JKW-KABUM-11-DA-014-014

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 11, sde tshan 14, Text 14, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 11: 241-. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

14 557-568	རྟ་མགྲིན་དམར་པོ་གྲུབ་རྒྱལ་ལུགས་ཀྱི་བྱིན་རླབས་རྗེས་གནང་དང་བཅས་པའི་ཆོ་ག་དངོས་གྲུབ་ཆར་འབེབས། rta mgrin dmar po grub rgyal lugs kyi byin rlabs rjes gnang dang bcas pa'i cho ga dngos grub char 'bebs Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྟ་མགྲིན་དམར་པོ་གྲུབ་རྒྱལ་ལུགས་ཀྱི་བྱིན་རླབས་རྗེས་གནང་དང་བཅས་པའི་ཆོ་ག་དངོས་གྲུབ་ཆར་འབེབས། ༄༅། །རྟ་མགྲིན་དམར་པོ་གྲུབ་རྒྱལ་ལུགས་ཀྱི་བྱིན་རླབས་རྗེས་གནང་དང་བཅས་པའི་ཆོ་ག་དངོས་གྲུབ་ཆར་འབེབས་ཞེས་བྱ་བ་བཞུགས་སོ། །ན་མོ་གུ་རུ་ཤྲཱི་ཧ་ཡ་གྲཱི་བཱ་ཡ། དཔལ་རྟ་མགྲིན་གྲུབ་རྒྱལ་ལུགས་ཀྱི་བྱིན་གྱི་རླབས་པའི་ཆོ་ག་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། འདིའི་བྱིན་རླབས་ཐོབ་ཅིང་དམ་ཚིག་དང་ལྡན་པའི་རྣམས་འབྱོར་པས། གནས་དབེན་པར་སྟེགས་བུའི་ཁར་མཎྜལར་སྣ་ཚོགས་པདྨ་འདབ་མ་བརྒྱད་པའམ། མེ་ཏོག་གི་ཚོམ་བུ་དགུ་བཀོད་པ་ནི་གདན་མཚོན་བྱེད་དང་། དེའི་སྟེང་དུ་མཉྫིའི་ཁར་ལྷ་བསྐྱེད་གཞི་དཔལ་གཏོར་དམར་པོ་རྒྱན་ལྡན་དར་དམར་པོའི་ཅོད་པན་དང་བཅས་པ་བཤམ། མདུན་དུ་འབུལ་གཏོར་ཟླུམ་པོ་དང་། བྱང་ཤར་ནས་བརྩམས་ཏེ་མཚམས་འཛིན་གྱི་མེ་ཏོག་དང་ཆུ་གཉིས་སྔོན་འགྲོའི་ཉེར་སྤྱོད་ཀྱིས་བསྐོར། རང་གི་མདུན་དུ་ནང་མཆོད། རྡོར་དྲིལ། མེ་ཏོག་གི་སྣོད་སོགས་དགོས་པའི་ཡོ་བྱད་ཐམས་ཅད་ཚང་བར་བྱས་ཏེ། མཆོད་པ་བྱིན་རླབས་སྔོན་དུ་འགྲོ་བས་བདག་བསྐྱེད་བཟླས་པ་དང་བཅས་པ་ཚར་ཆེན་རྡོ་རྗེ་འཆང་ཆེན་པོའི་གསུང་ཇི་ལྟ་བ་བཞིན་ཉམས་སུ་བླངས་རྗེས། མདུན་གྱི་གཏོར་མ། ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ། ཀྱིས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཟླ་གམ་སྨུག་ནག་སོགས་ནས། དབུར་བརྒྱན་ཞེས་པའི་བར་རང་ཉིད་ཅེས་དོར་བ་མ་གཏོགས་བདག་བསྐྱེད་ལྟར་བསྐྱེད། མཆོད་པ་བྱིན་གྱིས་བརླབས་ལ། ཨོཾ་ཧ་ཡ་གྲཱི་བ་ས་པ་རི་ཝཱ་ར་ཨརྒྷཾ་ནས་ཤཔྡའི་བར་གྱིས་མཆོད། སྔགས་ལ་ཨོཾ་ཨཱཿཧཱུྃ་བཏགས་པས་ནང་མཆོད་འབུལ། ཧྲཱིཿལས་སྐྱེས་པའི་སོགས་ཀྱིས་བསྟོད། གཏོར་མ་བསང་སྦྱང་བྱིན་རླབས་འབུལ་བ་རྣམས་སྒྲུབ་ཐབས་ལྟར་བྱ། མཆོད་བསྟོད་ཀྱི་རྗེས་སུ། དཔལ་ཆེན་རྟ་མགྲིན་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་འདོད་པའི་དོན་ལ་གསོལ་བ་གདབ། མདུན་བསྐྱེད་ལ་དམིགས་པའི་བཟླས་པ་ཅུང་ཟད་བྱའོ། །གཉིས་པ་དངོས་གཞི་ནི། སྣོད་དུ་རུང་བའི་སློབ་མ་རྣམས་ཁྲུས་བྱས། ཕྱག་དར་འཇུག་པའི་ཡོན་ཕུལ། རང་རང་གི་གྲལ་དུ་སྙིམས་པ་མེ་ཏོག་དང་བཅས་ཏེ་འཁོད་པ་ལ། སློབ་དཔོན་གྱིས་སེམས་བསྐྱེད་གསལ་འདེབས་སོགས་སྔོན་དུ་འགྲོ་བས། དེ་ལ་དུས་གསུམ་གྱི་རྒྱལ་བ་སྲས་དང་བཅས་པའི་སྙིང་རྗེ་ཆེན་པོའི་ཡེ་ཤེས་གཅིག་ཏུ་བསྡུས་པའི་རང་གཟུགས་འཕགས་མཆོག་སྤྱན་རས་གཟིགས་དབང་ཕྱུག་ཉིད་གདུལ་བྱ་གདུག་ཅིང་གཏུམ་པ་རྣམས་རྗེས་སུ་བཟུང་བའི་ཕྱིར་དཔལ་རྟ་མགྲིན་གྱི་སྐུར་བཞེངས་པ་ལ། རྒྱུད་དང་མན་ངག་རྣམས་ནས་སྒྲུབ་པའི་ཐབས་བསམ་གྱིས་མི་ཁྱབ་པ་ཞིག་གསུངས་པ་ལས། འདིར་སྐབས་སུ་བབས་པ་ནི། ཚེ་གཅིག་ལུས་གཅིག་ཁོ་ནས་འཇའ་ལུས་རྡོ་རྗེའི་གོ་འཕང་མངོན་སུམ་དུ་བརྙེས་པ་རྣལ་འབྱོར་གྱི་དབང་ཕྱུག་རས་ཆུང་རྡོ་རྗེ་གྲགས་པས་ཡེ་ཤེས་ཀྱི་མཁའ་འགྲོ་མ་གྲུབ་པའི་རྒྱལ་མོ་ལས། ཐུགས་རྗེ་ཆེན་པོ་ལ་བརྟེན་ནས་བྱང་ཆུབ་སྒྲུབ་པ། ཚེ་དཔག་མེད་ལ་བརྟེན་ནས་ཚེ་སྒྲུབ་པ། དཔལ་རྟ་མགྲིན་ལ་བརྟེན་ནས་བར་ཆད་སེལ་བ་སྟེ་ཁྱད་པར་གྱི་གདམས་སྐོར་གསུམ་གསན་པའི་ཕྱི་མ། རྒྱུད་སྡེ་ཆེན་པོ་བཞིའི་ནང་ཚན་རྣལ་འབྱོར་བླ་མེད་མ་རྒྱུད་པདྨ་གར་དབང་གི་རིགས་སུ་གཏོགས་པ་དཔལ་རྟ་མགྲིན་དམར་པོ་དཔའ་བོ་གཅིག་པའི་བྱིན་རླབས་རྗེས་གནང་གི་རིམ་པ་ཟབ་མོ་ཞུ་བའི་ཡོན་དུ་མཎྜལ་ཕུལ། མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་ཕུང་པོ་ཅན་སོགས། རྒྱུད་དག་པར་བྱ་བའི་སླད་དུ། མདུན་གྱི་ནམ་མཁའི་གནས་སུ་དཔལ་རྟ་མགྲིན་ལ། རྩ་བརྒྱུད་ཀྱི་བླ་མ། ཡི་དམ་ལྷ་ཚོགས། སངས་རྒྱས་བྱང་སེམས་དཔག་ཏུ་མེད་པས་བསྐོར་བ་ཏིལ་གྱི་གོང་བུ་ཁ་ཕྱེ་བ་བཞིན་མངོན་སུམ་དུ་ཁྲ་ལམ་མེར་བཞུགས་པའི་སྤྱན་སྔར་རང་དང་གཞན་གྱི་སྡིག་པ་བཤགས་པ་ལ་སོགས་པ་ཡན་ལག་བདུན་དང་ལྡན་པའི་སྒོ་ནས་བྱང་ཆུབ་མཆོག་ཏུ་སེམས་བསྐྱེད་པ་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་བདག་སྐྱབས་མཆི་སོགས། དེ་ནས་དངོས་གཞིའི་བྱིན་རླབས་དང་རྗེས་སུ་གནང་བའི་རིམ་པ་ནི་འདི་ཉིད་ཀྱི་གཞུང་གྲུབ་པའི་རྒྱལ་མོས་མཛད་པ་ལས། སློབ་མའི་བར་ཆད་སྲུང་བའི་ཕྱིར། གཏོར་མས་བྱིན་གྱིས་བརླབ་པ་ནི། ཨོཾ་ཨཱཿཧཱུྃ། སྐུ་གསུང་ཐུགས་རྣམས་བསྟིམ་པ་དང་། །ལྷ་དང་སྔགས་ཀྱི་རྗེས་གནང་བྱ། །ཞེས་གསུངས་པ་ལྟར་ཐོག་མར་སྐུ་གསུང་ཐུགས་ཀྱི་བྱིན་གྱིས་བརླབ་པའི་སླད་དུ། མདུན་གྱི་གཏོར་མ་འདི་ཉིད་དཔལ་རྟ་མགྲིན་དངོས་སུ་གསལ་བའི་དཔྲལ་བ་ནས་ཨོཾ་དཀར་པོ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་སྤྱི་བོར་ཐིམ་པས་ལུས་ཀྱི་ནང་ཐམས་ཅད་གང་། ལུས་ཀྱི་སྒོ་ནས་བསགས་པའི་སྡིག་སྒྲིབ་བར་ཅད་ཐམས་ཅད་དང་། །དཔལ་རྟ་མགྲིན་གྱི་སྐུའི་བྱིན་རླབས་མ་ལུས་བརྒྱུད་ལ་ཞུགས་པའི་མོས་པ་མཛོད། རྩ་སྔགས་བརྗོད་ཅིང་སྤོས་རོལ་བྱ། ཡང་མདུན་བསྐྱེད་ཀྱི་མགྲིན་པ་ནས་ཨཱཿདམར་པོ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་མགྲིན་པར་ཐིམ། ངག་གི་སྒོ་ནས་བསགས་པའི་སྡིག་སྒྲིབ་དང་བར་ཆད་ཐམས་ཅད་དག །དཔལ་རྟ་མགྲིན་གྱི་གསུང་གི་བྱིན་རླབས་མ་ལུས་པ་རྒྱུད་ལ་ཞུགས་པའི་མོས་པ་མཛོད། སྔགས་རོལ་བྱ། སླར་ཡང་མདུན་བསྐྱེད་ཀྱི་ཐུགས་ཀ་ནས་ཧཱུྃ་སྔོན་པོ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་སྙིང་གར་ཐིམ། ཡིད་ཀྱི་སྒོ་ནས་བསགས་པའི་སྡིག་སྒྲིབ་དང་བར་ཆད་ཐམས་ཅད་དག །དཔལ་རྟ་མགྲིན་གྱི་ཐུགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པའི་མོས་པ་མཛོད། སྔགས་རོལ་བྱ། དེ་ནས་ལྷ་དང་སྔགས་ཀྱི་རྗེས་སུ་གནང་བའི་སླད་དུ། སློབ་དཔོན་ལ་དཔལ་རྟ་མགྲིན་དངོས་ཡིན་སྙམ་པའི་མོས་གུས་དྲག་པོ་དུང་བ་ཞིག་མཛད་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ། གཏོར་མ་རྟ་མགྲིན་དུ་གསལ་བ་ཉིད་ཁྱེད་རང་རྣམས་ཀྱི་སྤྱི་བོར་བྱོན་པའི་སྟེང་གི་ནམ་མཁར་རྩ་བརྒྱུད་ཀྱི་བླ་མ། མཐའ་སྐོར་དུ་ཡི་དམ་ལྷ་ཚོགས། སངས་རྒྱས་བྱང་སེམས། དཔའ་བོ་དཔའ་མོ་རྣམས་སྤྲིན་འཐིབས་པ་ལྟར་བཞུགས་ཏེ་རྒྱུད་བྱིན་གྱིས་བརླབས་པའི་མོས་པ་མཛོད། གཏོར་མ་སྤྱི་བོར་བཞག་ལ། བཅོམ་ལྡན་འདས་དཔལ་རྟ་མགྲིན། མ་གཅིག་གྲུབ་པའི་རྒྱལ་མོ། ཏི་ཕུ་གསང་སྔགས་སྡོང་པོ། རས་ཆུང་རྡོ་རྗེ་གྲགས་པ། མི་ལ་བཞད་པ་རྡོ་རྗེ། དྭགས་པོ་ཟླ་འོད་གཞོན་ནུ། ཕག་གྲུ་རྡོ་རྗེ་རྒྱལ་པོ། འབྲི་གུང་འཇིག་རྟེན་མགོན་པོ། སྤྱན་སྔ་གྲགས་པ་འབྱུང་གནས། ཡང་དགོན་པ་ཐུགས་ཀྱི་རྡོ་རྗེ། ཐུགས་སྲས་སྤྱན་སྔ་རིན་ལྡན། ཟུར་ཕུག་པ་རིན་ཆེན་དཔལ་བཟང་། འབར་ར་བ་རྒྱལ་མཚན་དཔལ་བཟང་། རྟོགས་ལྡན་རིན་ཆེན་འཕེལ། འཁྲུལ་ཞིག་ཚུལ་ཁྲིམས་རྒྱལ་མཚན། རིན་ཆེན་མཁྱེན་རབ་མཆོག་གྲུབ། ཀུན་སྤངས་ཆོས་ཀྱི་ཉི་མ། ཚར་ཆེན་བློ་གསལ་རྒྱ་མཚོ། མཁན་ཆེན་གཞོན་ནུ་བློ་གྲོས། ཁྱབ་བདག་དབང་ཕྱུག་རབ་བརྟན། རིན་ཆེན་བསོད་ནམས་མཆོག་གྲུབ། བྱམས་པ་ངག་དབང་ལྷུན་གྲུབ། རྨོར་ཆེན་ཀུན་དགའ་ལྷུན་གྲུབ། གནས་གསར་པ་ལེགས་པའི་འབྱུང་གནས། ས་ཆེན་ཀུན་དགའ་བློ་གྲོས། འཇམ་མགོན་དཔལ་ལྡན་ཆོས་སྐྱོང་། ཀུན་མཁྱེན་འཇིགས་མེད་དབང་པོ། དཀོན་མཆོག་བསྟན་པའི་སྒྲོན་མེ། མཁན་ཆེན་དཀོན་མཆོག་རྒྱལ་མཚན། བདག་ཅག་གི་དཔལ་ལྡན་བླ་མ་དམ་པ་འཇམ་པའི་དབྱངས་དཀོན་མཆོག་བསྟན་པ་རབ་རྒྱས་དཔལ་བཟང་པོའི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས། སངས་རྒྱས་བྱང་སེམས་དཔའ་བོ་དཔའ་མོའི་ཚོགས་དང་བཅས་པ་ཁྱེད་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པའི་སྒོ་ནས། རྡོ་རྗེ་སློབ་མ་འདི་རྣམས་ལ་དུས་ད་ལྟ་ཉིད་དུ་བྱིན་གྱིས་རློབས་ཤིག