JKW-KABUM-18-TSHA-001-004

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 18, sde tshan 1, Text 4, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 18: 8-. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

4 10-13	བཞི་པ་སྤྱི་ཡི་བརྗོད་དོན་གྱི་བྱ་གཞག། bzhi pa spyi yi brjod don gyi bya gzhag Official Letters - chab shog	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

བཞི་པ་སྤྱི་ཡི་བརྗོད་དོན་གྱི་བྱ་གཞག ། བཞི་པ་སྤྱི་ཡི་བརྗོད་དོན་གྱི་བྱ་གཞག་ཀྱང་། དཎྜཱིའི་གཞུང་ལས། འདིར་ནི་ཟབ་པས་རྒྱ་མཚོ་དང་། །བརླིང་པ་ཉིད་ཀྱི་རི་བོ་ཡིན། །འཇིག་རྟེན་རྣམས་ལ་འདོད་པ་ནི། །སྟེར་ཕྱིར་དཔག་བསམ་རྐང་འཐུང་ངོ་། །ཞེས་གསུངས་པ་བཞིན། བློ་གྲོས་ཟབ་པ་ལ་རྒྱ་མཚོ། བརླིང་པ་ལ་རི་དབང་། འདོད་པ་སྐོང་བ་ལ་ཡིད་བཞིན་ནོར་བུ་དང་། དཔག་བསམ་ཤིང་། བུམ་པ་བཟང་པོ། གཟི་བྱིན་ཆེ་བ་ལ་ཉི་མ། བརྟན་པ་ལ་ས་གཞི། འགྱུར་བ་མེད་པ་ལ་གསེར། གཤིས་དཀར་བ་ལ་དུང་དང་པད་རྩ། བློ་ཁོག་ཡངས་པ་ལ་ནམ་མཁའ། སྙིང་ཉེ་བ་ལ་ཉི་མས་རེག་པའི་ཨུཏྤལ། མཛེས་པ་ལ་ཟླ་བ་དང་། ཀུནྡའི་ཚལ་སོགས་བགྲང་དུ་མེད་བ་ཞིག་དཔེ་ལ་སྦྱོར་བའང་། ཇི་ལྟ་ཇི་ཞིག་ལྟར་མཚུངས་པ། །གསལ་བ་གང་དུ་རྟོགས་བྱེད་པ། །དེ་ནི་དཔེ་ཞེས་བྱ་སྟེ་དཔེར། །ཞེས་གསུངས་པ་བཞིན་དཔེ་ཡི་སྐྱོན་གྱིས་མ་གོས་པ་དང་། བླ་མ་དགེ་བའི་བཤེས་གཉེན་རྣམས་ལ། བླ་མ་སངས་རྒྱས་ཀུན་དང་མཉམ། ཞེས་དང་། མྱ་ངན་འདས་མདོར། དཀོན་མཆོག་གསུམ་ལ་སྐྱབས་སོང་ན། །འཇིགས་པ་མེད་པ་ཐོབ་པར་འགྱུར། །ཞེས་གསུངས་པ་ལྟར། རྒྱལ་སྲས་རྣམས་ཀྱི་སྤང་རྟོགས་དང་མཚུངས་པའི་ཚུལ་དང་། སྔོན་བྱོན་དམ་པ་རྣམས་ཀྱི་རྣམ་ཐར་ལ་བསྙེགས་ཚུལ། སྐྱབས་ཀྱི་སྙིང་པོ་ལ་བཀུར་ཏེ་བརྗོད་པར་བྱའོ། ། ༈ རྒྱལ་པོ་རྣམས་ལ་རང་སྡེ་བྱམས་པས་སྐྱོང་ཞིང་། གཞན་དག་ཟིལ་གྱིས་གནོན་པ་དང་། ཚུལ་མིན་ཚར་གཅོད་པ་ལ་ཚངས་པའི་བློ། སྲེད་མེད་བུའི་སྒྱུ་རྩལ། དབང་ཕྱུག་གི་ཡོན་ཏན། ལེགས་བྱས་ཕུན་སུམ་ཚོགས་པ་ལ་བསོད་ནམས་སྟོབས། ཁྲིམས་དྲང་བ་ལ་མེ་ལོང་གདོང་དང་། མང་པོས་བཀུར་བ། བྱམས་པས་སྐྱོང་བ་ལ་བྱམས་པའི་སྟོབས་སོགས་དང་མཚུངས་ཚུལ་དང་། གཞན་ཡང་རྒྱན་ལས། བྱང་ཆུབ་སེམས་དཔའ་རྟག་ཏུ་ནི། ཁྱིམ་པ་འཁོར་ལོས་སྒྱུར་རྣམས་སུ། །གྱུར་ནས་སྐྱེ་བ་ཐམས་ཅད་དུ། །སེམས་ཅན་རྣམས་ཀྱི་དོན་བྱེད་དོ། །ཞེས་སོགས་གསུངས་པ་བཞིན་བསྔགས་བརྗོད་གང་འཚམས་བྱའོ། ། ༈ གནས་ལྔའི་རིག་ལམ་གང་ལ་མཁས་པ་དེ་དང་དེར་བསྔགས་འོས་རིགས་ཀྱང་། བརྡའ་སྤྲོད་མཁས་པ་ལ། རང་བཞིན་རྐྱེན་དང་རྣམ་འགྱུར་གྱི་སྒོ་ནས་རྒྱལ་གསུང་གཏན་ལ་དབབ་མཁས་པ། བྲམ་ཟེ་པཱ་ཎི་དང་། ལྷ་ཡི་དབང་པོ། དྲང་སྲོང་ཕུར་བུ། གཞོན་ནུ་གདོང་དྲུག་སོགས་དང་མཚུངས་ཚུལ། ཚད་མ་ལ། དཔྱད་གསུམ་རྣམ་པར་དག་པའི་སྒོ་ནས་གསུང་རབ་ཀྱི་དོན་ཕྱིན་ཅི་མ་ལོག་པ་གཏན་ལ་དབབ་ཅིང་བརྒལ་བརྟགས་སུན་འབྱིན་གྱི་ཡོན་ཏན་རྒྱལ་སྲས་འཕགས་པ་ལྷ། ཕྱོགས་ཀྱི་གླང་པོ། ཆོས་ཀྱི་གྲགས་པ་སོགས་དང་མཚུངས་ཚུལ། བཟོ་རིག་ལ་ཤེས་བྱར་མཆིས་པ་ཇི་བཞིན་བསྐྲུན་པ་ལ་ཐོགས་པ་མེད་པ་ལས་སྣ་ཚོགས་པ་ཏེ་བི་ཤྭ་ཀརྨ། བྱེ་བྲག་ཡིག་མཁན་ལ་བྲམ་ཟེ་ལེགས་བྱིན་དང་། ཐུ་མི་སཾ་བྷོ་ཊ། གསོ་བ་རིག་པར། དུས་མིན་འཆི་བའི་འཇིགས་པ་སྐྱོབ་པའི་བྱེད་པོ་རྒྱུན་ཤེས་ཀྱི་བུ། གཞོན་ནུའི་གསོས། ཕ་ཁོལ། ཟླ་བ་མངོན་དགའ། གཡུ་ཐོག་པ། བྱང་ཟུར་མཁས་པ་རིམ་བྱོན་སོགས་དང་མཚུངས་ཚུལ། སྙན་ངག་ལ་མཁས་པར། མཚོ་བྱུང་མ། དཔལ་ལྡན་དཎྜཱི། དགེ་དབང་ཡབ་སྲས། དབྱངས་ཅན་དགའ་བ་སོགས་དང་མཚུངས་ཚུལ། མངོན་བརྗོད་ལ། སློབ་དཔོན་འཆི་བ་མེད་པའི་སྡེ། རབ་འབྱོར་ཟླ་བ། སྐར་རྩིས་ལ་རྡོ་རྗེ་རིགས་ལྡན། དུས་ཞབས་ཆེ་ཆུང་། རྒྱ་མཚོ་རྣམ་གསུམ། ནག་རྩིས་ལ་ཞུ་འཕྲུལ་ལེན་འཆང་བཞི། ཁམ་ཁྲ། ཁྱུང་ནག་སོགས་དང་མཚུངས་ཚུལ་སོགས་གང་དང་གང་ལ་བསྔགས་འོས་དེ་དང་དེར་འཚམས་པའི་ཚིག་དོན་རྣ་བའི་གསོས་སུ་འཇེབས་པ་བརྗོད་པར་བྱའོ། ། ༈

