JKW-KABUM-21-ZHA-001-002

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 21, sde tshan 1, Text 2, Pages 5- (Folios 3a6 to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 21: 5-. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

2 5-12	བཞིན་གཤེགས་པའི་ཡིག་བརྒྱ་ལ་བརྟེན་པའི་སྡིག་བཤགས་བྱ་ཚུལ། bzhin gshegs pa'i yig brgya la brten pa'i sdig bshags bya tshul Confessions - bshags pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

བཞིན་གཤེགས་པའི་ཡིག་བརྒྱ་ལ་བརྟེན་པའི་སྡིག་བཤགས་བྱ་ཚུལ། དེ་བཞིན་གཤེགས་པའི་ཡི་གེ་བརྒྱ་པ་ལ་བརྟེན་ནས་སྡིག་པ་བཤགས་པའི་ཆོ་ག་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། དཔྱིད་ཟླ་ར་བ་ལ་སོགས་པ་ཁྱད་པར་ཅན་གྱི་ཟླ་བ་གང་ཡང་རུང་བའི་ཚེས་གཅིག་གི་སྔ་མའི་ཉིན་ཁྲུས་དང་གཙང་སྦྲ་ལ་གནས་པས། དེ་བཞིན་གཤེགས་པའི་རིང་བསྲེལ་བཞུགས་ངེས་པའི་མཆོད་རྟེན་ནམ་སྐུ་གཟུགས་ཀྱི་ཉེ་འཁོར་ཐམས་ཅད་དུ་ཕྱག་དར་ལེགས་པར་བྱས་ལ་དྲི་ཞིམ་པོའི་ཆུས་ཆག་ཆག་གདབ། མདུན་དུ་མེ་ཏོག་ལ་སོགས་པའི་མཆོད་པ་རྒྱ་ཆེར་བཤམ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྟེན་དེ་དང་དབྱེར་མེད་དུ་བཞུགས་པར་མོས་ལ་སྙན་གསན་དབབ་པའི་ཚུལ་དུ་ཡན་ལག་བདུན་པ་རྒྱས་པར་བྱས་ལ་དགེ་བའི་སེམས་ཀྱིས་ཉལ་ལོ། །གཉིས་པ་ནི། སང་ཚེས་གཅིག་གི་ནངས་པར་སྔ་བར་ལྡང་སྟེ་མཆོད་པ་བཤམ། ཁྲུས་དང་གཙང་སྦྲ་ལ་གནས་པས་རྟེན་གྱི་སྤྱན་སྔར་འཁོད་དེ། སངས་རྒྱས་ཆོས་ཚོགས་སོགས་སྐྱབས་སེམས་རྒྱས་བསྡུས་ཇི་ལྟར་རིགས་པར་བྱ། ཐེག་པ་ཆེན་པོའི་གསོ་སྦྱང་བླངས། བདེན་པའི་སྟོབས་བརྗོད་པས་གནས་དང་མཆོད་པའི་ཡོ་བྱད་རྣམས་བྱིན་གྱིས་བརླབ། བདག་ཉིད་ལྷའི་རྣལ་འབྱོར་ལ་གནས་པའམ་ཐ་མལ་གྱི་རྣམ་པས་ཀྱང་རུང་སྟེ། སྟོང་པ་ཉིད་དང་སྙིང་རྗེ་ཆེན་པོའི་སེམས་མངོན་དུ་བྱས་ཏེ། འདུན་པ་རྩེ་གཅིག་པས། སྤོས་བཏུལ་ལ་སྙན་པའི་དབྱངས་དང་བཅས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །ཞེས་སོགས་ཀྱིས་སྤྱན་དྲངས་བས། སྨོན་ལམ་དང་ཐུགས་རྗེའི་མཐུ་ཐོགས་པ་མེད་པས་བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་སངས་རྒྱས་དང་བྱང་ཆུབ་སེམས་དཔའ་འཇིག་རྟེན་སྐྱོང་བའི་ཚོགས་དང་བཅས་པ་སྐད་ཅིག་གིས་མངོན་སུམ་དུ་གཤེགས་ཏེ་མདུན་གྱི་རྟེན་དང་དབྱེར་མེད་དུ་བཞུགས་པར་མོས་ལ། བཅོམ་ལྡན་འདིར་ནི་བྱོན་པ་ལེགས། །སོགས་འབྱོན་ལེགས་གདན་ཕུལ། ཁྲུས་གསོལ་རྣམས་ཚིགས་བཅད་རྐྱང་པ་སྤྱི་ལྟར་བྱ། ཐལ་མོ་སྤྱི་བོར་སྦྱར་བས་བཏུད་དེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་ཆོས་ཀྱི་དབྱིངས་སུ་གཏོགས་པའི་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་ཐམས་ཅད་ལ་བདག་དབུལ་བར་བགྱིའོ། །ཐུགས་རྗེ་ཆེན་པོ་དང་ལྡན་པ་དེ་རྣམས་ཀྱིས་ཀྱང་བདག་ལ་རྣམ་པ་ཐམས་ཅད་དང་དུས་ཐམས་ཅད་དུ་བྱིན་གྱིས་བརླབ་པ་དང་ཡོངས་སུ་བཟུང་བར་གྱུར་ཅིག །བདག་ལ་གྲུབ་པ་དང་མཆོག་སྩོལ་ཅིག །ཅེས་ལན་གསུམ་གྱིས་བདག་དབུལ། དེ་ནས་སྡིག་པ་བཤགས་པ་སོགས་དམ་ཚིག་གསུམ་བཀོད་པའི་རྟོགས་པ་ལས་འབྱུང་བ་ལྟར་རམ། སྤྱི་ཙམ་དུ། ཇི་སྙེད་སུ་དག་སོགས་ཡན་ལག་བདུན་པ་ལན་གསུམ་བྱ། སངས་རྒྱས་བྱང་ཆུབ་སེམས་དཔའི་བྱིན་རླབས་དང་། སྨོན་ལམ་གྱི་སྟོབས་དང་། གཟུངས་སྔགས་ཀྱི་མཐུ་ལ་ལྷག་པར་དད་པའི་དྲན་པ་མངོན་ཏུ་བཞག་སྟེ། ཕྱོགས་བཅུའི་དེ་བཞིན་གཤེགས་པའི་བྱིན་གྱིས་བརླབས་དང་། སྨོན་ལམ་གྱི་སྟོབས་དང་། བསོད་ནམས་དང་ཡེ་ཤེས་ཀྱི་སྟོབས་ཀྱིས་བདག་གིས་དེ་བཞིན་གཤེགས་པའི་སྙིང་པོ་འདི་བཟླས་པས་འཁོར་བར་གྱུར་བའི་ཉོན་མོངས་དང་སྡུག་བསྔལ་བ་ལ་སོགས་པ་རབ་ཏུ་སྤང་བ་དང་བྱང་ཆུབ་སེམས་དཔའི་ཚོགས་ཡོངས་སུ་རྫོགས་པར་གྱུར་ཅིག །ཅེས་སྨོན་པའི་སེམས་རྩེ་གཅིག་པས། ན་མ་སྟྲཻ་ཡ་དྷྭི་ཀ་ནཱཾ། ཏ་ཐཱ་ག་ཏཱ་ནཱཾ། སརྦ་ཏྲ་ཨ་པྲ་ཏི་ཧ་ཏ་བཱ་སྟི་དྷརྨ་ཏཱ་བ་ལི་ནཱཾ། ཨོཾ་ཨ། ས་མ་ས་མ་ས་མནྟ་ཏོ། ཨ་ནནྟཱ་བཱ་སྟི། ཤཱ་ས་ནི་ཧ་ར་ཧ་ར། སྨ་ར་སྨ་ར་ཎི་བི་ག་ཏ་རཱ་ག །བུདྡྷ་དྷརྨ་ཏ། ས་ར་ས་ར། ས་མ་བ་ལ། ཧ་ས་ཧ་ས། ཏྲ་ཡ་ཏྲ་ཡ། ག་ག་ན་མ་ཧཱ་བ་ར་ཎ་ལཀྵ་ཎེ། ཛྭ་ལ་ཛྭ་ལ་ན་སཱ་ག་ར་སྭཱ་ཧཱ། ཞེས་བརྒྱ་རྩ་བརྒྱད་དག་པར་བཟླས་ཏེ་ལངས་ལ། བསྐོར་བའི་སྔགས་སྔོན་ཏུ་འགྲོ་བས་གཟུངས་འདི་ཉིད་བཟླ་བཞིན་ཏུ་རྟེན་ལ་བསྐོར་བ་བྱའོ། །དེའི་ཚེ་མདུན་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་གཙུག་ཏོར་དང་སྨིན་མཚམས་ནས་འོད་ཟེར་མཐའ་ཡས་པ་འཕྲོས། སངས་རྒྱས་ཀྱི་ཞིང་ཐམས་ཅད་སྣང་བར་བྱས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སླར་འདུས་རང་ལ་ཐིམ་པས་སྡིག་སྒྲིབ་བག་ཆགས་དང་བཅས་པ་ཐམས་ཅད་སྦྱངས་ཏེ་རྒྱུད་བྱིན་གྱིས་བརླབ་པར་བསམ་ལ། ཇི་སྲིད་ངལ་བར་མ་གྱུར་གྱི་བར་དུ་བཟླས་བརྗོད་དང་བསྐོར་བ་བྱའོ། །ངལ་ན་ཐུན་མཚམས་ཀྱི་བྱ་བ་ལ་འཇུག་སྟེ། རྟེན་གྱི་དྲུང་དུ་འཁོད་ལ་བུམ་པའི་ཕྱག་རྒྱ་བཅས། བདག་གི་བཟླས་བརྗོད་ཀྱི་དགེ་བའི་རྩ་བ་འདི་སྡིག་སྒྲིབ་ཐམས་ཅད་ཡོངས་སུ་ཞི་བའི་དངོས་གྲུབ་ཀྱི་དོན་ཏུ་བཅོམ་ལྡན་འདས་ལ་འབུལ་ལོ། །འཕགས་པ་ཁྱེད་ཀྱིས་བདག་ལ་སྡིག་སྒྲིབ་ཐམས་ཅད་ཞི་བའི་དངོས་གྲུབ་སྩལ་དུ་གསོལ༔ ཅེས་གསོལ་བས་གནང་བ་བྱིན་པར་བསམ། བུམ་པའི་ཕྱག་རྒྱ་ནི་སྲིན་ལག་སོ་སོའི་རྒྱབ་ཏུ་གུང་མོ་སྦྱར། དེ་གཉིས་གཡས་པའི་རྒྱབ་གཡོན་པའི་མདུན་དུ་སྦྱར་ཏེ་བསྣོལ། གཡས་གཡོན་གྱི་འཛུབ་མོས་སོ་སོའི་གུང་སྲིན་ལ་འཁྱུད། མཐེ་བོང་གཉིས་འཛུབ་མོའི་ཚིགས་དབུས་མ་ལ་བཞག །མཐེའུ་ཆུང་གཉིས་གཤིབ་སྟེ་བསྒྲེང་བའོ། །དེ་ནས་ཡན་ལག་བདུན་པ་བྱ། མདུན་གྱི་ལྷ་རང་བཞིན་གྱི་གནས་སུ་གཤེགས་པའམ། མི་དམིགས་པར་བློ་བཞག་སྟེ། གོང་གི་སྨོན་ལམ་དང་། གཞན་ཡང་བཟང་པོ་སྤྱོད་པ་ལ་སོགས་པའི་སྨོན་ལམ་རྒྱ་ཆེར་གདབ་བོ། །དེ་ལྟ་བུའི་རིམ་པས་ཐུན་གསུམ་མམ་བཞི་ཉམས་སུ་བླངས། ཐུན་མཚམས་སུ་མཎྜལ་སོགས་དགེ་བའི་ལས་ཅི་འགྲུབ་དང་། ཁྱད་པར་སྡོང་པོ་བཀོད་པ་སོགས་ཐེག་པ་ཆེན་པོའི་མདོ་སྡེ་ཀློག །ཉལ་བའི་ཚེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་བྱིན་གྱིས་རློབ་པ་དང་། བླ་ན་མེད་པའི་དངོས་གྲུབ་ཀྱི་མཆོག་སྩོལ་ཅིག །རྣམ་པར་འཚེ་བ་ཐམས་ཅད་རབ་ཏུ་ཞི་བར་མཛད་དུ་གསོལ། ཅེས་གསོལ་བ་བཏབ་ལ་ཆོས་ཀྱི་འདུ་ཤེས་ཀྱིས་ཉལ། ལྡང་བ་ན་སྙིང་རྗེ་ཆེན་པོའི་འདུ་ཤེས་ཀྱིས་ལངས་ཏེ་སྔ་མ་ལྟར་བྱའོ། །དེ་ལྟར་ཚེས་གཅིག་ནས་བཅུའི་བར་ཉིན་དང་མཚན་ཏུ་འབད་པ་ཆེན་པོས་གཟུངས་སྔགས་འབུམ་ཕྲག་གཅིག་བཟླ་བ་ནི་བསྙེན་པའོ། །བསྙེན་པའི་སྐབས་འདིར་རྟེན་ལ་བསྐོར་བ་མ་གྲུབ་ཀྱང་འགལ་བ་མེད་དོ། །དེ་ནས་ཚེས་བཅོ་ལྔའི་ཉིན་མོ་བསྐོར་བ་དང་བཅས་པས་སྔགས་སྟོང་ཕྲག་བརྒྱད་བཟླ་བ་ནི་བསྒྲུབ་པའོ། །དེའི་མཚན་ཐོག་ཐག་ཏུ་བཟླ་བ་ནི་ལས་སྦྱོར་ཏེ། ཐོ་རངས་ཀྱི་དུས་སུ་དངོས་སམ་རྨི་ལམ་དུ་སྡིག་པ་དག་པའི་རྟགས་མཐོང་བ་ནི་ངེས་པའོ། །དེ་དག་གི་སྐབས་ཅི་རིགས་པར་མདུན་གྱི་རྟེན་ལ་ཁྲུས་གསོལ་བའི་ཁྲུས་ཆུས་བདག་གཞན་ལ་ཁྲུས་བགྱིས་པས་སྡིག་པ་བྱང་བར་འགྱུར་རོ། །གསུམ་པ་རྗེས་ནི། ཚེས་བཅུ་དྲུག་གི་ཉིན་མོ་ཡན་ལག་བདུན་པ་སོགས་གཏང་རག་གི་མཆོད་པ་རྒྱ་ཆེར་བྱ་ཞིང་སྨོན་ལམ་རྒྱས་པར་གདབ། རྟེན་གྱི་དྲུང་དུ་དྲི་ཞིམ་པོའི་ཤིང་ལ་མེ་སྦར་ཏེ། ཀུ་ཤའི་ཆུས་བསང་ཞིང་ཨ་མྲྀ་ཏེ་བརྗོད། མ་ལུས་སེམས་ཅན་སོགས་ཀྱིས་རྟེན་གྱི་ལྷ་ཐབ་ཏུ་སྤྱན་དྲངས་ལ། ཡམ་ཤིང་དང་། མར་དང་། ཏིལ་རྣམས་གཟུངས་སྔགས་ཁོ་ནས་བརྒྱ་རྩ་བརྒྱད་ཕུལ་ལ་སྡིག་སྒྲིབ་ལྷག་མེད་དུ་བྱང་བར་གསོལ་བ་གདབ། སླར་རྟེན་དང་དབྱེར་མེད་དུ་བཞུགས་པར་བསམས་ལ་མཆོད་ཅིང་ཕྱག་འཚལ། མེ་ཏོག་ལ་སོགས་པའི་མཆོད་རྫས་དམན་པ་རྣམས་ཀྱང་མེར་བསྲེགས་ཏེ་ཐལ་བ་ཆུ་ཀླུང་ཆེན་པོར་དོར། ལས་ཀྱི་རྗེས་མི་མངོན་པར་བྱ། སྤྱིར་རྟེན་ལ་ཕུལ་བའི་མེ་ཏོག་རྙིང་པ་གཙང་སྦྲ་དང་བཅས་ཏེ་བཅང་ལ། ཆར་མི་འབབས་པའི་དུས་སུ་དྲི་ཞིམ་པོའི་མེ་ཏོག་དཀར་པོ་གཞན་དང་བཅས་ཆུ་ཀླུང་ཆེན་པོར་དོར་ཞིང་སྨོན་ལམ་གདབ་པས་ཆར་འབབ་པ་དང་། ཆར་ཧ་ཅང་ཆེ་ན་བ་ལང་གི་ལྕི་བའི་མེ་ལ་བསྲེག་པས་ནམ་མཁའ་དྭངས་པ་དང་། འབྱུང་པོས་ཟིན་པ་ལ་གུ་གུལ་དང་བཅས་ཏེ་བདུག་པས་བྱེར་བ་དང་། དུད་འགྲོ་སོགས་དམན་པའི་སེམས་ཅན་འཆི་བའི་ཚེ་དུད་པས་བདུག་ན་མཐོ་རིས་སུ་སྐྱེ་བ་སོགས་ལས་ཀྱི་རིམ་པ་ཅི་ཡང་འགྲུབ་པར་འགྱུར་རོ། །སྦྱིན་སྲེག་གི་ཚེ་ནའང་། ནད་ཞི་བར་འདོད་ན། གང་ན་བའི་གཉེན་པོའི་སྨན་ནམ་སྨན་དེས་བསྒོས་པའི་མེ་ཏོག་གི་སྦྱིན་སྲེག་བརྒྱ་རྩ་ལ་སོགས་པ་ཕུལ་ན་ནད་ཞི་བས་མཚོན་རྒྱ་ཆེར་རིག་པར་བྱའོ། །འདིའི་གཟུངས་ལས་ཚེས་གཅིག་ནས་བརྩམས་ཟླ་བ་གཅིག་ཏུ་གསུངས་པ་ནི་ཇི་སྲིད་ཟླ་བ་ཉ་གང་བའི་བར་དུ་སྟེ་དཀར་པོའི་ཕྱོགས་གཅིག་ཞེས་པའི་ཐ་ཚིག་གོ། །ཡང་གཞན་ཏུ་ན་ཐུབ་པ་ཆེན་པོའི་སྙིང་པོའི་སྔགས་ལ་བསྙེན་པ་འབུམ་ཕྲག་བཞི་སྔོན་ཏུ་སོང་ནས། རྒྱུད་ལས། དེ་བཞིན་དུ་མཆོད་རྟེན་ལ་བསྐོར་བ་བྱེད་ཅིང་སྟོང་ཕྲག་བརྒྱད་བཟླས་ན་སྡིག་པ་ལས་གྲོལ་བར་འགྱུར་རོ། །ཞེས་གསུངས་པ་ལྟར་ཟླ་བའི་དུས་སུ་ཇི་སྐད་བཤད་པའི་སྦྱོར་བ་དང་བཅས་ཉམས་སུ་བླང་བས་སྡིག་པ་ལས་གྲོལ་བ་ནི་མན་ངག་གི་ངེས་པའོ།། །། ༈

[edit]

bzhin gshegs pa'i yig brgya la brten pa'i sdig bshags bya tshul/ de bzhin gshegs pa'i yi ge brgya pa la brten nas sdig pa bshags pa'i cho ga la gsum/__sbyor ba/__dngos gzhi/__rjes so/__/dang po ni/__dpyid zla ra ba la sogs pa khyad par can gyi zla ba gang yang rung ba'i tshes gcig gi snga ma'i nyin khrus dang gtsang sbra la gnas pas/__de bzhin gshegs pa'i ring bsrel bzhugs nges pa'i mchod rten nam sku gzugs kyi nye 'khor thams cad du phyag dar legs par byas la dri zhim po'i chus chag chag gdab/__mdun du me tog la sogs pa'i mchod pa rgya cher bsham/__sangs rgyas dang byang chub sems dpa' thams cad rten de dang dbyer med du bzhugs par mos la snyan gsan dbab pa'i tshul du yan lag bdun pa rgyas par byas la dge ba'i sems kyis nyal lo/__/gnyis pa ni/__sang tshes gcig gi nangs par snga bar ldang ste mchod pa bsham/__khrus dang gtsang sbra la gnas pas rten gyi spyan sngar 'khod de/__sangs rgyas chos tshogs sogs skyabs sems rgyas bsdus ji ltar rigs par bya/__theg pa chen po'i gso sbyang blangs/__bden pa'i stobs brjod pas gnas dang mchod pa'i yo byad rnams byin gyis brlab/__bdag nyid lha'i rnal 'byor la gnas pa'am tha mal gyi rnam pas kyang rung ste/__stong pa nyid dang snying rje chen po'i sems mngon du byas te/__'dun pa rtse gcig pas/__spos btul la snyan pa'i dbyangs dang bcas/__ma lus sems can kun gyi mgon gyur cing /__/zhes sogs kyis spyan drangs bas/__smon lam dang thugs rje'i mthu thogs pa med pas bcom ldan 'das dpal rgyal ba shAkya thub pa sangs rgyas dang byang chub sems dpa' 'jig rten