ཆུ་གྲུ་ལུས་ཀྱི་རྣམ་བཤད།

🚧 This website is under continued development. We appreciate your patience!

Previous Text Back to Volume Page Next Text

Wylie title	chu gru lus kyi rnam bshad
Location	dpal sprul bka' 'bum Volume 1, Text 18, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Detailed Explanation - rnam bshad

[edit]

༄༅། །ཆུ་གྲུ་ལུས་ཀྱི་རྣམ་བཤད་བཞུགས་སོ། །

ཆུ་གྲུ་ལུས་ཀྱི་རྣམ་བཤད་པ། །ཆོས་དང་དོན་སྤོབས་ངེས་པའི་ཚིག །སོ་སོར་ཡང་དག་མཁྱེན་ལྡན་པ། །འཇམ་མགོན་སྙིང་གི་ཉི་མ་ལ། །བཏུད་དེ་འདིར་ནི་བཤད་པར་བྱ། གང་གི་ཚེ་རྒན་པ་དག་བག་ཕེབ་པར་གཞི་རུ་གནས་ཤིང་། དོན་དང་བྱ་བ་འགའ་ཞིག་གི་ཕྱིར་གཞོན་པ་དག་ཕྱོགས་ཕྱོགས་སུ་སོང་ངོ་། །དེ་དག་སོང་ནས་རང་གི་དོན་དང་བྱ་བ་འགའ་ཞིག་གི་དོན་གང་ཡིན་པ་དེ་བསྒྲུབས་ནས་སླར་འོང་བས་རྒན་པ་དག་གིས་དྲིས་པ། ཨ་བུ་དག །ལོ་བརྒྱ་དག །ཅི་ཞིག་ནི་ཐོས། ཅི་ཞིག་ནི་གོ །བཤད་པར་བྱ་བ་ནི་ཅི་ཞིག་ཡོད། གཞོན་པས་སྨྲས་པ། སྐུ་ཚེ་ལགས། དགུང་ལོ་ལགས། ཐོས་པ་དང་། གོ་བ་དང་། བཤད་པར་བྱ་བ་ནི་ཆུ་གྲུ་ལུས་ཀྱང་མེད་དོ། །རྒན་པས་སྨྲས་པ། གཞོན་ནུ་ཁྱོད་ཀྱིས་སྨྲས་པ་དེ་དག་གི་དོན་ཁ་ཅིག་ནི་ཁོ་བོས་གོ་ལ། ཁ་ཅིག་ནི་མ་གོ་སྟེ། དེ་ཡང་ཐོས་པ་ཞེས་བྱ་བ་ནི། ཕྱོགས་དང་ཕྱོགས་སུ་གྲགས་པའི་སྐད་ཆ་ཁྱེད་ཀྱི་རྣ་ལམ་ལ་ཐོས་པ་ཅུང་ཟད་ཡོད་དམ་ཞེས་དྲིས་པ་ལ་དེས་མེད་དོ་ཞེས་ཟེར་བ་སྟེ་དེ་ནི་གོའོ། །གོ་བ་ཞེས་པ་ནི་གཞན་དག་གི་བྱ་བ་ཁ་ཅིག་ཐོས་པའམ། མཐོང་བ་ལས་དེ་ནི་དེ་ལྟ་བུ་དག་ཡིན་ནོ་སྙམ་དུ་རང་གི་ཡིད་ལ་ངེས་པར་གྱུར་པ་དག་སྟེ། དེ་ལྟ་