JKW-KABUM-06-CHA-002-012

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 6, sde tshan 2, Text 12, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 6: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

1 Texts in this Section (sde tshan or chos tshan)

12 198-213	རྒྱུ་དང་འབྲས་བུའི་ཐེག་པའི་མཐར་ཐུག་གི་འབྲས་བུའི་རྣམ་པར་བཞག་པ་ངོ་མཚར་སྣང་བ། rgyu dang 'bras bu'i theg pa'i mthar thug gi 'bras bu'i rnam par bzhag pa ngo mtshar snang ba Detailed Classification - rnam bzhag	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྒྱུ་དང་འབྲས་བུའི་ཐེག་པའི་མཐར་ཐུག་གི་འབྲས་བུའི་རྣམ་པར་བཞག་པ་ངོ་མཚར་སྣང་བ།

རྒྱུ་དང་འབྲས་བུའི་ཐེག་པའི་མཐར་ཐུག་གི་འབྲས་བུའི་རྣམ་པར་བཞག་པ་ངོ་མཚར་སྣང་བ་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ ཐེག་པ་ཆེན་པོ་དང་གསང་སྔགས་ཀྱི་འབྲས་བུའི་ཐོབ་ཚུལ་ཅུང་ཟད་བཤད་ན་གཉིས་ལས། དང་པོ་ནི། སྤོང་ལམ་གྱི་དབང་དུ་བྱས་པ་དག་ལ་ཀུན་ཏུ་འོད་སངས་རྒྱས་ཀྱི་སར་བཞག་ནས་བཤད་པར་བྱ་སྟེ། འདི་སངས་རྒྱས་པ་ངོ་བོ་ཉིད་ཀྱི་སྐུ་རང་བཞིན་དང་། འདིས་སངས་རྒྱས་པ་ཆོས་ཀྱི་སྐུ་བྱང་ཆུབ་ཕྱོགས་མཐུན་ཚད་མེད་པ་ལ་སོགས་པའི་ཡོན་ཏན་གྱིས་ཕྱེ་བ་ཅན་དག་རྫས་དང་ལྡོག་པའི་དབྱེ་བས་གཅིག་དང་ཐ་དད་དུ་སྨྲ་བའི་དབང་གིས་སྐུ་གསུམ་མམ་བཞིར་འདོད་པ་དག་གང་ཡིན་ཡང་རུང་། ངོ་བོ་དངོས་པོ་སྤྱིའམ་སེམས་ཀྱི་རང་བཞིན་དྲི་མ་མེད་པའི་ཡོན་ཏན་དེ་ཉིད་ཀྱིས་ཕྱེ་བས་མངོན་དུ་གྱུར་པ་ནི་དྲི་མ་མཐའ་དག་དག་ཅིང་ཡོན་ཏན་རྣམ་པ་ཐམས་ཅད་པའི་དོན་གྱིས་སངས་རྒྱས་དངོས་ཡིན་ཅིང་། དེ་ནི་སངས་རྒྱས་རང་ཁོ་ནའི་སྤྱོད་ཡུལ་ཅན་ཡིན་པས་སྒྲིབ་པ་དང་བཅས་པ་རྣམས་ཀྱི་སྤྱོད་ཡུལ་དུ་མི་འགྱུར་ལ། འོན་ཀྱང་སངས་རྒྱས་རྣམས་ནི་གཞན་དོན་འབའ་ཞིག་གིས་རབ་ཏུ་ཕྱེ་བའི་ཕྱིར། སྨོན་ལམ་དང་ཐུགས་རྗེའི་འཕེན་པ་ཚད་མེད་པས་ཡིད་བཞིན་གྱི་ནོར་བུས་རེ་བ་བཀང་བ་ལྟར། ཡེ་ཤེས་ཀྱི་སྐུ་དེ་ཉིད་བདག་པོར་གྱུར་པའི་ཚུལ་གྱིས་སྐུ་གསུང་ཐུགས་ཀྱི་སྣང་བརྙན་སེམས་ཅན་རང་གི་རྒྱུད་ཀྱི་ཁྱད་པར་ཡོངས་སུ་སྨིན་པའི་ཉེར་ལེན་ལས་སྣང་བ་དག་འབྱུང་བ་ཡིན་ཏེ། རེ་ཞིག་ཉོན་སྒྲིབ་རྣམ་པར་དག་ཀྱང་། ཤེས་སྒྲིབ་ཀྱིས་བཟུང་བའི་ཁྱད་པར་ཅན་ས་བཅུའི་བྱང་སེམས་དག་ལ་ལོངས་སྤྱོད་རྫོགས་པའི་སྐུ་ངེས་པ་ལྔ་ལྡན་དུ་སྣང་བ་ཡིན་ལ། ཉོན་སྒྲིབ་ཙམ་གྱིས་དག་པའམ། དེས་མ་དག་ཀྱང་སྤྱིར་རྒྱུད་ཡོངས་སུ་དག་པ་དག་ལ། དེའི་ཆ་མཐུན་སྤྲུལ་པའི་སྐུ་གསུང་ཐུགས་དང་མཛད་པའི་ཁྱད་པར་དག་སྣང་ལ། དེ་ལའང་རིགས་ཅན་སོ་སོའི་རྒྱུད་ཀྱི་ཁྱད་པར་ལས། ཐེག་པ་ཆེན་པོ་པ་རྣམས་ལ་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པ། དག་པར་ཆུད་པ་རྣམས་ལ་ཕལ་ཆེན་སོགས་ལས་འབྱུང་བ་ལས་ནི་དམན་ལ། ཉན་རང་ལ་སོགས་པ་ལ་ལྟོས་ཏེ་ནི། དེ་དག་བསམ་གྱིས་ལོངས་པ་དག་སྣང་བ་སྟེ། དེའང་ཉན་ཐོས་རྣམས་ལ་རང་གི་རྒྱུད་ཁོ་ནའི་རྐྱེན་གྱིས་སྡུག་བསྔལ་གྱི་ཕུང་པོའི་ལྷག་མ་ཅན། འཇིག་རྟེན་དང་འཇིག་རྟེན་ལས་འདས་པའི་ཤེས་པ་དག་ཀྱང་མཉམ་པར་བཞག་པ་ལས་མངོན་དུ་མཛད་དེ་ཤེས་བྱ་རིམ་གྱིས་མཁྱེན་པ་ཅན་དང་། མཁྱེན་པ་ཇི་ཙམ་པས་མངོན་རྟགས་སུ་གྱུར་པའི་ཆོས་བདེན་བཞིས་བསྡུས་པ་དག་གསུངས་ཤིང་། ཡོངས་སུ་མྱ་ངན་འདས་པ་ན་ཕུང་པོ་ལྷག་མ་མེད་པའི་དབྱིངས་སུ་ཤེས་བརྗོད་ཀྱི་རྒྱུན་ཆད་དེ་སྙོམས་པར་ཞུགས་པ་ཙམ་དུ་སྣང་ལ། དེ་ལས་ཀྱང་སྐལ་བ་དམན་པ་རང་ཅག་ལྟ་བུ་རྣམས་ལ་ནི་ད་ལྟར་སློབ་དཔོན་གྱི་གཟུགས་སུ་སྣང་བ་ལས་ཆོས་དེ་དང་དེ་སྟོན་པ་ལའང་སངས་རྒྱས་ཀྱི་ཡེ་ཤེས་བདག་པོར་གྱུར་པ་ཡིན་ནོ། །གཉིས་པ་ནི། གོང་མའི་བུམ་དབང་ནས་རྒྱུད་སྡེ་འོག་མའི་བར་བསྒྱུར་བའི་ལམ་དུ་བྱས་པ་དག་ལ། པདྨོ་ཅན་གྱི་སར་བཞག་ནས། དེ་ལའང་བཞི་ལས། དང་པོ་བྱ་བའི་རྒྱུད་དུ་ནི། ལྷའི་རྣལ་འབྱོར་དང་། ལྷ་དེ་དང་དེ་དག་གི་དམ་ཚིག་ཕྱག་རྒྱ་བཅིངས་པ་ལས། གཙོ་བོར་བཟླས་པའི་བསམ་གཏན་གང་ཡང་རུང་བ་ལ་འབད་པ། རིག་པ་འཛིན་པའི་སའི་གནས་ལུས་ལོངས་སྤྱོད་དུ་སྣང་བ་དང་། གཙོ་བོར་གཞན་དོན་གྱི་སྒོ་རྣམས་གཟུངས་ཉིད་དུ་སྣང་བས་བྱེད་ཅིང་། གཞན་དག་ཕྱག་རྒྱས་ཀྱང་འགྲུབ་པ་སྟེ། དེ་ཡང་བདག་གི་དེ་ཁོ་ན་ཉིད་མངོན་དུ་གྱུར་པ་ལས་སྣང་བ་ནི་སྐུ་དང་། གཟུངས་སྔགས་གསུང་། ཕྱག་རྒྱ་ཐུགས་སམ་རང་སའི་སྐུ་གསུམ་མམ་བཞིར་འགྱུར་ལ། དེ་དག་ལྷར་སྣང་བའི་དབང་གཙོ་བོར་བཟུང་བ་ལས་ནི་འཇིག་རྟེན་ལས་འདས་པའི་རིགས་གསུམ་དང་། སྤྲུལ་སྐུའམ་མཛད་པའི་དབྱེ་བས་དེ་དག་གི་འཁོར་འཇིག་རྟེན་པའི་རིགས་གསུམ་སྟེ་དྲུག་གིས་བསྡུས་ཤིང་། དེའི་གཙོ་བོའི་དབང་བསྟན་པ་ཉེ་བར་བཟུང་ནས། རྗོད་བྱེད་གྱི་རྒྱུད་རྣམས་ཀྱང་དྲུག་ལ་སོགས་པར་སྔོན་གྱི་སློབ་དཔོན་རྣམས་ཀྱིས་ཕྱེ་བ་ཡིན་ནོ། །གཉིས་པ་སྤྱོད་རྒྱུད་དུ། འཇིག་རྟེན་པའི་སེམས་བརྒྱ་དྲུག་ཅུ་ལ་སོགས་པ་ལས་ཡང་དག་པར་འདས་ཏེ། མོས་སྤྱོད་པའི་ས་ལ་འཇུག་གནས་ལྡང་གསུམ་མངོན་དུ་བྱས་ཏེ། དེ་ཉིད་ལྷ་དང་སྔགས་ཀྱི་བསམ་གཏན་གཙོ་བོར་གྱུར་པ་དང་སྦྱོར་བ་དག་པ་ལ་འཇུག་པ་སོགས་སུ་གོམས་པ་ལས་ཇི་ལྟར་རིགས་པར་བདེན་པ་མཐོང་ཞིང་། མངོན་ཤེས་ལ་སོགས་པ་གྲུབ་པའི་ས་བཅུར་ཕྱེ་བ་དག་བགྲོད་པའི་མཐར་ཀུན་ཏུ་སངས་རྒྱས་པའི་སར་ཡི་གེ་བཞི་ཡི་རིམ་གྱིས་མངོན་པར་བྱང་ཆུབ་པ་བཞི་མངོན་དུ་བྱས་པ་ལས། སེམས་གསུམ་གྱི་དེ་ཁོ་ན་ཉིད་མངོན་པར་བྱང་ཆུབ་པ་དྲི་མ་མེད་པའི་མཚན་ཉིད་ཅན་ལས། ལམ་དུ་ཇི་ལྟར་བསྒྱུར་བ་དང་མཐུན་པའི་སྐུ་མི་ཟད་པ་སྙིང་རྗེ་ཆེན་པོའི་སྙིང་པོ་ཅན་ཡོན་ཏན་གྱི་ཆོས་མ་ལུས་པ་རྟེན་དང་བརྟེན་པའི་ལྷར་སྣང་བས་རབ་ཏུ་ཕྱེ་བའི་འཁོར་ལོ་སྣང་བ་དང་། གསུང་མི་ཟད་པ་ཡི་གེ་འཁོར་ལོའི་དཀྱིལ་འཁོར་དུ་འབྲས་བུའི་ཡོན་ཏན་ཐམས་ཅད་ཡི་གེའི་དཀྱིལ་འཁོར་དུ་སྣང་བ་དང་། ཐུགས་མི་ཟད་པ་ཕྱག་རྒྱའི་དཀྱིལ་འཁོར་དུ་དེ་དག་ཕྱག་རྒྱར་སྣང་བ་སྟེ། རགས་པའི་སྐུ་གསུམ་མམ་བཞི་ལ་སོགས་པར་ཡང་འགྱུར་ལ། འབྲས་བུའི་དཀྱིལ་འཁོར་གསུམ་པོ་དེ་དག་གི་དབང་ལས་རིགས་ཀྱང་གསུམ་དུ་ཕྱེ་ཞིང་རྗོད་བྱེད་ལ་ཡང་ངོ་། །གསུམ་པ་རྣལ་འབྱོར་གྱི་རྒྱུད་དུ། སྲིད་པ་ཐ་མ་པར་གྱུར་པ་ན་འོག་མིན་དུ་མངོན་བྱང་ལྔ་མངོན་དུ་བྱས་པ་ལས་ལོངས་སྐུར་གྱུར་ཏེ། སྐད་ཅིག་མ་དེ་ཉིད་ཀྱི་ཚེ་ན་དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་རང་བཞིན་གྱིས་འོད་གསལ་བའི་ཡེ་ཤེས་ཀྱི་འབྱུང་གནས་སུ་གྱུར་པའི་བར་གྱིས་ཐོག་མཐའ་མེད་པའི་བྱང་ཆུབ་ཀྱི་སེམས་ཆེན་པོ་མངོན་དུ་གྱུར་ཏེ། རིགས་ཐམས་ཅད་ཀྱི་ཆོས་སྟོན་པ་པོར་དབང་ཐོབ་ནས། ལོངས་སྐུ་ལས་སྤྲུལ་པའི་རིགས་ལྔ་ལས་སྐུ་རྩ་དཀྱིལ། གསུང་ཆོས། ཐུགས་གཟུངས། ཕྲིན་ལས་ལས་ཀྱི་དཀྱིལ་འཁོར་གྱི་བར་དག་དུམ་བུ་བཞིས་འདུལ་བའི་གདུལ་བྱའི་རྒྱུད་དང་འཚམས་པར་རིགས་སོ་སོར་སྣང་ཞིང་། དེ་ཡང་རྒྱས་བསྡུས་བར་གསུམ་ལ་མོས་པའི་ཁྱད་པར་ལས། དཀྱིལ་འཁོར་རྒྱས་པ་དང་། ཕྱག་རྒྱ་བཞི་གཅིག་སོགས་སུ་བྱུང་སྟེ། ཐམས་ཅད་སྐུ་གསུང་ཐུགས་ཕྲིན་ལས་ཀྱི་ཆོས་མཐའ་དག་ལྷ་དང་ཡི་གེ་ལ་སོགས་པར་སྣང་བ་ཉིད་ལམ་དུས་སུ་ལམ་གྱི་ཆོས་མཐའ་དག་དེ་དང་དེར་བསྒྱུར་ཞིང་། གཞི་ལ་ལྟོས་ཏེ་ཉོན་མོངས་བསྒྱུར་བར་ཡང་སོང་བས་ལམ་འབྲས་མངོན་རྟོགས་མཐུན་པར་འབྱུང་ཞིང་། དེ་ཐམས་ཅད་ཀྱང་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབྱེ་བས་རིགས་ལྔར་འདུ་ཞིང་། གདུལ་བྱའི་དབང་གི་དབྱེ་བསྡུའི་རྗོད་བྱེད་དུམ་བུ་བཞིར་གནས་པ་ཡིན་ནོ། །བཞི་པ་རྣལ་འབྱོར་བླ་མེད་ཀྱི་རྒྱུད་དུ། བུམ་དབང་སྣང་སྐབས་ཀྱི་འབྲས་བུའི་སྣང་བ། རང་གི་ཕུང་ཁམས་སྐྱེ་མཆེད་ཁོ་ནའི་གནས་སྐབས་ཀྱི་འཁྲུལ་པ་བསྒྱུར་བ་ལས་བྱུང་བའི་རིགས་གཅིག་ནས། རིགས་བརྒྱའི་བར་གྱི་དཀྱིལ་འཁོར་རྟེན་དང་བརྟེན་པའི་ངོ་བོར་སྣང་བ་དང་། རིགས་དེ་དག་ཀྱང་རྩ་ཁམས་ཀྱི་དབྱེ་བ་ཁོ་ན་ལས་སྣང་བས། དེའི་རླུང་བཅིངས་པ་ལས་བྱུང་བའི་ངག་སྔགས་དང་། ཡིད་རང་སའི་བདེ་སྟོང་དགའ་བའི་མཚན་ཉིད་ཅན་རྣམས་ནི་སྐུ་གསུང་ཐུགས་སམ། སྐུ་གསུམ་དང་བཞིར་ཕྱེ་བ་རང་སའི་དབང་དུ་བྱས་པ་དག་ཡིན་ལ། གསང་བའི་དབང་གི་བྱང་ཆུབ་ནི། ངག་རྡུལ་གྱི་ཆོས་དག་པ་ལ་བཞག་ཕྱིར། ཡི་གེའི་འཁོར་ལོ་ཚོགས་ཆེན་གྱི་ས་སྟེ། རྩ་དག་པའི་བདག་རྐྱེན་གྱི་སྣོད་བཅུད་ཀྱི་སྣང་བ་ཐམས་ཅད་པར་ཤར་བའི་སྣ་ཚོགས་གཟུགས་དང་། གཙོ་བོར་རླུང་དག་པའི་ཆོས་ཕུང་བརྒྱད་ཁྲི་བཞི་སྟོང་ལ་སོགས་པར་འགྱུར་བས་སྐད་རྣམ་པ་ཐམས་ཅད་པའམ་ལོངས་སྐུའི་སྐད་ཅེས་བྱ་ལ། དེ་ཡང་མགོན་པོ་བཞིའི་རྒྱུ་བའི་ངེས་པ་དང་། འཁོར་ལོ་དྲུག་ཡོན་ཏན་གསུམ་གྱིས་ཕྱེ་བ་རྣམས་ལ་སྟོབས་བཅུ། མི་འཇིགས་པ་བཞི། མ་འདྲེས་པ་བཅོ་བརྒྱད་རྣམས་སུ་འཇོག་གོ། །དེ་བཞིན་དུ་ཤེར་དབང་གི་སྐབས། དེ་མཐའ་དག་ཞུ་བའི་བདེ་བ་ཉིད་ཀྱི་རྒྱུ་འབྲས་ཀྱི་ཆོས་ལ་བརྩི་སྟེ། དེ་ཡང་ཐུགས་མི་ཕྱེད་པ་ལྷན་སྐྱེས་ཀྱི་ཆོས་ལ་བཞག་པའི་ཕྱིར། རྡོ་རྗེ་འཆང་བར་བསྙད་ལ། འདི་དག་ཏུ་ནི་འདོད་པའི་གནས་སྐབས་བཅུ་དང་། ཁམས་ལས་བྱུང་བའི་དགའ་བ་སོགས་ཐིག་ལེའི་གནས་སྐབས་བཞི་དང་། འཁོར་ལོ་དྲུག་ཏུ་ཐིམ། ལོངས་སྤྱོད་པའི་བདག་པོའི་ཐིག་ལེའམ། ཡང་ན་དཀར་དམར་དུ་འདྲེས་པའི་དུས་ཉིད་ཀྱི་འབྱུང་བཞི་དག་ཁམས་དྲུག་ཡོན་ཏན་གསུམ་གྱིས་ཕྱེ་བ་རྣམས་ལ་སྟོབས་སོགས་དང་། དེའི་རྟེན་གྱི་ངོས་ནས་མཚན་སོགས་ལྔར་ཕྱེ་བ་དག་སྟེ། རིམ་པ་དེ་འདྲ་བས་སྐུ་བཞིའམ། གསུམ་ལ་སོགས་པར་འགྱུར་རོ། །མྱ་ངན་ལས་འདས་པའི་ཕྱོགས་དབང་བཞི་པའི་ལམ་གྱི་ངེས་པ་ལས་ནི། བདེ་གཤེགས་ཐམས་ཅད་བགྲོད་གཅིག་གི་ལམ་གྱི་འབྲས་བུ་མཐར་ཐུག་པ་ཡེ་ཤེས་བླ་མའི་སའི་ངེས་པ་ཉིད་ཀྱིས། གཞིའི་གནས་ཚུལ་བསལ་བཞག་ཐམས་ཅད་དང་བྲལ་བ་དེ་ཉིད། ཁམས་རླུང་མི་གཡོ་བ་ལས་བྱུང་བའི་འཁྲུལ་པའི་དྲི་མ་ཕྲ་བས་ཀྱང་མ་བསླད་པའི་ངོ་བོ་མངོན་དུ་གྱུར་པ་སྟེ། དེའང་རིས་སུ་མ་ཆད་པས་མཁའ་ལྟར་ཀུན་ལ་ཁྱབ་པ། རང་གི་ངོ་བོ་སྐྱེ་འགག་བྲལ་བ་ཉིད་ཀྱིས་ཟད་པ་མེད་པའང་ཞིང་ཁམས་ཀྱི་རྣམ་པར་དབྱེ་བ་དང་བྲལ་བ་ཤེས་བརྗོད་ཀྱི་ཡུལ་མ་ཡིན་པས་ཞིང་དང་མཛད་པ་སོགས་གྲངས་སུ་བགྲང་བ་ལས་ཡང་དག་པར་འདས་ཤིང་། རྒྱ་ཆད་ཕྱོགས་ལྷུང་མེད་པའི་སེམས་ཀྱི་རང་ཆས་མངོན་དུ་གྱུར་པའི་གནས་སྐབས་ཡིན་པའི་ཕྱིར། སྔར་བསྟན་པའི་ལས་འབྲས་སྲིད་དོ་ཅོག་དང་། དེར་མ་ཟད་བརྟན་གཡོ་ཐམས་ཅད་ཀྱི་ངོ་བོ་བདག་པོར་གྱུར་པ་རྣམས་ཉིད་ཀྱིས་ལྷུན་གྲུབ་ཏུ་འཆར་བ་ཡིན་ནོ། །གནས་སྐབས་སུ་སོ་སོར་བཞག་པ་ཐམས་ཅད་བླ་དང་བཅས་པ་ཞེས་བྱ་ལ། སོ་སོ་དེ་ལྟ་བུ་སྦྱངས་པ་ལས། མཐར་བགྲོད་པ་གཅིག་པའི་ངེས་པར་འབྱུང་བ་གཅིག་པུ་ཉིད་བདེ་བ་ཆེན་པོའི་ས་ཞེས་བྱ་ལ། གཞི་ཡི་གནས་སྐབས་ཀྱི་འཁྲུལ་པ་བཞི་རྣམ་པར་དག་པ་བྱས་པ་ལས་གདོད་མའི་སྒྲིབ་པ་མེད་པ་སོགས་མངོན་དུ་གྱུར་པ་ཉིད་ལ། ཇི་ལྟར་རིགས་པར་རིམ་པ་བཞིན་དུ་སྒྱུ་འཕྲུལ་དྲྭ་བ་དང་། རྣམ་པ་ཉི་ཤུ་དང་། རྣམ་པ་ལྔ་དང་། སྐད་ཅིག་གཅིག་གིས་བྱང་ཆུབ་པའི་མཚན་ཉིད་ཅན་གྱི་སྐུ་བཞི་དང་། དམ་ཚིག་སེམས་དཔའ་ལ་སོགས་པའི་སེམས་དཔའ་བཞི་དང་། གཞི་ལམ་རྣམ་པར་དག་པ་རྣམ་པ་ཐམས་ཅད་མཁྱེན་པ་ཉིད་དམ། རྡོ་རྗེ་བཞིའི་དབྱེ་བས་སྐུ་བཞིར་ཡང་རྣམ་པར་བཞག་པ་སྟེ། མདོར་ན་སེམས་ཀྱི་ཐབས་ཡན་ལག་བདུན་ལྡན་སྒྲིབ་བྲལ་དེ་ཉིད་མངོན་དུ་གྱུར་པ་ལས་སྐུ་གསུང་ཐུགས་རྣམ་པ་ཐམས་ཅད་པར་འཆར་ཞིང་། ཕྲིན་ལས་རྣམ་པ་ཐམས་ཅད་པ་འཁོར་བ་ཇི་སྲིད་དུ་འབྱུང་ལ། རང་གི་ངོ་བོ་ཉིད་ལ་བཞག་པ་ཐམས་ཅད་བྲལ་ཞིང་ཅི་ཡང་འབྱུང་བ་མེད་པ་ཞེས་བྱ་བ་ཡིན་ནོ། །འདི་ལྟར་མཉམ་སྦྱོར་གྱི་ཊཱི་ཀར། སངས་རྒྱས་ཀྱི་ས་ཀུན་ཏུ་འོད་དང་། པདྨོ་ཅན་དང་། ཡི་གེའི་འཁོར་ལོ་ཚོགས་ཆེན་གྱི་ས་དང་། རྡོ་རྗེ་འཆང་དབང་དང་། ཡེ་ཤེས་བླ་མའི་ས་དང་། བདེ་བ་ཆེན་པོའི་ས་རྣམས་རིམ་པ་བཞིན་དུ་སྦྱངས་ཤིང་། གཅིག་ཅར་ཐོབ་པའོ། །ཞེས་དང་། མཚན་བརྗོད་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་སོ།། །། ༈

རྒྱུད་སྡེ་བཞི་ལས། དང་པོ་བྱ་རྒྱུད་ཀྱི་ལམ་རིམ་ནི། རྟེན་གྱི་གང་ཟག་སོར་སྡོམ་དང་། བྱང་སེམས་ཀྱིས་རྒྱུད་སྦྱངས་པ་ཞིག་སྤྱོད་པ་གསུམ་པོ་ཉམས་སུ་བླངས་པ་སྟེ། འདི་ཕར་ཕྱིན་དུ་མ་བཤད་ཅིང་། ཕར་ཕྱིན་ལས་བཤད་པའི་ལམ་ཐམས་ཅད་ཀྱི་སྟེང་། འདི་ལྷག་པར་བརྒལ་ནས་ཉམས་སུ་བླངས་པས་འབྲས་བུ་འགྲུབ་པ་ཡིན་པ་ལ་ཁྱད་པར་དུ་འཕགས་སོ། །དེ་ལ་དང་པོ་འཇུག་པའི་སྤྱོད་པ་ནི། སྤྱི་རྒྱུད་ནས་གསུངས་པའི་ཆོ་ག་རིགས་གསུམ་སྤྱིའམ། སོ་སོའི་དཀྱིལ་འཁོར་དུ་དབང་བསྐུར་ནས་སྔགས་ཀྱི་སྡོམ་ལྡན་དུ་བྱེད་པ་དང་། སྦྱོར་བའི་སྤྱོད་པ་ནི། བདག་གི་དེ་ཁོ་ན་ཉིད་སྟོང་པ་སྔོན་དུ་འགྲོ་བར་བྱས། མདུན་དུ་རང་འདོད་པའི་དཀྱིལ་འཁོར་གྱི་ལྷ་ཚོགས་སྤྱན་དྲངས། དེ་ལ་མཆོད་བསྟོད་སོགས་མཚན་བཅས་ཀྱི་རྣལ་འབྱོར་ཉམས་སུ་ལེན་པ་དང་། སྒྲུབ་པའི་སྤྱོད་པ་ནི། བསམ་གཏན་ཕྱི་མ་ལས་གསུངས་པ་ལྟར། མཐུན་རྐྱེན་འཛོམ་པའི་གནས་སུ་འགལ་རྐྱེན་སྤངས་ནས། མེར་གནས། སྒྲ་གནས། སྒྲ་མཐའི་དེ་ཉིད་སོགས་མཚན་མེད་ཀྱི་ཏིང་འཛིན་ཉམས་སུ་ལེན་པ་སྟེ། དེ་ལྟར་སྤྱོད་པ་དང་པོས་རྟེན་གྱི་གང་ཟག་དང་། ཕྱི་མས་ལམ་དངོས་བསྟན་ལ། གཉིས་པོ་དེས་གནས་སྐབས་ཀྱི་འབྲས་བུ་ས་དང་པོའི་བར་དུ་བསྒྲུབས་ནས། མཐར་ཐུག་གི་འབྲས་བུ་བྲལ་སྨིན་གྱི་ཡོན་ཏན་དྲུག་ཅུ་རྩ་བཞིས་བརྒྱན་པའི་སྐུ་གསུམ་ཐོབ་པར་བཤད་དོ། །གཉིས་པ་སྤྱོད་རྒྱུད་ཀྱི་ལམ་རིམ་ནི། རྒྱུ་རྟེན་གྱི་གང་ཟག །རྐྱེན་ལམ་གྱི་རིམ་པ། འབྲས་བུ་སངས་རྒྱས་ཀྱི་སའོ། །དང་པོ་ནི། རིགས་ཀྱི་གཙོ་བོ་ལུས་ངག་ཡིད་གསུམ་ཕུན་སུམ་ཚོགས་པ་གསུམ་དང་ལྡན་པའོ། །གཉིས་པ་ལ་ཕར་ཕྱིན་གྱི་ལམ་གྱིས་རྒྱུད་སྦྱངས་པ་དང་། དེ་ནས་རྒྱུད་ལ་འཇུག་པའི་ཚུལ་གཉིས། དང་པོ་ནི། ཐོག་མར་འདིར་འཇུག་པ་ལ་བྱང་ཆུབ་ཀྱི་སེམས་དང་། ཕར་ཕྱིན་དྲུག་སོགས་ཀྱིས་རྒྱུད་སྦྱངས་པ། ཕྱི་མ་ངེས་པར་དགོས་པ་ཕྱག་ན་རྡོ་རྗེ་དབང་བསྐུར་བའི་རྒྱུད་དུ་གསུངས་སོ། །གཉིས་པ་ལ་སྤྱོད་པ་གསུམ་སྟེ། དང་པོ་ལ་ཕྱི་འཇུག་དཀྱིལ་འཁོར་དུ་ཞུགས་ཤིང་དབང་བླངས་པར་དམ་ཚིག་དང་སྡོམ་པ་ལ་གནས་པར་བྱ་བ་དང་། ནང་འཇུག་ལ་མཚན་བཅས་འཇིག་རྟེན་དང་། མཚན་མེད་འདས་པའི་རྣལ་འབྱོར་གཉིས། དེ་ལ་མཚན་མེད་ནི་ངོ་བོ་ཉིད་མེད་པར་རྟོགས་པའི་ཏིང་འཛིན་ལ་སེམས་ཇི་སྲིད་འདོད་ཀྱི་བར་དུ་གནས་པའོ། །མཚན་བཅས་ནི། ཐོག་མར་བདག་གནས་རྣལ་འབྱོར་སྲུང་བ་སོགས་སྔོན་དུ་འགྲོ་བའི་བདག་གི་སྒོ་ནས་བདག་གི་དེ་ཁོ་ན་སྟོང་པ་ཉིད་བསྒོམས་ཏེ། དེའང་སྒྱུ་མ་ལྟ་བུ་དང་། ནམ་མཁའ་ལྟ་བུ་རིམ་བཞིན་བསྒོམས་ནས་རང་བཞིན་མེད་པར་གཏན་ལ་ཕབ་པའོ། །དེ་ནས་ལྷའི་སྐུར་བསྐྱེད་ལ་སྔགས་དང་ཕྱག་རྒྱ་ལ་སོགས་པས་བྱིན་གྱིས་བརླབ། དེ་ནས་གཞི་གཉིས་པ་རང་གི་མདུན་དུ་སངས་རྒྱས་ཀྱི་སྐུ་བསྐྱེད་པའི་ཐུགས་ཀར་སྔགས་བཀོད་ནས་ཏིང་ངེ་འཛིན་བརྟན་པར་བྱེད་པའོ། །སྦྱོར་བའི་སྤྱོད་པ་ལའང་། མཚན་བཅས་ཕྱིའི་བཟླས་བརྗོད་ཡན་ལག་བཞི་དང་། ནང་གི་བཟླས་བརྗོད་ཡན་ལག་བཞི་རྣམས་ཡིན་ལ། མཚན་མེད་ལྷའི་སྐུ་ཡང་བཏགས་པ་ཙམ་དུ་ཤེས་པར་བྱས་ནས་རང་རིག་པ་ཙམ་ལ་གནས་ནས་ཡིད་བཟླས་བྱེད་པའོ། །སྒྲུབ་པའི་སྤྱོད་པ་ལས། ཕྱིའི་དངོས་གྲུབ་རལ་གྲི་ལ་སོགས་པའི་རྫས་བླངས་ནས་རིག་པ་འཛིན་པ་ལ་སོགས་པའི་དངོས་གྲུབ་སྒྲུབ་པ་ཡིན་ལ། ནང་གི་དངོས་གྲུབ་ནི། ནང་གི་འབྱུང་བཞིའི་དཀྱིལ་འཁོར་བསྒོམས་པས་མངོན་ཤེས་ཉེར་ལྔ་དང་། ཞར་ལ་མཚན་བཅས་ཀྱི་དངོས་གྲུབ་རྣམས་ཀྱང་འགྲུབ་བོ། །འབྲས་བུ་སངས་རྒྱས་ཀྱི་ས་ནི། གང་གིས་སྒྲུབ་པའི་རྒྱུ་དང་། དེས་གྲུབ་པའི་འབྲས་བུ་གཉིས། དང་པོ་ནི། སྤྱིར་རྒྱུའི་གཙོ་བོ་གསུམ་དང་། ཁྱད་པར་ཆོས་ཀྱི་འདུ་ཤེས་བརྒྱད་ཀྱིས་འཇིག་རྟེན་ལས་འདས་པའི་ལམ་འཇུག་ཅིང་། དེ་ནས་འཇིག་རྟེན་འདས་པའི་ལམ་འགྲུབ་པའི་ཚུལ་དང་། དབང་རྟུལ་གང་ཟག་གི་བདག་མེད་རྟོགས་པའི་དང་། དབང་རྣོན་ཆོས་ཀྱི་བདག་མེད་རྟོགས་པའི་སྒོ་ནས་འཇུག་པ་གཉིས། དང་པོ་ནི། འཇིག་རྟེན་པའི་སེམས་བརྒྱ་དང་དྲུག་ཅུ་བསྐལ་པ་གསུམ་གྱིས་འདས་པའི་གང་ཟག་གི་བདག་མེད་རྟོགས་པའི་སེམས་སྐྱེ་བ་ཡིན་ལ། དབང་རྣོན་ནི་བསྐལ་པ་གཉིས་ཀྱིས་འཇིག་རྟེན་ལས་འདས་པ་ཆོས་ཀྱི་བདག་མེད་རྟོགས་པའི་སེམས་སྐྱེ་བ་ཡིན་ནོ། །དེ་ནས་སེམས་དེ་ཉིད་ཀྱིས་ས་བཅུ་པའི་བར་དུ་བགྲོད་པ་ནི་རྒྱུའོ། །གཉིས་པ་ནི། དཔའ་བོ་ཆེན་པོས་ཏིང་ངེ་འཛིན་གྱིས་བདུད་བཞི་བཅོམ་སྟེ་ཁམས་གསུམ་ལས་འདས་ཏེ་འོག་མིན་སྟུག་པོ་བཀོད་པར་མངོན་བྱང་ལྔའི་ཚུལ་གྱིས་སངས་རྒྱས་པར་བཤད་དོ། །གསུམ་པ་རྣལ་འབྱོར་གྱི་རྒྱུད་ཀྱི་མངོན་རྟོགས་ནི། རྒྱུ་རྒྱུད། ཐབས་རྒྱུད། འབྲས་རྒྱུད་གསུམ་སྟེ། དང་པོ་ནི། ཐོག་མ་དང་ཐ་མ་མེད་པའི་བྱང་ཆུབ་ཀྱི་སེམས་རང་བཞིན་གྱི་འོད་གསལ་བ་ཉིད་ཡིན་ལ། དེ་ནི་རྒྱུན་མི་འཆད་པས་རྒྱུད་དོ། །གཉིས་པ་ནི། རང་བཞིན་གྱི་དྲི་མ་བྲལ་བ་དེ་མངོན་དུ་བྱེད་པའི་ཐབས་ཤེས་ཀྱི་རྣལ་འབྱོར་ཡན་ལག་དང་བཅས་པ་སྟེ། འདི་ལ་སློབ་མའི་དང་། སློབ་དཔོན་གྱི་རིགས་ཅན་གྱི་ལམ་གཉིས་ལས། དང་པོ་ནི། རིག་པའི་དབང་ཙམ་སྟེར་ཞིང་། དེ་ཡང་སྦྱང་བ་མ་བྱས་ན་དམ་ཚིག་འཛིན་མི་ནུས་པས་དམ་ཚིག་མི་སྦྱིན་ཅིང་། ཡི་དམ་གྱི་སྒོམ་བཟླས་ཙམ་སྦྱིན། སྦྱང་བ་བྱས་པ་ནི། དེ་དང་འབྲེལ་བའི་དམ་ཚིག་ཀྱང་བསྲུངས་ནུས་པས་དམ་ཚིག་སྦྱིན། དངོས་གྲུབ་ཀྱི་ཡེ་ཤེས་གང་འདོད་པ་ལ་སློབ་ཏུ་འཇུག །གཉིས་པ་ནི། རྡོ་རྗེ་སློབ་དཔོན་དུ་དབང་བསྐུར་བའང་བྱ་ཞིང་། དེ་ནས་རྗེས་སུ་འབྲེལ་བའི་དམ་ཚིག་ལ་བསླབ་པ་དང་། དཀྱིལ་འཁོར་དང་ལྷའི་དེ་ཁོ་ན་ཉིད་བཅུ་ལ་བསླབ་པ་དང་། སློབ་མ་གཞུག་པ་སོགས་སློབ་དཔོན་གྱི་ལས་དང་། དངོས་གྲུབ་ཀྱི་ཡེ་ཤེས་དང་། ཕྱག་རྒྱའི་ཡེ་ཤེས་དང་། རྩ་བའི་རྒྱུད་དང་། ཕྱི་མ་དང་། ཕྱི་མ་ཕྱི་མའི་རྒྱུད་ལ་སོགས་པའི་སྒྲུབ་པའི་ཚུལ་ཐམས་ཅད་ལ་བསླབ་པར་བྱ་བའོ། །འབྲས་བུའི་རྒྱུད་ནི། གནས་སྐབས་སུ་དངོས་གྲུབ་ནི་ཡེ་ཤེས་ཇི་ལྟར་འདོད་པ་ལ་སྦྱོར་ཞིང་། མཐར་ཐུག་ཁམས་གསུམ་ལས་འདས་པའི་འོག་མིན་ཆེན་པོར་མངོན་བྱང་ལྔའི་ཆོ་འཕྲུལ་སྐུ་བཞི་དབྱེར་མེད་པའི་གོ་འཕང་བརྙེས་པའོ། །བཞི་པ་བླ་མེད་ཀྱི་རྒྱུད་ལ་སློབ་དཔོན་གྱིས་མངོན་པར་རྟོགས་པ་ལས། དང་པོ་ཕ་རྒྱུད་གསང་འདུས་ལ། ཤྲདྡྷ་ཝ་རྨས་རྒྱུ་ཐབས་འབྲས་བུའི་རྒྱུད་གསུམ་གྱི་མངོན་རྟོགས་དང་། སློབ་དཔོན་ཀླུ་སྒྲུབ་ཀྱིས་རིམ་པ་དྲུག་གམ། ལྔའམ། གཉིས་ཀྱི་མངོན་རྟོགས་དང་། འཕགས་པ་ལྷས་གང་ཟག་གི་རིམ་པ་འཇུག་ཚུལ་དང་བསྟུན་པའི་མངོན་རྟོགས་དགུ་དང་། སློབ་དཔོན་སྐལ་བཟང་རྡོ་རྗེས། སྨིན་བྱེད་དབང་། གྲོགས་དམ་ཚིག །རྒྱུད་ཀྱི་བཤད་པ། བྱང་ཆུབ་འགྲུབ་པའི་རྒྱུ་བྱང་སེམས། མཐར་ཕྱིན་པའི་ཐབས་སྤྱོད་པ་སྟེ་ལྔ་གཞི་ལམ་འབྲས་གསུམ་གྱིས་བསྡུས་པར་འཆད་པ་དང་། སློབ་དཔོན་ལེགས་ལྡན་འབྱེད་ཀྱིས། ལམ་རྒྱུད་ཀྱི་མངོན་པར་རྟོགས་པ། སྨིན་བྱེད་དབང་བཞི། གྲོལ་བྱེད་བསྐྱེད་རིམ། རྫོགས་རིམ་རིམ་ལྔ། སྤྱོད་པ་གསུམ། འབྲས་བུ་མཆོག་ཐུན་གཉིས་སུ་བསྡུས་ཏེ་བཤད་པ་དང་། དགྲ་ནག་གི་འགྲེལ་པར། དབང་། དམ་ཚིག །བསྙེན་པ་དང་། སྒྲུབ་པ། འབྲས་བུ་དང་ལས་ཚོགས་ཏེ་གཞི་ལམ་འབྲས་གསུམ་གྱིས་བསྡུས་པའི་མངོན་རྟོགས་དྲུག་ཏུ་བཤད་པ་སོགས་སོ། །གཉིས་པ་མ་རྒྱུད་བདེ་མཆོག་ལ། གྲུབ་ཆེན་ལཱུ་ཧི་པས། རྣལ་འབྱོར་ཀུན་སྤྱོད་ཀྱི་རྒྱུད་ལ་བརྟེན་ནས། སྔོན་དུ་འགྲོ་བ་ཉམས་སུ་ལེན་པ་དང་གང་ཟག་གི་ཀུན་སྤྱོད། དེས་ཉམས་སུ་བླང་བ་ལམ་གྱི་ཀུན་སྤྱོད་དེས་གྲུབ་པ་འབྲས་བུའི་ཀུན་སྤྱོད་དེ་སྤྱིའི་མངོན་རྟོགས་གསུམ་གྱི། དང་པོ་ལ་གང་ཟག་དྲུག་དང་། གཉིས་པ་ལམ་ལ་ལམ་གྱི་གཙོ་བོ་སྐུ་གསུམ་ལམ་བྱེད་ཀྱི་མངོན་རྟོགས་དང་། ཡན་ལག་ལ་དང་པོ་གཉིས་རྫོགས་པར་བྱེད་པའི་ཡན་ལག་ལྔ་དང་། གསུམ་ཀ་རྫོགས་བྱེད་ཀྱི་ཡན་ལག་ལྔ་སྟེ་བཅུ། གསུམ་པ་འབྲས་བུ་ལ། མཆོག་དང་། ཐུན་མོང་དང་། ཕྱག་རྒྱ་ཆེན་པོའི་མངོན་རྟོགས་གསུམ་སྟེ། ཉི་ཤུ་རྩ་གཉིས་སུ་འབྱེད་པར་གསུངས་པ་དང་། སློབ་དཔོན་ནག་པོ་སྤྱོད་པས་སྦྱིན་བྱ་དབང་བཞི། ཉམས་སུ་བླང་བྱ་རིམ་གཉིས་གྲོགས་དང་བཅས་པ་དང་། ཉམས་སུ་བླངས་པ་ལས་བྱུང་བའི་འབྲས་བུ་སྟེ་མངོན་རྟོགས་གསུམ་དུ་བསྟེན་པ་སོགས་བསམ་གྱིས་མི་ཁྱབ་ལ། གསུམ་པ་ཐབས་དང་ཤེས་རབ་གཉིས་སུ་མེད་པའི་རྒྱུད་དཔལ་ཀྱེ་རྡོ་རྗེ་ལ། གཙོ་བོར་སློབ་དཔོན་ཌོམྦྷི་ཧེ་རུ་ཀས་རྒྱུད་གསུམ་ལས་ཕྱེ་བའི་མངོན་རྟོགས་སུམ་ཅུ་རྩ་བརྒྱད་དང་། སློབ་དཔོན་ནག་པོ་པ་རྗེས་འབྲངས་དང་བཅས་པས། རྒྱུད་གསུམ་ལ་ལམ་གྱི་དངོས་གཞི་ཕར་ཕྱིན་དང་ཐུན་མོང་དུ་བྱེད་པའི་ཚེ་མངོན་པར་རྟོགས་པ་ལྔ་བཅུ་རྩ་བདུན། དངོས་གཞི་རིམ་གཉིས་ལ་བཞག་པའི་ཚེ་ལྔ་བཅུ་རྩ་དྲུག །ཡང་རྒྱུད་གསུམ་ལས་མངོན་རྟོགས་འབྱེད་ཚུལ་གཞན་ལྔ་བཅུར་བྱེད་པ་སྟེ་གསུམ་དུ་བཞེད་པ་དང་། དུས་ཀྱི་འཁོར་ལོར་འཇུག་པའི་རིམ་པ་དང་བསྟུན། འཇིག་རྟེན་གྱི་ཁམས། ནང་རྡོ་རྗེའི་ལུས། གཞན་ཡང་བཅུ་གཅིག་སྔོན་དུ་འགྲོ་བ་ལ། ཐུན་མོང་དང་མཆོག་གི་དངོས་གྲུབ་བསྒྲུབ་པའི་ཕྱིར་བསྐྱེད་པའི་རིམ་པ་ཡན་ལག་བཞི་དང་། རྫོགས་པའི་རིམ་པ་སྦྱོར་བ་ཡན་ལག་དྲུག་ཏུ་བསྟན་པ་སོགས་སོ། །ཤུ་བྷཾ།། །། ༈

[edit]

rgyu dang 'bras bu'i theg pa'i mthar thug gi 'bras bu'i rnam par bzhag pa ngo mtshar snang ba/ rgyu dang 'bras bu'i theg pa'i mthar thug gi 'bras bu'i rnam par bzhag pa ngo mtshar snang ba zhes bya ba bzhugs so/__/na mo gu ru b+h+yaH__theg pa chen po dang gsang sngags kyi 'bras bu'i thob tshul cung zad bshad na gnyis las/__dang po ni/__spong lam gyi dbang du byas pa dag la kun tu 'od sangs rgyas kyi sar bzhag nas bshad par bya ste/__'di sangs rgyas pa ngo bo nyid kyi sku rang bzhin dang /__'dis sangs rgyas pa chos kyi sku byang chub phyogs mthun tshad med pa la sogs pa'i yon tan gyis phye ba can dag rdzas dang ldog pa'i dbye bas gcig dang tha dad du smra ba'i dbang gis sku gsum mam bzhir 'dod pa dag gang yin yang rung /__ngo bo dngos po spyi'am sems kyi rang bzhin dri ma med pa'i yon tan de nyid kyis phye bas mngon du gyur pa ni dri ma mtha' dag dag cing yon tan rnam pa thams cad pa'i don gyis sangs rgyas dngos yin cing /__de ni sangs rgyas rang kho na'i spyod yul can yin pas sgrib pa dang bcas pa rnams kyi spyod yul du mi 'gyur la/__'on kyang sangs rgyas rnams ni gzhan don 'ba' zhig gis rab tu phye ba'i phyir/__smon lam dang thugs rje'i 'phen pa tshad med pas yid bzhin gyi nor bus re ba bkang ba ltar/__ye shes kyi sku de nyid bdag por gyur pa'i tshul gyis sku gsung thugs kyi snang brnyan