JKW-KABUM-13-PA-023-013

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 13, sde tshan 23, Text 13, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 13: . Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

13 527-530	རྟ་མཆོག་རོལ་པ་གསང་སྒྲུབ་ཀྱི་རྒྱུན་ཁྱེར་གྲུབ་གཉིས་དཔལ་སྟེར། rta mchog rol pa gsang sgrub kyi rgyun khyer grub gnyis dpal ster Daily Practice - rgyun khyer   ·   Lineage Supplications - brgyud 'debs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྟ་མཆོག་རོལ་པ་གསང་སྒྲུབ་ཀྱི་རྒྱུན་ཁྱེར་གྲུབ་གཉིས་དཔལ་སྟེར། རྟ་མཆོག་རོལ་པ་གསང་སྒྲུབ་ཀྱི་རྒྱུན་ཁྱེར་གྲུབ་གཉིས་དཔལ་སྟེར་ཅེས་བྱ་བ་བཞུགས་སོ། །ན་མོ་གུ་རུ་ཧ་ཡ་གྲཱི་བཱ་ཡ། རྟ་མཆོག་རོལ་པ་གསང་སྒྲུབ་ཀྱི་རྣལ་འབྱོར་ཟབ་མོ་མདོར་བསྡུས་ཏེ་ཉམས་སུ་བླང་པའི་ཚུལ་ལ། སྐྱབས་སེམས་ནི། །བདག་སོགས་འགྲོ་ཀུན་དེང་ནས་བྱང་ཆུབ་བར། །རྩ་གསུམ་ལྷ་ཚོགས་རྣམས་ལ་སྐྱབས་སུ་མཆི། །གཞན་དོན་རྫོགས་པའི་སངས་རྒྱས་ཐོབ་བྱའི་ཕྱིར། །དབང་ཆེན་རྟ་མཆོག་རོལ་པ་བསྒོམ་པར་བགྱི། ལན་གསུམ། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། དངོས་གཞི་ནི། །འོད་གསལ་སྟོང་ཉིད་དབྱིངས་ལས་རིག་པའི་རྩལ། །སྣ་ཚོགས་པདྨ་ཉི་མའི་གདན་གྱི་སྟེང་། །རང་ཉིད་སྐད་ཅིག་རྟ་མཆོག་རོལ་པའི་སྐུ། །དམར་ལྗང་དཀར་བའི་ཞལ་གསུམ་ཕྱག་དྲུག་པ། །དབུ་གཙུག་རྟ་མགོ་ལྗང་ནག་རྟ་སྐད་འཚེར། །ཞབས་བརྒྱད་སྦྲུལ་བརྒྱད་བསྣོལ་བའི་སྟེང་དུ་བགྲད། །གཡས་གསུམ་རྡོ་རྗེ་ཁ་ཊཱཾ་རལ་གྲི་དང་། །གཡོན་གསུམ་སྡིགས་མཛུབ་མདུང་ཐུང་རྒྱུ་ཞགས་བསྣམས། །གར་དགུའི་ཉམས་ལྡན་དུར་ཁྲོད་ཆས་ཀྱིས་བརྒྱན། །ཡེ་ཤེས་མེ་ཕུང་འཁྲུགས་པའི་དབུས་ན་རོལ། །མགུལ་གྱི་བུམ་པ་ནས་བཟུང་ལོང་བུ་ཡན། །རང་འདྲའི་ཁྲོ་ཆུང་དཔག་ཏུ་མེད་པས་གཏམས། །ལྷ་ཚོགས་ཞལ་ནས་སྔགས་ཀྱི་སྒྲ་སྒྲོགས་ཤིང་། །འོད་ཟེར་དཔག་ཡས་མཁའ་ཁྱབ་འཕྲོས་པ་ཡིས། །འཕགས་མཆོད་བྱིན་རླབས་དངོས་གྲུབ་རང་ལ་ཐིམ། །འགྲོ་ཀུན་སྒྲིབ་སྦྱངས་བདེ་བའི་དཔལ་ལ་བཀོད། །སྡེ་བརྒྱད་འབྱུང་པོ་བྱད་མ་བརླག་ཅིང་གཟིར། །སྣང་བ་ལྷ་ལ་གྲགས་པ་སྔགས་ཀྱི་སྒྲ། །དྲན་རྟོག་ཀ་དག་ཆོས་སྐུའི་ངོ་བོར་གྱུར། ཨོཾ་ཧྲཱིཿཔདྨ་ནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕ྄ཊ། ཞེས་ཅི་ནུས་དང་། སྔོན་ཏུ་བསྙེན་པ་སོང་བ་ཡིན་ན། སྔགས་ཤམ་དུ་དབང་སྡུད་ཀྱི་སྔགས། ཨོཾ་བཛྲ་དུ་ན་བྷྱོཿཏྲིག་ནན་ཛཿཛཿས་མ་ཡ་སྟྭཾ། ཞེས་དང་། ས་མ་ཡ་ཛཿ །ས་མ་ཡ་ཟློག །ས་མ་ཡ་བྷྱོ༔ ས་མ་ཡ་གཏུབས། ས་མ་ཡ་བྱེར། ས་མ་ཡ་རྦད། ས་མ་ཡ་རྦད་རྦུད་ཕ྄ཊ་ཡ། འབྱུང་པོ་མཱ་ར་ཡ་ཛཿཛཿ ཞེས་པའང་སྦྲེལ་ལ་ཅུང་ཟད་བཟླས། །རྒྱལ་གདོན་ལ་དམིགས་ཀྱིས་བསལ་ན། ཁཾ་རཀྵ་ས་མ་ཡ་ཛཿ ཞེས་སོགས་ས་མ་ཡ་ཐམས་ཅད་ཀྱི་མགོར་ཁཾ་རཀྵ་སྦྱར་བའང་བཟླའོ། །ཐུན་མཐར་དབྱངས་གསལ་རྟེན་འབྲེལ་སྙིང་པོས་སྔགས་ཀྱི་ལྷག་ཆད་བསྐང་ཞིང་བརྟན་པར་བྱ། སྣང་ཆའི་ལྷ་སྐུ་འོད་གསལ་དབྱིངས་སུ་ཐིམ། །སླར་ཡང་སྐད་ཅིག་རྟ་མཆོག་རོལ་པར་གྱུར། །དགེ་འདིས་བདུད་སྡེའི་གཡུལ་ལས་རྣམ་རྒྱལ་ནས། །པདྨ་གར་དབང་གྲུབ་པའི་ས་ཐོབ་ཤོག །ཅེས་སོགས་བསྔོ་སྨོན་ཤིས་བརྗོད་ཀྱིས་མཚམས་སྦྱར་ཏེ་ཐུན་མཚམས་ཀྱི་བྱ་བ་ལ་འཇུག །གཏོར་མ་འབུལ་ན། བསང་སྦྱང་། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་གསུམ་ཞུ་བ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ། རང་གི་སྙིང་ག་ནས་འོད་ཟེར་འཕྲོས་པས་དཔལ་རྟ་མགྲིན་ལ་རྩ་གསུམ་ཆོས་སྲུང་རྒྱ་མཚོས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿ དེ་རྣམས་ཀྱི་ལྗགས་རྡོ་རྗེའི་སྦུ་གུ་གཏོར་མ་ལ་ཟུག་ནས་གསོལ་བར་བསམས་ལ། རྩ་སྔགས་ཀྱི་མཐར། ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། གྲྀཧྞ་གྲྀཧྞ་བྷུཉྫ་ཧོ། རཀྟ་པི་པ་ཧོ། ས་མ་ཡ་སྭཱ་ཧཱ། ཨོཾ་བཛྲ་པུཥྤེ་ནས། ཤབྡའི་བར་གྱིས་མཆོད། རྒྱལ་བ་ཀུན་གྱི་ཆོས་སྐུ་པདྨའི་གདུང་༔ ཆོས་རྗེ་འོད་དཔག་མེད་པ་རྡོ་རྗེ་ཆོསཿ སྤྱན་རས་གཟིགས་སྤྲུལ་ཧྲཱིཿལས་རྔམ་ཆེན་སྤྲུལ༔ རྟ་མགྲིན་རྟ་སྐད་བཞད་ལ་ཕྱག་འཚལ་ལོ༔ ཞེས་བསྟོད། །རྟ་མཆོག་རོལ་པ་འཁོར་བཅས་རྣམས། །མཆོད་སྦྱིན་གཏོར་མ་སོགས་ཀྱིས་འདོད་དོན་གསོལ། རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་སོགས་སྤྱི་ལྟར་བྱའོ། །བསྙེན་བ་བྱེད་ན། ཇི་སྐད་བཤད་པའི་རྣལ་འབྱོར་ཐུན་བཞིའི་རིམ་པས་རྩ་སྔགས་རབ་འབྲུ་འབུམ། འབྲིང་བཞི་འབུམ། ཐ་མ་འབུམ་ཕྲག་གསུམ་བཟླ་བ་དང་། སྔགས་གསུམ་པོ་སྦྲེལ་བའང་ཞག་གསུམ་སོགས་ཅི་རིགས་པ་བཟླ། ཕྱི་ཐུན་གྱི་མཇུག་ཏུ་གཏོར་མ་འབུལ། ཁ་སྐོང་ཞི་བའི་སྦྱིན་སྲེག་བྱ་བའམ། མ་གྲུབ་ན་ཡི་གེ་བརྒྱ་པ་ཁྲི་ཕྲག་སོགས་ཅི་ནུས་བཟླས་པས་ཀྱང་རུང་ངོ་། །ཞེས་པའང་གཏེར་གཞུང་རྩ་བ་གསལ་བྱེད་དང་བཅས་པའི་དགོངས་དོན་ཇི་ལྟ་བར་བྱ་བྲལ་བ་མཁྱེན་བརྩེའི་དབང་པོས་ཉུང་གསལ་སྙིང་པོར་དྲིལ་ཏེ་སྦྱར་བ་སིདྡྷིར་སྟུ།། །། ༈

[edit]