མྱུར་བ་ཉིད་དུ་བྱིན་གྱིས་རློབས་ཤིག །འདུག་ས་འདི་ཉིད་དུ་བྱིན་གྱིས་རློབས་ཤིག །ནད་གདོན་སྡིག་སྒྲིབ་འགལ་རྐྱེན་བར་ཆད་ཐམས་ཅད་ཞི་བ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། རྩ་སྔགས་ཀྱི་མཐར། ཛཿཧཱུྃ་བྃ་ཧོཿ ཞེས་བརྗོད་པས་དེ་ཐམས་ཅད་འོད་དུ་ཞུ་ནས་ཁྱེད་རང་རྣམས་ལ་ཐིམ་པས། ཁྱེད་རང་རྣམས་སྐད་ཅིག་གིས་དཔལ་རྟ་མགྲིན་གྱི་སྐུར་གྱུར་པ་ནི། སྐུ་མདོག་དམར་པོ་ནས། བདུད་བཞི་མནན་པ། ཟླ་གམ་སྨུག་ནག་མེ་འབར་བའི་ཀློང་དཀྱིལ་དུ་སྣ་ཚོགས་པདྨ་དང་ཉི་མའི་གདན་ལ་མེ་ཕུང་འབར་བའི་དབུས་སུ་གར་གྱི་ཉམས་དགུའི་ཉམས་ཀྱིས་རོལ་པའི་སྟབས་ཀྱིས་བཞུགས་པའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿཡིག་དམར་པོ་གྱེན་དུ་ལངས་པ་ཞིག་གསལ་བཏབ་ནས། སྔགས་ཀྱི་རྗེས་སུ་གནང་བའི་སླད་དུ། སློབ་དཔོན་ལ་གུས་འདུད་མཛད་པས་སློབ་དཔོན་གྱི་ཐུགས་ཀར་ཉི་མའི་སྟེང་དུ་ཧྲཱིཿཡིག་གི་མཐར་སྔགས་ཀྱི་ཕྲེང་བ་གཡས་སྐོར་དུ་གནས་པ་ལས། དེ་འདྲ་བའི་སྔགས་ཕྲེང་གཉིས་པ་མར་མེ་གཅིག་ལས་གཉིས་ཀྱི་རྣམ་པར་ལན་གསུམ་དུ་ཆད་དེ་སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ས་བོན་གྱི་མཐར་དང་པོས་དམ་ཚིག་པའི་ཚུལ་དུ་འཁོད། གཉིས་པས་ཡེ་ཤེས་པའི་ཚུལ་དུ་ཐིམ། གསུམ་པས་རིགས་ཀྱི་བདག་པོས་རྒྱས་འདེབས་པའི་ཚུལ་གྱིས་བརྟན་པར་བྱས་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད། རྩ་སྔགས་ལན་གསུམ། སླར་ཡང་སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་འཐོར་བཞིན་པ་དང་བཅས་པས་འདིའི་རྗེས་ཟློས་ལན་གསུམ་མཛོད། བཅོམ་ལྡན་བདག་ལ་སྩལ་ལགས་ཀྱིས། །བཅོམ་ལྡན་བདག་ལ་བྱིན་གྱིས་རློབས། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱས་ཏེ་སྤྱི་བོར་བཞག་པས་སྙིང་གའི་སྔགས་ཕྲེང་བརྟན་ཅིང་ནུས་ལྡན་དུ་བྱས་པའི་མོས་པ་མཛོད། བཅོམ་ལྡན་འདི་ལ་སྩལ་ལགས་ཀྱིས། །བཅོམ་ལྡན་འདི་ལ་བྱིན་གྱིས་རློབས། །བཅོམ་ལྡན་འདས་ཀྱི་བྱིན་རླབས་ནི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྡོ་རྗེ་སློབ་མ་འདི་རྣམས་ཀྱི་རྒྱུད་ལ་དཔལ་རྟ་མགྲིན་གྱི་གསང་སྔགས་ཀྱི་བྱིན་རླབས་དང་ནུས་མཐུ་མ་ལུས་པ་འཇུག་པར་གྱུར་ཅིག །རྗེས་གཙོ་བོས་མཎྜལ། དེང་ནས་སོགས་སྤྱི་དང་འདྲ། དགེ་བ་བསྔོས་ལ་སློབ་མ་རྣམས་རང་གནས་སུ་བཏང་། གསུམ་པ་རྗེས་ནི། མཆོད་པ་རྣམས་ཁ་གསོས་བསང་སྦྱང་བྱིན་གྱིས་བརླབ། བདག་བསྐྱེད་ལ་དམིགས་པའི་མཆོད་བསྟོད་དང་། ཡི་གེ་བརྒྱ་པ་ལན་གསུམ་གྱིས་ལྷག་ཆད་བསྐང་། མ་འབྱོར་པ་དང་སོགས་ཀྱིས་བཟོད་པར་གསོལ། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། དགེ་བ་འདི་ཡིས་མྱུར་དུ་བདག །དཔལ་ཆེན་རྟ་མགྲིན་འགྲུབ་གྱུར་ནས། །སོགས་བསྔོ་སྨོན་དང་། ཤིས་བརྗོད་སྤྱི་ལྟར་བྱའོ། །གྲུབ་རྒྱལ་ལུགས་ཀྱི་ཚེ་དབང་གི་རྗེས་སུ་འདིའི་བྱིན་རླབས་སྦྲེལ་ནས་ཚེ་རྟ་ཟུང་འབྲེལ་ཞེས་བླ་མ་རྣམས་ཀྱི་ཕྱག་ལེན་དུ་མཛད་པར་སྣང་ངོ་། །བསྙེན་པ་བྱེད་ན། གནས་དབེན་པར་འདི་ཉིད་ཀྱི་བྲིས་སྐུ་ཡོད་ན་དགྲམ་པའི་མདུན་དུ། འབུལ་གཏོར་ཟླུམ་པོ་དང་། མཆོད་པ་བཤམ། བསྙེན་པ་ལ་འཇུག་པའི་ཚུལ་སོགས་བསྙེན་ཡིག་སྤྱི་ལྟར་ལ། ཚད་ནི་གཞུང་ལས། འབུམ་དུ་བཟླས་ན་ལས་ཀུན་བྱེད། །ཅེས་འབྱུང་བས་ཐུན་བཞིའི་རིམ་པས་གྲངས་བསྙེན་རབ་འབྲུ་འབུམ་སྟེ་འབུམ་ཕྲག་བཅོ་ལྔ། འབྲིང་འབུམ་ཕྲག་བཞི། ཐ་མ་འབུམ་ཕྲག་གཅིག་བཟླ། དམིགས་པ་གཙོ་བོར་སྙིང་གའི་སྔགས་ཕྲེང་མེ་འབར་བཞིན་པ་ལ་ཀློག་པའི་ཚུལ་དུ་ཡིད་རྩེ་གཅིག་གཏད། སྐབས་སུ་སྔགས་ཕྲེང་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཁྱད་པར་གནོད་བྱེད་གདུག་པ་ཅན་ཐམས་ཅད་ཚར་བཅད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་དང་ནུས་མཐུ་ཐམས་ཅད་ཚུར་འདུས། སྙིང་གའི་ཧྲཱིཿལ་ཐིམ་པས་བདག་ཉིད་ཀྱི་རྒྱུད་བྱིན་གྱིས་བརླབས་ཏེ་གཟི་བརྗིད་དང་ནུས་སྟོབས་མཆོག་ཏུ་འབར་བར་བསམས་ལ་བཟླ། ཐུན་ཐམས་ཅད་ཀྱི་མཇུག་ཏུ་མཆོད་ཅིང་བསྟོད། བཅོམ་ལྡན་འདས་དཔལ་རྟ་མགྲིན་གྱིས་བདག་དང་སེམས་ཅན་ཐམས་ཅད་ཀྱི་འགལ་རྐྱེན་ནད་གདོན་བར་ཆད་ཐམས་ཅད་ཞི་བ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ། གནས་གསུམ་བསྲུང་། དགེ་བ་བསྔོ་ཞིང་སྨོན་ལམ་གདབ། ཐུན་གཉིས་ཀྱི་མཐར་གཏོར་མ་འབུལ། དེ་ཡང་སྒྲུབ་ཐབས་ཀྱི་དཀྱུས་སུ་བཤད་པ་ལྟར་བདག་བསྐྱེད་ལ་འབུལ་པའམ། མདུན་བསྐྱེད་ལ་འབུལ་བར་སྤྲོ་ན། བྱིན་རླབས་ཀྱི་རྗེས་སུ། རང་གི་སྙིང་ག་ནས་འོད་ཟེར་འཕྲོས་པས་ཁྲོ་བོའི་རྒྱལ་པོ་དཔལ་རྟ་མགྲིན་ལ་བླ་མ་ཡི་དམ་སངས་རྒྱས་བྱང་སེམས་དཔའ་བོ་དཔའ་མོའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿ པདྨ་ཀ་མ་ལཱ་ཡ་སྟྭཾ། གཏོར་འབུལ་སོགས་དཀྱུས་ལྟར། རྗེས་ལྷག་ཆད་ཁ་བསྐང་། ནོངས་པ་བཟོད་གསོལ། རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་བྱ། གནས་གསུམ་སྲུང་བ་སོགས་སྔར་ལྟར་རོ། །དེ་ལྟར་བརྩོན་པས་བར་ཆད་ཐམས་ཅད་ཞི་ཞིང་། དངོས་གྲུབ་རྣམ་པ་གཉིས་ཐོབ་པའི་ཚུལ་བརྒྱུད་ལྡན་བླ་མའི་རྣམ་ཐར་ལས་ཀྱང་མང་དུ་འབྱུང་བས་ཤེས་ལ། ལས་སྦྱོར་གྱི་བཟླས་པ་བྱེད་པར་སྤྲོ་ན། བསྙེན་པ་ཐེམ་ནས། ཐུགས་ཀའི་སྔགས་ཕྲེང་ལས་འོད་ཟེར་ལྕགས་ཀྱུ་དང་ཞགས་པའི་རྣམ་པ་ཅན་དཔག་ཏུ་མེད་པ་འཕྲོས། ལྷ་འདྲེ་མི་གསུམ་ཟས་ནོར་ལོངས་སྤྱོད་སོགས་གང་འདོད་པར་ལྕགས་ཀྱུས་བཏབ། ཞགས་པས་བཅིངས། བདག་གི་མདུན་དུ་བཀུག་ནས་དབང་དུ་འདུས་པར་བསམས་ལ་རྩ་སྔགས་ཉིད་བསྙེན་པའི་བཅུ་ཆ་ཙམ་བཟླ་བར་གསུངས། གཞན་ལས་ཚོགས་འདི་ཉིད་རང་ལ་དམིགས་བསལ་མ་མཐོང་ཡང་། བསྙེན་པ་ཐེམ་ནས་ལས་ཐམས་ཅད་བྱེད་པར་གསུངས་པས་གསང་བ་སྤྱི་དང་། བྱེ་བྲག་རྟ་མགྲིན་གྱི་གཞུང་གཞན་ནས་འབྱུང་བ་བཞིན་ཇི་ལྟར་རིགས་པ་བསྒྲུབ་ཏུ་རུང་བ་ཉིད་དོ། །ཞེས་པའང་རང་གཞན་ལ་ཉེ་བར་མཁོ་བའི་སླད། རྒྱ་གཞུང་དང་ཡིག་རྙིང་གི་དགོངས་དོན་ཚར་ཆེན་ཆོས་ཀྱི་རྒྱལ་པོས་ལེགས་པར་ཕྱེ་བའི་རྗེས་སུ་འབྲངས་ཏེ་མང་དུ་ཐོས་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བ་སྟེ། འདིས་ཀྱང་མཐའ་ཡས་པའི་འགྲོ་ཀུན་ལམ་གྱི་བར་ཆད་ཐམས་ཅད་ཉེ་བར་ཞི་ཞིང་། དངོས་གྲུབ་རྣམ་པ་གཉིས་ལ་དབང་འབྱོར་བའི་རྒྱུར་གྱུར་ཅིག ། ༈

[edit]

rta mgrin dmar po grub rgyal lugs kyi byin rlabs rjes gnang dang bcas pa'i cho ga dngos grub char 'bebs/ @#/_/rta mgrin dmar po grub rgyal lugs kyi byin rlabs rjes gnang dang bcas pa'i cho ga dngos grub char 'bebs zhes bya ba bzhugs so/__/na mo gu ru shrI ha ya grI bA ya/__dpal rta mgrin grub rgyal lugs kyi byin gyi rlabs pa'i cho ga la gsum/__sbyor ba/__dngos gzhi/__rjes so/__/dang po ni/__'di'i byin rlabs thob cing dam tshig dang ldan pa'i rnams 'byor pas/__gnas dben par stegs bu'i khar maN+Dalar sna tshogs pad+ma 'dab ma brgyad pa'am/__me tog gi tshom bu dgu bkod pa ni gdan mtshon byed dang /__de'i steng du many+dzi'i khar lha bskyed gzhi dpal gtor dmar po rgyan ldan dar dmar po'i cod pan dang bcas pa bsham/__mdun du 'bul gtor zlum po dang /__byang shar nas brtsams te mtshams 'dzin gyi me tog dang chu gnyis sngon 'gro'i nyer spyod kyis bskor/__rang gi mdun du