JKW-KABUM-11-DA-013

🚧 This website is under continued development. We appreciate your patience!

Previous Section"DA" is not a number. Back to Volume Page"DA" is not a number.Next Section "DA" is not a number.

Wylie title
Location	mkhyen brtse'i bka' 'bum Volume , sde tshan 13, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum "DA" is not a number.

1 Texts in this Section (sde tshan or chos tshan)

389-401	སྒྲོལ་མའི་མཎྜལ་བཞི་ཆོག་མདོར་བསྡུས་ཕན་བདེའི་ཨུཏྤལ། sgrol ma'i maN+Dal bzhi chog mdor bsdus phan bde'i ut+pal Ritual and Liturgical Texts - cho ga phyag len   ·   Offering Rituals - mchod sbyin	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

"DA" is not a number.

Tibetan Text

Wylie

[edit]

སྒྲོལ་མའི་མཎྜལ་བཞི་ཆོག་མདོར་བསྡུས་ཕན་བདེའི་ཨུཏྤལ།

༄༅། །སྒྲོལ་མ་མཎྜལ་བཞི་པའི་ཆོ་ག་བྱ་ཚུལ་མདོར་བསྡུས་སྙིང་པོར་དྲིལ་བ་ཕན་བདེའི་ཨུཏྤལ་ཞེས་བྱ་བ་བཞུགས་སོ།། །། གང་མཚན་དྲན་པའི་མོད་ཉིད་ནས། །འཇིགས་པ་ཀུན་ལས་དབུགས་འབྱིན་པའི། །མྱུར་མ་དཔའ་མོར་གུས་བཏུད་ནས། །དེ་མཉེས་བྱེད་པའི་ཆོ་ག་བཤད། །དེ་ལ་འདིར་བློ་གྲོས་དང་ལྡན་པ་རྣམས་ཀྱིས་མངོན་པར་མཐོ་བ་དང་། ངེས་པར་ལེགས་པའི་གོ་འཕང་དོན་དུ་གཉེར་བ་ན། ལམ་གྱི་བར་དུ་གཅོད་པ་ཐམས་ཅད་ཐབས་ཁྱད་པར་ཅན་གྱི་སྒོ་ནས་སྲུང་བའི་སླད་དུ་རྗེ་བཙུན་སྒྲོལ་མ་ཡི་དམ་གྱི་ལྷར་བཟུང་ཞིང་། གཉིས་གསུམ་བདུན་དུ་མངོན་པར་བརྗོད་ན། ཞེས་པའི་མན་ངག་ཕྱོགས་གཅིག་པ་མཎྜལ་བཞི་བའི་མཆོད་པ་ཉམས་སུ་བླང་བར་འདོད་པས། རྟེན་གྱི་གང་ཟག་རྒྱུད་དག་པའི་དགེ་སློང་བཞིས་བཏང་ན་ཤིན་ཏུ་བཟང་སྟེ། མ་གྲུབ་ན་རང་གཅིག་པུས་ཀྱང་རུང་། གང་ལྟར་ཡང་གནས་གཙང་ཞིང་ཡིད་དང་མཐུན་ལ་བཀོད་པས་མཛེས་པར་དཀོན་མཆོག་གི་རྟེན་གསུམ་ཇི་ལྟར་རིགས་པ་དང་། ཁྱད་པར་རྗེ་བཙུན་མའི་སྐུ་བྲིས་འབུར་གང་རིགས་རབ་གནས་དང་ལྡན་པའི་སྤྱན་སྔར། སྟེགས་ཀྱི་ཁར་དྲི་བཟང་གིས་བྱུགས་པའི་མཎྜལ་རེ་ཁཱ་གཉིས་སྐོར་དུ་བྲིས་པའི་དབུས་སུ་ཚོམ་བུ་བདུན་བཀོད་པ་བཞི་དང་། གཏོར་མ་འབུལ་ན་ཟླུམ་གཏོར་བཞིའམ་གཅིག །མཆོད་པ་སྣ་ལྔ་ཚར་ལྔ་སོགས་ཇི་ལྟར་འཛོམས་པ་གཙང་སྦྲ་དང་ལྡན་པས་འདུ་བྱས་ནས་ཆོ་ག་དངོས་ལའང་སྔོན་དངོས་རྗེས་གསུམ་ལས། དང་པོ་སྔོན་འགྲོ་ནི། སྒྲུབ་པ་པོ་རྣམས་ཀྱིས་ཆབ་བླངས་བའི་རྗེས་སྟན་བདེ་བ་ལ་འདུག་སྟེ་དགེ་སེམས་ཁྱད་པར་ཅན་གྱི་ངང་མདུན་གྱི་ནམ་མཁར་སྐྱབས་ཡུལ་ཐམས་ཅད་མངོན་སུམ་བཞིན་དུ་བཞུགས་པར་མོས་ལ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་སྐྱབས་སེམས་ཇི་ལྟར་རིགས་པ་བྱ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་ཚད་མེད་བཞི་བསྒོམ། གནས་དང་ཡོ་བྱད་རྣམས་ལ་དམིགས་ཏེ། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་ལས་ཆོས་ཀྱི་དབྱིངས་རང་བཞིན་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འདིར་ཁོར་ཡུག་གི་ས་གཞི་འདི་དག་བདེ་བ་ཅན་གྱི་ཞིང་གི་བཀོད་པ་ལྟ་བུ་ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ་མཛེས་ཤིང་ཡིད་དུ་འོང་བར་གྱུར་པའི་དབུས་སུ་མཆོད་རྫས་རྣམས་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་རྒྱུ་འཇིག་རྟེན་དང་འཇིག་རྟེན་ལས་འདས་པའི་དགེ་བ་ལས་བྱུང་བ། ངོ་བོ་བཟང་ཞིང་གཙང་བ། ཡུལ་ནམ་མཁའི་མཐའ་ཁྱབ་པ། དུས་འཁོར་བ་ཇི་སྲིད་མ་སྟོང་གི་བར་དུ་རྒྱུན་མི་ཆད་པར་སྐྱབས་གནས་དཀོན་མཆོག་རྒྱ་མཚོའི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