DKYD-KABUM-02-KHA-015

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	mdo mkhyen brtse bka' 'bum Volume 2, Text 15, Pages (Folios to )
Author	མདོ་མཁྱེན་བརྩེ་
Less details More details
Citation
Genre

[edit]

༄༅། །ཡང་གསང་ཌཱཀྐིའི་ཐུགས་ཐིག་གི་ཆ་ལག་ཟུར་འགེབ་མི་ཟད་རྒྱན་འཁོར་ལསཿ གཅོད་ཀྱི་ལས་ཚོགས་དམིགས་རིམཿ དང་པོ་སྔ་ནོན་དམིགས་པ་ནིཿ ཕཊཿ རང་ཉིད་སྐད་ཅིག་གིས་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ཐུགས་ཀ་ནས་འོད་ཟེར་རབ་ཏུ་འཕྲོས་ནས་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཐམས་ཅད་འོད་ཀྱིས་ཁྱབ་པར་བསམཿ ཐམས་ཅད་འོད་དུ་ཞུ་ནས་སྣང་སྲིད་ཀྱི་ལྷ་འདྲེ་ཐམས་ཅད་མ་ལུས་ལུས་མེད་ཐར་པ་དང་འཆོར་ས་མེད་པར་མཐའ་ནས་བསྡུས་ཏེ་གཉན་ཁྲོད་དེ་རུ་བསྡུས་ནས་གནམ་ལྕགས་རྡོ་རྗེ་ལས་གྲུབ་པའི་གུར་ཁང་ནག་པོ་མེ་འབར་བའི་ནང་དུ་ཚུད་དེ་ཀུན་གྱི་མཐུ་སྟོབས་ནུས་པའི་དཔའ་ཟིལ་ཆགས་དེ་འདར་ཕྲིལ་ཕྲིལ་གནས་པར་བསམཿ སྔ་ནོན་དམིགས་པ་མང་ཡོད་ཀྱང་ཿ དེ་ཙམ་ཆོག་པ་ཁྱད་ཆོས་ཡིནཿ དེ་ནས་བར་ནོན་དམིགས་པ་ནི་རང་ལུས་ཆེ་བ་སྲ་བ་ཡུལ་ལྗོང་ཙམ་དུ་བསྐྱེད་པའི་འོག་ཏུ་ལྷ་འདྲེ་གནོད་བྱེད་ཐམས་ཅད་ཚུད་ནས་སྐད་ངན་ཙི་རི་རི་འདོན་པར་བསམཿ སླར་ཡང་བཀའི་སྣང་སྲིད་ལྷ་འདྲེ་ཐམས་ཅད་ཤོག་སྐྱ་རླུང་གིས་བསྐྱོད་པ་ལྟར་བཀུགས་ནས་མལ་འོག་ཏུ་མནན་པར་བསམ་ཞིང་ལྷ་འདྲེ་དེ་དག་ཐིམ་པར་བསམཿ དམིགས་པ་གསལ་ཞིང་ངག་ཏུ་ནིཿ འོ་ད་ནི་སྐལ་བ་མ་ཞིག་འབྱུང་བ་མ་རྡིབ་བར་དུ་བདག་འདི་ནས་མི་འགུལཿ འདི་ནས་མི་འཕོཿ འདི་ལས་མི་གཡོཿ འདི་རུ་འདུག་གོཿ ཉལ་ལོ་ཕཊ་ཕཊ་ཕཊཿ ལན་གསུམ་བརྗོདཿ སྟེང་གི་ནམ་མཁར་བླ་མ་ཡི་དམ་སངས་རྒྱས་བྱང་སེམས་ཆོས་སྐྱོང་ཐམས་ཅད་བཀྲ་དཔུང་ངེ་འོད་ཐིབས་སེ་བཞུགས་པར་བསམཿ ཡེངས་མེད་རོ་སྙོམས་ཀྱི་ངང་དུ་སྙོམས་པར་བརྡལཿ དེ་ནས་རབ་དགོས་ཐ་མ་རྨི་ལམཿ འབྲང་ལ་སློང་ཚད་ངེས་པར་འོང་བ་ཡིནཿ ས་མ་ཡཿ ཕྱི་ནོན་དམིགས་པ་ནིཿ གདན་ཚབ་ཏུ་རྟེན་རབ་གནས་བྱ་ལ་བཞགཿ ཕུང་པོའི་ནི་མཆོད་མ་སྦྱིན་ཆོས་སྦྱིན་བྱཿ བདེ་སྡུག་གཏོང་ལེན་དམིགས་པ་གནད་སྨིན་བྱས་ལཿ ཧ་ཧཿ ཧི་ཧིཿ ཧེ་ཧེཿ ཧོ་ཧོཿ ཧཱུཾ་ཧཱུཾཿ ཕཊཿཕཊགོམ་པ་བདུན་བོར་ནསཿ རྐང་དུང་ལན་གསུམ་འབུདཿ ཀཻའི་ཀཻའི༴ རེམ་རེམཿ ཕཊཿ རང་གི་རིག་པ་ཡེ་ཤེས་ཀྱི་མཁའ་འགྲོ་སྡེ་ལྔར་གྱུར་ཏེ་ཕྱོགས་བཞིར་གཤེགས་པར་བསམ་ལ་མིག་མཐོང་གང་ཙམ་སླེབ་ནསཿ ཐེ་ཚོམ་མེད་པར་ཟབ་མོ་ཚེར་ལྕགས་གཅིག་བཙུག་ལ་ཡེ་ཤེས་ཀྱི་བྱ་ཁྱུང་སོགས་ཀུ་རུ་བྷྲུྃཿས་མ་ཡཱཿ ཡང་གསང་ཌཱཀྐིའི་ཐུགས་ཐིག་ཆ་ལག་ཏུཿ གཅོད་ཀྱི་ལས་ཚོགས་དམིགས་རིམ་སྐོར་གསུམ་འདིཿ རྨད་བྱུང་ཟབ་གསང་གཏེར་ལ་དབང་བསྒྱུར་བའིཿ རྩོད་བྲལ་གཏེར་ཆེན་ཛྙཱ་ན་དི་པ་ཡེ་ཤེསཿ མཁའ་འགྲོའི་བཀའ་བཞིན་ལེགས་པར་སྤེལ་བ་ལཿ འགྲོ་ཀུན་ཡུམ་ཆེན་རྒྱལ་ས་ཟིན་པར་ཤོགཿ གཅོད་ཡུལ་བསྟན་པ་རྒྱས་པའི་ཤིས་པ་སྩོལ། ཤུབྷཾ།། །།