sems can rang gi rgyud kyi khyad par yongs su smin pa'i nyer len las snang ba dag 'byung ba yin te/__re zhig nyon sgrib rnam par dag kyang /__shes sgrib kyis bzung ba'i khyad par can sa bcu'i byang sems dag la longs spyod rdzogs pa'i sku nges pa lnga ldan du snang ba yin la/__nyon sgrib tsam gyis dag pa'am/__des ma dag kyang spyir rgyud yongs su dag pa dag la/__de'i cha mthun sprul pa'i sku gsung thugs dang mdzad pa'i khyad par dag snang la/__de la'ang rigs can so so'i rgyud kyi khyad par las/__theg pa chen po pa rnams la sku gsung thugs kyi gsang ba bsam gyis mi khyab pa/__dag par chud pa rnams la phal chen sogs las 'byung ba las ni dman la/__nyan rang la sogs pa la ltos te ni/__de dag bsam gyis longs pa dag snang ba ste/__de'ang nyan thos rnams la rang gi rgyud kho na'i rkyen gyis sdug bsngal gyi phung po'i lhag ma can/__'jig rten dang 'jig rten las 'das pa'i shes pa dag kyang mnyam par bzhag pa las mngon du mdzad de shes bya rim gyis mkhyen pa can dang /__mkhyen pa ji tsam pas mngon rtags su gyur pa'i chos bden bzhis bsdus pa dag gsungs shing /__yongs su mya ngan 'das pa na phung po lhag ma med pa'i dbyings su shes brjod kyi rgyun chad de snyoms par zhugs pa tsam du snang la/__de las kyang skal ba dman pa rang cag lta bu rnams la ni da ltar slob dpon gyi gzugs su snang ba las chos de dang de ston pa la'ang sangs rgyas kyi ye shes bdag por gyur pa yin no/__/gnyis pa ni/__gong ma'i bum dbang nas rgyud sde 'og ma'i bar bsgyur ba'i lam du byas pa dag la/__pad+mo can gyi sar bzhag nas/__de la'ang bzhi las/__dang po bya ba'i rgyud du ni/__lha'i rnal 'byor dang /__lha de dang de dag gi dam tshig phyag rgya bcings pa las/__gtso bor bzlas pa'i bsam gtan gang yang rung ba la 'bad pa/__rig pa 'dzin pa'i sa'i gnas lus longs spyod du snang ba dang /__gtso bor gzhan don gyi sgo rnams gzungs nyid du snang bas byed cing /__gzhan dag phyag rgyas kyang 'grub pa ste/__de yang bdag gi de kho na nyid mngon du gyur pa las snang ba ni sku dang /__gzungs sngags gsung /__phyag rgya thugs sam rang sa'i sku gsum mam bzhir 'gyur la/__de dag lhar snang ba'i dbang gtso bor bzung ba las ni 'jig rten las 'das pa'i rigs gsum dang /__sprul sku'am mdzad pa'i dbye bas de dag gi 'khor 'jig rten pa'i rigs gsum ste drug gis bsdus shing /__de'i gtso bo'i dbang bstan pa nye bar bzung nas/__rjod byed gyi rgyud rnams kyang drug la sogs par sngon gyi slob dpon rnams kyis phye ba yin no/__/gnyis pa spyod rgyud du/__'jig rten pa'i sems brgya drug cu la sogs pa las yang dag par 'das te/__mos spyod pa'i sa la 'jug gnas ldang gsum mngon du byas te/__de nyid lha dang sngags kyi bsam gtan gtso bor gyur pa dang sbyor ba dag pa la 'jug pa sogs su goms pa las ji ltar rigs par bden pa mthong zhing /__mngon shes la sogs pa grub pa'i sa bcur phye ba dag bgrod pa'i mthar kun tu sangs rgyas pa'i sar yi ge bzhi yi rim gyis mngon par byang chub pa bzhi mngon du byas pa las/__sems gsum gyi de kho na nyid mngon par byang chub pa dri ma med pa'i mtshan nyid can las/__lam du ji ltar bsgyur ba dang mthun pa'i sku mi zad pa snying rje chen po'i snying po can yon tan gyi chos ma lus pa rten dang brten pa'i lhar snang bas rab tu phye ba'i 'khor lo snang ba dang /__gsung mi zad pa yi ge 'khor lo'i dkyil 'khor du 'bras bu'i yon tan thams cad yi ge'i dkyil 'khor du snang ba dang /__thugs mi zad pa phyag rgya'i dkyil 'khor du de dag phyag rgyar snang ba ste/__rags pa'i sku gsum mam bzhi la sogs par yang 'gyur la/__'bras bu'i dkyil 'khor gsum po de dag gi dbang las rigs kyang gsum du phye zhing rjod byed la yang ngo /__/gsum pa rnal 'byor gyi rgyud du/__srid pa tha ma par gyur pa na 'og min du mngon byang lnga mngon du byas pa las longs skur gyur te/__skad cig ma de nyid kyi tshe na de bzhin gshegs pa thams cad kyi mnyam pa nyid rang bzhin gyis 'od gsal ba'i ye shes kyi 'byung gnas su gyur pa'i bar gyis thog mtha' med pa'i byang chub kyi sems chen po mngon du gyur te/__rigs thams cad kyi chos ston pa por dbang thob nas/__longs sku las sprul pa'i rigs lnga las sku rtsa dkyil/__gsung chos/__thugs gzungs/__phrin las las kyi dkyil 'khor gyi bar dag dum bu bzhis 'dul ba'i gdul bya'i rgyud dang 'tshams par rigs so sor snang zhing /__de yang rgyas