JKW-KABUM-15-BA-030-009

🚧 This website is under continued development. We appreciate your patience!

Previous Text Back to Volume PageLast text in section.

Wylie title
Location	mkhyen brtse'i bka' 'bum Volume 15, sde tshan 30, Text 9, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 15: . Khams sde dge rdzong sar dgon: Rdzong sar blo gros phun tshogs, 2020.
Genre
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

1 Texts in this Section (sde tshan or chos tshan)

9 583-592	ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་སྒྲུབ་ཆེན་དངོས་གཞིའི་སྐབས་ཀྱི་འདོན་འགྲིགས། thugs rje chen po sdug bsngal rang grol gyi sgrub chen dngos gzhi'i skabs kyi 'don 'grigs Liturgy - ngag 'don	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་སྒྲུབ་ཆེན་དངོས་གཞིའི་སྐབས་ཀྱི་འདོན་འགྲིགས། ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་སྒྲུབ་ཆེན་དངོས་གཞིའི་སྐབས་ཀྱི་འདོན་འགྲིགས་བཞུགས་སོ། ཨོཾ་སྭསྟི། ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་སྒྲུབ་ཆེན་དངོས་གཞིའི་སྐབས་ཉིན་རེ་བཞིན་སྔ་ཆོག་ལ། སྔོན་འགྲོ་ཚང་མ། སྐྱབས་སེམས། ཡན་ལག་བདུན་པ། མཚམས་ལྷ་བསྐྱེད་ཆོག །གསེར་སྐྱེམས། བགེགས་གཏོར་སྲུང་འཁོར་ནས་བསྟོད་པའི་བར། གཞུང་གི་བཟླས་པ། ཉིན་གཉིས་པ་མན་རིལ་བུའི་བཟླས་པ་དང་རྣམ་བུམ་གྱི་བཟླས་པ་སྦྱར། ཐུན་བསྡུ་རན་པ་ན་ཉིན་མོའི་སྔགས་རྒྱུན་པ་རྣམས་ལ་གཟུངས་ཐག་གཏད་ནས། དབྱངས་གསལ་རྟེན་སྙིང་མཐར། རྡོ་རྗེའི་ལྷ་མོ་བཅུ་དྲུག །གཞུང་གི་བསྟོད་པ། ཡིག་བརྒྱ་གསུམ། གསོལ་འདེབས་ཞལ་མཐོང་མ། བསང་མདོར་བསྡུས་དང་། ཐོ་གསོལ། ན་རཀ་སྐོང་བཤགས། ཞི་ཁྲོ་ཁྲོམ་དཀྲུག་ལྟར་མར་མེའི་སྨོན་ལམ། ཚོགས་སྐོང་། བདག་འཇུག་ཚོགས་ལ་རོལ་དུས་བསམ་ལྷུན། ཕྱི་རོལ་དུ་ཆ་གསུམ་བཏང་། ལྷག་མ། ཐུགས་རྗེ་ཆེན་པོའི་དཀྱིལ་འཁོར་དུ། །སོགས་སྨོན་ལམ་འགྲུབ་འཕྲལ་བཞེངས་ཏེ་དཀྱིལ་འཁོར་མདུན་ནས་ཀུན་ཐུབ་བསྐུལ། བྱིན་འབེབས་རྔ་མེད་དྲིལ་གདངས། མ་ཎིའི་ཛཔ྄་དབྱངས་གསུམ། ། ༈ ཕྱི་ཐུན་ལ་ཐམས་ཅད་གྲལ་ལ་འཁོད་རྗེས་རྒྱུད་འདེབས། སྐྱབས་སེམས་ནས་བཟླས་པའི་བར་ལས་གཞུང་ལྟར། ཉིན་དང་པོ་ལ་རྩ་བའི་བསྙེན་པ་དང་། གཉིས་པ་མན་ལ་རིལ་བུའི་བསྙེན་པ་གཙོ་བོར་བྱེད་ནས་སྤྱོད་ལམ་གྱིས་བར་མ་ཆོད་པར་སྔགས་རྒྱུན་གྱི་ཚུལ་དུ་བཟླ། ཐུན་བསྡུ་རན་པ་དང་སྔགས་རྒྱུན་པ་ལ་གཟུངས་ཐག་གཏད་ནས། དབྱངས་གསལ་རྟེན་སྙིང་། རྡོ་རྗེ་ལྷ་མོ་བཅུ་དྲུག་འདོན་མིན་སྐབས་དང་སྦྱར། གང་ལྟར་ཡང་མཆོད་བསྟོད་གསོལ་འདེབས། མ་མགོན། གཟའ། ཚེ་རིང་མ། ཚོགས། སྐོང་བཤགས་རྡོ་རྗེའི་ཐོལ་གླུ་དང་གཞུང་གི་སྐོང་བ་བཅས། གནས་འདྲེན་བྱེད་ན་འདིར་གཏོང་། ཚོགས་ལ་རོལ་དུས་མྱུར་འགྲུབ་ཚར་གསུམ། ལྷག་མ་བསྐུལ། གཏོར་འགུགས་རྗེས་ཕྲིན་བཅོལ་ཐུབ་བསྟན་མ། ཆད་མདོ་ནས། རྟ་བྲོ་བར་གཞུང་ལྟར། གཏོང་རག་གི་མཆོད་བསྟོད་རྒྱས་བསྡུས་གང་འོས། དངོས་གྲུབ་ལེན་ཆོག་མི་དགོས། ནོངས་བཤགས་མན་གཞུང་ལྟར། ལོངས་ཡོད་ན་དོང་སྤྲུགས་སྨོན་ལམ་དང་བཀྲ་ཤིས་རྒྱས་པ། གང་ལྟར་ཡང་མཐར་ཀུན་ཐུབ་བསྐུལ། བྱིན་འབེབས་རྔ་བརྡུང་དབྱངས། མ་ཎིའི་ཛཔ྄་དབྱངས་མཐར་གྲོལ། ། ༈ སྔགས་རྒྱུན་མཁན་རྣམས་ཀྱིས། ཚིག་བདུན་གསོལ་འདེབས། དཔལ་ལྡན་རྩ་བའི་བླ་མ་སོགས་སྔོན་དུ་འགྲོ་བས། བརྒྱུད་འདེབས་མཐར། སྐྱེ་བ་ཀུན་ཏུ་སོགས། ཁྱེད་རྣམས་བསྟོད་ཅིང་སོགས། སྐྱབས་འགྲོ་ནས་བཟླས་པའི་བར་གཞུང་ལྟར། ཉིན་གཉིས་པ་མན་ལ་རྩ་བསྙེན་སྟོང་ཕྲག །ལྷ་མོ་བཞི་ལ་བརྒྱ་སྐོར་ཙམ། རིལ་སྒྲུབ་དམིགས་བཟླས་གཙོ་བོར་བྱེད། སྤྱིར་བཟླས་པ་མགོ་ཚུགས་པ་དང་མཉམ་དུ་གཟུངས་ཐག་བཟུང་དགོས། དེའང་མཚན་ཐུན་ལ་ཐུན་བཞིར་ཕྱེ་བའི་ཐུན་དང་པོས་ཐུན་གཉིས་པ་ལེན་མཁན་གྱི་བསྙེན་རྒྱུན་མ་ཚུགས་པར་བསྙེན་བར་མི་ཆད་པར་བཟླ། བསྙེན་རྒྱུན་ཚུགས་པ་དང་མཉམ་དུ་དེ་ལ་གཟུངས་ཐག་གཏད་ནས་དབྱངས་གསལ་རྟེན་སྙིང་ཚར་གསུམ་མཐར། གཞུང་གི་མཆོད་བསྟོད་ཡིག་བརྒྱ་གསུམ། གསོལ་འདེབས་ཞལ་མཐོང་མ། ཚོགས་སྐོང་ལྷག་མའི་བར། དེ་ནས་རྗེས་ཆོག་གི་མཆོད་བསྟོད་བྱ། དངོས་གྲུབ་ལེན་ཆོག་མི་དགོས། ནོངས་བཤགས་ནས་བཀྲ་ཤིས་བར་གཞུང་ལྟར་གྲུབ་རྗེས། ཉུ་ལེ་ལ་ཕུར་གདབ་དང་། བྱིན་འབེབས་སྒྲུབ་ཁོག་ལྟར་གྱི་རྗེས། མ་ཎིའི་ཛཔ྄་དབྱངས་ལན་གསུམ་བྱས་ལ་གྲོལ། མཚན་ཐུན་ཐམས་ཅད་ཀྱིས་འདོན་ལུགས་འདི་ལྟར་བྱེད་དགོས། མདོར་ན་ཉིན་མཚན་གྱི་སྔགས་རྒྱུན་མཁན་ཐམས་ཅད་ཀྱིས་མངོན་རྟོགས་དང་། བཟླས་རྒྱུན་གཉིས་ཀ་བར་མ་ཆད་པ་དགོས་པས། སྔ་མ་སྔ་མས་ཐུན་འཇོག་སྐབས། ཕྱི་མ་ཕྱི་མ་རྣམས་ཀྱི་སྔགས་རྒྱུན་མ་ཚུགས་བར་ཐུན་མི་བསྡུ་ཞིང་། སྔགས་རྒྱུན་ཚུགས་ནས་དལ་བུས་གཟུངས་ཐག་ཕྱི་མའི་སློབ་དཔོན་ལ་གཏད་ནས་ཐུན་བསྡུ་བ་སོགས་སྔགས་རྒྱུན་ཁོར་ཡུག་ཏུ་བྱེད་པ་ཤིན་ཏུ་གལ་ཆེའོ། །མངྒ་ལཾ། ༈ སེམས་མ་བཞིའི་སྒོས་སྒྲུབ་སྐབས། ཉིན་ཞག་གཅིག་ལ་མཚོན་ན་ཐུན་བཞིར་དབྱེ་བའི་ཐུན་དང་པོ་ལ། རྩ་བའི་རིལ་བུའི་བཟླས་པས་འོས་མཚམས་རྗེས་གཟུངས་ཐག་ཤར་གྱི་སྒྲོལ་མའི་བུམ་པ་ལ་གདགས་པ་ནས་བཟུང་སྟེ། བུམ་པ་ལྷ་ཡི་གཞལ་མེད་ཁང་༔ མཚན་ཉིད་ཐམས་ཅད་ཡོངས་རྫོགས་དབུས༔ རིལ་བུ་རྗེ་བཙུན་སྒྲོལ་མ་དཀར༔ ཕྱག་གཡས་མཆོག་སྦྱིན་ཨུཏྤལ་འཛིན༔ གཡོན་པས་མཉམ་བཞག་ཚེ་བུམ་ཅན༔ ཞབས་གཉིས་སེམས་མའི་སྐྱིལ་ཀྲུང་བཞུགས༔ གསལ་བརྟན་འོད་ཟེར་འབར་བ་ཡིས༔ ཐུགས་དམ་རྒྱུད་བསྐུལ་འོད་ཟེར་འཕྲོས༔ བདེ་གཤེགས་ཀུན་གྱི་དྭངས་མའི་སྲོག༔ བརྟན་གཡོའི་ཁམས་ནས་ཚེ་བཅུད་དང་༔ བླ་ཚེ་སྲོག་དབུགས་ཡར་བ་བཀུག༔ བསྒྲུབ་བྱ་གཙོ་བོའི་ཐུགས་སྲོག་དབུས༔ གསལ་བ་ལ་ཐིམ་ཚེ་བསོད་རྒྱས༔ ཨོཾ་མ་ཎི་པདྨེ་ཧཱུྃ་ཧྲཱིཿ ཏཱ་རེ་ཨཱ་ཡུརྫྙཱ་ན་ཚེ་བྷྲཱུྃ་ནྲྀ་ཛ་སྭཱ་ཧཱ། ཞེས་གཙོ་བོར་བཟླ་ཞིང་། ཐུན་བསྡུ་བ་ན། འོད་ཟེར་ཅན་མ་མན་ཆད་གཞུང་ལྟར་བསྙེན་པ་ཅུང་ཟད་རེ་བཟླ། དབྱངས་གསལ་རྟེན་སྙིང་མཆོད་བསྟོད་སོགས་དཀྱུས་ལྟར་བྱ། དེ་བཞིན་དུ་ཐུན་གཉིས་པ་ལ། རྩ་བའི་རིལ་སྒྲུབ་དང་། སྒྲོལ་མའི་བསྙེན་པ་ཅུང་ཟད་རྗེས་གཟུངས་ཐག་ལྷོ་ཡི་བུམ་པར་གདགས་པ་ནས་བཟུང་སྟེ། བུམ་པ་ལྷ་ཡི་གཞལ་མེད་ཁང་༔ མཚན་ཉིད་ཐམས་ཅད་ཡོངས་རྫོགས་དབུས༔ རིལ་བུ་འོད་ཟེར་ཅན་མ་ནི༔ ཞལ་གཅིག་ཕྱག་གཉིས་སྐུ་མདོག་སེར༔ ཞབས་གཉིས་དོར་སྟབས་ཞི་མ་ཁྲོ༔ ཕྱག་གཡས་རཏྣའི་ནོར་བུ་དང་༔ གཡོན་པས་ཉི་ཟླའི་ཞགས་པ་གདེངས༔ དར་དང་རིན་ཆེན་རྒྱན་གྱིས་མཛེས༔ ཐུགས་ནས་འོད་ཟེར་འཕྲོས་པ་ཡིས༔ ལོག་པར་འདྲེན་པའི་བཀྲག་མདངས་བཅུད༔ སྦུབ་ཆུས་དྲངས་བཞིན་བདག་ལ་ཐིམ༔ གཟི་བྱིན་ཉི་ཟླ་ལྟ་བུར་གྱུར༔ ཁྱད་པར་ཞགས་པ་གཡུག་པ་ཡི༔ ལོག་འདྲེན་དབང་བསྡུས་ཉི་ཟླ་གཉིས༔ ཆ་ལང་བརྡབས་པའི་བར་དུ་བཙིར༔ དེའི་བཀྲག་མདངས་ཚེའི་ལྷག་མ༔ བརྟན་གཡོའི་གཟི་བྱིན་སྟོབས་དཔལ་ཀུན༔ བདག་ཐིམ་གཟི་བྱིན་འབར་བར་གྱུར༔ ཨོཾ་མ་ཎི་པདྨེ་ཧཱུྃ་ཧྲཱིཿ ཨཱཪྻཱ་མ་རཱི་ཙྱཻ་མཱཾ་སྭཱ་ཧཱ། ཞེས་གཙོ་བོར་བཟླ། ཐུན་བསྡུ་བ་ན། རིག་བྱེད་མ་མན་ཆད་གཞུང་ལྟར་ཅུང་ཟད་བསྙེན་པ་སོགས་འདྲ། ། ༈ ཐུན་གསུམ་པ་ལ། རྩ་བའི་རིལ་སྒྲུབ་བཟླས་པ་དང་། སྒྲོལ་མ་དང་། འོད་ཟེར་ཅན་མའི་བསྙེན་པ་ཅུང་ཟད་རྗེས་གཟུངས་ཐག་ནུབ་ཀྱི་བུམ་པར་གདགས་པ་ནས་བཟུང་སྟེ། བུམ་པ་ལྷ་ཡི་གཞལ་མེད་ཁང་༔ མཚན་ཉིད་ཐམས་ཅད་ཡོངས་རྫོགས་དབུས༔ རིལ་བུ་ཀུ་རུ་ཀུ་ལླེ་ནི༔ ཞལ་གཅིག་ཕྱག་བཞི་བརྐྱང་བསྐུམ་ཞབས༔ རྩ་ཕྱག་པདྨའི་མདའ་གཞུ་བཀང་༔ ལྷག་མ་རྣམ་གཉིས་ལྕགས་ཀྱུ་ཞགས༔ སྟག་ཤམ་རུས་རྒྱན་པད་ཕྲེང་ལྡན༔ ཐུག་ནས་འོད་ཟེར་འཕྲོས་པ་ཡིས༔ བརྟན་གཡོའི་དྭངས་བཅུད་མ་ལུས་དང་༔ ཁྱད་པར་དམིགས་བྱའི་ཚེ་བསོད་དབང་༔ འོད་དམར་རྣམ་པར་མེར་གྱིས་བསྡུས༔ བདག་ཐིམ་གཟི་བྱིན་འབར་བར་གྱུར༔ ཨོཾ་མ་ཎི་པདྨེ་ཧཱུྃ་ཧྲཱིཿ ཀུ་རུ་ཀུལླེ་ཧྲཱིཾ་ཧྲཱིཾ་ཝཱཾ་ཤང་ཀུ་རུ་སྭཱ་ཧཱ། ཞེས་པ་དང་། བདག་མདུན་གཙོ་ལས་འོད་འཕྲོས་པས༔ དབང་མོའི་ཐུགས་ཀར་ཕོག་པའི་མོད༔ ཟག་མེད་བདེ་བ་ཆེན་པོའི་ཉམས༔ དཔག་ཏུ་མེད་པ་འབར་བ་ལས༔ ཐུགས་དམ་རྒྱུད་བསྐུལ་དེའི་ཐུགས་ནས༔ མཁའ་འགྲོ་ཡིད་ཀྱི་ཆོམ་རྐུན་མ༔ དམར་གསལ་བཀྲག་དང་ལྡན་པ་ལ༔ ཧྲཱིཿསྒྲ་སྒྲོགས་པ་ཏལ་གྱིས་ཐོན༔ པད་འདབ་འོད་ཀྱི་སྦུ་གུ་ཅན༔ དེ་ཡི་ནང་བཞུགས་ཤར་གྱིས་ཐོན༔ ཕོ་ཡི་སྤྱི་བོ་མོའི་གསང་གནས༔ ལམ་བརྒྱུད་སྙིང་གི་དབུས་སུ་ཞུགས༔ བཀྲག་མདངས་བཅུད་ལ་འཇིབས་པ་ཡིས༔ འདོད་པ་གཡོས་ཤིང་བརྟན་པ་འཕྲོག༔ ཤོག་སྐྱ་རླུང་གིས་བཏེགས་པ་བཞིན༔ རང་དབང་བྲལ་ཏེ་འདུས་པར་གྱུར། ཅེས་པའི་དམིགས་པ་དང་སྦྱར་ཏེ་སྔགས་ཅི་ནུས་བཟླས་མཐར། ཐུན་བསྡུ་བ་ན། ནོར་རྒྱུན་མ་ཅུང་ཟད་བསྙེན། དབྱངས་གསལ་རྟེན་སྙིང་མཆོད་བསྟོད་སོགས་བྱ། ། ༈ ཐུན་བཞི་པ་ལ། རྩ་བའི་རིལ་སྒྲུབ་ཀྱི་བཟླས་པ་དང་། སྒྲོལ་མ། འོད་ཟེར་ཅན། ཀུ་རུ་ཀུ་ལླེ་རྣམས་ཅུང་ཟད་བསྙེན་མཐར་གཟུངས་ཐག་བྱང་གི་བུམ་པར་གདགས་པ་ནས་བཟུང་སྟེ། བུམ་པ་ལྷ་ཡི་གཞལ་མེད་ཁང་༔ མཚན་ཉིད་ཐམས་ཅད་ཡོངས་རྫོགས་དབུས༔ རིལ་བུ་ནོར་རྒྱུན་ལྷ་མོ་ནི༔ འདོད་པ་འཇོ་བའི་གཏེར་བུམ་སྟེང་༔ ཞལ་གཅིག་ཕྱག་གཉིས་མཉམ་སྟབས་བཞེངས༔ དར་དང་རིན་ཆེན་རྒྱན་ཕྲེང་མཛེས༔ ཕྱག་གཡས་ཡིད་བཞིན་ནོར་བུ་དང་༔ གཡོན་པས་དགོས་འབྱུང་ནེའུ་ལེ་འཛིན༔ ལྗང་གསལ་སེམས་མའི་ཆ་བྱད་ཅན༔ གསལ་རྫོགས་གཟི་བྱིན་རབ་འབར་བས༔ ལྷ་ཀླུ་དྲང་སྲོང་མིའི་ནོར་བུ༔ ལྕགས་ཀྱུ་ལྟ་བུའི་འོད་ཟེར་གྱིས༔ བཀུག་ནས་བདག་ལ་སྩལ་བ་དང་༔ ཟས་ནོར་ཆར་དུ་འབེབས་པར་གྱུར༔ ཨོཾ་མ་ཎི་པདྨེ་ཧཱུྃ་ཧྲཱིཿ མ་མ་བཱ་སུ་དྷ་རི་སྭཱ་ཧཱ། ཞེས་བཟླས། ཐུན་བསྡུ་བ་ན་དབྱངས་གསལ་རྟེན་སྙིང་མཆོད་བསྟོད་སོགས་དཀྱུས་ལྟར་རོ། ། ༈ འདོད་ཡོན་བསྔོ་བར་སྤྲོ་ན། དབང་བསྐུར་བའི་རྗེས་ཅི་འབྱོར་བའི་བཟའ་བཏུང་སོགས་ལ་ཆབ་བྲན། རྃ་ཡྃ་ཁྃ་གིས་བསང་སྦྱངས། སྟོང་པའི་ངང་ལས་ལྷ་རྫས་དང་ཏིང་ངེ་འཛིན་ལས་གྲུབ་པའི་འདོད་ཡོན་གྱི་དངོས་པོ་ནམ་མཁའ་གང་བར་གྱུར་པར་བསམས་ལ། ཨོཾ་ཨཱཿཧཱུྃ་དང་། ན་མས་སརྦ་ཏ་ཐཱ་ག་ཏ་བྷྱོ་བི་ཤྭ་སོགས་ནམ་མཁའ་མཛོད་ཀྱིས་སྔགས་རྒྱས་བརླབ། ཕྱོགས་དུས་ཀུན་ན་གཟུགས་སྒྲ་དྲི་རོ་དང་། །རེག་བྱའི་ཁྱད་པར་དབང་པོ་ཚེམ་བྱེད་རྣམས། །རྡོ་རྗེ་སེམས་དཔའི་གནས་ཐོབ་ཁྱོད་ལ་འབུལ། །ཟག་མེད་དགའ་བདེས་རྟག་ཏུ་ཚིམ་པར་ཤོག །ཨོཾ་བཛྲ་སཏྭ་པཉྩ་ཀཱ་མ་གུ་ཎ་པྲ་ཏཱིཙྪ་སྭཱ་ཧཱ། ཅེས་བརྗོད་ཅིང་མེར་བསྲེག་པའི་དྲི་བསུར་གྱིས་ཚིམ་པར་བྱ། ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ཅེས་སྨོན་ལམ་གདབ། སྤྲོ་ན། ཁ་དོག་དབྱིབས་ལེགས་སོགས་རྒྱས་པར་སྦྱར། ། ༈ བྱང་བུ་བསྲེག་པའི་ཚེ། ཚེ་ལས་འདས་པའི་རྣམ་ཤེས་ཧཱུྃ་གི་རྣམ་པས་རྩལ་བོ་ཆེས་མདའ་འཕང་བ་ལྟར་རྣམ་གྲོལ་དབུགས་ཆེན་འབྱིན་པ་ལྔའི་ཞིང་དུ་སོང་ནས་རྒྱལ་བའི་སྲས་སུ་གྱུར་ཏེ་སངས་རྒྱས་པར་གྱུར་པའི་མོས་པས། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཞེས་བརྗོད། སླར་ཡང་དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་ཀ་ནས་ཡེ་ཤེས་འོད་ཟེར་བྱུང་བས་ཚེ་འདས་ཀྱི་ཕུང་ཁམས་སྐྱེ་མཆེད་འཁོར་བའི་ཆོས་ཐམས་ཅད་དམིགས་མེད་ཀ་དག་གི་དབྱིངས་སུ་སྦྱངས་པར་གྱུར་པའི་མོས་པས། ཧོཿ གསོན་ཅིག་དགོངས་ཤིག་རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་རིགས་ལྔའི་མེ་སྦར་རོ། །འབྱུང་བ་ལྔ་ཡི་བུད་ཤིང་ལ། །གཤེགས་མ་ལྔ་ཡི་མེ་སྦར་རོ། །རྣམ་ཤེས་བརྒྱད་ཀྱི་བུད་ཤིང་ལ། །སེམས་དཔའ་བརྒྱད་ཀྱི་མེ་སྦར་རོ། །སྐྱེ་མཆེད་དྲུག་གི་བུད་ཤིང་ལ། །ཐུབ་པ་དྲུག་གི་མེ་སྦར་རོ། །ཡུལ་དང་དབང་པོའི་བུད་ཤིང་ལ། །དག་བྱ་དག་བྱེད་མེ་སྦར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བ་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་པ། །འགྲོ་བའི་དོན་དུ་འགྲུབ་པར་ཤོག །ཅེས་དང་། རྩ་སྔགས་དང་ཡི་གེ་བརྒྱ་པ་བཟླ་བཞིན་མེ་སྦར་བར་བྱའོ། ༈ །གནས་སྦར་བ་ནི། སྦྱང་བྱའི་རྣམ་ཤེས་ཧཱུྃ་གི་རྣམ་པས་རྩལ་བོ་ཆེས་མདའ་འཕང་བ་ལྟར་བདེ་བ་ཅན་གྱི་ཞིང་དུ་སོང་ནས་རྒྱལ་བའི་སྲས་སུ་དབུགས་དབྱུང་བར་གྱུར་པར་བསམ། བྱང་བུ་བསྲེག་པ་ནི། སླར་ཡང་ཡེ་ཤེས་ཀྱི་འོད་ཟེར་མེ་ལྕེ་ལྟ་བུས་ཚེ་འདས་ཀྱི་ཕུང་ཁམས་སྐྱེ་མཆེད་འཁོར་བའི་ཆོས་ཐམས་ཅད་རང་བཞིན་འོད་གསལ་གྱི་དབྱིངས་སུ་བསྲེག་ཅིང་སྦྱངས་པར་གྱུར་པའི་མོས་པ་དང་བཅས། ཆོས་ཀྱི་དབྱིངས་ཀྱི་ཐབ་ཁུང་དུ། །བདག་འཛིན་ཕུང་པོའི་བུད་ཤིང་ལ། །ཤེས་རབ་ཡེ་ཤེས་མེ་སྦར་ཏེ། །ཚེ་འདས་ཉོན་མོངས་བག་ཆགས་བསྲེགས། །ཞེས་དང་། ཨོཾ་ཨ་མི་ཏ་བྷ་ཧྲཱིཿ ཨོཾ་ཨ་རོ་ལི་ཀ྄་ཧཱུྃ། ཨོཾ་ཨ་མི་ཏེ་ཨ་མི་ཏེ། ཨ་མི་ཏོདྦྷ་བེ། ཨ་མི་ཏ་སཾ་བྷ་བེ། ཨ་མི་ཏ་བི་ཀྲནྟེ། ཨ་མི་ཏ་བི་ཀྲནྟོ་ག་མི་ནི་སརྦ་ཀརྨ་ཀླེ་ཤ་ཀྵ་ཡཾ་ཀ་རི་སྭཱ་ཧཱ། ཞེས་བཟླ་བཞིན་དུ་བསྲེགས་ལ། འཁོར་གསུམ་རང་བཞིན་མི་དམིགས་པའི་ཆོས་ཉིད་ལ་མཉམ་པར་བཞག །དེ་ལས་ལྡང་བ་ན། རྗེས་ཐོབ་སྙིང་རྗེ་ཆེན་པོས་མཚམས་སྦྱར་ཏེ། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། ཞེས་སོགས་ཤློ་ཀ་གཉིས་ཀྱིས་སྨོན་ལམ་གདབ། སངས་རྒྱས་སྐུ་གསུམ་བརྙེས་པའི་སོགས་བདེན་པའི་ཚིག་བརྗོད་པས་མཐའ་བརྒྱན་པར་བྱའོ། །དགེའོ། །

[edit]

thugs rje chen po sdug bsngal rang grol gyi sgrub chen dngos gzhi'i skabs kyi 'don 'grigs/ thugs rje chen po sdug bsngal rang grol gyi sgrub chen dngos gzhi'i skabs kyi 'don 'grigs bzhugs so/__oM swasti/__thugs rje chen po sdug bsngal rang grol gyi sgrub chen dngos gzhi'i skabs nyin re bzhin snga chog la/__sngon 'gro tshang ma/__skyabs sems/__yan lag bdun pa/__mtshams lha bskyed chog__/gser skyems/__bgegs gtor srung 'khor nas bstod pa'i bar/__gzhung gi bzlas pa/__nyin gnyis pa man ril bu'i bzlas pa dang rnam bum gyi bzlas pa sbyar/__thun bsdu ran pa na nyin mo'i sngags rgyun pa rnams la gzungs thag gtad nas/__dbyangs gsal rten snying mthar/__rdo rje'i lha mo bcu drug__/gzhung gi bstod pa/__yig brgya gsum/__gsol 'debs zhal mthong ma/__bsang mdor bsdus dang /__tho gsol/__na raka skong bshags/__zhi khro khrom dkrug ltar mar me'i smon lam/__tshogs skong /__bdag 'jug tshogs la rol dus bsam lhun/__phyi rol du cha gsum btang /__lhag ma/__thugs rje chen po'i dkyil 'khor du/__/sogs smon lam 'grub 'phral bzhengs te dkyil 'khor mdun nas kun thub bskul/__byin 'bebs rnga med dril gdangs/__ma Ni'i dzapa? dbyangs gsum/___/__!_phyi thun la thams cad gral la 'khod rjes rgyud 'debs/__skyabs sems nas bzlas pa'i bar las gzhung ltar/__nyin dang po la rtsa ba'i bsnyen pa dang /__gnyis pa man la ril bu'i bsnyen pa gtso bor byed nas spyod lam gyis bar ma chod par sngags rgyun gyi tshul du bzla/__thun bsdu ran pa dang sngags rgyun pa la gzungs thag gtad nas/__dbyangs gsal rten snying /__rdo rje lha mo bcu drug 'don min skabs dang sbyar/__gang ltar yang mchod bstod gsol 'debs/__ma mgon/__gza'/__tshe ring ma/__tshogs/__skong bshags rdo rje'i thol glu dang gzhung gi skong ba bcas/__gnas 'dren byed na 'dir gtong /__tshogs la rol dus myur 'grub tshar gsum/__lhag ma bskul/__gtor 'gugs rjes phrin bcol thub bstan ma/__chad mdo nas/__rta bro bar gzhung ltar/__gtong rag gi mchod bstod rgyas bsdus gang 'os/__dngos grub len chog mi dgos/__nongs bshags man gzhung ltar/__longs yod na dong sprugs smon lam dang bkra shis rgyas pa/__gang ltar yang mthar kun thub bskul/__byin 'bebs rnga brdung dbyangs/__ma Ni'i dzapa? dbyangs mthar grol/___/__!_sngags rgyun mkhan rnams kyis/__tshig bdun gsol 'debs/__dpal ldan rtsa ba'i bla ma sogs sngon du 'gro bas/__brgyud 'debs mthar/__skye ba kun tu sogs/__khyed rnams bstod cing sogs/__skyabs 'gro nas bzlas pa'i bar gzhung ltar/__nyin gnyis pa man la rtsa bsnyen stong phrag__/lha mo bzhi la brgya skor tsam/__ril sgrub dmigs bzlas gtso bor byed/__spyir bzlas pa mgo tshugs pa dang mnyam du gzungs thag bzung dgos/__de'ang mtshan thun la thun bzhir phye ba'i thun dang pos thun gnyis pa len mkhan gyi bsnyen rgyun ma tshugs par bsnyen bar mi chad par bzla/__bsnyen rgyun tshugs pa dang mnyam du de la gzungs thag gtad nas dbyangs gsal rten snying tshar gsum mthar/__gzhung gi mchod bstod yig brgya gsum/__gsol 'debs zhal mthong ma/__tshogs skong lhag ma'i bar/__de nas rjes chog gi mchod bstod bya/__dngos grub len chog mi dgos/__nongs bshags nas bkra shis bar gzhung ltar grub rjes/__nyu le la phur gdab dang /__byin 'bebs sgrub khog ltar gyi rjes/__ma Ni'i dzapa? dbyangs lan gsum byas la grol/__mtshan thun thams