SPCD-KABUM-02-KHA-028

Previous Text Back to Volume Page Next Text

Wylie title
Location	'phags mchog bka' 'bum Volume 2, Text 28, Pages (Folios to )
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. '*. In Mtshungs med grub sras 'phags mchog rdo rje mchog gi gsung 'bum rin po che* , Vol. : . Kathmandu: Khenpo Shedup Tenzin & Lama Thinley Namgyal, 2004.**
Genre

[edit]

༄༅། །འཕགས་མ་སྒྲོལ་མའི་ཚོགས་མཆོད་དོན་འདུས་ཡེ་ཤེས་རོལ་མོ་ཞེས་བྱ་བ་བཞུགས་སོ།།

དེ་ཡང་ཁྲལ་སོང་ལྟ་བུ་མ་ཡིན་པར་ཐབས་ཤེས་ཀྱི་ཚོགས་རྫས་བཟང་ལ་གྱ་ནོམ་པའི་དངོས་པོ་ཅི་འབྱོར་རྣམས་གཙང་ཞིང་ཡིད་དུ་འོང་བར་བཤམས་བཀོད་བྱས་ལ་བདུད་རྩིས་བྲན་ནས། དང་པོ་ཡེ་ཤེས་པ་སྤྱན་འདྲེན་ཞིང་བཞུགས་སུ་གསོལ་བ་ནི། ཧྲཱིཿ འོག་མིན་ཆོས་དབྱིངས་གཞལ་མེད་ཕོ་བྲང་ནས། །ཡེ་ཤེས་མཁའ་འགྲོ་རྒྱ་མཚོ་གཤེགས་སུ་གསོལ། །བདེ་ཆེན་ལོངས་སྤྱོད་རྫོགས་སྐུའི་ཞིང་ཁམས་ནས། །འཕགས་མ་སྒྲོལ་མ་ཉེར་གཅིག་གཤེགས་སུ་གསོལ། །འཇིག་རྟེན་གནས་ཡུལ་དག་པའི་སྣང་བ་ནས། །སྤྲུལ་པ་ལས་ཀྱི་ལྷ་ཚོགས་གཤེགས་སུ་གསོལ། །སྐུ་མདོག་ལྗང་གསལ་མརྒད་མདོག་ལྟར་འཚེར། །གཞོན་ནུ་བཅུ་དྲུག་ལོན་པའི་ན་ཚོད་ཅན། །ཁྲོ་འཛུམ་ཆགས་པའི་ཉམས་འགྱུར་བདེ་སྟེར་མ། །ཕྱག་གཡས་མཆོག་སྦྱིན་གཡོན་པས་ཨུཏྤལ་འཛིན། །དར་དང་རིན་ཆེན་སྣ་ཚོགས་བརྒྱན་གྱིས་སྤྲས། །མཛེས་པའི་གར་དང་རྡོ་རྗེའི་གླུ་དབྱངས་སྒྲོགས། །བྱིན་རླབས་དངོས་གྲུབ་མྱུར་འབེབས་རྗེ་བཙུན་མ། །ཡེ་ཤེས་མཁའ་འགྲོའི་འཁོར་ཚོགས་དང་བཅས་པ། །གསང་ཆེན་རྨད་དུ་བྱུང་བའི་དཀྱིལ་འཁོར་འདིར། །དམ་ཚིག་གཉན་པོར་དགོངས་ཏེ་གཤེགས་སུ་གསོལ། །ཨོཾ་ཨཱརྻ་ཏཱ་རེ་ཛྙཱ་ན་ཌཱཀྐི་ནཱི་ས་པ་རི་ཝཱ་ར་བཛྲ་ས་མཱ་ཡ་ཛཿཛཿ མཁྱེན་བརྩེ་ནུས་པའི་དཔལ་མངའ་དེང་འདིར་དགོངས། །བདག་གཞན་བླ་མེད་བྱང་ཆུབ་མ་ཐོབ་བར། །དམ་ཚིག་ཡེ་ཤེས་གཉིས་སུ་མེད་པ་ཡིས། །མི་འབྲལ་རྟག་པ་རྒྱུན་དུ་བཞུགས་སུ་གསོལ། །ཛཿཧཱུྃ་བཾ་ཧོཿ ས་མ་ཡ་ཏིཥྛ་ལྷན། གཉིས་པ་ཚོགས་རྫས་བྱིན་གྱིས་བརླབས་ཤིང་འབུལ་བའི་རིམ་པ་ནི། རྃ་ཡྃ་ཁྃ། ཨོཾ་ཨཱཿཧཱུྃ། ཡེ་ཤེས་ལྔ་ཡི་རང་རྩལ་འཕྲོ་བ་ལས། །ཚོགས་རྫས་དངོས་འཛིན་བསྲེགས་གཏོར་ཡོངས་སུ་སྦྱངས། །རྣམ་ཀུན་མཆོག་ལྡན་རྒྱལ་བའི་དཀྱིལ་འཁོར་དུ། །ཤེས་རབ་སྟོང་ཆེན་ཡངས་པའི་ཚོགས་གཞོང་གསལ། །སྣང་བ་རྟེན་ཅིང་འབྲེལ་འབྱུང་སྲིད་ཞིའི་ཆོས། །ཐབས་མཆོག་རྒྱན་གྱི་རོལ་མོས་ཡོངས་བཀང་སྟེ། །བདེ་སྟོང་གཉིས་མེད་སྦྱོར་བའི་ཚོགས་འཁོར་འདི། །དམ་ཚིག་སྒྲོལ་མའི་ལྷ་ཚོགས་མཉེས་ཕྱིར་འབུལ། །མ་རིག་ཉེས་ལྟུང་དྲི་མའི་ཚོགས་ཅི་མཆིས། །བརྩེ་ཆེན་ཡེ་ཤེས་གཟིགས་པའི་སྤྱན་སྔར་བཤགས། །གཟུང་འཛིན་གཉིས་སྣང་འཁྲུལ་བའི་འགྲོ་བ་རྣམས། །གཞི་མེད་རང་བྱུང་རིག་པའི་ཀློང་དུ་སྒྲོལ། །གང་ལ་གང་འདུལ་ཕྲིན་ལས་རྣམ་བཞིས་སྐྱོངས། །མཆོག་ཐུན་དངོས་གྲུབ་འབད་མེད་ལྷུན་གྲུབ་སྩོལ། །ཨོཾ་ཨཱརྻ་ཏཱ་རེ་ཛྙཱ་ན་ཌཱཀྐི་ནཱི་ས་པ་རི་ཝཱ་ར་ག་ཎ་ཙཀྲ་པཱུ་ཛ་ཧོཿ ཡིག་བརྒྱ་བརྗོད་ཅིང་ཚར་གྲངས་དལ་ཆགས་པར་བསགས། གསུམ་པ་ལྷག་མ་བསྔོ་ཞིང་དགེ་བའི་སྨོན་ལམ་གདབ་པ་ནི། ཨོཾ་ཨཱཿཧཱུྃ། ཕེཾ། གནས་ཡུལ་ཀུན་ཏུ་རྒྱུ་བའི་གིང་ལང་ཀ །ལེགས་ཉེས་སྟངས་འཛིན་དཀྱིལ་འཁོར་མུ་རན་སྐྱོང་། །འདོད་ཡོན་ལྷག་མའི་མཆོད་པ་འདི་བཞེས་ལ། །བསྟན་པ་གཉན་པོ་རྟག་ཏུ་སྲུང་སྐྱོབས་མཛོད། །ཨོཾ་ཨུཙྪིཥྚ་བ་ལིངྟ་ཁཱ་ཧི། དེ་ལྟར་ཕུལ་བའི་དགེ་ཚོགས་ཟབ་མོའི་མཐུས། །ཚེ་འདིའི་འགལ་རྐྱེན་ཀུན་ཞི་ལེགས་ཚོགས་རྒྱས། །ཚུལ་ཁྲིམས་རྣམ་དག་ཤེས་བྱའི་རྒྱུ་སྐར་བཀྲག །གྲུབ་པའི་ཉམས་རྟོགས་ཡར་ངོའི་ཟླ་བཞིན་ཚེས། །མཐར་ཐུག་དབྱིངས་ཀྱི་ས་ལ་ལྷུན་རྫོགས་ནས། །འཕགས་མ་ཉིད་དང་ཕྲིན་ལས་མཉམ་པར་ཤོག །ཅེས་སྨོན་ལམ་གདབ་ཅིང་རྗེས་ཆོག་གི་བྱ་བ་རྣམས་སྤྱི་འགྲོས་སུ་འཇུག་པར་བྱའོ། །འདི་འདྲའི་རིགས་ཉམས་སུ་མི་ལོང་བའི་རང་བཞིན་ལས། གསར་དུ་འབྲི་བའི་དོན་ཅང་མ་མཐོང་ཡང་། དགེ་བརྩོན་འགྲུས་ལགས་ནས་དུས་ཚེས་དགེ་བའི་ཉིན་དར་དང་ལྕགས་ཕུར་སྒྲོས་གཙང་བཅས་ཏེ་བསྐུལ་ངོ་མ་ལྡོག་ཙམ་དུ་སྲས་མིང་པ་ཀུན་བཟང་རྡོ་རྗེ་རྩལ་གྱིས་ལྷག་བསམ་དད་པའི་ངང་ནས་ཤུགས་འབྱུང་དུ་བྲིས་པ་དགེ་ལེགས་ཤོག །དགེའོ།། །།