bsdus bar gsum la mos pa'i khyad par las/__dkyil 'khor rgyas pa dang /__phyag rgya bzhi gcig sogs su byung ste/__thams cad sku gsung thugs phrin las kyi chos mtha' dag lha dang yi ge la sogs par snang ba nyid lam dus su lam gyi chos mtha' dag de dang der bsgyur zhing /__gzhi la ltos te nyon mongs bsgyur bar yang song bas lam 'bras mngon rtogs mthun par 'byung zhing /__de thams cad kyang sku gsung thugs yon tan phrin las kyi dbye bas rigs lngar 'du zhing /__gdul bya'i dbang gi dbye bsdu'i rjod byed dum bu bzhir gnas pa yin no/__/bzhi pa rnal 'byor bla med kyi rgyud du/__bum dbang snang skabs kyi 'bras bu'i snang ba/__rang gi phung khams skye mched kho na'i gnas skabs kyi 'khrul pa bsgyur ba las byung ba'i rigs gcig nas/__rigs brgya'i bar gyi dkyil 'khor rten dang brten pa'i ngo bor snang ba dang /__rigs de dag kyang rtsa khams kyi dbye ba kho na las snang bas/__de'i rlung bcings pa las byung ba'i ngag sngags dang /__yid rang sa'i bde stong dga' ba'i mtshan nyid can rnams ni sku gsung thugs sam/__sku gsum dang bzhir phye ba rang sa'i dbang du byas pa dag yin la/__gsang ba'i dbang gi byang chub ni/__ngag rdul gyi chos dag pa la bzhag phyir/__yi ge'i 'khor lo tshogs chen gyi sa ste/__rtsa dag pa'i bdag rkyen gyi snod bcud kyi snang ba thams cad par shar ba'i sna tshogs gzugs dang /__gtso bor rlung dag pa'i chos phung brgyad khri bzhi stong la sogs par 'gyur bas skad rnam pa thams cad pa'am longs sku'i skad ces bya la/__de yang mgon po bzhi'i rgyu ba'i nges pa dang /__'khor lo drug yon tan gsum gyis phye ba rnams la stobs bcu/__mi 'jigs pa bzhi/__ma 'dres pa bco brgyad rnams su 'jog go/__/de bzhin du sher dbang gi skabs/__de mtha' dag zhu ba'i bde ba nyid kyi rgyu 'bras kyi chos la brtsi ste/__de yang thugs mi phyed pa lhan skyes kyi chos la bzhag pa'i phyir/__rdo rje 'chang bar bsnyad la/__'di dag tu ni 'dod pa'i gnas skabs bcu dang /__khams las byung ba'i dga' ba sogs thig le'i gnas skabs bzhi dang /__'khor lo drug tu thim/__longs spyod pa'i bdag po'i thig le'am/__yang na dkar dmar du 'dres pa'i dus nyid kyi 'byung bzhi dag khams drug yon tan gsum gyis phye ba rnams la stobs sogs dang /__de'i rten gyi ngos nas mtshan sogs lngar phye ba dag ste/__rim pa de 'dra bas sku bzhi'am/__gsum la sogs par 'gyur ro/__/mya ngan las 'das pa'i phyogs dbang bzhi pa'i lam gyi nges pa las ni/__bde gshegs thams cad bgrod gcig gi lam gyi 'bras bu mthar thug pa ye shes bla ma'i sa'i nges pa nyid kyis/__gzhi'i gnas tshul bsal bzhag thams cad dang bral ba de nyid/__khams rlung mi g.yo ba las byung ba'i 'khrul pa'i dri ma phra bas kyang ma bslad pa'i ngo bo mngon du gyur pa ste/__de'ang ris su ma chad pas mkha' ltar kun la khyab pa/__rang gi ngo bo skye 'gag bral ba nyid kyis zad pa med pa'ang zhing khams kyi rnam par dbye ba dang bral ba shes brjod kyi yul ma yin pas zhing dang mdzad pa sogs grangs su bgrang ba las yang dag par 'das shing /__rgya chad phyogs lhung med pa'i sems kyi rang chas mngon du gyur pa'i gnas skabs yin pa'i phyir/__sngar bstan pa'i las 'bras srid do cog dang /__der ma zad brtan g.yo thams cad kyi ngo bo bdag por gyur pa rnams nyid kyis lhun grub tu 'char ba yin no/__/gnas skabs su so sor bzhag pa thams cad bla dang bcas pa zhes bya la/__so so de lta bu sbyangs pa las/__mthar bgrod pa gcig pa'i nges par 'byung ba gcig pu nyid bde ba chen po'i sa zhes bya la/__gzhi yi gnas skabs kyi 'khrul pa bzhi rnam par dag pa byas pa las gdod ma'i sgrib pa med pa sogs mngon du gyur pa nyid la/__ji ltar rigs par rim pa bzhin du sgyu 'phrul drwa ba dang /__rnam pa nyi shu dang /__rnam pa lnga dang /__skad cig gcig gis byang chub pa'i mtshan nyid can gyi sku bzhi dang /__dam tshig sems dpa' la sogs pa'i sems dpa' bzhi dang /__gzhi lam rnam par dag pa rnam pa thams cad mkhyen pa nyid dam/__rdo rje bzhi'i dbye bas sku bzhir yang rnam par bzhag pa ste/__mdor na sems kyi thabs yan lag bdun ldan sgrib bral de nyid mngon du gyur pa las sku gsung thugs rnam pa thams cad par 'char zhing /__phrin las rnam pa thams cad pa 'khor ba ji srid du 'byung la/__rang gi ngo bo nyid la bzhag pa thams cad bral zhing ci yang 'byung ba med pa zhes bya ba yin no/__/'di ltar mnyam sbyor gyi TI kar/__sangs rgyas kyi sa kun tu 'od dang /__pad+mo can dang /__yi ge'i 'khor lo tshogs chen gyi sa dang /__rdo rje 'chang dbang dang /__ye shes bla ma'i sa dang /__bde ba chen po'i sa rnams rim pa bzhin du sbyangs shing /__gcig car thob pa'o/__/zhes dang /__mtshan brjod las/__theg pa gsum gyi nges 'byung la/__/theg pa gcig gi 'bras bur gnas/__/zhes gsungs so//____//__!