JKW-KABUM-24-YA-004

🚧 This website is under continued development. We appreciate your patience!

Previous Section Back to Volume PageNext Section

Wylie title
Location	mkhyen brtse'i bka' 'bum Volume 24, sde tshan 4, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 24: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

1 Texts in this Section (sde tshan or chos tshan)

223-225	རྩ་བརྒྱུད་ཀྱི་བླ་མ་རྗེས་སུ་དྲན་པའི་རྡོ་རྗེའི་གླུ་བྱིན་རླབས་བདུད་རྩིའི་ཆར་འབེབ། rtsa brgyud kyi bla ma rjes su dran pa'i rdo rje'i glu byin rlabs bdud rtsi'i char 'beb Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྩ་བརྒྱུད་ཀྱི་བླ་མ་རྗེས་སུ་དྲན་པའི་རྡོ་རྗེའི་གླུ་བྱིན་རླབས་བདུད་རྩིའི་ཆར་འབེབ།

༄༅། །རྩ་བརྒྱུད་ཀྱི་བླ་མ་རྗེས་སུ་དྲན་པའི་རྡོ་རྗེའི་གླུ་བྱིན་རླབས་བདུད་རྩིའི་ཆར་འབེབ་ཞེས་བྱ་བ་བཞུགས་སོ། ། ཨ་ཧོ། ནང་གསལ་གཞོན་ནུ་བུམ་སྐུ་སྤྲོས་བྲལ་གྱི་ཀློང་ནས། །འཆི་མེད་སོ་སོར་རྟོག་པའི་རིགས་མདངས་སུ་ཤར་བ། །གདོད་མིའི་མགོན་པོ་སྣང་བ་མཐའ་ཡས་དེ་དྲན་བྱུང་། །ཀ་དག་གནས་ལུགས་རྟོགས་པར་བྱིན་གྱིས་རང་རློབས་ཤིག །མི་འགྱུར་བདེ་བ་ཆེན་པོའི་ཡེ་ཤེས་ཀྱི་ཀློང་ནས། །ཁ་སྦྱོར་ཡན་ལག་བདུན་གྱི་སྣང་སྙན་དུ་ཤར་བ། །ལོངས་སྤྱོད་རྫོགས་སྐུ་ཐུགས་རྗེ་ཆེན་པོ་དེ་དྲན་བྱུང་། །ལྷུན་གྲུབ་མངོན་སུམ་རིག་པར་བྱིན་གྱིས་རང་རློབས་ཤིག །ལྔ་ལྡན་འཇའ་ཟེར་འཁྲུགས་པའི་འོད་ཕུང་གི་ཀློང་ནས། །སྲས་བཅས་རྒྱལ་ཀུན་ཕྲིན་ལས་རང་གཟུགས་སུ་ཤར་བ། །སྤྲུལ་པའི་སྒྱུ་འཕྲུལ་པདྨ་ཐོད་ཕྲེང་དེ་དྲན་བྱུང་། །ཟུང་འཇུག་གོ་འཕང་ཐོབ་པར༴ ཟག་མེད་རྣམ་ཀུན་མཆོག་ལྡན་ཡེ་ཤེས་ཀྱི་ཀློང་ནས། །རྒྱལ་ཀུན་བསྐྱེད་དང་རོལ་པའི་ཡུམ་མཆོག་ཏུ་ཤར་བ། །ཡེ་ཤེས་ཌཱ་ཀིའི་གཙོ་མོ་མཚོ་རྒྱལ་དེ་དྲན་བྱུང་། །ཞུ་བདེའི་ལྷན་སྐྱེས་རྟོགས་པར༴ འཕགས་རྣམས་གསུང་གི་རྡོ་རྗེ་མི་ཤིག་པའི་ཀློང་ནས། །འཇམ་དཔལ་གཞོན་ནུ་མི་ཡི་རྗེ་བོ་རུ་ཤར་བ། །བཀའ་དྲིན་མཉམ་མེད་ཆོས་རྒྱལ་ཡབ་སྲས་དེ་དྲན་བྱུང་། །སྲིད་ཞི་འཁོར་ལོའི་སྒྱུར་བར༴ སྨོན་ལམ་རྣམ་པར་དག་པའི་མཐར་ཕྱིན་གྱི་འབྲས་བུ། །རིག་འཛིན་འདུས་པ་རྒྱ་མཚོའི་ཚོགས་རྗེ་རུ་ཤར་བ། །ཉང་རལ་ཆོས་དབང་ཀུན་མཁྱེན་ཆོས་རྗེ་དེ་དྲན་བྱུང་། །འབྲེལ་ཚད་དོན་དང་ལྡན་པར་བྱིན༴ སྐུ་བཞི་དབྱེར་མི་ཕྱེད་པའི་ཡེ་ཤེས་ཀྱི་ཀློང་ནས། །སེམས་དཔའ་པདྨའི་མྱུ་གུའི་རྣམ་རོལ་དུ་ཤར་བ། །རིགས་ཀུན་ཁྱབ་བདག་གཏེར་ཆེན་བླ་མ་རྗེ་དྲན་བྱུང་། །ཐུགས་ཡིད་གཅིག་ཏུ་འདྲེས་པར༴ ཨ་ཧོ། དལ་འབྱོར་རྙེད་དཀའ་འཇིག་སླའི་ངང་ཚུལ་ལ་བརྟེན་ནས། །ངེས་འབྱུང་དྲག་པོའི་རྒྱུ་འབྲས་བླང་དོར་ལ་བརྩོན་ཅིང་། །སྐྱབས་འགྲོ་སེམས་བསྐྱེད་བསགས་སྦྱོང་མོས་གུས་ཀྱི་སྙིང་པོའི། །སྔོན་འགྲོའི་རང་རྒྱུད་འབྱོངས་པར་བྱིན༴ སྨིན་བྱེད་དབང་ཐོབ་དམ་ཚིག་ཉེས་ལྟུང་དང་བྲལ་ཞིང་། །སྣང་བ་ལྷ་སྐུར་ཤར་བའི་ངལ་འཚོ་དང་སྦྲགས་ཏེ། །སྒྲ་གྲགས་སྔགས་དང་དྲན་རྟོག་ཆོས་དབྱིངས་སུ་དག་པའི། །བུམ་དབང་ལམ་བཟང་གོམ་པར་བྱིན༴ སྦྱོར་བ་བཞི་ལྡན་རླུང་གི་རེག་བྱ་ཡིས་བསྐུལ་བའི། །གཏུམ་མོའི་མེ་ལྕེ་འབར་བའི་བདེ་ཆེན་གྱི་ཉམས་འགྱུར། །གསལ་སྟོང་རྣམ་པར་མི་རྟོག་ཡེ་ཤེས་སུ་ཐིམ་པའི། །གསང་དབང་ལམ་མཆོག་གོམས་པར་བྱིན༴ དངོས་ཡིད་ཞིང་སྔགས་ལྷན་སྐྱེས་ཌཱ་ཀི་ཡི་རྩེ་དགས། །བདེ་ཆེན་ཟླ་བ་ཞུ་བའི་དགའ་བཞི་ཡི་ཉམས་འགྱུར། །དཔེ་ཡི་ལྷན་ཅིག་སྐྱེས་པའི་ལང་ཚོ་རུ་ཤར་བ། །ཤེར་དབང་ལམ་བཟང་གོམས་པར་བྱིན༴ རིག་སྟོང་རང་ངོ་ཤེས་པ་ཁྲེགས་ཆོད་ཀྱི་ལྟ་བ། །གཅིག་ཐོག་བློ་ཐག་ཆོད་པ་ཡེངས་མེད་ཀྱི་སྒོམ་པ། །གྲོལ་ཐོག་གདེངས་སུ་འཆའ་བ་བྱར་མེད་ཀྱི་འབྲས་བུ། །བཞི་པའི་ལམ་མཆོག་གོམས་པར་བྱིན༴ དབྱིངས་དང་རིག་པའི་གཟུགས་བརྙན་མངོན་སུམ་དུ་མཐོང་ནས། །གོང་འཕེལ་ཉམས་ཀྱི་སྣང་བ་ཚད་ཕེབས་སུ་རྫོགས་ཏེ། །ཆོས་ཅན་ཁྱད་ཆོས་དྲུག་ལྡན་ཆོས་དབྱིངས་སུ་ཟད་པའི། །མཐར་ཐུག་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །རྩ་གསུམ་རྒྱ་མཚོའི་ཁྱབ་བདག་ཨོ་རྒྱན་གྱི་བླ་མས། །བྱིན་རླབས་བདུད་རྩིའི་ཆར་ཆེན་མངོན་སུམ་དུ་ཕབ་ནས། །འདིར་ཚོགས་སྐལ་ལྡན་ཚོམ་བུར་འདུས་པ་ཡི་ཚོགས་རྣམས། །དོན་གཉིས་ལྷུན་གྱིས་གྲུབ་པའི་སྨོན་ལམ་ཞིག་ཞུའོ། །ཞེས་པའང་རིག་འཛིན་རྒྱལ་བའི་སྲས་པོ་འགྱུར་མེད་ཚེ་དབང་གྲགས་པའི་ཞལ་སྔ་ནས་ལྷ་རྫས་ཀྱི་རེག་བྱ་དང་རིན་ཆེན་གཉིས་པའི་མེ་ཏོག་བཅས་འདི་ལྟ་བུ་ཞིག་བྲིས་ཤིག་ཅེས་བཀའ་སྩལ་ནོར་བུའི་ཕྲེང་བས་བསྐུལ་བ་ལྟར་མཚོ་སྐྱེས་བླ་མ་དགྱེས་པའི་འཇམ་དབྱངས་མཁྱེན་བརྩེའི་དབང་པོས་དཔལ་གདོང་ལོའི་ཆོ་འཕྲུལ་ཟླ་བའི་ཡར་ངོའི་ཚེས་བཅུའི་ཚོགས་འཁོར་གྱི་མཆོད་པའི་སྐབས་གང་ཤར་བྲིས་པ་རྩ་བརྒྱུད་ཀྱི་བླ་མའི་བྱིན་རླབས་སྙིང་ལ་འཇུག་པའི་རྒྱུར་གྱུར་ཅིག། །།དགེ་ལེགས་འཕེལ།།