rta mchog rol pa gsang sgrub kyi rgyun khyer grub gnyis dpal ster/_ rta mchog rol pa gsang sgrub kyi rgyun khyer grub gnyis dpal ster ces bya ba bzhugs so/__/na mo gu ru ha ya grI bA ya/__rta mchog rol pa gsang sgrub kyi rnal 'byor zab mo mdor bsdus te nyams su blang pa'i tshul la/__skyabs sems ni/__/bdag sogs 'gro kun deng nas byang chub bar/__/rtsa gsum lha tshogs rnams la skyabs su mchi/__/gzhan don rdzogs pa'i sangs rgyas thob bya'i phyir/__/dbang chen rta mchog rol pa bsgom par bgyi/__lan gsum/__sems can thams cad bde ba dang sogs tshad med bzhi bsgom/__dngos gzhi ni/__/'od gsal stong nyid dbyings las rig pa'i rtsal/__/sna tshogs pad+ma nyi ma'i gdan gyi steng /__/rang nyid skad cig rta mchog rol pa'i sku/__/dmar ljang dkar ba'i zhal gsum phyag drug pa/__/dbu gtsug rta mgo ljang nag rta skad 'tsher/__/zhabs brgyad sbrul brgyad bsnol ba'i steng du bgrad/__/g.yas gsum rdo rje kha TAM ral gri dang /__/g.yon gsum sdigs mdzub mdung thung rgyu zhags bsnams/__/gar dgu'i nyams ldan dur khrod chas kyis brgyan/__/ye shes me phung 'khrugs pa'i dbus na rol/__/mgul gyi bum pa nas bzung long bu yan/__/rang 'dra'i khro chung dpag tu med pas gtams/__/lha tshogs zhal nas sngags kyi sgra sgrogs shing /__/'od zer dpag yas mkha' khyab 'phros pa yis/__/'phags mchod byin rlabs dngos grub rang la thim/__/'gro kun sgrib sbyangs bde ba'i dpal la bkod/__/sde brgyad 'byung po byad ma brlag cing gzir/__/snang ba lha la grags pa sngags kyi sgra/__/dran rtog ka dag chos sku'i ngo bor gyur/__oM hrIHpad+ma n+ta kr-ita badz+ra kro d+ha ha ya grI wa hu lu hu lu hU~M pha?T/__zhes ci nus dang /__sngon tu bsnyen pa song ba yin na/__sngags sham du dbang sdud kyi sngags/__oM badz+ra du na b+h+yoHtrig nan dzaHdzaHsa ma ya s+t+waM/__zhes dang /__sa ma ya dzaH_/sa ma ya zlog__/sa ma ya b+h+yo:__sa ma ya gtubs/__sa ma ya byer/__sa ma ya rbad/__sa ma ya rbad rbud pha?T ya/__'byung po mA ra ya dzaHdzaH__zhes pa'ang sbrel la cung zad bzlas/__/rgyal gdon la dmigs kyis bsal na/__khaM rak+Sha sa ma ya dzaH__zhes sogs sa ma ya thams cad kyi mgor khaM rak+Sha sbyar