_ rgyud sde bzhi las/__dang po bya rgyud kyi lam rim ni/__rten gyi gang zag sor sdom dang /__byang sems kyis rgyud sbyangs pa zhig spyod pa gsum po nyams su blangs pa ste/__'di phar phyin du ma bshad cing /__phar phyin las bshad pa'i lam thams cad kyi steng /__'di lhag par brgal nas nyams su blangs pas 'bras bu 'grub pa yin pa la khyad par du 'phags so/__/de la dang po 'jug pa'i spyod pa ni/__spyi rgyud nas gsungs pa'i cho ga rigs gsum spyi'am/__so so'i dkyil 'khor du dbang bskur nas sngags kyi sdom ldan du byed pa dang /__sbyor ba'i spyod pa ni/__bdag gi de kho na nyid stong pa sngon du 'gro bar byas/__mdun du rang 'dod pa'i dkyil 'khor gyi lha tshogs spyan drangs/__de la mchod bstod sogs mtshan bcas kyi rnal 'byor nyams su len pa dang /__sgrub pa'i spyod pa ni/__bsam gtan phyi ma las gsungs pa ltar/__mthun rkyen 'dzom pa'i gnas su 'gal rkyen spangs nas/__mer gnas/__sgra gnas/__sgra mtha'i de nyid sogs mtshan med kyi ting 'dzin nyams su len pa ste/__de ltar spyod pa dang pos rten gyi gang zag dang /__phyi mas lam dngos bstan la/__gnyis po des gnas skabs kyi 'bras bu sa dang po'i bar du bsgrubs nas/__mthar thug gi 'bras bu bral smin gyi yon tan drug cu rtsa bzhis brgyan pa'i sku gsum thob par bshad do/__/gnyis pa spyod rgyud kyi lam rim ni/__rgyu rten gyi gang zag__/rkyen lam gyi rim pa/__'bras bu sangs rgyas kyi sa'o/__/dang po ni/__rigs kyi gtso bo lus ngag yid gsum phun sum tshogs pa gsum dang ldan pa'o/__/gnyis pa la phar phyin gyi lam gyis rgyud sbyangs pa dang /__de nas rgyud la 'jug pa'i tshul gnyis/__dang po ni/__thog mar 'dir 'jug pa la byang chub kyi sems dang /__phar phyin drug sogs kyis rgyud sbyangs pa/__phyi ma nges par dgos pa phyag na rdo rje dbang bskur ba'i rgyud du gsungs so/__/gnyis pa la spyod pa gsum ste/__dang po la phyi 'jug dkyil 'khor du zhugs shing dbang blangs par dam tshig dang sdom pa la gnas par bya ba dang /__nang 'jug la mtshan bcas 'jig rten dang /__mtshan med 'das pa'i rnal 'byor gnyis/__de la mtshan med ni ngo bo nyid med par rtogs pa'i ting 'dzin la sems ji srid 'dod kyi bar du gnas pa'o/__/mtshan bcas ni/__thog mar bdag gnas rnal 'byor srung ba sogs sngon du 'gro ba'i bdag gi sgo nas bdag gi de kho na stong pa nyid bsgoms te/__de'ang sgyu ma lta bu dang /__nam mkha' lta bu rim bzhin bsgoms nas rang bzhin med par gtan la phab pa'o/__/de nas lha'i skur bskyed la sngags dang phyag rgya la sogs pas byin gyis brlab/__de nas gzhi gnyis pa rang gi mdun du sangs rgyas kyi sku bskyed pa'i thugs kar sngags bkod nas ting nge 'dzin brtan par byed pa'o/__/sbyor ba'i spyod pa la'ang /__mtshan bcas phyi'i bzlas brjod yan lag bzhi dang /__nang gi bzlas brjod yan lag bzhi rnams yin la/__mtshan med lha'i sku yang btags pa tsam du shes par byas nas rang rig pa tsam la gnas nas yid bzlas byed pa'o/__/sgrub pa'i spyod pa las/__phyi'i dngos grub ral gri la sogs pa'i rdzas blangs nas rig pa 'dzin pa la sogs pa'i dngos grub sgrub pa yin la/__nang gi dngos grub ni/__nang gi 'byung bzhi'i dkyil 'khor bsgoms pas mngon shes nyer lnga dang /__zhar la mtshan bcas kyi dngos grub rnams kyang 'grub bo/__/'bras bu sangs rgyas kyi sa ni/__gang gis sgrub pa'i rgyu dang /__des grub pa'i 'bras bu gnyis/__dang po ni/__spyir rgyu'i gtso bo gsum dang /__khyad par chos kyi 'du shes brgyad kyis 'jig rten las 'das pa'i lam 'jug cing /__de nas 'jig rten 'das pa'i lam 'grub pa'i tshul dang /__dbang rtul gang zag gi bdag med rtogs pa'i dang /__dbang rnon chos kyi bdag med rtogs pa'i sgo nas 'jug pa gnyis/__dang po ni/__'jig rten pa'i sems brgya dang drug cu bskal pa gsum gyis 'das pa'i gang zag gi bdag med rtogs pa'i sems skye ba yin la/__dbang rnon ni bskal pa gnyis kyis 'jig rten las 'das pa chos kyi bdag med rtogs pa'i sems skye ba yin no/__/de nas sems de nyid kyis sa bcu pa'i bar du bgrod pa ni rgyu'o/__/gnyis pa ni/__dpa' bo chen