JKW-KABUM-19-DZA-001-050

🚧 This website is under continued development. We appreciate your patience!

Previous Text Back to Volume PageNext Text

གྲུབ་ཆེན་ཀུན་དགའ་བློ་ལྡན་ནི།

Wylie title	grub chen kun dga' blo ldan ni
Location	mkhyen brtse'i bka' 'bum Volume 19, sde tshan 1, Text 50, Pages 389-393 (Folios 194b6 to 197a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. grub chen kun dga' blo ldan ni. In 'jam dbyangs mkhyen brtse'i dbang po'i bka' 'bum, Vol. 19: 389-393. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

50 389-393	གྲུབ་ཆེན་ཀུན་དགའ་བློ་ལྡན་ནི། grub chen kun dga' blo ldan ni History Texts - lo rgyus   ·   Religious History Texts - chos 'byung	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །གྲུབ་ཆེན་ཀུན་དགའ་བློ་ལྡན་ནི། ཤར་རྒྱལ་མོ་རོང་དུ་འཁྲུངས། དབུས་གཙང་དུ་བྱོན་ནས། རྟེན་གསུམ་རྣམས་ལ་ཕྱག་བསྐོར་མཆོད་པ་སོགས་ཚོགས་བསགས་སྒྲིབ་སྦྱོང་མཐའ་ཡས་པ་མཛད། ཁྱད་པར་ངོར་ཨེ་ཝྃ་དུ་བསྟན་པ་རིན་པོ་ཆེའི་སྒོར་ཞུགས། སྡོམ་པ་གསུམ་གྱི་བདུད་རྩིས་ཐུགས་ཀྱི་བུམ་བཟང་གཏམས། ཐོས་བསམ་སྒོམ་གསུམ་སྤེལ་མར་མཛད། དཔལ་ས་སྐྱར་འཇམ་པའི་དབྱངས་ངག་དབང་ཀུན་དགའ་བློ་གྲོས་ཀྱི་ཞབས་པད་བསྟེན་ནས་ཟབ་དོན་གྱི་སྨིན་གྲོལ་མང་དུ་གསན་པའི་ཆོས་གྲྭར་འཇམ་མགོན་དེ་ཉིད་ཀྱིས་དགྱེས་པའི་སྤྱན་གྱིས་གཟིགས་ཤིང་། རྣལ་འབྱོར་རྒྱལ་མོ་རོང་པ་ཞེས་ཡང་ཡང་གསུངས་ཏེ། མ་འོངས་པ་ན་སྒྲུབ་པའི་རྒྱལ་མཚན་འཛིན་པར་ལུང་བསྟན། དེ་ནས་ཤར་ཆེན་ཡེ་ཤེས་དབང་ཕྱུག་མདོ་ཁམས་སྡེ་དགེར་ཆིབས་བསྐྱོད་སྐབས་མཆོད་དཔོན་གྱི་ཚུལ་དུ་ཕེབས། དེ་དག་གི་སྐབས་སུའང་རིམ་གཉིས་བཟླས་པ་དང་བཅས་པའི་རྣལ་འབྱོར་ལ་གཡེལ་མེད་དུ་བརྩོན་པར་མཛད་ཅིང་། སླར་ཤར་ཆེན་དབུས་གཙང་དུ་ཕེབས། རྗེ་ཉིད་རྩེ་གཅིག་སྒྲུབ་པ་ལ་བརྩོན་པའི་དགོངས་བཞེད་འཁྲུངས་པ་ན། དཔལ་ས་སྐྱ་པའི་ཕྲིན་ལས་ཀྱི་འཁོར་ལོས་སྒྱུར་བ་བླ་མ་ཆོས་ཀྱི་རྒྱལ་མཚན་པས་དབེན་གནས་གྲྭ་མ་སྒང་དུ་བཞུགས་པ་ལེགས་ཞེས་ལུང་བསྟན་པ་ལྟར་སྒྲུབ་ཁང་གསར་དུ་བཞེངས། ཤ་ཆང་དང་ཤ་གོས་སོགས་སྡིག་པའི་ལས་དང་ལོག་འཚོའི་འབྱོར་པ་རྒྱངས་རིང་དུ་བསྲིངས་ནས། ཆོས་གོས་རྣམ་གསུམ་འབྲལ་མེད་དང་། གདན་གཅིག །རྡོར་དཀར་སོགས་ཕྱི་འདུལ་བའི་ཀུན་སྤྱོད་ཤིན་ཏུ་གཙང་། ནང་བྱང་ཆུབ་སེམས་གཉིས་དང་མི་འབྲལ། གསང་བ་དཔལ་དགྱེས་པ་རྡོ་རྗེའི་ལམ་བསྐྱེད་རྫོགས་ཀྱི་རྣལ་འབྱོར་ཐུན་བཞིར་བརྩོན་པ་དྲག་པོས་ཉམས་སུ་བཞེས་པས་རྒྱུད་སྡེ་ནས་བཤད་པའི་ཉམས་མྱོང་ཚད་མ་ཐུགས་རྒྱུད་ལ་འཁྲུངས་ཏེ་གྲུབ་པའི་གོ་འཕང་མཐོན་པོར་གཤེགས། དཀར་ཕྱོགས་སྐྱོང་བའི་གཞི་བདག་རྡོ་རྗེ་གཡུང་དྲུང་སོགས་མི་མ་ཡིན་རྣམས་ཀྱིས་ཕྱག་བྱས། འབྱུང་པོ་གདུག་པ་ཅན་ཕྱག་ནས་འཐོར་བ་ཙམ་གྱིས་རྒྱུན་ཆད། མངོན་པར་ཤེས་པ་རྒྱ་ཆེན་པོ་མངའ་བ་སོགས་ཡོན་ཏན་བསམ་གྱིས་མི་ཁྱབ། ས་སྐྱོང་སྡེ་དགེ་ཆོས་རྒྱལ་ཆེན་པོས་དབུའི་མཆོད་གནས་སུ་གདན་འདྲེན་ཞུས་ཀྱང་ཆོས་འབྲེལ་ཚེ་དབང་ཞིག་སྩལ་ནས་འཕྲལ་དུ་དབེན་རིར་བྱོན། བར་ཆད་ཀྱི་དབང་དུ་མ་སོང་ཞེས་བཀའ་སྩལ་བར་ཐོས་པས་མཚོན་འཇིག་རྟེན་ཆོས་བརྒྱད་ཀྱི་རྟོག་པས་མི་གཡེངས་དབང་བསྐུར་ཞུ་མཁན་རྣམས་ལའང་སྣོད་མ་བརྟག་པར་མི་གནང། ལས་འབྲས་གཙོ་བོར་གྱུར་པའི་གདམས་ངག་གིས་དཀྲི་བར་མཛད་པས་ཇོ་བོ་བཀའ་གདམས་པའི་རྣམ་ཐར་དང་རྗེས་སུ་མཐུན་ཅིང་མཐོང་ཐོས་ཐམས་ཅད་དོན་དང་ལྡན་པའི་ཕྲིན་ལས་མངའ། ཐར་རྩེ་རྡོ་རྗེ་འཆང་བྱམས་པ་ནམ་མཁའ་འཆི་མེད། ཤར་ཆེན་ཞབས་དྲུང་ངག་དབང་བསྟན་པའི་རྒྱལ་མཚན། རྡོ་རྗེ་འཛིན་པ་ངག་དབང་ཆོས་འབྱོར་སོགས་ཐོག་མཚུངས་པའི་མཁས་གྲུབ་ཐམས་ཅད་ཀྱིས་གུས་པས་བསྟེན། ཁྱད་པར་གྲུབ་མཆོག་ངག་དབང་རིན་ཆེན། མཚུངས་མེད་དཔལ་ལྡན་ཕྲིན་ལས། མཁས་དབང་བླ་མ་བསོད་ནམས་རྒྱལ་མཚན་གསུམ་ལ་གདམས་པ་རྫོགས་པར་གནང་བས་བསྟན་པའི་སྨན་ཡོན་ཆེན་པོར་གྱུར། མ་འོངས་པ་ན་དབེན་གནས་དེ་ཉིད་དུ་སྒྲུབ་སྡེ་ཁྱད་པར་འབྱུང་བའི་རྟེན་འབྲེལ་བསྒྲིགས། སྐུ་ཚེ་དང་སྒྲུབ་པ་མཐར་ཕྱིན་ནས་སྐུ་རླུང་ལྟ་བུས་ཅུང་ཟད་བསྙུན་ཚུལ་བཞེས་པ་ན། ཐུགས་སྲས་བླ་མ་དཔལ་ལྡན་ཕྲིན་ལས་ལ་གང་ཅིའི་ཞལ་ཆེམས་ལྷུག་པར་སྩལ་ནས་གླང་ལོ་སྣྲོན་ཟླ་བའི་དཀར་པོའི་ཕྱོགས་ཀྱི་ཚེས་བཅུ་བཞིའི་ཉི་མ་འཆར་ཀའི་ཚེ་སྐུ་དྲང་པོར་བསྲངས། ཕྱག་གཡས་ཆོས་འཆད་དང་གཡོན་མཉམ་གཞག་གི་ཕྱག་རྒྱ་མཛད་དེ་ཆོས་དབྱིངས་ཞི་བ་ཆེན་པོར་ཐུགས་གཞོལ་བའི་ཚུལ་བསྟན། འོད་གསལ་གྱི་ངང་དུ་ཞག་བདུན་བཞུགས་ཏེ། ཟུང་འཇུག་གི་སྐུ་འོག་མིན་ཆེན་པོར་གཤེགས་པའི་ཚེ་ཤངས་བུག་གཉིས་ནས་བྱང་སེམས་དཀར་དམར་གྱི་རྒྱུན་བབས། དབུའི་གཙུག་ཏོར་གསལ་བར་འཕགས་པས་མཚོན་མཆོག་གི་དངོས་གྲུབ་བརྙེས་པའི་ལམ་རྟགས་རྣམས་མངོན་སུམ་དུ་སྣང་བར་མཛད། དེ་སྐབས་དབྱར་གྱི་ཚད་ཆེན་རྒྱས་པའི་དུས་ཡིན་ཀྱང། ཞག་བདུན་དུ་སྦྲང་ཆར་ཟིལ་བུར་རྒྱུན་མ་ཆད་པ་བབས་པས་སྐྱེ་རྒུ་རྣམས་དགའ་བདེའི་དཔལ་ལ་བཀོད་ཅིང་། ས་གཡོ་བ་ལྟ་བུའིུ་སྒྲ་དང་། ཤར་ཕྱོགས་ཀྱི་ནམ་མཁའ་ནས་འཇའ་དཀར་པོ་མདུང་ཚུགས་སུ་ཟུག །ཞལ་ཆེམས་ལྟར་ཤར་ཆེན་ཞབས་དྲུང་རིན་པོ་ཆེས་བཅོམ་ལྡན་འདས་ཐམས་ཅད་རིག་པའི་སྒོ་ནས་སྐུ་གདུང་ཞུགས་འབུལ་གནང་བ་ན་མེ་ལྕེ་ཐམས་ཅད་དུམ་བུ་གཅིག་ཏུ་གྱུར་ཅིང་རིན་པོ་ཆེའི་དབྱིབས་སུ་འབར། དཀར་ཞིང་གསལ་བའི་དུ་བ་མཆོད་སྤྲིན་གྱི་ཚུལ་དུ་འཁོར། མེ་སྒྲ་གླིང་བུའི་གདངས་ལྟར་སྙན་པ་སོགས་ངོ་མཚར་བའི་ལྟས་དང་། སྤྱི་གཙུག་གི་ཐད་ཀྱི་སྐུ་རུས་ཐག་སྒྲ་དང་བཅས་ནམ་མཁར་འཕགས། གདུང་རུས་ཀུནྡ་ལྟར་དཀར་བའི་ཁ་དོག་ཅན་འབའ་ཞིག་ཏུ་གྱུར། ཞག་བདུན་གྱི་བར་གདུང་ཁང་ལ་དྲི་ཞིམ་པོའི་ངད་ལྡང་བས་མཚོན་གདུལ་བྱ་ཐུན་མོང་བ་རྣམས་ཀྱིས་ཀྱང་མངོན་སུམ་དུ་གྱུར་པས་མ་དད་པ་དད་ཅིང་། དད་པ་རྣམས་སླར་ཡང་དད་གུས་ཆེས་ཆེར་རྒྱས་པས་བསྔགས་པའི་མེ་ཏོག་ཕྱོགས་བརྒྱར་འགྲེམ་ཞིང་། ཐུགས་ཀྱི་སྲས་རྣམས་ནས་བླ་མ་དམ་པའི་མཛད་པ་ལྟར་ཚུལ་ཁྲིམས་རྣམ་པར་དག་པས་གཞི་བཟུང་། ལམ་ཟབ་མོ་རྩེ་གཅིག་ཏུ་ཉམས་སུ་བཞེས། བཤད་སྒྲུབ་སྤེལ་མར་མཛད་པས་ཕྲིན་ལས་ཀྱི་རྒྱུན་རྒྱས་པར་གྱུར་ཏོ། །རྗེ་འདིའི་རྣམ་ཐར་ཉུང་གསལ་མཁས་དབང་ཀུན་དགའ་དཔལ་ལྡན་གྱིས་མཛད་པ་དམ་པའི་གསུང་སྒྲོས་ཞེས་པ་ཞིག་ཡོད།། །། ༈

[edit]

grub chen kun dga' blo ldan ni/ @#/_/grub chen kun dga' blo ldan ni/__shar rgyal mo rong du 'khrungs/__dbus gtsang du byon nas/__rten gsum rnams la phyag bskor mchod pa sogs tshogs bsags sgrib sbyong mtha' yas pa mdzad/__khyad par ngor e wa~M du bstan pa rin po che'i sgor zhugs/__sdom pa gsum gyi bdud rtsis thugs kyi bum bzang gtams/__thos bsam sgom gsum spel mar mdzad/__dpal sa skyar 'jam pa'i dbyangs ngag dbang kun dga' blo gros kyi zhabs pad bsten nas zab don gyi smin grol mang du gsan pa'i chos grwar 'jam mgon de nyid kyis dgyes pa'i spyan gyis gzigs shing /__rnal 'byor rgyal mo rong pa zhes yang yang gsungs te/__ma 'ongs pa na sgrub pa'i rgyal mtshan 'dzin par lung bstan/__de nas shar chen ye shes dbang phyug mdo khams sde dger chibs bskyod skabs mchod dpon gyi tshul du phebs/__de dag gi skabs su'ang rim gnyis bzlas pa dang bcas pa'i rnal 'byor la g.yel med du brtson par mdzad cing /__slar shar chen dbus gtsang du phebs/__rje nyid rtse gcig sgrub pa la brtson pa'i dgongs bzhed 'khrungs pa na/__dpal sa skya pa'i phrin las kyi 'khor los sgyur ba bla