cad kyis 'don lugs 'di ltar byed dgos/__mdor na nyin mtshan gyi sngags rgyun mkhan thams cad kyis mngon rtogs dang /__bzlas rgyun gnyis ka bar ma chad pa dgos pas/__snga ma snga mas thun 'jog skabs/__phyi ma phyi ma rnams kyi sngags rgyun ma tshugs bar thun mi bsdu zhing /__sngags rgyun tshugs nas dal bus gzungs thag phyi ma'i slob dpon la gtad nas thun bsdu ba sogs sngags rgyun khor yug tu byed pa shin tu gal che'o/__/mang+ga laM/__!__sems ma bzhi'i sgos sgrub skabs/__nyin zhag gcig la mtshon na thun bzhir dbye ba'i thun dang po la/__rtsa ba'i ril bu'i bzlas pas 'os mtshams rjes gzungs thag shar gyi sgrol ma'i bum pa la gdags pa nas bzung ste/__bum pa lha yi gzhal med khang :__mtshan nyid thams cad yongs rdzogs dbus:__ril bu rje btsun sgrol ma dkar:__phyag g.yas mchog sbyin ut+pal 'dzin:__g.yon pas mnyam bzhag tshe bum can:__zhabs gnyis sems ma'i skyil krung bzhugs:__gsal brtan 'od zer 'bar ba yis:__thugs dam rgyud bskul 'od zer 'phros:__bde gshegs kun gyi dwangs ma'i srog:__brtan g.yo'i khams nas tshe bcud dang :__bla tshe srog dbugs yar ba bkug:__bsgrub bya gtso bo'i thugs srog dbus:__gsal ba la thim tshe bsod rgyas:__oM ma Ni pad+me hU~M hrIH__tA re A yur+dz+nyA na tshe b+h+rU~M nr-i dza swA hA/__zhes gtso bor bzla zhing /__thun bsdu ba na/__'od zer can ma man chad gzhung ltar bsnyen pa cung zad re bzla/__dbyangs gsal rten snying mchod bstod sogs dkyus ltar bya/__de bzhin du thun gnyis pa la/__rtsa ba'i ril sgrub dang /__sgrol ma'i bsnyen pa cung zad rjes gzungs thag lho yi bum par gdags pa nas bzung ste/__bum pa lha yi gzhal med khang :__mtshan nyid thams cad yongs rdzogs dbus:__ril bu 'od zer can ma ni:__zhal gcig phyag gnyis sku mdog ser:__zhabs gnyis dor stabs zhi ma khro:__phyag g.yas rat+na'i nor bu dang :__g.yon pas nyi zla'i zhags pa gdengs:__dar dang rin chen rgyan gyis mdzes:__thugs nas 'od zer 'phros pa yis:__log par 'dren pa'i bkrag mdangs bcud:__sbub chus drangs bzhin bdag la thim:__gzi byin nyi zla lta bur gyur:__khyad par zhags pa g.yug pa yi:__log 'dren dbang bsdus nyi zla gnyis:__cha lang brdabs pa'i bar du btsir:__de'i bkrag mdangs tshe'i lhag ma:__brtan g.yo'i gzi byin stobs dpal kun:__bdag thim gzi byin 'bar bar gyur:__oM ma Ni pad+me hU~M hrIH__AR+YA ma rI ts+yai mAM swA hA/__zhes gtso bor bzla/__thun bsdu ba na/__rig byed ma man chad gzhung ltar cung zad bsnyen pa sogs 'dra/___/__!