་བདེན་པའི་སྟོབས་བརྗོད་པས་བྱིན་གྱིས་བརླབ། སྤྲོ་ན། ན་མོ་རཏྣ་ཏྲ་ཡཱ་ཡ། ཨོཾ་ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོདྷི་མཎྜོ་པ་སཾ་ཀྲ་མ་ཎ་བཛྲེ་སརྦ་ཀརྨ་ཨཱ་བ་ར་ཎ་བི་ཤོ་དྷ་ན་བཛྲེ་སྭཱ་ཧཱ། །ཞེས་མཆོད་པའི་སྤྲིན་གྱི་གཟུངས་ལན་གསུམ་བརྗོད་པས་བྱིན་གྱིས་བརླབ། དངོས་གཞི་ནི། མདུན་གྱི་རྟེན་རྣམས་རྗེ་བཙུན་སྒྲོལ་མ་འཁོར་སྒྲོལ་མ་ཉེར་གཅིག་དང་། ཕྱོགས་བཅུ་དུས་གསུམ་གྱི་སྐྱབས་ཡུལ་མ་ཚང་བ་མེད་པས་བསྐོར་བ་མངོན་སུམ་ལྟ་བུར་བཞུགས་པར་མོས་པས། མཎྜལ་དང་པོ་དཀོན་མཆོག་སྤྱི་ལ་འབུལ་བ་ནི། ཐོག་མར། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །ཞེས་ཤློ་ཀ་གཅིག་དང་། མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་གྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །ཞེས་ཤློ་ཀ་གསུམ་རྣམས་ལན་གསུམ་དུ་བརྗོད་ཅིང་། ཤློ་ཀ་རེ་ལ་ཕྱག་རེ་བྱས་མཐར་མེ་ཏོག་འཐོར་ནས་སྟན་ལ་བསྡད། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱི་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མ་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་རྣམས། །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །ཞེས་ཡན་ལག་བདུན་པའི་མཐར། སངས་རྒྱས་ཆོས་ཚོགས་མས་སྐྱབས་སེམས་ལན་གསུམ་བྱས་པ་དང་བདག་གཞན་རྣམས་དཀོན་མཆོག་གསུམ་གྱི་སྐྱབས་འོག་ཏུ་ཚུད་པར་བསམ། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་མཎྜལ་འབུལ། སྐྱབས་གནས་དཀོན་མཆོག་རྒྱ་མཚོ་ཐུགས་རྗེ་ཅན། །བདག་དང་མཐའ་ཡས་སེམས་ཅན་ཐམས་ཅད་ཀྱི། །སྒྲིབ་གཉིས་བྱང་ཞིང་ཚོགས་གཉིས་མྱུར་རྫོགས་ནས། །རྫོགས་པའི་སངས་རྒྱས་ཐོབ་པར་མཛད་དུ་གསོལ། །དེ་མ་ཐོབ་པའི་ཚེ་རབས་ཀུན་ཏུ་ཡང་། །ལྷ་དང་མི་ཡི་བདེ་བ་མཆོག་ཐོབ་ནས། །ཐམས་ཅད་མཁྱེན་པ་སྒྲུབ་པར་བྱེད་པ་ལ། །བར་ཆད་གདོན་བགེགས་རིམས་དང་ནད་ལ་སོགས། །དུས་མིན་འཆི་བར་གྱུར་པ་སྣ་ཚོགས་དང་། །རྨི་ལམ་ངན་དང་མཚན་མ་ངན་པ་དང་། །འཇིགས་པ་བརྒྱད་སོགས་ཉེ་བར་འཚེ་བ་རྣམས། །མྱུར་དུ་ཞི་ཞིང་མེད་པར་མཛད་དུ་གསོལ། །འཇིག་རྟེན་འཇིག་རྟེན་ལས་ནི་འདས་པ་ཡི། །བཀྲ་ཤིས་བདེ་ལེགས་ཕུན་སུམ་ཚོགས་པ་རྣམས། །འཕེལ་ཞིང་རྒྱས་པས་དོན་རྣམས་མ་ལུས་པ། །འབད་མེད་ལྷུན་གྱིས་འགྲུབ་པར་མཛད་དུ་གསོལ། །སྒྲུབ་ལ་བརྩོན་ཞིང་དམ་ཆོས་འཕེལ་བ་དང་། །རྟག་ཏུ་ཁྱེད་སྒྲུབ་ཞལ་མཆོག་མཐོང་བ་དང་། །སྟོང་ཉིད་དོན་རྟོགས་བྱང་སེམས་རིན་པོ་ཆེ། །ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད། །ཅེས་པས་འདོད་པའི་དོན་ལ་གསོལ་བ་རྩེ་གཅིག་ཏུ་གདབ། དེ་ནས་རྗེ་བཙུན་མ་ལ་མཎྜལ་གསུམ་འབུལ་བའི་དང་པོ་ནི། ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །ཞེས་ལན་བདུན་གྱིས་ཕྱག་བྱས་ལ་མེ་ཏོག་འཐོར། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། སོགས་ཀྱིས་མཎྜལ་འབུལ། རྗེ་བཙུན་འཕགས་མ་སྒྲོལ་མ་དང་། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པ། །དངོས་འབྱོར་ཡིད་ཀྱིས་སྤྲུལ་ནས་འབུལ། །འཕགས་མའི་ཚོགས་ཀྱིས་བཞེས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །ཉན་ཐོས་རང་རྒྱལ་བྱང་ཆུབ་སེམས། །སོ་སོ་སྐྱེ་བོ་ལ་སོགས་པའི། །དུས་གསུམ་དགེ་བ་ཅི་བསགས་པ། །བསོད་ནམས་ལ་ནི་བདག་ཡི་རངས། །སེམས་ཅན་རྣམས་ཀྱི་བསམ་པ་དང་། །བློ་ཡི་བྱེ་བྲག་ཇི་ལྟ་བར། །ཆེ་ཆུང་ཐུན་མོང་ཐེག་པ་ཡི། །ཆོས་ཀྱི་འཁོར་ལོ་བསྐོར་དུ་གསོལ། །འཁོར་བ་ཇི་སྲིད་མ་སྟོང་བར། །མྱ་ངན་མི་འདའ་ཐུགས་རྗེ་ཡིས། །སྡུག་བསྔལ་རྒྱ་མཚོར་བྱིང་བ་ཡི། །སེམས་ཅན་རྣམས་ལ་གཟིགས་སུ་གསོལ། །བདག་གིས་བསོད་ནམས་ཅི་བསགས་པ། །ཐམས་ཅད་བྱང་ཆུབ་རྒྱུར་གྱུར་ནས། །རིང་པོར་མི་ཐོགས་འགྲོ་བ་ཡི། །འདྲེན་པའི་དཔལ་དུ་བདག་གྱུར་ཅིག །ཅེས་ཡན་ལག་བདུན་པ་དང་། སངས་རྒྱས་ཆོས་ཚོགས་མས་སྐྱབས་སེམས་ལན་གསུམ་དུ་བྱས་པས། །རང་དང་བསྒྲུབ་བྱ་ཐམས་ཅད་རྗེ་བཙུན་མའི་ཕྱག་གཡས་པའི་སྐྱབས་སྦྱིན་བརྐྱངས་པའི་འོག་ཏུ་ཚུད་ནས་འཇིགས་པ་ཐམས་ཅད་ལས་དབུགས་དབྱུང་བར་བསམས་ལ། ཕྱག་འཚལ་ཉེར་གཅིག་གི་བསྟོད་པ་ཚར་གཉིས་འདོན། མཐར། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །ཞེས་སོགས་ཀྱིས་འདོད་པའི་དོན་ལ་གསོལ་བ་གདབ། དེ་བཞིན་དུ་མཎྜལ་གཉིས་པ་ལ་ཕྱག་འཚལ་ཉེར་གཅིག་ཚར་གསུམ་དང་། གསུམ་པ་ལ་འདུན་སྤར་བ་མ་གཏོགས་གཞན་འདྲ། ལྷ་མོ་ལ་གུས་ཡང་དག་ལྡན་པའི། །བློ་ལྡན་གང་གིས་རབ་དང་བརྗོད་དེ། །སྲོད་དང་ཐོ་རངས་ལངས་པར་བྱས་ནས། །དྲན་པས་མི་འཇིགས་ཐམས་ཅད་རབ་སྟེར། །སྡིག་པ་ཐམས་ཅད་རབ་ཏུ་ཞི་བ། །ངན་འགྲོ་ཐམས་ཅད་འཇོམས་པ་ཉིད་དོ། །རྒྱལ་བ་བྱེ་བ་ཕྲག་བདུན་རྣམས་ཀྱིས། །མྱུར་དུ་དབང་ནི་བསྐུར་བར་འགྱུར་ལ། །འདི་ལས་ཆེ་བ་ཉིད་ནི་ཐོབ་ཅིང་། །སངས་རྒྱས་གོ་འཕང་མཐར་ཐུག་དེར་འགྲོ། །དེ་ཡི་དུག་ནི་དྲག་པོ་ཆེན་པོ། །བརྟན་གནས་པའམ་གཞན་ཡང་འགྲོ་བ། །ཟོས་པ་དང་ནི་འཐུངས་པ་ཉིད་ཀྱང་། །དྲན་པས་རབ་ཏུ་སེལ་བ་ཉིད་ཐོབ། །གདོན་དང་རིམས་དང་དུག་གིས་གཟིར་བའི། །སྡུག་བསྔལ་ཚོགས་ནི་རྣམ་པར་སྤོང་སྟེ། །སེམས་ཅན་གཞན་པ་རྣམས་ལ་ཡང་ངོ་། །གཉིས་གསུམ་བདུན་དུ་མངོན་པར་བརྗོད་ན། །བུ་འདོད་པས་ནི་བུ་ཐོབ་འགྱུར་ཞིང་། །ནོར་འདོད་པས་ནི་ནོར་རྣམས་ཉིད་ཐོབ། །འདོད་པ་ཐམས་ཅད་ཐོབ་པར་འགྱུར་ཏེ། །བགེགས་རྣམས་མེད་ཅིང་སོ་སོར་འཇོམས་འགྱུར། །ཞེས་ཕན་ཡོན་ཀྱང་དོན་ཡིད་ལ་དྲན་བཞིན་པའི་སྒོ་ནས་ཚར་གཅིག་བྱ། རྗེས་ནི། གཏོར་མ་འབུལ་བར་སྤྲོ་ན་སྐབས་འདིར་གཞན་ནས་འབྱུང་བའི་ཆོ་གས་བཏང་། མ་འབྱོར་ནའང་གཞུང་རྩ་བར་མི་འབྱུང་བས་ཆད་སྐྱོན་མེད། གང་ལྟར་ཡང་གཏང་རག་གི་སླད་དུ་ཡན་ལག་བདུན་པ་འབུལ་ཞིང་འདོད་པའི་དོན་ལ་གསོལ་བ་གདབ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་མཛོད། །ཅེས་པའི་མཐར། བག་མེད་སྤྱད་པ་མ་དག་པས། །ཆོ་ག་གཞུང་བཞིན་མ་ལྕོགས་པས། །ལྷག་ཆད་འཁྲུལ་པ་ཅི་མཆིས་པ། །ཐུགས་རྗེས་བཟོད་པར་མཛད་དུ་གསོལ། །ཞེས་པས་ནོངས་བ་བཟོད་པར་གསོལ། མདུན་དུ་བཞུགས་པའི་ཡེ་ཤེས་པ་རྣམས་རྟེན་དང་དབྱེར་མེད་དུ་བཞུགས་པར་བསམས་ལ་མེ་ཏོག་འཐོར། དགེ་བ་འདི་ཡིས་མྱུར་དུ་བདག །རྗེ་བཙུན་སྒྲོལ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་དགེ་བ་བསྔོ་ཞིང་འཁོར་གསུམ་མི་དམིགས་པའི་ལྟ་བས་རྒྱས་གདབ། བདག་གིས་ཚེ་རབས་སྔོན་ནས་བསྒྲུབས་པའི་ལྷ། །དུས་གསུམ་སངས་རྒྱས་ཀུན་གྱི་ཕྲིན་ལས་མ། །སྔོ་ལྗང་ཞལ་གཅིག་ཕྱག་གཉིས་མྱུར་ཞི་དཔལ། །ཡུམ་གྱུར་ཨུཏྤལ་བསྣམས་པའི་བཀྲ་ཤིས་ཤོག །ཅེས་སོགས་བཀྲ་ཤིས་ཀྱི་ཚིགས་སུ་བཅད་པ་ཇི་ལྟར་རིགས་པ་བརྗོད་ཅིང་མེ་ཏོག་གི་ཆར་དབབ། ལས་ཀྱི་རྗེས་མི་མངོན་པར་བྱའོ། །དེ་ལ་སྤྱིར་རྗེ་བཙུན་སྒྲོལ་མ་ནི་རྒྱལ་བ་ཀུན་གྱི་ཕྲིན་ལས་ཐུགས་རྗེའི་གཟུགས་སུ་ཤར་བ་ཡིན་པས། འཕགས་པའི་ཡུལ་དུ་སློབ་དཔོན་ཀླུ་སྒྲུབ་སོགས་མཁས་ཤིང་དངོས་གྲུབ་བརྙེས་པ་རྣམས་ཀྱིས་འདི་ཁོ་ན་ལ་ཐུགས་དམ་དུ་མཛད་པས་བར་ཆད་ལས་བསྐྱབས་པ་སོགས་གཏམ་རྒྱུད་ཤིན་ཏུ་མང་ལ། ཁྱད་པར་མཎྜལ་གྱི་སྒོ་ནས་གསོལ་བ་འདེབས་པ་འདི་ཉིད་བྱིན་རླབས་ཆེས་མྱུར་བས་ན། གཙོ་བོར་ཐམས་ཅད་མཁྱེན་པ་ཐོབ་པར་བྱེད་པའི་རྒྱུའི་གཙོ་བོ་བྱམས་སྙིང་རྗེ་བྱང་ཆུབ་ཀྱི་སེམས་གཉིས་རྒྱུད་ལ་སྐྱེ་བ་དང་། དེའི་ཆེད་དུ་སྒྲུབ་པའི་གནས་སྐབས་ཀྱི་འགལ་རྐྱེན་ཞི་ཞིང་། མཐུན་རྐྱེན་ཕུན་སུམ་ཚོགས་པའི་སླད་དུ་གསོལ་བ་གདབ་ཅིང་། དུས་རྟག་ཏུ་རྗེ་བཙུན་མ་དྲན་པར་བྱས་ན་འཇིག་རྟེན་དང་འཇིག་རྟེན་ལས་འདས་པའི་དཔལ་གྱིས་འབྱོར་པ་ནི་ངེས་པའོ། །རྗེ་བཙུན་མྱུར་མ་དཔལ་མོའི་ཞབས། །མཆོད་པའི་ཐབས་ཚུལ་དཔྱིད་དཔལ་གྱིས། །ཕན་བདེའི་ཨུཏྤལ་རྒྱས་པའི་ཕུལ། །འགྲོ་རྣམས་ཉེར་འཚེའི་སླད་གྱུར་ཅིག །ཅེས་པའང་ལྔ་བརྒྱ་པ་རྣམས་ཀྱི་གཙུག་གི་ནོར་བུ་དཔལ་ལྡན་ཨ་ཏི་ཤ་ནས་རིམ་པར་བརྒྱུད་པའི་མན་ངག་དཔལ་སྣར་ཐང་གི་མཁན་པོ་མཆིམས་སྟོན་ནམ་མཁའ་གྲགས་ཀྱིས་གསལ་བར་མཛད་པའི་དགོངས་དོན་ཇི་ལྟ་བ་ལ། སྐབས་སུ་བབ་པའི་མཚམས་སྦྱོར་ཅུང་ཟད་དང་བཅས་ཏེ་ཤིན་ཏུ་བསྡུས་པའི་ཚུལ་གྱིས་ཤཱཀྱའི་དགེ་སློང་འཇམ་དབྱང་མཁྱེན་བརྩེའི་དབང་པོས་སྦྱར་བ་དགེ་ལེགས་སུ་གྱུར་ཅིག །

[edit]

sgrol ma'i maN+Dal bzhi chog mdor bsdus phan bde'i ut+pal/ @#/_/sgrol ma maN+Dal bzhi pa'i cho ga bya tshul mdor bsdus snying por dril ba phan bde'i ut+pal zhes bya ba bzhugs so//__// gang mtshan dran pa'i mod nyid nas/__/'jigs pa kun las dbugs 'byin pa'i/_/myur ma dpa' mor gus btud nas/__/de mnyes byed pa'i cho ga bshad/__/de la 'dir blo gros dang ldan pa rnams kyis mngon par mtho ba dang /__nges par legs pa'i go 'phang don du gnyer ba na/__lam gyi bar du gcod pa thams cad thabs khyad par can gyi sgo nas srung ba'i slad du rje btsun sgrol ma yi dam gyi lhar bzung zhing /__gnyis gsum bdun du mngon par brjod na/__zhes pa'i man ngag phyogs gcig pa maN+Dal bzhi ba'i mchod pa nyams su blang bar 'dod pas/__rten gyi gang zag rgyud dag pa'i dge slong bzhis btang na shin tu bzang ste/__ma grub na rang gcig pus kyang rung /__gang ltar yang gnas gtsang zhing yid dang mthun la bkod pas mdzes par dkon mchog gi rten gsum ji ltar rigs pa dang /__khyad par rje btsun ma'i sku bris 'bur gang rigs rab gnas dang ldan pa'i spyan sngar/__stegs kyi khar dri bzang gis byugs pa'i maN+Dal re khA gnyis skor du bris pa'i dbus su tshom bu bdun bkod pa bzhi dang /__gtor ma 'bul na zlum gtor bzhi'am gcig__/mchod pa sna lnga tshar lnga sogs ji ltar 'dzoms pa gtsang sbra dang ldan pas 'du byas nas cho ga dngos la'ang sngon dngos rjes gsum las/__dang po sngon 'gro ni/__sgrub pa po rnams kyis chab blangs ba'i rjes stan bde ba la 'dug ste dge sems khyad par can gyi ngang mdun gyi nam mkhar skyabs yul thams cad mngon sum bzhin du bzhugs par mos la/__sangs rgyas chos dang tshogs kyi mchog rnams la/__/byang chub bar du bdag ni skyabs su mchi/__/bdag gis sbyin sogs bgyis pa'i bsod nams kyis/__/'gro la phan phyir sangs rgyas 'grub par shog__/ces skyabs sems ji ltar rigs pa bya/__sems can thams cad bde ba dang bde ba'i rgyu dang ldan par gyur cig__/sdug bsngal dang sdug bsngal gyi rgyu dang bral bar gyur cig__/sdug bsngal med pa'i bde ba dang mi 'bral bar gyur cig__/nye ring chags sdang dang bral ba'i btang snyoms la gnas par gyur cig__/ces tshad med bzhi bsgom/__gnas dang yo byad rnams la dmigs