JKW-KABUM-14-PHA-021-003

🚧 This website is under continued development. We appreciate your patience!

Previous Text Back to Volume PageLast text in section.

Wylie title
Location	mkhyen brtse'i bka' 'bum Volume 14, sde tshan 21, Text 3, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	དཔའ་བོ་འོད་གསལ་ (dpa' bo 'od gsal)
Citation	'jam dbyangs mkhyen brtse'i dbang po. yak+sha dzam+b+ha la ljang gu'i gtor 'bul 'dod rgu'i snying po. In 'jam dbyangs mkhyen brtse'i dbang po'i bka' 'bum, Vol. 14: 319-323. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Cycle	གྲུབ་མཆོག་དཔའ་བོ་འོད་གསལ་ལུགས་གྲུབ་ཆེན་བརྒྱད་ཅུ་རྩ་བཞི་ (grub mchog dpa' bo 'od gsal lugs grub chen brgyad cu rtsa bzhi)
Deity	grub chen brgyad cu rtsa bzhi

1 Texts in this Section (sde tshan or chos tshan)

3 346-357	བླ་མ་རྡོ་རྗེ་འཆང་རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི་དང་བཅས་པའི་བྱིན་རླབས་བྱ་ཚུལ་གྲུབ་པ་མཆོག་གི་ཞལ་ལུང་། bla ma rdo rje 'chang rnal 'byor gyi dbang phyug brgyad cu rtsa bzhi dang bcas pa'i byin rlabs bya tshul grub pa mchog gi zhal lung Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

བླ་མ་རྡོ་རྗེ་འཆང་རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི་དང་བཅས་པའི་བྱིན་རླབས་བྱ་ཚུལ་གྲུབ་པ་མཆོག་གི་ཞལ་ལུང་།

༄༅། །བླ་མ་རྡོ་རྗེ་འཆང་རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི་དང་བཅས་པའི་བྱིན་རླབས་བྱ་ཚུལ་གྲུབ་པ་མཆོག་གི་ཞལ་ལུང་ཞེས་བྱ་བ་བཞུགས་སོ།

༅། །ན་མོ་བཛྲ་དྷཱ་རཱ་ཡ། ཤིན་ཏུ་རྣམ་པར་དག་པ་ཡི། །བདེ་སྟོང་མཆོག་གི་རྡོ་རྗེ་འཛིན། །གྲུབ་པའི་དབང་ཕྱུག་རྒྱ་མཚོ་ལ། །ཕྱག་བྱས་དེ་ཡི་བྱིན་རླབས་བཤད། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། ཡིད་དང་མཐུན་པའི་གནས་སུ་སྟེགས་ཀྱི་ཁར། མཎྜལ་ཟླུམ་པོའི་ངོས་སུ་ལྷ་གྲངས་དང་མཉམ་པའི་ཚོམ་བུ་བཀོད་པའི་མཐར་མཆོད་པས་བསྐོར། རང་གི་མདུན་རྡོ་རྗེ་དྲིལ་བུ། ནང་མཆོད། བུམ་པ་བཅུད་ལྡན། ཉེ་ལོགས་སུ་ཚོགས་ཀྱི་འཁོར་ལོའི་ལོངས་སྤྱོད་ཅི་འབྱོར་སོགས་འོག་ཏུ་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་བཤམ། གཉིས་པ་ནི། བྱིན་རླབས་ཀྱི་སྒྲུབ་པ་གཞན་མེད། རང་ཉིད་ཀྱིས་རྒྱུན་དུ་བསྙེན་པའི་བདེ་ཀྱེ་སོགས་ཡི་དམ་གང་རིགས་ཀྱི་བདག་བསྐྱེད་སྔོན་དུ་འགྲོ་བས་དེ་ལ་བརྟེན་པའི་ཚོགས་ཀྱི་འཁོར་ལོ་བྱ། སྐབས་དེའི་ཚོགས་མགྲོན་ལ་གྲུབ་ཆེན་བརྒྱད་ཅུ་རྩ་བཞི་བྱོན་པར་བསམས་ནས་ཚོམ་བུ་ལ་བསྟིམས་ཞིང་ཚོགས་གཏོར་གྱིས་མཆོད། དེ་ནས་སློབ་མ་རྣལ་འབྱོར་བླ་མེད་ཀྱི་དབང་བཞིས་སྨིན་པ་ཅི་རིགས་པ་བོས་ཏེ་ཁྲུས་བྱས། ཆོས་བཤད་ཇི་ལྟར་འཚམས་པའི་རྗེས་སུ། དེ་ལ་རྒྱ་གར་འཕགས་པའི་ཡུལ་དུ་ཆོས་ཀྱི་རྒྱལ་པོ་ཀཉྫི་ཀས་དུར་ཁྲོད་ཆེན་པོ་བསིལ་བའི་ཚལ་དུ་མཁའ་འགྲོ་མ་ཀོ་ཀི་ལ་དང་། དྷརྨ་དེ་བཱི་མཆེད་གཉིས་ངོ་ཆེན་དུ་སྦྲན་ནས་གྲུབ་ཆེན་བརྒྱད་ཅུ་རྩ་བཞིས་སྤྱན་དྲངས་ཏེ་ཚོགས་ཀྱི་འཁོར་ལོས་མཆོད་པ་བྱས་པ་ན། ཐོག་མར་རྣལ་འབྱོར་དབང་ཕྱུག་ལཱུ་ཧི་པ་བྱོན། དེ་ནས་རིམ་པར་བྱོན་ཏེ། མཐར་བྱཱ་ལི་པའི་བར་དུ་བྱོན། རྒྱལ་པོས་གྲུབ་ཐོབ་སོ་སོའི་སྐུ་རེ་བཞེངས། ལོ་རྒྱུས་དང་རྟོགས་བརྗོད་སོ་སོར་བྲིས། དེ་ནས་ཀྱང་རྒྱལ་རབས་བཞིའི་བར་དུ་ཚོགས་འཁོར་ལ་གྲུབ་ཆེན་བརྒྱད་ཅུ་རྩ་བཞི་དངོས་སུ་བྱོན་པར་གྲགས། ཕྱིས་གྲུབ་ཆེན་དཔའ་བོ་འོད་གསལ་གྱིས་ལོ་རྒྱུས་དང་རྟོགས་བརྗོད་ཀྱི་ཡི་གེ་དོ་ཧ་རྣམས་ཕྱོགས་གཅིག་ཏུ་བསྡུས། དེས་བྲམ་ཟེའི་པཎྜི་ཏ་ཀ་མ་ལ་ལ་བཤད། དེས་གྲུབ་ཐོབ་རི་ཁྲོད་པ་ཛ་ཝ་རི་པ་ལ། དེས་མ་ག་དྷཱའི་པཎྜི་ཏ་ཨ་བྷ་ཡ་ད་ན་ཤྲཱི་ལ། དེ་ལས་མེ་ཉག་ཙ་མི་ལོ་ཙཱ་བ་སྨོན་གྲུབ་ཤེས་རབ་ཀྱིས་གསན་ཏེ་བོད་དུ་བསྒྱུར་བ་ནས་བཟུང་བདག་ཅག་གི་དྲིན་ཆེན་རྩ་བའི་བླ་མའི་བར་དུ་བྱོན་པའི་བླ་མ་རྡོ་རྗེ་འཆང་རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི་དང་བཅས་པའི་བྱིན་རླབས་ཟབ་མོ་རྣམས་རིམ་བཞིན་དུ་འབུལ་བའི་སྐབས་སུ་བབས་པ་ལས། བདག་ཉིད་ཀྱིས་བགྱི་བར་འོས་པ་རྣམས་སྔོན་དུ་གྲུབ་ཟིན་ནས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་ཐོག་མར་འཇུག་སྒོ་སྤྱིའི་དབང་རྩ་བའི་བླ་མ་རྡོ་རྗེ་འཆང་གི་བྱིན་རླབས་སྒྲུབ་པའི་སླད་དུ་ཐུགས་དམིགས་འདི་བཞིན་དུ་གནང་བར་ཞུ། ས་ཕྱོགས་འདི་ཉིད་བླ་མ་མངོན་པར་སངས་རྒྱས་པའི་ཞིང་ཁམས་རྣམ་པར་དག་པའི་དབུས་སུ། སེང་གེ་ཆེན་པོ་བརྒྱད་ཀྱིས་བཏེགས་པའི་སྣ་ཚོགས་པདྨ་དང་ཉི་ཟླའི་གདན་གྱི་སྟེང་དུ། ངོ་བོ་བླ་མ་ལ་རྣམ་པ་རིགས་ཐམས་ཅད་ཀྱི་བདག་ཉིད་རྡོ་རྗེ་འཆང་སྔོན་པོ་རྡོ་རྗེ་དང་དྲིལ་བུ་འཛིན་པ། ཡུམ་བཅོམ་ལྡན་འདས་མ་དམར་མོ་གྲི་གུག་དང་ཐོད་པ་འཛིན་པ་ལ་འཁྱུད་ཅིང་། རྡོ་རྗེ་དང་པདྨའི་སྐྱིལ་ཀྲུང་གིས་བཞུགས་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ་ལ་རྩ་བརྒྱུད་ཀྱི་བླ་མ་རྣམས་དང་། དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་ནས་མངོན་སུམ་ལྟ་བུར་བཞུགས་པའི་དྲུང་དུ་གླིང་བཞི་རི་རབ་དང་བཅས་པ་འབུལ་བའི་མོས་པ་མཛོད། ཅེས་བརྗོད་ལ། མཎྜལ་རྒྱས་བསྡུས་ཅི་རིགས་འབུལ་དུ་གཞུག །དེ་ནས་གཤེད་ནས་རལ་གྲི་སྔོ་སངས་པོ་བྱུང་། ཁྱེད་རང་རྣམས་ཀྱི་སྨིན་མཚམས་ནས་ཐོད་པ་བྲེག །དེའི་ནང་དུ་ལུས་བཅུག །རླུང་མེ་ཐོད་པའི་སྒྱེད་བུར་བརྟེན་པའི་འོག་གི་རླུང་གཡོས། མེ་སྦར། རྫས་ཞུ་བའི་མ་དག་པ་ཐམས་ཅད་རླངས་པ་སྔོ་དམར་གྱི་རྣམ་པར་ཕྱིར་ཐོན། ཡེ་ཤེས་ཀྱི་བདུད་རྩི་བཀུག །དམ་ཚིག་གི་བདུད་རྩི་དང་འདྲེས་པས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པ་དེ་ཚོགས་ཀྱི་འཁོར་ལོར་འབུལ་བའི་མོས་པ་ལ་འདིའི་རྗེས་ཟློས་གནང་བར་ཞུ། ཞལ་ཟས་རོ་བརྒྱ་ལྡན་ཞིང་ཡིད་འཕྲོག་པ། །ལེགས་སྦྱར་འདི་ནི་རྒྱལ་བ་སྲས་བཅས་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ཅེས་པ་ཕུལ་དུ་གཞུག །དེ་ནས་རང་ཉིད་ལྷག་པའི་ལྷར་གསལ་བའི་ལུས་ལས་སྤྲོས་པའི་ལྷ་མོའི་ཚོགས་ཀྱིས་གསང་གསུམ་གྱི་ཡོན་ཏན་རྗེས་སུ་དྲན་པའི་བསྔགས་པ་བརྗོད་པའི་མོས་པ་མཛོད་ལ་འདིའི་རྗེས་ཟློས་ལན་གསུམ་གནང་བར་ཞུ། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཅེས་མཆོད་ཅིང་ཕྱག་འཚལ་བས་བླ་མ་རྡོ་རྗེ་འཆང་ཐུགས་དགྱེས་པའི་རྣམ་པར་བཞུགས་པ་ལས། ཐུགས་ཀའི་འོད་ཀྱིས་གདན་གསུམ་ཚང་བའི་དབང་གི་ལྷ་ནམ་མཁའ་གང་བར་སྤྱན་དྲངས་པར་བསམས་ལ། དེ་རྣམས་ལ་གསོལ་བ་གདབ་པ་འདིའི་རྗེས་ཟློས་མཛོད། བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་རང་བཞིན་ཅན་རྣམས་ཀྱིས། །ཁྱེད་ཀྱིས་བདག་ལ་དབང་བསྐུར་སྩོལ། །ཅེས་གསོལ་བ་བཏབ་པས། ནམ་མཁར་བཞུགས་པའི་དབང་གི་ལྷ་དང་སློབ་དཔོན་ལྷན་ཅིག་པས་རིན་པོ་ཆེའི་བུམ་པ་བདུད་རྩིས་གང་བ་ཐོགས་ཏེ་ཁྱེད་རང་རྣམས་ཀྱི་སྤྱི་བོ་ནས་དབང་བསྐུར་བའི་མོས་པ་མཛོད། །བུམ་པ་སྤྱི་བོར་བཞག་ལ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཞེས་བརྗོད་ཅིང་བུམ་ཆུ་བྱིན། དེས་བུམ་པའི་དབང་ཐོབ། ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །བླ་མ་རྡོ་རྗེ་འཆང་ཡབ་ཡུམ་སྙོམས་པར་ཞུགས་པའི་བྱང་ཆུབ་སེམས་ཀྱི་བདུད་རྩི་བྱིན་པའི་མོས་པ་མཛོད། །ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །བདག་གིས་གསང་བའི་དབང་གི་ནི། །སེམས་ཀྱི་རྒྱུན་གྱིས་དབང་བསྐུར་རོ། །ཨོཾ་ཨཱཿཧཱུྃ་ཧོཿ ཞེས་བརྗོད་ཅིང་ནང་མཆོད་ཀྱི་བདུད་རྩི་སྦྱིན། དེས་གསང་བའི་དབང་ཐོབ། ངག་གི་དྲི་མ་དག །ལམ་དང་གཏུམ་མོ་བསྒོམ་པ་ལ་དབང་། འབྲས་བུ་ལོངས་སྤྱོད་རྫོགས་པའི་སྐུའི་ས་བོན་རྒྱུད་ལ་བཞག་པ་ཡིན་ནོ། །སློབ་དཔོན་གྱི་ཐུགས་ཀ་ནས་རིག་མ་ཡིད་དུ་འོང་བ་ཞིག་སྤྲུལ་ཏེ་གཏད་པའི་མོས་པ་མཛོད། །དགའ་སྟེར་གནས་སྟེར་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཁྱེད་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་དག་ཏུ་གྱིས། །ཞེས་པའི་རིག་མ་དང་འདུ་ཤེས་སུམ་ལྡན་གྱིས་སྙོམས་པར་ཞུགས་པས་ཡས་བབས་དང་མས་བརྟན་གྱི་དགའ་བ་བཞི་ཉམས་སུ་མྱོང་བའི་མོས་པ་མཛོད། དེས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ཕོ་ཉའི་ལམ་བསྒོམས་ལ་དབང་། འབྲས་བུ་ཆོས་སྐུ་ཐོབ་པའི་ས་བོན་རྒྱུད་ལ་བཞག་པ་ཡིན་ནོ། །གསུམ་པའི་དུས་ཀྱི་ཡེ་ཤེས་དེ་ཉིད་ཡིད་ཡུལ་དུ་བྱས་ཏེ། བདེ་བས་ཐབས་བྱས་པའི་སྟོང་ཉིད་སོ་སོ་རང་རིག་པའི་ཡེ་ཤེས་ཉམས་སུ་མྱོང་བ་དབང་བཞི་པར་ངོ་སྤྲད་པ་ནི་འདི་ལ་གསན་པས་ཁྱབ་སྟེ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་སྦྱིན་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །དེས་དབང་བཞི་པ་ཐོབ། བག་ཆགས་ཀྱི་དྲི་མ་ཐོབ། ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་ས་བོན་རྒྱུད་ལ་བཞག་པ་ཡིན་ནོ། །མཐར་བླ་མ་རྡོ་རྗེ་འཆང་ཡབ་ཡུམ་ལ་གུས་འདུད་དྲག་པོ་དུང་བ་ཞིག་བྱས་པའི་རྐྱེན་གྱིས་འོད་དུ་ཞུ་སྟེ་ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་བརླབ་པར་མོས་པ་མཛོད། །ཅེས་བརྗོད་ལ་རོལ་མོས་བྱིན་དབབ་བོ། །དེས་འཇུག་སྒོ་སྤྱིའི་དབང་གྲུབ་ནས། གྲུབ་ཆེན་སོ་སོའི་བྱིན་རླབས་ལ། ཐོག་མར་གུ་རུ་ལཱུ་ཧི་པའི་ལོ་རྒྱུས་ནི་ཞེས་མཚམས་སྦྱར་ལ་རྣམ་ཐར་བཀླག །རྣམ་ཐར་དེ་དང་ལྡན་པའི་རྣལ་འབྱོར་གྱི་དབང་ཕྱུག་ལཱུ་ཧི་པའི་བྱིན་རླབ་ཀྱི་སླད་དུ་དམིགས་པ་འདི་བཞིན་མཛོད། །ཅེས་བརྡ་སྦྱར། བསྡུ་ན། ཐོག་མར་རྣལ་འབྱོར་གྱི་དབང་ཕྱུག་ལཱུ་ཧི་པའི་བྱིན་རླབས་ཀྱི་སླད་དུ་དམིགས་པ་འདི་བཞིན་མཛོད་ཅེས་སྦྲེལ། གང་ལྟར་ཡང་། མདུན་གྱི་མཎྜལ་འདི་ཉིད་དུར་ཁྲོད་རོལ་པའི་གཞལ་མེད་ཁང་བཀོད་པ་ཁྱད་པར་འཕགས་པའི་གཞིར་རི་དྭགས་ཀྲྀཥྞ་སཱ་རའི་པགས་པའི་གདན་ལ་རྣལ་འབྱོར་གྱི་དབང་ཕྱུག་ལཱུ་ཧི་པ་རྒྱ་གར་གྱི་རྣལ་འབྱོར་ནུས་ལྡན་གྱི་རྣམ་པ་ཅན་བྱིན་རླབས་ཀྱི་གཟི་བརྗིད་འབར་བ་ལ། ཡི་དམ་ལྷ་ཚོགས། སངས་རྒྱས་བྱང་སེམས་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་བ་མངོན་སུམ་ལྟ་བུར་བཞུགས་པའི་དྲུང་དུ་མཎྜལ་ཞིག་ཕུལ་མཛོད། །ཅེས་མཆོད་པ་དང་། ལུས་ཚོགས་འཁོར་དུ་འབུལ་བ་སྔར་ལྟར་ལ། བསྟོད་པའི་ཁྱད་པར། གང་གི་དྲིན་གྱིས་སོགས་ཀྱི་མཐར། ལཱུ་ཧི་པ་ལ་ཕྱག་འཚལ་ལོ། །ཞེས་གསོལ་བ་བཏབ་པས། མཎྜལ་གྱི་ནང་དུ་བཞུགས་པའི་རྣལ་འབྱོར་གྱི་དབང་ཕྱུག་ཆེན་པོའི་གཡོན་རྐྱང་མ་དང་འབྲེལ་བའི་བྱང་སེམས་དཀར་པོ་སྤྱི་བོའི་སྨིན་མཚམས་ནས་བྱོན། ཁྱེད་རང་རྣམས་ཀྱི་སྤྱི་བོ་ནས་ཞུགས། རྐྱང་མའི་ནང་ཐམས་ཅད་ཁེངས། ལུས་ཀྱི་སྒྲིབ་པ་དག །བུམ་པའི་དབང་ཐོབ། སྐུ་རྡོ་རྗེའི་བྱིན་རླབས་རྒྱུད་ལ་ཞུགས་པའི་མོས་པ་མཛོད། ཡང་གཡས་རོ་མ་དང་འབྲེལ་བའི་བྱང་སེམས་དམར་པོ་མགྲིན་པ་ནས་བྱོན། ཁྱེད་རང་རྣམས་ཀྱི་མགྲིན་པ་ནས་ཞུགས། རོ་མའི་ནང་ཐམས་ཅད་ཁེངས། ངག་གི་སྒྲིབ་པ་དག །གསང་བའི་དབང་ཐོབ། གསུང་རྡོ་རྗེའི་བྱིན་རླབས་རྒྱུད་ལ་ཞུགས་པའི་མོས་པ་མཛོད། ཡང་དབུས་དབུ་མ་དང་འབྲེལ་བའི་བྱང་སེམས་དཀར་དམར་འདྲེས་པ་ཐུགས་ཀ་ནས་བྱོན། ཁྱེད་རང་རྣམས་ཀྱི་སྙིང་གར་ཐིམ། དབུ་མའི་ནང་ཐམས་ཅད་གང་། ཡིད་ཀྱི་དྲི་མ་དག །ཤེས་རབ་ཡེ་ཤེས་ཀྱི་དབང་ཐོབ། ཐུགས་རྡོ་རྗེའི་བྱིན་རླབས་རྒྱུད་ལ་ཞུགས་པའི་མོས་པ་མཛོད། དེ་རྣམས་ནི་འདྲ་བས་འདྲ་བ་ལམ་དུ་བྱེད་པ་མཚོན་བྱེད་བརྡའི་དབང་གསུམ་ཡིན། ད་མཚོན་བྱ་དོན་གྱི་དབང་ནི། མཎྜལ་ན་བཞུགས་པའི་གུ་རུ་ལཱུ་ཧི་པའི་ཞལ་ནས་འདི་སྐད་དུ་གསུངས་པའི་ཐུགས་མོས་གནང་བར་ཞུ། ཞེས་བརྗོད་ལ་རྟོགས་བརྗོད་ཚར་གཅིག་བཀླག །དཔོན་སློབ་གཉིས་ཀས་ཅུང་ཟད་རེ་མཉམ་པར་བཞག་པའི་མཐར། ཞེས་གསུངས་ནས་རྣལ་འབྱོར་གྱི་དབང་ཕྱུག་དེ་ཁྱེད་རང་རྣམས་ལ་གཉིས་སུ་མེད་པར་ཐིམ་པས་ཁྱེད་རང་རྣམས་རྣལ་འབྱོར་གྱི་དབང་ཕྱུག་ལཱུ་ཧི་པའི་སྐུར་གྱུར། ལུས་ངག་ཡིད་གསུམ་གྱི་དྲི་མ་དག །དབང་བཞི་པ་ཐོབ། ཡེ་ཤེས་རྡོ་རྗེའི་བྱིན་རླབས་རྒྱུད་ལ་ཞུགས་པའི་མོས་པ་མཛོད། །དེ་ནས་ཚོམ་བུའམ་མེ་ཏོག་སྤྱི་བོར་བཀོད་ལ། སྤྱིར་རྒྱ་གར་གྲུབ་ཐོབ་བརྒྱད་ཅུ་རྩ་བཞིས་བྱིན་གྱིས་རློབས་ཤིག །ཁྱད་པར་རྣལ་འབྱོར་གྱི་དབང་ཕྱུག་ལཱུ་ཧི་པས་གདུལ་བྱ་སློབ་མ་འདི་རྣམས་ལ་བྱིན་གྱི་རླབས་ཀྱི་བྱིན་གྱིས་རློབས་ཤིག །ཅེས་དང་། ཛཿཧཱུྃ་བཾ་ཧོཿབརྗོད་ཅིང་རོལ་མོ་བྱ། དེས་ལཱུ་ཧི་པའི་བྱིན་རླབས་གྲུབ་པ་ལགས། དེས་རིགས་འགྲེ་སྟེ། དེ་ནས་གྲུབ་ཆེན་ལཱི་ལི་པའི་བྱིན་རླབས་ལ་ཞེས་མཚམས་སྦྱར་ལ། རྣམ་ཐར་དང་། མཚན་དང་རྟོགས་བརྗོད་སོ་སོར་སྦྱར། ཤཱནྟི་བ་སོགས་རབ་བྱུང་གི་རྣམ་པ་ཅན་རྣམས་ལ། མདུན་གྱི་མཎྜལ་འདི་ཉིད་དཀོན་མཆོག་གི་གཙུག་ལག་ཁང་བཀོད་པ་ཁྱད་པར་འཕགས་པར། དགེ་སྦྱོང་གི་ཉེར་སྤྱད་གདིང་བའི་གདན་ལ་པཎ་ཆེན་ཤཱནྟི་པ་རྒྱ་གར་གྱི་པཎྜི་ཏ་སྡོམ་བརྩོན་གྱི་ཆ་བྱད་ཅན། དབང་པོ་ཞི་ཞིང་ཤིན་ཏུ་དུལ་བ་ལ་ཞེས་སོགས་སྦྱར་བར་གསུངས། དེ་ལྟ་བུའི་ཚུལ་གྱིས་བྱཱ་ཡི་བའི་བར་རིམ་པར་གྲུབ་རྗེས། ཆོས་སྲུང་ཡེ་ཤེས་མགོན་པོའི་བྱིན་རླབས་ནི། དེ་ནས་མཐའ་རྟེན་དུ་ཆོས་སྲུང་ཡེ་ཤེས་མགོན་པོའི་བྱིན་རླབས་ཀྱི་སླད་དུ་དམིགས་པ་འདི་བཞིན་མཛོད། །མདུན་གྱི་མཎྜལ་དུར་ཁྲོད་རོལ་པའི་གཞལ་མེད་ཁང་ཆེན་པོའི་ནང་དུ་པདྨ་ཉི་མ་བམ་རོ་བསྣོལ་བའི་གདན་ལ་དཔལ་ཡེ་ཤེས་ཀྱི་མགོན་པོ་གྲི་གུག་ཅན་མངོན་སུམ་དུ་གསལ་བའི་སྤྱན་སྔར་མཎྜལ་ཞིག་འབུལ་མཛོད། །ཅེས་མཎྜལ་དང་ཚོགས་མཆོད་སྔར་ལྟར་ལ། གང་གི་འཕྲུལ་དང་མངོན་པར་རིགས་པའི་དཔལ། །ཉེ་བར་དགོངས་ནས་ཐུབ་པའི་བཀའ་བཞིན་དུ། །བསྟན་པ་རིན་ཆེན་བང་མཛོད་ལེགས་སྐྱོང་བ། །རྡོ་རྗེའི་ཆོས་སྲུང་རྣམས་ལ་ཕྱག་འཚལ་ལོ། །ཞེས་གསོལ་བ་བཏབ་པས། དཔལ་ཡེ་ཤེས་ཀྱི་མགོན་པོའི་གཡོན་རྐྱང་མ་སོགས་ནས། དབང་གསུམ་ཡིན་ཅེས་པའི་བར་སྔར་ལྟར་ལ། དེ་ནས་མཚོན་བྱ་དོན་གྱི་དབང་གི་སླད་དུ་དཔལ་ཡེ་ཤེས་ཀྱི་མགོན་པོ་དེ་ཉིད་ཁྱེད་རང་རྣམས་ལ་གཉིས་སུ་མེད་པར་ཐིམ་པས་ཁྱེད་རང་རྣམས་དཔལ་ཡེ་ཤེས་ཀྱི་མགོན་པོའི་སྐུར་གྱུར་སོགས་དང་། དཔལ་ཡེ་ཤེས་མགོན་པོས་གདུལ་བྱ་སློབ་མ་འདི་རྣམས་སོགས་བརྗོད་པ་ཁྱད་པར་རོ། །དེ་ལྟར་ན་དེ་རྣམས་ཀྱི་སྒོ་ནས་བླ་མ་རྡོ་རྗེ་འཆང་རྣལ་འབྱོར་དབང་ཕྱུག་བརྒྱད་ཅུ་རྩ་བཞིའི་བྱིན་རླབས་མཐའ་རྟེན་དང་བཅས་པ་ལེགས་པར་གསན་པ་ཡིན་པས། དེ་དག་གི་གནས་སྐབས་སུ་ཐོབ་པའི་དམ་ཚིག་དང་སྡོམ་པ་ལ་སྲུང་སྡོམ་ཚུལ་བཞིན་དུ་བགྱི་སྙམ་པས་འདིའི་རྗེས་ཟློས་མཛོད། །གཙོ་བོས་ཇི་ལྟར་སོགས་གཏོང་རག་གི་མཎྜལ་ཕུལ། སླར་ཡང་ལུས་ལོངས་སྤྱོད་འབུལ་སྙམ་པས་འདིའི་རྗེས་ཟློས་མཛོད། །དེང་ནས་བརྩམས་ཏེ་སོགས་དེས་བྱིན་རླབས་ཀྱི་བཀའ་ཟབ་མོ་ལེགས་པར་ཐོབ་པ་ཡིན་པས་རང་གཞན་གྱི་དོན་རྒྱ་ཆེན་པོ་མཛད་པར་ཞུ། །བསོད་ནམས་འདི་ཡིས་སོགས་བརྗོད་ལ་སློབ་མ་རྣམས་རང་གནས་སུ་བཏང་ངོ་། །དེ་ལྟ་བུའི་སྐབས་ཉིན་ཞག་གིས་བར་ཆོད་ན་མཇུག་ཏུ་དམ་ཚིག་ཁས་བླང་མན་བྱ། ཉིན་རྗེས་མར་བདག་བསྐྱེད་དང་ཚོགས་མཆོད་སྔོན་དུ་འགྲོ་བས། མགོར་སེམས་བསྐྱེད་གསལ་གདབ་དང་བཅས་ཏེ་གྲུབ་ཆེན་སོ་སོའི་རྣམ་ཐར་ལ་འཇུག་གོ །གསུམ་པ་རྗེས་ནི། ཚོགས་ལ་རོལ། ལྷག་མ་བཏང་། བདག་བསྐྱེད་ཉེར་བསྡུ་སོགས་འཇུག་གི་བྱ་བ་རྣམས་ཚུལ་བཞིན་དུ་བྱའོ། །གྲུབ་པའི་ཁྱུ་མཆོག་ཆེ་རྣམས་ཀྱི། །བྱིན་རླབས་བྱ་ཚུལ་བཀླགས་ཆོག་ཏུ། །བཀོད་པའི་དགེ་བས་འགྲོ་བ་ཀུན། །གྲུབ་གཉིས་དཔལ་ལ་རོལ་པར་ཤོག །ངེས་པའང་འཇམ་མགོན་ཀུན་དགའ་གྲོལ་མཆོག་དང་། ཆོས་སྨྲ་བ་འཕྲིན་ལས་ཤེས་རབ་སོགས་ཀྱིས་མཛད་པའི་ཡིག་ཆའི་དགོངས་པ་དང་བླ་མའི་ཕྱག་བཞེས་ལྟར། མ་ཧཱ་པཎྜི་ཏ་འཇམ་དཔལ་དགྱེས་པའི་བློ་གྲོས་སོགས་ལས་ཚུལ་འདིའི་བཀའ་དྲིན་ཐོབ་པ་བྱ་བྲལ་བ་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག །

[edit]

bla ma rdo rje 'chang rnal 'byor gyi dbang phyug brgyad cu rtsa bzhi dang bcas pa'i byin rlabs bya tshul grub pa mchog gi zhal lung /_ @#/__/bla ma rdo rje 'chang rnal 'byor gyi dbang phyug brgyad cu rtsa bzhi dang bcas pa'i byin rlabs bya tshul grub pa mchog gi zhal lung zhes bya ba bzhugs so/__