_thun gsum pa la/__rtsa ba'i ril sgrub bzlas pa dang /__sgrol ma dang /__'od zer can ma'i bsnyen pa cung zad rjes gzungs thag nub kyi bum par gdags pa nas bzung ste/__bum pa lha yi gzhal med khang :__mtshan nyid thams cad yongs rdzogs dbus:__ril bu ku ru ku l+le ni:__zhal gcig phyag bzhi brkyang bskum zhabs:__rtsa phyag pad+ma'i mda' gzhu bkang :__lhag ma rnam gnyis lcags kyu zhags:__stag sham rus rgyan pad phreng ldan:__thug nas 'od zer 'phros pa yis:__brtan g.yo'i dwangs bcud ma lus dang :__khyad par dmigs bya'i tshe bsod dbang :__'od dmar rnam par mer gyis bsdus:__bdag thim gzi byin 'bar bar gyur:__oM ma Ni pad+me hU~M hrIH__ku ru kul+le hrIM hrIM wAM shang ku ru swA hA/__zhes pa dang /__bdag mdun gtso las 'od 'phros pas:__dbang mo'i thugs kar phog pa'i mod:__zag med bde ba chen po'i nyams:__dpag tu med pa 'bar ba las:__thugs dam rgyud bskul de'i thugs nas:__mkha' 'gro yid kyi chom rkun ma:__dmar gsal bkrag dang ldan pa la:__hrIHsgra sgrogs pa tal gyis thon:__pad 'dab 'od kyi sbu gu can:__de yi nang bzhugs shar gyis thon:__pho yi spyi bo mo'i gsang gnas:__lam brgyud snying gi dbus su zhugs:__bkrag mdangs bcud la 'jibs pa yis:__'dod pa g.yos shing brtan pa 'phrog:__shog skya rlung gis btegs pa bzhin:__rang dbang bral te 'dus par gyur/__ces pa'i dmigs pa dang sbyar te sngags ci nus bzlas mthar/__thun bsdu ba na/__nor rgyun ma cung zad bsnyen/__dbyangs gsal rten snying mchod bstod sogs bya/___/__!_thun bzhi pa la/__rtsa ba'i ril sgrub kyi bzlas pa dang /__sgrol ma/__'od zer can/__ku ru ku l+le rnams cung zad bsnyen mthar gzungs thag byang gi bum par gdags pa nas bzung ste/__bum pa lha yi gzhal med khang :__mtshan nyid thams cad yongs rdzogs dbus:__ril bu nor rgyun lha mo ni:__'dod pa 'jo ba'i gter bum steng :__zhal gcig phyag gnyis mnyam stabs bzhengs:__dar dang rin chen rgyan phreng mdzes:__phyag g.yas yid bzhin nor bu dang :__g.yon pas dgos 'byung ne'u le 'dzin:__ljang gsal sems ma'i cha byad can:__gsal rdzogs gzi byin rab 'bar bas:__lha klu drang srong mi'i nor bu:__lcags kyu lta bu'i 'od zer gyis:__bkug nas bdag la stsal ba dang :__zas nor char du 'bebs par gyur:__oM ma Ni pad+me hU~M hrIH__ma ma bA su d+ha ri swA hA/__zhes bzlas/__thun bsdu ba na dbyangs gsal rten snying mchod bstod sogs dkyus ltar ro/___/__!_'dod yon bsngo bar spro na/__dbang bskur ba'i rjes ci 'byor ba'i bza' btung sogs la chab bran/__ra~M ya~M kha~M gis bsang sbyangs/__stong pa'i ngang las lha rdzas dang ting nge 'dzin las grub pa'i 'dod yon gyi dngos po nam mkha' gang bar gyur par bsams la/__oM AHhU~M dang /__na mas sarba ta thA ga ta b+h+yo bi shwa sogs nam mkha' mdzod kyis sngags rgyas brlab/__phyogs dus kun na gzugs sgra dri ro dang /__/reg bya'i khyad par dbang po tshem byed rnams/__/rdo rje sems dpa'i gnas thob khyod la 'bul/__/zag med dga' bdes rtag tu tshim par shog__/oM badz+ra satwa pany+tsa kA ma gu Na pra tIts+tsha swA hA/__ces brjod cing mer bsreg pa'i dri bsur gyis tshim par bya/__thams cad nam mkha'i mdzod bzhin du/__/longs spyod zad pa med par shog__/rtsod pa med cing 'tshe med par/__/rang dbang du ni spyod par shog__/ces smon lam gdab/__spro na/__kha dog dbyibs legs sogs rgyas par sbyar/___/__!