skyong ba'i tshogs dang bcas pa skad cig gis mngon sum du gshegs te mdun gyi rten dang dbyer med du bzhugs par mos la/__bcom ldan 'dir ni byon pa legs/__/sogs 'byon legs gdan phul/__khrus gsol rnams tshigs bcad rkyang pa spyi ltar bya/__thal mo spyi bor sbyar bas btud de/__sangs rgyas dang byang chub sems dpa' thams cad bdag la dgongs su gsol/__bdag ming 'di zhes bgyi ba chos kyi dbyings su gtogs pa'i sangs rgyas dang byang chub sems dpa' 'khor dang bcas pa thams cad la bdag dbul bar bgyi'o/__/thugs rje chen po dang ldan pa de rnams kyis kyang bdag la rnam pa thams cad dang dus thams cad du byin gyis brlab pa dang yongs su bzung bar gyur cig__/bdag la grub pa dang mchog stsol cig__/ces lan gsum gyis bdag dbul/__de nas sdig pa bshags pa sogs dam tshig gsum bkod pa'i rtogs pa las 'byung ba ltar ram/__spyi tsam du/__ji snyed su dag sogs yan lag bdun pa lan gsum bya/__sangs rgyas byang chub sems dpa'i byin rlabs dang /__smon lam gyi stobs dang /__gzungs sngags kyi mthu la lhag par dad pa'i dran pa mngon tu bzhag ste/__phyogs bcu'i de bzhin gshegs pa'i byin gyis brlabs dang /__smon lam gyi stobs dang /__bsod nams dang ye shes kyi stobs kyis bdag gis de bzhin gshegs pa'i snying po 'di bzlas pas 'khor bar gyur ba'i nyon mongs dang sdug bsngal ba la sogs pa rab tu spang ba dang byang chub sems dpa'i tshogs yongs su rdzogs par gyur cig__/ces smon pa'i sems rtse gcig pas/__na ma s+t+rai ya d+h+wi ka nAM/__ta thA ga tA nAM/__sarba tra a pra ti ha ta bA sti d+harma tA ba li nAM/__oM a/__sa ma sa ma sa man+ta to/__a nan+tA bA sti/__shA sa ni ha ra ha ra/__sma ra sma ra Ni bi ga ta rA ga__/bud+d+ha d+harma ta/__sa ra sa ra/__sa ma ba la/__ha sa ha sa/__tra ya tra ya/__ga ga na ma hA ba ra Na lak+Sha Ne/__dz+wa la dz+wa la na sA ga ra swA hA/__zhes brgya rtsa brgyad dag par bzlas te langs la/__bskor ba'i sngags sngon tu 'gro bas gzungs 'di nyid bzla bzhin tu rten la bskor ba bya'o/__/de'i tshe mdun gyi sangs rgyas dang byang chub sems dpa' thams cad kyi gtsug tor dang smin mtshams nas 'od zer mtha' yas pa 'phros/__sangs rgyas kyi zhing thams