1. /__/na mo badz+ra d+hA rA ya/__shin tu rnam par dag pa yi/__/bde stong mchog gi rdo rje 'dzin/__/grub pa'i dbang phyug rgya mtsho la/__/phyag byas de yi byin rlabs bshad/__/'di la gsum/__sbyor ba/__dngos gzhi/__rjes so/__/dang po ni/__yid dang mthun pa'i gnas su stegs kyi khar/__maN+Dal zlum po'i ngos su lha grangs dang mnyam pa'i tshom bu bkod pa'i mthar mchod pas bskor/__rang gi mdun rdo rje dril bu/__nang mchod/__bum pa bcud ldan/__nye logs su tshogs kyi 'khor lo'i longs spyod ci 'byor sogs 'og tu dgos pa'i yo byad thams cad ma tshang ba med par bsham/__gnyis pa ni/__byin rlabs kyi sgrub pa gzhan med/__rang nyid kyis rgyun du bsnyen pa'i bde kye sogs yi dam gang rigs kyi bdag bskyed sngon du 'gro bas de la brten pa'i tshogs kyi 'khor lo bya/__skabs de'i tshogs mgron la grub chen brgyad cu rtsa bzhi byon par bsams nas tshom bu la bstims zhing tshogs gtor gyis mchod/__de nas slob ma rnal 'byor bla med kyi dbang bzhis smin pa ci rigs pa bos te khrus byas/__chos bshad ji ltar 'tshams pa'i rjes su/__de la rgya gar 'phags pa'i yul du chos kyi rgyal po kany+dzi kas dur khrod chen po bsil ba'i tshal du mkha' 'gro ma ko ki la dang /__d+harma de bI mched gnyis ngo chen du sbran nas grub chen brgyad cu rtsa bzhis spyan drangs te tshogs kyi 'khor los mchod pa byas pa na/__thog mar rnal 'byor dbang phyug lU hi pa byon/__de nas rim par byon te/__mthar byA li pa'i bar du byon/__rgyal pos grub thob so so'i sku re bzhengs/__lo rgyus dang rtogs brjod so sor bris/__de nas kyang rgyal rabs bzhi'i bar du tshogs 'khor la grub chen brgyad cu rtsa bzhi dngos su byon par grags/__phyis grub chen dpa' bo 'od gsal gyis lo rgyus dang rtogs brjod kyi yi ge do ha rnams phyogs gcig tu bsdus/__des bram ze'i paN+Di ta ka ma la la bshad/__des grub thob ri khrod pa dza wa ri pa la/__des ma ga d+hA'i paN+Di ta a b+ha ya da na shrI la/__de las me nyag tsa mi lo tsA ba smon grub shes rab kyis gsan te bod du bsgyur ba nas bzung bdag cag gi drin chen rtsa ba'i bla ma'i bar du byon pa'i bla ma rdo rje 'chang rnal 'byor gyi dbang phyug brgyad cu rtsa bzhi dang bcas pa'i byin rlabs zab mo rnams rim bzhin du 'bul ba'i skabs su babs pa las/__bdag nyid kyis bgyi bar 'os pa rnams sngon du grub zin nas/__da khyed rang rnams kyi ngo skal du gyur pa la thog mar 'jug sgo spyi'i dbang rtsa ba'i bla ma rdo rje 'chang gi byin rlabs sgrub pa'i slad du thugs dmigs 'di bzhin du gnang bar zhu/__sa phyogs 'di nyid bla ma mngon par sangs rgyas pa'i zhing khams rnam par dag pa'i dbus su/__seng ge chen po brgyad kyis btegs pa'i sna tshogs pad+ma dang nyi zla'i gdan gyi steng du/__ngo bo bla ma la rnam pa rigs thams cad kyi bdag nyid rdo rje 'chang sngon po rdo rje dang dril bu 'dzin pa/__yum bcom ldan 'das ma dmar mo gri gug dang thod pa 'dzin pa la 'khyud cing /__rdo rje dang pad+ma'i skyil krung gis bzhugs pa/__dar dang rin po che dang rus pa'i rgyan gyis brgyan pa la rtsa brgyud kyi bla ma rnams dang /__dpa' bo dang rnal 'byor ma'i tshogs bsam gyis mi khyab pas bskor nas mngon sum lta bur bzhugs pa'i drung du gling bzhi ri rab dang bcas pa 'bul ba'i mos pa mdzod/__ces brjod la/__maN+Dal rgyas bsdus ci rigs 'bul du gzhug__/de nas gshed nas ral gri sngo sangs po byung /__khyed rang rnams kyi smin mtshams nas thod pa breg__/de'i nang du lus bcug__/rlung me thod pa'i sgyed bur brten pa'i 'og gi rlung g.yos/__me sbar/__rdzas zhu ba'i ma dag pa thams cad rlangs pa sngo dmar gyi rnam par