བླ་མའི་རྣལ་འབྱོར་ཉུང་ངུ་ཕན་བདེའི་གཏེར།

🚧 This website is under continued development. We appreciate your patience!

Previous Text Back to Volume Page Next Text

Wylie title	bla ma'i rnal 'byor nyung ngu phan bde'i gter
Location	'phags mchog bka' 'bum Volume 2, Text 35, Pages 615-619 (Folios 1a1 to 3a5)
Author	དོན་བརྒྱུད་ཉི་མ་
Less details More details
Citation	Khamtrul, 8th. Bla ma'i rnal 'byor nyung ngu phan bde'i gter. In Mtshungs med grub sras 'phags mchog rdo rje mchog gi gsung 'bum rin po che , Vol. 2: 615-619. Kathmandu: Khenpo Shedup Tenzin & Lama Thinley Namgyal, 2004.
Genre	Guru Yoga Texts - bla ma'i rnal 'byor
Colophon	།ཞེས་པའང་རྒྱ་གར་བློ་གྲོས་ནས་ཡང་ཡང་བསྐུལ་ངོར། མེ་བྱ་ཟླ་ ༢ ཚེས་ ༡༧ ལ་བླུན་རྨོངས་དོན་བརྒྱུད་ཉི་མས་མགྱོགས་པར་བྲིས་པ་དོན་ལྡན་དུ་གྱུར་ཅིག། །།དགེའོ།། །།
Colophon	/zhes pa'ang rgya gar blo gros nas yang yang bskul ngor/_me bya zla _2_tshes _17_la blun rmongs don brgyud nyi mas mgyogs par bris pa don ldan du gyur cig/_//dge'o//_//

[edit]