te/__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyi rlabs dang /__tshogs gnyis yongs su rdzogs pa'i mnga' thang chen po las chos kyi dbyings rang bzhin rnam par dag cing bsam gyis mi khyab pa'i stobs kyis/__deng 'dir khor yug gi sa gzhi 'di dag bde ba can gyi zhing gi bkod pa lta bu phun sum tshogs pa'i rgyan thams cad kyis brgyan pa mdzes shing yid du 'ong bar gyur pa'i dbus su mchod rdzas rnams 'phags pa kun tu bzang po'i rnam par thar pa las byung ba'i mchod pa'i sprin phung bsam gyis mi khyab pa rgyu 'jig rten dang 'jig rten las 'das pa'i dge ba las byung ba/__ngo bo bzang zhing gtsang ba/__yul nam mkha'i mtha' khyab pa/__dus 'khor ba ji srid ma stong gi bar du rgyun mi chad par skyabs gnas dkon mchog rgya mtsho'i spyan lam du 'byung zhing rgyas par gyur cig__/ces bden pa'i stobs brjod pas byin gyis brlab/__spro na/__na mo rat+na tra yA ya/__oM na mo b+ha ga wa te badz+ra sA ra pra mar+d+ha ne/__ta thA ga tA ya/__ar+ha te samya k+saM bud+d+ha ya/__tad+ya thA/__oM badz+re badz+re ma hA badz+re/__ma hA te dzo badz+re/__ma hA bid+yA badz+re/__ma hA bo d+hi tsit+ta badz+re/__ma hA bod+hi maN+Do pa saM kra ma Na badz+re sarba karma A ba ra Na bi sho d+ha na badz+re swA hA/__/zhes mchod pa'i sprin gyi gzungs lan gsum brjod pas byin gyis brlab/__dngos gzhi ni/__mdun gyi rten rnams rje btsun sgrol ma 'khor sgrol ma nyer gcig dang /__phyogs bcu dus gsum gyi skyabs yul ma tshang ba med pas bskor ba mngon sum lta bur bzhugs par mos pas/__maN+Dal dang po dkon mchog spyi la 'bul ba ni/__thog mar/__sangs rgyas thams cad 'dus pa'i sku/__/rdo rje 'dzin pa'i ngo bo nyid/__/dkon mchog gsum gyi rtsa ba ste/__/bla ma rnams la phyag 'tshal lo/__/zhes sh+lo ka gcig dang /__mgon po thugs rje che ldan pa/__/thams cad mkhyen pa ston pa po/__/bsod nams yon tan rgya mtsho'i zhing /__/de bzhin gshegs la phyag 'tshal lo/__/dag pa 'dod chags bral ba'i rgyu/__/dge bas ngan song las grol zhing /__/gcig tu don dam mchog gyur pa/__/zhi gyur chos la phyag 'tshal lo/__/grol nas grol ba'i lam yang ston/__/bslab pa dag la rab tu gus/__/zhing gi dam pa yon tan ldan/__/dge 'dun la yang phyag 'tshal lo/__/zhes sh+lo ka gsum rnams lan gsum du brjod cing /__sh+lo ka re la phyag re byas mthar me tog 'thor nas stan la bsdad/__ji snyed su dag phyogs bcu'i 'jig rten na/__/dus gsum gshegs pa mi yi seng ge kun/__/bdag gis ma lus de dag thams cad la/__/lus dang ngag yid dang bas phyag bgyi'o/__/bzang po spyod pa'i smon lam stobs dag gis/__/rgyal ba thams cad yid kyi mngon sum du/__/zhing gi rdul snyed lus rab btud pa yis/__/rgyal ba kun la rab tu phyag 'tshal lo/__/rdul gcig steng na rdul snyed sangs rgyas rnams/__/sangs rgyas sras kyi dbus na bzhugs pa dag__/de ltar chos kyi dbyings rnams ma lus pa/__/thams cad rgyal ba dag gis gang