JKW-KABUM-05-CA-001-001

🚧 This website is under continued development. We appreciate your patience!

First text in volume. Back to Volume PageNext Text

Wylie title		page=1
Location	mkhyen brtse'i bka' babs Volume 1, Text 1, Pages (Folios to )
Author	[[ | ]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation
Genre	Revelations - gter ma
Karchag page	JKW-KABAB-Volume-01-KA-Karchag

Tibetan Text

Wylie

[edit]

དྲིས་ལན་མདོར་བསྡུས་སྐོར། ༄༅། །དྲིས་ལན་མདོར་བསྡུས་སྐོར་བཞུགས་སོ། །དྲི་བ་རྣམས་ཀྱི་ལན་མདོར་བསྡུས་བརྗོད་པ། མཁའ་སྤྱོད་མའི་བྱིན་རླབས་ཟེར་བའི་རྒྱུ་མཚན་ནི། བདེ་ཀྱེ་ལྟ་བུ་མ་རྒྱུད་ཀྱི་དབང་བསྐུར་ཚད་ལྡན་ཐོབ་པའི་གང་ཟག་ལ། ཡེ་ཤེས་སྐྱེ་བའི་སྣ་འདྲེན་དུ་དབང་བཞིའི་སྙིང་པོ་བྱིན་རླབས་ཀྱི་ཚུལ་དུ་བསྡུས་ཏེ་བསྐུར་བ་ལས། དབང་མ་ཐོབ་པའི་གང་ཟག་ལ་བྱིན་རླབས་བྱ་མི་རུང་བས་དེ་ལྟར་བཏགས། དོན་དུ་དབང་བྱིན་རླབས་གཉིས་ཀ་དབང་བཞི་ཙམ་དུ་གཞི་མཐུན་ཀྱང་། ཆོ་ག་རྒྱས་བསྡུས་སོགས་ཁྱད་པར་ཆེན་པོ་ཡོད་པ། ཐ་སྙད་དུ་མཁའ་སྤྱོད་མའི་བྱིན་རླབས་ཟེར་བ་མ་གཏོགས། དབང་ཟེར་སྲོལ་མེད།། །། ༈ མདུན་བསྐྱེད་ཀྱི་རྟེན་གཞིའི་དཀྱིལ་འཁོར་གྱི་གཙོ་བོ་སིནྡྷཱུ་རའི་དཀྱིལ་འཁོར་ཡིན།། །། ༈ ལྷ་བསྐྱེད་སྐབས་སུ་སྐུ་ཚོམ་བུའི་དཀྱིལ་འཁོར་ནི་བརྡ་ཙམ་ཡིན་ཀྱང་དེའི་འོག་ཏུ་རྡོ་རྗེའི་ས་གཞི་དང་། ཕྱི་རོལ་དུ་རྡོ་རྗེའི་རྭ་གུར་ཡངས་ཤིང་རྒྱ་ཆེ་བར་བསྒོམས་པའི་དབུས་སུ་འབྱུང་བཞི་རི་རབ། ཐོད་པ་བདུད་རྩིས་གང་བ་དང་བཅས་པའི་སྟེང་། སིན་དཀྱིལ་ཉིད་ཆོས་འབྱུང་གི་གཞལ་ཡས་ཁང་གི་དབུས་སུ་སྔགས་རྣམས་ལྷར་བསྐྱེད་པ་ཡིན། ཚོམ་བུའི་དཀྱིལ་འཁོར་ལ་ལྷ་བསྐྱེད་རྒྱུ་མེད། འགའ་ཞིག་གིས་ཚོམ་བུའི་དཀྱིལ་འཁོར་ལ་མཁའ་སྤྱོད་མ་ཞལ་ཕྱག་ཡོངས་རྫོགས་བྲིས་པ་ནི་ནོར་བ་རེད།། །། ༈ མདུན་བསྐྱེད་ཡོད་སྐབས་གཏོར་མ་མདུན་བསྐྱེད་ཁོ་ན་ལ་ཕུལ་ཀྱང་འཐུས་ཡོད། ཚར་ལུགས་ཆོ་ག་ནག་འགྲོས་སུ་གཏོར་མགྲོན་སྤྱན་འདྲེན་གསུངས་པས། དེ་ལྟར་ན་གཏོར་མགྲོན་དང་མདུན་བསྐྱེད་གཉིས་ཀ་ལ་ཕུལ་བའམ། གཏོར་མགྲོན་སྤྱན་དྲངས་པ་ཁོ་ན་ལ་ཕུལ་པའམ། ཡང་ན་གཏོར་མགྲོན་སྤྱན་དྲངས་པ་མདུན་བསྐྱེད་ལ་བསྟིམས་ནས་ཕུལ་ཀྱང་ཆོག ། ༈ །ལྷོ་སྒོའི་སྐབས་རྣམ་ཤེས་དང་བཅས་པའི་བྱང་བུ་བསྲེགས་ཐབས་མེད་པས། རྣམ་ཤེས་ནམ་མཁར་སྤར་བའི་བྱང་བུ་ཕུང་པོའི་ཚུལ་དུ་བསྲེག །དེ་ནས་རྣམ་ཤེས་ནམ་མཁར་སྤར་བ་ལ་ལམ་སྦྱང་བསྟན་སོགས་བྱེད་པ་གསར་མ་ཕལ་ཆེར་གྱི་སྲོལ་ཡིན། གཞན་དུ་ལམ་སྦྱང་བསྟན་དང་རྣམ་ཤེས་སྤར་བ་སྔོན་དུ་བྱས་ནས། བྱང་བུ་བསྲེག་པའང་མང་ངོ་།། །། ༈ གྲུབ་པ་བཞི་ཞེས་པ་རྙིང་མའི་ཆོས་སྐད་ཡིན་ཏེ། །ཆོས་ཉིད་ངོ་བོ་ཉིད་ཀྱིས་གྲུབ་པ། །ཆོས་ཅན་རང་བཞིན་གྱིས་གྲུབ་པ། །བྱིན་གྱིས་བརླབས་པས་གྲུབ་པ། མཐུས་གྲུབ་པ་བཞིའོ། །དེ་དང་གནས་རི་ལ་སྦྱར་ན། གནས་ཀྱི་ས་རྡོ་རི་བྲག་སོགས་ངོ་བོ་སྟོང་པ་ཉིད་ཆོས་ཀྱི་སྐུ་ལས་མ་གཡོས་པས་ཆོས་ཉིད་ངོ་བོ་ཉིད་ཀྱིས་གྲུབ་པ། རྣམ་པ་སངས་རྒྱས་དང་བྱང་ཆུབ་སེམས་དཔའི་ཐུགས་རྗེ་ལས་གནས་ཀྱི་བཀོད་པ་རང་བྱོན་སོགས་གཟུགས་སྐུའི་ཚུལ་དུ་ཤར་བ་ཆོས་ཅན་རང་བཞིན་གྱིས་གྲུབ་པ། དེ་ལྟ་བུའི་གནས་དེ་ལ་གང་ཟག་ཁྱད་པར་ཅན་གྱིས་སྒྲུབ་པ་དང་། རབ་གནས་དང་། གནས་ཆེན་བྱིན་འབེབས་སོགས་མཛད་པས་སླར་ཡང་བྱིན་རླབས་ཅན་དུ་གྱུར་པ་བྱིན་གྱིས་བརླབས་པས་གྲུབ་པ། དེ་ལ་བརྟེན་ནས་དད་པ་ཅན་གྱིས་ཕྱག་མཆོད་བསྐོར་བ་སོགས་བགྱིས་པས་རྒྱུད་བྱིན་གྱིས་བརླབ་ཅིང་དངོས་གྲུབ་སྩོལ་ནུས་པ་མཐུས་གྲུབ་པ་སྟེ། དེ་ལྟ་བུའི་གྲུབ་པ་བཞི་དང་ལྡན་པས་ཐམས་ཅད་ཀྱི་ཕྱག་དང་མཆོད་པའི་རྟེན་དུ་གྱུར་པ་ནི་གནས་ཀྱི་མཚན་ཉིད་ཡིན་ནོ།། །། ༈ མཐའ་དྲུག་ཚུལ་བཞི་ཞེས་པ་མདོ་རྒྱུད་ཐམས་ཅད་ཀྱི་བཤད་ཐབས་ཡིན་པས་རྒྱས་པར་སྤྲོས་ན་མཐའ་ཀླས་པ་ཞིག་ཡོད་ཀྱང་། མིང་ཙམ་གྱི་སྒོ་ནས་མདོར་བསྡུ་ན་མཐའ་དྲུག་ནི། མདོ་སྔགས་སྤྱི་དང་། ཁྱད་པར་མདོ་འཆད་པའི་སྐབས་སུ་ཉེ་བར་མཁོ་བ་སྟེ། འཇམ་མགོན་ས་པཎ་གྱིས། གཞུང་ལུགས་ཆེན་པོ་བཤད་པ་ལ་མཐའ་དྲུག་ཤེས་དགོས་ཏེ། དགོངས་པ་དང་དགོངས་པ་མ་ཡིན་པ། དྲང་བའི་དོན་དང་ངེས་པའི་དོན། སྒྲ་ཇི་བཞིན་པ་དང་ཇི་བཞིན་མ་ཡིན་པའོ། །ཞེས་གསུངས་པ་ལྟར། དགོངས་པ་ཅན་ནི་སངས་རྒྱས་ཀྱི་གསུང་རབ་གང་ཞིག །དངོས་སུ་གསུངས་པ་དེ་ལྟར་མ་ཡིན་པར་དོན་གཞན་ལ་དགོངས་པ་བཙལ་ཏེ་བཤད་དགོས་པ། དགོངས་པ་ཅན་མ་ཡིན་པ་ནི། སངས་རྒྱས་ཀྱི་གསུང་རབ་གང་ཞིག །དགོངས་པ་གཞན་ནས་བཙལ་མི་དགོས་པར་གསུངས་པ་ཇི་ལྟ་བ་བཞིན་བཤད་ཆོག་པ། དྲང་བའི་དོན་ནི་གདུལ་བྱ་འགའ་ཞིག་རྗེས་སུ་གཟུང་བའི་ཕྱིར་ཀུན་རྫོབ་ཀྱི་བདེན་པ་གཙོ་བོར་བཏོན་ནས་རིམ་གྱིས་ཁ་དྲང་བའི་ཆེད་དུ་གསུངས་པ། ངེས་པའི་དོན་ནི། གདུལ་བྱ་དབང་པོ་རྣོན་པོ་རྣམས་ལ་ངེས་པའི་དོན་གཙོ་བོར་བཏོན་ནས་གསུངས་པས། ཚིག་དེ་ཉིད་ཀྱི་རྗེས་སུ་འབྲངས་པས་དོན་ཕྱིན་ཅི་མ་ལོག་པར་རྟོགས་པ། སྒྲ་ཇི་བཞིན་པ་ནི། སྦྱིན་པ་བཏང་བས་ལོངས་སྤྱོད་འབྱུང་བ་དང་། ཚུལ་ཁྲིམས་བསྲུངས་པས་མཐོ་རིས་ཐོབ་པ་སོགས་ཇི་སྐད་གསུངས་པ་ལྟར་བཤད་ཆོག་པ། སྒྲ་ཇི་བཞིན་མ་ཡིན་པ་ནི། མདོ་ལས། ཕ་དང་མ་ནི་གསད་བྱ་ཞིང་། ཞེས་པ་ལྟ་བུ་ལ་མཚོན་ན། ཕ་གཟུང་བ་དང་། མ་འཛིན་པ་ལ་དགོངས་པས་གཟུང་འཛིན་གྱི་རྟོག་པ་བཅོམ་པའི་དོན་ལ་འཇུག་པས་མཚོན་ཇི་སྐད་གསུངས་པ་བཞིན་ཐད་ཀར་བཤད་དུ་མི་བཏུབ་པ་རྣམས་སོ། །ཚུལ་བཞི་ནི། ཚིག་དོན་སྤྱི་དོན། སྦས་དོན། མཐར་ཐུག་གི་དོན་དང་བཞི་ཡིན། དེ་གཙོ་བོ་སྔགས་འཆད་པ་ལ་འཇུག་སྟེ། ཚིག་དོན་ནི། རྒྱུད་ཀྱི་ཚིག་རྣམས་ཀྱི་འབྲུ་དོན་མ་ནོར་བར་འཆད་པ་ལ་ཟེར། སྤྱི་དོན་ནི། སྔགས་བླ་མེད་ལ་མཚོན་ན། བསྐྱེད་རིམ། སྦས་དོན་རྫོགས་རིམ། མཐར་ཐུག་གི་དོན་ཟུང་འཇུག་སྐུ་དང་ཡེ་ཤེས་སོགས་ཀྱི་རྣམ་པར་བཞག་པ་རྣམས་ཡིན་ནོ།། །། ༈ ཚར་ལུགས་མཁའ་སྤྱོད་ཆོ་ག་ནག་འགྲོས་མའི་དུར་བདག་གཏོར་བསྔོས་སྐབས་ཛཿཧཱུྃ་བྃ་ཧོཿགཉིས་གསུངས་པ་སྔ་མ་གཏོར་འགྲོན་སྤྱན་འདྲེན་པའི་སྔགས་དང་། ཕྱི་མ་མདུན་བསྐྱེད་ལ་བསྟིམ་པའི་སྔགས་རེད།། །། ༈ རྣལ་འབྱོར་མའི་རིགས་བདག་རྣམ་སྣང་ལ་ཧེ་རུ་ཀ་ཞེས་པའི་ཐ་སྙད་བཏགས་པས་རུས་པ་དང་རིན་པོ་ཆེའི་རྒྱན་གཉིས་ཀ་ཡོད། དེའང་རུས་པའི་རྒྱན་ལ་རིན་པོ་ཆེའི་ཕྲས་བཏབ་པ་ཡིན། །ཡུམ་དངོས་སུ་མ་གསུངས་པ་དང་། མེ་ཕུང་མི་དགོས།། །། ༈ རྫོགས་རིམ་སྐབས། དབུ་མའི་མས་སྣེའི་དགའ་འཁྱིལ་དམར་པོས་བདེ་བ་དང་། ཡས་སྣའི་དཀར་པོས་སྟོང་པ་བསྒྲུབ་པའི་དམིགས་པ་བྱེད་པ་ཁྲིད་ཡིག་ཆེན་མོ་སོགས་ཐམས་ཅད་ཀྱི་དགོངས་པ་ཡིན།། །། ༈ རླུང་ལུས་ལ་གནས་པས་བདེ་བ་སྒྲུབ་པའི་སྐབས། སྔར་རླུང་བྱང་བ་དང་། དམིགས་པ་གསལ་པོ་ཡོད་ན་རླུང་མ་བཟུང་ཡང་རུང་། དེ་མིན་བུམ་ཅན་དང་དམིགས་པ་སྦྲགས་ན་ལེགས།། །། ༈ གཉིས་བྲལ་འཆད་དུས་ཞལ་ཤེས་གསུམ་ཟེར་བ་འདི་ལ་འཆད་ཚུལ་མང་པོ་ཞིག་འདུག་ཀྱང་། དོན་དུ་གཉིས་བྲལ་ནི་རྩ་དབུ་མའི་མངོན་བརྗོད་ཡིན་པས། དབུ་མ་འཆད་དུས་ཞལ་ཤེས་གསུམ། ཞེས་བསྐྱེད་རིམ་ཕག་མོ་མཁའ་སྤྱོད་དང་། རྫོགས་རིམ་རྩ་དབུ་མ་ཟུང་འབྲེལ་དུ་འཆད་པའི་སྐབས་ཞལ་ཤེས་གསུམ་ཡོད་ཅེས་པའི་དོན་ལགས། གསུམ་པོ་དེ་གང་ཞེ་ན། ཡོངས་གྲགས་སུ་སྔོན་འགྲོའི་སྐབས་བླ་མ་བསྐྱེད་པ་དང་བསྟིམ་པའི་ཞལ་ཤེས་གཉིས། དངོས་གཞིའི་སྐབས་བསམ་མི་ཁྱབ་ཐུན་མོང་མ་ཡིན་པའི་ཞལ་ཤེས་དང་གསུམ་ལ་མཛད། འགལ་ཞིག་གིས་ཞལ་ཤེས་ཐམས་ཅད་འདིར་བསྡུ་བའི་དབང་དུ་བྱས་ཏེ། སྔོན་འགྲོའི་སྐབས་བླ་མ་བསྐྱེད་བསྟིམ་གྱི་ཞལ་ཤེས་གཉིས་གཅིག་ཏུ་བརྩིས། དངོས་གཞིར་ལུས་དཀྱིལ་ཐུན་མོང་མ་ཡིན་པའི་ཞལ་ཤེས། མཇུག་ཏུ་བསམ་མི་ཁྱབ་ཐུན་མོང་མ་ཡིན་པའི་ཞལ་ཤེས་སོ་ཟེར་བའང་སྣང་། སྐྱེ་འགག་གནས་གསུམ་བྲལ་བ་སོགས་ཀྱི་དོན་ཞྭ་ལུ་མཆོག་སྤྲུལ་རིན་པོ་ཆེས་མཛད་པ་འདི་ཀས་འཐུས་པས་དཔེ་བཤུ་ཐུབ་ན་ལེགས།། །། ༈ ལུས་དཀྱིལ་ཡོད་སྐབས་གོ་ཆ་བཀོད་ལུགས་དམིགས་པ་གསལ་ཐེབས་ན་ཕྱི་ནང་གི་ལྷ་ཐམས་ཅད་ལ་ཡེ་ཤེས་པ་བསྟིམ་པ་ཡིན་པས་རྨོར་ཆེན་གསུང་ལྟར་ཕྱི་ནང་གི་རྣལ་འབྱོར་མ་ཐམས་ཅད་ཀྱི་གནས་སུ་བཀོད་ཐུབ་ན་ལེགས། དེ་ཙམ་གསལ་མ་ཐེབས་ན། ཕྱིའི་རྣལ་འབྱོར་མ་ལ་དངོས་སུ་གསལ་བཏབ་ནས་ལུས་དཀྱིལ་རྣམས་ལའང་གོ་ཆས་རྒྱས་བཏབ་ཡོད་སྙམ་པ་ཙམ་བྱས་ན་འཐུས་ཚུལ་གསུང་རྒྱུན་ལས་འབྱུང་།། །། ༈ བསམ་མི་ཁྱབ་ཐུན་མིན་སྐབས། ལུས་ཀྱི་ཤུལ་བུག་པ་ཧ་རེ་ཡོད་པ་ཞེས་པའི་དོན། རགས་ལུས་ཡོངས་རྫོགས་དྭང་མའི་ལུས་མཁའ་སྤྱོད་མ་ལ་ཐིམ་ཚར་བའི་རྗེས་ཤུལ་ན་རང་གི་གོས་བུག་པ་ཧ་རེ་ཡོད་པ་ཙམ་ལུས་པ་ལ་ཟེར་བ་ཡིན་གྱི། ལུས་ལ་བུག་པ་ཧ་རེ་ཡོད་ཟེར་བའི་དོན་ག་ལ་ཡིན།། །། ༈ དབུ་མ་ཁ་དབྱེའི་སྐབས། ཁྲིད་ཡིག་ཆེན་མོར་རྩ་གསུམ་གྱི་ནང་མེས་ཁེངས་གསུངས་པ་མེད། དོན་དུ་འབར་བའི་མེས་ལུས་ཀྱི་ནང་ཐམས་ཅད་ཁེངས། ཁམས་སྙིགས་མ་རྣམས་བསྲེགས། དྭང་མ་རྣམས་དབུ་མར་འདུས་པ་བསྒོམ་དགོས་རྒྱུ་ཡིན། ལར་ཁྲིད་ཡིག་ཐམས་ཅད་གོ་བསྡུར་ན་བླ་མ་རྣམས་ཀྱི་དགོངས་ཕྱོགས་ལྟ་བུས་ཅུང་མི་འདྲ་བ་མང་བས། རང་ལུགས་མཁྱེན་བརྩེས་མཛད་པའི་ཁྲིད་ཡིག་ཆེན་མོ་མཁའ་སྤྱོད་བགྲོད་པའི་སྣེ་ལམ་ཁོ་ན་དང་། ངག་འདོན་གནས་གསར་བས་མཛད་པའི་སྒྲུབ་ཐབས་ནག་འགྲོས་ལྟར་གཙོ་བོར་བྱེད་དགོས་པ་ཐུགས་ངེས་ཞུ།། །། ༈ ནཱ་རོ་པའི་སློབ་མ་གཉིས་སྐྱེས་མཆོག་གཉིས་ཞེས་པའི་གཉིས་སྐྱེས་ནི་བྲམ་ཟེའི་མིང་ཡིན་པས། བྲམ་ཟེའི་རིགས་སུ་འཁྲུངས་པའི་སློབ་མ་མཆོག་མ་ན་ཀ་ཤྲཱི་དང་། རཏྣ་རཀྵིཏ་གཉིས་ལགས།། །། ༈ སེམས་བསྐྱེད་ཚད་མེད་རྒྱུ་འབྲས་བུ་སོང་བ་ནི། དང་པོ་སྨོན་འཇུག་གི་སེམས་བསྐྱེད་རྒྱུ་དང་། དེ་ནས་སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་འབྲས་བུའི་ཚུལ་དུ་བསྒོམ་པ་སྒྲུབ་ཐབས་ཕལ་ཆེར་ལྟར་དང་། དེ་གཉིས་ངོ་བོ་དབྱེར་མེད་ནི། སྨོན་འཇུག་གི་སེམས་བསྐྱེད་ལས་ཚད་མེད་བཞི་ལོགས་སུ་མ་བསྒོམས་ཀྱང་། སྨོན་འཇུག་གི་སེམས་བསྐྱེད་ལ་ཚད་མེད་བཞི་དོན་གྱིས་ཚང་བ་ལགས།། །། ༈ བདག་གི་གཞི་སྦྱངས་བསྒྱུར་སྐབས། བླ་མ་རང་ལ་བསྟིམས་པས་རང་གི་ལུས་འོད་ཀྱི་རང་བཞིན་ལྟ་བུར་གྱུར་པའི་སྙིང་གའི་ཐད་དུ་ཆོས་འབྱུང་སོགས་བསྒོམ། དེའི་འོད་ཀྱིས་ལུས་འོད་ཀྱི་གོང་བུར་སྦྱངས། དེ་ལས་རྣལ་འབྱོར་མའི་སྐུར་བསྒྱུར་བ་ཡིན། རྡོར་སེམས་བསྒོམ་བཟླས་སྐབས་རང་ཐ་མལ་པའི་ལུས་རྟེན་འདི་གའི་སྤྱི་བོར་བླ་མ་རྡོ་རྗེ་སེམས་དཔའ་མཐོ་ཚད་དུ་བསྒོམ།། །། ༈ རྣལ་འབྱོར་མའི་ཚོགས་བརྒྱ་འབུལ་མཁན་མ་ཐོས། འབུལ་ན་ནི་ལོས་ཆོག །འབུལ་ལུགས་ཆོ་ག་ཚར་གཅིག་བདག་འཇུག་ཡན་གྲུབ་ནས། ཚོགས་བྱིན་རླབས་ནས་ལྷག་མའི་བར་གྲངས་གསོག །བརྒྱ་དུས་གཅིག་མ་ཚར་ན་གང་ཚར་གྱི་མཚམས་རྗེས་ཆོག་བྱ། སླར་ཆོ་ག་བསྐྱར་བས་འཐུས།། །། ༈ དབང་གི་ངོ་བོ་ནི། རྣལ་འབྱོར་བླ་མེད་ཀྱི་དབང་དུ་བྱས་ན། རང་རྒྱུད་ལ་སྐུ་བཞིའི་ས་བོན་ནུས་ལྡན་དུ་བྱེད་པའི་སྔགས་ཀྱི་ཆོ་གའི་ཁྱད་པར། ངེས་ཚིག་ནི། ཨ་བྷིཥིཉྩ་ཞེས་པའི་སྒྲ་ལས་དྲངས་ན་མངོན་པར་གཏོར་བ་སྟེ་སྒོ་གསུམ་ཆ་མཉམ་དང་བཅས་པའི་དྲི་མ་གཏོར་བའམ། ཨ་བྷི་ཥེ་ཀ་ཏ་ཞེས་པའི་སྒྲ་ལས་དྲངས་ན་མངོན་པར་བླུགས་པའམ་འཇོག་པ་སྟེ། སྐུ་བཞིའི་ས་བོན་རྒྱུད་ལ་འཇོག་པ་དབྱེ། སྤྱིར། བུམ། གསང་། ཤེས་རབ་ཡེ་ཤེས། དབང་བཞི་པ་བཞིར་འདུ། གཞན་རྒྱུད་སྡེ་སོ་སོའི་དབང་གི་དབྱེ་བ་ཕྲ་མོ་བསམ་གྱིས་མི་ཁྱབ་པ་ལགས།། །། ༈ ཀྱེ་རྡོར་ལམ་དུས་རབ་ཐུན་བཞི་ནས། ཐ་མ་ཐུན་གཉིས་ཡན་ལེགས། དབང་གི་ཆུ་རྒྱུན་མི་འཆད་པའི་ཐབས་ཡིན། མངོན་རྟོག་གཞན་ཚར་གྲངས་འདོན་ན་སྤྱིར་ཕན་ཡོན་ཆེན་པོ་ཡོད་པ་གཞིར་བཅས་ལས། དབང་གི་ཆུ་རྒྱུན་ལ་ཕན་པའི་ཐ་སྙད་མེད།། །། ༈ དབང་དོན་གྱི་ཡེ་ཤེས་ཚད་ལྡན་ཞིག་རྒྱུད་ལ་སྐྱེས་ནས་མ་ཉམས་ན། རྗེས་སུ་དབང་གཞན་ཞུས་པས་སྔགས་སྡོམ་མམ། དབང་དོན་གྱི་ཡེ་ཤེས་ངོ་བོ་གསར་དུ་ཐོབ་རྒྱུ་མེད་རུང་། རྣམ་པ་སྔར་གྱི་སྔགས་སྡོམ་མམ་དབང་གི་ཡེ་ཤེས་དེ་ཇེ་བཟང་དུ་འགྲོ་བས། ཇི་ཙམ་བཟང་དུ་སོང་བ་དེ་ཙམ་གསར་ཐོབ་ཀྱི་ཆ་ཤས་ཡིན། འདི་ཙམ་ནི་ལམ་དུས་ཚར་རེ་ཙམ་ལ་ཡང་བརྩི་རྒྱུ་ཡོད།། །། ༈ འབྲས་བུ་དམན་པ་སྟེ་ཆུང་ངུ་ལ། འབྲས་བུ་མེད་ཅེས་དགག་སྒྲ་བཞག་པའི་དོན། ཉན་ཐོས་ཀྱི་ལམ་ལ་ཞུགས་ན་ཉན་ཐོས་དགྲ་བཅོམ། རང་རྒྱལ་གྱིས་རང་རྒྱལ་དགྲ་བཅོམ། བྱང་སེམས་རྐྱང་པས་ས་བཅུ་གཅིག་པ་ཙམ་ཐོབ་ཀྱང་། མཐར་ཐུག་གི་འབྲས་བུ་ཆེན་པོ་སངས་རྒྱས་ཀྱི་གོ་འཕང་ཐོབ་མི་ནུས་པས་གནས་སྐབས་ཀྱི་འབྲས་བུ་ཆུང་ངུ་ལས་མེད། སྔགས་བླ་མེད་ཀྱིས་བཅུ་གསུམ་རྡོ་རྗེ་འཛིན་པའི་ས་ཐོབ་ནུས་པས་འབྲས་བུ་ཆེ་ཞེས་པའི་དོན་ཡིན། འོ་ན་སངས་རྒྱས་ཀྱིས་གདུལ་བྱ་རྣམས་ལ་དང་པོ་ནས་སྔགས་བླ་མེད་མི་བསྟན་པ་ཅི་སྙམ་ན། ཇི་ལྟར་བྱིས་པ་གསོ་བ་དང་། །ཡི་གེའི་ཕྱི་མོ་ཀློག་འཇུག་ལྟར། །དེ་བཞིན་སངས་རྒྱས་གདུལ་བྱ་ལ། །ཇི་ཙམ་བཟོད་པའི་ཆོས་བསྟན་ཏོ། །ཞེས་བྱིས་པ་ཁ་ཟས་ཆ་བསྐྱེད་དེ་གསོ་བ་དང་། ཡི་གེ་ཀ་ཁ་ནས་རིམ་པར་སློབ་དགོས་པ་ལྟར། སངས་རྒྱས་ཀྱིས་ཀྱང་གདུལ་བྱ་ལ་ཐུན་མོང་བ་རིམ་གྱིས་དྲང་བ་མ་གཏོགས་ཐབས་མེད་པས། ཐེག་པ་གསུམ་དང་། རྒྱུད་སྡེ་བཞི་སོགས་གསུངས་དགོས་པའི་རྒྱུ་མཚན་དེ་ལྟར་ལགས།། །། ༈ བར་སྲིད་དང་ཁམས་གོང་མ་རྟེན་འབྲེལ་གང་གི་སྐབས་ཡིན་པ། རྟེན་འབྲེལ་འབྱུང་ལྡོག་མཐར་ཆགས་དང་ཐོད་རྒལ་གང་ཡིན། ཤེས་བྱའི་གཞི་ལྔ་མཐའ་གསུམ་དུ་བསྡུ་སྐབས། འདུས་མ་བྱས་དང་ལྡན་མིན་འདུས་མ་བྱས་དང་ལྡན་མིན་འདུ་བྱེད་ཀྱི་དོག་གནས། ཀུན་གཞི་དང་ཉོན་ཡིད་ཀྱི་ཡུལ་དང་དབང་པོ་གང་ཡིན། སྤྱིར་དེ་གཉིས་དབང་སྐྱེས་ཀྱི་བློ་ཡིན་མིན། ཀུན་གཞིའི་འཁོར་གྱི་ཀུན་འགྲོ་ལྔའི་ངོས་འཛིན། ཉོན་ཡིད་དང་ཡིད་རྟོག་བཅས་སོགས་ཀྱི་ཁྱད་པར། ཡུལ་ཅན་ཡིན་ན་བློ་ཡིན་པས་ཨི་ཁྱབ། སྤྱིར་ཡུལ་ཅན་ལ་གང་ཟག་སོགས་དབྱེ་བ་དུ་ཡོད། ཡིད་ཀྱི་མངོན་སུམ་ངོས་འཛིན། དེའི་ཡུལ་ཆོས་ཁམས་ཡིན་མིན། ཡིན་ན་སྟོང་ཉིད་མངོན་སུམ་རྫོགས་པའི་བློ་དེ་ཡིད་མངོན་ཡིན་མིན་དང་། སྟོང་ཉིད་ཆོས་ཁམས་བདུན་པོ་ལས་གང་ཡིན། རང་རིག་མངོན་སུམ་གྱི་ངོས་འཛིན། ཡིད་མངོན་དང་རང་རིག་མངོན་སུམ་རྣལ་འབྱོར་མངོན་སུམ་གསུམ་གྱི་ཁྱད་པར། དེ་གསུམ་ཀ་ཡིད་མངོན་དུ་འདུ་མིན། ཡིད་ངོར་དབྱིབས་དང་ཁ་དོག་ཡུལ་གྲུབ་སོགས་གསལ་པོར་སྣང་བ་ཕུང་ཁམས་གང་དུ་བསྡུ། དོན་སྤྱི། རིགས་སྤྱི། ཚོགས་སྤྱི། རྫས་སྤྱི་རྣམས་ཀྱི་ཁྱད་པར་དོན་སྤྱི་དང་མེད་པ་གསལ་སྣང་གཉིས་ཀྱི་ངོས་འཛིན། འདི་ཡང་ཕུང་ཁམས་གང་གིས་བསྡུ། དོན་དམ་བློ་ཡིས་ཡུལ་ཡིན་ཚེ་བློ་གང་གི་ཡུལ་ཡིན། ཡུལ་བཞིའི་ནང་ནང་གང་ཡིན། དེ་འདྲའི་བློ་དེ་ཀུན་རྫོབ་ཡིན་མིན། ཡིན་ན་དོན་དམ་པ་བློ་ཀུན་རྫོབ་པའི་ཡུལ་དུ་གཉིས་སྣང་མ་ནུབ་པར་བྱར་རུང་མིན། གཏི་མུག་མེད་པའི་དགེ་རྩ་དང་མཚུངས་ལྡན་གྱི་འདོད་ཆགས་དེ་དགེ་མི་དགེ་གང་ཡིན་སོགས་འགྲེ། སྤྱིར་དགེ་སེམས་དང་མཚུངས་ལྡན་གྱི་མི་དགེ་བ་ཡོད་མེད། མི་དགེའི་སེམས་དང་མཚུངས་ལྡན་གྱི་དགེ་རྩ་ཡོད་མེད། ཚོར་འདུ་སོགས་བློ་ཡི་ཡུལ་ཡིན་ནམ། ཡུལ་ཅན་ཡིན་ནམ། གཉིས་ཀ་ཡིན་མིན་ལུས་ངག་གི་ངོས་འཛིན། སྤྱི་རྣམ་བྱང་ཕྱོགས་ཀྱི་ཆོས་ཐམས་ཅད་བྱང་ཕྱོགས་ལ་འདུ་མིན། འདུ་ཚེ་ཚད་མེད་བཞི་སོགས་རེ་རེ་ནས་གང་ལ་ལ་ཇི་ལྟར་བསྡུ་ཚུལ། རྒྱན་གྱི་ཟག་མེད་ཆོས་ལྔའི་སྐབས་སྤྱན་དང་གཟུངས་ཀྱི་སྒོ་དང་ཟག་མེད་ཀྱི་ཕུང་པོ་ལྔ་སོགས་མེད་པའི་རྒྱུ་མཚན། གཞན་འགྱུར་བཞིའི་ངོས་འཛིན་དང་ངེས་ཚིག །སེམས་བྱུང་ང་གཅིག་དགེ་མི་དགེ་ལུང་མ་བསྟན་གསུམ་དུ་བསྡུ་ཚུལ། ཆོས་དང་གང་ཟག་གཞི་མཐུན་ཡོད་མེད། ཡུལ་རྣམ་ཤེས་ཡུལ་ཤེར་ཕྱིན་སོགས། ཅན་གཉིས་ཀའི་གཞི་མཐུན་ཡོད་མེད། དབུ་མ་ཐལ་འགྱུར་བའི་ལུགས་ལ་ཀུན་བཏགས་མི་འདོད་པའི་རྒྱུ་མཚན། གལ་ཏེ་ཀུན་བཏགས་མེད་ཚེ་ལས་འབྲས་སོགས་ཡོད་མེད་ལ་དཔྱད། ཀུན་བཏགས་མེད་པ་དེ་ཡང་དོན་དམ་དུ་ཡིན་ནམ་ཐ་སྙད་ཡིན། དོན་དམ་དུ་ཡིན་ན་གཞན་དབང་དང་ཡང་མཚུངས་སོ། །མཛོད་དུ་སེམས་བྱུང་། ༥༡ ཚང་བར་མ་གསུངས་པའི་རྒྱུ་མཚན། སེམས་བྱུང་༥༡ དུ་མ་འདུས་པ་ཨེ་ཡོད། ཡོད་ན། ༥༡ ཏུ་བཞག་པའི་རྒྱུ་མཚན། ཆུད་མི་ཟ་བའི་རྫས་ཕུང་པོ་གང་དུ་བསྡུ།། །། ༈ ཐུག་མེད་དང་ཐུག་པ་དང་བཅས་པའི་དྲི་བའང་ཡོད།། །། ༈ སྔགས་ཕྱོགས་ཀྱི་དོག་གཅོད་ས་བོན། ལྷན་སྐྱེས་འདྲེན་བྱེད་ཀྱི་ཐབས་ལ་ཚོགས་དྲུག་གི་སྦྱོར་བ་ལ་ཁྱད་པར་ཡོད་མེད། ཡོད་ན་དེའི་ཁྱད་པར། མེད་ན་ལུས་ཤེས་དམིགས་ཀྱིས་བསལ་བའི་དགོས་པ། བུམ་དབང་གི་ལྟ་བ་ངོ་བོ་ཉིད་གསུམ་གྱི་གོ་དོན། ལྟ་བ་དང་གྲུབ་མཐའི་ཁྱད། གྲུབ་མཐའ་དང་རིག་འཛིན་གྱི་ཁྱད། ཀུན་གཞི་རྒྱུ་རྒྱུད་ལས་འཕྲོས་པའི་ལྟ་བ་འཁོར་འདས་དབྱེར་མེད་དང་། གྲུབ་མཐའ་འཁོར་འདས་དབྱེར་མེད་ཀྱི་ཁྱད། གསང་དབང་དང་ཤེར་དབང་གི་འདའ་ཀ་མ་ལ་དབང་པོའི་སྒོ་ཡི་གེས་དགག་དགོས་མིན་དབང་བཞི་པ་དང་སྦྱར་ནས་སླད་དཔྱད། རྩ་ཡིག་དབྱིབས་སོགས་དང་། སྒྲ་དང་ནུས་པ་གང་དུ་འདོད་པ། འདི་སྐབས་ཀྱི་སྙིང་པོ་རླུང་དཀྱིལ་གྱི་ངོས་འཛིན། རྡོ་རྗེ་རྦ་རླབས་ལམ་གསུམ་གྱི་ངོས་འཛིན་ཞིབ་ཆ། ས་བོན་དང་བག་ཆགས་ཀྱི་ཁྱད་པར་རྩ་བའི་འགྲོས་སོགས་ཀྱི་དོན་དང་འགྲོས་བཞི་ཐིམ་ལུགས། ཟུང་འཇུག་གི་ངོ་བོ་ཉིད་སོགས་ལྟ་བ་དུག་མེད་བཞིའི་ངོ་བོ་ལ་ཁྱད་ཅི་ཡོད། གདན་གྱི་ཉི་ཟླ་དང་མངོན་བྱང་གི་ཉི་ཟླ་གཉིས་གཅིག་མིན། རླུང་དབུ་མར་ཐིམ་པ་དང་རེངས་པའི་ཁྱད་པར། ལྔ་པའི་ཁྲིད་ཡིག་ཏུ་གསང་དབང་གི་ས་བརྩི་ཚུལ་གཞན་དང་མ་འདྲ་བའི་གནད། མཁྱེན་བརྩེའི་ཁྲིད་ཡིག་ཏུ་སློབ་བཤད་པ་སྦྱང་གཞི་ཕྱེད་དང་ལྔ། ཚོགས་བཤད་པ་ཕྱེད་དང་བཞི་ཞེས་པའི་ངོས་འཛིན། ཀླུ་སྒྲུབ་དང་ཀུན་གཞིའི་སྐབས་བཞེད་ཚུལ་མ་མཐུན་པའི་འགལ་སྤོང་། སྲུབ་ཤིང་འཁོར་ལོའི་དོན།། །། ༈ རྒྱུད་བཅོ་བརྒྱད་སྐུ་གསུང་ཐུགས་སོགས་དཔུང་འཇོག་བྱེད། ཐབས་གྲོལ་ལམ་གྱི་དོག་གནས། ཐེག་པ་ལམ་ཞུགས་ཀྱི་བཤད་པའི་དོན་གནས་ཀློང་གསལ་རྒྱུད་ཚོལ། ཡོ་ག་སྡེ་གསུམ་གྱི་ལྟ་བའི་ཁྱད་པར། དབང་། བྱིན་རླབས། རྗེས་གནང་། རིག་གཏད། སྒོམ་ལུང་བཅས་ཀྱི་ཁྱད་པར། སེམས་ཀློང་མན་ངག་སྡེ་གསུམ་གྱི་ལྟ་བའི་ཁྱད་པར། བསྙེན་སྒྲུབ་ལས་གསུམ་གྱི་ཆོ་གའི་ཁྱད་པར། སྒྲུབ་ཁོག་དང་དཀྱིལ་ཆོག་དང་བསྙེན་ཡིག་སོགས་ཀྱི་ཁྱད་པར།། །། ༈

[edit]

dris lan mdor bsdus skor/ @#/__/dris lan mdor bsdus skor bzhugs so/_/dri ba rnams kyi lan mdor bsdus brjod pa/__mkha' spyod ma'i byin rlabs zer ba'i rgyu mtshan ni/__bde kye lta bu ma rgyud kyi dbang bskur tshad ldan thob pa'i gang zag la/__ye shes skye ba'i sna 'dren du dbang bzhi'i snying po byin rlabs kyi tshul du bsdus te bskur ba las/__dbang ma thob pa'i gang zag la byin rlabs bya mi rung bas de ltar btags/__don du dbang byin rlabs gnyis ka dbang bzhi tsam du gzhi mthun kyang /__cho ga rgyas bsdus sogs khyad par chen po yod pa/__tha snyad du mkha' spyod ma'i byin rlabs zer ba ma gtogs/__dbang zer srol med//__//__!_mdun bskyed kyi rten gzhi'i dkyil 'khor gyi gtso bo sin+d+hU ra'i dkyil 'khor yin//__//__!_lha bskyed skabs su sku tshom bu'i dkyil 'khor ni brda tsam yin kyang de'i 'og tu rdo rje'i sa gzhi dang /__phyi rol du rdo rje'i rwa gur yangs shing rgya che bar bsgoms pa'i dbus su 'byung bzhi ri rab/__thod pa bdud rtsis gang ba dang bcas pa'i steng /__sin dkyil nyid chos 'byung gi gzhal yas khang gi dbus su sngags rnams lhar bskyed pa yin/__tshom bu'i dkyil 'khor la lha bskyed rgyu med/__'ga' zhig gis tshom bu'i dkyil 'khor la mkha' spyod ma zhal phyag yongs rdzogs bris pa ni nor ba red//__//__!