cad snang bar byas/__sems can thams cad kyi sdig sgrib sbyangs/__slar 'dus rang la thim pas sdig sgrib bag chags dang bcas pa thams cad sbyangs te rgyud byin gyis brlab par bsam la/__ji srid ngal bar ma gyur gyi bar du bzlas brjod dang bskor ba bya'o/__/ngal na thun mtshams kyi bya ba la 'jug ste/__rten gyi drung du 'khod la bum pa'i phyag rgya bcas/__bdag gi bzlas brjod kyi dge ba'i rtsa ba 'di sdig sgrib thams cad yongs su zhi ba'i dngos grub kyi don tu bcom ldan 'das la 'bul lo/__/'phags pa khyed kyis bdag la sdig sgrib thams cad zhi ba'i dngos grub stsal du gsol:__ces gsol bas gnang ba byin par bsam/__bum pa'i phyag rgya ni srin lag so so'i rgyab tu gung mo sbyar/__de gnyis g.yas pa'i rgyab g.yon pa'i mdun du sbyar te bsnol/__g.yas g.yon gyi 'dzub mos so so'i gung srin la 'khyud/__mthe bong gnyis 'dzub mo'i tshigs dbus ma la bzhag__/mthe'u chung gnyis gshib ste bsgreng ba'o/__/de nas yan lag bdun pa bya/__mdun gyi lha rang bzhin gyi gnas su gshegs pa'am/__mi dmigs par blo bzhag ste/__gong gi smon lam dang /__gzhan yang bzang po spyod pa la sogs pa'i smon lam rgya cher gdab bo/__/de lta bu'i rim pas thun gsum mam bzhi nyams su blangs/__thun mtshams su maN+Dal sogs dge ba'i las ci 'grub dang /__khyad par sdong po bkod pa sogs theg pa chen po'i mdo sde klog__/nyal ba'i tshe sangs rgyas dang byang chub sems dpa' thams cad la phyag byas te/__sangs rgyas dang byang chub sems dpa' thams cad kyis bdag la byin gyis rlob pa dang /__bla na med pa'i dngos grub kyi mchog stsol cig__/rnam par 'tshe ba thams cad rab tu zhi bar mdzad du gsol/__ces gsol ba btab la chos kyi 'du shes kyis nyal/__ldang ba na snying rje chen po'i 'du shes kyis langs te snga ma ltar bya'o/__/de ltar tshes gcig nas bcu'i bar nyin dang mtshan tu 'bad pa chen pos gzungs sngags 'bum phrag gcig bzla ba ni bsnyen pa'o/__/bsnyen pa'i skabs 'dir rten la bskor ba ma grub kyang 'gal ba med do/__/de nas tshes bco lnga'i nyin mo bskor ba dang bcas pas sngags stong phrag brgyad bzla ba ni bsgrub pa'o/__/de'i mtshan thog thag tu bzla ba ni las sbyor te/__tho rangs kyi dus su