JKW-KABUM-20-WA-001-104

Previous Text Back to Volume PageLast text in section.

Wylie title
Location	mkhyen brtse'i bka' 'bum Volume 20, sde tshan 1, Text 104, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 20: . Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

104 187-191	ཀ་དག་གཞོན་ནུ་བུམ་སྐུའི་ཆུ་གཏེར་ལས། ཞེས་པའི་དབུ་ཅན། ka dag gzhon nu bum sku'i chu gter las/ zhes pa'i dbu can Official Letters - chab shog	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཀ་དག་གཞོན་ནུ་བུམ་སྐུའི་ཆུ་གཏེར་ལས། ཞེས་པའི་དབུ་ཅན། ཤུ་བྷ་སྱ་མི་ཏྲ་བནྡྷུ་ཀརྨ་དྷརྨ་བརྡྷ་སྱ་པ་ཎཽ་ས་མཪྤི་ཏམ྄། ཤྲཱིབིཛཡནྟུ། ཀ་དག་གཞོན་ནུ་བུམ་སྐུའི་ཆུ་གཏེར་ལས། །ལྷུན་གྲུབ་འཇའ་ལུས་རྡོ་རྗེའི་རྣམ་རོལ་ཅན། །སངས་རྒྱས་གཉིས་པ་པདྨ་ཐོད་ཕྲེང་ཞེས། །འཆི་མེད་གྲུབ་པའི་ལྷ་དེས་ཁྱོད་ལ་སྲུངས། ༡ །ཇི་ལྟར་དག་པའི་ཡིད་འོང་བཻཌཱུཪྻ། །རྙེད་པ་ཙམ་གྱིས་འདོད་དགུའི་ཆར་འབེབས་བཞིན། །ཚོགས་ཟུང་བྱེ་བས་བསྐྲུན་པའི་དལ་འབྱོར་རྟེན། །ཐོབ་པའི་མོད་ནས་ཕན་བདེའི་སྣང་བ་རྒྱས། ༢ །ཁྱད་པར་འཇིག་རྟེན་དབང་ཕྱུག་ཀརྨ་ཀས། །ཆོས་འདུལ་ཁྲིམས་ཀྱི་སྣོད་དུ་ལེགས་སྦྱར་གང་། །ངེས་འབྱུང་བློ་ཡི་འབྱོར་པས་མངོན་མཐོ་ཞེས། །ལྷར་བཅས་བསྔགས་པའི་མེ་ཏོག་གཅིག་ཏུ་འཐོར། ༣ །སྨོན་འཇུག་བྱང་ཆུབ་སེམས་ཀྱི་བསླབ་པ་ནི། །པུཎྜ་རཱི་ཀ་ལྟ་བུར་རྒྱས་པ་ལས། །གཞན་ཕན་སྦྲང་རྩིའི་ཐིགས་པ་འཇོ་བ་ཡང་། །དོན་གཉིས་བུང་བ་དགའ་བའི་དཔྱིད་དུ་གྱུར། ༤ །སྒོ་གསུམ་བྱེད་པ་ཨེ་ཝྃ་མཱ་ཡའི་དབྱིངས། །སྨིན་བྱེད་དབང་བཞིའི་བདུད་རྩིས་རྒྱུད་བརླན་པས། །བསྐྱེད་རྫོགས་ཟུང་འཇུག་དཔག་བསམ་གཞོན་ནུ་ཡིས། །མེད་སྣང་འཁོར་བའི་ཚ་གདུང་རང་སར་བཅིལ། ༥ །ཕུང་པོ་ལྔ་བྲལ་ཀ་དག་གཉུག་མའི་གཤིས། །ཅེར་གྲོལ་སྐད་ཅིག་རིག་པར་ངོ་འཕྲོད་ཅིང་། །འོད་གསལ་ལྷུན་གྲུབ་སྣང་བཞིའི་ཉེ་ལམ་ལ། །མོས་པ་བརྟན་ཁྱོད་མ་ཧཱ་སནྡྷིའི་རིགས། ༦ །དེ་སླད་དོན་ལྡན་འཚོ་བའི་ཟླ་རིས་ནི། །ཉེར་འཚེའི་ཆུ་འཛིན་གཡོ་བ་ལས་གྲོལ་ཞིང་། །ཆོས་བཞིན་སྤྱོད་པའི་སྣང་བ་རབ་འབར་བས། །འདིར་ཡང་སྤྲོ་དགའི་ཆུ་གཏེར་གཅིག་ཏུ་དགོད། ༧ །ལྷག་པར་ཤེ༷ས་བྱ་རབ༷་འབྱམས་ཀུན་གཟིགས་མ་ཕམ་གཉིས་པའི་དགེ་བའི་བཤེས། །སྙིང་པོའི་བསྟན་པའི་རྒྱལ༷་མཚ༷ན་བསྒྲེངས་མཛད་མཁས་གྲུབ་བྱེ་བའི་གཙུག་ཏོར་དེས། །དབེན་པའི་རི༷་ངོགས་ཤིན་ཏུ་ཞི་བར་ཆོས༷་དང་མཐུན་པས་འཚོ་རྣམས་ཀྱི། །ངེས༷་དོ༷ན་རྟོགས་པའི་རྒྱ༷་མཚོ༷་འཕེལ་བྱེད་སྔོན་མེད་ལེགས་བཤད་ཆུ་ཤེལ་དབང་། ༨ །ཉེ་བར་ཐོབ་པའི་སྐལ་བཟང་གིས། །དད་དང་སྤྲོ་བའི་ཀུ་མུ་དཱ། །ཅི་དགར་བྱེ་བའི་ངང་ཚུལ་ནི། །དཔྱིད་ཀྱི་དུས་སྟོན་སླར་འོང་བཞིན། ༩ །འདི་ན་སྐྱབས་ཀུན་འདུས་ཞལ་བླ་མ་རྗེའི། །བྱིན་རླབས་ཟིལ་དངར་ཁོ་ནས་འཚོ་བ་ཡང་། །ལང་ཚོའི་འདུ་བྱེད་ཉམས་པར་མ་གྱུར་བཞིན། །གྱི་ནའི་སྤྱོད་པས་རོལ་དང་ཆབ་གཅིག་པར། ༡༠ །རིས་མེད་མཁས་གྲུབ་རྒྱ་མཚོའི་ལམ་བཟང་ལ། །ཕྱོགས་སུ་ལྷུང་བའི་སྐལ་ངན་རིང་བཏང་ནས། །དག་སྣང་པདྨོ་ལྟ་བུར་རྒྱས་པ་ཡིས། །ཆོས་སྤངས་སྒྲིབ་པ་དེ་ཡང་ག་ཤེད་སོང་། ༡༡ །འོན་ཀྱང་ཟབ་དང་རྒྱ་ཆེའི་རོ་མྱོང་ཕྱིར། །གཞུང་ལུགས་ཆེ་ཕྲ་ཀློག་དང་སེམས་པ་ལ། །བྱིས་པའི་རྣམ་ཐར་ཙམ་དུ་འཛིན་དུས་འདིར། །ངལ་བ་ཕལ་ཆེར་དོན་མེད་ཁོ་ནར་ཟད། ༡༢ །ཅི་ཕྱིར་མཁས་རྣམས་ཉི་ཚེའི་ཚིག་ལ་རྩོད། །གྲུབ་པར་རློམས་རྣམས་བཟླས་བརྗོད་ཙམ་གྱིས་གཡེངས། །གཞུང་ལུགས་ཆེ་ལས་ཟ་ཆོག་ཁོ་ན་བྲིན། །དེ་ཡང་ཁུངས་མེད་འཆོལ་བར་སྤྱོད་འདི་མཚར། ༡༣ །སྐབས་སུ་གསོལ་བ། ནོར་བུའི་དཔལ་གྱིས་བསྐྲུན་མིན་ལེགས་གསུང་མཆོག །ཟང་ཟིང་ཕྲན་བུས་གཞལ་བྱ་མ་ཡིན་ཀྱང་། །གནས་སྐབས་སྣག་ཤོག་བཟོ་བོའི་འདུ་བྱེད་ཀྱི། །རིན་ཐང་ཙམ་དུ་དམིགས་པའི་དངོས་པོ་ནི། ༡༤ །སྔ་སོར་རོ་ལྡན་བཏུང་བ་ཡི། །ལོ་འདབ་ཕོན་པོ་འདི་བསྲིངས་ཤིང་། །སླད་ནས་དེ་ཙམ་སྦྱིན་ནོ་ཞེས། །དམ་བཅའི་ཡི་གེ་བསྲུབ་མེད་འགོད། ༡༥ །སླར་སྨྲས་པ། རྩ་ཁམས་དབུ་མར་ཐིམ་པའི་མགྲིན་པ་ནས། །རྒྱུད་སྔགས་མི་ཤིགས་ནཱ་དའི་རོལ་མོ་ཅན། །རྟོག་ཚོགས་འོད་གསལ་དབྱིངས་སུ་ངལ་བསོ་བ། །འཇའ་ལུས་རྡོ་རྗེའི་རྣམ་ཐར་བཟུང་གྱུར་ཅིག ༡༦ །རབ་འབྱམས་ཤེས་བྱའི་གནས་ལ་བློ་མིག་གྲོལ། །གཞན་ཕན་བདུད་རྩིའི་སྤྲིན་དཀར་ཉིན་བཞིན་འཕེལ། །སྲིད་དང་ཞི་བའི་ཤིས་དགུའི་མེ་ཏོག་གིས། །དམ་པའི་ངང་ཚུལ་ཡུན་དུ་འབར་བར་ཤོག༡༧། དེ་སྲིད་འདིར་ཡང་བརྩེ་ཞིང་གཅུགས་པའི་ཡིད། །ཉིན་མོར་བྱེད་དང་ཨུཏྤལ་ཇི་བཞིན་དུ། །རྣམ་ཀུན་མཛའ་བ་མི་ཕྱེད་བློ་གྲོས་ཀྱིས། །བྱང་ཆུབ་སྙིང་པོའི་བར་དུ་འགྲོགས་པར་སྨོན། ༡༨ །ཅེས་གང་ཤར་ཉམས་མཚར་དུ་བཀོད་པའི་ཚིག་གི་མེ་ཏོག་དོན་གྱི་འབྲས་བུས་གཏམས་པ་ལས། འདྲེན་བྱེད་ཀྱི་རཿཡིག་གཉིས་པ་གཡོ་བའི་རྟེན་ཙམ་དུ་ཏཱ་རུ་མརྡྷུའི་ཕུར་མ་བམ་པོ་གཅིག་ལ་ཕྱག་རྒྱས་བཏབ་སྟེ་ཀཱརྡྷི་ཀཱ་ཡིས་ཉ་བའི་ཤར་ཕྱོགས་ཀྱི་དགའ་བ་གཉིས་པ་ལ་ཤཱཀྱའི་དགེ་སློང་རིག་པ་འཛིན་པ་འཇམ་དབྱངས་མཁྱེན་བརྩེའི་དབང་པོས་བསྲིངས་པ་སརྦ་དཱ་ཤྲེ་ཡོ་བྷ་བ་ཏུ། །དགེའོ། །དགེའོ། །དགེའོ། །། །

[edit]