བུ་ཡང་མེད་དོ་ཞེས་པ་དེ་ཡང་གོའོ། །འོན་ཀྱང་གཞོན་ནུས་ཆུ་གྲུ་ལུས་ཀྱང་མེད་དོ་ཞེས་པ་ནི་ཁོ་བོས་མ་གོ་ན་འདི་ཇི་ལྟར་ཡིན། འདི་ཇི་ལྟར་ཤེས་པར་བྱ། གཞོན་པ་དག་གིས་སྨྲས་པ། ཐོས་པ་དང་གོ་བ་ཞེས་པའི་དོན་ཉིད་ཀྱིས་མཁྱེན་པ་དེ་ལགས་ན། ཆུ་གྲུ་ལུས་ཀྱང་མེད་དོ། །ཞེས་པ་ནི་དོན་དེ་གསལ་བར་བྱ་བའི་ཁོ་བོས་དཔེ་བསྟན་པ་ཡིན་ནོ། །རྒན་པ་དག་གིས་སྨྲས་པ། གཞོན་ནུ་ཆུ་གྲུ་ལུས་ཞེས་པ་དེའི་དཔེ་ནི་གང་ཡིན། དོན་ནི་ཇི་ལྟར་ཤེས་པར་བྱ། གཞོན་པས་སྨྲས་པ། ཆུ་གྲུ་ལུས་ཞེས་པ་དེའི་དོན་ཡང་གསུམ། དཔེ་ཡང་གསུམ་སྟེ། འདི་ལྟར་ཆུ་ནི་འཇིག་རྟེན་གྱི་དྲི་མ་དང་སྐོམ་པ་སེལ་བའི་ཕྱིར་རྒྱ་མཚོ་ཆེན་པོ་ནས་འོང་སྟེ་ཕྱོགས་ནས་ཕྱོགས་སུ་འགྲོ་ཞིང་། མཐར་ཆུ་ཐམས་ཅད་ཀྱི་གནས་རྒྱ་མཚོ་ཆེན་པོ་དེར་གཞོལ་ཞིང་བབས་པ་ཡིན་མོད་ཀྱི། ཆུ་དེ་ལ་ནི་ཕྱོགས་དང་ཕྱོགས་ནས་བསྣོན་པ་དང་བྲི་བ་དང་རྙོགས་པ་དང་དྲི་མར་གྱུར་པ་ཅུང་ཟད་མེད་དེ། སྔར་རྒྱ་མཚོ་ནས་ཇི་ལྟར་སོང་བ་ལྟར་ཕྱིས་ཀྱང་རྒྱ་མཚོ་ཆེན་པོར་སླར་འོང་མོད་ཀྱི། ཆུ་བོ་ཆེན་པོ་དག་འགྲོ་བའི་ལམ་དེ་དང་དེ་དག་ཏུ་ནི་གཞན་འགལ་ཞིག་གིས་བཏུང་བ་དང་། བཀྲུ་བ་དང་། བསྒྱུར་བ་ལ་སོགས་པ་བྱེད་པ་ལྟར་ནི་སྣང་ངོ་། །དེ་བཞིན་དུ་ཁོ་བོ་དག་རང་གི་ཁྱིམ་ནས་དོན་དང་བྱ་བ་འགའ་ཞིག་གི་ཕྱིར་ཕྱོགས་དང་ཕྱོགས་སུ་འགྲོ་ཞིང་། དེ་དང་དེ་དག་ཏུའང་། འགའ་ཞིག་དང་འཕྲད་པ་དང་། གཏམ་བྱ་བ་དང་། དགའ་བར་བྱ་བ་ལ་སོགས་པ་ནི་ཡོད་མོད་ཀྱི། སྔར་མ་ཐོས་པ་དང་། མ་གོ་བ་དང་། མ་ཤེས་པ་དག་གསར་དུ་གོ་བ་དང་ཐོས་པ་ནི་ཅི་ཡང་མེད་དེ་དཔེར་ན་ཆུ་ཀླུང་དག་བཞིན་ནོ། །ཞེས་པ་སྟེ། འདི་དཔེ་དང་དོན་གཉིས་དང་པོའོ། །ཡང་འདི་ལྟར་