SPCD-KABUM-02-KHA-034

Previous Text Back to Volume Page Next Text

Wylie title
Location	'phags mchog bka' 'bum Volume 2, Text 34, Pages (Folios to )
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. '*. In Mtshungs med grub sras 'phags mchog rdo rje mchog gi gsung 'bum rin po che* , Vol. : . Kathmandu: Khenpo Shedup Tenzin & Lama Thinley Namgyal, 2004.**
Genre

[edit]

༄༅། །གུར་དྲག་བདེ་གཤེགས་འདུས་པའི་དབང་ཆོག་མེ་ཡི་ཕྲེང་བ་ཞེས་བྱ་བ་བཞུགས་པའི་དབུ་ཕྱོགས་དགེའོ།། ཨོཾ་སྭ་སྟི། པདྨ་རྒྱལ་པོ་རབ་འཇིགས་ཁྲོས་པའི་སྐུ། །བདེ་གཤེགས་འདུས་པའི་གཙོ་ལ་ཕྱག་འཚལ་ནས། །དེ་ཡི་དབང་བསྐུར་མེ་ཡི་ཕྲེང་བ་ནི། །དོན་གསལ་ཉུང་ངུ་སྤེལ་ལ་གནང་བ་སྩོལ། །དེ་ལ་སྟེགས་བུའི་སྟེང་དཀྱིལ་འཁོར་གཞུང་མཐུན་ནམ་ལྷ་ཚོམ་བཀོད་པའི་མཉྫིའི་ཁར་རྣམ་བུམ་བཅུད་ལྡན། སྐུ་ཙཀ་དུར་ཁྲོད། དཔལ་ཆས། སྔགས་ཕྲེང་། ཕྱག་མཚན་གྱི་ཙཀླི ཐོད་ཆང་། རིག་ཙཀ །ཤེལ་རྡོ། དབང་གཏོར་རྣམས་བཀོད། ཕྱི་ནང་གི་མཆོད་པ། སྔོན་གཏོར་དཀར་དམར་རྣམས་བཤམས་ལ། ལས་བྱངབ་སྟོད་པའི་མཐར་རྫབ་ཁང་དབྱེ་ལ། བདག་མདུན་ལ་དམིགས་ཏེ་འཕྲོ་འདུའི་བཟླས་པ་དང་། རྣམ་བུམ་དུའང་སྐད་ཅིག་གིས་གསལ་བཏབ་ལ་བཟླས་པ་ཅི་རིགས་བྱ་མཐར་སྟོང་ཚིགས་མཆོད་བསྟོད། བུམ་ལྷ་འོད་ཞུ། ལས་བུམ་དུ་རྟ་མགྲིན་ནམ་བདུད་རྩི་འཁྱིལ་བ་བསྐྱེད་བཟླས། ཚོགས་མཆོད་ཡན་གྲུབ་ནས་རིགས་མེ་དོར། སློབ་མར་ཁྲུས་བྱས་བགེགས་བསྐྲད་སོགས་སྤྱི་ལྟར་བཏང་། མཎྜལ་རྒྱས་བསྡུས་དང་། སེམས་བསྐྱེད་གསལ་བཏབ་ལ། དེ་ལ་འདིར་གསན་བྱའི་ཆོས་ནི། དུས་གསུམ་ཀུན་མཁྱེན་གུ་རུ་པདྨ་འབྱུང་གནས་ཉིད་སྲོག་བདག་གཟའ་ཀླུ་རྒྱལ་གསུམ་དང་། ཁྱད་པར་དཀོར་བདག་པེ་ཧར་འདུལ་བའི་དོན་དུ་པདྨ་དྲག་པོའི་སྐུར་བཞེངས་ཏེ་སྲོག་གི་སྙིང་པོ་བླངས་ཤིང་གནད་ལ་གཅུན། དམ་ལ་བཞག །མ་འོངས་ཕྱི་མའི་དུས་ཀྱི་འགྲོ་བ་རྣམས་སྐྱོབ་པའི་དོན་དུ་ཟབ་མོའི་གཏེར་ཁ་མཐའ་ཡས་པར་གུ་རུ་དྲག་པོའི་རྒྱུད་ལུང་མན་ངག་ཟབ་རྒྱས་ཇི་སྙེད་ཅིག་སྦ་བར་མཛད་པ་ལས། འདིར་ནི་ལྔ་བརྒྱ་ཐ་མའི་དུས་འདིར་བསྟན་པ་དང་འགྲོ་བའི་སྐྱབས་གཅིག་༧གྲུབ་པའི་འཁོར་ལོས་སྒྱུར་བ་ཆེན་པོ་ཤཱཀྱ་ཤྲཱི་ཛྙཱ་ན་ཞེས་འཛམ་གླིང་ན་ཉི་ཟླ་ལྟར་ཡོངས་སུ་གྲགས་པ་དེ་ཉིད་གྲུ་གུ་བསམ་གཏན་ཆོས་གླིང་དུ་བསྐྱེད་རྫོགས་ཟབ་མོར་བཞུགས་སྐབས་ཐོ་རངས་ཁར་མནལ་སད་པ་དང་། མདུན་གྱི་མཁའ་ཀློང་ཡངས་པར་གུ་རུ་དྲག་པོ་བདེ་གཤེགས་འདུས་པ་སྐུ་མདོག་ཕྱག་མཚན་རྒྱན་ཆ་ལུགས་གཞུང་མཐུན་ལྟར་ཡུན་རིང་དུ་གཟིགས་ཤིང་། མཐར་རིམ་གྱིས་ཡལ་ནས་རང་བབས་སུ་སྟོང་སོང་བར། ཕྱིས་དག་སྣང་གི་ཐུགས་སྒྲུབ་ཀྱི་དགོངས་པའི་གཏེར་མཛོད་ཀྱི་བྱེ་བྲག་གུ་རུ་དྲག་སྒྲུབ་འདི་ཉིད་གཏན་ལ་ཕབ་པར་མཛད་པའི་ཟབ་ཆོས་བྱིན་རླབས་ཀྱི་ཚན་ཀ་ཆེན་པོ་དང་ལྡན་པ་འདི་ཉིད་ཀྱི་སྨིན་བྱེད་སྒྲུབ་པ་ལ་བདག་གིས་བགྱི་འོས་གྲུབ་ནས་ཁྱེད་རང་གི་ངོ་སྐལ་དུ་གྱུར་པ་ལ་དེ་ཉིད་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྗོད་ལ་མཎྜལ་འབུལ། གསོལ་བ་འདེབས་པ་འདིའི་རྗེས་ཟློས་མཛོད། ཨེ་མ་བླ་མ་འགྲོ་བའི་མགོན། །བདག་ཅག་སྐལ་ལྡན་བུ་རྣམས་ལ། །དྲག་པོ་བདེ་གཤེགས་འདུས་པ་ཡི། །སྨིན་གྲོལ་དབང་བསྐུར་སྩལ་དུ་གསོལ། །ལན་གསུམ། སློབ་དཔོན་གྱིས་ལན་སྦྱིན་པ་ནི། དེ་ལྟར་ཡིན་ན་བུ་ཁྱོད་ནི། །དྲག་པོའི་དཀྱིལ་འཁོར་འདིར་ཞུགས་བྱ། །དད་དང་གུས་པས་རབ་ཏུ་ལོངས། །སྨིན་གྲོལ་གདམས་མཆོག་སྦྱིན་པར་བྱ། །རྒྱུད་སྦྱོང་བའི་ཕྱིར་ཚོགས་ཞིང་གསལ་བཏབ་པའི་སྤྱན་སྔར་སྐྱབས་སུ་འགྲོ་བ་འདིའི་རྗེས་ཟློས་མཛོད། ན་མོཿདཀོན་མཆོག་གསུམ་དང་རྩ་གསུམ་འདུས་པའི་དངོས༔ བདེ་གཤེགས་རིགས་འདུས་པདྨ་ཐོད་ཕྲེང་རྩལ༔ རྒྱལ་བ་དགོངས་བརྒྱུད་རིག་འཛིན་བརྡའ་ཡི་བརྒྱུད༔ གང་ཟག་སྙན་བརྒྱུད་བླ་མ་ཐམས་ཅད་ལ༔ བདག་གཞན་འདི་ནས་བྱང་ཆུབ་མ་ཐོབ་བར༔ སྐུ་གསུམ་བླ་མའི་ཚོགས་ལ་སྐྱབས་སུ་མཆི༔ ལན་གསུམ། སེམས་ཅན་རྣམས་བླ་ན་མེད་པའི་གོ་འཕང་ལ་འགོད་པར་འདོད་པས་སྨོན་པ་དང་། དེའི་ཆེད་དུ་བྱང་ཆུབ་ཀྱི་སྤྱོད་པ་ལ་བསླབ་པར་བགྱིའོ་སྙམ་དུ་སེམས་བསྐྱེད་པ་འདིའི་རྗེས་ཟློས་མཛོད། ན་མོཿ མཐའ་མེད་འཁོར་བར་འཁྱམས་པའི་སེམས་ཅན་རྣམས༔ མ་རིག་གཉིས་འཛིན་དུག་ལྔ་རང་གར་སྤྱོད༔ སྟོང་ཉིད་སྙིང་རྗེའི་རྩལ་སྣང་མ་འགགས་པས༔ འཁོར་བ་དོང་ནས་སྤྲུགས་པའི་སེམས་བསྐྱེད་དོ༔ ལན་གསུམ། བསགས་སྦྱོང་སྤེལ་གསུམ་གྱི་གནད་བསྡུས་པ་ཡན་ལག་བརྒྱད་པ་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་དད་པའི་ཞིང་གྱུར་ལ། །གཉིས་མེད་ཡིད་ཀྱི་སྐྱབས་སུ་མཆི། །དངོས་འབྱོར་ཡིད་ཀྱི་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུར་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་དཔའ་ལ། །དགོས་པ་གསུམ་ཕྱིར་ལུས་འབུལ་ལོ། །ཚེ་རབས་གྲངས་མེད་དགེ་བ་རྣམས། །བསྡུས་ཏེ་བྱང་ཆུབ་མཆོག་ཏུ་བསྔོ། །ཞེས་རྒྱུན་བཤགས་བྱ། ཡེ་ཤེས་དབབ་པ་ལ་དམིགས་པ་འདི་བཞིན་མཛོད། ལས་སྔགས་ཀྱིས་ལས་བུམ་ཆུ་འཐོར། སྭ་བྷཱ་ཝས་སྦྱངས། ཧཱུྃ༔ ཕྱི་སྣོད་ཆོས་འབྱུང་གྲུ་གསུམ་ཡངས་པའི་དབུས༔ རྡོ་རྗེ་བྲག་ཆེན་པདྨ་ཉི་ཟླ་དང་༔ རྒྱལ་འགོང་དམ་སྲི་ཁ་སྦུབས་བསྣོལ་བའི་སྟེང་༔ ནམ་མཁའི་ཧཱུྃ་ཡིག་ཐོག་མདའ་བཞིན་དུ་འབབས༔ ཧཱུྃ་ཡིག་དེ་ལས་འོད་ཟེར་ཕྱོགས་བཅུར་འཕྲོས༔ བདེ་བར་གཤེགས་པའི་ནུས་མཐུ་ཐམས་ཅད་བསྡུས༔ སླར་ཡང་འོད་ཟེར་འགྲོ་དྲུག་ཀུན་ལ་ཕོག༔ སྡུག་བསྔལ་སྦྱངས་ནས་ཐར་པའི་ལམ་ལ་བཀོད༔ འོད་ཟེར་ཚུར་འདུས་སྲོག་ཡིག་ཧཱུྃ་ལ་ཐིམ༔ ཧཱུྃ་ཡིག་ཡོངས་གྱུར་སྐད་ཅིག་དྲན་རྫོགས་སུ༔ བདེ་གཤེགས་ཀུན་འདུས་པདྨ་ཐོད་ཕྲེང་རྩལ༔ སྐུ་མདོག་དམར་ནག་པདྨ་རཱ་གའི་མདོག༔ ཞལ་གསུམ་ཕྱག་དྲུག་ཞབས་གཉིས་འགྱིང་སྟབས་བཞུགས༔ གཡས་དཀར་གཡོན་མཐིང་དབུས་དམར་འཇིགས་པའི་ཞལ༔ སྤྱན་དགུ་བསྒྲད་ཅིང་སྨ་ར་འབར་ཞིང་འཁྱིལ༔ ཞལ་གདངས་མཆེ་གཙིགས་ལྗགས་དམར་གློག་ལྟར་འཁྱུགས༔ དབུ་སྐྲ་ཁམ་ནག་ཐོད་སྐམ་རིགས་ལྔས་བརྒྱན༔ གླང་ལྤགས་སྟོད་གཡོགས་གཡང་གཞི་སྐེད་པར་དཀྲིས༔ སྟག་ལྤགས་ཤམ་ཐབས་རུས་པའི་རྒྱན་དྲུག་གསོལ༔ ཁྲག་གི་ཐིག་ལེ་ཞག་གི་ཟོ་རིས་དང་༔ ཐལ་ཆེན་ཚོམ་བུ་ཀླུ་ཆེན་བརྒྱད་ཀྱིས་བརྒྱན༔ ཕྱག་གཡས་དང་པོ་གནམ་ལྕགས་རྡོ་རྗེ་གདེངས༔ བར་མ་མེ་དབྱུག་འོག་མས་འཁོར་ལོ་འཛིན༔ གཡོན་གྱི་དང་པོ་གནམ་ལྕགས་སྡིགས་པ་དང་༔ བར་མས་ཐོད་དབྱུག་འོག་མས་རྒྱུ་ཞགས་བསྣམས༔ དུས་མཐའི་མེ་དཔུང་འབར་བའི་ཀློང་ན་བཞུགས༔ རིག་འཛིན་དྲག་པོའི་སྐུ་ཡི་གནས་ལྔ་རུ༔ དཔལ་ཆེན་སྐུ་ལྔ་གོ་ཆའི་ལྷ་ལྔ་ནི༔ རང་བྱུང་རང་ཤར་ཆེན་པོའི་ངང་དུ་རྫོགས༔ དེ་ལྟར་གསལ་བའི་གནས་གསུམ་ཨོཾ་ཨཱཿཧཱུྃ་གིས་མཚན་པ་ལས་འོད་ཟེར་འཕྲོས། ཡེ་ཤེས་པའི་ཚོགས་བསམ་གྱིས་མི་ཁྱབ་པ་སྤྱན་དྲངས་ཏེ་ཁྱོད་རང་ལ་ཐིམ་པར་མོས། སྤོས་རོལ་ཌཱ་དྲིལ་དང་བཅས། ཧྲཱིཿ བདེ་ཆེན་ལྷུན་གྲུབ་པདྨ་འཁྱིལ་བ་ནས༔ རྒྱལ་ཀུན་འདུས་གཟུགས་མ་ཧཱ་གུ་རུ་རྗེ༔ རིག་འཛིན་མཁའ་འགྲོ་རྒྱ་མཚོའི་ཚོགས་དང་བཅས༔ སྒྲུབ་པའི་རྟེན་རྫས་འཛུགས་པའི་གནས་མཆོག་འདིར༔ མ་ཐོགས་སྐུ་བཞིའི་བདག་ཉིད་གཤེགས་སུ་གསོལ༔ རྗེས་འཇུག་བྱིན་གྱིས་བརླབ་ཕྱིར་གཤེགས་སུ་གསོལ༔ འགྲོ་བ་སེམས་ཅན་འདུལ་ཕྱིར་གཤེགས་སུ་གསོལ༔ མཐའ་དམག་རྒྱལ་འགོང་འདུལ་ཕྱིར་གཤེགས་སུ་གསོལ༔ རིག་འཛིན་རྗེས་འཇུག་རྣལ་འབྱོར་བདག་ཅག་རྣམས༔ ཕུང་པོ་མཁའ་སྤྱོད་བགྲོད་ཕྱིར་གཤེགས་སུ་གསོལ༔ ཨོཾ་བཛྲ་གུ་རུ་དྷེ་ཝ་ཌཱ་ཀི་ནཱི་དྷརྨ་པཱ་ལ་ས་པཱ་རི་ཝཱ་ར་ཨེ་ཨཱ་རལླི་ཧྲིཾ་ཧྲིཾ་ཛཿ ཞེས་དྲག་ཏུ་དབབ། ཡེ་ཤེས་པ་རྣམས་བརྟན་པར་མོས་ལ། རྡོ་རྗེ་སྤྱི་བོར་རྒྱ་གྲམ་དུ་འཇོག །ཏིཥྛ་བཛྲ་ཞེས་བརྗོད། དབང་དངོས་ལ་དམིགས་པ་འདི་ལྟར་གྱིས། སློབ་དཔོན་གྱི་ཐུགས་ཀ་ནས་སྤྲོས་པའི་དབང་ལྷ་་རྣམས་ཀྱིས་དབང་རྣམས་རིམ་པར་སྩོལ་བར་མོས་ཤིག །རྣམ་བུམ་ཐོགས་ལ། ཧཱུྃ། རྣམ་རྒྱལ་བུམ་པ་ལྷའི་གཞལ་ཡས། །ལྷ་དང་གཉིས་མེད་བདུད་རྩིའི་ཆུས། །སྐལ་ལྡན་སྤྱི་བོར་དབང་བསྐུར་བས། །ལུས་སྒྲིབ་དག་ནས་བུམ་དབང་ཐོབ། །རྣམ་སྨིན་རིག་འཛིན་ཉེར་ཐོབ་ཅིང་། །སྤྲུལ་སྐུའི་གོ་འཕང་ཐོབ་པར་ཤོག །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཀཱ་ལ་ཤ་ཨ་བྷི་ཥིཉྩ་ཧཱུྃ༔ བུམ་ཆུ་བླུད། དཀྱིལ་འཁོར་གྱི་གཙོ་བོའི་སྐུ་ལས་སྐུ་གཉིས་པ་འཕྲོས་ཏེ་ཁྱེད་རང་རྣམས་ལ་ཐིམ་པར་མོས་ཤིག །སྐུ་ཙཀ་ཐོགས་ལ། ཧྲཱིཿ ལྷ་དང་གཉིས་སུ་མེད་པ་ཡི། །ཡེ་ཤེས་ཕྱག་རྒྱས་དབང་བསྐུར་བས། །ཕུང་ཁམས་སྐྱེ་མཆེད་ལྷ་སྐུར་སྨིན། །དྲག་པོའི་སྐུ་དང་དབྱེར་མེད་ཤོག །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཨོཾ། ཁྱེད་རྣམས་གཙོ་བོའི་སྐུར་གསལ་བ་ལ་དུར་ཁྲོད་ཆས་ཀྱིས་རྒྱན་པར་མོས་མཛོད། དུར་ཁྲོད་དཔལ་ཆས་ཐོགས་ལ། ཧཱུྃ། དུར་ཁྲོད་རོལ་པའི་ཆས་རྣམས་ཀྱིས། །སྐལ་ལྡན་བུ་ལ་དབང་བསྐུར་བས། །ཆེ་བའི་ཡོན་ཏན་ཀུན་རྫོགས་ནས། །ཁམས་གསུམ་བདུད་ལས་རྣམ་རྒྱལ་ཤོག །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ མ་ཧཱ་ཀ་པཱ་ལ་ཨ་ལཾ་ཀ་ར་ཨ་བྷི་ཥིཉྩ་ཧཱུྃ། བླ་མ་དྲག་པོའི་གསུང་སྔགས་ཀྱི་ཕྲེང་བ་ཁྱེད་རང་རྣམས་ཀྱི་མགྲིན་པར་ཐིམ་པའི་མོས་པ་མཛོད། སྔགས་ཕྲེང་ཐོགས་ལ། ཧཱུྃ་ཧྲཱིཿདྲག་པོའི་གསུང་ནི་གསང་བའི་སྔགས། །སྐལ་ལྡན་བུ་ལ་དབང་བསྐུར་བས། །ལས་རླུང་རྒྱུ་བ་ཀུན་དག་སྟེ། །རྡོ་རྗེའི་སྔགས་ཀྱི་དབང་ཐོབ་ཤོག །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཝཱ་ཀ་ཨ་བྷི་ཥིཉྩ་ཧཱུྃ། གཙོ་བོའི་ཐུགས་ཀ་ནས་ཕྱག་མཚན་སྤྲོས་ཏེ་ཁྱེད་རང་རྣམས་ཀྱི་སྙིང་གར་ཐིམ་པར་མོས་ཤིག །ཕྱག་མཚན་རྣམས་ཐོགས་ལ། ཧཱུྃ། ཡེ་ཤེས་འབར་བའི་རང་རྟགས་ནི། །ཕྱག་མཚན་དྲུག་གི་དབང་བསྐུར་བས། །བདུད་དཔུང་རྩད་ནས་གཞོམ་པ་དང་། །རིག་སྟོང་ཐུགས་སུ་སྨིན་པར་ཤོག །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ གུ་ཧྱ་བོ་དྷི་ཙིཏྟ་ཨ་ཧོ་མ་ཧཱ་སུ་ཁ་ཧོཿ ཞེས་བླུད། བླ་མ་དཀྱིལ་འཁོར་གྱི་གཙོ་བོའི་ཐུགས་ཀ་ནས་རིག་མ་ཡུམ་གྱི་ངོ་བོ་སྤྲོས་ཏེ་ཐར་པ་བསྟེན་པ་བསྐུལ་བར་གྱུར། རིག་ཙཀ་ཐོགས་ལ། ཧཱུྃ། བདེ་ཆེན་ཆུ་སྐྱེས་རབ་རྒྱས་པའི། །ལྷ་མོ་དགའ་སྟེར་གནས་སྟེར་མ། །འདི་སྦྱིན་ཁྱོད་ཀྱིས་རྟག་ཏུ་བཅངས། །བདེ་བ་ཆེ་ལ་རོལ་པར་གྱིས། །ཤེར་དབང་ཐོབ་ཅིང་ཡིད་སྒྲིབ་དག །ཕྱག་རྒྱའི་རིག་འཛིན་ཐོབ་པ་དང་། །ཆོས་ཀྱི་སྐུ་མཆོག་ཐོབ་པར་ཤོག །པདྨ་བྷཉྫ་མོཀྵ་ཧོཿ དྭངས་ཤེལ་དྲི་མ་མེད་པའི་བརྡས་མཚོན་ཏེ་རྡོ་རྗེའི་ཚིག་གིས་ངོ་སྤྲད་པར་གྱུར། ཤེལ་རྡོ་ཐོགས་ལ། ཧཱུྃ། དབྱིངས་ནི་རྣམ་པར་དག་པ་སྟེ། །རང་བཞིན་འོད་གསལ་ལྷུན་གྲུབ་ཆེ། །མ་འགགས་ཐུགས་རྗེ་རྟགས་འཆར་བ། །རང་བྱུང་རིག་པའི་ངང་དུ་རྫོགས། །ཤེས་བྱའི་སྒྲིབ་དག་ཚིག་དབང་ཐོབ། །ལྷུན་གྲུབ་རིག་འཛིན་ཉེར་ཐོབ་ཅིང་། །ངོ་བོ་ཉིད་སྐུ་ཐོབ་པར་ཤོག །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ དྷརྨ་དྷཱ་ཏུ་ཨ་ཧོཿ ཞེས་བརྗོད། དཔལ་གྱི་གཏོར་མ་གུ་རུ་དྲག་པོར་གསལ་བ་སྤྱི་བོར་བཞག་པས་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པའི་མོས་པ་མཛོད། གཏོར་མ་ཐོགས་ཏེ་སྤྱི་བོར་བཞག ཧཱུྃ་ཧྲཱིཿ རྗེ་བཙུན་ཆེན་པོ་པདྨ་ཐོད་ཕྲེང་རྩལ། །རིག་འཛིན་དཔའ་བོ་མཁའ་འགྲོའི་ཚོགས་དང་བཅས། །ཡི་དམ་པདྨ་དྲག་པོའི་ལྷ་ཚོགས་རྣམས། །ཐུགས་རྗེ་གློག་ལྟར་མྱུར་བས་འདིར་འབྱོན་ལ། །སློབ་མའི་ལུས་ངག་ཡིད་གསུམ་བྱིན་གྱིས་རློབས། །ནད་གདོན་རྐྱེན་བགེགས་བར་ཆད་ཞི་བ་དང་། །པདྨ་དྲག་པོའི་གོ་འཕང་མྱུར་ཐོབ་ཤོག །ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཀཱ་ཡ་ཝཱ་ཀ་ཙིཏྟ་བ་ལིངྟ་ཨོཾ་ཨཱཿཧཱུྃ་སྭཱཧཱ། ཞེས་གནས་ལྔར་བཞག དབང་དོན་གྱི་བྱིན་རླབས་བརྟན་པར་བྱས་པའི་མོས་པ་མཛོད། ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དི་མཧཱ་ཤྲ་མ་ཎཿསྭཱ་ཧཱ་ཞེས་དང་། བཀྲ་ཤིས་བརྗོད། དམ་ཚིག་བསྒྲགས། མཎྜལ། ལུས་འབུལ་རྣམས་དང་དགེ་བསྔོ་བྱས་ལ་གྲོལ། སློབ་དཔོན་གྱིས་ཚོགས་ལ་རོལ་བ་ལྷག་མ་གཏོང་བ་སོགས་རྗེས་རིམ་རྣམས་བྱའོ། །འདི་དགེས་བདག་གཞན་སེམས་ཅན་ཀུན། །བླ་མ་གུ་རུ་དྲག་པོ་ཡིས། །རྗེས་བཟུང་བདུད་ལས་རྣམ་རྒྱལ་ཏེ། །གུ་རུའི་གསང་གསུམ་དབྱེར་མེད་ཤོག །ཅེས་པའང་གྲུབ་དབང་༧རིན་པོ་ཆེའི་རིགས་དབོན་མཆོག་སྤྲུལ་པད་བདེས་གསུང་གིས་བསྐུལ་ངོར་༧ཆོས་ཀྱི་བློ་གྲོས་པས་བླ་མ་ལ་གསོལ་བ་བཏབ་བཞིན་བྲིས་པ་དགེ་ཞིང་བཀྲ་ཤིས་པར་གྱུར་ཅིག། །།ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དི་མཧཱ་ཤྲ་མ་ཎཿསྭཱ་ཧཱ།། །།