_mdun bskyed yod skabs gtor ma mdun bskyed kho na la phul kyang 'thus yod/__tshar lugs cho ga nag 'gros su gtor mgron spyan 'dren gsungs pas/__de ltar na gtor mgron dang mdun bskyed gnyis ka la phul ba'am/__gtor mgron spyan drangs pa kho na la phul pa'am/__yang na gtor mgron spyan drangs pa mdun bskyed la bstims nas phul kyang chog_/__!_/lho sgo'i skabs rnam shes dang bcas pa'i byang bu bsregs thabs med pas/__rnam shes nam mkhar spar ba'i byang bu phung po'i tshul du bsreg__/de nas rnam shes nam mkhar spar ba la lam sbyang bstan sogs byed pa gsar ma phal cher gyi srol yin/__gzhan du lam sbyang bstan dang rnam shes spar ba sngon du byas nas/__byang bu bsreg pa'ang mang ngo //__//__!_grub pa bzhi zhes pa rnying ma'i chos skad yin te/__/chos nyid ngo bo nyid kyis grub pa/__/chos can rang bzhin gyis grub pa/__/byin gyis brlabs pas grub pa/__mthus grub pa bzhi'o/__/de dang gnas ri la sbyar na/__gnas kyi sa rdo ri brag sogs ngo bo stong pa nyid chos kyi sku las ma g.yos pas chos nyid ngo bo nyid kyis grub pa/__rnam pa sangs rgyas dang byang chub sems dpa'i thugs rje las gnas kyi bkod pa rang byon sogs gzugs sku'i tshul du shar ba chos can rang bzhin gyis grub pa/__de lta bu'i gnas de la gang zag khyad par can gyis sgrub pa dang /__rab gnas dang /__gnas chen byin 'bebs sogs mdzad pas slar yang byin rlabs can du gyur pa byin gyis brlabs pas grub pa/__de la brten nas dad pa can gyis phyag mchod bskor ba sogs bgyis pas rgyud byin gyis brlab cing dngos grub stsol nus pa mthus grub pa ste/__de lta bu'i grub pa bzhi dang ldan pas thams cad kyi phyag dang mchod pa'i rten du gyur pa ni gnas kyi mtshan nyid yin no//__//__!_mtha' drug tshul bzhi zhes pa mdo rgyud thams cad kyi bshad thabs yin pas rgyas par spros na mtha' klas pa zhig yod kyang /__ming tsam gyi sgo nas mdor bsdu na mtha' drug ni/__mdo sngags spyi dang /__khyad par mdo 'chad pa'i skabs su nye bar mkho ba ste/__'jam mgon sa paN gyis/__gzhung lugs chen po bshad pa la mtha' drug shes dgos te/__dgongs pa dang dgongs pa ma yin pa/__drang ba'i don dang nges pa'i don/__sgra ji bzhin pa dang ji bzhin ma yin pa'o/_/zhes gsungs pa ltar/__dgongs pa can ni sangs rgyas kyi gsung rab gang zhig__/dngos su gsungs pa de ltar ma yin par don gzhan la dgongs pa btsal te bshad dgos pa/__dgongs pa can ma yin pa ni/__sangs rgyas kyi gsung rab gang zhig__/dgongs pa gzhan nas btsal mi dgos par gsungs pa ji lta ba bzhin bshad chog pa/__drang ba'i don ni gdul bya 'ga' zhig rjes su gzung ba'i phyir kun rdzob kyi bden pa gtso bor bton nas rim gyis kha drang ba'i ched du gsungs pa/__nges pa'i don ni/__gdul bya dbang po rnon po rnams la nges pa'i don gtso bor bton nas gsungs pas/__tshig de nyid kyi rjes su 'brangs pas don phyin ci ma log par rtogs pa/__sgra ji bzhin pa ni/__sbyin pa btang bas longs spyod 'byung ba dang /__tshul khrims bsrungs pas mtho ris thob pa sogs ji skad gsungs pa ltar bshad chog pa/__sgra ji bzhin ma yin pa ni/__mdo las/__pha dang ma ni gsad bya zhing /__zhes pa lta bu la mtshon na/__pha gzung ba dang /__ma 'dzin pa la dgongs pas gzung 'dzin gyi rtog pa bcom pa'i don la 'jug pas mtshon ji skad gsungs pa bzhin thad kar bshad du mi btub pa rnams so/__/tshul bzhi ni/__tshig don spyi don/__sbas don/__mthar thug gi don dang bzhi yin/__de gtso bo sngags 'chad pa la 'jug ste/__tshig don ni/__rgyud kyi tshig rnams kyi 'bru don ma nor bar 'chad pa la zer/__spyi don ni/__sngags bla med la mtshon na/__bskyed rim/__sbas don rdzogs rim/__mthar thug gi don zung 'jug sku dang ye shes sogs kyi rnam par bzhag pa rnams yin no//__//__!