ma chos kyi rgyal mtshan pas dben gnas grwa ma sgang du bzhugs pa legs zhes lung bstan pa ltar sgrub khang gsar du bzhengs/__sha chang dang sha gos sogs sdig pa'i las dang log 'tsho'i 'byor pa rgyangs ring du bsrings nas/__chos gos rnam gsum 'bral med dang /__gdan gcig__/rdor dkar sogs phyi 'dul ba'i kun spyod shin tu gtsang /__nang byang chub sems gnyis dang mi 'bral/__gsang ba dpal dgyes pa rdo rje'i lam bskyed rdzogs kyi rnal 'byor thun bzhir brtson pa drag pos nyams su bzhes pas rgyud sde nas bshad pa'i nyams myong tshad ma thugs rgyud la 'khrungs te grub pa'i go 'phang mthon por gshegs/__dkar phyogs skyong ba'i gzhi bdag rdo rje g.yung drung sogs mi ma yin rnams kyis phyag byas/__'byung po gdug pa can phyag nas 'thor ba tsam gyis rgyun chad/__mngon par shes pa rgya chen po mnga' ba sogs yon tan bsam gyis mi khyab/__sa skyong sde dge chos rgyal chen pos dbu'i mchod gnas su gdan 'dren zhus kyang chos 'brel tshe dbang zhig stsal nas 'phral du dben rir byon/__bar chad kyi dbang du ma song zhes bka' stsal bar thos pas mtshon 'jig rten chos brgyad kyi rtog pas mi g.yengs dbang bskur zhu mkhan rnams la'ang snod ma brtag par mi gnang/__las 'bras gtso bor gyur pa'i gdams ngag gis dkri bar mdzad pas jo bo bka' gdams pa'i rnam thar dang rjes su mthun cing mthong thos thams cad don dang ldan pa'i phrin las mnga'/__thar rtse rdo rje 'chang byams pa nam mkha' 'chi med/__shar chen zhabs drung ngag dbang bstan pa'i rgyal mtshan/__rdo rje 'dzin pa ngag dbang chos 'byor sogs thog mtshungs pa'i mkhas grub thams cad kyis gus pas bsten/__khyad par grub mchog ngag dbang rin chen/__mtshungs med dpal ldan phrin las/__mkhas dbang bla ma bsod nams rgyal mtshan gsum la gdams pa rdzogs par gnang bas bstan pa'i sman yon chen por gyur/__ma 'ongs pa na dben gnas de nyid du sgrub sde khyad par 'byung ba'i rten 'brel bsgrigs/__sku tshe dang sgrub pa mthar phyin nas sku rlung lta bus cung zad bsnyun tshul bzhes pa