JKW-KABUM-07-JA-015-013

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 7, sde tshan 15, Text 13, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ནཱ་རོ་པ་ (Nāropa)
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 7: 303-. Khams sde dge rdzong sar dgon: Rdzong sar blo gros phun tshogs, 2020.
Genre
Cycle	ནཱ་རོ་མཁའ་སྤྱོད་མ་ (na ro mkha' spyod ma)
Deity	rdo rje rnal 'byor ma

1 Texts in this Section (sde tshan or chos tshan)

13 449-452	བསྟོད་གསོལ་ཌཱ་ཀི་དགྱེས་རོལ། bstod gsol DA ki dgyes rol Supplications - gsol 'debs   ·   Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

བསྟོད་གསོལ་ཌཱ་ཀི་དགྱེས་རོལ། རྗེ་བཙུན་རྡོ་རྗེ་རྣལ་འབྱོར་མ་ལ་བསྟོད་ཅིང་གསོལ་བ་གདབ་པ་མཁའ་སྤྱོད་ཌཱཀྐི་དགྱེས་པའི་རོལ་མོ་ཞེས་བྱ་བ་བཞུགས་སོ། །ན་མོ་གུ་རུ་ཤྩཱ་བྷེ་ད་བཛྲ་ཡོ་གི་ནྱཻ། རབ་དམར་རྣམ་ཐར་གསུམ་ལྡན་དཀྱིལ་འཁོར་དབུས། །རབ་སྒེག་པདྨ་བཾ་རོ་ཉི་མའི་སྟེང་། །རབ་མཛེས་བདེན་གཉིས་ཞལ་ཅན་རྣལ་འབྱོར་མ། །རབ་འབྱམས་རྒྱལ་བ་ཀུན་ཡུམ་བསྟོད་པར་བགྱི། །ཤིན་ཏུ་རྣམ་དག་རྣམ་ཀུན་མཆོག་ལྡན་ལས། །ཟུང་འཇུག་སྒྱུ་འཕྲུལ་དྲྭ་བའི་ཟློས་གར་ནི། །བཞིན་ལེགས་མཚན་དཔེའི་སྣང་ཆར་ཡོངས་ཤར་བའི། །ལོངས་སྤྱོད་ཡོངས་རྫོགས་འཁོར་ལོར་ཕྱག་འཚལ་བསྟོད། །ཐབས་མཆོག་ཧེ་རུ་ཀཿདཔལ་ལང་ཚོ་ལ། །ཤེས་རབ་དབྱིངས་ཀྱི་བཙུན་མོའི་སྒྱུ་མ་ཡིས། །ཨེ་ཝཾ་གཉིས་སུ་མེད་པར་ལེགས་འཁྱུད་པའི། །ཁ་སྦྱོར་རྡོ་རྗེའི་སྐུ་ལ་ཕྱག་འཚལ་བསྟོད། །གཟུང་འཛིན་སྲིད་པའི་འཕོ་ཆགས་རྒྱུ་དང་བཅས། །ཟག་བྲལ་དཔྱིད་ཀྱི་ཐིག་ལེར་འཆར་བ་ལས། །འབར་གཡོ་བརྟན་པའི་ཉམས་བརྒྱས་སྒེག་པ་པོ། །བདེ་ཆེན་ནཱ་དའི་གསུང་ལ་ཕྱག་འཚལ་བསྟོད། །རྡུལ་བྲལ་ཞི་བ་དམ་པའི་གྲོང་ཁྱེར་དུ། །རྣམ་མང་སྤྲོས་པའི་འཇུག་ལྡང་སིམ་གྱུར་པས། །གཉིས་སྣང་གློ་བུར་མཚན་མ་ལས་གྲོལ་བའི། །རང་བཞིན་མེད་པའི་ཐུགས་ལ་ཕྱག་འཚལ་བསྟོད། །གཞན་ཕྱིར་བརྩེ་བའི་བརླན་གྱིས་དྲངས་པ་ཡིས། །ཁྱོད་ཞབས་ནོར་བུའི་ཆུ་གཏེར་ལ་རེག་པས། །གྲུབ་གཉིས་འདོད་དགུ་ལྷུག་པར་འཇོ་བའི་ཕྱིར། །ཡོན་ཏན་སྙིང་རྗེས་ཡོངས་གང་ཕྱག་འཚལ་བསྟོད། །བརྟན་གཡོ་ཀུན་ལ་ཁྱབ་པའི་བདག་ཉིད་ནི། །མཐའ་ཀླས