གྲུ་ནི་གཞན་དག་སྒྲོལ་བར་བྱ་བའི་ཕྱིར་ཚུ་རོལ་ཕ་རོལ་དུ་འགྲོ་བ་དེ་ལས་ཀྱང་སླར་འོང་སྟེ་དེ་ལྟར་འགྲོ་བ་དང་ལྡོག་པ་རྒྱུན་ཀྱང་མི་ཆད་ལ། གྲུ་དེས་ནི་རེས་འགའ་ཚོང་པ། རེས་འགའ་མགྲོན་པོ་གཞན། རེས་འགའ་བུད་མེད་དང་། དགེ་སློང་། བླ་མ། བྲམ་ཟེ། རྐུན་པོ། ཤན་པ་ལ་སོགས་པ་བསྒྲལ་ཏེ་འགྲོ་ཡང་། གྲུ་དེ་སླར་འོང་བའི་ཚེ་ན་ནི་སྔར་ཅི་འདྲ་བ་དེ་འདྲ་བ་ལས། བྲི་བ་ཡང་མེད། གང་བ་ཡང་མེད་དོ། །འགའ་ཞིག་གི་བཟང་པོའམ་ངན་པར་བྱ་བ་བྱས་པ་ཡང་མེད་ལ་སྔར་ཅི་འདྲ་བ་དེ་བཞིན་དུ་ཡོད་མོད་ཀྱི་གྲུ་དེ་ད་དུང་ཡང་ཡང་ནས་ཡང་དུ་ཚུ་རོལ་ནས་ཕ་རོལ་དང་ཕ་རོལ་ནས་ཚུ་རོལ་དུ་འགྲོ་ཡང་དགོས་སོ། །དེ་བཞིན་ཏུ་ཁོ་བོ་ཡང་རང་གི་ཁྱིམ་ནས་ཀྱང་ཁྱིམ་གཞན་དུ་འགྲོ་དེ་ནས་ཀྱང་སླར་རང་གི་ཁྱིམ་དུ་འོང་སྟེ་གཞི་དེ་ལྟ་བུ་ཡང་ནས་ཡང་དུ་འགྲོ་ཞིང་ལྡོག་པར་བྱེད་པ་ལ་སོགས་པ་དེའི་ཚེ་རེས་འགའ་སྐྱེས་པ་དང་། རེས་འགའ་བུད་མེད་དང་། རེས་འགའ་བྱིས་པ་དང་འཕྲད་པ་དང་། མཐོང་བ་དག་ཡོད་མོད་ཀྱི་དེ་དག་ལས་བདག་གིས་ཅུང་ཟད་སྔར་མ་གོ་བའམ། མ་ཐོས་པ། གསར་དུ་གོ་བ་དང་ཐོས་པ་ནི་ཅུང་ཟད་ཀྱང་མེད་དོ། །དཔེར་ན་གྲུ་དང་འདྲ་ཞིང་ད་དུང་ཡང་ནས་ཡང་དུ་ཁོ་བོ་འགྲོ་ཡང་དགོས་ཏེ། འདི་དཔེ་དང་དོན་ཡང་གཉིས་པའོ། །ཡང་དེ་དག་གི་ལུས་ནི་ཆུ་ལས་སྒྲོལ་བར་བྱ་བའི་ཕྱིར་གྲུ་ནང་དུ་འཇུག་ཀྱང་། གྲུ་ནང་ནས་སླར་ཡང་འབྱུང་ཀྱང་གྲུ་ནང་དེ་ནས་ནི་མི་དེའི་རྙེད་པའམ་ཐོབ་པར་གྱུར་བའང་ཅུང་ཟད་ཀྱང་མེད་པ་ལ། གྲུ་དེར་མི་དེའི་ལུས་པར་འགྱུར་བའམ་བཞག་པར་གྱུར་བ་ཅུང་ཟད་ཀྱང་མེད་དེ་གྲུ་ཡང་སྔར་བཞིན། མི་ཡང་སྔར་བཞིན་འཇུག་ཅིང་འབྱུང་མོད་ཀྱི་མི་དེ་གྲུར་འཇུག་པ་ལ་དོན་ཅུང་ཟད་ཀྱང་