། མཐར་བླ་ན་མེད་པའི་བྱང་ཆུབ་ཐོབ་པའི་ཚེའང་མཚན་དེ་དང་ལྡན་པར་བྱིན་གྱིས་བརླབས་ཤིང་། འདི་ནས་ཤར་ཕྱོགས་ཀྱི་ལོགས་སུ་སངས་རྒྱས་ཀྱི་ཞིང་ཁམས་སྟོང་འདས་པ་ན་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་དེར་དེ་བཞིན་གཤེགས་པ་མི་འཁྲུགས་པ་ཞེས་སུ་འཚང་རྒྱ་བར་མཛད་དེ། ཞིང་ཁམས་དེ་དང་སྟོན་པ་དེ་ལྟ་བུའི་ཡོན་ཏན་ནི་བསམ་གྱིས་མི་ཁྱབ་སྟེ། རྒྱས་པར་མི་འཁྲུགས་པའི་བཀོད་པ་བསྟན་པའི་མདོ་ལས་གསུངས་པ་ལྟར་ཤེས་པར་བྱས་ལ། དེ་ཡང་དེ་བཞིན་གཤེགས་པ་དེའི་མཚན་ཡིད་ལ་བྱེད་ཅིང་སྐུ་བཞེངས་པ་དང་། ཡོན་ཏན་བརྗོད་པ་དང་། དེའི་ཆོས་ཀྱི་རྣམ་གྲངས་འཛིན་པ་དང་། ལེགས་པར་སྤྱད་པའི་དགེ་བའི་རྩ་བ་ཐམས་ཅད་ཞིང་ཁམས་དེར་སྐྱེ་བའི་རྒྱུར་བསྔོས་ན་ཞིང་དེར་སྐྱེ་བར་འགྱུར་པ་སོགས་ཞིང་དེར་སྐྱེ་བའི་རྒྱུ་མཐའ་ཡས་པ་གསུངས་ཀྱང་ཡོངས་སུ་རྫོགས་བ་ནི་གསུམ་སྟེ། རྣམ་པ་ལ་རྗེས་སུ་དྲན་པ་དང་། དེར་སྐྱེ་བའི་ཆེད་དུ་དགེ་བ་བསྒྲུབ་པ་དང་། དགེ་བ་རྣམས་དེར་སྐྱེ་བའི་རྒྱུར་བསྔོ་བ་སྟེ་དེ་གསུམ་ཚང་ན་ཞིང་དེར་སྐྱེའོ། །ཞིང་ཁམས་དེར་སྐྱེ་བའི་རྒྱུ་ལག་ཏུ་བླང་པའི་རིམ་པ་ལ་གསུམ་ལས། དང་པོ་རྣམ་པ་ལ་རྗེས་སུ་དྲན་པ་ནི། ཞིང་བཀོད་ལས་བཤད་པ་ལྟར་རྒྱལ་བ་མི་འཁྲུགས་པ་དེའི་སྐུ་དང་། བྱང་ཆུབ་ཀྱི་ཤིང་དང་། འོད་ལ་སོགས་པ་ཐོག་མར་བསམ། དེ་ནས་གསུང་དབྱངས་ཕུན་སུམ་ཚོགས་པ་བསྐལ་བ་ཆེན་པོ་འབུམ་ཕྲག་བཅུའི་བར་དུ་ཆོས་སྟོན་པ་དང་། ཆོས་སྟོན་པ་རེ་རེས་སེམས་ཅན་དཔག་ཏུ་མེད་པ་གྲོལ་བར་མཛད་པའི་ཚུལ་བསམ། དེའི་ཉན་ཐོས་ཀྱི་དགེ་འདུན་དང་བྱང་ཆུབ་སེམས་དཔའི་དགེ་འདུན་དཔག་ཏུ་མེད་ཅིང་བགྲང་དུ་མེད་པ་དང་། དེ་དག་གི་རྣམ་པར་འཕྲུལ་པ་བསམས་ལ་སེམས་དྭངས་པའི་རྣམ་པ་ཅན་གྱིས་བསྒོམ་ཞིང་བདག་ཀྱང་འདི་ལྟར་གྱུར་ཅིག་སྙམ་དུ་མོས་པ་བྱ། གཉིས་པ་དེར་སྐྱེ་བའི་ཆེད་དུ་དགེ་བ་བསྒྲུབ་པ་ནི། དེ་ལྟར་དད་པ་སྐྱེས་པ་ན་སངས་རྒྱས་མི་འཁྲུགས་པའི་སྐུ་གླང་པོའི་སྟེང་ན་བཞུགས་པ་སྟོང་རྩ་སོགས་བཞེངས་པ་དང་། གཟུངས་སྔགས་བཟླ་བ་དང་། སྦྱིན་གཏོང་སོགས་ཀྱི་དགེ་བ་གང་འགྲུབ་ལ་འབད། ཁྱད་པར་དུ་སྡིག་ལྟུང་བཤགས་སྡོམ་བྱས་ནས་ཁས་བླངས་པའི་ཚུལ་ཁྲིམས་དག་པར་བྱ། སྔར་ཚུལ་ཁྲིམས་མི་ལྡན་པ་ཡིན་ན། བསྙེན་གནས་སམ། སྲོག་གཅོད་སྤོང་བ་སོགས་ཚུལ་ཁྲིམས་ཀྱི་ཆ་གང་འགྲུབ་ཅིག་ལ་ངེས་པར་འབད་ཅིང་། དེའི་སྟེང་དུ་བསགས་སྦྱོང་ཅི་ནུས་སུ་བྱའོ། །གསུམ་པ་དགེ་བ་རྣམས་དེར་སྐྱེ་བའི་རྒྱུར་བསྔོ་བ་ནི། དེ་ནས་སྔར་བཤད་པ་ལྟར་སངས་རྒྱས་འཁོར་བཅས་དང་དེའི་སྣོད་བཅུད་ཀྱི་ཡོན་ཏན་ལ་བསམས་ལ་དེར་སྐྱེ་བའི་འདུན་པ་དྲག་ཏུ་བསྒོམ། འདུན་པ་སྐྱེས་པ་ན། སྦྱིན་ཁྲིམས་དང་ཐོས་སྒོམ་ལ་སོགས་རང་གཞན་གྱི་དུས་གསུམ་གྱི་དགེ་བ་རྣམས་ཡིད་ཡུལ་དུ་བྱས་ནས། དགེ་བའི་རྩ་བ་འདིས་བདག་འཆི་བའི་དུས་ཉེ་བར་གནས་པ་ན། དེ་བཞིན་གཤེགས་པ་མི་འཁྲུགས་པ་མངོན་སུམ་དུ་མཐོང་སྟེ་དད་པ་ཐོབ་པར་གྱུར་ཅིག །ཤི་འཕོས་མ་ཐག་ཏུ་རྒྱལ་བ་མི་འཁྲུགས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་པར་དགའ་བ་དེ་ཉིད་དུ་སྐྱེ་བར་གྱུར་ཅིག །སྐྱེས་མ་ཐག་ཏུ་དེ་བཞིན་གཤེགས་པ་མི་འཁྲུགས་པ་དེའི་སྤྱོད་པ་ལ་བསླབ་སྟེ་སེམས་ཅན་ཐམས་ཅད་ཀྱི་དོན་དུ་མངོན་པར་རྫོགས་པར་འཚང་རྒྱ་བར་གྱུར་ཅིག །སངས་རྒྱས་པའི་ཚེ་ཡང་དེ་བཞིན་གཤེགས་པ་མི་འཁྲུགས་པའི་སྐུ་ཚེ་དང་། ཞིང་གི་བཀོད་པ་དང་། ཕྲིན་ལས་ལ་སོགས་པ་ཇི་འདྲ་བ་དེ་འདྲ་བར་གྱུར་ཏེ་སེམས་ཅན་ཐམས་ཅད་ཀྱང་མྱུར་དུ་དེ་ལྟ་བུའི་གོ་འཕང་ལ་འགོད་ནུས་པར་གྱུར་ཅིག །ཅེས་འདུན་པ་དྲག་པོས་ལན་གསུམ་བརྗོད་ཅིང་ཡིད་ལ་བྱའོ། །དེ་གསུམ་བྱས་པས་ཞིང་དེར་ངེས་པར་སྐྱེ་སྟེ། གཞན་ཡང་བཻ་ཌཱུཪྻའི་ཞིང་དང་། བདེ་བ་ཅན་སོགས་སུ་སྐྱེ་བར་འདོད་ཀྱང་ཚུལ་དེ་བཞིན་དུ་བྱའོ། །བྱང་ཆུབ་ཀྱི་ཤིང་ཡོན་ཏན་རྨད་དུ་བྱུང་པའི་དབུས་ན་གླང་པོ་ཆེའི་ཁྲི་སྟེང་དུ་པདྨའི་སྟན་ལ་འཁོར་ཐེག་པ་ཆེ་ཆུང་གི་དགེ་འདུན་གྲངས་མེད་པའི་དབུས་སུ་དེ་བཞིན་གཤེགས་པ་མི་འཁྲུགས་པས་ཆོས་སྟོན་པར་བཤད་དོ།། །། ༈

[edit]

mi 'khrugs pa/ de bzhin gshegs pa mi 'khrugs pa ni/_sngon gyi dus de bzhin gshegs pa spyan chen po zhes bya ba'i drung du sems dang po bskyed pa nas bzod pa'i go cha shin tu brtan por bgos nas/_sems can thams cad la sems mi 'khrugs shing kun tu mi 'khrugs par byas pas dge slong mi 'khrugs pa zhes pa'i mtshan thob cing /_sangs rgyas de'i zhal nas kyang /_gnas skabs byang chub kyi spyod pa spyad pa'i tshe thams cad dang /_mthar bla na med pa'i byang chub thob pa'i tshe'ang mtshan de dang ldan par byin gyis brlabs shing /_'di nas shar phyogs kyi logs su sangs rgyas kyi zhing khams stong 'das pa na 'jig rten gyi khams mngon par dga' ba zhes bya ba der de bzhin gshegs pa mi 'khrugs pa zhes su 'tshang rgya bar mdzad de/_zhing khams de dang ston pa de lta bu'i yon tan ni bsam gyis mi khyab ste/_rgyas par mi 'khrugs pa'i bkod pa bstan pa'i mdo las gsungs pa ltar shes par byas la/_de yang de bzhin gshegs pa de'i mtshan yid la byed cing sku bzhengs pa dang /_yon tan brjod pa dang /_de'i chos kyi rnam grangs 'dzin pa dang /_legs par spyad pa'i dge ba'i rtsa ba thams cad zhing khams der skye ba'i rgyur bsngos na zhing der skye bar 'gyur pa sogs zhing der skye ba'i rgyu mtha' yas pa gsungs kyang yongs su rdzogs ba ni gsum ste/_rnam pa la rjes su dran pa dang /_der skye ba'i ched du dge ba bsgrub pa dang /_dge ba rnams der skye ba'i rgyur bsngo ba ste de gsum tshang na zhing der skye'o/_/zhing khams der skye ba'i rgyu lag tu blang pa'i rim pa la gsum las/_dang po rnam pa la rjes su dran pa ni/_zhing bkod las bshad pa ltar rgyal ba mi 'khrugs pa de'i sku dang /_byang chub kyi shing dang /_'od la sogs pa thog mar bsam/_de nas gsung dbyangs phun sum