dngos sam rmi lam du sdig pa dag pa'i rtags mthong ba ni nges pa'o/__/de dag gi skabs ci rigs par mdun gyi rten la khrus gsol ba'i khrus chus bdag gzhan la khrus bgyis pas sdig pa byang bar 'gyur ro/__/gsum pa rjes ni/__tshes bcu drug gi nyin mo yan lag bdun pa sogs gtang rag gi mchod pa rgya cher bya zhing smon lam rgyas par gdab/__rten gyi drung du dri zhim po'i shing la me sbar te/__ku sha'i chus bsang zhing a mr-i te brjod/__ma lus sems can sogs kyis rten gyi lha thab tu spyan drangs la/__yam shing dang /__mar dang /__til rnams gzungs sngags kho nas brgya rtsa brgyad phul la sdig sgrib lhag med du byang bar gsol ba gdab/__slar rten dang dbyer med du bzhugs par bsams la mchod cing phyag 'tshal/__me tog la sogs pa'i mchod rdzas dman pa rnams kyang mer bsregs te thal ba chu klung chen por dor/__las kyi rjes mi mngon par bya/__spyir rten la phul ba'i me tog rnying pa gtsang sbra dang bcas te bcang la/__char mi 'babs pa'i dus su dri zhim po'i me tog dkar po gzhan dang bcas chu klung chen por dor zhing smon lam gdab pas char 'bab pa dang /__char ha cang che na ba lang gi lci ba'i me la bsreg pas nam mkha' dwangs pa dang /__'byung pos zin pa la gu gul dang bcas te bdug pas byer ba dang /__dud 'gro sogs dman pa'i sems can 'chi ba'i tshe dud pas bdug na mtho ris su skye ba sogs las kyi rim pa ci yang 'grub par 'gyur ro/__/sbyin sreg gi tshe na'ang /__nad zhi bar 'dod na/__gang na ba'i gnyen po'i sman nam sman des bsgos pa'i me tog gi sbyin sreg brgya rtsa la sogs pa phul na nad zhi bas mtshon rgya cher rig par bya'o/__/'di'i gzungs las tshes gcig nas brtsams zla ba gcig tu gsungs pa ni ji srid zla ba nya gang ba'i bar du ste dkar po'i phyogs gcig zhes pa'i tha tshig go/__/yang gzhan tu na thub pa chen po'i snying po'i sngags la bsnyen pa 'bum phrag bzhi sngon tu song nas/__rgyud las/__de bzhin du mchod rten la bskor ba byed cing stong phrag brgyad bzlas na sdig pa las grol bar 'gyur ro/__/zhes gsungs pa ltar zla ba'i dus su ji skad bshad pa'i sbyor ba dang bcas nyams su blang bas sdig pa las grol ba ni man ngag gi nges pa'o//__//__!