་ཡིད་ཅན་ཁམས་དབང་བསམ་པ་དང་། །རྗེས་སུ་མཐུན་པར་སྣ་ཚོགས་གཟུགས་འཆང་བའི། །ཕྲིན་ལས་རྒྱུན་མི་ཆད་ལ་ཕྱག་འཚལ་བསྟོད། །མཆོག་ཏུ་མི་འགྱུར་ཆོས་དབྱིངས་སྙིང་པོ་ལས། །ཐབས་མཁས་ཡེ་ཤེས་སྐུ་ཡི་རོལ་མོ་ཡིས། །སྲིད་དང་ཞི་བའི་ཕ་མཐར་མི་གནས་པའི། །རྣམ་འཕྲུལ་འགོགས་པ་མེད་ལ་ཕྱག་འཚལ་བསྟོད། །དེ་ལྟར་བསྟོད་ཅིང་གསོལ་བ་བཏབ་པའི་མཐུས། །གནས་སྐབས་ལམ་མཆོག་སྒྲུབ་པའི་འགལ་རྐྱེན་གེགས། །མཐའ་དག་སྤངས་ཤིང་མཐུན་རྐྱེན་ཕུན་ཚོགས་པས། །རྣལ་འབྱོར་གསང་མཐའི་བདུད་རྩིས་སྨིན་པར་ཤོག །ཁྱད་པར་ཕྱི་སྣོད་ཐར་པ་ཆེན་པོའི་གྲོང་། །ནང་བཅུད་འགྲོ་ཀུན་རྗེ་བཙུན་ཌཱ་ཀྐིཾའི་སྐུར། །ཡོངས་ཤར་ཐ་མལ་སྣང་ཞེན་ཀུན་བཅོམ་པས། །བུམ་དབང་གྲུབ་མཐའ་རྙོགས་པར་བྱིན་གྱིས་རློབས། །ཤེས་རབ་རྡོ་རྗེ་རྣལ་འབྱོར་གཏུམ་མོའི་མེས། །ཐབས་མཆོག་བདེ་ཆེན་དམ་ཚིག་བསྲེགས་བཞུའི་ཕུལ། །ཟུང་འཇུག་དྷཱུ་ཏིའི་དབྱིངས་སུ་ཐིམ་པ་ལས། །གསང་དབང་གྲུབ་མཐའ་རྙོགས་པར་བྱིན་གྱིས་རློབས། །དངོས་ཡིད་ཕྱག་རྒྱ་མཛེས་མའི་སྙོམས་འཇུག་གིས། །ཆར་ཡང་ཨེ་ཝྃ་མཱ་ཡར་དྲངས་པའི་མོད། །ཞུ་བདེ་མི་རྟོགས་དགའ་བཞིའི་ཏིང་འཛིན་རོས། །ཤེར་དབང་གྲུབ་མཐའ་རྙོགས་པར་བྱིན་གྱིས་རློབས། །ལྷན་སྐྱེས་བདེ་སྟོང་འབར་བའི་སྣང་བ་ཆེས། །མཁའ་ཁྱབ་མཁའ་ཡི་རྡོ་རྗེ་བཙུན་མོའི་ཞལ། །དུས་གསུམ་འདུ་འབྲལ་མེད་པར་མཇལ་བ་ཡིས། །ཚིག་དབང་གྲུབ་མཐའ་རྙོགས་པར་བྱིན་གྱིས་རློབས། །གལ་ཏེ་དུས་འདིར་གྲུབ་མཐའ་མ་རྙོགས་ན། །ནམ་ཞིག་འཕོས་ཚེ་དཔའ་བོ་རྣལ་འབྱོར་མས། །ཡིད་འོང་མཆོད་པའི་སྤྲིན་གྱིས་མདུན་བདར་ཏེ། །དག་པའི་ཞིང་དུ་འཁྲིད་པར་བྱིན་གྱིས་རློབས། །མཐར་ཐུག་གནས་དང་ཡུལ་གྱི་རླུང་སེམས་ཀུན། །འོད་གསལ་ཨ་བ་དྷཱུ་ཏིར་ཕྱག་བྱས་པས། །སྐུ་གསུམ་དབྱེར་མེད་བཛྲ་ཝཱ་ར་ཧཱིའི། །གོ་འཕང་མཆོག་ལ་འགྲོ་ཀུན་འདྲེན་གྱུར་ཅིག །དེ་ལྟར་ཨཽཌྜཱི་ཡཱ་ནའི་ས་སྤྱོད་དབང་པོའི་བློས་ལེགས་པར་བཀྲལ་བའི་རྗེ་བཙུན་རྡོ་རྗེ་རྣལ་འབྱོར་མ་ལ་བསྟོད་ཅིང་གསོལ་བ་གདབ་པ་མཁའ་སྤྱོད་ཌཱ་ཀྐི་དགྱེས་པའི་རོལ་མོ་ཞེས་བྱ་བ་འདི་ཡང་གཙུག་ལག་དུ་མར་གཟིགས་པའི་སྤྱན་ཡངས་བླ་མ་དམ་པ་ཝཱ་གིནྡྲ་སུ་སིདྡྷིའི་བཀས་བསྐུལ་བ་ལས། ཀུན་རྨོངས་དཱ་རི་དྲ་པ་ཚངས་སྲས་དགྱེས་པའི་བློ་ལྡན་དུ་འབོད་པས་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བ་ཛ་ཡནྟུ།། །། ༈