མེད་པའང་མིན་ནོ། །དཔེ་དེ་བཞིན་དུ་ཁོ་བོ་ཡང་རང་གི་ཁྱིམ་ནས་གཞན་དུ་འཇུག་ཅིང་འབྱུང་མོད་ཀྱི་སླར་མ་གོ་བའམ་མ་ཐོས་པ་གསར་དུ་བཤད་པར་བྱ་བ་ནི་ཅུང་ཟད་ཀྱང་མེད་དེ། རང་གི་དོན་མ་གྲུབ་པ་ཡང་མིན་ནོ། །དེའི་ཕྱིར་གྲུ་འཇུག་པའི་ལུས་ཀྱི་དཔེ་སྟེ། འདི་ཡང་དཔེ་དང་དོན་གསུམ་པའོ། །དེ་ཡང་ཆུ་ནི་གཞི་ཡིན་ལ། གྲུ་ནི་ཆུ་ལ་འཇུག །ལུས་ནི་གྲུ་འཇུག་པའི་ཕྱིར། ཆུ་ལ་གྲུ་གནས། གྲུར་ནི་ལུས་གནས་པས་དེ་དག་གི་སྔ་ཕྱི་རྟེན་དང་བརྟེན་པའི་གོ་རིམ་གྱི་དབང་གིས་ཀྱང་ཆུ་གྲུ་ལུས་ཞེས་དཔེ་གསུམ་པོ་རིམ་བཞིན་དུ་བཞག་པ་ཡིན་ནོ། །ཡང་ཁོ་བོ་ནི་འདི་ལྟར་ཕྱོགས་གཞན་དང་གཞན་གྱི་མི་ཞིག་ན་བ་དང་ཤི་བར་གྱུར་པ་དེ་དང་དེ་དག་གི་སྐུ་རིམ་མམ་དགེ་རྩའི་ཕྱིར་ཡང་ནས་ཡང་དུ་དགེ་འདུན་གྱི་ཚོགས་སུ་འགྲོ་སྟེ་དེར་ནི་ཁོ་བོས་བཟླས་པ་དང་། ཀློག་པ་དང་། སྒོམ་པ་ལ་སོགས་པ་གཞན་ལ་ཕན་པ་འགའ་ཞིག་གི་ཕྱིར་ཞུགས་པ་ཡིན་ལ། རེས་འགའ་ནི་རང་གི་དོན་ཕྲན་བུ་དག་གི་ཕྱིར་ཡང་འགྲོ་ཞིང་འོང་བ་དེ་དག་གི་ཕྱིར་ཡང་དཔེ་གསུམ་དུ་རིམ་པ་བཞིན་བཞག་པ་སྟེ། དེ་ཡོན་བདག་གི་སྐུ་རིམ་གྱི་ཕྱིར་འགྲོ་བ་ནི་ཆུ་ཀླུང་གི་དཔེ་དང་འབྲེལ་ཏེ། ཆུ་ཀླུང་གིས་འགྲོ་བ་དག་གི་དྲི་མ་དང་སྐོམ་པ་སེལ་ཞིང་ཕན་པ་དུ་མ་བྱེད་དེ་སྲོག་གནས་པར་བྱེད་ཅིང་མཐར་རྒྱ་མཚོ་ཆེན་པོར་འཇུག་པ་བཞིན་དུ་ནད་ཀྱི་དྲི་མ་སེལ་ཞིང་། གདོན་གྱི་གནོད་པ་སྐོམ་པའི་ཟུག་རྔུ་ལྟ་བུ་མེད་པར་བྱེད་ལ། སྨན་གྱི་མཐུ་བ་སྐྱེད་པ་ལ་སོགས་ཕན་པ་དུ་མ་བྱེད་ཅིང་ཐོག་ཡུན་རིང་དུ་གནས་པར་བྱེད་དེ་བྱ་བ་དེ་དག་མཇུག་བསྔོ་བས་རྗེས་འདེབས་པའི་ཕྱིར་རྣམ་པ་ཐམས་ཅད་མཁྱེན་པའི་རྒྱ་མཚོར་འབབ་པ་དེའི་ཕྱིར་ན་ཆུའི་དཔེ་དང་འབྲེལ་ལོ། །ཤི་བ་དག་གནས་སྤོར་བའི་ཕྱིར་འགྲོ་བ་ནི་གྲུའི་དཔེ་དང་འབྲེལ་ཏེ། མགྲོན་པོ་དག་ནི་ཚུ་རོལ་གྱི་གནས་ནས་ཕ་རོལ་གྱི་གནས་སུ་འགྲོ་འདོད་པ་ཡིན་ལ། དེའི་ལམ་བར་དུ་ཆུ་ཀླུང་ཆེན་པོ་དག་གིས་བཅད་པའི་ཕྱིར། རང་སྟོབས་ཀྱིས་འགྲོ་མི་ནུས་ཏེ། ཁོ་བོ་ལ་སོགས་འཕགས་པའི་དགེ་འདུན་དང་དམ་པའི་ཆོས་ཀྱི་གྲུ་བོ་ཆེ་ལ་བསྟེན་ན་བར་དོའི་རྣམ་ཤེས་ཆུ་ནང་གི་མི་ལྟར་བསྒྱུར་སླ་བ་དེ་ཐར་པའི་སྐམ་སར་འཁོད་པའི་ཕྱིར་འདི་ནི་གྲུའི་དཔེ་དང་འདྲའོ། །གནས་སྐབས་ཀྱི་དོན་ཕྲ་མོ་དག་གི་ཕྱིར་འགྲོ་བ་ལུས་ཀྱི་དཔེ་དང་འབྲེལ་ཏེ། ལུས་ནི་ཆུའི་དོན་དུའང་གྲུར་འཇུག་པ་མིན། གྲུའི་དོན་དུའང་མ་ཡིན། གཞན་སུའི་དོན་དུའང་མ་ཡིན་ཏེ་ལུས་ནི་རང་ཉིད་དང་རང་ལ་བསྟེན་པའི་ཞྭ་གོས་ཙམ་ཆུ་ལས་སྒྲོལ་བ་འབའ་ཞིག་གི་ཕྱིར་འཇུག་པ་དེ་དང་འདྲ་བར་ཁོ་བོ་ཡང་གནས་སྐབས་ཀྱི་དོན་ཕྲན་བུ་དག་གི་ཕྱིར་འགྲོ་བའི་ཚེ་རང་དང་རང་ལ་བསྟེན་པའི་གྲོགས་ཁྱེད་ཅག་གི་བྱ་བ་ཅུང་ཟད་དེའི་ཕྱིར་འགྲོ་བར་ཟད་ཀྱིས། དེ་ལས་གཞན་པའི་དོན་གང་ཡང་མེད་པའི་ཕྱིར་ན་ལུས་ཀྱི་དཔེ་དང་འདྲའོ། །དཔེ་གསུམ་པོ་དེ་དག་གི་སྐབས་སུ་རང་གི་དོན་དང་དོན་གང་ཡིན་པ་དེ་དང་དེ་དག་ནི་ཡོད་ལ་དེ་ལས་གཞན་པའི་དོན་གོ་བའམ། ཐོས་པའམ། བཤད་པར་བྱ་བ་ནི་ཅུང་ཟད་ཀྱང་མེད་པ་དེ་བཞིན་དུ་ཁོ་བོ་ལ་རང་ཉིད་གང་གི་དོན་དུ་ཕྱིན་པའི་དོན་དེ་དང་དེ་དག་ནི་ཡོད་ལ། དེ་ལས་གཞན་པའི་གོ་བའམ། ཐོས་པའམ། བཤད་པར་བྱ་བ་ནི་ཅུང་ཟད་ཀྱང་མེད་དེ་དེའི་ཕྱིར་ཁོ་བོས་ཆུ་གྲུ་ལུས་ཞེས་པའི་དཔེ་དོན་གསུམ་པོ་འདི་བཞག་པ་ཡིན་ནོ། །ཆུ་གྲུ་ལུས་ཀྱི་དོན་འདི་བྲི་ན་ཡང་། །ཚོང་ཁང་ཇི་སྙེད་ཤོག་བུ་ཟད་འགྱུར་ཞིང་། །མཁན་པོ་ཅི་སྙེད་སྣག་ཚ་ཟད་འགྱུར་གྱི། །ཁོ་བོའི་བློ་གྲོས་ཟད་པར་མི་འགྱུར་ཏེ། །ཆུ་གྲུ་ལུས་ཀྱི་དོན་ཀྱང་མི་ཟད་དོ། །རྒན་པོ་དག་གིས་སླར་སྨྲས་པ། ཨོཾ་མ་ཎི་པདྨེ་ཧཱུྃ། རྟག་ཏུ་སྡུག་བསྔལ་ལ་སྤྱོད་པའི། །འགྲོ་བ་དྲུག་ལ་སྤྱན་རས་ཀྱིས། །རྟག་ཏུ་གཟིགས་པའི་ཐུགས་རྗེ་ཅན། །མགོན་པོ་དེ་ལ་གུས་པའི་འདུད། །འདི་ན་རྒྱུད་འགྲེལ་རྩོམ་པ་འགས། །རྒྱུད་ཚིག་རྣལ་མ་རྩ་བཞིན་བོར། །དོན་མེད་པ་ཡི་མཐའ་རྒྱན་སྦྱར། །དེ་ལ་ཚིག་རྒྱན་ཀྱང་ཡང་སྦྱར། །ཆུ་གྲུ་ལུས་གསུམ་གནས་སྐབས་འགལ། །རྒྱུད་དང་མཐུན་པར་འགྲེལ་བ་རྩོམ། །རྒྱུ་མཚན་བཟུང་ན་ཆུ་གྲུ་ལུས། །ཚིག་བཀྲལ་རྒྱུད་དང་བསྟན་བཅོས་སོགས། །དཔང་པོ་ལུང་གི་སྐྱོར་མེད་ལ། །ཚིག་ཉོག་ནག་འགྲོས་སུ་བཀོད་ནས། །འགྲེལ་བའི་ཕུང་པོ་ཞིག་རྩོམ་པ། །དཔྱད་ན་རྩ་འགྲེལ་མ་འབྲེལ་བའི། །འགལ་འདུ་དུ་མ་ཞིག་མཆིས་ཀྱང་། །རེ་ཞིག་རྒོལ་བ་མི་བྱེད་ཀྱང་། །སླར་ཡང་བཞེད་ན་སྤྲོས་པས་ཆོག །ཅེས་སོ། །ཡང་དེའི་ལན་ནི། སྤྱིར་ན་འཆད་རྩོད་རྩོམ་པ་གསུམ། །དགོན་སྡེའི་མགོ་འཛིན་བྱེད་པ་ལ། །མེད་ཐབས་མེད་པ་དེ་ལགས་པས། །ཁྱེད་ཀྱང་རྩོད་པའི་འབྱམས་ཡིག་འདི། །རྩོམ་པར་བྱེད་པ་ལགས་མོད་ཀྱི། །ཆུ་གྲུ་ལུས་ཀྱི་རྣམ་བཤད་འདི། །དགོན་སྟོད་མཁས་པ་མང་ལ་གྲགས། །གཞུང་བཤད་དགེ་བའི་དཔལ་བ་ཁོང་། །སྒོམ་པའི་བློ་གྲོས་གཏིང་ན་གསལ། །དཔེར་ན་བུམ་ནང་མར་མེ་འདྲ། །ཁོ་ཐག་ནང་ནས་ཆོད་དེ་མཆི། །ནམ་ཕུག་རྒོལ་བས་མི་བརྫི་བའི། །གདེངས་ཤིག་སེམས་ལ་མ་ཐོབ་པར། །མ་བརྟགས་ཅ་ཅོར་གསུང་མི་སྲིད། །འགྲེལ་བྱེད་དཔལ་གྱི་དགེ་བ་དེ། །གཞུང་བརྒྱ་འབྱེད་པའི་རྣམ་དཔྱོད་ཡོད། །ཚིག་བརྒྱ་སྨྲ་བའི་སྤོབས་པ་ཡོད། །སྔ་རྒོལ་བྱས་ན