༄༅། །བླ་མའི་རྣལ་འབྱོར་ཉུང་ངུ་ཕན་བདེའི་གཏེར་ཞེས་བྱ་བ་བཞུགས་སོ།།

༄༅། །ན་མོ་གུ་ར་ཝེ། ལམ་ཟབ་མོ་བླ་མའི་རྣལ་འབྱོར་མདོར་བསྡུས་ཉམས་སུ་ལེན་པར་འདོད་པས། ཐོག་མར་སྐྱབས་སེམས་ནི། ན་མོ། སྐྱབས་གནས་རྒྱ་མཚོ་འདུས་པའི་སྤྱི། །དཔལ་ལྡན་བླ་མར་སྐྱབས་སུ་མཆི། །འགྲོ་དོན་སངས་རྒྱས་ཐོབ་བྱའི་ཕྱིར། །ལམ་ཟབ་རྣལ་འབྱོར་ཉམས་སུ་ལེན། །ལན་གསུམ། དངོས་གཞིའི་རྣལ་འབྱོར་ནི། ཨ། ཆོས་ཀུན་རང་བཞིན་སྟོང་པ་ཉིད། སྤྲོས་པ་ཀུན་དང་བྲལ་བའི་དབྱིངས། །མ་འགགས་འཛིན་མེད་སྒྱུ་མ་ལྟར། །བདག་ཉིད་གཞི་ལུས་རྣལ་འབྱོར་མར། །སྐད་ཅིག་དྲན་རྫོགས་ཉིད་གསལ་བའི། །སྤྱི་བོར་པད་ཟླའི་གདན་གྱི་སྟེང་། །སྐྱབས་གནས་ཀུན་འདུས་ངོ་བོ་ཉིད། །དཔལ་ལྡན་བླ་མ་རྡོ་རྗེ་འཆང་། །རྒྱས་སྲས་འཕགས་མཆོག་རྡོ་རྗེ་ནི། །དཀར་དམར་མདངས་མཛེས་ཞི་འཛུམ་ཉམས། །རབ་ཆས་དབུ་ལ་པཎ་ཞུ་གསོལ། །ཕྱག་གཡས་ཐུགས་ཀར་ཆོས་འཆད་མཛད། །གཡོན་པས་མཉམ་བཞག་ནོར་བུ་འཛིན། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །དད་ལྡན་བུ་ལ་དགྱེས་བརྩེའི་ཉམས། །རང་སྣང་རྩ་གསུམ་རྒྱ་མཚོའི་དབུས། །འཇའ་སྤྲིན་འོད་ཐིག་ཀློང་དུ་རོལ། །གསང་གསུམ་རྡོ་རྗེའི་འབྲས་མཚན་ལས། །འོད་ཟེར་ཆོས་ཀྱི་དབྱིངས་ཁྱབ་སྤྲོས། །ཡེ་ཤེས་འཁོར་ལོ་སྤྱན་དྲངས་ཐིམ། །སྒོ་གསུམ་གུས་པས་ཕྱག་འཚལ་ལོ། །ཕྱི་ནང་གསང་བའི་མཆོད་སྤྲིན་འབུལ། །བཅས་རང་སྡིག་ལྟུང་མ་ལུས་བཤགས། །དགེ་ཚོགས་ཀུན་ལ་རྗེས་ཡི་རང་། །ཟབ་གསང་ཆོས་འཁོར་བསྐོར་བར་བསྐུལ། །མྱ་ངན་མི་འདའ་རྟག་བཞུགས་གསོལ། །དགེ་ཀུན་བྱང་ཆུབ་ཆེན་པོར་བསྔོ། །ཡང་དག་བླ་མའི་སྐུུར་འགྲུབ་ཤོག །གསོལ་འདེབས་ནི། ཕྱོགས་དུས་དཀོན་མཆོག་རྩ་བ་གསུམ། །རྩ་རླུང་ཐིག་ལེ་བྱང་ཆུབ་སེམས། །ངོ་བོ་རང་བཞིན་ཐུགས་རྗེའི་བདག །དཔལ་ལྡན་བླ་མར་གསོལ་བ་འདེབས། །དབྱིངས་ནས་ཐུགས་རྗེས་རྗེས་ཟུངས་ལ༑ །བྱིན་རླབས་འཕོ་བའི་དབང་མཆོག་བསྐུར། །ཉམས་རྟོགས་ཡེ་ཤེས་རྩ་ཁ་ཕྱེས། །མཆོག་དང་ཐུན་མོང་དངོས་གྲུབ་སྩོལ། །ཞེས་གསོལ་བ་ཡང་ཡང་བཏབ་མཐར། དཔལ་ལྡན་བླ་མའི་གནས་བཞི་ནས། །འོད་འཕྲོས་བདག་གི་གནས་བཞིར་ཞུགས། །སྒྲིབ་བཞིའི་དྲི་བཀྲུས་དབང་བཞི་ཐོབ། །ལམ་བཞིའི་ཡེ་ཤེས་རྒྱུད་ལ་བསྐྱེད། །སྐུུ་བཞིའི་འབྲས་བུ་སྨིན་པར་བྱས། །མཐར་ནི་བླ་མ་འོད་ཞུ་ནས། །བདག་ལ་གཉིས་སུ་མེད་པར་ཐིམ། །ཐུགས་ཡིད་གཅིག་འདྲེས་དགོངས་རྩལ་རྫོགས། །ཨ་ཨ་ཨ། ཞེས་དགོངས་ཉམས་སྐྱོང་མཐར། དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་སོགས་བསྔོ་སྨོན་གང་ཤེས་ཀྱིས་མཐའ་བརྒྱན་ནོ། །ཞེས་པའང་རྒྱ་གར་བློ་གྲོས་ནས་ཡང་ཡང་བསྐུལ་ངོར། མེ་བྱ་ཟླ་ ༢ ཚེས་ ༡༧ ལ་བླུན་རྨོངས་དོན་བརྒྱུད་ཉི་མས་མགྱོགས་པར་བྲིས་པ་དོན་ལྡན་དུ་གྱུར་ཅིག། །།དགེའོ།། །།