nang mchod/__rdor dril/__me tog gi snod sogs dgos pa'i yo byad thams cad tshang bar byas te/__mchod pa byin rlabs sngon du 'gro bas bdag bskyed bzlas pa dang bcas pa tshar chen rdo rje 'chang chen po'i gsung ji lta ba bzhin nyams su blangs rjes/__mdun gyi gtor ma/__oM badz+ra kro d+ha ha ya grI ba hu lu hu lu hU~M phaT/__kyis bsang /__swa b+hA bas sbyang /__stong pa'i ngang las zla gam smug nag sogs nas/__dbur brgyan zhes pa'i bar rang nyid ces dor ba ma gtogs bdag bskyed ltar bskyed/__mchod pa byin gyis brlabs la/__oM ha ya grI ba sa pa ri wA ra ar+g+haM nas shap+da'i bar gyis mchod/__sngags la oM AHhU~M btags pas nang mchod 'bul/__hrIHlas skyes pa'i sogs kyis bstod/__gtor ma bsang sbyang byin rlabs 'bul ba rnams sgrub thabs ltar bya/__mchod bstod kyi rjes su/__dpal chen rta mgrin 'khor bcas rnams/__/mchod sbyin gtor ma 'di bzhes la/__/sogs kyis 'dod pa'i don la gsol ba gdab/__mdun bskyed la dmigs pa'i bzlas pa cung zad bya'o/__/gnyis pa dngos gzhi ni/__snod du rung ba'i slob ma rnams khrus byas/__phyag dar 'jug pa'i yon phul/__rang rang gi gral du snyims pa me tog dang bcas te 'khod pa la/__slob dpon gyis sems bskyed gsal 'debs sogs sngon du 'gro bas/__de la dus gsum gyi rgyal ba sras dang bcas pa'i snying rje chen po'i ye shes gcig tu bsdus pa'i rang gzugs 'phags mchog spyan ras gzigs dbang phyug nyid gdul bya gdug cing gtum pa rnams rjes su bzung ba'i phyir dpal rta mgrin gyi skur bzhengs pa la/__rgyud dang man ngag rnams nas sgrub pa'i thabs bsam gyis mi khyab pa zhig gsungs pa las/__'dir skabs su babs pa ni/__tshe gcig lus gcig kho nas 'ja' lus rdo rje'i go 'phang mngon sum du brnyes pa rnal 'byor gyi dbang phyug ras chung rdo rje grags pas ye shes kyi mkha' 'gro ma grub pa'i rgyal mo las/__thugs rje chen po la brten nas byang chub sgrub pa/__tshe dpag med la brten nas tshe sgrub pa/__dpal rta mgrin la brten nas bar chad sel ba ste khyad par gyi gdams skor gsum gsan pa'i phyi ma/__rgyud sde chen po bzhi'i nang tshan rnal 'byor bla med ma rgyud pad+ma gar dbang gi rigs su gtogs pa dpal rta mgrin dmar po dpa' bo gcig pa'i byin rlabs rjes gnang gi rim pa zab mo zhu ba'i yon du maN+Dal phul/__me tog dang bcas pas thal mo sbyar te gsol ba 'debs pa 'di'i rjes zlos lan gsum mdzod/__kun mkhyen ye shes phung po can sogs/__rgyud dag par bya ba'i slad du/__mdun gyi nam mkha'i gnas su dpal rta mgrin la/__rtsa brgyud kyi bla ma/__yi dam lha tshogs/__sangs rgyas byang sems dpag tu med pas bskor ba til gyi gong bu kha phye ba bzhin mngon sum du khra lam mer bzhugs pa'i spyan sngar rang dang gzhan gyi sdig pa bshags pa la sogs pa yan lag bdun dang ldan pa'i sgo nas byang chub mchog tu sems bskyed pa 'di'i rjes zlos lan gsum mdzod/__dkon mchog gsum la bdag skyabs mchi sogs/__de nas dngos gzhi'i byin rlabs dang rjes su gnang ba'i rim pa ni 'di nyid kyi gzhung grub pa'i rgyal mos mdzad pa las/__slob ma'i bar chad srung ba'i phyir/__gtor mas byin