pos ting nge 'dzin gyis bdud bzhi bcom ste khams gsum las 'das te 'og min stug po bkod par mngon byang lnga'i tshul gyis sangs rgyas par bshad do/__/gsum pa rnal 'byor gyi rgyud kyi mngon rtogs ni/__rgyu rgyud/__thabs rgyud/__'bras rgyud gsum ste/__dang po ni/__thog ma dang tha ma med pa'i byang chub kyi sems rang bzhin gyi 'od gsal ba nyid yin la/__de ni rgyun mi 'chad pas rgyud do/__/gnyis pa ni/__rang bzhin gyi dri ma bral ba de mngon du byed pa'i thabs shes kyi rnal 'byor yan lag dang bcas pa ste/__'di la slob ma'i dang /__slob dpon gyi rigs can gyi lam gnyis las/__dang po ni/__rig pa'i dbang tsam ster zhing /__de yang sbyang ba ma byas na dam tshig 'dzin mi nus pas dam tshig mi sbyin cing /__yi dam gyi sgom bzlas tsam sbyin/__sbyang ba byas pa ni/__de dang 'brel ba'i dam tshig kyang bsrungs nus pas dam tshig sbyin/__dngos grub kyi ye shes gang 'dod pa la slob tu 'jug__/gnyis pa ni/__rdo rje slob dpon du dbang bskur ba'ang bya zhing /__de nas rjes su 'brel ba'i dam tshig la bslab pa dang /__dkyil 'khor dang lha'i de kho na nyid bcu la bslab pa dang /__slob ma gzhug pa sogs slob dpon gyi las dang /__dngos grub kyi ye shes dang /__phyag rgya'i ye shes dang /__rtsa ba'i rgyud dang /__phyi ma dang /__phyi ma phyi ma'i rgyud la sogs pa'i sgrub pa'i tshul thams cad la bslab par bya ba'o/__/'bras bu'i rgyud ni/__gnas skabs su dngos grub ni ye shes ji ltar 'dod pa la sbyor zhing /__mthar thug khams gsum las 'das pa'i 'og min chen por mngon byang lnga'i cho 'phrul sku bzhi dbyer med pa'i go 'phang brnyes pa'o/__/bzhi pa bla med kyi rgyud la slob dpon gyis mngon par rtogs pa las/__dang po pha rgyud gsang 'dus la/__shrad+d+ha wa rmas rgyu thabs 'bras bu'i rgyud gsum gyi mngon rtogs dang /__slob dpon klu sgrub kyis rim pa drug gam/__lnga'am/__gnyis kyi mngon rtogs dang /__'phags pa lhas gang zag gi rim pa 'jug tshul dang bstun pa'i mngon rtogs dgu dang /__slob dpon skal bzang rdo rjes/__smin byed dbang /__grogs dam tshig__/rgyud kyi bshad pa/__byang chub 'grub pa'i rgyu byang sems/__mthar phyin pa'i thabs spyod pa ste lnga gzhi lam 'bras gsum gyis bsdus par 'chad pa dang /__slob dpon legs ldan 'byed kyis/__lam rgyud kyi mngon par rtogs pa/__smin byed dbang bzhi/__grol byed bskyed rim/__rdzogs rim rim lnga/__spyod pa gsum/__'bras bu mchog thun gnyis su bsdus te bshad pa dang /__dgra nag gi 'grel par/__dbang /__dam tshig__/bsnyen pa dang /__sgrub pa/__'bras bu dang las tshogs te gzhi lam 'bras gsum gyis bsdus pa'i mngon rtogs drug tu bshad pa sogs so/__/gnyis pa ma rgyud bde mchog la/__grub chen lU hi pas/__rnal 'byor kun spyod kyi rgyud la brten nas/__sngon du 'gro ba nyams su len pa dang gang zag gi kun spyod/__des nyams su blang ba lam gyi kun spyod des grub pa 'bras bu'i kun spyod de spyi'i mngon rtogs gsum gyi/__dang po la gang zag drug dang /__gnyis pa lam la lam gyi gtso bo sku gsum lam byed kyi mngon rtogs dang /__yan lag la dang po gnyis rdzogs par byed pa'i yan lag lnga dang /__gsum ka rdzogs byed kyi yan lag lnga ste bcu/__gsum pa 'bras bu la/__mchog dang /__thun mong dang /__phyag rgya chen po'i mngon rtogs gsum ste/__nyi shu rtsa gnyis su 'byed par gsungs pa dang /__slob dpon nag po spyod pas sbyin bya dbang bzhi/__nyams su blang bya rim gnyis grogs dang bcas pa dang /__nyams su blangs pa las byung ba'i 'bras bu ste mngon rtogs gsum du bsten pa sogs bsam gyis mi khyab la/__gsum pa thabs dang shes rab gnyis su med pa'i rgyud dpal kye rdo rje la/__gtso bor slob dpon Dom+b+hi he ru kas rgyud gsum las phye ba'i mngon rtogs sum cu rtsa brgyad dang /__slob dpon nag po pa rjes 'brangs dang bcas pas/__rgyud gsum la lam gyi dngos gzhi phar phyin dang thun mong du byed pa'i tshe mngon par rtogs pa lnga bcu rtsa bdun/__dngos gzhi rim gnyis la bzhag pa'i tshe lnga bcu rtsa drug__/yang rgyud gsum las mngon rtogs 'byed tshul gzhan lnga bcur byed pa ste gsum du bzhed pa dang /__dus kyi 'khor lor 'jug pa'i rim pa dang bstun/__'jig rten gyi khams/__nang rdo rje'i lus/__gzhan yang bcu gcig sngon du 'gro ba la/__thun mong dang mchog gi dngos grub bsgrub pa'i phyir bskyed pa'i rim pa yan lag bzhi dang /__rdzogs pa'i rim pa sbyor ba yan lag drug tu bstan pa sogs so/__/shu b+haM//___//_!