་དམ་བཅའ་བརྟན། །རང་འདོད་བསྒྲུབ་པའི་བློ་གྲོས་ཡོད། །ཕྱི་རྒོལ་བྱས་ན་རྩོད་རིགས་རྣོ། །གཞན་འདོད་བཤིགས་པའི་རྣམ་རིག་ཡོད། །རིག་ལམ་མེ་དཔུང་འབར་བ་འདྲ། །གང་ཡང་ཁོང་གི་གྲོགས་སུ་འགྲོ། །གནས་བརྟན་བློ་གྲོས་བཟང་པོ་དེ། །བློ་གསལ་སྟོང་གི་སློབ་དཔོན་ཡིན། །མཁས་མང་འདུ་བའི་འདུ་ས་ཡིན། །དཔེ་ཡང་ཁོང་གི་དྲུང་ནས་འབྱུང་། །འདི་ལ་རྒོལ་དུ་ཅིས་ཀྱང་དཀའ། །འབྲུ་དྲུག་མ་ཎི་པདྨེ་འདི། །ཆོས་ཀྱི་སྙིང་པོ་ཡིན་པ་སྐད། །དར་བ་བོད་ཡུལ་ཡོངས་ལ་དར། །ཤེས་པ་རྒད་མོ་རྣམས་ཀྱང་ཤེས། །འདོན་པ་སྤྲང་པོ་རྣམས་ཀྱང་འདོན། །བྲི་བ་བྱིས་པ་རྣམས་ཀྱང་བྲི། །མཁས་པའི་བསྟན་བཅོས་རྩོམ་པ་ལ། །མ་ཎིའི་འགྲོ་སྒོ་ཡོད་རབ་མེད། །རྩ་བ་ཚིག་འབྲུ་གསུམ་པོ་དེ། །སྔོན་ཆད་སྙན་ནས་སྙན་དུ་བརྒྱུད། །འགྲེལ་བྱེད་ཁོང་གི་མ་གཏོགས་པ། །དཔེ་ལ་འཁོད་པ་མ་བྱུང་སྐད། །དེ་ལ་ས་མཐའ་མེད་པ་འདི། །སྒྲུབ་བྱ་ཡིན་གྱི་སྒྲུབ་བྱེད་མིན། །རྩ་བ་རྒྱུད་དུ་ཁྱེད་བཞེད་ཅིང་། །ཆུ་གྲུ་ལུས་གསུམ་སྐབས་དུ་མར། །འབྲེལ་བ་ཞལ་གྱིས་བཞེས་ལགས་ན། །འགལ་ན་སྒྲུབ་ཏུ་མི་ནུས་ཏེ། །འབྲེལ་བའི་ཕྱིར་ན་རྒྱུད་དོ་ཞེས། །བཀའ་བསྟན་ཡོངས་ལ་རླུང་ལྟར་གྲགས། །ལུང་གི་དག་བྱེད་རིག་པ་ནི། །མཁས་མང་མདུན་སར་གྲགས་ལགས་ན། །རིག་པ་ལས་ལྷག་ལུང་མི་དགོས། །དགོས་ཀྱང་ཁོང་ལ་ཡོད་དེ་མཆི། །ཚིག་བྱས་ནག་འགྲོས་བཀོད་པ་དེ། །བཀའ་བསྟན་འགྲེལ་བྱེད་སྤྱི་ཡི་སྲོལ། །ཕྱག་ལེན་ཐབས་སུ་སྤྲད་པ་ཞིག །རྙིང་བོན་ཆོ་ག་འགའ་ཞིག་ལ། །ཡོད་པར་སྲིད་ཀྱི་གཞན་དུ་མིན། །ད་དུང་འགལ་འདུ་མང་པོ་ཞིག །སྤྲོ་རྒྱུ་ཡོད་ན་ཅིས་ཀྱང་སྤྲོས། །མེད་ན་རྩོད་རྒྱུ་བློ་མེད་གྱིས།། །།དགེའོ། །དགེའོ། །དགེའོ། །