gyis brlab pa ni/__oM AHhU~M/__sku gsung thugs rnams bstim pa dang /__/lha dang sngags kyi rjes gnang bya/__/zhes gsungs pa ltar thog mar sku gsung thugs kyi byin gyis brlab pa'i slad du/__mdun gyi gtor ma 'di nyid dpal rta mgrin dngos su gsal ba'i dpral ba nas oM dkar po dpag tu med pa 'phros/__khyed rang rnams kyi spyi bor thim pas lus kyi nang thams cad gang /__lus kyi sgo nas bsags pa'i sdig sgrib bar cad thams cad dang /__/dpal rta mgrin gyi sku'i byin rlabs ma lus brgyud la zhugs pa'i mos pa mdzod/__rtsa sngags brjod cing spos rol bya/__yang mdun bskyed kyi mgrin pa nas AHdmar po dpag tu med pa 'phros/__khyed rang rnams kyi mgrin par thim/__ngag gi sgo nas bsags pa'i sdig sgrib dang bar chad thams cad dag__/dpal rta mgrin gyi gsung gi byin rlabs ma lus pa rgyud la zhugs pa'i mos pa mdzod/__sngags rol bya/__slar yang mdun bskyed kyi thugs ka nas hU~M sngon po dpag tu med pa 'phros/__khyed rang rnams kyi snying gar thim/__yid kyi sgo nas bsags pa'i sdig sgrib dang bar chad thams cad dag__/dpal rta mgrin gyi thugs kyi byin rlabs ma lus pa rgyud la zhugs pa'i mos pa mdzod/__sngags rol bya/__de nas lha dang sngags kyi rjes su gnang ba'i slad du/__slob dpon la dpal rta mgrin dngos yin snyam pa'i mos gus drag po dung ba zhig mdzad pas/__slob dpon gyi thugs ka nas 'od zer 'phros/__mdun bskyed kyi thugs kar phog pas thugs rgyud bskul te/__gtor ma rta mgrin du gsal ba nyid khyed rang rnams kyi spyi bor byon pa'i steng gi nam mkhar rtsa brgyud kyi bla ma/__mtha' skor du yi dam lha tshogs/__sangs rgyas byang sems/__dpa' bo dpa' mo rnams sprin 'thibs pa ltar bzhugs te rgyud byin gyis brlabs pa'i mos pa mdzod/__gtor ma spyi bor bzhag la/__bcom ldan 'das dpal rta mgrin/__ma gcig grub pa'i rgyal mo/__ti phu gsang sngags sdong po/__ras chung rdo rje grags pa/__mi la bzhad pa rdo rje/__dwags po zla 'od gzhon nu/__phag gru rdo rje rgyal po/__'bri gung 'jig rten mgon po/__spyan snga grags pa 'byung gnas/__yang dgon pa thugs kyi rdo rje/__thugs sras spyan snga rin ldan/__zur phug pa rin chen dpal bzang /__'bar ra ba rgyal mtshan dpal bzang /__rtogs ldan rin chen 'phel/__'khrul zhig tshul khrims rgyal mtshan/__rin chen mkhyen rab mchog grub/__kun spangs chos kyi nyi ma/__tshar chen blo gsal rgya mtsho/__mkhan chen gzhon nu blo gros/__khyab bdag dbang phyug rab brtan/__rin chen bsod nams mchog grub/__byams pa ngag dbang lhun grub/__rmor chen kun dga' lhun grub/__gnas gsar pa legs pa'i 'byung gnas/__sa chen kun dga' blo gros/__'jam mgon dpal ldan chos skyong /__kun mkhyen 'jigs med dbang po/__dkon mchog bstan pa'i sgron me/__mkhan chen dkon mchog rgyal mtshan/__bdag cag gi dpal ldan bla ma dam pa 'jam pa'i dbyangs dkon mchog bstan pa rab rgyas dpal bzang po'i bar du byon pa'i rtsa ba dang brgyud par bcas pa'i dpal ldan bla ma dam pa rnams dang /__yi dam dkyil 'khor gyi lha tshogs/__sangs rgyas byang sems dpa' bo dpa' mo'i tshogs dang bcas pa khyed rnams