ka dag gzhon nu bum sku'i chu gter las/__zhes pa'i dbu can/ shu b+ha s+ya mi tra ban+d+hu karma d+harma bar+d+ha s+ya pa Nau sa maR+pi tama?/_shrIbidzayan+tu/_ka dag gzhon nu bum sku'i chu gter las/_/lhun grub 'ja' lus rdo rje'i rnam rol can/_/sangs rgyas gnyis pa pad+ma thod phreng zhes/_/'chi med grub pa'i lha des khyod la srungs/_1_/ji ltar dag pa'i yid 'ong baiDUR+Ya/_/rnyed pa tsam gyis 'dod dgu'i char 'bebs bzhin/_/tshogs zung bye bas bskrun pa'i dal 'byor rten/_/thob pa'i mod nas phan bde'i snang ba rgyas/_2_/khyad par 'jig rten dbang phyug karma kas/_/chos 'dul khrims kyi snod du legs sbyar gang /_/nges 'byung blo yi 'byor pas mngon mtho zhes/_/lhar bcas bsngags pa'i me tog gcig tu 'thor/_3_/smon 'jug byang chub sems kyi bslab pa ni/_/puN+Da rI ka lta bur rgyas pa las/_/gzhan phan sbrang rtsi'i thigs pa 'jo ba yang /_/don gnyis bung ba dga' ba'i dpyid du gyur/_4_/sgo gsum byed pa e wa~M mA ya'i dbyings/_/smin byed dbang bzhi'i bdud rtsis rgyud brlan pas/_/bskyed rdzogs zung 'jug dpag bsam gzhon nu yis/_/med snang 'khor ba'i tsha gdung rang sar bcil/_5_/phung po lnga bral ka dag gnyug ma'i gshis/_/cer grol skad cig rig par ngo 'phrod cing /_/'od gsal lhun grub snang bzhi'i nye lam la/_/mos pa brtan khyod ma hA san+d+hi'i rigs/_6_/de slad don ldan 'tsho ba'i zla ris ni/_/nyer 'tshe'i chu 'dzin g.yo ba las grol zhing /_/chos bzhin spyod pa'i snang ba rab 'bar bas/_/'dir yang spro dga'i chu gter gcig tu dgod/_7_/lhag par sheXs bya rabaX 'byams kun gzigs ma pham gnyis pa'i dge ba'i bshes/_/snying po'i bstan pa'i rgyalaX mtshaXn bsgrengs mdzad mkhas grub bye ba'i gtsug tor des/_/dben pa'i riX ngogs shin tu zhi bar chosaX dang mthun pas 'tsho rnams kyi/_/ngesaX doXn rtogs pa'i rgyaX mtshoX 'phel byed sngon med legs bshad chu shel dbang /_8_/nye bar thob pa'i skal bzang gis/_/dad dang spro ba'i ku mu dA/_/ci dgar bye ba'i ngang tshul ni/_/dpyid kyi dus ston slar 'ong bzhin/_9_/'di na skyabs kun 'dus zhal bla ma rje'i/_/byin rlabs zil dngar kho nas 'tsho ba yang /_/lang tsho'i 'du byed