ཀུན་མཁྱེན་བླ་མའི་གསུང་རབས་ལ་བསྔགས་པ་ཡོངས་རྫོགས་བསྟན་པའི་པད་ཚལ།

🚧 This website is under continued development. We appreciate your patience!

Previous Text Back to Volume Page Next Text

Wylie title	kun mkhyen bla ma'i gsung rabs la bsngags pa yongs rdzogs bstan pa'i pad tshal
Location	dpal sprul bka' 'bum Volume 1, Text 9, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Verses of Praise - bstod pa
Colophon	ཅེས་པའང་ཨ་བུ་ཧྲལ་པོས་གང་དྲན་བརྗོད་པ་དགེ་ལེགས་འཕེལ། །དགེའོ། །དགེའོ། །དགེའོ།
Colophon	ces pa'ang a bu hral pos gang dran brjod pa dge legs 'phel/_/dge'o/_/dge'o/_/dge'o/

[edit]

༄༅། །ཀུན་མཁྱེན་བླ་མའི་གསུང་རབས་ལ་བསྔགས་པ་ཡོངས་རྫོགས་བསྟན་པའི་པད་ཚལ་བཞུགས་སོ། །

ན་མཿསརྦ་ཛྙཱ་ཡ་གུ་ར་ཝེ། གང་ཞིག་རྒྱལ་བའི་ཡོན་ཏན་མཐའ་ཀླས་པ། །མ་ལུས་ཡང་དག་རྫོགས་པའི་དཀྱིལ་འཁོར་ཅན། །ཀུན་མཁྱེན་བླ་མ་རྒྱལ་བ་ཐམས་ཅད་ཀྱི། །རྒྱལ་ཚབ་སེམས་དཔར་གྱུར་ལ་ཕྱག་འཚལ་ལོ།༼༡༽།གདོད་མའི་གཞི་དབྱིངས་ཡོན་ཏན་རྫོགས་པའི་ཀློ༵ང་། །སྟོང་ཆེ༵ན་ལྷུམས་སུ་ཆོས་ཉིད་ཟད་ཞུགས་པས། །ར༵བ་འབྱ༵མས་མཁྱེན་པས་ཤེས་བྱ་ཡོངས་གཅོད་པ། །ཀུན་མཁྱེན་བླ་མ་ཐམས་ཅད་མཁྱེན་པ་ཡིན།༼༢༽།སྐྱོབ་པ་དེ་ཡི་ལེགས་བཤད་ཚིག་གཅིག་གི །ཟུར་ཙམ་ཐོས་ཀྱང་སྲིད་པ་ཧྲུལ་པོ་རུ། །ངེས་པར་བགྱིད་ན་བསྟན་པ་ཡོངས་རྫོགས་པའི། །གསུང་ལ་ཐོས་བསམ་བགྱིད་རྣམས་ལྟ་ཅི་སྨོས།༼༣༽།རྒྱལ་བ་རྣམས་དང་རྒྱལ་སྲས་ཆེ་རྣམས་ཀྱིས། །དཔའ་བར་འགྲོ་སོགས་ཏིང་འཛིན་རྣམ་ཐར་མཐུས། ། འཕགས་བཞི་སོ་སྐྱེ་དུ་མའི་སྤྲུལ་གཟུགས་ཀྱིས། །རྒྱལ་བའི་མཛད་བཟང་ཅི་ཡང་སྟོན་པ་ཡིན།༼༤༽།དེ་སླད་ཀུན་མཁྱེན་མཆོག་གི་སྤྲུལ་བའི་སྐུས། །རྒྱལ་བའི་མཛད་པས་སྙིགས་མའི་འགྲོ་སྐྱོང་ཞིང་། །ཐོས་པས་གྲོལ་བ་ཐེག་རྩེའི་ཆོས་འཁོར་གྱིས། །རྡོ་རྗེ་སྙིང་པོའི་བསྟན་པ་གསལ་བར་མཛད།༼༥༽།ཀུན་ཆེན་བླ་མ་རྫོགས་པའི་སངས་རྒྱས་དེའི། །ལེགས་བཤད་བདུད་རྩི་ཤིན་ཏུ་དག་པ་འདི། །ལུང་གི་ཆོས་མཆོག་ཞལ་ནས་གསུངས་པའི་བཀར། །མི་ཤེས་པ་དེ་བ་གླང་ཡ་སོ་ཅན།༼༦༽སྐལ་བ་བཟང་དག་རབ་དགའ་སྐྱེད་བྱོས་ལ། །སངས་རྒྱས་མཐོང་བའི་ངེས་ཤེས་སྐྱེས་ཤིག་དང་། །ཀུན་མཁྱེན་བླ་མའི་ལེགས་བཤད་འདི་མཐོང་ལས། ། སངས་རྒྱས་མཇལ་ཡང་ཅུང་ཟད་ཡོད་རེ་ཀན།༼༧༽།ཐུབ་པའི་མཚན་དཔེ་མིག་གི་བདུད་རྩི་སྟེ། །སྐལ་བཟང་ཡིད་ལ་དད་གསུམ་བསྐྱེད་པ་ལགས། །ལེགས་བཤད་ཡིག་གཟུགས་བཟོ་ཡི་སྤྲུལ་སྐུ་སྟེ། །དད་པའི་གསོས་སུ་འདི་ལས་ལྷག་པ་མེད།༼༨༽།སྟོན་པས་ཚངས་དབྱངས་རྣ་བའི་བདུད་རྩི་སྟེ། །བསྐལ་བཟང་ཡིད་ལ་ཤེས་རབ་བསྐྱེད་པ་ལགས། །ལེགས་བཤད་ཚིག་ཕྲེང་རྣ་བའི་བདུད་རྩི་སྟེ། །ཤེས་རབ་གསོས་སུ་འདི་དང་མཉམ་པ་མེད།༼༨༽།རྒྱལ་བའི་བྱིན་རླབས་སྙིང་གི་བདུད་རྩི་སྟེ། །བསྐལ་བཟང་ཡིད་ལ་བདེན་པ་སྟོན་པ་ལགས། །ལེགས་བཤད་དོན་བཟང་སྙིང་གི་བདུད་རྩི་སྟེ། །ཡིད་ལ་ཡེ་ཤེས་གསོས་སུ་འདི་ཉིད་ཆེ།༼༡༠༽།རྣམ་ཐར་ཏིང་འཛིན་སྟོབས་ཀྱིས་བྱིན་རླབས་པས། །འདི་མཐོང་ཡིད་ལ་ཆོས་ཉིད་ཤུགས་ཀྱིས་སྐྱེ། ། ཀ་དག་དགོངས་པ་འཕྲལ་ལ་སྟོན་ནུས་ཤིང་། །ཆོས་ཅན་འཛིན་པ་གཞིག་ལ་འདི་འདྲ་མེད།༼༡༡༽།ཡི་གེའི་རྣམ་རོལ་ཤཱཀྱ་སེང་གེའི་སྐུ། །རྗོད་བྱེད་ཚིག་ཕྲེང་ཀུན་མཁྱེན་བླ་མའི་གསུང་། །བརྗོད་བྱ་དོན་ཟབ་རྒྱལ་བ་ཀུན་གྱི་ཐུགས། །གསུང་རབ་འདི་མཐོང་བདེ་གཤེགས་ཡོངས་རྫོགས་མཐོང་།༼༡༢༽།ལྔ་བརྒྱ་ཐ་མའི་བསྟན་པར་གྱུར་པ་ན། །གསུབ་རབ་རྣམ་རོལ་ཡི་གེའི་གཟུགས་དག་གིས། །སྟོན་པ་བཞུགས་ཞེས་སྐྱོབ་པ་ཐུགས་རྗེ་ཅན། །ཤཱཀྱ་སེང་གེའི་ཞལ་བཞེས་དེ་ལྟར་ལགས།༼༡༣༽།དོན་བཟང་ལེགས་བཤད་མཛོད་ཆེན་བདུན་ལ་སོགས། ། བསྟན་པ་ཡོངས་རྫོགས་ཚེ་གཅིག་སངས་རྒྱས་ཆོས། །ཟབ་ལམ་རྨད་བྱུང་བདུད་རྩིའི་ཐིག་པ་འདི། །ཀུན་མཁྱེན་བླ་མའི་གསུང་དུ་སུ་ཡིས་བསྙོན།༼༡༤༽།ལྷུན་གྲུབ་ཡོན