kyi sku gsung thugs yon tan phrin las mi zad pa'i sgo nas/__rdo rje slob ma 'di rnams la dus da lta nyid du byin gyis rlobs shig__myur ba nyid du byin gyis rlobs shig__/'dug sa 'di nyid du byin gyis rlobs shig__/nad gdon sdig sgrib 'gal rkyen bar chad thams cad zhi ba dang /__mchog dang thun mong gi dngos grub ma lus pa stsal du gsol/__rtsa sngags kyi mthar/__dzaHhU~M ba~M hoH__zhes brjod pas de thams cad 'od du zhu nas khyed rang rnams la thim pas/__khyed rang rnams skad cig gis dpal rta mgrin gyi skur gyur pa ni/__sku mdog dmar po nas/__bdud bzhi mnan pa/__zla gam smug nag me 'bar ba'i klong dkyil du sna tshogs pad+ma dang nyi ma'i gdan la me phung 'bar ba'i dbus su gar gyi nyams dgu'i nyams kyis rol pa'i stabs kyis bzhugs pa'i thugs kar nyi ma'i dkyil 'khor gyi steng du hrIHyig dmar po gyen du langs pa zhig gsal btab nas/__sngags kyi rjes su gnang ba'i slad du/__slob dpon la gus 'dud mdzad pas slob dpon gyi thugs kar nyi ma'i steng du hrIHyig gi mthar sngags kyi phreng ba g.yas skor du gnas pa las/__de 'dra ba'i sngags phreng gnyis pa mar me gcig las gnyis kyi rnam par lan gsum du chad de slob dpon gyi zhal nas thon/__khyed rang rnams kyi zhal du zhugs/__thugs ka'i sa bon gyi mthar dang pos dam tshig pa'i tshul du 'khod/__gnyis pas ye shes pa'i tshul du thim/__gsum pas rigs kyi bdag pos rgyas 'debs pa'i tshul gyis brtan par byas pa'i mos pa dang bcas te sngags 'di'i rjes zlos lan gsum mdzod/__rtsa sngags lan gsum/__slar yang slob dpon la drin lan gyi tshul du me tog 'thor bzhin pa dang bcas pas 'di'i rjes zlos lan gsum mdzod/__bcom ldan bdag la stsal lags kyis/__/bcom ldan bdag la byin gyis rlobs/__slob dpon gyis kyang me tog gi phreng ba sngags su byas te spyi bor bzhag pas snying ga'i sngags phreng brtan cing nus ldan du byas pa'i mos pa mdzod/__bcom ldan 'di la stsal lags kyis/__/bcom ldan 'di la byin gyis rlobs/__/bcom ldan 'das kyi byin rlabs ni/__/'di la 'go bar mdzad du gsol/__/sngags kyi dngos grub stsal du gsol/__/brtul zhugs brtan par mdzad du gsol/__/rdo rje slob ma 'di rnams kyi rgyud la dpal rta mgrin gyi gsang sngags kyi byin rlabs dang nus mthu ma lus pa 'jug par gyur cig__/rjes gtso bos maN+Dal/__deng nas sogs spyi dang 'dra/__dge ba bsngos la slob ma rnams rang gnas su btang /__gsum pa rjes ni/__mchod pa rnams kha gsos bsang sbyang byin gyis brlab/__bdag bskyed la dmigs pa'i mchod bstod dang /__yi ge brgya pa lan gsum gyis lhag chad bskang /__ma 'byor pa dang sogs kyis bzod par gsol/__rang gi dpral bar oM dkar po/__mgrin par AHdmar po/__thugs kar hU~M sngon po/__dge ba 'di yis myur du bdag__/dpal chen rta mgrin 'grub gyur nas/__/sogs bsngo smon dang /__shis brjod spyi ltar bya'o/__/grub rgyal lugs kyi tshe dbang gi rjes su 'di'i byin rlabs sbrel nas tshe rta zung 'brel zhes bla ma rnams kyi phyag len du mdzad par snang ngo /__/bsnyen pa byed na/__gnas dben par 'di nyid kyi bris sku yod na dgram pa'i mdun du/__'bul