_tshar lugs mkha' spyod cho ga nag 'gros ma'i dur bdag gtor bsngos skabs dzaHhU~M ba~M hoHgnyis gsungs pa snga ma gtor 'gron spyan 'dren pa'i sngags dang /__phyi ma mdun bskyed la bstim pa'i sngags red//___//__!__rnal 'byor ma'i rigs bdag rnam snang la he ru ka zhes pa'i tha snyad btags pas rus pa dang rin po che'i rgyan gnyis ka yod/__de'ang rus pa'i rgyan la rin po che'i phras btab pa yin/__/yum dngos su ma gsungs pa dang /__me phung mi dgos//___//__!__rdzogs rim skabs/__dbu ma'i mas sne'i dga' 'khyil dmar pos bde ba dang /__yas sna'i dkar pos stong pa bsgrub pa'i dmigs pa byed pa khrid yig chen mo sogs thams cad kyi dgongs pa yin//___//__!__rlung lus la gnas pas bde ba sgrub pa'i skabs/__sngar rlung byang ba dang /__dmigs pa gsal po yod na rlung ma bzung yang rung /__de min bum can dang dmigs pa sbrags na legs//___//__!__gnyis bral 'chad dus zhal shes gsum zer ba 'di la 'chad tshul mang po zhig 'dug kyang /__don du gnyis bral ni rtsa dbu ma'i mngon brjod yin pas/__dbu ma 'chad dus zhal shes gsum/__zhes bskyed rim phag mo mkha' spyod dang /__rdzogs rim rtsa dbu ma zung 'brel du 'chad pa'i skabs zhal shes gsum yod ces pa'i don lags/__gsum po de gang zhe na/__yongs grags su sngon 'gro'i skabs bla ma bskyed pa dang bstim pa'i zhal shes gnyis/__dngos gzhi'i skabs bsam mi khyab thun mong ma yin pa'i zhal shes dang gsum la mdzad/__'gal zhig gis zhal shes thams cad 'dir bsdu ba'i dbang du byas te/__sngon 'gro'i skabs bla ma bskyed bstim gyi zhal shes gnyis gcig tu brtsis/__dngos gzhir lus dkyil thun mong ma yin pa'i zhal shes/__mjug tu bsam mi khyab thun mong ma yin pa'i zhal shes so zer ba'ang snang /__skye 'gag gnas gsum bral ba sogs kyi don zhwa lu mchog sprul rin po ches mdzad pa 'di kas 'thus pas dpe bshu thub na legs//___//__!__lus dkyil yod skabs go cha bkod lugs dmigs pa gsal thebs na phyi nang gi lha thams cad la ye shes pa bstim pa yin pas rmor chen gsung ltar phyi nang gi rnal 'byor ma thams cad kyi gnas su bkod thub na legs/__de tsam gsal ma thebs na/__phyi'i rnal 'byor ma la dngos su gsal btab nas lus dkyil rnams la'ang go chas rgyas btab yod snyam pa tsam byas na 'thus tshul gsung rgyun las 'byung //___//__!__bsam mi khyab thun min skabs/__lus kyi shul bug pa ha re yod pa zhes pa'i don/__rags lus yongs rdzogs dwang ma'i lus mkha' spyod ma la thim tshar ba'i rjes shul na rang gi gos bug pa ha re yod pa tsam lus pa la zer ba yin gyi/__lus la bug pa ha re yod zer ba'i don ga la yin//___//__!__dbu ma kha dbye'i skabs/__khrid yig chen mor rtsa gsum gyi nang mes khengs gsungs pa med/__don du 'bar ba'i mes lus kyi nang thams cad khengs/__khams snyigs ma rnams bsregs/__dwang ma rnams dbu mar 'dus pa bsgom dgos rgyu yin/__lar khrid yig thams cad go bsdur na bla ma rnams kyi dgongs phyogs lta bus cung mi 'dra ba mang bas/__rang lugs mkhyen brtses mdzad pa'i khrid yig chen mo mkha' spyod bgrod pa'i sne lam kho na dang /__ngag 'don gnas gsar bas mdzad pa'i sgrub thabs nag 'gros ltar gtso bor byed dgos pa thugs nges zhu//___//__!__nA ro pa'i slob ma gnyis skyes mchog gnyis zhes pa'i gnyis skyes ni bram ze'i ming yin pas/__bram ze'i rigs su 'khrungs pa'i slob ma mchog ma na ka shrI dang /__rat+na rak+Shita gnyis lags//___//__!__sems bskyed tshad med rgyu 'bras bu song ba ni/__dang po smon 'jug gi sems bskyed rgyu dang /__de nas sems can thams cad bde ba dang sogs tshad med bzhi 'bras bu'i tshul du bsgom pa sgrub thabs phal cher ltar dang /__de gnyis ngo bo dbyer med ni/__smon 'jug gi sems bskyed las tshad med bzhi logs su ma bsgoms kyang /__smon 'jug gi sems bskyed la tshad med bzhi don gyis tshang ba lags//___//__!