[edit]

bzhi pa spyi yi brjod don gyi bya gzhag_/ bzhi pa spyi yi brjod don gyi bya gzhag kyang /__daN+DI'i gzhung las/__'dir ni zab pas rgya mtsho dang /__/brling pa nyid kyi ri bo yin/__/'jig rten rnams la 'dod pa ni/__/ster phyir dpag bsam rkang 'thung ngo /__/zhes gsungs pa bzhin/__blo gros zab pa la rgya mtsho/__brling pa la ri dbang /__'dod pa skong ba la yid bzhin nor bu dang /__dpag bsam shing /__bum pa bzang po/__gzi byin che ba la nyi ma/__brtan pa la sa gzhi/__'gyur ba med pa la gser/__gshis dkar ba la dung dang pad rtsa/__blo khog yangs pa la nam mkha'/__snying nye ba la nyi mas reg pa'i ut+pal/__mdzes pa la zla ba dang /__kun+da'i tshal sogs bgrang du med ba zhig dpe la sbyor ba'ang /__ji lta ji zhig ltar mtshungs pa/__/gsal ba gang du rtogs byed pa/__/de ni dpe zhes bya ste dper/__/zhes gsungs pa bzhin dpe yi skyon gyis ma gos pa dang /__bla ma dge ba'i bshes gnyen rnams la/__bla ma sangs rgyas kun dang mnyam/__zhes dang /__mya ngan 'das mdor/__dkon mchog gsum la skyabs song na/__/'jigs pa med pa thob par 'gyur/__/zhes gsungs pa ltar/__rgyal sras rnams kyi spang rtogs dang mtshungs pa'i tshul dang /__sngon byon dam pa rnams kyi rnam thar la bsnyegs tshul/__skyabs kyi snying po la bkur te brjod par bya'o/___/_!_rgyal po rnams la rang sde byams pas skyong zhing /__gzhan dag zil gyis gnon pa dang /__tshul min tshar gcod pa la tshangs pa'i blo/__sred med bu'i sgyu rtsal/__dbang phyug gi yon tan/__legs byas phun sum tshogs pa la bsod nams stobs/__khrims drang ba la me long gdong dang /__mang pos bkur ba/__byams pas skyong ba la byams pa'i stobs sogs dang mtshungs tshul dang /__gzhan yang rgyan las/__byang chub sems dpa' rtag tu ni/__khyim pa 'khor los sgyur rnams su/__/gyur nas skye ba thams cad du/__/sems can rnams kyi don byed do/__/zhes sogs gsungs pa bzhin bsngags brjod gang 'tshams bya'o/____/_!_gnas lnga'i rig lam gang la mkhas pa de dang der bsngags 'os rigs kyang /__brda' sprod mkhas pa la/__rang bzhin rkyen dang rnam 'gyur gyi sgo nas rgyal gsung gtan la dbab mkhas pa/__bram ze pA Ni dang /__lha yi dbang po/__drang srong phur bu/__gzhon nu gdong drug sogs dang mtshungs tshul/__tshad ma la/__dpyad gsum rnam par dag pa'i sgo nas gsung rab kyi don phyin ci ma log pa gtan la dbab cing brgal brtags sun 'byin gyi yon tan rgyal sras 'phags pa lha/__phyogs kyi glang po/__chos kyi grags pa sogs dang mtshungs tshul/__bzo rig la shes byar mchis pa ji bzhin bskrun pa la thogs pa med pa las sna tshogs pa te bi shwa karma/__bye brag yig mkhan la bram ze legs byin dang /__thu mi saM b+ho Ta/__gso ba rig par/__dus min 'chi ba'i 'jigs pa skyob pa'i byed po rgyun shes kyi bu/__gzhon nu'i gsos/__pha khol/__zla ba mngon dga'/__g.yu thog pa/__byang zur mkhas pa rim byon sogs dang mtshungs tshul/__snyan ngag la mkhas par/__mtsho byung ma/__dpal ldan daN+DI/__dge dbang yab sras/__dbyangs can dga' ba sogs dang mtshungs tshul/__mngon brjod la/__slob dpon 'chi ba med pa'i sde/__rab 'byor zla ba/__skar rtsis la rdo rje rigs ldan/__dus zhabs che chung /__rgya mtsho rnam gsum/__nag rtsis la zhu 'phrul len 'chang bzhi/__kham khra/_khyung nag sogs dang mtshungs tshul sogs gang dang gang la bsngags 'os de dang der 'tshams pa'i tshig don rna ba'i gsos su 'jebs pa brjod par bya'o/____/_!_