phyir thon/__ye shes kyi bdud rtsi bkug__/dam tshig gi bdud rtsi dang 'dres pas ye shes kyi bdud rtsi'i rgya mtsho chen por gyur pa de tshogs kyi 'khor lor 'bul ba'i mos pa la 'di'i rjes zlos gnang bar zhu/__zhal zas ro brgya ldan zhing yid 'phrog pa/__/legs sbyar 'di ni rgyal ba sras bcas la/__/dad pas phul bas 'gro ba 'di dag kun/__/'byor ldan ting 'dzin zas la spyod par shog__/ces pa phul du gzhug__/de nas rang nyid lhag pa'i lhar gsal ba'i lus las spros pa'i lha mo'i tshogs kyis gsang gsum gyi yon tan rjes su dran pa'i bsngags pa brjod pa'i mos pa mdzod la 'di'i rjes zlos lan gsum gnang bar zhu/__gang gi drin gyis bde chen nyid/__/skad cig nyid la 'char ba gang /__/bla ma rin chen lta bu'i sku/__/rdo rje can zhabs pad la 'dud/__/ces mchod cing phyag 'tshal bas bla ma rdo rje 'chang thugs dgyes pa'i rnam par bzhugs pa las/__thugs ka'i 'od kyis gdan gsum tshang ba'i dbang gi lha nam mkha' gang bar spyan drangs par bsams la/__de rnams la gsol ba gdab pa 'di'i rjes zlos mdzod/__bcom ldan de bzhin gshegs pa kun/__/bcom ldan bdag nyid chen po rnams/__/thugs rje'i rang bzhin can rnams kyis/__/khyed kyis bdag la dbang bskur stsol/__/ces gsol ba btab pas/__nam mkhar bzhugs pa'i dbang gi lha dang slob dpon lhan cig pas rin po che'i bum pa bdud rtsis gang ba thogs te khyed rang rnams kyi spyi bo nas dbang bskur ba'i mos pa mdzod/__/bum pa spyi bor bzhag la/__ji ltar bltams pa tsam gyis ni/__/lha rnams kyis ni khrus gsol ltar/__/lha yi chu ni dag pa yis/__/de bzhin bdag gis dbang bskur ro/__/oM sarba ta thA ga ta a b+hi She ka te sa ma ya shrI ye hU~M/__zhes brjod cing bum chu byin/__des bum pa'i dbang thob/__lus kyi dri ma dag__/lam bskyed rim bsgom pa la dbang /__'bras bu sprul sku thob pa'i skal ba can du byas pa yin no/__/bla ma rdo rje 'chang yab yum snyoms par zhugs pa'i byang chub sems kyi bdud rtsi byin pa'i mos pa mdzod/__/ji ltar 'das pa'i sangs rgyas kyis/__/byang chub sras rnams dbang bskur ltar/__/bdag gis gsang ba'i dbang gi ni/__/sems kyi rgyun gyis dbang bskur ro/__/oM AHhU~M hoH__zhes brjod cing nang mchod kyi bdud rtsi sbyin/__des gsang ba'i dbang thob/__ngag gi dri ma dag__/lam dang gtum mo bsgom pa la dbang /__'bras bu longs spyod rdzogs pa'i sku'i sa bon rgyud la bzhag pa yin no/__/slob dpon gyi thugs ka nas rig ma yid du 'ong ba zhig sprul te gtad pa'i mos pa mdzod/__/dga' ster gnas ster lha mo ni/__/sna tshogs gzugs can yid 'ong ma/__/khyed cig khyer cig sems dpa' che/__/khyer la mchod pa dag tu gyis/__/zhes pa'i rig ma dang 'du shes sum ldan gyis snyoms par zhugs pas yas babs dang mas brtan gyi dga' ba bzhi nyams su myong ba'i mos pa mdzod/__des shes rab ye shes kyi dbang thob/__yid kyi dri ma dag__/pho nya'i lam bsgoms la dbang /__'bras bu chos sku thob pa'i sa bon rgyud la bzhag pa yin no/__/gsum pa'i dus kyi ye shes de nyid yid yul du byas te/__bde bas thabs byas pa'i stong nyid so so rang rig pa'i ye shes nyams su myong ba dbang bzhi par ngo sprad pa ni 'di la gsan pas khyab ste/__ye shes 'di ni ches phra zhing /__/rdo rje nam mkha'i dkyil lta bu/__/rdul bral mthar sbyin zhi ba nyid/__/khyod rang