JKCL-KABUM-08-NYA-012-012

🚧 This website is under continued development. We appreciate your patience!

Previous Text Back to Volume PageNext Text

གླུ་ཡེ་ཤེས་བྱིན་འབེབས།

Wylie title	glu ye shes byin 'bebs
Location	chos kyi blo gros bka' 'bum Volume 8, sde tshan 12, Text 12, Pages 436-438 (Folios 11b4 to 12b3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. glu ye shes byin 'bebs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 436-438. Bir, H.P.: Khyentse Labrang, 2012.
Genre	Vajra Songs - rdo rje'i glu
Colophon	།ཞེས་བའང་སྨིན་གླིང་གདུང་སྲས་རིན་པོ་ཆེ་ཀུན་བཟང་དབང་རྒྱལ་གྱི་བཀའ་ཡིས་བསྐུལ་བ་བཞིན་དུ། རང་ལ་འདི་འདྲའི་རྟོགས་པའི་གདིང་ཚད་མེད་ཀྱང་འབྱུང་རུང་གི་རྟེན་སྨོན་ཙམ་དུ་འཇམ་དབྱངས་ཆོས་ཀྱི་བློ་གྲོས་པས་འོག་མིན་གཉིས་པ་སྨིན་གྲོལ་གླིང་དུ་བྲིས་པ་དགེ་ལེགས་སུ་གྱུར་ཅིག། སརྦ་དཱ་མངྒ་ལ་ཤུ་བྷཾ།།
	/zhes ba'ang smin gling gdung sras rin po che kun bzang dbang rgyal gyi bka' yis bskul ba bzhin du/__rang la 'di 'dra'i rtogs pa'i gding tshad med kyang 'byung rung gi rten smon tsam du 'jam dbyangs chos kyi blo gros pas 'og min gnyis pa smin grol gling du bris pa dge legs su gyur cig/__sarba dA mang+ga la shu b+haM//

1 Texts in this Section (sde tshan or chos tshan)

12 436-438	གླུ་ཡེ་ཤེས་བྱིན་འབེབས། glu ye shes byin 'bebs Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ གླུ་ཡེ་ཤེས་བྱིན་འབེབས་ཅེས་བྱ་བ། ཨ་ཧོ་ཡེ། མི་འགྱུར་བདེ་བ་ཆེན་པོའི་ཡེ་ཤེས་ཀྱི་ཕོ་བྲང་། །ངེས་པ་ལྔ་ལྡན་སངས་རྒྱས་པདྨ་ཡི་རྒྱལ་པོ། །གང་འདུལ་ངོ་མཚར་སྒྱུ་མའི་བཀོད་པ་ནི་གྲངས་མེད། །སྐྱབས་གཅིག་ཨོ་རྒྱན་གཏེར་བདག་གླིང་པ་དང་དབྱེར་མེད། །འགྱུར་མེད་པདྨ་བི་ཛ་སྙིང་དབུས་ནས་དྲན་བྱུང་། །ང་ཡི་གཟུང་འཛིན་འཁྲུལ་པ་གཏད་མེད་དུ་ཐོང་ཞིག། འཁོར་འདས་ཆོས་ཀུན་སྣ་ཚོགས་རང་སེམས་ཀྱི་ཆོ་འཕྲུལ། །རྨི་ལམ་བདེ་སྡུག་མྱོང་ལྟར་དོན་ལ་ནི་མ་གྲུབ། །ཨ་འཐས་བྱས་པའི་བློ་ཅན་རང་གི་རང་བཅིངས་པ། །འདི་ཀོ་བླ་མའི་དྲིན་གྱིས་འབད་མེད་དུ་གོ་བྱུང་། །སྐྱབས་གཅིག་དྲིན་ཆེན་བླ་མ་ཚངས་གནས་ཀྱི་འཁོར་ལོར། །སྙིང་དབུས་པད་དཀར་བཞད་པའི་ཟེ་འབྲུ་རུ་བསྒོམ་སྟེ། གསོལ་བཏབ་དབང་བླང་ཐུགས་ཡིད་བསྲེ་བ་ཡི་ཉམས་ལེན། །ཁ་ཙམ་མིན་པར་སྙིང་ནས་ཡང་ཡང་དུ་སྐྱོང་ན། །རྡོ་རྗེའི་ཡེ་ཤེས་སྙིང་དབུས་འབེབ་པ་ནི་ཐག་ཆོད། །མ་རིག་རྒྱུས་བསྐྱེད་ལུས་ངག་ཡིད་གསུམ་གྱི་སྒྲིབ་པས། །རིག་པ་སྐུ་གསུམ་སྙིང་པོའི་རང་ཞལ་དེ་མ་མཇལ། །ད་རེས་རང་རིག་རྒྱལ་པོ་བླ་མ་ཡི་དྲིན་གྱིས། །ཐུགས་རྗེའི་ཤུགས་ཀྱིས་མ་རིག་འཁྲུལ་འཁོར་དེ་གཏོར་ནས། །རང་གནས་ཆོས་ཉིད་ངོ་བོ་རྗེན་པ་རུ་འཆར་སོང་། །གཉིས་འཛིན་མུན་པ་སྟུག་པོ་གར་སོང་ནི་ཆ་མེད། །ཡེ་གྲོལ་ཀ་དག་ཆོས་དབྱིངས་སྟོང་ཆེན་གྱི་མཁའ་ལ། །ལྷུན་གྲུབ་འོད་གསལ་ཚོམ་བུའི་དཀྱིལ་འཁོར་འདི་བཀྲག་གསལ། །མ་བྱས་རང་བྱུང་ཐོལ་གྱིས་འཆར་བ་འདི་ཨ་ཧོ། །རང་བབ་མ་བཅོས་རང་སྣང་རིག་པ་ཡི་རྒྱན་འཁོར། །འདུ་འབྲལ་མེད་པར་སྤྱོད་པའི་རྣལ་འབྱོར་ང་སྐྱིད་དོ། །སངས་རྒྱས་ཞེས་པའི་འབྲས་བུ་སྒྲ་བོ་ཆེ་དེ་ཀོ། གཞི་རྫོགས་འཕོ་འགྱུར་བྲལ་བ་འདི་ཀ་རང་ཡིན་པར། །ངེས་ཤེས་གཏིང་ནས་སྐྱེས་པའི་མཆོད་པ་ཞིག་འབུལ་ན། །སྐུ་བཞི་ཡེ་ཤེས་ལྔ་ལྡན་བྱིན་ཆེན་དེ་ཕོབ་ཅིག། འཁོར་བ་དོང་ནས་སྤྲུགས་པའི་དངོས་གྲུབ་ཞིག་སྩོལ་ཅིག། རང་གཞན་དོན་གཉིས་འགྲུབ་པའི་བཀྲ་ཤིས་ནི་ཞུའོ། །ཞེས་བའང་སྨིན་གླིང་གདུང་སྲས་རིན་པོ་ཆེ་ཀུན་བཟང་དབང་རྒྱལ་གྱི་བཀའ་ཡིས་བསྐུལ་བ་བཞིན་དུ། རང་ལ་འདི་འདྲའི་རྟོགས་པའི་གདིང་ཚད་མེད་ཀྱང་འབྱུང་རུང་གི་རྟེན་སྨོན་ཙམ་དུ་འཇམ་དབྱངས་ཆོས་ཀྱི་བློ་གྲོས་པས་འོག་མིན་གཉིས་པ་སྨིན་གྲོལ་གླིང་དུ་བྲིས་པ་དགེ་ལེགས་སུ་གྱུར་ཅིག། སརྦ་དཱ་མངྒ་ལ་ཤུ་བྷཾ།། །།