na/__thugs sras bla ma dpal ldan phrin las la gang ci'i zhal chems lhug par stsal nas glang lo snron zla ba'i dkar po'i phyogs kyi tshes bcu bzhi'i nyi ma 'char ka'i tshe sku drang por bsrangs/__phyag g.yas chos 'chad dang g.yon mnyam gzhag gi phyag rgya mdzad de chos dbyings zhi ba chen por thugs gzhol ba'i tshul bstan/__'od gsal gyi ngang du zhag bdun bzhugs te/__zung 'jug gi sku 'og min chen por gshegs pa'i tshe shangs bug gnyis nas byang sems dkar dmar gyi rgyun babs/__dbu'i gtsug tor gsal bar 'phags pas mtshon mchog gi dngos grub brnyes pa'i lam rtags rnams mngon sum du snang bar mdzad/__de skabs dbyar gyi tshad chen rgyas pa'i dus yin kyang/__zhag bdun du sbrang char zil bur rgyun ma chad pa babs pas skye rgu rnams dga' bde'i dpal la bkod cing /__sa g.yo ba lta bu'u+i sgra dang /__shar phyogs kyi nam mkha' nas 'ja' dkar po mdung tshugs su zug__/zhal chems ltar shar chen zhabs drung rin po ches bcom ldan 'das thams cad rig pa'i sgo nas sku gdung zhugs 'bul gnang ba na me lce thams cad dum bu gcig tu gyur cing rin po che'i dbyibs su 'bar/__dkar zhing gsal ba'i du ba mchod sprin gyi tshul du 'khor/__me sgra gling bu'i gdangs ltar snyan pa sogs ngo mtshar ba'i ltas dang /__spyi gtsug gi thad kyi sku rus thag sgra dang bcas nam mkhar 'phags/__gdung rus kun+da ltar dkar ba'i kha dog can 'ba' zhig tu gyur/__zhag bdun gyi bar gdung khang la dri zhim po'i ngad ldang bas mtshon gdul bya thun mong ba rnams kyis kyang mngon sum du gyur pas ma dad pa dad cing /__dad pa rnams slar yang dad gus ches cher rgyas pas bsngags pa'i me tog phyogs brgyar 'grem zhing /__thugs kyi sras rnams nas bla ma dam pa'i mdzad pa ltar tshul khrims rnam par dag pas gzhi bzung /__lam zab mo rtse gcig tu nyams su bzhes/__bshad sgrub spel mar mdzad pas phrin las kyi rgyun rgyas par gyur to/__/rje 'di'i rnam thar nyung gsal mkhas dbang kun dga' dpal ldan gyis mdzad pa dam pa'i gsung sgros zhes pa zhig yod//____//__!