JKCL-KABUM-04-NGA-018

🚧 This website is under continued development. We appreciate your patience!

Previous Text"NGA" is not a number. Back to Volume Page"NGA" is not a number.Next Text "NGA" is not a number.

Wylie title
Location	chos kyi blo gros bka' 'bum Volume , Text 18, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"NGA" is not a number.

1 Texts in this Section (sde tshan or chos tshan)

93-99	གཏེར་ཆེན་པདྨ་གླིང་པའི་བླ་མའི་རྣལ་འབྱོར། gter chen pad+ma gling pa'i bla ma'i rnal 'byor Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"NGA" is not a number.

Tibetan Text

Wylie

[edit]

༄༅། །གཏེར་ཆེན་པདྨ་གླིང་པའི་བླ་མའི་རྣལ་འབྱོར་བཞུགས། ། ཨོཾ་སྭ་སྟི། རང་རིག་ཨོ་རྒྱན་པདྨ་གླིང་། །འདུ་འབྲལ་མེད་པར་མཆོད་བྱས་ཏེ། །དེ་ཉིད་སྒྲུབ་པའི་ཐབས་ཟབ་མོ། །བླ་མའི་རྣལ་འབྱོར་ཉུང་ངུར་དབྱེ། །དེ་ལ་འདིར་དད་པ་དང་དམ་ཚིག་ལྡན་པའི་སྒྲུབ་པ་པོ་བདེ་བའི་སྟན་ལ་འཁོད་དེ། སྐྱབས་སེམས་སྔོན་དུ་འགྲོ་བས། ཨ། གདོད་ནས་སྐྱེ་མེད་ཆོས་དབྱིངས་ཀློང་། །འགགས་མེད་རང་གསལ་ཞིང་ཁམས་ཆེར། །གནས་མེད་ཐུགས་རྗེ་སྤྲུལ་པའི་སྐུར། །རྩ་བའི་བླ་མ་པདྨ་གླིང་། །དཀར་དམར་མདངས་ལྡན་སྔགས་པའི་ཚུལ། །གསང་གོས་དཀར་པོ་འདུང་མ་དམར། །སྐུ་ཤམ་བཙག་ཁ་གཟན་སྨུག་དང་། །དབུ་ལ་པད་ཞྭ་ཁ་འབུས་གསོལ། །ཕྱག་གཡས་རྡོ་རྗེ་ཐུགས་ཀར་གཏོད། །གཡོན་པས་མཉམ་བཞག་ཐོད་ཆང་བསྣམས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །དབུ་གཙུག་གུ་རུ་བདེ་བ་ཆེ། །ཐུགས་དབུས་སྤྱན་རས་གཟིགས་དབང་ནི། །སེམས་ཉིད་ངལ་བསོ་བཞུགས་པར་གསལ། །ཞལ་གཅིག་ཕྱག་གཉིས་གཡས་མཆོག་སྦྱིན་གཡོན་སྟ་ཟུར་ནས་གདན་ལ་བརྟེན་ཞབས་ཕྱེད་སྐྱིལ། མཆན། གནས་གསུམ་རྡོ་རྗེའི་འབྲུ་གསུམ་ལས། །འོད་འཕྲོས་ཡེ་ཤེས་སྤྱན་དྲངས་གྱུར། །ཧཱུྃ། འོག་མིན་མཁའ་སྤྱོད་ཞིང་ཁམས་དང་། །པདྨ་འོད་ཀྱི་ཕོ་བྲང་སོགས། །སྐུ་གསུམ་ཞིང་ཁམས་རབ་འབྱམས་ནས། །རིག་འཛིན་བླ་མ་གཤེགས་སུ་གསོལ། །དཔའ་བོ་མཁའ་འགྲོ་འཁོར་དང་བཅས། །གདུགས་དང་རྒྱལ་མཚན་ཐིབས་སེ་ཐིབ། །རོལ་མོ་མང་པོ་དི་རི་རི། །དྲི་ཞིམ་སྤོས་ཀྱི་དུད་སྤྲིན་གཏིབ། །ཧཱུྃ་དང་ཕཊ་དང་ཕེཾ་གྱི་སྒྲས། །གནམ་ས་གང་བ་ཙམ་དུ་ནི། །སྤྱན་དྲངས་དམ་ཡེ་དབྱེར་མེད་བཞུགས། །མོས་ལྡན་བུ་ལ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །བཛྲ་ས་མ་ཡ་ཛཿཛཿཧཱུྃ་བྃ་ཧོཿཚོགས་བསགས་པ་ནི། ཧྲཱི༔ ལུས་མཆོག་ཞིང་གི་རྡུལ་སྙེད་སྤྲུལ། །རབ་གུས་དད་པས་ཕྱག་འཚལ་ལོ། །སྲིད་ཞིའི་ཕུན་ཚོགས་ཇི་སྙེད་པ། །བློ་ཡིས་བླངས་ནས་མཆོད་པར་འབུལ། །ཚེ་རབས་ཐོག་མེད་ནས་བསགས་པའི། །སྡིག་ལྟུང་སྟོབས་བཞི་ཚང་བས་བཤགས། །འཕགས་དང་སོ་སྐྱེའི་དགེ་ཚོགས་ལ། །ཕྲག་དོག་མེད་པར་རྗེས་ཡི་རང་། །རྒྱལ་བ་མྱ་ངན་འདའ་བཞེད་ལ། །མི་འདའ་བཞུགས་པར་གསོལ་བ་འདེབས། །གདུལ་བྱའི་བློ་དང་འཚམས་པ་ཡི། །ཟབ་རྒྱས་ཆོས་འཁོར་བསྐོར་བར་བསྐུལ། །དུས་གསུམ་བསགས་པའི་ལེགས་བྱས་ཀུན། །འགྲོ་རྣམས་བྱང་ཆུབ་ཐོབ་ཕྱིར་བསྔོ། །སྤྲོ་ན་མཎྜལ་འབུལ། གསོལ་འདེབས་ནི། དཀྱིལ་འཁོར་རྒྱ་མཚོའི་ཁྱབ་བདག་པད་མ་འབྱུང་། །ཡེ་ཤེས་གཅིག་ཉིད་དུ་མར་ཤར་བའི་གཟུགས། །པདྨ་གསལ་དང་པདྨ་ལས་འབྲེལ་རྩལ། །ཀློང་ཆེན་རབ་འབྱམས་ཐེག་མཆོག་བསྟན་པའི་བདག །པདྨ་གླིང་པར་སྟོན་ལ་གསོལ་བ་འདེབས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མཚན་སྔགས་ནི། ཨོཾ་ཨཱཿབཛྲ་གུ་རུ་པདྨ་དྭཱི་བ་སརྦ་སིདྡྷི་ཕ་ལ་ཧཱུྃ། ཞེས་བཟླ། སྤྱི་བོའི་བླ་མ་བདེ་བ་ཆེའི། །སྐུ་ལས་བདུད་རྩིའི་རྒྱུན་བབས་པ། །བླ་མའི་སྐུ་ཡི་དབྱིབས་བརྒྱུད་ནས། །རང་གི་སྤྱི་བོ་ནས་བབས་པས། །ལུས་གང་སྒྲིབ་དག་དབང་བཞི་ཐོབ། །སྐུ་བཞི་མངོན་དུ་གྱུར་པ་དང་། །བླ་མ་འོད་ཞུ་རང་ལ་ཐིམ། །ཐུགས་ཡིད་བསྲེས་ལ་མཉམ་པར་བཞག །ཡི་དམ་གྱི་བཟླས་པ་བྱ་ན། རང་ཉིད་བླ་མར་གསལ་བ་དང་། །སྤྱི་བོར་བླ་མ་བདེ་བ་ཆེ། །སྙིང་གའི་ཐུགས་རྗེ་ཆེན་པོ་ཡི། །ཐུགས་དབུས་ཟླ་སྟེང་ཧྲཱིཿཡིས་མཚན། །སྔགས་ཀྱིས་བསྐོར་ལས་འོད་ཟེར་འཕྲོས། །འཕགས་མཆོད་སྒྲིབ་སྦྱངས་སྣང་གྲགས་རིག །རིག་འཛིན་བླ་མའི་འཁོར་ལོར་རྫོགས། སྤྱི་བོའི་བླ་མ་ལས་བདུད་རྩི་འབེབས་དམིགས་དང་བཅས། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། སྙིང་གའི་ཡི་དམ་ལ་དམིགས་ནས། ཨོཾ་མ་ཎི་པདྨེ་ཧཱུྃ་ཧྲཱིཿཅི་ནུས་བཟླས་མཐར། ཡེ་ཤེས་ལྷ་ཚོགས་སོགས་ཀྱི་སྟོང་ཚིག་མཆོད་བསྟོད་བྱའོ། ། ༈ ། ཚོགས་མཆོད་འབུལ་བར་སྤྲོ་ན། དམ་ཚིག་གི་རྫས་ཅི་འབྱོར་པ་བཤམས་ལ། ཨཱཿགཟུང་བ་རྣམ་དག་ཀ་པ་ལ། །འཛིན་པ་རང་གྲོལ་དམ་ཚིག་རྫས། །རྃ་ཡྃ་ཁྃ་གྱིས་སྦྱོང་བ་དང་། །འབྲུ་གསུམ་འོད་ཀྱིས་བདུད་རྩིར་གྱུར། ཨོཾ་ཨཱཿཧཱུྃ། ལན་གསུམ་བརྗོད། ཧྲཱིཿསྐུ་གསུམ་ཞིང་ཁམས་རབ་འབྱམས་ནས། །བླ་མ་ཡི་དམ་མཁའ་འགྲོའི་ཚོགས། །འདིར་གཤེགས་ཚོགས་ཀྱི་འདུ་བར་གཤེགས། །དམ་ཚིག་རྫས་ལ་བྱིན་ཆེན་ཕོབས། །སྣང་སྲིད་བཅུད་བསྡུས་དངོས་གྲུབ་དབྱིག །འཛད་པ་མེད་པའི་གཏེར་དུ་གྱུར། །བཛྲ་ས་མ་ཡ་ཛཿཛཿཧཱུྃ་བྃ་ཧོཿཧོཿབཟའ་བཅའ་བཏུང་བ་ཕྱི་ཡི་ཚོགས། །འདོད་ཡོན་ལྔ་ལྡན་ནང་གི་ཚོགས། །འབར་འཛག་སྙོམས་འཇུག་གསང་བའི་ཚོགས། །དགྱེས་མཉམ་ཆེན་པོའི་མཆོད་པར་འབུལ། །དམ་ཚིག་ཉམས་ཆགས་མཐོལ་ལོ་བཤགས། །ཕྱི་ནང་གསང་བའི་འཁྲུལ་རྟོག་སྒྲོལ། །ཡེ་ཤེས་ཀློང་ལྔའི་དབྱིངས་སུ་སྟོབས། །མཆོག་དང་ཐུན་མོང་དངོས་གྲུབ་སྩོལ། ཧཱུྃ་ཧྲཱིཿཐུགས་དམ་བསྐང་བའི་རྫས་མཆོག་ནི། །ཀུན་བཟང་བདེ་སྟོང་རོལ་མོ་ལས། །བྱུང་བའི་མཆོད་པའི་སྤྲིན་ཕུང་ཆེ། །སྲིད་ཞིའི་ཁམས་ཀྱི་དག་པའི་རྫས། །ཅིར་ཡང་འཆར་ཞིང་ཅིར་ཡང་འཕྲུལ། །བླ་མ་རིག་འཛིན་དཀྱིལ་འཁོར་ནི། །ཡུལ་དང་དབང་པོ་གཉིས་མེད་སྟོབས། །བདེ་ཆེན་བདུད་རྩིས་རབ་མྱོས་ཏེ། །རྗེས་ཆགས་ཡེ་ཤེས་སྒྱུ་མའི་འཕྲུལ། །ནམ་མཁའ་གང་བར་འབར་འཕྲོ་ཡི། །སྣོད་བཅུད་ཡེ་དག་དཀྱིལ་འཁོར་དུ། །ལྷུན་རྫོགས་བདེ་ཆེན་མཆོག་དངོས་གྲུབ། །ཚེ་འདི་ཉིད་ལ་འགྲུབ་གྱུར་ཅིག །དེ་ནས་ཚོགས་ལ་རོལ་ཞིང་ལྷག་གཏོར་ནི། ཧྲཱིཿཕེཾ། སྔོན་ཚེ་གྲུབ་པའི་ཧེ་རུ་ཀའི། །དཔལ་གྱི་ཕམ་ཕབ་ལ་དབང་ཚོགས། །ལྷག་གཏོར་བཞེས་ལ་རླུང་སེམས་ཀྱི། །སྣང་ཆ་རིག་དབྱིངས་སྒྲོལ་བར་མཛོད། ཨུཥྩི་ཊ་བ་ལིཾ་ཏ་ཁཱ་ཧི། ཅེས་ཕུལ་ལ། རིག་འཛིན་བླ་མའི་དཀྱིལ་འཁོར་དུ། །ཚོགས་ཀྱི་མཆོད་པ་ཕུལ༴ སོགས་བརྗོད། གཏང་རག་མཆོད་བསྟོད་ནོངས་བཤགས་ནི། ཧཱུྃ་ཧྲཱིཿརིག་འཛིན་བླ་མའི་ལྷ་ཚོགས་མཆོད། །ཡོན་ཏན་རྗེས་དྲན་གླུ་ཡིས་བསྟོད། །སྐུ་གསུང་ཐུགས་ཀྱི་དངོས་གྲུབ་སྩོལ། །འགའ་འཁྲུལ་ཉམས་ཆགས་མཐོལ་ལོ་བཤགས། ཡིག་བརྒྱ་བརྗོད། རྟེན་ཡོད་ན་བརྟན་བཞུགས་བྱ། མཐར། སྣོད་བཅུད་འོད་ཞུ་རང་ལ་ཐིམ། །རང་ཡང་མི་དམིགས་དབྱིངས་སུ་ཐིམ། །སླར་ཡང་བླ་མའི་སྐུར་གསལ་བའི། །གནས་གསུམ་ཡི་གེས་སྲུང་བར་གྱུར། ཨོཾ་བཛྲ་ཀཱ་ཝཱ་ཙི་རཀྵ་ཧཾ། །དགེ་བ་འདི་ཡིས༴ སོགས་བསྔོ་སྨོན་བྱས་ཏེ་རྗེས་སྤྱོད་ལ་འཇུག་གོ། ཅེས་པའང་གཡག་ཟེ་བླ་མ་འགྱུར་གྲགས་ནས་རྟེན་བཅས་བསྐུལ་ངོར་ཆོས་ཀྱི་བློ་གྲོས་པས་དབང་ཆེན་སྤྲེལ་ལོ་སྤྲེལ་ཟླའི་ཚེས་ལ་སྒྲུབ་མཚོ་པདྨ་གླིང་ནས་བྲིས་ཏེ་ལྷ་ལུང་ཆོས་གྲྭ་ཆེན་པོར་གྲུབ་པར་བགྱིས་པའོ། །འདི་དགེས་མ་གྱུར་སེམས་ཅན་ཀུན། །ལས་ངན་སྡིག་སྒྲིབ་ཀུན་བྱང་ནས། པདྨ་འོད་ཀྱི་གྲོང་ཁྱེར་དུ། །གུ་རུ་ཡབ་སྲས་དྲུང་འཁོད་དེ། །གསུང་གི་བདུད་རྩིས་འཚོ་བ་དང་། །རིག་འཛིན་རྣམ་བཞིའི་ལམ་བགྲོད་དེ། །འཁོར་བ་དོང་ནས་སྤྲུགས་ནུས་ཤོག །སརྦ་མངྒ་ལཾ།། །།