yang ni de yi pha/__/des dbang bzhi pa thob/__bag chags kyi dri ma thob/__lam phyag rgya chen po bsgom pa la dbang /__'bras bu ngo bo nyid sku thob pa'i sa bon rgyud la bzhag pa yin no/__/mthar bla ma rdo rje 'chang yab yum la gus 'dud drag po dung ba zhig byas pa'i rkyen gyis 'od du zhu ste khyed rang rnams la thim pas rgyud byin gyis brlab par mos pa mdzod/__/ces brjod la rol mos byin dbab bo/__/des 'jug sgo spyi'i dbang grub nas/__grub chen so so'i byin rlabs la/__thog mar gu ru lU hi pa'i lo rgyus ni zhes mtshams sbyar la rnam thar bklag__/rnam thar de dang ldan pa'i rnal 'byor gyi dbang phyug lU hi pa'i byin rlab kyi slad du dmigs pa 'di bzhin mdzod/__/ces brda sbyar/__bsdu na/__thog mar rnal 'byor gyi dbang phyug lU hi pa'i byin rlabs kyi slad du dmigs pa 'di bzhin mdzod ces sbrel/__gang ltar yang /__mdun gyi maN+Dal 'di nyid dur khrod rol pa'i gzhal med khang bkod pa khyad par 'phags pa'i gzhir ri dwags kr-iSh+Na sA ra'i pags pa'i gdan la rnal 'byor gyi dbang phyug lU hi pa rgya gar gyi rnal 'byor nus ldan gyi rnam pa can byin rlabs kyi gzi brjid 'bar ba la/__yi dam lha tshogs/__sangs rgyas byang sems dpa' bo dang rnal 'byor ma'i tshogs bsam gyis mi khyab pas bskor ba mngon sum lta bur bzhugs pa'i drung du maN+Dal zhig phul mdzod/__/ces mchod pa dang /__lus tshogs 'khor du 'bul ba sngar ltar la/__bstod pa'i khyad par/__gang gi drin gyis sogs kyi mthar/__lU hi pa la phyag 'tshal lo/__/zhes gsol ba btab pas/__maN+Dal gyi nang du bzhugs pa'i rnal 'byor gyi dbang phyug chen po'i g.yon rkyang ma dang 'brel ba'i byang sems dkar po spyi bo'i smin mtshams nas byon/__khyed rang rnams kyi spyi bo nas zhugs/__rkyang ma'i nang thams cad khengs/__lus kyi sgrib pa dag__/bum pa'i dbang thob/__sku rdo rje'i byin rlabs rgyud la zhugs pa'i mos pa mdzod/__yang g.yas ro ma dang 'brel ba'i byang sems dmar po mgrin pa nas byon/__khyed rang rnams kyi mgrin pa nas zhugs/__ro ma'i nang thams cad khengs/__ngag gi sgrib pa dag__/gsang ba'i dbang thob/__gsung rdo rje'i byin rlabs rgyud la zhugs pa'i mos pa mdzod/__yang dbus dbu ma dang 'brel ba'i byang sems dkar dmar 'dres pa thugs ka nas byon/__khyed rang rnams kyi snying gar thim/__dbu ma'i nang thams cad gang /__yid kyi dri ma dag__/shes rab ye shes kyi dbang thob/__thugs rdo rje'i byin rlabs rgyud la zhugs pa'i mos pa mdzod/__de rnams ni 'dra bas 'dra ba lam du byed pa mtshon byed brda'i dbang gsum yin/__da mtshon bya don gyi dbang ni/__maN+Dal na bzhugs pa'i gu ru lU hi pa'i zhal nas 'di skad du gsungs pa'i thugs mos gnang bar zhu/__zhes brjod la rtogs brjod tshar gcig bklag__/dpon slob gnyis kas cung zad re mnyam par bzhag pa'i mthar/__zhes gsungs nas rnal 'byor gyi dbang phyug de khyed rang rnams la gnyis su med par thim pas khyed rang rnams rnal 'byor gyi dbang phyug lU hi pa'i skur gyur/__lus ngag yid gsum gyi dri ma dag__/dbang bzhi pa thob/__ye shes rdo rje'i byin rlabs rgyud la zhugs pa'i mos pa mdzod/__/de nas tshom bu'am me tog spyi bor bkod la/__spyir rgya gar grub thob brgyad cu rtsa bzhis byin gyis rlobs shig__/khyad par rnal 'byor gyi dbang phyug lU hi pas gdul bya slob