__bdag gi gzhi sbyangs bsgyur skabs/__bla ma rang la bstims pas rang gi lus 'od kyi rang bzhin lta bur gyur pa'i snying ga'i thad du chos 'byung sogs bsgom/__de'i 'od kyis lus 'od kyi gong bur sbyangs/__de las rnal 'byor ma'i skur bsgyur ba yin/__rdor sems bsgom bzlas skabs rang tha mal pa'i lus rten 'di ga'i spyi bor bla ma rdo rje sems dpa' mtho tshad du bsgom//___//__!__rnal 'byor ma'i tshogs brgya 'bul mkhan ma thos/__'bul na ni los chog__/'bul lugs cho ga tshar gcig bdag 'jug yan grub nas/__tshogs byin rlabs nas lhag ma'i bar grangs gsog__/brgya dus gcig ma tshar na gang tshar gyi mtshams rjes chog bya/__slar cho ga bskyar bas 'thus//___//__!__dbang gi ngo bo ni/__rnal 'byor bla med kyi dbang du byas na/__rang rgyud la sku bzhi'i sa bon nus ldan du byed pa'i sngags kyi cho ga'i khyad par/__nges tshig ni/__a b+hiShiny+tsa zhes pa'i sgra las drangs na mngon par gtor ba ste sgo gsum cha mnyam dang bcas pa'i dri ma gtor ba'am/__a b+hi She ka ta zhes pa'i sgra las drangs na mngon par blugs pa'am 'jog pa ste/__sku bzhi'i sa bon rgyud la 'jog pa dbye/__spyir/__bum/__gsang /__shes rab ye shes/__dbang bzhi pa bzhir 'du/__gzhan rgyud sde so so'i dbang gi dbye ba phra mo bsam gyis mi khyab pa lags//___//__!__kye rdor lam dus rab thun bzhi nas/__tha ma thun gnyis yan legs/__dbang gi chu rgyun mi 'chad pa'i thabs yin/__mngon rtog gzhan tshar grangs 'don na spyir phan yon chen po yod pa gzhir bcas las/__dbang gi chu rgyun la phan pa'i tha snyad med//___//__!__dbang don gyi ye shes tshad ldan zhig rgyud la skyes nas ma nyams na/__rjes su dbang gzhan zhus pas sngags sdom mam/__dbang don gyi ye shes ngo bo gsar du thob rgyu med rung /__rnam pa sngar gyi sngags sdom mam dbang gi ye shes de je bzang du 'gro bas/__ji tsam bzang du song ba de tsam gsar thob kyi cha shas yin/__'di tsam ni lam dus tshar re tsam la yang brtsi rgyu yod//___//__!__'bras bu dman pa ste chung ngu la/__'bras bu med ces dgag sgra bzhag pa'i don/__nyan thos kyi lam la zhugs na nyan thos dgra bcom/__rang rgyal gyis rang rgyal dgra bcom/__byang sems rkyang pas sa bcu gcig pa tsam thob kyang /__mthar thug gi 'bras bu chen po sangs rgyas kyi go 'phang thob mi nus pas gnas skabs kyi 'bras bu chung ngu las med/__sngags bla med kyis bcu gsum rdo rje 'dzin pa'i sa thob nus pas 'bras bu che zhes pa'i don yin/__'o na sangs rgyas kyis gdul bya rnams la dang po nas sngags bla med mi bstan pa ci snyam na/__ji ltar byis pa gso ba dang /__/yi ge'i phyi mo klog 'jug ltar/__/de bzhin sangs rgyas gdul bya la/__/ji tsam bzod pa'i chos bstan to/__/zhes byis pa kha zas cha bskyed de gso ba dang /__yi ge ka kha nas rim par slob dgos pa ltar/__sangs rgyas kyis kyang gdul bya la thun mong ba rim gyis drang ba ma gtogs thabs med pas/__theg pa gsum dang /__rgyud sde bzhi sogs gsungs dgos pa'i rgyu mtshan de ltar lags//___//__!__bar srid dang khams gong ma rten 'brel gang gi skabs yin pa/__rten 'brel 'byung ldog mthar chags dang thod rgal gang yin/__shes bya'i gzhi lnga mtha' gsum du bsdu skabs/__'dus ma byas dang ldan min 'dus ma byas dang ldan min 'du byed kyi dog gnas/__kun gzhi dang nyon yid kyi yul dang dbang po gang yin/__spyir de gnyis dbang skyes kyi blo yin min/__kun gzhi'i 'khor gyi kun 'gro lnga'i ngos 'dzin/__nyon yid dang yid rtog bcas sogs kyi khyad par/__yul can yin na blo yin pas i khyab/__spyir yul can la gang zag sogs dbye ba du yod/__yid kyi mngon sum ngos 'dzin/__de'i yul chos khams yin min/__yin na stong nyid mngon sum rdzogs pa'i blo de yid mngon yin min dang /__stong nyid chos khams bdun po las gang yin/__rang rig mngon sum gyi ngos 'dzin/__yid mngon dang rang rig mngon sum rnal 