[edit]

@#/__/gter chen pad+ma gling pa'i bla ma'i rnal 'byor bzhugs/__/ oM swa sti/__rang rig o rgyan pad+ma gling /__/'du 'bral med par mchod byas te/__/de nyid sgrub pa'i thabs zab mo/__/bla ma'i rnal 'byor nyung ngur dbye/__/de la 'dir dad pa dang dam tshig ldan pa'i sgrub pa po bde ba'i stan la 'khod de/__skyabs sems sngon du 'gro bas/__a/__gdod nas skye med chos dbyings klong /__/'gags med rang gsal zhing khams cher/__/gnas med thugs rje sprul pa'i skur/__/rtsa ba'i bla ma pad+ma gling /__/dkar dmar mdangs ldan sngags pa'i tshul/__/gsang gos dkar po 'dung ma dmar/__/sku sham btsag kha gzan smug dang /__/dbu la pad zhwa kha 'bus gsol/__/phyag g.yas rdo rje thugs kar gtod/__/g.yon pas mnyam bzhag thod chang bsnams/__/zhabs gnyis rdo rje'i skyil krung bzhugs/__/dbu gtsug gu ru bde ba che/__/thugs dbus spyan ras gzigs dbang ni/__/sems nyid ngal bso bzhugs par gsal/__/zhal gcig phyag gnyis g.yas mchog sbyin g.yon sta zur nas gdan la brten zhabs phyed skyil/__mchan/__gnas gsum rdo rje'i 'bru gsum las/__/'od 'phros ye shes spyan drangs gyur/__/hU~M/__'og min mkha' spyod zhing khams dang /__/pad+ma 'od kyi pho brang sogs/__/sku gsum zhing khams rab 'byams nas/__/rig 'dzin bla ma gshegs su gsol/__/dpa' bo mkha' 'gro 'khor dang bcas/__/gdugs dang rgyal mtshan thibs se thib/__/rol mo mang po di ri ri/__/dri zhim spos kyi dud sprin gtib/__/hU~M dang phaT dang pheM gyi sgras/__/gnam sa gang ba tsam du ni/__/spyan drangs dam ye dbyer med bzhugs/__/mos ldan bu la byin gyis rlobs/__/mchog dang thun mong dngos grub stsol/__/badz+ra sa ma ya dzaHdzaHhU~M ba~M hoHtshogs bsags pa ni/__hrI:__lus mchog zhing gi rdul snyed sprul/__/rab gus dad pas phyag 'tshal lo/__/srid zhi'i phun tshogs ji snyed pa/__/blo yis blangs nas mchod par 'bul/__/tshe rabs thog med nas bsags pa'i/__/sdig ltung stobs bzhi tshang bas bshags/__/'phags dang so skye'i dge tshogs la/__/phrag dog med par rjes yi rang /__/rgyal ba mya ngan 'da' bzhed la/__/mi 'da' bzhugs par gsol ba 'debs/__/gdul bya'i blo dang 'tshams pa yi/__/zab rgyas chos 'khor bskor bar bskul/__/dus gsum bsags pa'i legs byas kun/__/'gro rnams byang chub thob phyir bsngo/__/spro na maN+Dal 'bul/__gsol 'debs ni/__dkyil 'khor rgya mtsho'i khyab bdag pad ma 'byung /__/ye shes gcig nyid du mar shar ba'i gzugs/__/pad+ma gsal dang pad+ma las 'brel rtsal/__/klong chen rab 'byams theg mchog bstan pa'i bdag__/pad+ma gling par ston la gsol ba 'debs/__/mchog dang thun mong dngos grub stsal du gsol/__/mtshan sngags ni/__oM AHbadz+ra gu ru pad+ma dwI ba sarba sid+d+hi pha la hU~M/__zhes bzla/__spyi bo'i bla ma bde ba che'i/__/sku las bdud rtsi'i rgyun babs pa/__/bla ma'i sku yi dbyibs brgyud nas/__/rang gi spyi bo nas babs pas/__/lus gang sgrib dag dbang bzhi thob/__/sku bzhi mngon du gyur pa dang /__/bla ma 'od zhu rang la thim/__/thugs yid bsres la mnyam par bzhag__/yi dam gyi bzlas pa bya na/__rang nyid bla mar gsal ba dang /__/spyi bor bla ma bde ba che/__/snying ga'i thugs rje chen po yi/__/thugs dbus zla steng hrIHyis mtshan/__/sngags kyis bskor las 'od zer 'phros/__/'phags mchod sgrib sbyangs snang grags rig__/rig 'dzin bla ma'i 'khor lor rdzogs/__spyi bo'i bla ma las bdud rtsi 'bebs dmigs dang bcas/__oM AHhU~M badz+ra gu ru pad+ma sid+d+hi hU~M/__snying ga'i yi dam la dmigs nas/__oM ma Ni pad+me hU~M hrIHci nus bzlas mthar/__ye shes lha tshogs sogs kyi stong tshig mchod bstod bya'o/__/_!