ba'ang bzla'o/__/thun mthar dbyangs gsal rten 'brel snying pos sngags kyi lhag chad bskang zhing brtan par bya/__snang cha'i lha sku 'od gsal dbyings su thim/__/slar yang skad cig rta mchog rol par gyur/__/dge 'dis bdud sde'i g.yul las rnam rgyal nas/__/pad+ma gar dbang grub pa'i sa thob shog__/ces sogs bsngo smon shis brjod kyis mtshams sbyar te thun mtshams kyi bya ba la 'jug__/gtor ma 'bul na/__bsang sbyang /__stong pa'i ngang las oM las rin po che'i snod yangs shing rgya che ba'i nang du oM AHhU~M gsum zhu ba las byung ba'i gtor ma bdud rtsi'i rgya mtsho chen por gyur/__oM AHhU~M lan gsum/__rang gi snying ga nas 'od zer 'phros pas dpal rta mgrin la rtsa gsum chos srung rgya mtshos bskor ba mdun gyi nam mkhar badz+ra sa mA dzaH__de rnams kyi ljags rdo rje'i sbu gu gtor ma la zug nas gsol bar bsams la/__rtsa sngags kyi mthar/__sa pa ri wA ra i daM ba ling+ta kha kha khA hi khA hi/__gr-ih+Na gr-ih+Na b+huny+dza ho/__rak+ta pi pa ho/__sa ma ya swA hA/__oM badz+ra puSh+pe nas/__shab+da'i bar gyis mchod/__rgyal ba kun gyi chos sku pad+ma'i gdung :__chos rje 'od dpag med pa rdo rje chosaH__spyan ras gzigs sprul hrIHlas rngam chen sprul:__rta mgrin rta skad bzhad la phyag 'tshal lo:__zhes bstod/__/rta mchog rol pa 'khor bcas rnams/__/mchod sbyin gtor ma sogs kyis 'dod don gsol/__rten yod na brtan bzhugs dang /__med na gshegs gsol sogs spyi ltar bya'o/__/bsnyen ba byed na/__ji skad bshad pa'i rnal 'byor thun bzhi'i rim pas rtsa sngags rab 'bru 'bum/__'bring bzhi 'bum/__tha ma 'bum phrag gsum bzla ba dang /__sngags gsum po sbrel ba'ang zhag gsum sogs ci rigs pa bzla/__phyi thun gyi mjug tu gtor ma 'bul/__kha skong zhi ba'i sbyin sreg bya ba'am/__ma grub na yi ge brgya pa khri phrag sogs ci nus bzlas pas kyang rung ngo /__/zhes pa'ang gter gzhung rtsa ba gsal byed dang bcas pa'i dgongs don ji lta bar bya bral ba mkhyen brtse'i dbang pos nyung gsal snying por dril te sbyar ba sid+d+hir stu//___//__!_