_byang bu bsreg pa'i tshe/__tshe las 'das pa'i rnam shes hU~M gi rnam pas rtsal bo ches mda' 'phang ba ltar rnam grol dbugs chen 'byin pa lnga'i zhing du song nas rgyal ba'i sras su gyur te sangs rgyas par gyur pa'i mos pas/_hU~M hU~M hU~M hU~M hU~M zhes brjod/__slar yang dkyil 'khor gyi lha tshogs rnams kyi thugs ka nas ye shes 'od zer byung bas tshe 'das kyi phung khams skye mched 'khor ba'i chos thams cad dmigs med ka dag gi dbyings su sbyangs par gyur pa'i mos pas/_hoH_gson cig dgongs shig rigs kyi bu/__/phung po lnga yi bud shing la/__/rgyal ba rigs lnga'i me sbar ro/__/'byung ba lnga yi bud shing la/__/gshegs ma lnga yi me sbar ro/__/rnam shes brgyad kyi bud shing la/__/sems dpa' brgyad kyi me sbar ro/__/skye mched drug gi bud shing la/__/thub pa drug gi me sbar ro/__/yul dang dbang po'i bud shing la/__/dag bya dag byed me sbar ro/__/lus ngag yid gsum bud shing la/__/rgyal ba sku gsum me sbar ro/__/sku gsum ye shes lnga ldan pa/__/'gro ba'i don du 'grub par shog__/ces dang /__rtsa sngags dang yi ge brgya pa bzla bzhin me sbar bar bya'o/__!_/gnas sbar ba ni/__sbyang bya'i rnam shes hU~M gi rnam pas rtsal bo ches mda' 'phang ba ltar bde ba can gyi zhing du song nas rgyal ba'i sras su dbugs dbyung bar gyur par bsam/__byang bu bsreg pa ni/__slar yang ye shes kyi 'od zer me lce lta bus tshe 'das kyi phung khams skye mched 'khor ba'i chos thams cad rang bzhin 'od gsal gyi dbyings su bsreg cing sbyangs par gyur pa'i mos pa dang bcas/__chos kyi dbyings kyi thab khung du/__/bdag 'dzin phung po'i bud shing la/__/shes rab ye shes me sbar te/__/tshe 'das nyon mongs bag chags bsregs/__/zhes dang /__oM a mi ta b+ha hrIH__oM a ro li ka? hU~M/__oM a mi te a mi te/__a mi tod+b+ha be/__a mi ta saM b+ha be/__a mi ta bi kran+te/__a mi ta bi kran+to ga mi ni sarba karma kle sha k+Sha yaM ka ri swA hA/__zhes bzla bzhin du bsregs la/__'khor gsum rang bzhin mi dmigs pa'i chos nyid la mnyam par bzhag__/de las ldang ba na/__rjes thob snying rje chen pos mtshams sbyar te/__rgyal ba'i dkyil 'khor bzang zhing dga' ba der/_zhes sogs sh+lo ka gnyis kyis smon lam gdab/_sangs rgyas sku gsum brnyes pa'i sogs bden pa'i tshig brjod pas mtha' brgyan par bya'o/__/dge'o/_/