bar mos/__/de dag bsngags pa mi zad rgya mtsho rnams/__/dbyangs kyi yan lag rgya mtsho'i sgra kun gyis/__/rgyal ba kun gyi yon tan rab brjod cing /__/bde bar gshegs pa thams cad bdag gis bstod/__/me tog dam pa phreng ba dam pa dang /__/sil snyan rnams dang byug pa gdugs mchog dang /__/mar me mchog dang bdug spos dam pa yis/__/rgyal ba de dag la ni mchod par bgyi/__/na bza' dam pa rnams dang dri mchog dang /__/phye ma phur ma ri rab mnyam pa dang /__/bkod pa khyad par 'phags pa'i mchog kun gyis/__/rgyal ba de dag la ni mchod par bgyi/__/mchod pa gang rnams bla med rgya che ba/__/de dag rgyal ba thams cad la yang mos/__/bzang po spyod la dad pa'i stobs dag gis/__/rgyal ba kun la phyag 'tshal mchod par bgyi/__/'dod chags zhe sdang gti mug dbang gis ni/__/lus dang ngag dang de bzhin yid kyis kyang /__/sdig pa bdag gis bgyis pa ci mchis pa/__/de dag thams cad bdag gis so sor bshags/__/phyogs bcu'i rgyal ba kun dang sangs rgyas sras/__/rang rgyal rnams dang slob dang mi slob dang /__/'gro ba kun gyi bsod nams gang la yang /__/de dag kun gyi rjes su bdag yi rang /__/gang rnams phyogs bcu'i 'jig rten sgron ma rnams/__/byang chub rim par sangs rgyas ma chags brnyes/__/mgon po de dag bdag gis thams cad la/_/'khor lo bla na med pa bskor bar bskul/__/mya ngan 'da' ston gang bzhed de dag la/_/'gro ba kun la phan zhing bde ba'i phyir/__/bskal pa zhing gi rdul snyed bzhugs par yang /__/bdag gis thal mo rab sbyar gsol bar bgyi/__/phyag 'tshal ba dang mchod cing bshags pa dang /__/rjes su yi rang bskul zhing gsol ba yi/__/dge ba cung zad bdag gis ci bsags pa/__/thams cad bdag gis byang chub phyir bsngo'o/_/zhes yan lag bdun pa'i mthar/__sangs rgyas chos tshogs mas skyabs sems lan gsum byas pa dang bdag gzhan rnams dkon mchog gsum gyi skyabs 'og tu tshud par bsam/__sa gzhi spos chus byugs shing me tog bkram/__/ri rab gling bzhi nyi zlas brgyan pa 'di/__/sangs rgyas zhing du dmigs te phul ba yis/__/'gro kun rnam dag zhing la spyod par shog__/ces maN+Dal 'bul/__skyabs gnas dkon mchog rgya mtsho thugs rje can/_/bdag dang mtha' yas sems can thams cad kyi/__/sgrib gnyis byang zhing tshogs gnyis myur rdzogs nas/__/rdzogs pa'i sangs rgyas thob par mdzad du gsol/__/de ma thob pa'i tshe rabs kun tu yang /__/lha dang mi yi bde ba mchog thob nas/__/thams cad mkhyen pa sgrub par byed pa la/__/bar chad gdon bgegs rims dang nad la sogs/__/dus min 'chi bar gyur pa sna tshogs dang /__/rmi lam ngan dang mtshan ma ngan pa dang /__/'jigs pa brgyad sogs nye bar 'tshe ba rnams/__/myur du zhi zhing med par mdzad du gsol/__/'jig rten 'jig rten las ni 'das pa yi/__/bkra shis bde legs phun sum tshogs pa rnams/__/'phel zhing rgyas pas don rnams ma lus pa/__/'bad med lhun gyis 'grub par mdzad du gsol/__/sgrub la brtson