་ཏན་ཤིན་ཏུ་རྒྱ་ཆེན་པོ། །ཀ་དག་དབྱིངས་སུ་ཟབ་པའི་ཆོས་ཉིད་ཅན། །ཟུང་འཇུག་ཐེག་རྩེ་རྡོ་རྗེ་སྙིང་པོའི་ཆོས། །རྒྱན་ཀུན་ཐུགས་གསང་འདི་ལས་ཅི་ཞིག་ཡོད།༼༡༥༽།ཐུབ་པའི་མཛེས་སྐུ་གསེར་གྱི་རི་འདྲ་བ། །གཟུགས་སྐུ་མཐོང་བའི་ཁྱད་ཆོས་དེ་ལགས་མོད། །ཆོས་ཉིད་རང་བཞིན་བརྗོད་དུ་མེད་སྟོན་པ། །ཆོས་སྐུ་མཐོང་བའི་སྐལ་བཟང་འདི་ཙམ་ལགས།༼༡༦༽།ཤིང་དབང་དྲུང་དེར་སྐྱོབ་པས་གང་མཁྱེན་དང་། །རྒྱལ་སྲས་རྣམས་ཀྱིས་བདེན་པ་གང་གཟིགས་པ། །ཀུན་མཁྱེན་བླ་མའི་ལེགས་བཤད་ཚིག་གཅིག་གིས། །བརྗོད་དུ་མེད་དོན་ཐབས་ཀྱིས་སྟོན་པར་མཛད།༼༡༧༽།ཡོན་ཏན་རང་བཞིན་བྱང་ཆུབ་ཕྱོགས་ཀྱི་ཆོས། །མ་ལུས་ཡོངས་རྫོགས་རྫོགས་པ་ཆེན་པོ་ནི། །རྒྱལ་བ་ཀུན་གྱི་ཆོས་སྐུའི་མཆོད་སྡོང་སྟེ། །བསོད་ནམས་ཞིང་དུ་འདི་ལས་ལྷག་པ་མེད།༼༡༨༽།ཐུབ་པའི་མདོ་སྡེ་ཇི་སྙེད་བསམ་ཡས་པའི། །ཡོན་ཏན་མཆོག་ཀྱང་ཟབ་རྒྱས་སྟོན་པས་ཏེ། །ཆོས་ཉིད་རང་བཞིན་ཟབ་ཅིང་རྒྱ་ཆེ་བ། །རྗེན་པར་སྟོན་འདིའི་ཡོན་ཏན་ཡང་དེ་ཙམ།༼༡༩༽།དེ་སླད་གཞུང་འདིའི་ཚིག་གཅིག་ཉན་པ་དང་། །འཛིན་ཀློག་སྒྲུབ་རྣམས་ཇི་སྙེད་རྒྱལ་བའི་ཆོས། །ཉན་དང་འཛིན་ཀློག་སྒྲུབ་ལ་བརྩོན་པ་དང་། །བསྐལ་པ་མཉམ་ཞིང་བསོད་ནམས་རྣམ་སྨིན་མཉམ།༼༢༠༽བརྒྱད་ཁྲི་བཞི་སྟོང་ཆོས་དོན་རིག་པའི་ཀློང་། །འདུས་པར་ངེས་ན་དེ་ཡི་བརྗོད་བྱེད་གཞུང་། །ཀུན་མཁྱེན་བླ་མའི་ལེགས་བཤད་ཟབ་མོའི་ཆོས། །ཚིག་བཅད་གཅིག་ཏུ་ཅི་ཡི་ཕྱིར་མི་འདུ།༼༢༡༽།དད་པའི་སེམས་ཀྱིས་སྐད་ཅིག་མཇལ་ན་ཡང་། །གང་གི་ཡིད་ལ་གདུང་བ་སྐྱེ་འགྱུར་བའི། །ཉོན་མོངས་རྙོགས་པ་ཤུགས་ཀྱིས་འབྲལ་བགྱིད་པ། །ཀུན་མཁྱེན་བླ་མའི་ལེགས་བཤད་མཐོང་གྲོལ་ཡིན།༼༢༢༽། ཚིག་གཅིག་ཐོས་ཀྱང་རྣམ་པར་རྟོག་པའི་རྡུལ། །རྣམ་པར་སྤངས་ནས་ཞི་བའི་ཏིང་ངེ་འཛིན། ། གང་གི་ཡིད་ལ་རྩོལ་མེད་སྐྱེ་འགྱུར་བ། །ཀུན་མཁྱེན་བླ་མའི་ལེགས་བཤད་ཐོས་གྲོལ་ཡིན།༼༢༣༽།རྟོག་གེའི་བློ་གྲོས་རྩུབ་མོའི་སྐྱོན་སྤངས་པའི། །ཞི་བ་བསིལ་བ་འཇམ་པའི་རེག་བྱ་ཅན། །འཁོར་བའི་གདུང་སེལ་འཆི་མེད་ཐེག་པ་སྟེ། །ཀུན་མཁྱེན་བླ་མའི་ལེགས་བཤད་རེག་གྲོལ་ཡིན།༼༢༤༽།ཟབ་པའི་དོན་བཟང་བདུད་རྩིའི་རོ་མངར་ཅན། །ཇི་ཙམ་མྱོང་བཞིན་ཐོས་བསམ་སྒོམ་པའི་ལུས། །བརྟས་པའི་འཕུར་ལྡིང་ཆོས་ཉིད་དབྱིངས་སྤྱོད་པ། ། ཀུན་མཁྱེན་བླ་མའི་ལེགས་བཤད་མྱོང་གྲོལ་ཡིན།༼༢༥༽།རྒྱལ་བའི་བསྟན་པ་ཇི་སྙེད་ཡོངས་རྫོགས་པའི། །གཞུང་བཟང་ཀུན་མཁྱེན་བླ་མས་བཀྲལ་འདི་འདྲ། །འཕགས་བོད་མཁས་པའི་སྐྱེ་བོ་སུ་ཡིས་ཀྱང་། །སྔོན་ཆད་འཛམ་གླིང་ལྗོངས་འདིར་བཞག་པ་མེད།༼༢༦༽།རྒྱུ་འབྲས་ཐེག་པའི་ཆོས་ཀྱི་སྒོ་དབྱེ་ནས། །རྒྱུ་འབྲས་མེད་དབྱིངས་མཉམ་པར་ལ་ཟློས་པའི། ། ཀུན་མཁྱེན་བླ་མའི་གདམས་ངག་འདི་འདྲ་བ། །འཆད་པའི་མཁས་གྲུབ་གཉིས་པ་སུ་ཡང་མེད།༼༢༧༽།གཞུང་བཟང་འདི་དག་ཡན་ལག་ཡོངས་རྫོགས་པའི། །ལྷ་ལུས་མཛེས་པ་རྒྱན་གྱིས་སྤྲས་འདྲ་སྟེ། །འདི་དང་བསྒྲུན་ན་མཁས་པའི་བསྟན་བཅོས་གཞན། །ཕྱོགས་རེའི་ཡན་ལག་དུམ་བུར་འཐོར་དང་འདྲ།༼༢༨༽།ཚིག་བཟང་སྙན་དངགས་དམ་པའི་རྒྱན་གྱིས་མཛེས། ། དོན་ཆེན་རྒྱལ་བསྟན་རྫོགས་པའི་ཁོ་ལག་དར། །ཐེག་རྩེ་ནོར་བུ་མཆོག་གི་ཐོར་ཚུགས་ཅན། ། གཞུང་བཟང་འདི་དག་ལྷ་ཡི་དབང་པོ་འདྲ།༼༢༩༽།ལམ་སྟེགས་རྒྱུ་འབྲས་ཐེག་པའི་ཐེམ་སྐས་བཀྲམ། །གསང་ཆེན་ལམ་གྱི་བ་གམ་བརྗིད་ཆགས་ཤིང་། །ལྷུན་གྲུབ་སྐུ་བཞིར་བགྲོད་པའི་རྩེ་མོ་འབར། །གཞུང་བཟང་འདི་དག་རྣམ་རྒྱལ་ཕོ་བྲང་འདྲ།༼༣༠༽།འདོད་ཁམས་དགེ་བཅུའི་རི་དབང་ལྷུན་བརྗིད་ཅིང་། །གཟུགས་མེད་ཏིང་འཛིན་ཞི་བའི་སྤྲིན་ཚོགས་བཀྲམ། ། གཟུགས་ཁམས་འཕགས་ལམ་རྫོགས་པའི་འོག་མིན་ཅན། །གཞུང་བཟང་འདི་དག་སྲིད་པ་གསུམ་པོ་འདྲ།༼༣༡༽གང་འདུལ་འགྲོ་ཁམས་མོས་པ་དེ་བཞིན་འདུལ། །སྣ་ཚོགས་ཤེས་བྱའི་ཆོས་ཀུན་མ་འདྲེས་འཆད། །དོན་དམ་མཉམ་པའི་ཀློང་ལས་མི་འདའ་བས། །གཞུང་བཟང་འདི་དག་རྫོགས་པའི་སངས་རྒྱས་འདྲ།༼༣༢༽།ཇི་སྙེད་ཐེག་པའི་རྣམ་གྲངས་མཐའ་ཡས་སྟོན། །ཡིད་དཔྱོད་རྒྱུ་འབྲས་ལམ་ལས་ཐེག་དགུར་ཕྱེ། །མངོན་སུམ་འོད་གསལ་ཀློང་དུ་སྤང་བླང་ཟད། །གཞུང་བཟང་འདི་དག་སྲིད་ཞི་གཉིས་ཀ་འདྲ།༼༣༣༽།དོན་འདི་ཤེས་ན་རྡོ་རྗེ་སྙིང་པོའི་ལམ། །སྙིང་ཐིག་གསང་བའི་ཟབ་གནད་སྙིང་འདྲ་བའི། །དོན་འདི་མི་སྟོན་མཁས་པའི་བསྟན་བཅོས་གཞན། །ལུས་ཉིད་མཛེས་ཀྱང་སྙིང་མེད་རོ་དང་འདྲ།༼༣༤༽།རྟོགས་པའི་འདྲ་འབག་རྡོ་རྗེ་སྙིང་པོའི་གླུ། །མངོན་སུམ་ཆོས་ཉིད་རྗེན་པར་སྟོན་པའི་ངག །ཀློང་རྡོལ་གཏམ་འདི་སྐད་ཅིག་ཐོས་པས་ཀྱང་། །འོད་གསལ་ཡེ་ཤེས་རྒྱུད་ལ་ཤུགས་ཀྱིས་སྐྱེ།༼༣༥༽།ཟབ་ལས་ ཆེས་ཟབ་ཆོས་དབྱིངས་རིན་པོ་ཆེ། །བྱིན་བརྒྱུད་ཡེ་ཤེས་རྟོགས་པའི་མཛོད་གཅིག་པུར། །ཡང་དག་ཆོས་སྐུ་དངོས་བྱོན་གཞུང་འདི་འདྲ། །གང་གིས་ཉམས་བླང་སྲིད་པ་ཐ་མ་ཡིན།༼༣༦༽། ཟང་ཐལ་རིག་པ་ཀུན་མཁྱེན་བླ་མའི་ཐུགས། །རྗེན་པར་སྟོན་པའི་མན་ངག་འདི་འདྲ་བ། ། སངས་རྒྱས་དངོས་ཡིན་དམ་པའི་ཆོས་ཀྱང་ཡིན། །མོས་གུས་སྐྱེས་ན་དགེ་བའི་བཤེས་གཉེན་ཡིན།༼༣༧༽།རྒྱུད་སྡེ་ཀུན་གྱི་ཟབ་གནད་མཐར་ཐུག་པ། །བཞི་པའི་དབང་ཞེས་གྲགས་པ་འདི་ཡིན་ཏེ། །དབང་བཞི་ཡོངས་རྫོགས་རིག་པ་རྩལ་གྱི་དབང་། །གཞུང་བཟང་འདི་འདྲ་མཐོང་ལས་གཞན་ཡོད་མིན།༼༣༨༽།ཀུན་མཁྱེན་བླ་མ་འཇའ་ལུས་སྒྱུ་མའི་སྐུ། །སྔོན་ཞིག་བཞུགས་ཀྱི་ད་ལྟ་མེད་པ་མིན། །མཐོང་བར་ནུས་ན་རང་གི་མདུན་ན་བཞུགས། །རྟོག་པས་བསྒྲིབ་ན་མངོན་སུམ་བྱོན་ཀྱང་ཅི།༼༣༩༽།གསུང་གི་གནད་འདི་རྟོགས་པའི་འདྲ་འབག་སྟེ། ། ཡེ་ཤེས་ཆེན་པོས་ཚིག་དོན་བྱིན་གྱིས་བརླབས། །མོས་གུས་ཅན་ལ་བདེན་ཚིག་གཏད་རྒྱ་མཛད། །ངེས་པར་བརྟེན་ན་བླ་མ་འདི་རང་ཡིན།༼༤༠༽།མོས་གུས་ཐོབ་ནས་ཚིག་དོན་དཔྱོད་ཤེས་ན། །གཞུང་བཟང་འདི་འདྲ་ཅི་ཙམ་མཇལ་བའི་ཡུན། །དེ་སྲིད་དེ་བློ་ཆོས་ཉིད་མངོན་སུམ་པའི། །འོད་གསལ་མཆོག་ལས་གཡོ་བ་ཡོད་རེ་ཀན།༼༤༡༽།རྣམ་པར་དཔྱོད་མང་ རྟོག་གེའི་བསྟན་བཅོས་གཞན། །ཇི་ཙམ་བལྟས་བཞིན་འཁྲུལ་བའི་རྣམ་རྟོག་འཕེལ། །བློ་ལས་འདས་སྟོན་ཀུན་མཁྱེན་བླ་མའི་གཞུང་། །ཚིག་གཅིག་ཐོས་ཀྱང་རྩོལ་མེད་ཏིང་འཛིན་སྐྱེད།༼༤༢༽།རྟོག་གེའི་དཀྲུགས་པ་ཕལ་བའི་གཞུང་མང་དུ། །འཁྱམས་ཤིང་འཁྱམས་པའི་དོན་མེད་ངལ་བ་ཅན། །ཚིག་དོན་ཕུན་ཚོགས་ནོར་བུའི་ངལ་སྟེགས་སུ། །ངལ་གསོ་སྦྱིན་པ་ཀུན་མཁྱེན་བླ་མའི་གཞུང་།༼༤༣༽།ཕྱོགས་རེའི་རིག་པ་སྦྲང་བུའི་གཤོག་རླབས་ཀྱིས། །གླིང་བཞི་ཉུལ་འདོད་འབྲས་མེད་ལྟད་མོ་བ། །རྡོ་རྗེ་སྙིང་པོའི་རི་རབ་རྩེར་བགྲོད་ནས། །ཐེག་དགུ་གསལ་སྟོན་ཁྱུང་ཆེན་རྒྱལ་པོ་འདྲ།༼༤༤༽།བྱིས་པའི་བསྟན་བཅོས་རྩེད་མོའི་རྩོད་པ་ཅན། ། ཡིན་དང་མ་ཡིན་རང་རང་ཕྱོགས་ལ་ཞེན། །མཉམ་པའི་ཆོས་ཉིད་རྒན་པོའི་བློ་གྲོས་ཅན། ། ཀུན་མཁྱེན་བླ་མའི་ལེགས་བཤད་གཟུ་བོ་ཡིན།༼༤༥༽།རྨོངས་དང་མ་རིག་ཐེ་ཚོམ་སྐྱེས་པའི་དུས། །གཞུང་བཟང་འདི་དག་བལྟ་བར་བྱོས་ཤིག་དང་། །རྨོངས་པའི་དྲྭ་བ་གང་གིས་གཅོད་འགྱུར་བའི། །ཀུན་མཁྱེན་ལེགས་བཤད་ཤེས་རབ་རལ་གྲི་ཡིན།༼༤༦༽།སྣ་ཚོགས་རྟོག་པའི་བུན་ལོང་གཡོ་བའི་དུས། །གཞུང་བཟང་འདི་དག་བལྟ་བར་བྱོས་ཤིག་དང་། །འཁྲུལ་རྟོག་རྩིག་པ་གང་གིས་འཇིག་འགྱུར་བའི། །ཀུན་མཁྱེན་ལེགས་བཤད་ཡེ་ཤེས་རྡོ་རྗེ་ཡིན།༼༤༧༽། ཆགས་སྡང་འཁྲུལ་བའི་ཟུག་རྔུ་འབར་བའི་དུས། །གཞུང་བཟང་འདི་དག་བལྟ་བར་བྱོས་ཤིག་དང་། །ཉོན་མོངས་བུད་ཤིང་སྐད་ཅིག་སྲེག་བྱེད་པའི། །ཀུན་མཁྱེན་ལེགས་བཤད་རྟོགས་པའི་མེ་དཔུང་ཡིན།༼༤༨༽།འདུ་འཛིའི་གནས་དང་སྐྱོ་བས་གདུང་བའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །ངེས་འབྱུང་བློ་ཡིས་ཁམས་གསོ་སྦྱིན་བྱེད་པའི། ། ཀུན་མཁྱེན་ལེགས་བཤད་བདུད་རྩིའི་སྨན་མཆོག་ཡིན།༼༤༩༽།དབེན་པའི་གནས་སུ་གཅིག་པུར་གནས་པའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །ཉིན་མཚན་འཁོར་ཡུག་ཆོས་ཀྱིས་འདའ་བྱེད་པའི། །ཀུན་མཁྱེན་ལེགས་བཤད་རིག་པའི་སྐྱོ་གྲོགས་ཡིན།༼༥༠༽། མང་པོའི་དབུས་སུ་ཆགས་སྡང་སྐྱེས་པའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །མཉམ་པའི་ཀློང་དུ་སེམས་དལ་སྦྱིན་བྱེད་པའི། །ཀུན་མཁྱེན་ལེགས་བཤད་ནོར་བུའི་ངལ་སྟེགས་ཡིན།༼༥༡༽།ཡིད་དཔྱོད་རྟོག་པའི་ཞེ་འདོད་སྐྱེས་པའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །བདེན་ཞེན་གྲུབ་མཐའི་ལྕགས་སྒྲོགས་གྲོལ་བྱེད་པའི། །ཀུན་མཁྱེན་ལེགས་བཤད་ཐབས་ཀྱི་ལྡེའུ་མིག་ཡིན།༼༥༢༽།བྱིང་རྒོད་རྨུགས་པས་སྒོམ་གེགས་སྐྱེས་པའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །ཞི་བའི་ཏིང་འཛིན་སྐྱོན་མེད་ལེགས་སྐྱེད་པའི། །ཀུན་མཁྱེན་ལེགས་བཤད་གནད་ཀྱི་མན་ངག་ཡིན།༼༥༣༽།ནད་དང་སྡུག་བསྔལ་གནོད་པ་སྐྱེས་པའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། ། རྐྱེན་ངན་སྣང་བ་གྲོགས་སུ་བསྒྱུར་བྱེད་པའི། །ཀུན་མཁྱེན་ལེགས་བཤད་གསེར་འགྱུར་བདུད་ རྩི་ཡིན།༼༥༤༽།རིག་རྩལ་རྟོགས་པའི་ཉམས་མྱོང་འབར་བའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །ཆོས་སྐུའི་ཀློང་དུ་མཉམ་ཉིད་ངོ་སྤྲོད་པའི། །ཀུན་མཁྱེན་ལེགས་བཤད་གནད་ཀྱི་བོག་འདོན་ཡིན།༼༥༥༽།བྱུང་རྒྱལ་ཉམས་ཀྱི་སྣང་བ་འུར་བའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །ཞེན་མེད་ངང་དུ་བརྟུལ་ཞུགས་གོང་འཕེལ་བའི། ། ཀུན་མཁྱེན་ལེགས་བཤད་རྡོ་རྗེའི་ཐོལ་གླུ་ཡིན།༼༥༦༽།འདོད་ཡོན་ལོངས་སྤྱོད་ཤུགས་ཀྱི་འདུ་བའི་དུས། །གཞུང་བཟང་འདི་དག་བལྟ་བར་བྱོས་ཤིག་དང་། །ཞེན་མེད་ངང་དུ་ཅི་འདོད་རྒྱན་འཆང་བའི། །ཀུན་མཁྱེན་ལེགས་བཤད་རྨ་བྱ་དུག་རོལ་ཡིན།༼༥༧༽།སྙེམས་བྱེད་རེ་དོགས་གཟུང་འཛིན་སྐྱེས་པའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །བརྟུལ་ཞུགས་རོལ་པའི་དཔའ་གདེང་སྐྱེད་བྱེད་པའི། །ཀུན་མཁྱེན་ལེགས་བཤད་བདུད་ཀྱི་གཅོད་ཡུལ་ཡིན།༼༥༨༽།དངོས་འཛིན་འཁྲུལ་བ་ཨ་འཐས་སྐྱེས་པའི་ཚེ། །གཞུང་བཟང་འདི་དག་བལྟ་བར་བྱོས་ཤིག་དང་། །བདེན་ཞེན་གདོས་བཅས་བུན་ལོང་འཇིག་བྱེད་པའི། །ཀུན་མཁྱེན་ལེགས་བཤད་སྒྱུ་མའི་མན་ངག་ཡིན།༼༥༩༽།ཀུན་མཁྱེན་ལེགས་བཤད་ནོར་བུའི་གཏེར་ འདྲ་བའི། །ཡོན་ཏན་ཕྲེང་བ་གཞལ་དུ་མི་སྤྱོད་མོད། །ཅུང་ཟད་སྨྲས་འདིས་ཁོ་བོའི་སྤོབས་ པ་ཡང་། །མཐར་ཐུག་མིན་ན་བརྗོད་བྱ་ཇི་ལྟར་རྫོགས།༼༦༠༽།བསྔགས་པའི་གནས་འདི་གྲངས་མེད་ཞིང་དུ་ཡང་། །རྒྱལ་བ་རྣམས་དང་རྒྱལ་སྲས་མཁས་རྣམས་ཀྱི། །དམ་ཆོས་ གཏམ་གྱི་གླེང་གཞིར་གྱུར་པ་སྟེ། །སོ་སོ་ཡང་དག་རིག་པའི་སྤྱོད་ཡུལ་ཡིན།༼༦༡༽།མཁའ་ དབྱིངས་བཞིན་དུ་མཁས་པའི་རོལ་གནས་ལ། །སོ་སྐྱེ་བློ་གྲོས་སྦྲང་བུའི་གཤོག་རླབས་ཀྱིས། ། བསྔགས་པའི་སྙན་གླུ་དར་དིར་སྒྲོགས་པ་འདི། །ལེགས་བཤད་ཚལ་ལ་རབ་དགའ་སྐྱེས་ནས་ཡིན།༼༦༢༽།དགའ་བར་བྱོས་ཤིག་སྐལ་བཟང་དོན་མཐུན་དག །གེ་སར་རོ་མངར་ཡང་ཡང་བཏུང་གྱིས་ལ། །བསྟོད་པའི་གླུ་ཕྲེང་བདག་དང་མཐུན་སྒྲོགས་དང་། །མི་ཟད་སྤོབས་པ་ཁྱེད་ལ་མཛའ་བར་འགྱུར།༼༦༣༽།བསྔགས་འོས་ཡུལ་ལ་བསྔགས་པའི་མཆོད་སྤྲིན་འདིའི། ། ལེགས་བྱས་དགེ་བ་སྲིད་ལ་ཞི་རྒྱུ་དང་། །ཞི་ལ་སྲིད་དོན་གཉིས་མཐར་མི་གནས་པའི། །རྒྱལ་དང་དེ་སྲས་ཐུགས་དགོངས་རྫོགས་ཕྱིར་བསྔོ།༼༦༤༽།མཚམས་སྤྲིན་གཟི་འདྲ་མཚན་དཔེའི་གཟི་འབར་བ། །འཇམ་དཔལ་དཔའ་བོའི་མཁྱེན་པ་དེ་དྲན་ནས། །དེ་ཡི་རྗེས་བཞིན་བདེན་པའི་འཁོར་གསུམ་བློ། །སྤོངས་པའི་ཡོངས་བསྔོ་སྨོན་པ་མེད་དབྱིངས་སྙོགས།༼༦༥༽།བདག་ཀྱང་དེང་ནས་ཀུན་མཁྱེན་བརྒྱུད་བཅས་ཀྱི། །སྨིན་གྲོལ་རྒྱལ་ཐབས་རྒྱས་པའི་སྒོ་དྲུང་ནས། །

དད་གསུམ་སློང་ཕོར་གཏོང་བ་མེད་ལྡན་པས། །བལྟ་བའི་སྐལ་བཟང་འཁོར་བའི་མཐའ་མར་སྨོན།༼༦༦༽།ནམ་ཞིག་སྲིད་དང་ཞི་བ་མཉམ་པར་བརྡལ། །འཁོར་བ་དོང་སྤྲུགས་ཞི་བ་བུམ་སྐུར་བཞེང་། །འཁོར་འདས་མ་ལུས་ཐིག་ལེ་གཅིག་གི་ཀློང་། །ཀུན་མཁྱེན་བླ་མའི་དགོངས་པར་འདྲེས་གྱུར་ཅིག༼༦༧༽།ཅེས་པའང་ཨ་བུ་ཧྲལ་པོས་གང་དྲན་བརྗོད་པ་དགེ་ལེགས་འཕེལ། །དགེའོ། །དགེའོ། །དགེའོ། །