[edit]

bstod gsol DA ki dgyes rol/ rje btsun rdo rje rnal 'byor ma la bstod cing gsol ba gdab pa mkha' spyod DAk+ki dgyes pa'i rol mo zhes bya ba bzhugs so/__/na mo gu ru sh+tsA b+he da badz+ra yo gi n+yai/__rab dmar rnam thar gsum ldan dkyil 'khor dbus/__/rab sgeg pad+ma baM ro nyi ma'i steng /__/rab mdzes bden gnyis zhal can rnal 'byor ma/__/rab 'byams rgyal ba kun yum bstod par bgyi/__/shin tu rnam dag rnam kun mchog ldan las/__/zung 'jug sgyu 'phrul drwa ba'i zlos gar ni/__/bzhin legs mtshan dpe'i snang char yongs shar ba'i/__/longs spyod yongs rdzogs 'khor lor phyag 'tshal bstod/__/thabs mchog he ru kaHdpal lang tsho la/__/shes rab dbyings kyi btsun mo'i sgyu ma yis/__/e waM gnyis su med par legs 'khyud pa'i/__/kha sbyor rdo rje'i sku la phyag 'tshal bstod/__/gzung 'dzin srid pa'i 'pho chags rgyu dang bcas/__/zag bral dpyid kyi thig ler 'char ba las/__/'bar g.yo brtan pa'i nyams brgyas sgeg pa po/__/bde chen nA da'i gsung la phyag 'tshal bstod/__/rdul bral zhi ba dam pa'i grong khyer du/__/rnam mang spros pa'i 'jug ldang sim gyur pas/__/gnyis snang glo bur mtshan ma las grol ba'i/__/rang bzhin med pa'i thugs la phyag 'tshal bstod/__/gzhan phyir brtse ba'i brlan gyis drangs pa yis/__/khyod zhabs nor bu'i chu gter la reg pas/__/grub gnyis 'dod dgu lhug par 'jo ba'i phyir/__/yon tan snying rjes yongs gang phyag 'tshal bstod/__/brtan g.yo kun la khyab pa'i bdag nyid ni/__/mtha' klas yid can khams dbang bsam pa dang /__/rjes su mthun par sna tshogs gzugs 'chang ba'i/__/phrin las rgyun mi chad la phyag 'tshal bstod/__/mchog tu mi 'gyur chos dbyings snying po las/__/thabs mkhas ye shes sku yi rol mo yis/__/srid dang zhi ba'i pha mthar mi gnas pa'i/__/rnam 'phrul 'gogs pa med la phyag 'tshal bstod/__/de ltar bstod cing gsol ba btab pa'i mthus/__/gnas skabs lam mchog sgrub pa'i 'gal rkyen gegs/__/mtha' dag spangs shing mthun rkyen phun tshogs pas/__/rnal 'byor gsang mtha'i bdud rtsis smin par shog__/khyad par phyi snod thar pa chen po'i grong /__/nang bcud 'gro kun rje btsun DA k+kiM'i skur/__/yongs shar tha mal snang zhen kun bcom pas/__/bum dbang grub mtha' rnyogs par byin gyis rlobs/__/shes rab rdo rje rnal 'byor gtum mo'i mes/__/thabs mchog bde chen dam tshig bsregs bzhu'i phul/___/zung 'jug d+hU ti'i dbyings su thim pa las/__/gsang dbang grub mtha' rnyogs par byin gyis rlobs/__/dngos yid phyag rgya mdzes ma'i snyoms 'jug gis/__/char yang e wa~M mA yar drangs pa'i mod/__/zhu bde mi rtogs dga' bzhi'i ting 'dzin ros/__/sher dbang grub mtha' rnyogs par byin gyis rlobs/__/lhan skyes bde stong 'bar ba'i snang ba ches/__/mkha' khyab mkha' yi rdo rje btsun mo'i zhal/__/dus gsum 'du 'bral med par mjal ba yis/__/tshig dbang grub mtha' rnyogs par byin gyis rlobs/__/gal te dus 'dir grub mtha' ma rnyogs na/__/nam zhig 'phos tshe dpa' bo rnal 'byor mas/__/yid 'ong mchod pa'i sprin gyis mdun bdar te/__/dag pa'i zhing du 'khrid par byin gyis rlobs/__/mthar thug gnas dang yul gyi rlung sems kun/__/'od gsal a ba d+hU tir phyag byas pas/__/sku gsum dbyer med badz+ra wA ra hI'i/__/go 'phang mchog la 'gro kun 'dren gyur cig__/de ltar auD+DI yA na'i sa spyod dbang po'i blos legs par bkral ba'i rje btsun rdo rje rnal 'byor ma la bstod cing gsol ba gdab pa mkha' spyod DA k+ki dgyes pa'i rol mo zhes bya ba 'di yang gtsug lag du mar gzigs pa'i spyan yangs bla ma dam pa wA gin+d+ra su sid+d+hi'i bkas bskul ba las/__kun rmongs dA ri dra pa tshangs sras dgyes pa'i blo ldan du 'bod pas yon tan rin po che du ma'i 'byung gnas dpal e waM chos ldan gyi bla brang thar pa rtser sbyar ba dza yan+tu//___//__!_