[edit]

!_glu ye shes byin 'bebs ces bya ba/__a ho ye/__mi 'gyur bde ba chen po'i ye shes kyi pho brang /__/nges pa lnga ldan sangs rgyas pad+ma yi rgyal po/__/gang 'dul ngo mtshar sgyu ma'i bkod pa ni grangs med/__/skyabs gcig o rgyan gter bdag gling pa dang dbyer med/__/'gyur med pad+ma bi dza snying dbus nas dran byung /__/nga yi gzung 'dzin 'khrul pa gtad med du thong zhig/__'khor 'das chos kun sna tshogs rang sems kyi cho 'phrul/__/rmi lam bde sdug myong ltar don la ni ma grub/__/a 'thas byas pa'i blo can rang gi rang bcings pa/__/'di ko bla ma'i drin gyis 'bad med du go byung /__/skyabs gcig drin chen bla ma tshangs gnas kyi 'khor lor/__/snying dbus pad dkar bzhad pa'i ze 'bru ru bsgom ste/__gsol btab dbang blang thugs yid bsre ba yi nyams len/__/kha tsam min par snying nas yang yang du skyong na/__/rdo rje'i ye shes snying dbus 'beb pa ni thag chod/__/ma rig rgyus bskyed lus ngag yid gsum gyi sgrib pas/__/rig pa sku gsum snying po'i rang zhal de ma mjal/__/da res rang rig rgyal po bla ma yi drin gyis/__/thugs rje'i shugs kyis ma rig 'khrul 'khor de gtor nas/__/rang gnas chos nyid ngo bo rjen pa ru 'char song /__/gnyis 'dzin mun pa stug po gar song ni cha med/__/ye grol ka dag chos dbyings stong chen gyi mkha' la/__/lhun grub 'od gsal tshom bu'i dkyil 'khor 'di bkrag gsal/__/ma byas rang byung thol gyis 'char ba 'di a ho/__/rang bab ma bcos rang snang rig pa yi rgyan 'khor/__/'du 'bral med par spyod pa'i rnal 'byor nga skyid do/__/sangs rgyas zhes pa'i 'bras bu sgra bo che de ko/__gzhi rdzogs 'pho 'gyur bral ba 'di ka rang yin par/__/nges shes gting nas skyes pa'i mchod pa zhig 'bul na/__/sku bzhi ye shes lnga ldan byin chen de phob cig/__'khor ba dong nas sprugs pa'i dngos grub zhig stsol cig/__rang gzhan don gnyis 'grub pa'i bkra shis ni zhu'o/__/zhes ba'ang smin gling gdung sras rin po che kun bzang dbang rgyal gyi bka' yis bskul ba bzhin du/__rang la 'di 'dra'i rtogs pa'i gding tshad med kyang 'byung rung gi rten smon tsam du 'jam dbyangs chos kyi blo gros pas 'og min gnyis pa smin grol gling du bris pa dge legs su gyur cig/__sarba dA mang+ga la shu b+haM//___//