སྟོན་པ་བདེ་བར་གཤེགས་པའི་གསུང་གསང་བ་བསམ་གྱིས་མི་ཁྱབ་པ་ལ་བསྔགས་པ་པདྨ་དཀར་པོའི་ཆུན་འཕྱང་།

Previous Text Back to Volume Page Next Text

Wylie title	ston pa bde bar gshegs pa'i gsung gsang ba bsam gyis mi khyab pa la bsngags pa pad+ma dkar po'i chun 'phyang
Location	dpal sprul bka' 'bum Volume 1, Text 8, Pages 155-195 (Folios 1a1 to 21a5)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. Ston pa bde bar gshegs pa'i gsung gsang ba bsam gyis mi khyab pa la bsngags pa pad+ma dkar po'i chun 'phyang. In Dpal sprul 'jigs med chos kyi dbang po'i gsung 'bum, Vol. 1: 155-195. Kathmandu: Tsadra Foundation and Shechen Publications, 2026.
Genre	Verses of Praise - bstod pa

[edit]

༄༅། །སྟོན་པ་བདེ་བར་གཤེགས་པའི་གསུང་གསང་བ་བསམ་གྱིས་མི་ཁྱབ་པ་ལ་བསྔགས་པ་པདྨ་དཀར་པོའི་ཆུན་འཕྱང་ཞེས་བྱ་བ་བཞུགས་སོ། །

༄༅། །དཔལ་ཤཱཀྱ་སེངྒེ་ལ་ཕྱག་འཚལ་ལོ། །དབྱིངས་ཀྱི་སྟོང་པ་སྤྲོས་པ་ཀུན་བྲལ་བ། །ལྷུན་གྲུབ་མི་གཡོ་རྫོགས་པའི་སངས་རྒྱས་ཏེ། །མཐའ་དག་ཡོན་ཏན་མཆོག་གི་གཏེར་གྱུར་པ། །མཚུངས་མེད་སྐྱོབས་པ་དེ་ལ་ཕྱག་འཚལ་ལོ།༼༡༽།ཐུབ་པའི་གསུང་ནི་མཚན་མའི་ཡུལ་མིན་ཏེ། །བརྟགས་པར་དཀའ་བ་འདུས་མ་བྱས་པའི་ཀློང་། །བརྗོད་བྲལ་ཉག་གཅིག་བརྗོད་པ་ཀུན་གྱི་གཞི། །ནམ་མཁའི་རང་བཞིན་ཟབ༵་པར་གྱུར་པ་ལགས།༼༢༽།མིང་ཚིག་ཡི་གེ་བྱེད་རྩོལ་ཡུལ་དུ་མིན། །སྒྲིབ་གཉིས་དྲི་མ་གཞན་ཡང་མི་དམིགས་པས། །འཁོར་གསུམ་ཡོངས་དག་དག་པ་ཆེན་པོའི་གནས། །སྤྲོས་པའི་ཡུལ་མིན་ཞི༵་བ་ཆེན་པོ་ལགས།༼༣༽།རྟག་པར་མ་ཡིན་ཆད་པར་ལྟ་ཅི་ཞིག །གཉིས་དང་གཉིས་མིན་དབྱེ་བ་མི་བཟོད་པའི། །ཐུབ་པའི་གསུང་ནི་བློ་ཡི་ཡུལ་མིན་ཏེ། །ཚིག་དང་དོན་ཞེས་སྤྲོས་པ་ཀུན་དང་བྲལ།༼༤༽།འགགས་པ་མེད་པ་རྒྱལ་བའི་གསུང་ཡིན་ཕྱིར། །རྨོངས་པའི་མུན་པ་གཤིས་ལ་མི་གནས་པའི། །ལྷུན་གྲུབ་རང་བཞིན་མཚོན་བརྗོད་ཀུན་བྲལ་ལ། །ངང་གིས་འོད་གསལ་མཆོག་ཏུ་ཞི་བར་བཞུགས།༼༥༽།ལྕེ་མཆུའི་རྩོལ་བས་ཡི་གེ་སྒྲ་བྱུང་ཞིང་། །དེ་ལས་མིང་དང་ཚིག་གི་ཚོགས་འབྱུང་བའི། །ངག་གི་རང་བཞིན་རྒྱལ་བའི་གསུང་མིན་ཏེ། །འདུས༵་མ༵་བྱས༵་པ་རང་བཞིན་བབས་ཀྱིས་སྣང་།༼༦༽།ཡུལ་དང་ཡུལ་ཅན་བརྗོད་པ་ཚིག་གི་སྒྲར། །འཛིན་པའི་དུག་འདི་འཁྲུལ་པའི་ངག་ལ་སྟེ། །འཁྲུལ་མེད་ཐུབ་དབང་ཡོན་ཏན་མཆོག་གི་མཛོད། །བདུད་རྩི་རྒྱུ་ཡི་ཆོས་མཆོག་སྙོགས་པ་མེད།༼༧༽།བྱས་པའི་ཆོས་ཀུན་འཇིག་པར་འགྱུར་བ་སྟེ། །མ་བྱས་ལྷུན་གྲུབ་སྟོན་པ་མཆོག་གི་གསུང་། །བརྗོད་བྱ་ཙམ་མིན་བརྗོད་པས་མ་ཡིན་པས། །ནམ་ཡང་འགག༵ས་པ༵ར་འབྱུང་བ་དམིགས་སུ་མེ༵ད།༼༨༽།འགགས་མེད་གསུང་ནི་རྒྱུ་ཡིས་མ་བསྐྱེད་དེ། །རྐྱེན་ལས་མ་སྐྱེས་ཆོས་ཉིད་ཟབ་པའི་དབྱིངས། །དུས་གསུམ་དུས་མེད་མཉམ་པར་རོ་གཅིག་པ། །དོན་དམ་དབྱིངས་ཏེ་སྐྱེ༵་བ༵འི་ཆོས་སུ་མེ༵ད།༼༨༽།སྐྱེ་བ་མེད་པ་ཡི་གེ་ཨ་ཡི་གསུང་། །ཨ་ནི་ཡེ་ནས་སྐྱེ་མེད་མཉམ་པ་སྟེ། །མཉམ་པའི་དབྱིངས་ལས་བརྗོད་པ་ཀུན་འབྱུང་བས། །གསུང་ནི་རང་བཞིན་རྒྱུན་ཆ༵ད་ཡེ་ནས་མེ༵ད།༼༡༠༽།ཆད་པ་མེད་པ་དངོས་པོའི་ཆོས་མིན་ཏེ། །ཡོད་མིན་མེད་མིན་བློ་ཡི་ཡུལ་ལས་འདས། །བསམ་ཡུལ་བྲལ་བ་འཛིན་པའི་ཡུལ་མིན་ཕྱིར། །རྟག་པ་མ་ཡིན་རྟ༵ག་རྒྱུར་ཡེ་ནས་མེ༵ད།༼༡༡༽།ཐོག་མེད་རང་བཞིན་ཡེ་ནས་ཞི་བའི་གསུང་། །བསམ་མེད་གཉིས་མེད་རྟག་པ་མེད་པ་སྟེ། །གང་ལ་གང་དུ་སྨྲ་བའི་བློ་མེད་པ། །འོ༵ང་བ༵་མེ༵ད་པ་དུས་གསུམ་རྒྱལ་བའི་གསུང་།༼༡༢༽།ཟད་པའི་ཐ་མ་གསུང་འདིར་ཡོད་མིན་ཏེ། །སྲི༵ད་པའི་མཐར་ཡང་གསུང་གི་རྒྱུན་གཅིག་པུ། །སྟོང་པ་ཉག་གཅིག་བཟུང་དུ་མེད་པ་ཉིད། །འགྲོ༵་བ༵་མེ༵ད་པ་གསུང་གི་རང་བཞིན་ཡིན།༼༡༣༽།དོན་དུ་འཛིན་པ་ཡེ་ནས་མི་དམིགས་ཏེ། །ཤེས་བྱའི་ཆོས་ཀུན་སྟོང་པ་གཅིག་པའི་ཚུལ། །བཏགས་པའི་རྣམ་གྲངས་མཚན་མ་འདིར་ཟད་པའི། །ཐ༵་ད༵ད་དོ༵ན་མིན་མཉམ་པ་ཉིད་ཀྱི་ངང་།༼༡༤༽།གཅིག་ཏུ་འཛིན་པའི་བདག་འཛིན་ཡུལ་ཕྱུང་སྟེ། །དུ་མའི་གསུང་གིས་སྒྱུ་མའི་ཚུལ་མཚོན་པ། །བློ་དང་དབང་པོ་མོས་པའི་རྗེས་འགྲོ་བར། །ཀུན་མཁྱེན་ཉིད་དེ་བཟུང་བའི་དོ༵ན་གཅི༵ག་མི༵ན།༼༡༥༽།མཉམ་པར་བཞག་པ་རྟག་ཏུ་ཞི་བའི་ཐུགས། །རྒྱལ་བ་ཀུན་གྱི་རང་བཞིན་འདི་ཡིན་ཕྱིར། །ཐུགས་ལས་གསུང་ཞེས་དབྱེ་བའི་གཞི་མེད་པའི། །གསུང་གི་རང་བཞིན་སྨྲ༵་བར་དཀའ་བ་ལགས།༼༡༦༽།གསུང་གིས་ཡེ་ནས་མཉམ་ཉིད་གཅིག་གསུང་སྟེ། །མཉམ་པ་ཉིད་དབྱིངས་བློ་ཡི་ཡུལ་མིན་ཕྱིར། །བློ་ལས་འདས་པ་དཔགས་པར་དཀའ་བ་ཉིད། །ཟབ་པའི་ཚུལ་དེ་ཇི་ལྟར་བས༵མ་དུ་རུང་།༼༡༧༽།བརྗོད་པའི་ཚིག་གི་ཆོས་ཉིད་མི་མཚོན་ཏེ། །སྤྲོས་པའི་ཡུལ་ལས་རྒྱལ་བའི་གསུང་འདས་ཕྱིར། །ཆོས་སུ་སྣང་བའང་བཏགས་པ་ཙམ་དུ་སྟེ། །ཐུབ་པ་ཆེན་པོའི་གསུང་ནི་བརྗོ༵ད་དུ་མེ༵ད།༼༡༨༽།ཤེས་དང་ཤེས་བྱ་ཐ་དད་མ་ཡིན་ཏེ། །གཅིག་ཏུ་འཛིན་པ་ངང་གིས་མི་དམིགས་པ། །སྤྲོས་པ་གཅོད་པ་ཆུ་ཟླ་ལྟ་བུའི་ཚུལ། །རྒྱལ་བའི་གསུང་ནི་ཤེ༵ས་ར༵བ་ཕ༵་རོ༵ལ་ཕྱི༵ན།༼༡༩༽།གསུང་ཙམ་ཉིད་ནས་མ༵་སྐྱེ༵ས་མི༵་འག༵གས་ཏེ། །ན༵མ་མཁ༵འི་རང་བཞིན་ཀུན་ལ་ཁྱབ་གདལ་བ། །ཆོས་རྣམས་ཀུན་གྱི་ངོ༵་བོ༵་དེ་བཞིན་ཉི༵ད། །སངས་རྒྱས་ཀུན་གྱི་གསུང་གི་མཐར་ཐུག་ཡིན།༼༢༠༽།གཟུང་འཛིན་ཤེས་པས་དམིགས་སུ་མི་རུང་ཡང་། །སོ༵་སོ༵ར་ར༵ང་རིག་འཕགས་པ་ཆེན་པོའི་ཐུགས། །རྟོག་བྲལ་བརྗོད་པ་ལྷ་ཡི་རྔ་སྒྲ་བཞིན། །བདེ་གཤེགས་གསུང་ནི་མཚན་ཉིད་མུ་མཐའ་མེད།༼༢༡༽།ཕལ་བའི་ཡུལ་མིན་གསུང་གཅིག་ཟབ་མོའི་དབྱིངས། །དུ་མའི་ཚུལ་དུ་སྣང་བ་མི་འགོག་སྟེ། །ཇི་ལྟ་ཇི་སྙེད་ཡེ༵་ཤེ༵ས་མཆོག་གི་ཚུལ། །དོན་དམ་གཟིགས་པའི་སྤྱོ༵ད་ཡུ༵ལ་གྱུར་པ༵་ཡིན།༼༢༢༽།རྒྱལ་བའི་གསུང་གིས་རྒྱལ་བའི་ལམ་མཚོན་ཏེ། །འབྲས་བུའི་རང་བཞིན་གཞན་དུ་མི་དམིགས་པས། །དུ༵ས་གསུ༵མ་རྒྱལ་བ༵འི་རྣམ་གྲོལ་གཞིར་གྱུར་ཕྱིར། །ཡུ༵མ་གྱི་རང་བཞིན་གསུང་ལ༵་ཕྱ༵ག་འཚ༵ལ་ལོ༵།༼༢༣༽།ཟབ་མོའི་གནས་འདི་དཔག་པར་དཀའ་བ་སྟེ། །རྒྱལ་བ་དེ་ཡི་གསུང་ལས་རྗེས་སྐྱེས་ཞེས། །བསམ་པའི་བློ་ཉིད་ཡིད་ལ་དབང་བགྱིས་ནས། །བསྟོད་པའི་ཚིག་ཕྲེང་མཁས་པའི་གཞུང་བཞིན་བགྱིས།༼༢༤༽།དགེ་བ་འདི་ཡིས་རྨོངས་པའི་འགྲོ་མང་ཁམས། །ཡེ་ཤེས་མཆོག་གི་ཉི་མ་སྣང་བྱེད་ཅིང་། །འོས་པར་སྨྲ་བའི་ཨ་བུ་རྨོངས་པ་ཡང་། །རྒྱལ་བའི་གསུང་དབྱངས་ཚེ་འདིར་ཐོབ་པར་ཤོག༼༢༥༽།སྟོན་པ་བདེ་བར་གཤེགས་པའི་གསུང་གསང་བ་བསམ་གྱིས་མི་ཁྱབ་པ་ལ་བསྔགས་པའི་སྐབས་རྫོགས་སོ།། ༈ གསུང་རྣམ་པ་ཐམས་ཅད་ལ་བསྔགས་པ། ཆུན་འཕྱང་གཉིས་པ། སྟོན་པ་བདེ་བར་གཤེགས་པའི་གསུང་རྣམ་པ་ཐམས་ཅད་པ་ལ་བསྔགས་པ་ཨུ་དུམ་ཝཱ་རའི་ཆུན་པོ་ཞེས་བྱ་བ། དཔལ་གསུང་གི་དབང་ཕྱུག་ལ་ཕྱག་འཚལ་ལོ། །བརྗོད་མེད་བརྗོད་པ་ཀུན་གྱི་གཞིར་བཞེངས་ནས། །སྨྲ་བ་མཆོག་གི་ཉི་མ་གཅིག་པུ་རུ། །གཉིས་སུ་མེད་པར་གསུང་གི་ཚུལ་སྟོན་པ། །ཤཱཀྱའི་ཏོག་གྱུར་དེ་ལ་ཕྱག་འཚལ་ལོ།༼༡༽།རྒྱལ་བའི་གསུང་ནི་རྣམ་པ་ཐམས་ཅད་དུ། །གསུང་གཅིག་སྒྲ་ལས་དུ་མའི་ཚུལ་གོ་སྟེ། །གང་ཡང་བརྗོད་པ་རྙོག་པ་མི་མངའ་བས། །ཟབ་པའི་ཚུལ་དེའི་རྒྱ་ཆེར་གྱུར་པ་ཡིན།༼༢༽།ལེགས་པར་སྦྱར་བས་མཁས་པའི་ཡིད་འཕྲོག་ཅིང་། །སྒྲ་དག་དབྱངས་གསལ་སྡེབ་སྦྱོར་ཉམས་པ་མེད། །ཀློག་པའི་ཚུལ་མཛེས་སྐྱེ་གནས་མ་འཁྲུལ་བར། །ཐམས་ཅད་མཁྱེན་པ་ལྷ་ཡི་སྐད་བཞིན་གསུངས།༼༣༽།ཉུང་ངུ་མ་ཡིན་རྒྱས་པར་སྟོན་པ་སྟེ། །གང་ཡང་དོན་ཟབ་བླུན་པོས་རྟོགས་པ་སླ། །སྙན་པའི་ངག་གིས་ཡིད་ནི་དགར་བགྱིད་དེ། །འགྲོ་བའི་གཙོ་བོས་ཀླུ་ཡི་སྐད་བཞིན་གསུངས།༼༤༽།དྲག་ཤུལ་ཚུལ་གྱིས་བསྒྲིམ་སྟེ་སྨྲ་བའི་སྒྲ། །ང་རོའི་གདངས་གསལ་ཟབ་ཅིང་ཡིད་འཕྲོག་པ། །འབྲུག་སྒྲ་ལྟ་བུར་ཟིལ་གནོན་དཔའ་བའི་དབྱངས། །མི་མཆོག་དེ་ནི་གནོད་སྦྱིན་སྐད་དུ་གསུངས།༼༥༽།སྒྲ་ལ་ཞེན་པ་རྟོག་གེ་སུན་འབྱིན་ཞིང་། །སྒྲ་དང་སྒྲ་མིན་དབྱེ་བ་མི་མཛད་དེ། །ལེགས་སྦྱར་དབྱངས་ལས་སྒྲུབ་པ་མ་བྱས་པས། །གྲུལ་བུམ་སྐད་དུའང་རྒྱལ་བས་ཆོས་རྣམས་སྟོན།༼༦༽།སྣ་ཚོགས་ཡུལ་དང་ཡུལ་གྱི་བྱེ་བྲག་གིས། །དུ་མར་སྨྲ་ཡང་དེ་ཚུལ་དང་མཚུངས་པའི། །རང་རང་སྐད་དུ་རྣ་བར་འཇེབས་པའི་ངག །མི་རྣམས་སྐད་དུ་ཐུབ་པས་ཆོས་ཚུལ་སྟོན།༼༧༽།ཚིགས་སུ་བཅད་པ་ཡིད་འོང་སྙན་ངག་ཕྲེང་། །ཚིག་སྙན་དོན་ཟབ་ལུས་དང་རྒྱན་དུ་འགྲེལ། །སྨྲ་བའི་སྤོབས་པ་མི་ཟད་ཐོགས་མེད་པས། །དྲང་སྲོང་མཆོག་གིས་དྲང་སྲོང་རྗེས་སུ་འཛིན།༼༨༽།སྲབ་ཅིང་རིང་ལ་ཡངས་ཤིང་བཟང་བ་སྟེ། །པདྨའི་འདབ་ལྟར་རྣམ་པར་དག་གྱུར་པ། །སྟོང་ཁམས་འདི་ཡང་རྒྱས་པར་ཁེབ་ནུས་པའི། །ལྗགས་ཀྱི་དབང་པོ་མཆོག་ཅིག་ཁྱོད་ལ་མངའ།༼༨༽།བསོད་ནམས་དུ་མས་ཡོངས་སུ་བསྐྲུན་པའི་ངག །འཁོར་གྱི་དཀྱི༵ལ་འཁོ༵ར་ཡོད་དགུར་དུས་གཅིག་ཀྱང་། །སྣ་ཚོགས་སྐད་དུ་སྣ་ཚོགས་ཆོས་སྟོན་པ། །ཐུབ་པའི་དབྱངས་ཀྱི་ཡན་ལག་རྒྱ་མཚོ་ཡིན།༼༡༠༽།ཟབ་ཅིང་ཡངས་ལ་གཏིང་དཔགས་དཀའ་བ་སྟེ། །མཐའ་ཡས་རྒྱ་ཆེ་རྒྱུན་རིང་ཟད་མེད་པར། །ཐུབ་པ་ཆེན་པོའི་གསུང་ནི་འབྲུག་སྒྲ་བཞིན། །གདངས་ཀྱི་བྱེ་བྲག་ཟིལ་གནོན་བརྗིད་པར་གསུངས།༼༡༡༽།གསུང་སྙ༵ན་དབྱངས་ནི་རང་རང་སྐད་དུ་སྟེ། །གཅུ་དང་འཛེར་བག་འདར་བའི་ཉམས་མེད་པར། །ལྡབ་ལྡིབ་མ་ཡིན་དག་གསལ་ཡིད་དུ་འོང་། །ཤིན་ཏུ་འཇེབས་ལ་རྣ་བར་སྙན་པ་ཡིན།༼༡༢༽།བརྗོད་པ་གང་གིས་བརྗོད་བྱ་གང་སྟོན་པ། །ཚི༵ག་དོ༵ན་མ་འཁྲུལ་དོན་དང་ལྡ༵ན་པ་སྟེ། །དོན་མེད་མི་གསུངས་གདུལ་བྱས་ཤེས་ནུས་པས། །ཐུབ་པའི་གསུང་ནི་བརྗོད་བྱ་ཟབ་པ་ལགས།༼༡༣༽།ཐུབ་པའི་བྱིན་རླབས་ཚངས་པའི་དབྱངས་ཀྱི་གསུང་། །གང་ལྟར་བསྟན་པ་དེ་ལྟར་གཟུ༵ང་སླ༵་སྟེ། །གསུངས་གཅིག་གིས་ཀྱང་བསྐལ་བར་དོན་བྱེད་ཅིང་། །བླུན་པོ་ཡིན་ཡང་ཤས་ནི་རྟོགས་པར་ནུས།༼༡༤༽།སུ་ཡིས་གང་ཞིག་དྲི་བའི་ཚིག་སྨྲས་པ། །དེ་དང་དེ་ཡི་འདོད་པ་ཡོངས་སྐོང་ཞིང་། །དུད་འགྲོ་ལ་སོགས་སྣ༵་ཚོ༵གས་རང་རང་གིས། །སྐད་ངག་ལས་ནི་ཅི༵་འདོ༵ད་ཉིད་འཆད་མཛད།༼༡༥༽།དེ་དག་གིས་ཕྱིར་འགྲོ་བ་སོ་སོ་ཡང་། །ཕྱོགས་དང་ཕྱོགས་ནས་དད་པས་འདུས་གྱུར་ཏེ། །རྨོངས་པར་སོང་བ་ཉམས་པའི་དུད་འགྲོ་ཡང་། །ཐུབ་པ་ཁྱོད་ཀྱི་གསུང་ནི་མཉན་པར་མོས།༼༡༦༽།སྙན་པའི་དཔེ་ནི་འགྲོ་བའི་ཡིད་འཛིན་ཏེ། །དེ་ལས་མི་འགྲོ་དབང་པོ་དེར་གཏོད་ཅིང་། །རྣ༵མ་པ༵ར་མི༵་གཡེ༵ངས་གཅིག་ཏུ་དགའ་བའི་ཡིད། །ཐམས་ཅད་མཁྱེན་པའི་གསུང་གིས་ངོམས་པར་གྱུར།༼༡༧༽།ཚིག་གི་དོན་ནི་རྣ༵མ་གྲོ༵ལ་ལམ་ཡིན་ཏེ། །ཚིག་གཅིག་གིས་ཀྱང་དོན་མང་མཚོན་ནུས་ཕྱིར། །ཐུབ་པ་ཁྱེད་ཀྱི་སློབ་མར་གང་གྱུར་པ། །ཐར་པའི་ལམ་ལས་ཐ་དད་སོང་བ་མེད།༼༡༨༽།རྟོག་གེ་སྨྲ་བ་གཡོ་སྒྱུའི་བསྟན་བཅོས་བཞིན། །གཟུང་བར་དཀའ་བ་རྒྱལ་བས་མི་སྟོན་ཏེ། །ཐོས་པ་ཙམ་ནས་ཁོང་དུ་ཆུད་པའི་ཕྱིར། །ཁྱེད་ཀྱི་རྗེས་འཇུག་མཁས་པར་ཆུད་པ་མང་།༼༡༩༽།མ་སྨིན་ལོག་འགྲོ་རྨོངས་པའི་སྐད་ལས་ཀྱང་། །ཆོས་ཀུན་སྟོན་ཅིང་སྨིན་པར་བྱེད་པ་སྟེ། །ཁྱོད་གསུང་ས་བོན་གང་གི་རྣར་བཏབ་པ། །དེ་ནི་བྱང་ཆུབ་སྙེ་མ་ནམ་ཡང་སྦོམ།༼༢༠༽།ལྷ་ཡི་ཡུལ་དུ་དབང་པོའི་རྔ་དག་དང་། །དྲི་ཟའི་ཡུལ་དུ་རྒྱུན་མང་བཻཌཱུརྱ། །སྐལ་པར་ལྡན་ལ་ལྗོན་ཤིང་སིལ་སྙན་དང་། །བེམ་པོའི་སྒྲ་དག་ལས་ཀྱང་ཆོས་མང་སྟོན།༼༢༡༽།མི་གཙང་འདམ་དུ་གསེར་གྱི་བུང་བ་དང་། །གཅན་གཟན་ཁྲོད་དུ་སེངྒེའི་རྒྱལ་པོ་སོགས། །གང་གིས་གང་འདུལ་དེ་ཡི་སྐད་དུ་སྟེ། །རྣམ་པ་ཐམས་ཅད་མཁྱེན་པའི་གསུང་ལས་བྱུང་།༼༢༢༽།གསུང་གི་བྱིན་རླབས་སྤྲུལ་པ་མི་ཟད་པ། །གདུལ་བྱའི་དབང་དང་སྨོན་ལམ་དབང་ལས་ཏེ། །དེ་ཕྱིར་འགགས་པ་མེད་པ་རྒྱལ་བའི་གསུང་། །གསུང་གསང་རྣམ་པར་འཕྲུལ་ལ་ཕྱག་འཚལ་ལོ།༼༢༣༽།གསུང་གི་ཡོན་ཏན་བསྐལ་པ་བྱེ་བར་ཡང་། །རྡོ་རྗེའི་ལྕེས་ཀྱང་བགྲངས་པར་མི་ནུས་ན། །མཁས་པ་མིན་པ་བདག་འདྲས་ལྟ་ཅི་སྟེ། །ཉུང་ངུའི་ངག་འདི་དད་པའི་ཡིད་ཀྱིས་ཡིན།༼༢༤༽།དགེ་བ་དེ་ཡིས་ཁམས་གསུམ་འགྲོ་བ་ཀུན། །སྐྱེ་འགགས་མེད་པ་རྒྱལ་བའི་གསུང་ཐོབ་ཅིང་། །གསུང་དེར་མོས་པའི་ཨ་བུ་བླུན་པོ་ཡང་། །འཁྲུལ་པའི་ངག་འདིའི་སྒྲིབ་པ་བྲལ་གྱུར་ཅིག༼༢༥༽།སྟོན་པ་བདེ་བར་གཤེགས་པའི་གསུང་རྣམ་པ་ཐམས་ཅད་པ་ལ་བསྔགས་པའི་སྐབས་རྫོགས་སོ།། ༈ །།གསུང་དམ་པའི་ཆོས་ལ་བསྔགས་པ། ཆུན་འཕྱང་གསུམ་པ། སྟོན་པ་བདེ་བར་གཤེགས་པའི་གསུང་དམ་པའི་ཆོས་ལ་བསྔགས་པ་ཨུཏྤལ་གཞོན་ནུའི་ཆུན་འཕྱངས་ཞེས་བྱ་བ། དཔལ་སྣང་བ་མཐའ་ཡས་ལ་ཕྱག་འཚལ་ལོ། །གྲངས་མེད་བསྐལ་པར་ཚོགས་གཉིས་ཡོངས་རྫོགས་ཤིང་། །བདུད་བཏུལ་བྱང་ཆུབ་མཆོག་གི་སར་གཤེགས་ཏེ། །ཚངས་པའི་དབྱངས་ཀྱིས་སྣ་ཚོགས་ཆོས་སྟོན་པ། །དབུས་འགྱུར་ཚལ་བཞུགས་དེ་ལ་ཕྱག་འཚལ་ལོ།༼༡༽།ཐུབ་པའི་གསུང་ནི་རྣམ་གྲངས་མི་ཟད་པ། །བརྗོད་བྱ་དོན་གྱི་ཆོས་འཁོར་མཚོན་པའི་ངག །རྗོད་བྱེད་སྒྲ་ཚིག་ཆོས་ཀྱི་འཁོར་ལོ་སྟེ། །རྣམ་གསུམ་རིམ་པར་བྱོན་ལ་ཕྱག་འཚལ་ལོ།༼༢༽།སྡུག་བསྔལ་ཀུན་འབྱུང་འགོག་པ་ལམ་བདེན་པ། །འཁོར་དང་གཞན་ཡང་འབྲས་བུ་རྒྱུར་བཅས་ཟུང་། །ཤེས་ནས་སྤང་བླང་བགྱིད་དང་བགྱིས་ཟིན་པའི། །བཟླས་པ་བཅུ་གཉིས་ཐུབ་པས་དངོས་པོར་བསྟན།༼༣༽།གང་གི་རྒྱུད་ལ་སྒྲིབ་དང་ཉོན་མོངས་ཁམས། །ཇི་སྙེད་མཆིས་པ་ཐོགས་མེད་གཅོད་པའི་མཚོན། །ཐུབ་པའི་གསུངས་འདི་ཆོས་ཀྱི་འཁོར་ལོ་སྟེ། །འཁོར་ལོ་དེ་ཡང་རྩིབ་མང་རྣོ་བ་ལགས།༼༤༽།ཐ་བ་འདིས་གཅོད་སྒྲིབ་པ་འདིས་འབྲལ་ཏེ། །དྲི་མ་འདིས་འཁྲུད་ཤིན་ཏུ་གཙང་གྱུར་པ། །སྲིད་པའི་སྐྱོན་མང་ངེས་པར་དག་པ་ཅན། །འཁོར་ལོ་དེ་ནི་ཚངས་པའི་འཁོར་ལོ་ལགས།༼༥༽།ལྷའམ་ཀླུའམ་མི་མཆོག་གཞན་སུས་ཀྱང་། །བསྐོར་བར་མི་ནུས་རྒྱུ་འབྲས་ཟབ་མོའི་གཏམ། །ཐར་པའི་ལམ་གྱི་རྫིང་བུ་བཟང་པོ་སྟེ། །འཁོར་ལོ་དེ་ནི་ཟབ་པར་གྱུར་བ་ལགས།༼༦༽།ཁྱིམ་ན་གནས་ཀྱང་ཚངས་པའི་ལམ་སྤྱོད་ཅིང་། །ཚངས་པར་སྤྱོད་པ་ཞི་བའི་དབྱིངས་འགྲོ་བ། །བསྟན་འདིར་གང་བཞུགས་སྡུག་བསྔལ་གཡུལ་འཇོམས་ཏེ། །འཁོར་ལོ་དེ་ནི་ཐོགས་པ་མེད་པ་ཡིན།༼༧༽།ཞི་བ་བསིལ་བ་བདུད་རྩི་དམ་པའི་ལམ། །བདུད་རྩིའི་སྒོ་མོ་ཐུབ་པས་གང་དབྱེ་བ། །ལྷར་བཅས་སྲིད་པའི་སྣང་བ་གཅིག་པུ་སྟེ། །འཁོར་ལོ་དེ་ནི་གསལ་བར་བགྱི་བ་ཡིན།༼༨༽།སྤྱོད་པ་རྒྱ་ཆེ་དོན་མང་ཚུལ་མཛེས་ཤིང་། །མཐའ་གཉིས་ལས་འདས་སྒོ་གསུམ་ཉེ་བར་ཞི། །སྟོན་དང་བསྟན་པ་གཉིས་སུ་བཀའ་སྩལ་བ། །ཆོས་འདུལ་ནོར་བུའི་མཛོད་ལ་ཕྱག་འཚལ་ལོ།༼༨༽།སྣང་བའི་ཆོས་འདི་རང་བཞིན་སྟོང་བ་སྟེ། །སྟོང་པའི་དབྱིངས་ནི་བློ་ཡི་ཡུལ་མིན་ལ། །བློ་འདས་གང་ཡིན་ཁས་ལེན་ཚིག་བྲལ་བ། །ཟབ་པའི་ཚུལ་འདི་འཁོར་ལོ་བར་པར་བསྟན།༼༡༠༽།བསམ་པ་རྒྱ་ཆེ་སྤྱོད་དང་སྨོན་ལམ་དང་། །ཐབས་ལ་མཁས་པ་བསྔོ་བ་དམ་པའི་མཆོག །འགྲོ་དོན་ཕྲིན་ལས་ཀུན་ནས་རྒྱ་ཆེ་བ། །གསུང་གི་ཚུལ་འདི་ཐེག་པ་ཆེན་པོ་ཡིན།༼༡༡༽།སྟོང་པའི་རང་བཞིན་བརྟགས་པར་དཀའ་བ་སྟེ། །ཟབ་པའི་དབྱིངས་ལ་རྟེན་འབྱུང་སྒྱུ་མའི་ཚུལ། །བདེན་པ་གཉིས་ཞེས་ཚིག་གིས་མཚོན་ཙམ་སྟེ། །སྐྱེ་བ་མེད་པ་བདེན་པ་གཅིག་པུར་གསུངས།༼༡༢༽།ཤེས་བྱ་དངོས་ཀུན་བཏགས་པ་ཙམ་ཉིད་དེ། །རྨི་ལམ་སྒྱུ་མ་ཆུ་ཟླ་ལྟ་བའི་ཚུལ། །རང་བཞིན་མེད་ཀྱང་རྣམ་པ་མི་འགོགས་ཤིང་། །སྟོང་ཉིད་རྒྱུ་འབྲས་འཆར་བ་དེ་ལྟར་གསུངས།༼༡༣༽།ཚད་མས་གྲུབ་པའི་ཀུན་རྫོབ་མི་དམིགས་ཀྱང་། །བདེན་པར་ཞེན་པའི་བློ་འདིས་བཟོས་པའི་ཕྱིར། །བློ་བྲལ་དབྱིངས་ནི་དཔྱོད་པའི་ཡུལ་མིན་ཏེ། །དབུ་མའི་ལམ་འདི་ཤིན་ཏུ་ཟབ་པ་ལགས།༼༡༤༽།སྨྲ་བསམ་བརྗོད་མེད་ནམ་མཁའ་ལྟ་བུའི་ཀློང་། །ཕུང་ལྔའི་འཛིན་བྲལ་དག་པའི་མཉམ་བཞག་སྟེ། །འདུ་བྱེད་རྣམ་དག་རླུང་གིས་མི་དཀྲུགས་པས། །དབུ་མའི་ལམ་འདི་མཆོག་ཏུ་ཞི་བ་ལགས།༼༡༥༽།ཡུལ་དང་ཡུལ་ཅན་འཛིན་པ་གཉིས་མེད་ཅིང་། །མེད་དོ་སྙམ་པའི་འཛིན་རྟོག་རང་ཞིག་སྟེ། །སྙམས་བྱེད་བདག་དེ་ཡུལ་མེད་རང་སངས་པ། །དབུ་མའི་ལམ་འདི་བདག་མེད་སྟོང་པ་ཡིན།༼༡༦༽།འཕོ་མེད་རྟག་པ་དག་པ་ཆེན་པོའི་ཁམས། །མ་ལུས་སེམས་ཅན་བདེ་གཤེགས་སྙིང་པོ་ཅན། །ཡོངས་གྲུབ་ཞི་བ་འདུས་མ་བྱས་བསྟན་པ། །ཐུབ་པའི་ཚུལ་འདི་འཁོར་ལོ་ཐ་མ་ཡིན།༼༡༧༽།ཀུན་བཏགས་ཆོས་ཀུན་རང་བཞིན་སྟོང་པ་སྟེ། །གཞན་དབང་དངོས་ཀྱང་སྐྱེ་བ་མེད་པའི་ཚུལ། །འགྱུར་མེད་ཡོངས་གྲུབ་སྒྲིབ་པ་བྲལ་བའི་ཁམས། །འདི་དེ་སངས་རྒྱས་རྣམས་ཀྱི་ཆོས་སྐུར་བཞུགས།༼༡༨༽།སྒྲིབ་པས་བསྒྲིབས་ཀྱང་ངོ་བོ་དག་པའི་ཁམས། །ཤེས་ཉོན་མུན་པ་གཤིས་ལ་མི་འདྲེ་བའི། །ཆོས་ཉིད་དབྱིངས་འདི་ཉི་མའི་དཀྱིལ་འཁོར་བཞིན། །བསལ་བཞག་གཉིས་མེད་གཙང་བའི་ཕ་རོལ་ཕྱིན།༼༡༩༽།བྱིས་པས་བཟུངས་བའི་བདག་འདི་ཡོད་མིན་ཏེ། །དམ་པས་བསྟན་པའི་སྙིང་པོ་མེད་མིན་པའི། །འགྲོ་བའི་ཆོས་ཁམས་རྒྱལ་བའི་རང་བཞིན་ཅན། །མི་གཡོ་ཁྱབ་བདག་བདག་གི་ཕ་རོལ་ཕྱིན།༼༢༠༽།འཁྲུལ་བས་བསླུས་པའི་རྨོངས་པ་མནར་གྱུར་ཀྱང་། །ཡོན་ཏན་རང་བཞིན་འཛིན་མེད་རྒྱལ་བའི་ཆོས། །པདྨའི་སྦུབས་ན་སྤྲུལ་པའི་སངས་རྒྱས་བཞིན། །བདེ་གཤེགས་སྙིང་བོ་བདེ་བའི་ཕ་རོལ་ཕྱིན།༼༢༡༽།ཇི་ལྟར་སྔོན་བཞིན་ཕྱིས་ཀྱང་དེ་བཞིན་ཏེ། །འགྱུར་བ་མེད་ཕྱིར་སྲིད་ཞི་གཉིས་མེད་པ། །ལྷུན་གྱིས་གྲུབ་པ་མངོན་པར་འདུས་མ་བྱས། །ཞི་དབྱིངས་འཕོ་མེད་རྟག་པའི་ཕ་རོལ་ཕྱིན།༼༢༢༽།གཟུང་དང་འཛིན་པ་བདེན་པར་ཡོད་མིན་ཏེ། །གཉིས་མེད་ཤེས་པའང་ཀུན་རྫོབ་ཙམ་དུ་བས། །ཟབ་མོ་སྟོང་ཆེན་དཔག་པར་དཀའ་བའི་ཁམས། །རྒྱལ་བའི་སྡེ་སྣོད་ད་དུང་ཡོད་པར་ཤེས།༼༢༣༽།ཐུབ་པའི་ཆོས་ཀུན་གཏིང་དཔག་དཀའ་བ་སྟེ། །སོ་སྐྱེའི་ངག་གིས་འདོམས་པར་སླ་མིན་ཡང་། །རང་གི་བློ་ཤེས་བསྐུལ་བས་གང་འཆུན་ཙམ། །བསྔགས་པའི་ཡུལ་དུ་བརྗོད་པར་མི་རུང་མིན།༼༢༤༽།དགེ་བ་དེས་ནི་སྲིད་པའི་ཁམས་འདི་དག །ཡང་དག་དམ་ཆོས་སྣང་བས་མི་གཏོང་ཞིང་། །བརྗོད་པ་འདི་བགྱིད་ཨ་བུ་གླེན་པ་ཡང་། །ངག་ལ་ཆོས་ཀྱི་བདེན་པས་སྲུང་གྱུར་ཅིག༼༢༥༽།བདེ་བར་གཤེགས་པའི་གསུང་དམ་པའི་ཆོས་ལ་བསྔགས་པའི་སྐབས་རྫོགས་སོ།། ༈ །།གསུང་ཡི་གེའི་ཕྲེང་བ་ལ་བསྔགས་པ། ཆུན་འཕྱང་བཞི་པ། སྟོན་པ་བདེ་བར་གཤེགས་པའི་གསུང་ཡི་གེའི་ཕྲེང་བ་ལ་བསྔགས་པ་ཀུ་མུད་དའི་ཆུན་འཕྱང་ཞེས་བྱ་བ། དཔལ་ལྷ་མོ་སྒྲ་དབྱངས་ལ་ཕྱག་འཚལ་ལོ། །གཏིང་མཐའ་མི་མངོན་བཻཌཱུར་བདུད་རྩིའི་ཀླུང་། །སྲིད་པའི་སྙན་བཅུད་འཛགས་པའི་ཡིད་འཛིན་མ། །ཕྲོག་པ་མེད་པའི་ཡིད་འབྱུང་ལྷའི་བུ་མོའི། །སྙིང་ལ་ཀཻ་ལ་ཤ་བཞིན་ཁྱེད་བཞེས་ཤིག༼༡༽།ལེགས་བྱས་བྱེད་པོས་བྲིས་པའི་གཟུགས་གང་ཞིག །ཚོགས་པས་བརྗོད་པའི་དོན་སྟོན་མིང་ཚིག་གཞི། །སྲིད་ན་རྒྱལ་བའི་ཆོས་ཁམས་ངེས་འཛིན་པ། །མི་འགྱུར་མིང་གི་ངེས་པས་ཁྱོད་ཅིག་བཟུང་།༼༢༽།བརྗོད་མེད་ལུས་ཀྱི་རྣམ་པ་གསལ་བྱེད་གཟུགས། །བརྗོད་པ་སྲོག་གི་འཛིན་པའི་བཅུ་དྲུག་དབྱངས། །བསྡོམ་པའི་ཤེས་བྱའི་དངོས་སུ་གང་མཆིས་པ། །སྨྲ་ལས་བས་བར་གྱུར་ཅེས་ཁྱོད་མི་མཆི།༼༣༽།བྲིས་པས་དངོས་པོའི་ཕྱོགས་ཞེས་ལམ་མཚོན་ཞིང་། །གནས་པའི་མགོ་ལུས་འབྱེད་པའི་རྒྱན་མཚོན་ལ། །བརྗོད་པ་མིང་གི་དངོས་པོ་འཁྱུད་དཀའ་བའི། །གཟུགས་དེ་དང་པོར་གནས་ཞེས་མཁས་པས་གླེང་།༼༤༽།མ་འདྲེས་བརྗོད་པའི་སྲོག་ཏུ་ཀུན་ཁྱབ་ཅིང་། །བསྲེས་ན་ཆུ་ལ་ཆུ་བཞིན་གཤིས་མཐུན་པ། །དབྱངས་ལས་རིགས་ཀྱི་དང་པོར་གྲལ་འཛིན་པའི། །གཟུགས་དེ་མཚུངས་པའི་མིང་གིས་ལྷག་པར་སྙན།༼༥༽།འདྲ་མིན་འདྲེན་པར་གྱུར་ཀྱང་ཁྲོ་མེད་པར། །གཟུགས་གཅིག་སྲོག་ཐར་རིང་བའི་ངང་བསྲིངས་ཏེ། །མཐོ་བའི་བརྗོད་པར་ཆས་པའི་དབྱངས་གང་ཞིག །མཁས་པའི་འདུན་སར་མཚམས་སྦྱོར་མིང་གིས་བཞུགས།༼༦༽།ཁོང་ནས་བརྗོད་པར་ཆས་པའི་ངག་གང་ཡང་། །ཅུང་ཞིག་དྲི་འཛིན་སྐལ་བའི་ཆར་བྱས་པ། །ང་རོའི་མིང་གིས་བརྗོད་བྱར་དེ་བཞུགས་ཏེ། །དབྱིབས་སུ་ཟླ་བ་ཉ་བའི་དཀྱིལ་འཁོར་བཞིན།༼༧༽།བརྡར་བ་དཔའ་བོའི་རལ་གྲི་མ་ཡིན་ཡང་། །རྣམ་པར་བཅད་པ་མིང་ཙམ་ཁོ་ནས་ཏེ། །སྲོག་བྲལ་ས་རའི་ལུས་ལ་ཁྱོད་སྐྱེས་ཀྱང་། །བཤིགས་ན་ཕ་རོལ་རྗེས་མཐུན་ཅིར་ཡང་འགྱུར།༼༨༽།མ་སྐྱེས་དལ་གྱིས་ཆས་པ་དེའི་རང་ལམ། །འགེགས་བྱེད་ལྕེ་མཆུའི་རྩོམ་པ་མི་ཆེ་སྟེ། །ལྷོད་ལྷོད་མགྲིན་པའི་ལམ་ན་གདངས་བཟང་བ། །གང་ཞིག་མཆིས་པར་གྱུར་བ་ཀ་ཡི་སྡེ།༼༨༽།གཡོ་བའི་དབུགས་ཀྱི་བོས་པ་ལོས་ལགས་ཀྱང་། །གནས་པ་སྐན་ལ་འདི་མཆིས་རྔ་སྒྲ་ལྟར། །བྱེད་པོས་བསྐུལ་བའི་རྐྱེན་ལས་ལེགས་སྐྱེས་པ། །དེ་འདྲའི་ངེས་པ་མི་འགོང་ཙ་ཡི་སྡེ།༼༡༠༽།མཐོ་བ་སྤྱི་བོ་ལས་ལྷུང་འདར་གྱུར་པ། །བརྗོད་པ་སྲོག་དང་འཕྲད་ལས་སྡེབ་ཐོན་ཞིང་། །འཕགས་ཡུལ་མཁས་པའི་ངག་ལ་ཁྱེར་འཁྲི་སྟེ། །བྷོ་ཊར་ཁྲོས་པ་བཞིན་གནས་ཊ་ཡི་སྡེ།༼༡༡༽།སྨྲ་བྱེད་ཟླ་བ་བཀས་འདྲའི་རྩེར་སྐྱེས་ཤིང་། །རྗོད་བྱེད་དྲི་བཞོན་རྒྱུ་བའི་སྲོག་བྱས་ལས། །ལྡབ་ལྡིབ་མིག་སྨན་ཚོས་ཀྱིས་བསྒྱུར་དཀའ་བ། །ངག་གང་བརྗོད་པ་དག་སྟེ་ཏ་ཡི་སྡེ།༼༡༢༽།བྱིས་པ་པདྨའི་ཡལ་འདབ་འདིར་བཟླུམ་པ། །འོང་བ་ཁྱོད་ཅིག་ཟླ་བའི་སྤུན་ཡིན་ནམ། །ཅི་སླད་དབུགས་ཀྱི་རྒྱུ་ལ་ཁྱོད་ཁྲོ་སྟེ། །ལྕིད་བཅས་མཆུ་ལས་སྐྱེས་པ་ས་ཡི་སྡེ།༼༡༣༽།དྲུད་པ་གཙུབས་ཤིང་གཙུབས་པའི་མེ་མིན་ཡང་། །དྲོ་བ་དལ་གྱིས་འོང་བའི་དབུགས་ལས་ཏེ། །སྐྱེ་གནས་ཁམས་ཀྱི་བྱེད་པ་སོ་སོར་རང་། །མཐུན་པའི་རང་གྲལ་སྡེབ་པ་ཤ་ཥ་ས།༼༡༤༽།ཁེངས་པས་ཐོག་མའི་གྲལ་ལ་མི་སྙོགས་ཏེ། །ཁ་ཅིག་བརྗོད་རུང་སྲོག་གྱུར་ཞིག་པ་ལྟའི། །ཐོག་མ་དགྱེས་པའི་གད་མོ་དེ་འོང་བ། །མཐར་གནས་དམན་ས་འཛིན་པ་བཞི་ཞིག་ཡོད།༼༡༥༽།རྫོགས་པ་ལྔ་བཅུའི་སྤུན་གྱི་ཐ་ཆུང་བ། །འགྱུར་བཅས་ཟད་པ་མཚོན་ཕྱིར་དགག་བྱ་སྟེ། །བསྡུ་བ་ཐ་མའི་སྡུད་པོར་གང་གྱུར་བ། །གཅིག་ཅིག་ཡི་གེའི་མིང་གི་ཕྱེད་ཀྱང་ཡིན།༼༡༦༽།གཅོད་པ་རལ་གྲིས་བྱེད་པ་གང་འཛིན་པ། །རིང་པོ་རི་མོས་མཚོན་པའི་མདའ་ཡིན་ཏེ། །སྙན་ཚིག་བརྗོད་པ་བདེ་བའི་གྲལ་གཅོད་པ། །བརྗོད་མེད་བརྗོད་པའི་མཚམས་གཅོད་ཤད་ཀྱིས་བྱས།༼༡༧༽།བསྡུས་ན་བརྗོད་པའི་གཟུགས་གྱུར་ལྔ་བཅུ་སྟེ། །བཀྲལ་ན་མི་ཟད་ཤེས་བྱའི་མིང་སྟོན་པ། །དབྱིབས་སུ་དུ་མར་སྣང་བའི་སྤྲུལ་བསྒྱུར་ཅན། །ཐུབ་པའི་གསུང་གི་བྱིན་རླབས་ཁོ་ན་ལགས།༼༡༨༽།སུ་ཞིག་ཐར་ལམ་སྣང་བ་ཚོལ་བ་དང་། །གང་གི་ཞི་བའི་སྒྲོན་མེ་རྙེད་གྱུར་པ། །དེ་ལ་སྦྱིན་པ་རྩོམ་པའི་ལམ་འདིས་ཏེ། །གཞན་དུ་ཤེས་པའི་དངོས་པོ་ཇི་ལྟར་སྟེར།༼༡༩༽།དོན་དུ་མཚན་མར་གྱུར་པ་མ་ལགས་ཀྱང་། །སྣང་ཙམ་སྐལ་བཟང་སྐལ་བའི་མིག་ཡིན་ཕྱིར། །ལེགས་གསུང་བསྟན་པ་རྒྱ་མཚོའི་དེ་ཉིད་ཀྱང་། །དེང་དུ་བརྗོད་པ་ཡི་གེའི་སྒྲ་ལྟར་སྣང་།༼༢༠༽།མ་སྐྱེས་རང་བཞིན་ཡི་གེ་ཨ་ཡིན་ཏེ། །དོན་དམ་བདེན་གཅིག་སྤྲོས་པའི་ཡུལ་ལས་འདས། །སྐྱེ་བའི་ཆོ་འཕྲུལ་སྣང་བའི་གཞིར་གྱུར་བ། །བརྗོད་དུ་མེད་བཞིན་བརྗོད་པ་ཀུན་གྱི་གཞི།༼༢༡༽།རྡུལ་སྙེད་བསྐལ་པར་ཇི་སྙེད་བགྲངས་དཀའ་ཡང་། །གོམས་པར་བྱས་པ་ལེགས་མཛད་ཁོ་ན་སྟེ། །དེ་འདྲ་ལས་སྐྱེས་མགུལ་གྱི་བུམ་བཟང་ལས། །ཐུབ་པའི་གསུངས་ཀྱང་ཡི་གེའི་སྒྲ་བཞིན་སྣང་།༼༢༢༽།ཡི་གེ་འདུས་ལས་གྲགས་པའི་མིང་བྱུང་སྟེ། །མིང་ལས་ཚིག་བྱུང་དེ་ལས་ཇི་སྙེད་ཆོས། །བརྗོད་པའི་དོན་སྟོན་ཡོན་ཏན་མཛོད་འཛིན་ཕྱིར། །སྤང་བླང་ལེགས་ཉེས་དཀའ་གནས་འདི་ཡིས་སྦྱིན།༼༢༣༽།སྲིད་པའི་ཁམས་ན་ཕན་བདེའི་དངོས་གྱུར་བ། །གང་ཡང་ཐུབ་པའི་སྤྲུལ་པར་བཀའ་སྩལ་ན། །བློ་མཆོག་བློ་ལ་ཤེས་པའི་མིག་སྦྱིན་པ། །ཡི་གེའི་གཟུགས་འདི་བཟོ་ཡི་སྤྲུལ་སྐུ་ཡིན།༼༢༤༽།སྡེ་སྣོད་རིན་ཆེན་ཐུབ་པའི་ལེགས་གསུང་བཀའ། །བཀའ་ཡི་རྗེས་འབྲེལ་ཕུན་ཚོགས་བསྟན་བཅོས་གཞུང་། །ཐར་ལམ་བྱེད་པོ་གཞན་ན་ཡོད་མིན་ཏེ། །རྒྱལ་བ་དངོས་ཞེས་ཐུབ་པ་མཆོག་གིས་གསུངས།༼༢༥༽།དེ་སླད་ཆོས་ཀྱི་ཉི་མ་འདི་ཡིན་ཏེ། །རྨོངས་པས་འཁོར་བར་ལོང་ལ་འདི་དམིགས་བུ། །ཡང་དག་ཐར་ལམ་ཐེམ་པ་འདིས་བགྱིད་དེ། །མདོར་ན་ལེགས་དགུའི་བྱེད་པོ་གཅིག་ཅིག་ཡིན།༼༢༦༽།མཚུངས་མེད་ཐུབ་པའི་ལེགས་བཤད་ཡི་གེའི་གཟུགས། །རྗེས་འཇུག་འཕགས་པའི་གསུང་བཅས་མ་ལུས་པའི། །ཡོན་ཏན་ཕྲེང་བར་བསྡུ་བར་དཀའ་མོད་དེ། །མོས་པ་ཁོ་ནས་ཅུང་ཟད་ཚིག་ཏུ་སྡེབ།༼༢༧༽།དགེ་བ་དེ་ཡིས་རྒྱལ་བསྟན་ཡོངས་འདུའི་ཕྲེང་། །ཉམས་མེད་སྐལ་པའི་མཐར་ཡང་སྲོག་བརླིང་ཞིང་། །གུས་པའི་བློ་ཅན་ཨ་བུ་ཧྲུལ་པོ་ཡང་། །ལྕེ་ལ་དབྱངས་ཅན་ལྷ་མོ་བཞུགས་གྱུར་ཅིག༼༢༨༽།བདེ་བར་བཤེགས་པའི་གསུང་ཡི་གེའི་གཟུགས་བརྙན་ལ་བསྔགས་པའི་སྐབས་རྫོགས་སོ།། ༈ །།གསུང་གསང་སྔགས་ཀྱི་ཚུལ་ལ་བསྔགས་པ། ཆུན་འཕྱང་ལྔ་པ། སྟོན་པ་བདེ་གཤེགས་པའི་གསུང་གསང་སྔགས་ཀྱི་ཚུལ་ལ་བསྔགས་པ་མེ་ཏོག་གི་ཆུན་འཕྱང་ཞེས་བྱ་བ། བླ་མ་འཇམ་དཔལ་དབྱངས་ལ་ཕྱག་འཚལ་ལོ། །གཉིས་སུ་མེད་པའི་ཡེ་ཤེས་རྡོ་རྗེའི་ཁམས། །སྲིད་ཞིའི་སྲོག་ཏུ་གྱུར་པའི་དེ་ཁོ་ན། །བརྗོད་མེད་བརྗོད་པའི་ཀློ༵ང་ཆེ༵ན་ན༵་དེའི་སྒྲ། །ར༵བ་འབྱ༵མས་རྒྱལ་ཀུན་གསུང་གི་རྡོ་རྗེས་སྐྱོ༵ངས།༼༡༽།དག་ཆེན་ཡེ་ཤེས་གཅིག་གི་དབྱིངས་ཁོ་ནར། །ཤེས་བྱའི་རང་ཚུལ་ཞིག་པ་ཟབ་མོའི་ངག །མིང་ཚིག་ཡི་གེའི་སྤྲོས་པས་མ་ལགས་ཏེ། །ཐུགས་ཉིད་གསུ༵ང་གི༵་གས༵ང་བར་གཉིས་སུ་མེད།༼༢༽།ཆོས་དབྱིངས་རང་བཞིན་བརྗོད་དུ་མེད་པའི་ཁམས། །འཕོ་མེད་དག་པ་སྒྲིབ་བྲལ་དོ༵ན་གྱི༵་གཤིས། །ཡུལ་དང་ཡུལ་ཅན་སྤྲོས་པས་ལྟ་ཅི་སྟེ། །འཛིན་པའི་ཁམས་ལ་གསུངས་ཞེས་དམིགས་སུ་མེད་།༼༣༽།གཅིག་ཏུ་མ་ཡིན་དབྱི༵ངས་རི༵ག་མཉམ་པ་ཆེ༵། །རྟོག་མེད་རྟོགས་པས་དག་པའི་རང་བཞིན་བྱི༵ན། །སྤྲོས་པས་མ༵་རླབས་སྤྲོས་བྲལ་ཉིད་ཀྱི་ངང་། །གསུ༵ང་གི་གསང་བ་མ་འདྲེས་སོ་སོར་རྟོགས།༼༤༽།ཐ་དད་མ་ཡིན་ཐིག་ལེ་གཅིག་གི་ཀློང་། །གཉི༵ས་འཛིན་ཅི་ཞིག་ཡོད་མེ༵ད་ཡུལ་མིན་ཏེ། །མཐའ་ཡི་མི་ཕྱེད་རྡོ་རྗེ་དེ་ཁོ་ན། །གསུ༵ང་གི་དབྱིངས་ནི་རང་བཞིན་མཉམ་པ་ཉིད།༼༥༽།དག་པས་དགོ༵ངས་པ༵་གཞི་ལས་མི་གཡོ་ཡང་། །ཡེ་ཤེས་སྒྱུ་མའི་བཀོད་པ་བརྡ༵་ཡི༵་ཚུལ། །སྣང་དང་དེ་ཡུལ་ཐ་མི་དད་མཚོན་པ། །གསུ༵ང་གི་རང་བཞིན་དག་པའི་མེ་ལོང་བཞིན།༼༦༽།བརྗོད་མེད་དབྱངས་ཀུན་བརྗོད་པའི་སྤྲོས་ཤར་བ། །གདུལ་བྱའི་ཡུལ་ལ་ཚ༵ངས་པ་ཆེན་པོའི་དབྱངས། །རྩོལ་བས་མ་ཡིན་རང་བཞིན་བབས་ཀྱིས་སྣང་། །གསུ༵ང་གི་ཕྲིན་ལས་བརྗོད་པའི་བྱ་བ་གྲུབ།༼༧༽།འདོད་ཆགས་ཆེན་པོའི་བདེ་ཆེན་དག་པའི་མེས། །བསྲེགས་པའི་འོ༵ད་སྣང་དཔ༵ག་མེ༵ད་ཆོས་རྒྱལ་པོ། །དག་པས་འདུ་ཤེས་ཡེ་ཡོད་རྟག་པའི་ཁམས། །གསུང་གི་རྡོ་རྗེ་སྐུ་དང་ཡེ་ཤེས་མཛོད།༼༨༽།རྨོངས་པའི་རྩུབ་རེག་གཞན་ཡང་དམིགས་མིན་ཏེ། །འཇ༵མ་པའི་རྡོ་རྗེ་དཔ༵ལ་ལྡན་རྒྱལ་བའི་དབྱ༵ངས། །སྒྲིབ་པའི་དྲྭ་བ་ཡེ་བྲལ་བསྡུར་མེད་པ། །གསུང་གི་ཐུགས་ནི་རྣམ་ཀུན་ཟབ་པའི་དབྱིངས།༼༩༽།ལྔ་ཕྲག་རང་བཞིན་གསལ་བའི་སྤྱ༵ན་ར༵ས་ནི། །དག་པས་གཟི༵གས་པའི་སྣང་བ་རྒྱ་ཆེ་རུ། །གསུང་གཅིག་དབྱངས་ཀྱིས་ཟབ་པའི་གནས་སྟོན་པས། །གསུང་གི་གསུང་ནི་དམིགས་པའི་ཡུལ་ལས་འདས།༼༡༠༽།མཉམ་པའི་གཞི་ཀློང་ཡེ་གདལ་གཏིང་མཐའ་མེད། །བརྗོད་པའི་ངག་ཀུན་བརྗོད་མེད་གསུང་ཡིན་ཏེ། །རྣམ་གསུམ་སྒྲ་འདི་སྒྲ༵་ཡི༵་རྡོ༵་རྗེ༵་མ། །གསུང་གི་སྐུ་སྟེ་རྒྱལ་ཀུན་དགྱེས་པ་སྐོང་།༼༡༡༽།རྨོངས་པའི་མུན་ཆེན་ཟད་བྱེད་སྣང༵་བའི་ཁམས། །ཆོས་རབ་གས༵ལ་བ་ཡེ་ཤེས་ཉི་མ༵་སྟེ། །སྲིད་པའི་སྲེད་པ་གཅོད་པའི་དཔལ་གང་བ། །གསུང་གི་ཡོན་ཏན་འགྲོ་བའི་རེ་བ་སྐོང་།༼༡༢༽།སྒྲིབ་མེད་འཚེར་བའི་དབྱངས་གཅིག་དེ་ཁོ་ན། །འགྲོ་ཁམས་རྣམ་གྲོལ་ལམ་གྱི་རྟ་ཡི༵ན་ཏེ། །ཐེག་པའི་ཚུལ་ཆེན་མགྲི༵ན་པ་ལས་འཕོས་ཀླུ། །གསུང་གི་ཕྲིན་ལས་ཤེས་ཉོན་ཡུལ་ལ་ཁྲོ།༼༡༣༽།སྲིད་པའི་ལྕ༵གས་ཁམས་འཆིང་བའི་མཀྵི་ཀས། །ལས་ཉོན་འཁོར་བའི་སྒྲོགས་སུ་མི་བགྱིད་དེ། །ཡེ་ཤེས་སྒྱུ་མ༵་ཐབས་ཀྱི་རང་བཞིན་ཉིད། །གསུང་གི་རྣམ་པར་འཁོར་འདས་རོ་གཅིག་སྡོམ།༼༡༤༽།བསམ་གྱིས་མི་ཁྱབ་འོག་མིན་ཆེན་པོའི་གནས། །གཉིས་འཛིན་སྣང་བ་དབྱིངས་སུ་ནུབ༵་པའི་གཞི། །རང་སྣང་རང་བཞིན་ཕྱོགས་བྲལ་མཉམ་པའི་ཀློང་། །གསུང་གི་དཀྱིལ་འཁོར་རང་བཞིན་ལྷུན་གྱིས་གྲུབ།༼༡༥༽།དབང་བཅུའི་རང་བཞིན་ཡོན་ཏན་ཆ་བསགས་སྒྲོ། །ཉོན་མོངས་དུག་ཆེན་ཐབས་ཀྱིས་ཞི་བའི་གར། །བཀྲགས་པའི་རྒྱན་སྣང་རྨ༵་བྱ༵འི་མགྲིན་བཏེགས་པ། །གསུང་གི་གདན་ཁྲི་རྒྱལ་བའི་རྒྱན་དུ་བཀྲམ།༼༡༦༽།འཁོར་བའི་མུན་པ་མཐར་བྱེད་ཤེས་རབ་ཅན། །རྣམ་གྲོལ་དག་ཆེན་སོ་སོར་རྟོགས་པའི་གདངས། །དྲན་པའི་གསུང་འགྲུབ་གྲུབ་པ་བཞི་ཡི་ཚུལ། །གསུང་གི་སྙིང་བོ་བརྗོད་མེད་ཀློང་ལས་ཤར།༼༡༧༽།དག་པའི་ཆ༵གས་ཆེ༵ན་ཆགས་པ་གཅོད་པའི་མཚོ༵ན། །སྐུ་ལས་ལེགས་འོང་ཡེ་ཤེས་སྣང་བའི་གདངས། །དབྱིངས་ལས་རང་ཤར་ཁ་དོག་དམ༵ར་པོ༵་སྟོན། །གསུང་གི་འོད་ཟེར་རང་སྣང་བཀོད་པའི་རྒྱན།༼༡༨༽།བདེན་ཞེན་གཉིས་འཛིན་འཆིང་བ་ལྟ་ཅི་སྟེ། །རང་བཞིན་གྲུབ་པའི་ཆོས་ཤིག་དམིགས་མི༵ན་ཕྱིར། །རྫུན་སྣང་རང་བཞིན་ཤེས་ཀྱང་དོན་སྨྲ་སྟེ། །གསུང་གི་དམ་ཚིག་འགྲོ་བློའི་ངོར་སྣང་ཙམ།༼༡༩༽།གང་ཡང་མ་གསུངས་ཅི་ཞིག་གསུང་འགྱུར་ཏེ། །གསུང་བར་མི་མཛད་ཚུལ་དེ་རྒྱལ་བའི་གསུང་། །མི་ཤིག་རང་བཞིན་རྡོ་རྗེའི་ཟ་མ་ཏོག །གསུང་བའི་དུས་ནི་བསམ་མི་ཁྱབ་པ་ཉིད།༼༢༠༽།དབྱངས་འདིའི་རང་བཞིན་བྱིས་བློས་མ་ཡིན་ཏེ། །ཡིད་ཆེས་ཚད་མ་ལུང་གིས་མི་བསླུ་བའི། །རྡོ་རྗེའི་གནས་ལ་གང་གིས་གང་བསྟན་པ། །གསུང་གི་ཟབ་དོན་སྦས་པའི་གསང་བར་བཞུགས།༼༢༡༽།ཡ་ཡིས་མཚོན་པ་ཟླ༵་ག༵མ་རྡོ་རྗེའི་ལྗགས། །དབང་ཤེས་ཡོངས་རྫོགས་དག་པའི་སེམས་དཔའ་སྟེ། །བགྲངས་བར་མི་སྤྱོད་ཡོན་ཏན་རྒྱ་མཚོའི་གཞི། །གསུང་གི་དབྱིངས་སུ་མ་བྱས་རང་བཞིན་ཤར།༼༢༢༽།འཕགས་པའི་ཡེ་ཤེས་རྣམ་པར་དག་པས་ཀྱང་། །གསུང་གི་གསང་བ་གཞལ་བའི་ཡུལ་མིན་ན། །སོ་སྐྱེས་བློ་ལས་ཡེ་ནས་འདས་མོད་དེ། །སྤྱི་བརྟོལ་ངག་མིན་གསུང་གི་དོན་བཞིན་སྨྲས།༼༢༣༽།མོས་པའི་བློ་ཡིས་བློ་ལ་རྗེས་བསྐུལ་ནས། །བློ་བྲལ་གཤིས་ལུགས་གསུང་གི་རྡོ་རྗེ་དེར། །གུས་པ་ཁོ་ནས་རྗེས་བསྔགས་ཚིག་བཅད་སྡེབ། །ཁེངས་དང་མུ་ཅོར་ནོང་ཆ་འདིར་ཡོད་མིན།༼༢༤༽།དགེ་བ་དེ་ཡིས་བརྗོད་བྲལ་ཟབ་མོའི་དོན། །འགྲོ་བའི་རྒྱུད་ལ་རང་བཞིན་སྒྲིབ་བྲལ་ཏེ། །དད་པའི་བློ་གྲོས་ཨ་བུ་ཧྲལ་པོ་ཡང་། །གསུང་གི་རྡོ་རྗེས་རྗེས་སུ་འཛིན་གྱུར་ཅིག༼༢༥༽།དེ་བཞིན་གཤེགས་པའི་གསུང་གི་གསང་བ་གསང་སྔགས་ཀྱི་ཚུལ་དུ་བསྔགས་པ་བརྗོད་པའི་སྐབས་རྫོགས་སོ།། ༈ །།གསུང་ཟབ་དོན་གསང་བ་ལ་བསྔགས་པ། ཆུན་འཕྱང་དྲུག་པ། སྟོན་པ་བདེ་བར་གཤེགས་པའི་གསུང་གི་གསང་བ་གསང་སྔགས་ཀྱི་ཐོར་བུ་ལ་བསྔགས་པ་ཟླ་བ་ཐིག་ལེའི་ཆུན་འཕྱང་ཞེས་བྱ་བ། དཔལ་གསང་བའི་བདག་པོ་ལ་ཕྱག་འཚལ་ལོ། །འཕོ་མེད་བདེ་ཆེན་ཟླ་བ་བདུད་རྩིའི་ཆུ། །གྱེན་དུ་ནམ་མཁའི་འཁོར་ལོར་རྒྱས་བཏབ་པས། །སྒྲིབ་བྲལ་བདེ་ཆེན་དག་པའི་དཔལ་བརྙེས་ཏེ། །ཟུང་འཇུག་འཇུག་པ་མཐོར་གཤེགས་ལ་ཕྱག་འཚལ།༼༡༽།ཁ་སྦྱོར་བདེ་ཆེན་མཆོག་གི་སྟོན་པ་ལས། །ཉི་ཟླ་ཟ་བ་ཟབ་པའི་དབང་བརྙེས་ནས། །མཆེད་པའི་བག་ཆགས་ཕྲ་བའི་ཁམས་སྟོང་པས། །རྡོ་རྗེ་གསུང་གི་རང་བཞིན་བརྙེས་པ་ལགས།༼༢༽།ལྷན་སྐྱེས་བདེ་ཆེན་བརྗོད་པ་བྲལ་བའི་གསུང་། །སྲིད་དང་ཞི་བ་ཡོངས་ཡེ་ཁྱབ་པ་ཡང་། །སྒྲིབ་པའི་སྤྲིན་སྟུག་གང་དུ་བྲལ་གྱུར་པར། །ཐུབ་གསུང་ཉི་འོད་གསལ་བ་བཞིན་དུ་སྣང་།༼༣༽།མི་ཤིག་ཐིག་ལེ་བདེ་ཆེན་དག་པའི་ཡིད། །ལུས་ཅན་སྙིང་ལ་སྟོན་པ་ཉིད་བཞུགས་ནས། །མཆོག་གི་ཡེ་ཤེས་བསྟན་པ་དམ་པའི་གསུང་། །སྒྲིབ་པའི་སྒྲུབ་ནང་དག་པ་ཆེན་པོར་བཞུགས།༼༤༽།རྡོ་རྗེ་བཙུན་མོ་གསང་བའི་སྒྱུ་མ་ཡིས། །གང་དུ་དྲང་པ་སྟོན་པའི་ཐིག་ལེ་ནི། །རང་གི་རང་བཞིན་མཚོན་པ་བྲལ་བའང་། །རྡོ་རྗེ་གསུང་གིས་དེ་རུ་སྣང་བར་མཛད།༼༥༽།བདེ་ཆེན་ཡེ་ཤེས་དག་པའི་སྟོན་འཁོར་གྱིས། །སྣང་བ་གཉིས་ཟོས་མུན་པའི་ལྟོ་བྲལ་ནས། །ནམ་མཁའི་ཐིག་ལེ་གཅིག་ལ་ཞུགས་པ་ན། །སྙིང་པོའི་གསུང་ནི་ཡུལ་དང་བྲལ་བར་གསལ།༼༦༽།གང་གིས་མ་བསྟན་བརྗོད་དུ་མེད་པའི་དོན། །སྐལ་བཟང་སྙིང་ལ་བྱིན་རླབས་མཐུས་བྱིན་པས། །གསུང་གི་དེ་ཉིད་སྒྲིབ་དང་བྲལ་གྱུར་པ། །ཚིག་ལས་འདས་པ་རང་གི་རང་བཞིན་ཤེས།༼༧༽།འཁྲུལ་བའི་ངག་ནི་གསུང་གི་རྡོ་རྗེའི་རྒྱུ། །ལྕགས་ལ་རྩི་བཞིན་ཐབས་ཀྱིས་མངོན་བྱེད་པ། །ལམ་གྱི་ལམ་མཆོག་གསུང་གི་སྙིང་པོ་ནི། །གང་ལ་སྣང་བ་སྲིད་པ་ཐ་མར་བྱེད།༼༨༽།སྟོང་ལས་ངེས་པར་སྙིང་པོའི་དྲངས་པའི་གཟུགས། །སྣང་སྟོང་གཉིས་མེད་གསུང་གི་རྣམ་པ་ནི། །ཟླ་བ་བཞུ་བས་རི་མོ་བྱས་ལྟའི་མདངས། །གསལ་བརྟན་གོམས་ལས་ཡིད་ནི་འཆིང་བར་འགྱུར།༼༨༽།མ་སྐྱེས་མཚོན་པ་ཡི་གེའི་རྣམ་པ་ལས། །སྤྲོས་པས་ཐབས་མཁས་ནམ་མཁའི་ཁྱོན་འགེངས་ཤིང་། །གང་དུ་བསྡུས་པའི་ཐིག་ལེ་གཅིག་གིས་ཀྱང་། །འཕེལ་འགྲིབ་མེད་པ་གཉུག་མ་ཉིད་དུ་གནས།༼༡༠༽།གསུང་གི་རྣལ་འབྱོར་གོམས་པའི་ཕྲིན་ལས་ཀྱིས། །བཅིངས་པས་འཛིན་གཉིས་བདུད་རྩིའི་དཔལ་འཛིན་ཞིང་། །རྒྱས་དང་སྒྲིབ་འཇོམ་མཐོ་རིས་སྲོག་སྦྱིན་ལ། །སྨོན་པའི་འབྲས་བུ་དུད་པར་བྱེད་པ་ཡིན།༼༡༡༽།སྟོང་པ་སྲ་ཞིང་འབར་བ་འདིས་བསྲེགས་ཏེ། །གཤེར་གྱུར་འབབ་ལ་བརྟན་པ་འཐོར་ཞིང་གཡེངས། །འཐས་པ་བཤིག་ནས་སྟོང་ཞིང་ལྟུང་བ་སྟེ། །གསུང་གི་ཏིང་འཛིན་འཕྲིན་ལས་བསམ་མི་ཁྱབ།༼༡༢༽།རིང་ནས་དགུགས་ཤིང་གནས་ལས་སྐྲོད་པ་དང་། །འཆིང་བར་བྱེད་ཅིང་འཆིང་བ་གྲོལ་གྱུར་ལ། །ཤི་བ་སློང་དང་གསོན་པ་མཐར་བྱེད་ཅིང་། །ཕྱོགས་གཉིས་རྒྱལ་དང་ཕམ་པའང་བྱེད་པར་འགྱུར།༼༡༣༽།གང་གི་ཡིད་ལ་མཆོག་གི་དཔལ་སྦྱིན་པ། །ཤིན་ཏུ་ཡང་དག་དཀྱིལ་འཁོར་འཁོར་ལོ་ནི། །ཡི་གེ་སྤྲིན་གྱི་ཕྲེང་བ་ལས་བཀོད་དེ། །ཐ་མལ་སྣང་བ་རྡོ་རྗེའི་གྲོང་དུ་བྱེད།༼༡༤༽།གསུང་གི་སྙིང་པོ་ཕྲ་ཞིང་གཡོ་བའི་གཟུགས། །སྲོག་གི་དབུས་ན་ཡིད་ནི་དེར་འཆིང་ཞིག །རྩོལ་བས་བཟླས་པའི་ཐུགས་དམ་རྒྱུད་བསྐུལ་ཏེ། །སྐལ་བཟང་དངོས་གྲུབ་སྐལ་བ་སྦོམ་པོར་བྱེད།༼༡༥༽།གྲུབ་པ་རྣམ་བཞིས་ཡོངས་བཟུང་དག་པའི་ངག །རྡོ་རྗེའི་གསུང་ཞེས་ཅིས་ཕྱིར་འོས་མིན་ཏེ། །སྲིད་པའི་བརྗོད་པ་ཉེས་པའི་འབྲས་བདོ་བ། །འགོག་དང་ཡོངས་དག་འདི་ཡིས་བྱེད་པར་འགྱུར།༼༡༦༽།དགྱེས་དང་དྲག་ཤུལ་རྡོ་རྗེའི་གད་མོ་ནི། །དྲན་པ་ཡིས་ཀྱང་འབྱུང་པོའི་ཚོགས་བྱེར་ཞིང་། །དགོད་གཤེ་དྲག་ཤུལ་ཉམས་བརྒྱའི་ང་རོ་ཡིས། །དུག་གསུམ་རྡུལ་ཀྱང་བསྲེག་ཤིང་ཟད་པར་བྱེད།༼༡༧༽།ཟླུམ་པོའི་འགྲོས་ཀྱིས་རྟོག་པའི་དུག་སྦྱོང་ཤིང་། །ཐབས་ཤེས་འབྲེལ་བ་མགལ་མེ་ལྟར་རྒྱུ་བས། །བདེ་གསལ་སིམ་པ་སྙིང་ལ་བྱིན་པའི་མོད། །གྲགས་སྟོང་གསུང་ནི་བུང་བ་ཚང་ཞིག་བཞིན།༼༡༨༽།འཁོར་འདས་བྱིན་བཅུད་ཐབས་ཀྱི་འཕྲོ་བའི་ཁུར། །འཆི་བ་མེད་པའི་བཅུད་དུ་གནས་པའི་དཔལ། །རྣལ་འབྱོར་སྲོག་ལ་བདུད་རྩི་སྦྱིན་ནུས་པ། །སྐུ་ཡི་སྙིང་པོ་ཨོཾ་ལས་གཞན་ན་མེད།༼༡༩༽།ཀུན་རྟོག་སྲོག་རྩ་སྐད་ཅིག་གཅིག་ཁོ་ནར། །གཅོད་པའི་རྣོ་ནུས་ཉི་ཟླའི་ཁྱིམ་བརྒྱུད་ནས། །ཁམས་གསུམ་བསད་ནས་སྒྲ་གཅན་ལྟོར་འདེབས་པ། །གཉིས་སྤང་གྲོགས་དེ་ཨཱཿཡིག་བསྟི་བར་འགྱུར།༼༢༠༽།སྤྲོས་པས་རི་མོ་ནམ་མཁའི་ཁྱོན་གང་བས། །སྣོད་བཅུད་སྣང་བ་ངེས་པར་རྒྱས་བཏབ་ནས། །སྒྱུ་མའི་གྲོང་ཁྱེར་རྣལ་འབྱོར་མངོན་སུམ་དུ། །ཆུ་ཟླ་ལྟ་བུའི་ཧཱུྃ་ཡིག་གཡོ་བས་ངོམས།༼༢༡༽།གསུང་གི་དཀྱིལ་འཁོར་བཅུ་ཕྲག་གཡོ་བའི་གསུང་། །མས་ནས་ཞུགས་པས་སྲིད་པའི་ཁྱིམ་བཅུ་གཉིས། །ངེས་པར་བཤིག་སྟེ་གཟུང་འཛིན་སྲོག་བཅད་ནས། །ཤིན་ཏུ་དག་པའི་ཡེ་ཤེས་གཅིག་ཏུ་འགྱུར།༼༢༢༽།གཡོ་བ་དེས་ནི་ཉི་མ་མཁར་སྦས་ནས། །ཟླ་བ་བཞུ་བའི་འགྲོས་བཞིའི་ཤིང་རྟ་ལས། །མཆོག་གི་སྟོན་པ་ཡིད་ཀྱི་གྲོང་དྲངས་པས། །བརྗོད་དུ་མེད་པའི་ཆོས་འཁོར་དེ་རུ་བསྐོར།༼༢༣༽།ཐབས་ཀྱིས་བཅིང་པས་འཁྲུལ་པའི་ཡི་གེ་ནི། །ལོངས་སྤྱོད་རྫོགས་པ་མཆོག་གི་གསུང་ཁོ་ནར། །ཡུད་ཀྱིས་བྱེད་པ་ལམ་གྱི་ལམ་མཆོག་ནི། །རྒྱལ་བའི་གསང་ཆེན་རྡོ་རྗེ་ཐེག་པར་ངེས།༼༢༤༽།ངེས་པའི་རང་བཞིན་མངོན་པར་བརྗོད་འདིའི་དགེས། །ཐབས་ཆེན་ལམ་འདིས་སྲིད་པའི་སྲོག་འཇོམས་ཤིང་། །ཉེས་རྟོག་མང་བ་ཨ་བུ་གདོལ་པ་ཡང་། །གཡོ་བའི་ངག་འདི་དབུ་མར་འཆིང་གྱུར་ཅིག༼༢༥༽།སྟོན་པ་བདེ་བར་གཤེགས་པའི་གསུང་ཟབ་མོའི་གསང་བ་ལ་བསྔགས་པའི་སྐབས་རྫོགས་སོ།། ༈ །།གསུངས་ཡོན་ཏན་རྒྱ་མཚོའི་ཆེ་བ་ལ་བསྔགས་པ། ཆུན་འཕྱང་བདུན་པ། སྟོན་པ་བདེ་བར་གཤེགས་པའི་གསུང་ཡོན་ཏན་རྒྱ་མཚོའི་ཆེ་བ་ལ་བསྔགས་པ་མུཀྟི་ཀའི་ཆུན་འཕྱང་ཞེས་བྱ་བ། དཔལ་དོན་ཀུན་གྲུབ་པ་ལ་ཕྱག་འཚལ་ལོ། །གང་གི་སྲིད་པའི་དྲྭ་བ་གཅོད་དོན་དུ། །ཐོག་མར་ཞི་བའི་བདུད་རྩི་བརྙེས་མཛད་ནས། །གོ་འཕང་འཆི་བ་མེད་པར་འགྲོ་བ་ཀུན། །སྦྱོར་མཛད་ལེགས་གསུང་མངའ་ལ་ཕྱག་འཚལ་ལོ།༼༡༽།རྟག་ཏུ་མཉམ་བཞག་དགོངས་པ་གཡོ་མེད་པ། །ཆོས་སྐུའི་ཀློང་ནི་ཚིག་དང་ཡི་གེ་ལས། །རྣམ་པར་འདས་ཀྱང་སྣ་ཚོགས་གསུང་གི་ཚུལ། །སྲིད་པར་ཡོངས་སྣང་གསུང་གི་ཆེ་བ་ཡིན།༼༢༽།སྲིད་ཞིའི་སྒྲར་གྱུར་མ་ལུས་ཟིལ་གནོན་ཞིང་། །དུས་གཅིག་ཉིད་དུ་དུ་མར་གསུངས་མཛད་ལ། །དུས་རྣམས་ཀུན་ཏུ་རྒྱུན་ཆད་མེད་གསུང་པ། །མོས་པ་རྒྱ་མཚོའི་སྣོད་དང་མཐུན་པར་སྣང་།༼༣༽།སྙན་ཞིང་ཡིད་འོང་ཐུབ་པ་ཆེན་པོའི་གསུང་། །ཉན་པའི་ཡིད་ལ་ཀུན་དགའི་དཔལ་སྦྱིན་ཞིང་། །སྐྱོ་དང་བག་མེད་མ་གུས་མེད་གྱུར་པ། །རྒྱལ་བའི་གསུང་ནི་ཐོག་མར་དགེ་བ་ཡིན།༼༤༽།གསུང་དེས་རྗེས་སུ་གང་ཞིག་གུས་སྦྱོར་བ། །ངལ་བ་མེད་པར་མཐའ་གཉིས་རྣམ་སྤངས་ནས། །དབུ་མའི་ལམ་ལ་ཡང་དག་བརྟེན་འགྱུར་ཕྱིར། །ཐུབ་པ་ཁྱོད་གསུང་བར་དུ་དགེ་བ་ལགས།༼༥༽།ཤིན་ཏུ་དྲི་མེད་ཤིན་ཏུ་མཐར་ཕྱིན་ཞིང་། །འདོད་ཆགས་དང་བྲལ་ཆགས་བྲལ་མཐར་ཐུག་པ། །རྣམ་པ་ཀུན་ཏུ་འབྲས་བུ་མཆོག་སྦྱིན་ཕྱིར། །ཁྱེད་ཀྱི་གསུང་ནི་ཐ་མར་དགེ་བ་ཡིན།༼༦༽།མཐོ་རིས་ཡོན་ཏན་དཔལ་མང་སྦྱིན་པ་དང་། །ངན་འགྲོའི་སྡུག་བསྔལ་གཅད་ཕྱིར་ཕན་པ་སྟེ། །རྗེས་བསླབ་བདེ་ནས་བདེ་བའི་གནས་འགྲོ་བའི། །བསླུ་མེད་བརྗོད་དོན་བཟང་པོ་མངའ་བ་སྟེ།༼༧༽།ཉམས་པ་མེད་པར་ཚིག་གི་ཟུར་ཕྱིན་ཞིང་། །ལེགས་པར་སྦྱར་བས་མཁས་པ་མགུ་བ་སྐྱེད། །ཤིན་ཏུ་སྒྲོས་གཙང་སྙན་པའི་སྡེབ་མངའ་བ། །རྒྱལ་བའི་གསུང་ནི་ཚིག་འབྲུ་བཟང་པོ་ཡིན།༼༨༽།རྟག་ཆད་བདག་རྟོག་དམ་པའི་ལམ་མིན་པ། །རྟོག་གེ་ཕྱི་རོལ་གཡོ་རྒྱུའི་རྡུལ་སྤངས་ཤིང་། །ཐུབ་ཚུལ་ཡང་དག་ཀུན་ལས་ཁྱད་འཕགས་ཕྱིར། །འདྲེན་པ་ཁྱོད་གསུང་མ་འདྲེས་པ་ཉིད་ཡིན།༼༨༽།སྣ་ཚོགས་མོས་ཁམས་རྒྱ་མཚོའི་རྡུལ་ཇི་སྙེད། །དེ་སྙེད་ཡང་དག་ལམ་ལ་ཚད་མེད་ཅིང་། །ཀུན་ཀྱང་རང་འབྲས་བླ་ན་མེད་ལྡན་པ། །རྣམ་པ་ཀུན་ཏུ་ཡོངས་སུ་རྫོགས་པ་ཡིན།༼༡༠༽།ཡེ་ནས་དག་པ་གསུང་གི་རང་བཞིན་ཏེ། །འདུས་མ་བྱས་པ་ལྷུན་གྲུབ་གཡོ་མེད་པ། །རྣམ་རྟོག་སྐྱོན་གྱིས་བསྐུལ་བ་ཉིད་མིན་ཕྱིར། །ཐུབ་པའི་གསུང་ནི་ཡོངས་སུ་དག་པ་ཡིན།༼༡༡༽།ཇི་སྙེད་ཉོན་མོངས་སྲིད་པའི་སྐྱོན་མང་པོ། །སྤང་བའི་ཡེ་ཤེས་ཐམས་ཅད་མཁྱེན་བརྙེས་པའི། །མཆོག་གི་གནས་ལས་བདུད་རྩིའི་ཚུལ་སྦྱིན་པ། །སྐྱོབ་པ་ཁྱོད་གསུང་རྣམ་པར་བྱང་བ་ཡིན།༼༡༢༽།སྲིད་ཁམས་བསོད་ནམས་ཕུང་པོ་གཞལ་བྲལ་བའི། །རྒྱལ་བའི་དཔེ་བྱད་མཚན་དང་མཚན་མཆོག་གི །བསོད་ནམས་དེས་ཀྱང་བསྒྲུན་དུ་མེད་པ་ཡི། །རྒྱུས་བསྐྱེད་ཚངས་དབྱངས་གསུང་གི་ཁྱད་ཆོས་ལགས།༼༡༣༽།ཞེན་པའི་ཀུན་དཀྲིས་མདུད་པ་ཆེས་དམ་པས། །རྣམ་པར་འཆིང་ལྡན་དགའ་བོ་ལྟ་བུ་ཡང་། །ཐུབ་པའི་གསུང་གཅིག་ཁོ་ནས་རྒྱུད་བསྡམས་པས། །སྲིད་པའི་འཆིང་བ་མ་ལུས་ཡོངས་སུ་གྲོལ།༼༡༤༽།སྡང་བའི་མཚོན་འཁོར་བསྐྱོད་ལ་མི་ངལ་བའི། །མྱོས་པའི་ནོར་སྐྱོང་སྟབ་པོར་རྒྱུག་པའང་། །ཁྱེད་གསུང་བདུད་རྩིའི་ཐིག་པ་གཅིག་བྲན་པས། །དུལ་བ་ཁོ་ནས་འཆི་མེད་གནས་སུ་སོང་།༼༡༥༽།རྨོངས་པའི་མུན་པ་ཀུན་ཏུ་གཞིག་དཀའ་བ། །རྟུལ་བའི་བློ་གྲོས་བྲམ་ཟེ་ལམ་ཆུང་ཡང་། །རྡུལ་མེད་དྲི་བྲལ་གསུང་གི་འོད་གཅིག་གིས། །ཐོག་མེད་སྒྲིབ་ཕུང་མིང་ཙམ་ཉིད་དུ་བྱས།༼༡༦༽།ང་རྒྱལ་རྒྱགས་པས་སྲིད་པའི་རྩེར་འགྱིང་བའི། །བྱེད་པོར་རློམ་ལྡན་ཚངས་དབང་བརྗིད་གྱུར་ཀྱང་། །གསུང་གཅིག་ཆོས་ཀྱིས་དྲེགས་པ་ཀུན་བཅོམ་སྟེ། །འདུད་པའི་ཐོར་གཙུག་ཞབས་ཀྱི་རྡུལ་འོག་ལྟུང་།༼༡༧༽།ཕྲག་དོག་རྒྱུས་བསྐུལ་ལུས་མེད་དྲག་པོའི་དཔུང་། །བྱེ་བ་ཁྲག་ཁྲིག་མཚོན་ཆར་འབེབ་བཞིན་པ། །ཡི་གེར་བཅས་མིན་གསུང་གི་གདངས་གཅིག་གིས། །སེན་རྩེའི་རྡུལ་ལ་སྲིད་མཐའི་རླུང་བཞིན་བྱས།༼༡༨༽།མི་གསོན་ཟོས་པའི་ཁྲག་གིས་ལུས་རྒྱས་པའི། །གདུག་པའི་འབྲོག་གནས་མཆེ་བ་དམར་གཙིག་ཀྱང་། །ཞི་བའི་གསུང་ལས་འདའ་བར་མ་ནུས་ཏེ། །སྡོམ་པའི་ཀུན་སྤྱོད་སློབ་མ་བཞིན་དུ་བླངས།༼༡༩༽།རྔམ་ཟས་ཁོ་ནར་མི་བཙས་སྲོག་འགུམ་ཞིང་། །ལྔ་བརྒྱའི་བུར་བཅས་སྲིད་པའི་ཁམས་རྒྱུ་བའི། །འཕྲོག་མ་སྲིན་མོ་ཐུབ་གསུང་གིས་བཅིངས་པས། །འདུས་པའི་གྲལ་མཐར་ཆང་བུ་ཉུལ་ཞིང་བསྣོམས།༼༢༠༽།ལམ་གོལ་གོམས་པའི་ཡུན་དུ་བསླུས་རབ་བཟང་། །རྒས་པའི་འཁྱོར་གོམ་འཁར་བས་བརྟེན་པ་ལ། །གསུང་གཅིག་ཁོ་ནས་མྱ་ངན་འདས་བྱིན་པས། །ཡང་སྲིད་མེད་དང་རྫུ་འཕྲུལ་སྟོབས་བཅས་གཤེགས།༼༢༡༽།བསྟི་བ་མེད་པར་དམྱལ་གནས་ལ་སྤྱོད་པའི། །བསྲེག་གཏུབ་གཅོད་པའི་ཚོར་བས་མནར་བའང་། །གསུང་གི་འོད་ཀྱི་སྐད་ཅིག་གཅིག་རེག་པས། །ངལ་བསོའི་བདེ་བ་ལྷ་ཡུལ་ལྷ་བཞིན་མྱོང་།༼༢༢༽།ཐུབ་པའི་གསུང་ནི་རྣམ་པ་ཐམས་ཅད་དུ། །ཡོན་ཏན་རྒྱ་མཚོའི་ངེས་པར་བཟུང་བ་སྟེ། །སྲིད་ཞིའི་ཁམས་ན་ལེགས་དགུའི་ཆ་ཅི་མཆིས། །མགོན་པོ་ཁྱེད་ཀྱི་གསུང་གི་ཕྲིན་ལས་ཡིན།༼༢༣༽།གསུང་གི་ཆེ་བ་ཟབ་པས་མཐའ་སྤང་བ། །བརྗོད་པའི་ཡུལ་དུ་འཕགས་པས་ཀྱང་མིན་ན། །བླུན་པོ་བདག་ལྟས་སྨྲ་བར་ནུས་མིན་ཡང་། །མོས་པའི་ཡིད་ཀྱིས་ཅུང་ཟད་ཚིག་ཏུ་བསྡེབས།༼༢༤༽།དགེ་བ་འདི་ཡིས་དམན་པའི་འགྲོ་ཁམས་ཀུན། །ཆེ་བའི་རྒྱལ་པོ་ཐུབ་པའི་དཔལ་བརྙེས་ཤིང་། །ཉེས་པའི་ངག་ཅན་ཨ་བུ་འཆལ་བ་ཡང་། །ཚིག་བཙན་གཏམ་བཙུན་དྲང་སྲོང་བཞིན་གྱུར་ཅིག༼༢༥༽།སྟོན་པ་བདེ་བར་གཤེགས་པའི་གསུང་ཡོན་ཏན་རྒྱ་མཚོའི་ཆེ་བ་ལ་བསྔགས་པའི་སྐབས་རྫོགས་སོ།། ༈ །།སྟོན་པ་བདེ་བར་གཤེགས་པའི་གསུང་ཡེ་གྲོལ་རྫོགས་ཆེན་ལ་བསྔགས་པ་བཻཌཱུརྱའི་ཆུན་འཕྱང་ཞེས་བྱ་བ། །སྙིང་གི་རྒྱ་ཅན། དཔལ་འཁོར་ལོའི་དབང་ཕྱུག་ལ་ཕྱག་འཚལ་ལོ། །གང་གི་རང་བཞིན་ནམ་མཁའ་ལྟ་བུའི་ཀློང་། །སྲིད་དང་ཞི་བ་གཉིས་སུ་མེད་གྱུར་པ། །སྤྲོས་བྲལ་ཡོངས་གྲུབ་རྫོགས་པ་ཆེན་པོ་ནི། །མི་གནས་བསམ་ཡུལ་འདས་ལ་ཕྱག་འཚལ་ལོ།༼༡༽།གང་ཞིག་གང་གིས་ཡོད་དང་མེད་པའི་ཕྱོགས། །གཉིས་སུ་མི་འཛིན་ཆེད་དུ་མི་བཀག་པར། །གྲུབ་མཐས་མ་བསླད་དྲན་པས་མ་བཅིང་པའི། །ཐ་མལ་ཤེས་པ་རྩོལ་སྒྲུབ་གཉིས་ལས་འདས།༼༢༽།དེ་ནི་ང་ཡིན་ཡེ་ནས་མ་འཁྲུལ་ཞེས། །ཀུན་བྱེད་ཆོས་སྐུའི་སྟོན་པས་འདིར་གསུངས་ཏེ། །གསུངས་ཙམ་ཉིད་ནས་རྒྱུ་འབྲས་འདས་པའི་གནད། །སྐལ་ལྡན་རྣམས་ཀྱིས་ཤེས་ནས་རང་བཞིན་གནས། །༼༣༽།གསུང་གཅིག་གིས་ནི་བསྐལ་པའི་གསུངས་མཐའ་དག །རྫུན་དུ་བྱས་ནས་ཅི་ཡང་མི་གསུང་སྟེ། །གང་ལ་གསུང་ཞེས་ཡུལ་ཡང་མ་དམིགས་པ། །ཆོས་སྐུའི་ཀློང་དེར་འཁོར་འདས་འདྲེས་པར་གྱུར།༼༤༽།རང་བཞིན་དེ་ཤེས་འཕགས་པ་ཉིད་གྱུར་པ། །བདེན་པ་གཟིགས་ཀྱང་བདེན་ཞེས་འཛིན་མིན་པར། །ངེས་ཤེས་ཟད་ནས་གྲུབ་མཐའི་བློ་སྟོར་ཏེ། །ལྟ་སྒོམ་སྤྱོད་པའི་ཐ་སྙད་དེ་རུ་ཆད།༼༥༽།ཀྱེ་མ་མཁས་པ་རྣམས་ནི་རྟོག་དཔྱོད་དུག །མྱང་བཞིན་མྱང་བཞིན་གཅིག་ལ་གཉིས་སུ་འཁྲུལ། །ཆོས་སྐུ་རང་ལ་གནས་པ་མ་མཐོང་ནས། །སྲིད་པའི་རྡུལ་ཕྲན་བགྲངས་ནས་རྙེད་དུ་རེ།༼༦༽།དམ་པས་བསྟན་པ་རང་ལས་གང་རྙེད་པ། །སྲིད་པའི་རྙོགས་མ་རྣམས་ནི་དེས་འཁྲུད་དེ། །རང་བཞིན་བཞུགས་པས་ཆོག་པའི་གནད་ཤེས་ན། །སུ་ཡང་བྱིས་པའི་ཆོས་ཀྱིས་གཡེང་མི་བགྱིད།༼༧༽།གང་གིས་སྲིད་དང་ཞི་བ་ནམ་མཁའ་སྟེ། །ནམ་མཁའ་ལྟ་བུའི་ཆོས་ཉིད་བྱང་ཆུབ་ལ། །སྐྱེ་འཆིའི་མིང་འདོགས་ཟད་ཅེས་སུས་ཤེས་པ། །དེ་ལ་སྔ་ཕྱིའི་ཚེ་རབས་ཡོད་མི་འགྱུར།༼༨༽།དེ་ཕྱིར་སྡིག་དང་དགེ་བས་སུ་ལ་ཅི། །སངས་རྒྱས་བསྒྲུབས་པས་འགྲུབ་པ་མ་ཡིན་ཏེ། །ས་ལམ་རྩོལ་སྒྲུབ་བྲལ་བའི་གཉུག་མ་འདི། །མཐོང་ཙམ་ཉིད་ནས་རྒྱུ་འབྲས་རྫུན་པར་འགྱུར།༼༨༽།སྔར་ཡང་སྲིད་ཅེས་སུ་ཡང་མ་འཁྲུལ་ལ། །ད་ལྟ་མི་འཁྲུལ་འཁྲུལ་པར་མི་འགྱུར་ཕྱིར། །བཅིང་གྲོལ་མེད་པ་ཀུན་གྱི་ཆོས་ཉིད་དེ། །དེ་ལ་གྲོལ་དང་ཐར་པ་ཇི་ལྟར་ཡོད་།༼༡༠༽།ཡོད་དང་མེད་པ་རྟག་ཆད་འགྲོ་འོང་ཆོས། །བློ་ཡིས་བཀག་ཀྱང་ཇི་ལྟར་ཁེག་འགྱུར་ཏེ། །བློ་འདས་ཉིད་ཅེས་བློ་ཡིས་བཟོ་བཅོས་ན། །ཆུ་ལ་ཆུ་ཡིས་རག་བྱེད་འཁྲུལ་མིན་ཅི།༼༡༡༽།ཁ་ཅིག་ཡོད་ཅེས་ཀུན་རྫོབ་ལས་བསམ་སྨྲ། །འགའ་ཞིག་མེད་ཅེས་དོན་དམ་ལ་དམིགས་ཏེ། །དམིགས་པའི་དུག་དེས་གཉིས་ཀ་ཁྱབ་གྱུར་པས། །དམིགས་སུ་མེད་པའི་ཆོས་སྐུ་ཤེས་མི་འགྱུར།༼༡༢༽།ཐབས་ཀྱིས་བཅིངས་པའི་རྨོངས་པ་ལམ་ནོར་བ། །བདེ་གནས་གསལ་བའི་ཡིད་ལ་ཆོས་སྐུར་རེ། །ཀྱེ་མ་གཉུག་མའི་ཡིད་ནི་སྒྲིབ་བྲལ་དུ། །རྟག་ཏུ་རང་ལ་གནས་པ་མ་མཐོང་ངོ་།༼༡༣༽།ཕྱལ་བ་ལྷུག་པ་རང་བཞིན་གུ་ཡངས་པ། །གླེན་པའི་ཡིད་འདི་བཅོས་སུ་ཅི་དགོས་ཏེ། །བཅོས་ཤིང་བཅོས་ཤིང་སེམས་ཀྱི་རྟོག་ལང་བ། །རང་གི་རང་བཞིན་བསྒྲིབ་པ་ཉིད་དུ་གྱུར།༼༡༤༽།དཔེ་ལས་འདས་པ་དཔེ་ཡི་མཚོན་མིན་ཏེ། །ཚིག་དང་བྲལ་ལ་ཚིག་གིས་དབང་བསྐུར་ཅི། །ཡེ་ནས་སྨིན་ཟིན་གདོད་སྨིན་བྱར་མེད་ན། །སྨིན་དང་གྲོལ་ཞེས་དེ་ལྟར་བརྫུན་དུ་སྨྲ།༼༡༥༽།སྣ་ཚོགས་གྲུབ་མཐས་བྱིས་པའི་ཡིད་བསླུས་ནས། །རིམ་རྩོལ་བྲལ་ལ་ཐེག་རིམ་འཇུག་སྒོ་བཟུང་། །ལྟ་སྒོམ་སྤྱོད་པས་རྣལ་འབྱོར་ཀུན་བསླུས་ཏེ། །ཆོས་སྐུའི་གཤིས་ལས་རིང་བ་ཉིད་དུ་གྱུར།༼༡༦༽།ཤིན་ཏུ་རྣལ་འབྱོར་ངག་ལས་འདས་མོད་ཀྱང་། །སྣ་ཚོགས་ཐེག་པའི་གཟེབ་ཀྱིས་བཅིང་བ་ལ། །གཅོད་པའི་དོན་དུ་རལ་གྲིར་འདི་སྣང་བས། །ནམ་མཁའི་མདུད་བཞིན་ད་ནི་ཅིར་མི་བརྡུག༼༡༧༽།གང་ཡང་ཡིན་ཏེ་སྣང་ཙམ་ཀུན་ཏུ་བདེན། །གང་ཡང་མིན་ཏེ་གཤིས་ལ་བསམ་བརྗོད་བྲལ། །ཡིན་མིན་མེད་དེ་ཁས་ལེན་མཁན་པོ་སྟོར། །རྟོགས་དང་མ་རྟོགས་ཡེ་ནས་ཡོད་པ་མིན།༼༡༨༽།སུས་ཀྱང་མ་བསྟན་གང་གིས་བཟུང་མིན་པ། །མཁའ་མཉམ་རྣམ་གྲོལ་རྫོགས་པ་ཆེན་པོ་ནི། །སྒྲ་ཚིག་ལས་འདས་ལམ་དང་ཡི་གེ་མེད། །ནམ་མཁའ་བཞིན་དུ་ཡེ་ནས་རང་བཞིན་སྣང་།༼༡༩༽།རྩོལ་ཞིང་སྒྲུབ་མེད་ཡེ་སངས་རྒྱས་པའི་དལ། །རང་རིག་ལྷུན་འབྱམས་བདེ་ཆེན་དག་པའི་ཞིང་། །འཁོར་འདས་འདི་ཀུན་ཡེ་ནས་དབྱིངས་གཅིག་སྟེ། །མ་བྱས་ལྷུན་གྲུབ་རྡོ་རྗེ་བཀོད་པའི་རྒྱན།༼༢༠༽།རང་བཞིན་ཤེས་ན་སངས་རྒྱས་རང་ཡིན་པས། །རྟོག་བྲལ་སེམས་འདི་ཆོས་སྐུ་ཉག་གཅིག་སྟེ། །བཟང་ངན་དགེ་སྡིག་སྤྲིན་བཞིན་ཡལ་བ་ན། །གཉུག་མའི་སེམས་ནི་དག་པའི་ཉི་བཞིན་གསལ།༼༢༡༽།ངེས་པ་འདི་ཤེས་སྙིང་པོའི་རྣལ་འབྱོར་བ། །ཆོས་སྐུའི་དབྱིངས་ནས་ཡེ་ཤེས་ཡས་བབས་ཏེ། །འཁྲུལ་རྟོག་དུག་ལྡན་བྲང་འགྲོ་བཞིན་ཟོས་ནས། །ཕྱོགས་ལྷུང་མེད་པར་ནམ་མཁའ་ལྡིང་བཞིན་གྱུར།༼༢༢༽།ཀྱེ་ཧོ་གསང་བ་ལས་ཀྱང་ཆེས་གསང་བ། །གསུང་གི་གསང་ཆེན་ཡང་གསང་རྡོ་རྗེའི་རྩེ། །བསྟན་ཡང་བསྒྲུབ་མེད་ངག་གི་ཡུལ་མིན་ན། །བསྟོད་པའི་ཡུལ་དུ་ཇི་ལྟར་བྱ་བར་རུང་།༼༢༣༽།དེ་ལྟར་ནའང་རྟོག་པས་བཅིང་པའི་ཡིད། །བྱིས་དང་ལམ་ཞུགས་ཐེག་བརྒྱད་གོལ་བའི་མཚངས། །བརྟོལ་ཙམ་ཉིད་ནས་ཐེག་རྩེའི་ཆེ་འབྱིན་ཏེ། །རང་གི་རང་བཞིན་བརྗོད་དང་བྲལ་བར་ཤོག༼༢༤༽།དགེ་བ་དེ་ཡིས་སྲིད་ཞི་མ་ལུས་པ། །མི་གནས་ས་ལ་རྫོགས་སངས་རྒྱས་འགྱུར་ཞིང་། །ནམ་མཁའི་ཡིད་ཅན་ཨ་བུ་ཧ་ཤང་ཡང་། །བརྗོད་པའི་ངག་འདི་བྲག་ཆ་བཞིན་གྱུར་ཅིག༼༢༥༽།