gtor zlum po dang /__mchod pa bsham/__bsnyen pa la 'jug pa'i tshul sogs bsnyen yig spyi ltar la/__tshad ni gzhung las/__'bum du bzlas na las kun byed/__/ces 'byung bas thun bzhi'i rim pas grangs bsnyen rab 'bru 'bum ste 'bum phrag bco lnga/__'bring 'bum phrag bzhi/__tha ma 'bum phrag gcig bzla/__dmigs pa gtso bor snying ga'i sngags phreng me 'bar bzhin pa la klog pa'i tshul du yid rtse gcig gtad/__skabs su sngags phreng las 'od 'phros/__'phags pa mchod/__sems can gyi don byas/__khyad par gnod byed gdug pa can thams cad tshar bcad/__sangs rgyas dang byang chub sems dpa' thams cad kyi sku gsung thugs yon tan phrin las dang bcas pa'i byin rlabs dang nus mthu thams cad tshur 'dus/__snying ga'i hrIHla thim pas bdag nyid kyi rgyud byin gyis brlabs te gzi brjid dang nus stobs mchog tu 'bar bar bsams la bzla/__thun thams cad kyi mjug tu mchod cing bstod/__bcom ldan 'das dpal rta mgrin gyis bdag dang sems can thams cad kyi 'gal rkyen nad gdon bar chad thams cad zhi ba dang /__mchog dang thun mong gi dngos grub ma lus pa stsal du gsol/__zhes gsol ba gdab/__gnas gsum bsrung /__dge ba bsngo zhing smon lam gdab/__thun gnyis kyi mthar gtor ma 'bul/__de yang sgrub thabs kyi dkyus su bshad pa ltar bdag bskyed la 'bul pa'am/__mdun bskyed la 'bul bar spro na/__byin rlabs kyi rjes su/__rang gi snying ga nas 'od zer 'phros pas khro bo'i rgyal po dpal rta mgrin la bla ma yi dam sangs rgyas byang sems dpa' bo dpa' mo'i tshogs kyis bskor ba mdun gyi nam mkhar oM badz+ra sa mA dzaHsa spyan drang /__dzaHhU~M ba~M hoH__pad+ma ka ma lA ya s+t+waM/__gtor 'bul sogs dkyus ltar/__rjes lhag chad kha bskang /__nongs pa bzod gsol/__rten yod na brtan bzhugs dang /__med na gshegs gsol bya/__gnas gsum srung ba sogs sngar ltar ro/__/de ltar brtson pas bar chad thams cad zhi zhing /__dngos grub rnam pa gnyis thob pa'i tshul brgyud ldan bla ma'i rnam thar las kyang mang du 'byung bas shes la/__las sbyor gyi bzlas pa byed par spro na/__bsnyen pa them nas/__thugs ka'i sngags phreng las 'od zer lcags kyu dang zhags pa'i rnam pa can dpag tu med pa 'phros/__lha 'dre mi gsum zas nor longs spyod sogs gang 'dod par lcags kyus btab/__zhags pas bcings/__bdag gi mdun du bkug nas dbang du 'dus par bsams la rtsa sngags nyid bsnyen pa'i bcu cha tsam bzla bar gsungs/__gzhan las tshogs 'di nyid rang la dmigs bsal ma mthong yang /__bsnyen pa them nas las thams cad byed par gsungs pas gsang ba spyi dang /__bye brag rta mgrin gyi gzhung gzhan nas 'byung ba bzhin ji ltar rigs pa bsgrub tu rung ba nyid do/__/zhes pa'ang rang gzhan la nye bar mkho ba'i slad/__rgya gzhung dang yig rnying gi dgongs don tshar chen chos kyi rgyal pos legs par phye ba'i rjes su 'brangs te mang du thos pa'i bya bral ba 'jam dbyangs mkhyen brtse'i dbang pos sbyar ba ste/__'dis kyang mtha' yas pa'i 'gro kun lam gyi bar chad thams cad nye bar zhi zhing /_dngos grub rnam pa gnyis la dbang 'byor ba'i rgyur gyur cig____/_!