zhing dam chos 'phel ba dang /__/rtag tu khyed sgrub zhal mchog mthong ba dang /__/stong nyid don rtogs byang sems rin po che/__/yar ngo'i zla ltar 'phel zhing rgyas par mdzod/__/ces pas 'dod pa'i don la gsol ba rtse gcig tu gdab/__de nas rje btsun ma la maN+Dal gsum 'bul ba'i dang po ni/__lha dang lha min cod pan gyis/__/zhabs kyi pad+mo la btud de/__/phongs pa kun las sgrol mdzad ma/__/sgrol ma yum la phyag 'tshal lo/__/zhes lan bdun gyis phyag byas la me tog 'thor/__sa gzhi spos chus byugs shing me tog bkram/__sogs kyis maN+Dal 'bul/__rje btsun 'phags ma sgrol ma dang /__/phyogs bcu dus gsum bzhugs pa yi/__/rgyal ba sras bcas thams cad la/__/kun nas dang bas phyag 'tshal lo/__/me tog bdug spos mar me dri/__/zhal zas rol mo la sogs pa/__/dngos 'byor yid kyis sprul nas 'bul/__/'phags ma'i tshogs kyis bzhes su gsol/__/thog ma med nas da lta'i bar/__/mi dge bcu dang mtshams med lnga/__/sems ni nyon mongs dbang gyur pa'i/__/sdig pa thams cad bshags par bgyi/__/nyan thos rang rgyal byang chub sems/__/so so skye bo la sogs pa'i/__/dus gsum dge ba ci bsags pa/__/bsod nams la ni bdag yi rangs/__/sems can rnams kyi bsam pa dang /__/blo yi bye brag ji lta bar/__/che chung thun mong theg pa yi/__/chos kyi 'khor lo bskor du gsol/__/'khor ba ji srid ma stong bar/__/mya ngan mi 'da' thugs rje yis/__/sdug bsngal rgya mtshor bying ba yi/__/sems can rnams la gzigs su gsol/__/bdag gis bsod nams ci bsags pa/__/thams cad byang chub rgyur gyur nas/__/ring por mi thogs 'gro ba yi/__/'dren pa'i dpal du bdag gyur cig__/ces yan lag bdun pa dang /__sangs rgyas chos tshogs mas skyabs sems lan gsum du byas pas/__/rang dang bsgrub bya thams cad rje btsun ma'i phyag g.yas pa'i skyabs sbyin brkyangs pa'i 'og tu tshud nas 'jigs pa thams cad las dbugs dbyung bar bsams la/__phyag 'tshal nyer gcig gi bstod pa tshar gnyis 'don/__mthar/__rje btsun bcom ldan 'das ma thugs rje can/__/zhes sogs kyis 'dod pa'i don la gsol ba gdab/__de bzhin du maN+Dal gnyis pa la phyag 'tshal nyer gcig tshar gsum dang /__gsum pa la 'dun spar ba ma gtogs gzhan 'dra/__lha mo la gus yang dag ldan pa'i/__/blo ldan gang gis rab dang brjod de/__/srod dang tho rangs langs par byas nas/__/dran pas mi 'jigs thams cad rab ster/__/sdig pa thams cad rab tu zhi ba/__/ngan 'gro thams cad 'joms pa nyid do/__/rgyal ba bye ba phrag bdun rnams kyis/__/myur du dbang ni bskur bar 'gyur la/__/'di las che ba nyid ni thob cing /__/sangs rgyas go 'phang mthar thug der 'gro/__/de yi dug ni drag po chen po/__/brtan gnas pa'am gzhan yang 'gro ba/__/zos pa dang ni 'thungs pa nyid kyang /__/dran pas rab tu sel ba nyid thob/__/gdon dang rims dang dug gis gzir ba'i/__/sdug bsngal tshogs ni rnam par spong ste/__/sems can gzhan pa rnams la yang ngo /__/gnyis gsum bdun du mngon par brjod na/__/bu 'dod pas ni bu thob 'gyur zhing /__/nor 'dod pas ni nor rnams nyid thob/__/'dod pa thams cad thob par 'gyur te/__/bgegs rnams med cing so sor 'joms 'gyur/__/zhes phan yon kyang don yid la dran bzhin pa'i sgo nas tshar gcig bya/__rjes ni/__gtor ma 'bul bar spro na skabs 'dir gzhan nas 'byung ba'i cho gas btang /__ma 'byor na'ang gzhung rtsa bar mi 'byung bas chad skyon med/__gang ltar yang gtang rag gi slad du yan lag bdun pa 'bul zhing 'dod pa'i don la gsol ba gdab/__ma 'byor pa dang nyams pa dang /__/gang yang bdag rmongs blo yis ni/__/bgyis pa dang ni bgyid stsal ba/__/de kun mgon pos bzod par mdzod/__/ces pa'i mthar/__bag med spyad pa ma dag pas/__/cho ga gzhung bzhin ma lcogs pas/__/lhag chad 'khrul pa ci mchis pa/__/thugs rjes bzod par mdzad du gsol/__/zhes pas nongs ba bzod par gsol/__mdun du bzhugs pa'i ye shes pa rnams rten dang dbyer med du bzhugs par bsams la me tog 'thor/__dge ba 'di yis myur du bdag__/rje btsun sgrol ma 'grub gyur nas/__/'gro ba gcig kyang ma lus pa/__/de yi sa la 'god par shog___/ces dge ba bsngo zhing 'khor gsum mi dmigs pa'i lta bas rgyas gdab/__bdag gis tshe rabs sngon nas bsgrubs pa'i lha/_/dus gsum sangs rgyas kun gyi phrin las ma/__/sngo ljang zhal gcig phyag gnyis myur zhi dpal/__/yum gyur ut+pal bsnams pa'i bkra shis shog___/ces sogs bkra shis kyi tshigs su bcad pa ji ltar rigs pa brjod cing me tog gi char dbab/__las kyi rjes mi mngon par bya'o/__/de la spyir rje btsun sgrol ma ni rgyal ba kun gyi phrin las thugs rje'i gzugs su shar ba yin pas/__'phags pa'i yul du slob dpon klu sgrub sogs mkhas shing dngos grub brnyes pa rnams kyis 'di kho na la thugs dam du mdzad pas bar chad las bskyabs pa sogs gtam rgyud shin tu mang la/__khyad par maN+Dal gyi sgo nas gsol ba 'debs pa 'di nyid byin rlabs ches myur bas na/__gtso bor thams cad mkhyen pa thob par byed pa'i rgyu'i gtso bo byams snying rje byang chub kyi sems gnyis rgyud la skye ba dang /__de'i ched du sgrub pa'i gnas skabs kyi 'gal rkyen zhi zhing /__mthun rkyen phun sum tshogs pa'i slad du gsol ba gdab cing /__dus rtag tu rje btsun ma dran par byas na 'jig rten dang 'jig rten las 'das pa'i dpal gyis 'byor pa ni nges pa'o/__/rje btsun myur ma dpal mo'i zhabs/__/mchod pa'i thabs tshul dpyid dpal gyis/__/phan bde'i ut+pal rgyas pa'i phul/__/'gro rnams nyer 'tshe'i slad gyur cig__/ces pa'ang lnga brgya pa rnams kyi gtsug gi nor bu dpal ldan a ti sha nas rim par brgyud pa'i man ngag dpal snar thang gi mkhan po mchims ston nam mkha' grags kyis gsal bar mdzad pa'i dgongs don ji lta ba la/__skabs su bab pa'i mtshams sbyor cung zad dang bcas te shin tu bsdus pa'i tshul gyis shAkya'i dge slong 'jam dbyang mkhyen brtse'i dbang pos sbyar ba dge legs su gyur cig__/