བླ་སྒྲུབ་ཀྱི་གསོལ་འདེབས་བྱིན་རླབས་མྱུར་འབེབས།

🚧 This website is under continued development. We appreciate your patience!

Previous Text Back to Volume PageNext Text

Wylie title	bla sgrub kyi gsol 'debs byin rlabs myur 'bebs
Location	'phags mchog bka' 'bum Volume 2, Text 29, Pages 561-562 (Folios 1a1 to 1b5)
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. Bla sgrub kyi gsol 'debs byin rlabs myur 'bebs. In Mtshungs med grub sras 'phags mchog rdo rje mchog gi gsung 'bum rin po che , Vol. 2: 561-562. Kathmandu: Khenpo Shedup Tenzin & Lama Thinley Namgyal, 2004.
Genre	Supplications - gsol 'debs
Colophon	།ཞེས་པ་ཀུན་བཟང་འཕགས་མཆོག་པས་གང་དྲན་ཤར་མར་དུ་གསོལ་བ་བཏབ་པའོ། །དགེའོ།།
	/zhes pa kun bzang 'phags mchog pas gang dran shar mar du gsol ba btab pa'o/_/dge'o//

Tibetan Text

[edit]

༄༅། །བླ་སྒྲུབ་ཀྱི་གསོལ་འདེབས་བྱིན་རླབས་མྱུར་འབེབས་བཞུགས་སོ།། ཀུན་བཟང་རྡོར་སེམས་དགའ་རབ་ཤྲཱི་སེང་། །པདྨ་ཀཱ་ར་རྗེ་འབངས་ཉི་ཤུ་ལྔ། །སོ་ཟུར་གནུབས་གཉགས་གཏེར་སྟོན་བརྒྱ་རྩ་བཅས། །བཀའ་གཏེར་བླ་མ་རྣམས་ལ་གསོལ་བ་འདེབས། །སྲས་བཅས་རྒྱལ་བའི་མཁྱེན་རབ་ཡེ་ཤེས་དངོས། །གངས་ཅན་མཁས་གྲུབ་ཡོངས་ཀྱི་དཔལ་དུ་ཤར། །སྔ་འགྱུར་རྡོ་རྗེ་ཐེག་པའི་ཉིན་བྱེད་མཆོག །ཀློང་ཆེན་རབ་འབྱམས་ཞབས་ལ་གསོལ་བ་འདེབས། །འཇམ་དཔལ་དབྱངས་དངོས་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་པའི་རོལ་གར་གཅིག་ཏུ་བཞད། །ངོ་མཚར་བཀའ་བབས་བདུན་གྱི་མཛོད་འཛིན་པ། །འོད་གསལ་སྤྲུལ་པའི་རྡོ་རྗེར་གསོལ་བ་འདེབས། །བདེ་ཆེན་འགྱུར་བ་མེད་པ་རྡོ་རྗེ་དངོས། །འགྲོ་འདྲེན་སྲས་དང་བཅས་པའི་ཁྱབ་བདག་མཆོག །འཇམ་མགོན་བླ་མ་པདྨ་གར་གྱི་དབང་། །བློ་གྲོས་མཐའ་ཡས་ཞབས་ལ་གསོལ་བ་འདེབས། །གངས་ལྗོངས་མཁས་གྲུབ་རྒྱ་མཚོའི་ཡིད་བཞིན་ནོར། །རླབས་ཆེན་ཕྲིན་ལས་རྒྱ་མཚོ་འདོད་དགུར་འཇོ། །རིས་མེད་བསྟན་པ་རྒྱ་མཚོའི་དབུགས་འབྱིན་པ། །སི་ཏུ་རྒྱ་མཚོའི་ཞབས་ལ་གསོལ་བ་འདེབས། །ཀ་དག་རྫོགས་པ་ཆེན་པོའི་གསང་ལམ་ལ། །དགོངས་པ་རང་བྱན་ཚུད་པའི་རྣལ་འབྱོར་པ། །འབྲེལ་ཚད་དོན་ལྡན་དོན་གཉིས་མཐར་ཕྱིན་པ། །སྣ་ཚོགས་རང་གྲོལ་ཞབས་ལ་གསོལ་བ་འདེབས། །གཉིས་སྣང་འཁྲུལ་བའི་རྒྱ་ལས་རང་སར་གྲོལ། །ཕྱག་རྫོགས་སྙིང་པོའི་བསྟན་པ་མཁའ་ལྟར་སྤེལ། །དོན་གཉིས་ཕུན་སུམ་ཚོགས་ལ་མངའ་བརྙེས་པ། །འཇའ་ལུས་རྡོ་རྗེའི་ཞབས་ལ་གསོལ་བ་འདེབས། །དེ་ལྟར་རྩེ་གཅིག་གསོལ་བ་བཏབ་པའི་མཐུས། །གཉིས་སྣང་སོ་ཚའི་ཆོས་བརྒྱད་སྨིག་རྒྱུ་ཡིས། །ཅུང་ཟད་མི་བསླུ་འདུ་འཛི་གཡེང་བ་བྲལ། །འཁོར་འདས་དབྱེར་མེད་དོན་གྱི་བླ་མ་དངོས། །རང་ཞལ་མྱུར་དུ་མཇལ་ནས་བྱང་ཆུབ་སྟེ། །དོན་གཉིས་མཐའ་རུ་ཕྱིན་པར་བྱིན་གྱིས་རློབས། །ཞེས་པ་ཀུན་བཟང་འཕགས་མཆོག་པས་གང་དྲན་ཤར་མར་དུ་གསོལ་བ་བཏབ་པའོ། །དགེའོ།། །།