[edit]

rtsa brgyud kyi bla ma rjes su dran pa'i rdo rje'i glu byin rlabs bdud rtsi'i char 'beb/ @#/_/rtsa brgyud kyi bla ma rjes su dran pa'i rdo rje'i glu byin rlabs bdud rtsi'i char 'beb zhes bya ba bzhugs so/_/ a ho/__nang gsal gzhon nu bum sku spros bral gyi klong nas/__/'chi med so sor rtog pa'i rigs mdangs su shar ba/__/gdod mi'i mgon po snang ba mtha' yas de dran byung /__/ka dag gnas lugs rtogs par byin gyis rang rlobs shig__/mi 'gyur bde ba chen po'i ye shes kyi klong nas/__/kha sbyor yan lag bdun gyi snang snyan du shar ba/__/longs spyod rdzogs sku thugs rje chen po de dran byung /__/lhun grub mngon sum rig par byin gyis rang rlobs shig__/lnga ldan 'ja' zer 'khrugs pa'i 'od phung gi klong nas/__/sras bcas rgyal kun phrin las rang gzugs su shar ba/__/sprul pa'i sgyu 'phrul pad+ma thod phreng de dran byung /__/zung 'jug go 'phang thob par=__zag med rnam kun mchog ldan ye shes kyi klong nas/__/rgyal kun bskyed dang rol pa'i yum mchog tu shar ba/__/ye shes DA ki'i gtso mo mtsho rgyal de dran byung /__/zhu bde'i lhan skyes rtogs par=__'phags rnams gsung gi rdo rje mi shig pa'i klong nas/__/'jam dpal gzhon nu mi yi rje bo ru shar ba/__/bka' drin mnyam med chos rgyal yab sras de dran byung /__/srid zhi 'khor lo'i sgyur bar=__smon lam rnam par dag pa'i mthar phyin gyi 'bras bu/__/rig 'dzin 'dus pa rgya mtsho'i tshogs rje ru shar ba/__/nyang ral chos dbang kun mkhyen chos rje de dran byung /__/'brel tshad don dang ldan par byin=__sku bzhi dbyer mi phyed pa'i ye shes kyi klong nas/__/sems dpa' pad+ma'i myu gu'i rnam rol du shar ba/__/rigs kun khyab bdag gter chen bla ma rje dran byung /__/thugs yid gcig tu 'dres par=__a ho/__dal 'byor rnyed dka' 'jig sla'i ngang tshul la brten nas/__/nges 'byung drag po'i rgyu 'bras blang dor la brtson cing /__/skyabs 'gro sems bskyed bsags sbyong mos gus kyi snying po'i/__/sngon 'gro'i rang rgyud 'byongs par byin=__smin byed dbang thob dam tshig nyes ltung dang bral zhing /__/snang ba lha skur shar ba'i ngal 'tsho dang sbrags te/__/sgra grags sngags dang dran rtog chos dbyings su dag pa'i/__/bum dbang lam bzang gom par byin=__sbyor ba bzhi ldan rlung gi reg bya yis bskul ba'i/__/gtum mo'i me lce 'bar ba'i bde chen gyi nyams 'gyur/__/gsal stong rnam par mi rtog ye shes su thim pa'i/__/gsang dbang lam mchog goms par byin=__dngos yid zhing sngags lhan skyes DA ki yi rtse dgas/__/bde chen zla ba zhu ba'i dga' bzhi yi nyams 'gyur/__/dpe yi lhan cig skyes pa'i lang tsho ru shar ba/__/sher dbang lam bzang goms par byin=__rig stong rang ngo shes pa khregs chod kyi lta ba/__/gcig thog blo thag chod pa yengs med kyi sgom pa/_/grol thog gdengs su 'cha' ba byar med kyi 'bras bu/__/bzhi pa'i lam mchog goms par byin=__dbyings dang rig pa'i gzugs brnyan mngon sum du mthong nas/__/gong 'phel nyams kyi snang ba tshad phebs su rdzogs te/__/chos can khyad chos drug ldan chos dbyings su zad pa'i/__/mthar thug grub mtha' snyogs par byin gyis rang rlobs shig__/rtsa gsum rgya mtsho'i khyab bdag o rgyan gyi bla mas/__/byin rlabs bdud rtsi'i char chen mngon sum du phab nas/__/'dir tshogs skal ldan tshom bur 'dus pa yi tshogs rnams/__/don gnyis lhun gyis grub pa'i smon lam zhig zhu'o/__/zhes pa'ang rig 'dzin rgyal ba'i sras po 'gyur med tshe dbang grags pa'i zhal snga nas lha rdzas kyi reg bya dang rin chen gnyis pa'i me tog bcas 'di lta bu zhig bris shig ces bka' stsal nor bu'i phreng bas bskul ba ltar mtsho skyes bla ma dgyes pa'i 'jam dbyangs mkhyen brtse'i dbang pos dpal gdong lo'i cho 'phrul zla ba'i yar ngo'i tshes bcu'i tshogs 'khor gyi mchod pa'i skabs gang shar bris pa rtsa brgyud kyi bla ma'i byin rlabs snying la 'jug pa'i rgyur gyur cig/__//dge legs 'phel//