ma 'di rnams la byin gyi rlabs kyi byin gyis rlobs shig__/ces dang /__dzaHhU~M baM hoHbrjod cing rol mo bya/__des lU hi pa'i byin rlabs grub pa lags/__des rigs 'gre ste/__de nas grub chen lI li pa'i byin rlabs la zhes mtshams sbyar la/__rnam thar dang /__mtshan dang rtogs brjod so sor sbyar/__shAn+ti ba sogs rab byung gi rnam pa can rnams la/__mdun gyi maN+Dal 'di nyid dkon mchog gi gtsug lag khang bkod pa khyad par 'phags par/__dge sbyong gi nyer spyad gding ba'i gdan la paN chen shAn+ti pa rgya gar gyi paN+Di ta sdom brtson gyi cha byad can/__dbang po zhi zhing shin tu dul ba la zhes sogs sbyar bar gsungs/__de lta bu'i tshul gyis byA yi ba'i bar rim par grub rjes/__chos srung ye shes mgon po'i byin rlabs ni/__de nas mtha' rten du chos srung ye shes mgon po'i byin rlabs kyi slad du dmigs pa 'di bzhin mdzod/__/mdun gyi maN+Dal dur khrod rol pa'i gzhal med khang chen po'i nang du pad+ma nyi ma bam ro bsnol ba'i gdan la dpal ye shes kyi mgon po gri gug can mngon sum du gsal ba'i spyan sngar maN+Dal zhig 'bul mdzod/__/ces maN+Dal dang tshogs mchod sngar ltar la/__gang gi 'phrul dang mngon par rigs pa'i dpal/__/nye bar dgongs nas thub pa'i bka' bzhin du/__/bstan pa rin chen bang mdzod legs skyong ba/__/rdo rje'i chos srung rnams la phyag 'tshal lo/__/zhes gsol ba btab pas/__dpal ye shes kyi mgon po'i g.yon rkyang ma sogs nas/__dbang gsum yin ces pa'i bar sngar ltar la/__de nas mtshon bya don gyi dbang gi slad du dpal ye shes kyi mgon po de nyid khyed rang rnams la gnyis su med par thim pas khyed rang rnams dpal ye shes kyi mgon po'i skur gyur sogs dang /__dpal ye shes mgon pos gdul bya slob ma 'di rnams sogs brjod pa khyad par ro/__/de ltar na de rnams kyi sgo nas bla ma rdo rje 'chang rnal 'byor dbang phyug brgyad cu rtsa bzhi'i byin rlabs mtha' rten dang bcas pa legs par gsan pa yin pas/__de dag gi gnas skabs su thob pa'i dam tshig dang sdom pa la srung sdom tshul bzhin du bgyi snyam pas 'di'i rjes zlos mdzod/__/gtso bos ji ltar sogs gtong rag gi maN+Dal phul/__slar yang lus longs spyod 'bul snyam pas 'di'i rjes zlos mdzod/__/deng nas brtsams te sogs des byin rlabs kyi bka' zab mo legs par thob pa yin pas rang gzhan gyi don rgya chen po mdzad par zhu/__/bsod nams 'di yis sogs brjod la slob ma rnams rang gnas su btang ngo /__/de lta bu'i skabs nyin zhag gis bar chod na mjug tu dam tshig khas blang man bya/__nyin rjes mar bdag bskyed dang tshogs mchod sngon du 'gro bas/__mgor sems bskyed gsal gdab dang bcas te grub chen so so'i rnam thar la 'jug go_/gsum pa rjes ni/__tshogs la rol/__lhag ma btang /__bdag bskyed nyer bsdu sogs 'jug gi bya ba rnams tshul bzhin du bya'o/__/grub pa'i khyu mchog che rnams kyi/__/byin rlabs bya tshul bklags chog tu/__/bkod pa'i dge bas 'gro ba kun/__/grub gnyis dpal la rol par shog____/nges pa'ang 'jam mgon kun dga' grol mchog dang /_chos smra ba 'phrin las shes rab sogs kyis mdzad pa'i yig cha'i dgongs pa dang bla ma'i phyag bzhes ltar/____ma hA paN+Di ta 'jam dpal dgyes pa'i blo gros sogs las tshul 'di'i bka' drin thob pa bya bral ba mkhyen brtse'i dbang pos bris pa dge legs su gyur cig___/