'byor mngon sum gsum gyi khyad par/__de gsum ka yid mngon du 'du min/__yid ngor dbyibs dang kha dog yul grub sogs gsal por snang ba phung khams gang du bsdu/__don spyi/__rigs spyi/__tshogs spyi/__rdzas spyi rnams kyi khyad par don spyi dang med pa gsal snang gnyis kyi ngos 'dzin/__'di yang phung khams gang gis bsdu/__don dam blo yis yul yin tshe blo gang gi yul yin/__yul bzhi'i nang nang gang yin/__de 'dra'i blo de kun rdzob yin min/__yin na don dam pa blo kun rdzob pa'i yul du gnyis snang ma nub par byar rung min/__gti mug med pa'i dge rtsa dang mtshungs ldan gyi 'dod chags de dge mi dge gang yin sogs 'gre/__spyir dge sems dang mtshungs ldan gyi mi dge ba yod med/__mi dge'i sems dang mtshungs ldan gyi dge rtsa yod med/__tshor 'du sogs blo yi yul yin nam/__yul can yin nam/__gnyis ka yin min lus ngag gi ngos 'dzin/__spyi rnam byang phyogs kyi chos thams cad byang phyogs la 'du min/__'du tshe tshad med bzhi sogs re re nas gang la la ji ltar bsdu tshul/__rgyan gyi zag med chos lnga'i skabs spyan dang gzungs kyi sgo dang zag med kyi phung po lnga sogs med pa'i rgyu mtshan/__gzhan 'gyur bzhi'i ngos 'dzin dang nges tshig__/sems byung nga gcig dge mi dge lung ma bstan gsum du bsdu tshul/__chos dang gang zag gzhi mthun yod med/__yul rnam shes yul sher phyin sogs/__can gnyis ka'i gzhi mthun yod med/__dbu ma thal 'gyur ba'i lugs la kun btags mi 'dod pa'i rgyu mtshan/__gal te kun btags med tshe las 'bras sogs yod med la dpyad/__kun btags med pa de yang don dam du yin nam tha snyad yin/__don dam du yin na gzhan dbang dang yang mtshungs so/__/mdzod du sems byung /__51_tshang bar ma gsungs pa'i rgyu mtshan/__sems byung 51_du ma 'dus pa e yod/__yod na/__51_tu bzhag pa'i rgyu mtshan/__chud mi za ba'i rdzas phung po gang du bsdu//___//__!__thug med dang thug pa dang bcas pa'i dri ba'ang yod//___//__!__sngags phyogs kyi dog gcod sa bon/__lhan skyes 'dren byed kyi thabs la tshogs drug gi sbyor ba la khyad par yod med/__yod na de'i khyad par/__med na lus shes dmigs kyis bsal ba'i dgos pa/__bum dbang gi lta ba ngo bo nyid gsum gyi go don/__lta ba dang grub mtha'i khyad/__grub mtha' dang rig 'dzin gyi khyad/__kun gzhi rgyu rgyud las 'phros pa'i lta ba 'khor 'das dbyer med dang /__grub mtha' 'khor 'das dbyer med kyi khyad/__gsang dbang dang sher dbang gi 'da' ka ma la dbang po'i sgo yi ges dgag dgos min dbang bzhi pa dang sbyar nas slad dpyad/__rtsa yig dbyibs sogs dang /__sgra dang nus pa gang du 'dod pa/__'di skabs kyi snying po rlung dkyil gyi ngos 'dzin/__rdo rje rba rlabs lam gsum gyi ngos 'dzin zhib cha/__sa bon dang bag chags kyi khyad par rtsa ba'i 'gros sogs kyi don dang 'gros bzhi thim lugs/__zung 'jug gi ngo bo nyid sogs lta ba dug med bzhi'i ngo bo la khyad ci yod/__gdan gyi nyi zla dang mngon byang gi nyi zla gnyis gcig min/__rlung dbu mar thim pa dang rengs pa'i khyad par/__lnga pa'i khrid yig tu gsang dbang gi sa brtsi tshul gzhan dang ma 'dra ba'i gnad/__mkhyen brtse'i khrid yig tu slob bshad pa sbyang gzhi phyed dang lnga/__tshogs bshad pa phyed dang bzhi zhes pa'i ngos 'dzin/__klu sgrub dang kun gzhi'i skabs bzhed tshul ma mthun pa'i 'gal spong /__srub shing 'khor lo'i don//___//__!__rgyud bco brgyad sku gsung thugs sogs dpung 'jog byed/__thabs grol lam gyi dog gnas/__theg pa lam zhugs kyi bshad pa'i don gnas klong gsal rgyud tshol/__yo ga sde gsum gyi lta ba'i khyad par/__dbang /__byin rlabs/__rjes gnang /__rig gtad/__sgom lung bcas kyi khyad par/__sems klong man ngag sde gsum gyi lta ba'i khyad par/__bsnyen sgrub las gsum gyi cho ga'i khyad par/_sgrub khog dang dkyil chog dang bsnyen yig sogs kyi khyad par//___//__!