nyams par ma gyur bzhin/_/gyi na'i spyod pas rol dang chab gcig par/_10_/ris med mkhas grub rgya mtsho'i lam bzang la/_/phyogs su lhung ba'i skal ngan ring btang nas/_/dag snang pad+mo lta bur rgyas pa yis/_/chos spangs sgrib pa de yang ga shed song /_11_/'on kyang zab dang rgya che'i ro myong phyir/_/gzhung lugs che phra klog dang sems pa la/_/byis pa'i rnam thar tsam du 'dzin dus 'dir/_/ngal ba phal cher don med kho nar zad/_12_/ci phyir mkhas rnams nyi tshe'i tshig la rtsod/_/grub par rloms rnams bzlas brjod tsam gyis g.yengs/_/gzhung lugs che las za chog kho na brin/_/de yang khungs med 'chol bar spyod 'di mtshar/_13_/skabs su gsol ba/_nor bu'i dpal gyis bskrun min legs gsung mchog_/zang zing phran bus gzhal bya ma yin kyang /_/gnas skabs snag shog bzo bo'i 'du byed kyi/_/rin thang tsam du dmigs pa'i dngos po ni/_14_/snga sor ro ldan btung ba yi/_/lo 'dab phon po 'di bsrings shing /_/slad nas de tsam sbyin no zhes/_/dam bca'i yi ge bsrub med 'god/_15_/slar smras pa/_rtsa khams dbu mar thim pa'i mgrin pa nas/_/rgyud sngags mi shigs nA da'i rol mo can/_/rtog tshogs 'od gsal dbyings su ngal bso ba/_/'ja' lus rdo rje'i rnam thar bzung gyur cig_16_/rab 'byams shes bya'i gnas la blo mig grol/_/gzhan phan bdud rtsi'i sprin dkar nyin bzhin 'phel/_/srid dang zhi ba'i shis dgu'i me tog gis/_/dam pa'i ngang tshul yun du 'bar bar shog17/_de srid 'dir yang brtse zhing gcugs pa'i yid/_/nyin mor byed dang ut+pal ji bzhin du/_/rnam kun mdza' ba mi phyed blo gros kyis/_/byang chub snying po'i bar du 'grogs par smon/_18_/ces gang shar nyams mtshar du bkod pa'i tshig gi me tog don gyi 'bras bus gtams pa las/_'dren byed kyi raHyig gnyis pa g.yo ba'i rten tsam du tA ru mar+d+hu'i phur ma bam po gcig la phyag rgyas btab ste kAr+d+hi kA yis nya ba'i shar phyogs kyi dga' ba gnyis pa la shAkya'i dge slong rig pa 'dzin pa 'jam dbyangs mkhyen brtse'i dbang pos bsrings pa sarba dA shre yo b+ha ba tu/_/dge'o/_/dge'o/_/dge'o/_//_/