__/__tshogs mchod 'bul bar spro na/__dam tshig gi rdzas ci 'byor pa bshams la/__AHgzung ba rnam dag ka pa la/__/'dzin pa rang grol dam tshig rdzas/__/ra~M ya~M kha~M gyis sbyong ba dang /__/'bru gsum 'od kyis bdud rtsir gyur/__oM AHhU~M/__lan gsum brjod/__hrIHsku gsum zhing khams rab 'byams nas/__/bla ma yi dam mkha' 'gro'i tshogs/__/'dir gshegs tshogs kyi 'du bar gshegs/__/dam tshig rdzas la byin chen phobs/__/snang srid bcud bsdus dngos grub dbyig__/'dzad pa med pa'i gter du gyur/__/badz+ra sa ma ya dzaHdzaHhU~M ba~M hoHhoHbza' bca' btung ba phyi yi tshogs/__/'dod yon lnga ldan nang gi tshogs/__/'bar 'dzag snyoms 'jug gsang ba'i tshogs/__/dgyes mnyam chen po'i mchod par 'bul/__/dam tshig nyams chags mthol lo bshags/__/phyi nang gsang ba'i 'khrul rtog sgrol/__/ye shes klong lnga'i dbyings su stobs/__/mchog dang thun mong dngos grub stsol/__hU~M hrIHthugs dam bskang ba'i rdzas mchog ni/__/kun bzang bde stong rol mo las/__/byung ba'i mchod pa'i sprin phung che/__/srid zhi'i khams kyi dag pa'i rdzas/__/cir yang 'char zhing cir yang 'phrul/__/bla ma rig 'dzin dkyil 'khor ni/__/yul dang dbang po gnyis med stobs/__/bde chen bdud rtsis rab myos te/__/rjes chags ye shes sgyu ma'i 'phrul/__/nam mkha' gang bar 'bar 'phro yi/__/snod bcud ye dag dkyil 'khor du/__/lhun rdzogs bde chen mchog dngos grub/__/tshe 'di nyid la 'grub gyur cig__/de nas tshogs la rol zhing lhag gtor ni/__hrIHpheM/__sngon tshe grub pa'i he ru ka'i/__/dpal gyi pham phab la dbang tshogs/__/lhag gtor bzhes la rlung sems kyi/__/snang cha rig dbyings sgrol bar mdzod/__uSh+tsi Ta ba liM ta khA hi/__ces phul la/__rig 'dzin bla ma'i dkyil 'khor du/__/tshogs kyi mchod pa phul=__sogs brjod/__gtang rag mchod bstod nongs bshags ni/__hU~M hrIHrig 'dzin bla ma'i lha tshogs mchod/__/yon tan rjes dran glu yis bstod/__/sku gsung thugs kyi dngos grub stsol/__/'ga' 'khrul nyams chags mthol lo bshags/__yig brgya brjod/__rten yod na brtan bzhugs bya/__mthar/__snod bcud 'od zhu rang la thim/__/rang yang mi dmigs dbyings su thim/__/slar yang bla ma'i skur gsal ba'i/__/gnas gsum yi ges srung bar gyur/__oM badz+ra kA wA tsi rak+Sha haM/__/dge ba 'di yis=__sogs bsngo smon byas te rjes spyod la 'jug go/__ces pa'ang g.yag ze bla ma 'gyur grags nas rten bcas bskul ngor chos kyi blo gros pas dbang chen sprel lo sprel zla'i tshes la sgrub mtsho pad+ma gling nas bris te lha lung chos grwa chen por grub par bgyis pa'o/__/'di dges ma gyur sems can kun/__/las ngan sdig sgrib kun byang nas/__pad+ma 'od kyi grong khyer du/__/gu ru yab sras drung 'khod de/__/gsung gi bdud rtsis 'tsho ba dang /__/rig 'dzin rnam bzhi'i lam bgrod de/__/'khor ba dong nas sprugs nus shog__/sarba mang+ga laM//____//