tshogs pa bskal ba chen po 'bum phrag bcu'i bar du chos ston pa dang /_chos ston pa re res sems can dpag tu med pa grol bar mdzad pa'i tshul bsam/_de'i nyan thos kyi dge 'dun dang byang chub sems dpa'i dge 'dun dpag tu med cing bgrang du med pa dang /_de dag gi rnam par 'phrul pa bsams la sems dwangs pa'i rnam pa can gyis bsgom zhing bdag kyang 'di ltar gyur cig snyam du mos pa bya/_gnyis pa der skye ba'i ched du dge ba bsgrub pa ni/_de ltar dad pa skyes pa na sangs rgyas mi 'khrugs pa'i sku glang po'i steng na bzhugs pa stong rtsa sogs bzhengs pa dang /_gzungs sngags bzla ba dang /_sbyin gtong sogs kyi dge ba gang 'grub la 'bad/_khyad par du sdig ltung bshags sdom byas nas khas blangs pa'i tshul khrims dag par bya/_sngar tshul khrims mi ldan pa yin na/_bsnyen gnas sam/_srog gcod spong ba sogs tshul khrims kyi cha gang 'grub cig la nges par 'bad cing /_de'i steng du bsags sbyong ci nus su bya'o/_/gsum pa dge ba rnams der skye ba'i rgyur bsngo ba ni/_de nas sngar bshad pa ltar sangs rgyas 'khor bcas dang de'i snod bcud kyi yon tan la bsams la der skye ba'i 'dun pa drag tu bsgom/_'dun pa skyes pa na/_sbyin khrims dang thos sgom la sogs rang gzhan gyi dus gsum gyi dge ba rnams yid yul du byas nas/_dge ba'i rtsa ba 'dis bdag 'chi ba'i dus nye bar gnas pa na/_de bzhin gshegs pa mi 'khrugs pa mngon sum du mthong ste dad pa thob par gyur cig__/shi 'phos ma thag tu rgyal ba mi 'khrugs pa'i sangs rgyas kyi zhing 'jig rten gyi khams mngon par dga' ba de nyid du skye bar gyur cig__/skyes ma thag tu de bzhin gshegs pa mi 'khrugs pa de'i spyod pa la bslab ste sems can thams cad kyi don du mngon par rdzogs par 'tshang rgya bar gyur cig__/sangs rgyas pa'i tshe yang de bzhin gshegs pa mi 'khrugs pa'i sku tshe dang /_zhing gi bkod pa dang /_phrin las la sogs pa ji 'dra ba de 'dra bar gyur te sems can thams cad kyang myur du de lta bu'i go 'phang la 'god nus par gyur cig__/ces 'dun pa drag pos lan gsum brjod cing yid la bya'o/_/de gsum byas pas zhing der nges par skye ste/_gzhan yang bai DUR+Ya'i zhing dang /_bde ba can sogs su skye bar 'dod kyang tshul de bzhin du bya'o/_/byang chub kyi shing yon tan rmad du byung pa'i dbus na glang po che'i khri steng du pad+ma'i stan la 'khor theg pa che chung gi dge 'dun grangs med pa'i dbus su de bzhin gshegs pa mi 'khrugs pas chos ston par bshad do//___//_!_